sophie23's Profile

舖頭瀰漫文青氛圍，完全唔似係賣滷味食物。套餐以托盤上枱夠企理，應該花過心思選用碗碟，色調跟食品顏色相配，悅目喔，整體感覺似去咗台北日式小食店。滷水汁香而不過鹹，鵝有鵝肉的獨特香味，肉實夠入味。擔心老友記食唔到鵝，叫埋牛展併豆腐做後備，結果佢兩様通殺。鵝件大細適中，有啲係全肉，有啲帶骨，啱晒佢唔使吓吓啖啖肉。白飯份量足，略嫌冇飯香同較軟身；手工湯麵軟硬度適中，清湯入口唔口渴。老友記加麻辣醬再倒入點鵝食的醋汁，自製酸辣味。三小碟中點食魚仔同青瓜，前者得兩票，青瓜輸在冇咗爽脆口感。單點滷鵝腎同話梅花雕雞軟骨。厚身鵝腎帶紅心賣相靚，入味唔韌，送酒一流。花雕汁鹹咗啲，亦食唔到話海香，老友記食咗幾粒雞軟骨就放棄，激死禾。…Read More

雞脾當道之時，雞槌仔更啱心水，冇嗰種要趁熱一次過食晒成隻脾的壓力。四件燒汁雞槌、一份蟹籽芝麻醬冷麵加一罐飲品睇落細細份，食吓食吓都飽肚。好耐冇飲清涼爽，推介自行加冰減甜。留意小店齋做外賣，冇堂食，啱晒依家齊齊抗疫買返屋企開餐。麵條爽口夠涼，芝麻醬份量剛好，條條麵都掛到醬，唔係醬浸麵，喜歡；雞槌仔大細平均，冇煮過龍梅梅爛爛，賣相吸引。不過呢，雞肉淡口，單靠燒汁加味，味道唔夠豐富喔。特價時段餐價減五蚊，有借口試其他餐。…Read More

堂食漸變成奢侈活動。坐好後，店員派發每人一個存放口罩紙信封，同埋自助落單QR Code，呢個自助落單安排真心讚，希望疫情過後會繼續咁做。落好單，即用枱面支酒精搓手液清潔，安心等食。大包圍點咗三個炸點加三個定食。炸南瓜、炸番薯、炸魷魚一律唔油膩，冇炸到乾爭爭，亦冇過鹹。魷魚唔係橡筋咁韌，入口大細切得啱啱好，大人細路都咬得開。蟹肉丼係迷你版，但配埋跟餐刺身壽司係夠飽架。蟹肉可口，刺身新鮮，略嫌碗飯唔夠熱，只係微暖。壽司主要用火炙處理，食材比壽司烏冬定食的高級。壽司烏冬定食，正正常常咁喇，用昆布豉油配食壽司，味道唔錯。飯腳將照燒雞扒定食隻温泉蛋拌均熱飯，睇住澎湃的蛋黃汁染黃白飯，竟然有種治療感。雞扒嘛，呈現打風後的混亂狀態，可以再煎老啲，達至皮脆肉略焦的效果會更理想。…Read More

門口餐牌好大塊，但係上面啲字細細粒，舖內餐牌一樣字多字型細，花咗相當時間研讀。船皇麵同大碗麵啲餸差唔多，船皇賣貴啲多咗雞翼、豬潤、豬紅之類咁喇。湯底望落好油，入口又唔覺，滷水味比預期的輕柔。自助調味料中有一款秘製酸辣汁，加落麵係好食啲，不過真係辣，落少少試吓先就最穩陣。凍飲用大口碗連飲管上枱，如果預早知道，一定會叫店員走飲管。…Read More

活在亂世，食咗先算。去茶樓開飯，快來快去。下午茶限定炸韭菜餃，外表粗糙，勝在饀多香脆；燒鵝米啲鵝，件數多，啖啖肉夠入味，飯腳食唔停口。另一個叫咗叉燒飯，嫌叉燒唔係半肥瘦，講明唔想食柴，死死氣咬咗啖之後話夠腍喎，結果成碗食晒。燒腩仔塊皮卜卜脆，可惜瘦蜢蜢。鳳爪排骨飯細細盅，排骨冇腥膻味，係至愛的軟骨版，單食佢唔夠飽，叫多幾樣點心。蝦餃皮薄煙韌，入面有蝦有肉，好耐冇食到有肉的蝦餃喇。菜乾排骨粥料多夠綿；芋頭糕多芋粒，食完唔口喝；紫米露甜度剛好夠大碗，啱晒幾個人分嚟食。唯一食剩係煎魚餅。…Read More

睇餐牌，蔥油豬扒飯同梅菜扣肉飯都想食，咁就一人叫一個。兩個飯賣相都靚，最窩心係豬扒飯啲菜心係切段上，方便食，大讚。出街食飯咬唔開條菜，有時真係超尷尬。飯，水份剛好，粒粒分明，份量夠飽；豬扒大大塊，醃得入味，仲係最喜歡的連骨扒，可惜肉質硬喔。嗰飯冇咩汁，靠蔥油變濕潤，呢個時候撈啲梅菜扣肉落去就啱晒。甜梅菜入口無沙，扣肉少肥多瘦，夠腍夠味，碟底冇一氹油，仲有青菜，係健康版扣肉飯；白飯用碗上，比碟頭豬扒飯的飯熱啲。 扣肉餐有兩票，贏。…Read More

廿蚊食到一個豬肉飯連玄米茶／肥仔水的茶餐，真係以為睇錯餐牌，只求冇怪味唔係食膠已收貨。最終呢，飯同豬肉都比老牌連鎖店好味，珍珠米有少少Q，豬肉冇咁瘦，亦鍾意佢少汁。牛肉米粉嗰湯頭鹹道剛剛好，牛肉冇嗰間咁肥，亦冇咁甜。加錢試吓辣酥雞試，竟然唔辣亦唔酥，建議將啲錢撥去買碗正正經經的雞扒飯。泡菜雞扒飯塊雞扒皮薄香脆，咬落有肉汁，有驚喜。可惜唔喺韓式泡菜，似麻油豉油撈菜，菜量亦少，點解世事總係冇兩存其美呢。…Read More

一份午餐包括四樣嘢：即炒小菜、熱辣辣白飯、唔係味精加水例湯（賣晒就冇）、有茶香的奶茶。食晒真係超飽，之後醒目帶埋飯盒嚟。試過椒鹽豬扒（好夠味，可惜豬扒一啲硬，一啲稔）、味菜銀芽炒牛肉（酸甜惹味，牛肉唔係發粉牌）、芹菜蘿白炒豬肉（勁多蘿白，芹菜得幾條實在太少喔）。例湯唔係水還水、渣還渣，夠熱，飲完唔口渴，少鹽更加好。如果飲開奶茶少奶的，唔使再特登叫少奶。呢個餐有個特別名稱叫開心餐，佢確實做得到。有選擇困難唔知食咩好，店員冇催快落單，亦冇催交枱。試埋早餐，牛油厚多士夠脆夠熱有麵包香，米線多餸仲有條菜咁健康，已經成為自己的快樂早餐。…Read More

過嚟呢頭睇韓國食材，順便食埋晏。舖頭簡潔明亮，寫完紙仔落單，飲啖茶，望吓街，hea 住等食。麵豉大醬湯，餐牌上用英文寫成 Miso Stew with Crab and Clam。現實版係見唔到有蟹，主要食材係蜆、實豆腐及疑似番薯。湯好熱，滾住上枱，舖頭的強勁冷氣幫手將佢快速降温，入口比較鹹。韓式湯麵即係齋麵，麵身幼滑，口感唔錯，多啲紫菜更好。懷念喺首爾的舖頭仔食麵，成盒紫菜碎放喺枱面任加任食。呢碗麵份量大，好夠飽，清湯底味精算輕手，略嫌鹹咗啲。枱上最好味的，係幾款小食。泡菜有蒜香，夠辣又爽脆，食落新鮮，係最喜歡的韓式原味，由於份量少，要同老友搶食。以為白蘿蔔係酸的，點知係鹹架，好有趣，食到蘿蔔的清香；用青豆做小食唔常見，遇到會特別開心。…Read More

長老想食鐵板餐，要求坐得舒服，冷氣唔好太大吹親佢。餐廳職員安排我哋坐近門口的卡座，令長老相當滿意，我就勁鍾意個懷舊feel。長老睇到餐牌有豬手，即刻放棄鐵板餐。叫咗個漢堡扒蒜汁豬手配薯菜，萬一豬手太硬食唔到，仲有漢堡扒替代。午餐跟羅宋湯、餐包同熱飲。湯夠熱、料多、香濃，唔係水汪汪；餐包有熱感，搽牛油落去冇耐就溶晒入包。食晒呢兩樣嘢，已經飽飽地。豬手出場時，長者第一時間食炸薯條，讚夠脆，不過灑鹽唔平均，一條鹹，一條淡。至於豬手，好夠腍同入味，長老全部食晒。漢堡扒有種手搓扒的風味，可惜煎燶咗少少，但無損味道，多啲肉汁會更好。另外叫咗焗雞扒飯，用炒飯底，雞扒正常大細；醬汁有番茄、芝士、蘑菰、西芹、甘筍、洋蔥，用料比大快活的豐富得多（當然價錢有差距）。同長老分享啲飯，佢自己加啲豬手汁落去，食晒成碗。奶茶有茶香，喜歡。隔離枱食客都係老友記長，佢食唔晒個餐，自備外賣盒帶走。店員對長者都好體貼，不時問使唔使加水、幫手清走碗碟，服務周到。長老聽到鄰枱傳出鐵板餐獨有的淋汁咋咋聲，約定下次嚟食鐵板餐。…Read More

被雞脾紅豆冰吸引住，企定定望吓有咩茶餐，23 蚊有碗輕量扎肉肉丸河連熱飲，冇加一，糧尾時期首選。話明係輕量，預咗碗粉係細份量，見到實物後覺得 OK 喎，食晒佢飲埋杯咖啡，飽。河粉，夠幼滑；湯，味精少，唔死鹹；扎肉同肉丸都爽口，肉丸一口一粒，食落冇嗰種化學合成的味道。鍾意食辣，點咗少少是拉差辣椒醬，肉丸個味唔同晒，仲有肥身芽菜做配菜，食得好高興。咖啡大大杯，奶味濃，飲唔晒，唔係茶記常見的即溶粉溝水。呢間屋邨食肆地方夠晒大，坐得非常舒服，遇上服務到位的女店員，呢個茶餐變成超值選。…Read More

去以過唔同分店堂食焗豬扒飯，每次個飯都係用即棄鍚紙餐盒載住，要揭起塊紙蓋先見到盒飯靚唔靚，同外賣返公司食冇咩分別。以為身處舖頭食外賣成為常態喇，今日喺度食的焗豬，竟然有焗。兜。載。住。未食先開心，咁至係堂食吖嘛。雖然叫焗飯，但丁點燶的焗痕都冇，唔好諗多咗個飯有芝士。豬扒係最鍾意的有骨扒，腍身易砌，醃得入味，正常 size；炒飯底，飯粒軟硬適中，唔係乾爭爭，入面的炒蛋份量係歷來之冠；番茄汁走清新路線，夾埋豬扒食互補長短，如果加返兩三粒車厘茄喺面，成個飯會更出色。食埋由椰菜、豆角、紅蘿蔔、菰組成的蔬菜碗，堅飽。望住空空如也的焗兜，希望同你後會有期。…Read More

收工後想食件餅，上嚟試吓千層蛋糕。睇完餐牌，索性叫多兩個最平的意粉餐，價錢實在吸引嘛，凍飲唔使加錢、有雪糕，仲冇加一添。肉醬意粉灑咗好多芝士，肉醬份量亦多，食落出奇地淡口，唔係預期的香濃。卡邦尼温泉蛋意粉嗰忌廉汁，貫徹清淡風格，但有煙肉同蛋黃汁幫手加味，整體味道好過肉醬意。如果將煙肉煎耐啲變香脆，相信味道仲好。主角千層蛋糕，試咗綠茶味同焙茶味，結果焙茶味勝出！佢冇綠茶咁甜，焙茶嗰朕獨特香味唔係人人接受到，呢件餅的茶味恰到好處，唔會濃到嚇走你，亦非淡而無味，食晒唔覺甜到漏，絕對能夠偷走焙茶控的心。起身去找數，先覺肚皮脹晒。門口餅櫃入面，蛋糕所剩無幾，確實名不虛傳，下次一定要試其他口味。客多，店員幾忙都保持禮貌，服務勤快，樂意將凍飲走飲管，讚。…Read More

生活總有唔如意，食好嘢善待自己，打打氣，兼幫小店撑落去。飲早茶唔知有咩揀，直接去檔口了解吓，大叔二話不說揭開蒸籠蓋任睇，除咗爪骨飯、骨飯，仲有最後一盅咸魚肉餅，即時搶走佢，加多碟山竹牛肉。咸魚係至愛的梅香，有少少骨，咬落即溶，唔死咸，同少肥肉餅最夾。餸的份量剛好，夠送飯。飯面的薑片外形雖然粗糙，勝在夠辣、薑味濃，豐富咗成個飯的味道，多得佢，個飯更滋味。最重視的白飯，軟硬適中，粒粒分明，唔係冇味碎米。睇佢細細盅猜疑唔夠飽，食食吓先驚會食唔晒碟牛肉。呢盅飯值得一啖一啖咁細味，出色過上次喺好彩食的同款飯。茶錢六蚊一位，高過預期。頭壺茶用嚟食碗筷，加水後等一段時間先飲用，沖出嚟的香片冇清香撲鼻，勝在入口甘香醇厚。…Read More

呢間小店冇靚裝修，地方淺窄，吸引之處在於由泰國人經營。對泰國人主理的食肆有信心，過嚟叫咗三個菜試吓。青木瓜沙律夠清涼，辣度有得揀，食得辣的，建議由中辣起跳，個汁甜酸度適中，非常惹味，勁鍾意青檸的清新香味。乾炒海鮮河有鑊氣，碟底冇一氹油，河粉入口煙韌，略嫌海鮮配料少咗啲，但不失為一碟好炒河。軟殼蟹配黃咖喱蛋汁喺小店名物，炸醬薄身脆口，隻蟹唔係得個殼，有肉地喎；黃咖喱汁零辣度，怕辣族唔使擔心得個睇字；汁內有蔬菜，冇加香草，屬低濃味食物，最啱撈白飯食。埋尾的泰式奶茶，嗰朕飄出嚟的泰茶獨特香氣，呃唔到人，入口餘香強勁，好茶！舖頭只得廚師同店員兩個人，百忙之中堅持好好招呼，禮貌周周。作為食客，無論落單、等上菜、埋單，咩都要有等待的心理準備喔。食客多數係街坊，同店員有講有笑，呢種氣氛真係小店至有。…Read More