Bcat0108的个人专页

今日嚟中環接老公放工，齊齊上咗Soho揾好嘢食，經過見到有間餐廳裝修特別，個名古古怪怪叫Uncle Pizza，即管一試！餐廳面積唔算好大，環境昏暗，但非常舒適。餐牌上有好多唔同款嘅Pizza，每款Pizza都會用一個Uncle名字命名，老公係食肉獸，最後嗌咗BBQ lover，即係Uncle Cowboy。Pizza上有辣肉腸、火腿、墨西哥辣椒同BBQ sauce，由於Pizza係即叫即整即烤，餅底非常香脆，餡料豐富，配上大量香濃嘅芝士，非常有口感，令我最有驚喜係燒烤醬甜甜的但又唔係好膩，墨西哥辣椒份量啱啱好。另外我哋仲叫咗個Linguine with Smoke Duck Breast，本身以為pasta配菜Pizza係主角，點知原來pasta一樣出色，首先係個汁，cream base但有甜同辣嘅味道，非常特別係其他地方食唔到嘅。然後喺個煙鴨胸！塗上蜜糖烤嘅煙鴨胸，外皮少少脆，由於鴨胸本身非常厚身，所以入邊嘅肉質亦都keep到非常鮮嫩入味，生熟度啱啱好，linguine係al Dante，非一般嘅彈口，配搭清新嘅筍，值得一讚！食鴨胸當然要配白酒，我哋叫咗一人一杯house white wine。對於今次嘅選擇非常滿意！…查看更多

星期五放工嚟到the one睇戲睇戲前就嚟食下面嘅古今二之前食過銅鑼灣嘅古今非常滿意聽講古今二係古今師傅嘅徒弟開唔知係咪星期五嘅關係，好多人排隊等位，我哋等咗半個鐘。龍捲風芝士配搭鰻魚嘅配搭好夾，鰻魚調味唔會太甜，鹹香同芝士味好出眾柚想蝦你本身只係想叫個沙律做前菜，點知個沙律咁足料，啲材料鋪到成座山咁高，有生蝦刺身、中華沙律、柚子、蟹籽等等，非常豐富。鹿兒島黑豚荔枝卷串燒喺餐廳嘅人氣推介，大大粒嘅荔枝肉經燒之後，爆出淡淡果汁，配上豚肉嘅油脂味，非常清新。富士山蟹柳、鰻魚肉、牛油果、再配上薯片碎，材料豐富到名副其實好似富士山咁，鰻魚肉質嫩滑，配上清甜Creamy牛油果，加上蛋黃醬，完全可以得出食材嘅鮮味。鹽燒白饅外皮燒得脆脆的，肉質鮮嫩彈牙，調味適中，不過不失…查看更多

今日喺銅鑼灣行完街，朋友好想食日本嘢，所以就嚟咗古今。古今主打創意卷物，將唔同嘅日式刺身同材料混合成好多款嘅卷物。俾人煥然一新嘅感覺，唔會好似平時食日本菜咁單一。🏅金龍卷有三文魚、炸蝦同芝士整成嘅卷物，三文魚非常厚切清新，最鍾意加埋大大啖嘅忌廉芝士，芝士味非常香濃，炸蝦亦非常爽口彈牙，上邊再配有少少辣嘅醬汁。🏅蜘蛛油炸軟殼蟹、青瓜、牛油果同蟹柳整成嘅卷物，食完芝士少少油膩就最啱食依個清新嘅卷物，軟殼蟹上碟時仲係脆皮，配上青瓜，牛油果同蟹柳特別清新，層次豐富。🏅埼玉網燒牛舌牛舌非常厚身，口感煙韌。最有驚喜係個特製醬汁，中和左牛舌嘅內臟味。非常清新嘅口感！🏅日式章魚小丸子一客6粒，每一粒係一口嘅份量，上面舖咗大量木魚同紫菜絲，不過入邊嘅章魚粒就唔大粒，不過不失。整體嚟講，好欣賞古今嘅多氧化銅創意，仲有師傅就住客人落單嘅卷物而擺盤嘅心思！…查看更多

一向鍾意港式街頭小食，但一直都冇乜突破，今次嚟到紅磡依間小食店，發覺佢將街頭小食發揮得淋漓盡致！招牌燒賣餐廳主打燒賣，有蒸有炸，兩樣都好多口味揀，搞到我都有瞬間選擇困難症，所以就決定蒸同炸各一款蒸: 奶油麻辣魚肉燒賣好有創意同大膽嘅配搭，原來奶油拼麻辣係咁出色，燒賣係啱啱蒸好，熱辣辣兼且非常彈口，上邊配有大量乾紅椒絲，脆脆的增加口感。炸: 日式大阪魚肉燒賣一向都好鍾意炸燒賣，個皮好香脆，唔會炸得太乾，入邊嘅燒賣肉仍然都係彈牙，配上毫不吝嗇嘅木魚同日式燒汁，令我好似食緊好煙靭嘅大阪燒。除咗燒賣，hidden table亦都有小食珍珠雞令人好驚喜嘅小食！店員先將珍珠雞蒸熟，點上天婦羅炸粉，再放入油鍋炸，令到珍珠雞唔會太乾，而外面少少燒燶嘅飯焦非常煙靭有彈感！珍珠雞亦都有配上奶油，並切開四份，細細份可以一口放入口，係好方便嘅珍珠雞！炸薯條 (霹靂 Peri Peri)薯條非常香脆，有濃濃嘅薯味，配上美式霹靂粉，彷彿好似去咗美國咁，整體不過不失。價錢方便，同區小食嚟講性價比高，如果想冇咁悶，非常值得一試！店舖亦提供少量堂食位置，備有秘製醬汁，可以趁熱食！…查看更多

經過見到依間小食店，門面乾淨企理，放工已經好攰，所以想快快食完晚餐就算，所以就喺金記小食買咗幾個餸返屋企食。🍴酸辣粉加咗豬腸、蘿蔔、豬紅，酸辣粉非常煙韌有咬感，一食上癮，辣到剛剛好。🍴麻辣燙加咗廚師腸、金菇、海帶、芝心丸等等，面頭好多油，比較辣，米線冇酸辣粉咁有咬感，整體不過不失。🍴碗仔翅好耐冇食碗仔翅，好足料，淡淡都有料！🍴牛雜大大碗好足料！調味適中！小食點嚟講，店面真係好乾淨，食得非常安心，中等價錢單份量偏多，非常抵食！…查看更多

九龍城一向高質餐廳雲集，今次揀咗可以帶寵物嘅瀛鍋！樓上多間獨立包廂 環境寬敞 派對聚會之選餐廳樓上設有8間獨立包廂，供客人帶同寵物與朋友聚會 (食煩鍋帶寵物要小心安全啊) ，包廂由2人房到30人房可供預訂。海鮮刺身海外直送到港 鮮味十足餐廳其中一項主打係刺身，所有刺身都係海外直送到港，包括加拿大象拔蚌、挪威三文魚等等，其中象拔蚌刺身清脆可口，另外三文魚刺身油脂分布平均，厚切令食客充分體驗魚肉的質感和甘甜，入口即溶，非常推介！獨門秘方醃製冰鎮鮑魚最令我有驚喜係冰鎮鮑魚。鮑魚新鮮大份，爽口無雪藏味，經獨家秘方醃製後令鮑魚味更加濃厚。新鮮熬製火鍋湯底 今次我哋叫咗麻辣拼蕃茄牛肉雙拼湯底，湯底有餐廳師傅新鮮熬製，不含防腐劑同味精。麻辣湯底非常香口，辣度適中，花椒味濃，湯底仲有大量豬皮，加入香茅令湯底加入一點清新嘅味道。蕃茄牛肉湯底帶出蕃茄原有嘅鮮味，蕃茄係新界自家農場有機種植，不含農藥，非常清新鮮甜！有機蔬菜來自新界自設農場 餐廳所有蔬菜都係來自新界嘅自設農場，全部有機耕種，食得非常安心之餘，蔬菜亦特別鮮甜，特別係熬製湯底嘅蕃茄，同麻辣湯底入邊嘅大大粒蒜頭，令湯底更上一層樓。主打之一: 手打拉絲芝心丸 廚師手打墨魚滑同蝦滑，再包入芝士，肉質厚實鮮甜、彈牙，唔會有過重嘅面粉感，煮熟後芝士更加變成流心拉絲，非常吸引！重頭戲當然係牛雜拼盤，當中包括一口牛柳&牛舌、手切本地牛頸脊&牛𦟌、美國霜降牛。本地牛用料新鮮，無論係口感定係牛味都比美國牛優勝。最大驚喜係牛舌，入口即融，口感同和牛有得比！店員細心有禮 整體體驗上佳由於平日人流唔多，店員都非常細心，並且逐一介紹每一味餸，環境寬敞亦都令到貓貓唔會緊張，仲可以帶佢去魚缸睇魚。不過星期五及週末會比較多人，如果想坐包廂就要預訂。…查看更多

今日嚟接老公放工，太耐冇嚟中環，行過見倒間餐廳出面望入去好似泰國街頭啲草店🤣原來係間素食餐廳，就係咁就俾佢吸引咗入去喇！搵位坐之後，就去自助落單。Treehouse主打包同沙律，可以自己mix and march啲餡料 (create your own) ，亦都有signature款，所有嘢食都係即刻整，確保新鮮。Banyan Sourdough with grill tempeh Banyan係其中一隻signature味，有茄子、蒜、鷹嘴豆、白菜、蕃茄同amba sauce，另外可以揀天貝/ 蛋，而我就揀咗天貝。而flatbread方面我揀咗signature za’atar，比起naked多咗好多款香料，最有驚喜係入邊嘅孜然味令成個包嘅味道昇華。餡料方便所有蔬菜都非常新鮮爽口，天貝嘅味道有啲似豆，經過香煎後非常脆口有咬感。非常健康又可口！Cold Hiyashi Kelp Ramen with spiced tofu (分店special) 海帶冷拉麵配上辣豆腐，成個碗都係滿滿嘅蔬菜同豆腐，而底部有拉麵，拉麵並唔係傳統拉麵，而係好似粉絲咁嘅蒟蒻麵，雖然咬感冇咁好，勝在健康！Turmeric Latte 薑黃鮮奶咖啡 (Oak Milk) 好新鮮嘅combination，本身唔中意薑黃，但加落oak milk latte度我又唔抗拒，好健康！Mekong (自家品牌冷榨果汁) 有西瓜、菠蘿同薄荷嘅冷榨果汁，不含防腐劑，冇加額外嘅糖，好清新！雖然價錢有啲貴，但健康係無價嘅！同區選擇亦都唔多，推介！…查看更多

一向都知Aeon有food court ，但原來food court最深深處有間麵館，主打精煉熬煮牛骨湯同刀削麵，價錢合理，值得一試！沙茶牛三寶熱伴刀削麵 🍝 (麻辣味)牛三寶有金錢肚、牛筋、牛腩，肉質嫩滑，醃得好入味，另外有手工伴麵配上大量芫荽，手工麵非常煙靭，口感十足，隨餐仲配上大量炸蒜片同青瓜蘿蔔絲，好有誠意！沙茶鮮牛熱伴刀削麵 (招牌蔥油味)沙茶鮮牛口感鮮嫩，細細塊牛肉入口即溶，不過蔥油味伴麵略嫌比較淡味，不及麻辣好食。小食: 蒜泥白肉 🧄 比起一般蒜泥白肉小蒜，辣味比較重，適合鍾意食辣嘅人。飲品: 百香果冷泡茶 & 綠研茉莉茶自家工場製嘅樽裝茶，唔會太甜，有茶嘅香味，不含防腐劑，仲有新鮮果肉，非常解膩。雖然喺food court入邊食，但由AEON管理比較有信心，加上啱啱裝修完，所以環境都理想，適合想食個快飯/ 平日家常便飯。…查看更多

今日早放工，帶咗貓貓去 營足四季。之前經過一直以為係「營養」個「營」，點知原來係「露營」個「營」，餐廳內嘅裝修全部都係露營風格，不論傢俬枱櫈，甚至乎燈具都係露營裝備，令我恍如去咗一個有冷氣嘅露營！因為有帶貓貓，店員帶咗我哋去餐廳後室外位置，原來有好多人都帶咗寵物嚟！雖然係室外，但因為夜晚關係，所以唔算太熱。雖然喺工業區後巷，但光線充足，環境幽靜！貓貓都好enjoy清新柚子煙燻三文魚洋蔥薄餅 🍕 上碟熱烘烘，pizza 脆口有嚼勁，餡料方面，薄薄的餅底鋪滿各種餡料，有主角鮮甜煙三文魚，滿滿嘅生洋蔥，份量十足，芝士入口即溶，最特別之處就係pizza配上柚子肉由柚子汁，配搭新穎有趣，清新怡人！巨型豬扒配薯條沙律 🐖塊豬扒真係對得住個名，非常巨型！豬扒生熟剛剛好，切開後肉汁滿瀉，肉質鮮嫩，配有特製豬扒汁。豬扒下邊就係滿滿嘅薯菜，有薯條、翠玉瓜、筍、蕃茄等等。餐廳仲有好多款飲品，特飲/cocktail/ wine/咖啡應有盡有！口水多過浪花🍸 (特飲)青檸配上滿滿薄荷葉調製出嚟嘅飲品，加上荔枝肉，甜度適中，非常清新叢林的秘密🍸喺一杯材料非常豐富嘅水果茶，有水蜜桃、鮮檸檬、西柚、藍莓粒、鮮青檸，雖然等得有啲耐，但見到入邊有咁多咁新鮮嘅水果粒，係值得嘅！甜品: 阿華田脆脆奶蓋瀑布蛋糕配提拉米蘇雪糕 🍰🍨蛋糕以膠圈圍住，當拉起膠圈之後，濃厚既阿華田醬就好似瀑布咁覆蓋成個蛋糕。脆脆同鬆軟既蛋糕令口感更加突出，而Tiramisu同阿華田既crossover更令味道甜而不漏餐廳整體環境同食物都出色，唯獨帶寵物坐户外會有蚊，最好自備蚊怕水。…查看更多

經過旺角金雞，見倒樓下有張好似車站嘅poster，原來係一間樓上Cafe，仲要有我最愛嘅pasta食，二話不說同老公搭𨋢上去食！星期二嘅7點鐘，生意都好好，不過好采都仲有位唔洗等😇Cafe裝修簡潔，以白色為主。有一個4層高嘅櫃放滿各式名樣嘅Board Game。座位係Sofa，主要售賣dinner set同小食，而dinner set有8款，主要係Pasta。🍴西班牙海蝦辣肉腸燴飯 🦐 🍝 濃濃嘅茄醬配上蝦肉同辣肉腸，灑上少量香草，汁不會太少，份量剛好，飯煮得軟硬適中，一定嘅腍度吸湯力高，並非傳統意大利返咁硬，切合香港人口味。雖然蝦同辣肉腸係雪藏並非新鮮，但解凍恰當，不會太大雪藏味。🍴卡邦尼煙肉雜菌意粉意粉al Dante ，配上大量洋葱同煙肉，毫不吝嗇嘅忌廉同Parmesan cheese碎令意粉非常滑同香口。🍴黑松露薯條原先叫小食想係過吓口癮，點知原來小食都咁大份。滿滿嘅黑松露粉平均灑係薯條上，再配上茄汁，薯條炸得香脆可口。呢度有好多好特別嘅飲品，唔同嘅配搭令到我真係好難選擇！🍹薄荷朱古力非常濃郁嘅朱古力味，特意叫佢多cream，配上清新嘅薄荷，非常適合夏天飲。整體而言，份量十足，價錢平民，抵食！…查看更多

以前有食過幾次，但見佢剛剛裝修好，就同老公放工嚟食晚飯！新裝修令餐廳更加整潔明亮、座位舒適，夥計服務態度熱情殷勤，不錯嘅第一印象！店員推介我哋點鐵板T骨牛扒餐，隨餐會跟例湯，我哋點咗中湯係消暑冬瓜湯，湯煲得好夠火候，材料豐富，有冬瓜、瘦肉等，消暑健脾！隨餐仲有餐包配anchor牛油，送上果陣仲係熱辣辣呢！鐵板T骨扒好大份，即使係鐵板上都唔會過熟，生熟控制得啱啱好，肉質嫩滑，唔會太韌，亦唔係落咗鬆肉粉嘅牛扒嘅質地。食港式鐵板餐例牌係配黑椒汁，祥榮嘅黑椒汁非常足料，有粗粒黑椒同蒜蓉，剩下嘅汁可以送飯，平時唔食飯嘅我都食咗一大碗！$152一個鐵板牛扒嚟講真係物超所值。三葱爆滑雞煲經洋蔥、蒜頭爆香，非常惹味，而且肉質鮮嫩，啲肉一咬就離骨，唔會太鹹，份量適中。配合港式茶餐廳風，我哋仲點咗紅豆冰。紅豆冰嘅紅豆粒粒渾圓完整，未算超軟腍但勝在有咬口，附粗飲管方便吸啜。但冰塊就略嫌太大粒，如果係碎冰會更好，不過勝在紅酒份量多，唔會俾奶嘅甜味蓋過紅豆味！適當我哋捧住個肚出返嚟，最後二人埋單都係$255，好抵食。…查看更多

平時經過已經聞到好香嘅孜然味，加上咁多人等外賣自取，就已經好想試！今日終於有機會！如果淨係睇環境未必可以吸引倒我食，但見網上咁多好評，姑且比一個機會佢！呢度最出名係串燒，全部都係即叫即做，保證新鮮熱辣。除此之外仲有香鍋、炒粉麵、酸辣粉、海鮮等等。落單後等候期間見倒4個外賣平台不停出單，亦有好多人外賣自取，所以等候時間比較長。幸好我哋點嘅餸都有陸續上菜，不至於乾等。首先有燒鴨胸肉、和牛、豬頸肉同雞軟骨即叫即整果然有品質保證，燒鴨胸肉肉質嫩滑，和牛有濃濃油脂味，豬頸肉咬落彈牙，雞軟骨爽脆。全部都好惹味，每張枱都有辣粉同孜然粉俾食客自行調味。麻辣豆腐除咗串燒，食川菜當然要試吓麻辣豆腐，豆腐係現成包裝，不過不失，但調味非常惹味，不會太油，麻而不太辣。其中一道推介菜式係鵝肝多士，$70有四少分鵝肝多士真係物超所值，鵝肝雖然略為燒焦，入口香脆，但肝心仍然柔軟質感，入口溶化，不失為一道可口值推嘅小食！另一道廚師推介係蒜蓉燒生蠔，上碟時蠔殼非常大，但生蠔相對地細，屬於偏細同咸嘅生蠔，蒜蓉份量非常多，但都冇掩蓋生蠔新鮮嘅肉汁！牛肉麻辣香鍋配白飯呢度菜算係今晚最普通嘅，肥牛份量豐富，但略嫌偏鹹。重慶酸辣紅薯粉作為紅薯粉控嘅我真係非常喜歡紅薯粉嘅麵質，非常煙韌有咬感，吸收晒濃郁嘅酸辣湯底，每啖都辣得好過癮！由於係假期繁忙時段，堂食同外賣都好多單，建議下次可以先打電話落單，預啱時間先嚟攞就可以省卻等候時間。如非繁忙時間，堂食飲下酒都係不錯嘅選擇。…查看更多

週未嚟到馬尿水海旁逛逛、踏下單車，再去科學園揾餐廳食午餐。今次揀咗環境幽靜嘅十和田壽司。之前去過尖沙咀分店，估唔到科學園都有！中午12點左右入座唔洗等位，但12點半就差不多滿座。好幸運今次被安排坐單邊角落，有90度落地大玻璃可以近賞科學園嘅園林景。一行二人叫咗超特選壽司拼盤，再加蟹棒同熟蝦壽司。拼盤本身配味噌湯同蒸蛋，湯不會太濃或太鹹，帶有鮮甜味道，蒸蛋口感滑嫩，含香菇、海鮮、魚板或山茼萵，小小一碗就有濃郁嘅鮮味。超特選壽司拼盤非常豐富，有吞拿魚、海膽、鰻魚、三文魚子、吞拿魚蓉、生蟹腳、生蝦、甜蝦壽司第等，配上一隻大蝦頭。當中有三款不同部位嘅吞拿魚壽司，有不同嘅油脂比例同分佈，三款都肉質鮮嫩，非常可口。海膽壽司上嘅海膽份量十足，入口鮮甜帶creamy口感，仲有濃濃嘅海水味！鰻魚壽司上嘅鰻魚長過手掌，肉質細緻鮮嫩，醬烤入味，好吃不過鹹，鹹中帶點微甜，愛吃鰻魚嘅朋友必點！另外單點嘅蟹棒同火炙芝士熟蝦壽司就不過不失，同樣地食材肉質都非常新鮮！不得不提，今次食壽司除要欣賞魚肉外，仲可欣賞壽司嘅米飯！米飯顏色呈淺啡，因為壽司師傅已經用醋作適當嘅調味，黏性和味道適中，不掩蓋魚肉的味道。望著園境，食著高質素壽司，就咁就過咗一個休閑嘅星期日。…查看更多

台灣具高知名度嘅2派克脆皮雞排專門店原來係紅磡開咗全港首間加盟店！2派克主打雞排外皮相當酥脆，標榜「完美鎖住微甜的肉汁」，今日放工就順便去買！2派克出名炸物，最出名就係雞排，我哋買咗3款炸物，而每款可以揀兩種調味粉配搭，非常體貼。有別於其他炸雞店，2派克每樣出品都係新鮮即叫即炸，所以我哋都等咗10分鐘，但完全值得！等候期間見倒其他客人一早係OpenRice落定單，預啱時間嚟攞就可以省卻等候時間。🍴脆皮杏鮑菇 (海苔、芝士)皮炸得香脆，而且炸粉完全唔厚。杏鮑菇多汁彈牙，而且舊舊都好大舊。海苔配搭芝士粉有粟米湯嘅味道，好有驚喜🍴脆皮無骨雞排(梅子)雞扒炸得非常香口juicy、肉質嫩滑，唔會鞋口。唔係好似其他雞扒雖然大塊但好薄，2派克出品係原塊厚厚嘅雞排，冇被壓/揼過。另外由於唔係翻炸，所以炸皮好薄，出色！高度推介配梅子粉，好解膩！🍴甜不辣(麻辣)好似手指咁粗，咬落口感煙韌，配上又薄又脆嘅炸皮，好有飽足感！沿途行返屋企，已經食咗一大半。好滿足！下次想食又懶惰可以用外賣平台啊！…查看更多

後生時，食燒肉一定要去任食餐廳。宜家做咗輕熟女，食燒肉只有一個原則: 重質不重量！今次嚟到新城市廣場(東鐵綫沙田站)，預先係App攞飛，星期五繁忙時間等一陣就可以入座喇。Yakiniku Kakura主打不同部位嘅黑毛和牛。今次我點咗午市套餐嘅牛舌盛合同牛肉壽喜燒烏冬，一試難忘！🍴牛舌盛合有兩款，分別係鹽味同葱鹽味各5片，兩款唔同厚度，非常喜歡佢嘅彈牙口感，加上檸檬汁同葱花，唔洗點醬已經好好食！🍴牛肉壽喜燒烏冬係牛肉多過烏冬！壽喜燒湯底又濃又甜又唔澀，烏冬口感彈牙。由於係用石鍋，上菜時仲係滾湯，做到收汁效果，令到個烏冬介乎於湯麵同撈麵之間！貫徹日式餐廳嘅風格，每個套餐都配有沙律、湯、前菜醃牛舌，仲有甜品！甜品係杏仁奶凍同雪米糍，個人最中意杏仁奶凍，好香嘅奶味同杏仁味混合，口感滑流柔軟！非常適合食完燒肉後食！…查看更多