bayee_kiddman's Profile

成家人食下午茶，每人叫咗一個餐， 首先上枱嘅係泡菜拉麵，不過不失啦！ 之後到原條鰻魚定食，條鰻魚有一個tray咁長，即時覺得好抵，鰻魚好入味，初初以為會係超級市場嗰啲水準， 冇諗過幾十蚊都食到咁嘅水平，完全係高性價比！ 再上檯就係吉列豬扒定食，個吉列豬扒大過隻碟、大過塊面，而且唔油膩、超脆、少少 juicy，亦都係另一性價比高嘅推介！ 最後係青魚定食，都係不過不失啦！反而三個定食跟餐嘅茶碗蒸非常出色， 絕對覺得可以自費多叫一個！…Read More

新搬咗嚟呢一區，係要周圍試下啲地道嘢啦，誤打誤撞之後入咗呢間嘢，排檔通常畀人感覺污糟邋遢，但見到佢枱櫈都好乾淨，筷孓亦都冇黐笠笠，所以可以一試！門口嘅食物相好吸引，第一眼就畀個鵝腸併肥牛麵吸引咗喇，入到去再睇睇見到手打墨魚丸，梗係唔可以放過喇，所以最後叫左手打墨魚丸麵拼鵝腸、我個妹就食牛筋麵！首先講下個墨魚丸，唔係出面嗰啲粉球，真係食到有墨魚丸嘅香味，係彈牙嗰種，麵嘅份量比較少，但口感ok...今日要推介嘅重點係個鵝腸，真係超級好味！ 佢洗得好乾淨，完全冇腥味，而且白灼嘅時間剛剛好，非常爽口，$12 超值！ 好味嘅程度係我過咗兩日忍唔住返去食多次！ 寫呢篇食評之前我都喺度諗，會唔會推介完之後個個仆度咁去食我冇得食呢？ 但好嘢係要share下嘅。。。多啲支持小店啦，香港人！…Read More

四個人嚟開餐，如果叫一隻燒鵝肯定食唔曬，所以只係叫咗半隻，另外仲有蜆介鯪魚球、 五福拼盤、上湯浸娃娃菜。講真，香港任何一間即燒嘅燒鵝都好好食，咁點解要特登揸車嚟深井咁遠食？ 首先，呢度啲皮真係好脆，第二，皮同肉之間白色嗰層肥膏佢哋會好窩心咁幫你搣咗，第三，呢度個梅子醬啲味同出面有啲唔同，第四，呢度除咗燒鵝好食，佢啲小菜其實唔差！ 平時嚟會叫醉鵝肝、醉鴨舌、老火湯，今次就試咗蜆蚧鯪魚球！ 喺外面食嘅鯪魚球，完全唔係一個球體，但呢一度佢個外型做得好好， 其次，其他食點用嘅係超級市場嗰啲蜆蚧汁， 呢度個蜆蚧汁加咗啲蔥、椒絲之類，份外惹味！不過香港人咁市儈，講到尾最緊要係錢，香港人食飯鍾意帶紅白酒，呢度只係收30蚊開瓶費， 泊車亦都係30蚊，淨係呢兩樣都慳咗兩舊水， 小菜嘅價錢係普通酒樓㗎，雖然環境都叫差， 但為咗食佢燒鵝，點都係要過嚟！…Read More

初初開業嘅時候，已經覺得呢度嘅牛肉麵好好食，湯底好清甜， 只係牛肉燉湯，係真係可以當湯飲嗰種， 開業已經一段時間，但味道依然keep到，抵讚！今次試咗佢個麻辣三寶，初時仲以為會係魚旦之類，原來係有牛肉牛筋豬腸， 牛筋炆得好林， 而且唔會有 sticky感覺， 個人非常之怕嗰種口感， 所以呢度嘅牛筋絕對可以encore！ 但要提提大家，食牛肉麵一定要飲埋個湯底，食飽之後先叫佢嘅餐飲！今次係第二次食佢嘅炸豬扒， 上次食熱辣辣，今次食就有啲失色，只係暖笠笠， 可能因為飯市太多人，預先預備嘅關係掛！但整體嚟講，食物嘅質素非常唔錯，而且性價比高， 喺附近返工嘅人嘅首選！…Read More

平日晚市時間，起碼要排一個鐘以上先有機會食到， 下午茶時間等咗十分鐘左右就可以入座！ 喺排隊嘅時候，我哋已經睇咗餐牌，已經決定咗要食乜，所以一坐低已經可以即刻叫嘢食！ 以外嘅地方係下單之後大概5至10分鐘已經有食物上枱，速度比我想像中快？話曬都係炸物，仲以為要相對長嘅時間！呢度蕎麥麵嘅湯底相對比較清淡，比較似喺日本食到嘅嗰種，而且麵亦都有淡淡嘅麥味，唔錯！咁當然要講返主角天婦羅， 佢個炸漿算係薄身， 而且唔算太油， 可能因為係人氣店，所有食材嘅感覺都好新鮮， 但份量對於男士嚟講就可能唔太足夠， 兩個男士嚟食，應該需要叫三個餐先足夠。…Read More

今次試咗杯 old fashion Coffee， 係一種加咗少量酒精嘅咖啡 (疑似係 Gin)， 咖啡唔屬於好濃嘅一種，但加上淡淡嘅酒精味，反而突顯咗咖啡嘅純香。美中不足係堂食都畀外賣杯， 如果用一隻適合size嘅酒杯，絕對會畫龍點睛，而家用外賣杯，感覺好似畀人偷飲咗幾啖咁， 作為一個飲咗廿幾年咖啡嘅 mania，平日我喺屋企做呢個咖啡我會用紅酒杯 or rock glass...當然，呢度另一個取勝點係環境比較清靜， 而且嗰兩張搖籃櫈的確非常吸睛！最後試咗佢個焙茶蛋糕， 對於從來唔食甜品嘅我，淡淡嘅茶味可以接受， 最怕嗰啲成斤糖放入口嘅感覺！…Read More

我好少出食評話人哋啲嘢難食，但今次真係要點名話下呢間舖！點咗一個咖哩雞飯，真係喺香港未食過咁難食嘅嘢！ 咖哩雞飯有三隻雞翼、兩隻雞翼尖、一嚿唔知乜嘢雞！ 三隻雞翼得一隻正常，另外兩隻都極度難食，一隻甚至乎係燶咗！ 啲雞極乾，好似翻煮咗十次咁， 難食嘅程度非筆墨能夠形容！咖哩當然係食過咖哩汁，點知咸到好似落錯咗三次鹽一樣！ 雞翼尖同樣係又乾又鹹， 最後成個咖哩雞飯淨係食咗兩粒薯仔，全部放棄曬！坦白講，中學生家政堂都煮得好食過佢，咁嘅質素有乜可能出嚟開舖頭？…Read More

冇人會否定水蟹粥係澳門嘅名物，所以隨便喺遊客區叫一碗水蟹粥都要百幾蚊， 但坦白講，大部分水蟹粥嘅質素都非常接近， 除非你係食家，否則都食唔到個分別！如果你追求車呔人嘅推介丶貴丶環境，可以放棄以下嘅食評。鋪頭嘅位置係筷子基巴士總站附近，鄰近 "老記牛什"，鋪頭細細，只有唔夠十張枱， 格局係我最喜愛嘅木傢俬。。。講咗咁耐入返正題，呢度嘅水蟹粥只係80蚊一碗，size 比其他粥品會大， 好多人以為隻蟹咁少肉係呃人，但呢個先係真正嘅水蟹！( 想食多啲蟹肉，自己出去叫炒肉蟹啦！) 呢度嘅水蟹好新鮮，少量入貨，賣曬就冇。 第二次嚟呢度食，蟹肉依然係鮮甜，食得出係新鮮嘢！粥有少少 "棉", 對香港人嚟講算係啱啱好，唔太水又唔太"傑"，粥品除咗水蟹粥，豬腰豬潤粥/麵亦都係高度推介嘅項目，因為豬腰豬潤做得唔好會好腥，呢度有冇呢個問題，遺憾係冇薑絲， 加超級大量嘅薑絲係本人嘅癖好， 燉葱就最好唔好啦！我哋亦都叫咗一個炸雲吞同煎蠔餅，蠔餅並唔係香港炸果種，似係一個加咗蠔仔嘅蛋餅，蠔仔亦都新鮮丶無腥味丶算肥 而且因為不是油炸產品，食落冇咁鹹同油，配粥食係一流！ 至於炸雲吞， 我覺得比較淡， 我自己喺上面加咗少少鹽同胡椒粉， 而且因為即叫即炸，熱辣香脆，非常好味！…Read More

會特登搭飛機去越南街邊食 Pho嘅我， 喺香港食過好多間都似模似樣，但過後便知龍與鳳！ 因為同大家講過無數咁多次食拉麵丶食粉麵， 最重要嘅係湯底！ 今次點咗個火車頭湯河，上面嘅生牛肉丶牛丸等等，全部都不過不失， 而最重要嘅湯底， 喺香港算係味濃，唔係走清淡嘅路線，食完要隔一個鐘，口渴就代表裏面全部都係味精， 即係做假丶垃圾。。。 但放心，今次食呢一碗 pho，完全冇呢個感覺， 我仲差不多飲曬全部湯！ 提提大家，侍應會係放低碗 pho嘅時候同時放低一碗芽菜， 要立即將牙菜放入熱湯裏面浸，之後先慢慢加青檸丶辣椒， 食完成餐飯都總係覺得爭咁啲嘢， 就係正宗嘅越南河粉，應該用一隻好薄嘅鐵匙羹食， 唔知點解，但就係呢隻鐵匙羹好有越南嘅味道！除咗 pho，我哋叫咗兩個小食，比較值得推介嘅係粉卷，為咗外觀，香港絕大部分食店都會將佢一分為二， 但咁樣就會令到 dip 魚露嘅時候變得太咸，而且魚露嘅度數，亦即係價錢，亦都好容易穿崩 ( 越南魚露可以好貴㗎！) 最後要講下份量，呢度嘅份量算係 ok, 女士食完應該會有八分飽，男士就可能需要再點多一個小食， 大家記得食得曬先好嗌，唔好做大嘥鬼呀！…Read More

已經去大自然素食各家分店食過無限咁多次，但第一次叫酸辣湯，出事啦！ 個酸辣湯似係用茄膏做，酸得好假，做都好差， 好彩呢個係我朋友點嘅，我就叫返每一次嚟都會飲嘅竹生羹，呢個竹生羹無論飲幾多次都係咁好味，但要提提大家，如果多過四五個人，最好係叫一大碗，咁樣會比較化算！仲有每次嚟呢一度一定要叫牛油果法包， 但大家千祈唔好以為係外面西餐廳嗰種的式法包，呢度嘅法包係長過一個手板， 每人一件真係夠㗎，食多一件就會食唔到其他嘢。。。 上次食過黃金蝦好好食，今次再叫，但又要提提大家，兩個人嚟食飯唔好叫呢個餸，因為會好滯。。。 另外仲有一碟炒菜同埋炒飯，飯炒得夠乾身但唔油，做得非常之好， ( 怕油嘅朋友可以叫南瓜飯，上次試過都非常唔錯) 如果喜歡食榴槤嘅話，食完飯可以嚟多個炸榴槤卷當係飯後甜品， 內脆外軟，榴槤味十足，而且性價比高，非常推介！…Read More

相比其他韓式燒肉店，呢度算係快靚正， 而且店員都比較有禮貌！是次晚餐點左一個二人嘅烤肉套餐，有豬丶有牛，另外叫咗兩個拌飯，因為淨係食肉真係會死㗎。。。之前都喺度食過牛肉拌飯，今次就試章魚拌飯同全州拌飯， 可能係我對韓國拌飯嘅認知不足，食起上嚟，我覺得所有拌飯嘅味道都差不多，甚至乎係每一間鋪頭嘅味道都差不多。。。 初初以為章魚拌飯裏面嘅章魚粒粒會好韌， 好彩食起上嚟唔韌，仲有少少鮮甜， 已經喺呢一餐飯好嘅開始！先上一碟豬拼盤，其中一樣叫豬皮嘅嘢，聽起上嚟同睇起上嚟都好核突，但估你唔到，只要燒耐少少，食起上嚟真係幾好食！ 總括只可以講：牛拼盤比豬拼盤好食， 因為所有韓燒嘅味道都係差不多，只係呢間冇出面嗰啲咁咸。。。BTW, 如果係三五知己嚟食，建議大家可以點一個 tower, 因為tower 比散叫細啤化算！…Read More

已經有幾個月冇嚟過呢度食飯，都係早兩個星期訂枱嘅時候先知已經改咗名！前菜多咗個之前冇嘅醉豬手，當然要叫嚟試下啦，豬手皮爽丶汁濃厚而不咸，除咗花雕酒，仲有另一種酒嘅味道，但講唔出 (玫瑰露??) 下次再返嚟食飯我都絕對會 encore！因為朋友第一次嚟呢度食飯，叫咗幾個平時同屋企人嚟食都會叫嘅餸， 叫咗侍應先上前菜丶點心，後上主食，全部都一一做到，呢個要讚一下！前菜除咗有值 8.5分嘅醉豬手，仲有北京肴肉丶小籠包丶 紅油抄手丶 酸辣湯， 北京肴肉嘅size比以前大件咗，味道差不多， 但紅油抄手好明顯轉咗烹調方法，冇以前咁咸，個汁開得唔錯，值８分！煮食方面有北京片皮鴨丶上湯豆苗丶 仲有個唔知乜嘢魚，(因為我覺得個魚唔好食，所以已經唔記得咗佢個名) 片皮鴨個皮好香脆，每一隻可以起到兩碟肉，6 - 8 個人食就最適合，每人大概可以有兩件，鴨皮配上京蔥丶醬汁，味道非常唔錯，加上唔使預訂，非常推介大家試食！甜品有擂沙湯圓丶高力芒果豆沙， 雖然兩個甜品都唔係一啲好甜嘅食物，但我可以好肯定咁講，小朋友都會鍾意食呢個高力芒果豆沙！P.S. 侍應問你開咩茶，推介大家飲12蚊一位嘅四寶茶…Read More

因為上網search "蘋果拔絲" 而搵到呢間餐廳！ 入到去，當時只有三四枱客左右，環境非常之靚，明顯花咗好多心機落裝修，以香港中菜嚟講，算係非常闊落！大家都食咗下午茶先上去食飯，所以唔係叫咗好多餸，嚟呢啲北京餐廳，當然要點一個小籠包啦，味道算係不過不失，再嚟一個蔥油餅，簡直就非常難食！以為可以以後唔使再嚟呢間餐廳嘅時候， 頭盤係一個豬皮凍，同外面嘅做法有少少唔同，佢有少少甜椒粒切咗喺上面，係非常非常之好味，而且爽而不膩，只可惜食起上嚟都係有少少冰粒喺中間，但我依然會畀最少９分呢一個餸 !!跟住再上嘅係賽螃蟹，簡單不過嘅一個餸， 但要煮得好食其實好難，但呢碟餸一上枱嗰刻已經聞到非常之香，配少少陳醋試食咗一啖，足以令我即刻叫一碗白飯， 呢個賽螃蟹我夠膽講，可能係香港最好食嘅！好食過尖沙咀某某米芝蓮星級京菜！另外仲有幾個小菜，味道普普通通啦，反而因為有其他客人點咗 "叫化雞"，成間餐廳頓時充斥咗好香好香嘅味道， 見到侍應拎咗一舊好似石頭咁嘅嘢上枱，由客人用鎚仔仆開，如果下次再嚟呢間餐廳食，我一定會點呢個雞，但提提大家，呢個係需要預訂嘅！至於此行嘅目的：蘋果拔絲，似係一早整好，喺雪櫃拎出嚟，而不是即場拉，糖皮係脆，但味道只係一般。完！…Read More

走高檔路線嘅同鄉會，服務當然有番咁上下，食物味道同外面食到嘅有啲唔同， 可能呢啲就係傳統嘅味道掛！炸鱔糊同黃金小黃魚都係推介嘅菜式！ 外麵食到嘅鱔糊都係一個濕炒嘅模樣， 係香港第一次食到呢一款鱔糊，樣子黑蚊蚊，並不討人歡喜，但每一條都炸得好均勻丶好脆，好似食薯條咁！ 雖然唔係鮮味濃郁，但亦都輕輕咁食到鱔味。至於黃金小黃魚，怕骨嘅人未必啱食， 所謂黃金嘅味道，亦有別於地道小炒嘅黃金鮮魷之類，呢度嘅做法比較乾身，鹹蛋黃味唔算突出， 但正係呢個原因為，令到我哋可以食到魚嘅味道！…Read More

一大班朋友聚會，閒閒哋都要幾百蚊一位食飯，唔係個個都 afford 到。 今次食呢一間酒樓，喺旺角地鐵站出口旁邊， 地理位置方便，飲多兩杯都唔怕！講番啲食物，如果一圍檯食飯，佢哋嘅套餐非常抵食，二千蚊左右，即係每人都係200有找！ 嗰隻王子豬係必食推介， 雖然唔係即燒，但個皮依然係脆嘅，肉亦都暖暖哋， 連埋下層嘅糯米炒飯食一流！套餐仲包一條魚同炸子雞，炸子雞皮脆肉嫩， 味道唔錯！除咗套餐上面嘅食物我的另外叫咗脆皮豆腐，個皮的確係脆皮， 絕對唔會上枱就淋咗， 熱辣辣上枱的確好味！坦白講，二千蚊一圍算係咁上下！收貨！…Read More