富東閣海鮮酒家 (Closed)

活在亂世，食咗先算。去茶樓開飯，快來快去。下午茶限定炸韭菜餃，外表粗糙，勝在饀多香脆；燒鵝米啲鵝，件數多，啖啖肉夠入味，飯腳食唔停口。另一個叫咗叉燒飯，嫌叉燒唔係半肥瘦，講明唔想食柴，死死氣咬咗啖之後話夠腍喎，結果成碗食晒。燒腩仔塊皮卜卜脆，可惜瘦蜢蜢。鳳爪排骨飯細細盅，排骨冇腥膻味，係至愛的軟骨版，單食佢唔夠飽，叫多幾樣點心。蝦餃皮薄煙韌，入面有蝦有肉，好耐冇食到有肉的蝦餃喇。菜乾排骨粥料多夠綿；芋頭糕多芋粒，食完唔口喝；紫米露甜度剛好夠大碗，啱晒幾個人分嚟食。唯一食剩係煎魚餅。