ONEMORE TWOMORE's Profile

講起潮州打冷，我可能第一時間會諗起北角，今日嚟到相當近北角地鐵站嘅梅花村小館，店內壁畫相當豪邁奔放，唔知佢嘅滷水係咪一樣咁惹味呢？畀Menu上嘅鵝片鵝肝飯吸引，賣相平平，白飯偏濕軟，滷水較淡口，但佢嘅鵝片肉嫩而鵝肝鮮美，口感非常滿足，綜合嚟講值得一試。另外叫咗蠔仔粥，潮州粥嘅形式，冬菇、紫菜、方魚乾提供源源不絕嘅鮮味，而且蠔仔肉碎份量足夠，絕對畀佢海洋般嘅風味驚艷。唔少人食飯追求大大份，CP值高，但我哋覺得一餐食得簡單而隆重，足以令人回味萬分。嚟緊都會寫更多嘅食評，希望大家睇完follow我哋啦。…Read More

秋冬季節，加上最近流感肆虐，大家要小心身體。新興棧食家鄰近佐敦站同廟街，店外長期有人輪候堂食或外賣。名氣十足之餘，佢嘅生滾粥都鑊氣十足，風味鮮味兼具。兩次堂食，分別試咗魚雲粥、魚咀粥、魚腩魚卜粥同魚腩及第粥，價錢比一般粥店貴，但份量同配菜都絕唔馬虎，啖啖肉咁濟。半開放式嘅廚房見到非常粗獷嘅佈置，好似大排檔咁鑊氣滾粥，可謂罕見，的確堆滿期望值。總結一下佢畀我嘅感受。鮮: 靚貨鮮魚滾出嚟嘅粥，令人估唔到喺佐敦都食到荔灣風情，當然可能有落味精提升鮮味，但至少我食完成碗粥都唔覺口渴。焦: 如果搵一款粥配搭泥煤威士忌，可能就係佢，每一啖粥除咗魚鮮，仲可以感受焦香同炭火嘅暗示，呢樣喺「煲粥」搵唔到。葱: 「魚鮮」、「生滾」兩位主角領銜演出，連配角嘅青葱都搏命搶鏡，為風味飽滿嘅粥加入清爽嘅氣息，形成三方鼎立嘅局面。兩次經驗中發現，如果你有同行朋友或伴侶一齊食，你好似我咁食完有兩款或多款配料嘅粥，再試單一配料嘅粥，會發現風味嘅層次真係會有啲遠，想試吓佢最有表現力嘅味道，嗌多樣餸更稱心。新興棧嘅粥十分出色，可以一試再試，當然小店關係，比較注重衛生和環境迫夾問題嘅朋友要適應吓。嚟緊都會寫更多嘅食評，希望大家睇完follow我哋啦。…Read More

重陽節long weekend ，專程嚟到深水埗中央飯店，感受舊式酒樓車水馬龍嘅氛圍，蒸氣、叫喊同新聞報道共冶一爐，場內以中老年人為主，有一兩枱遊客，互不打擾，一種大隱隱於市嘅閒情逸致。蒸籠點心除咗日常選擇，傳統一啲仲有大包同魚肚燒賣。阿姐都會推住煎釀三寶等嘅熱氣之選繞場。特別推薦雞紮、鮮蝦粉果同芋角，完美演繹大件夾抵食，份量十足，味道亦不差。至於蠔仔肉鬆湯飯，價錢親民，用料的確大方，如果已經食咗點心，三至四人share都好足夠。不過口味偏淡，未有特別記憶點，建議留力食點心。最後嗌咗酸甜炸軟殼蟹，非常可惜嘅一道餸，軟殼蟹新鮮炸好，理應香脆可口，但係未加溫嘅酸甜醬好似一盤冷水，幫軟殼蟹迅速降溫，又熱又凍嘅口感相當突兀。總括，中央飯店充滿舊區情調，係一幅樸實無華嘅平民寫照，點心表現豪邁大方，但嗰日試嘅小菜就不盡人意，希望下次試佢嘅晚市會有更大驚喜。…Read More

想一家大細聚餐，位置方便，服務同食物優質，Mira嘅國金軒係唔錯嘅選擇。從結論嚟講，呢餐飯食得大家開心又舒服。廚房用上乘食材炮製各式佳餚，前台嘅殷勤禮貌，令餐飲體驗更上一層樓。椒鹽田雞腿: 見其他人食得津津有味，唔食田雞嘅我都食咗一嚿，口感似嫩滑嘅雞肉，辛香椒鹽嘅風味蓋過我心中嘅疙瘩，零油溢味而外脆內軟。燒鱔: 外觀好似蒲燒鰻魚，食材嘅品質同廚師精緻嘅手法帶嚟三個感受 - 外皮爽脆、油脂甘香、魚肉鮮美。脆皮羊腩: 第三樣炸物，但喉嚨未見負荷過重，秋風剛起嘅時節，油炸配搭羊肉帶來溫暖但清朗嘅感覺，近乎冇羊臊味，呢點好唔好就見仁見智。豉椒炒蟶子: 蟶子新鮮，三色椒鮮甜，不過少咗啲鑊氣。嗰種好似武林高手嘅內功咁深厚，剛勁嘅鑊氣，係我對呢種典型大排檔小炒嘅期望。燜斑翅: 廣東人對大魚大肉有一份情意結，古法燜煮不單保留魚嘅肉質，豆腐火腩令成道菜變成一幅充滿細節嘅壁畫，需要慢慢細味，慢慢消化。泡飯: 非常溫潤嘅泡飯，濃且鮮嘅風味好好咁作為前幾道菜同甜品環節之間嘅橋樑。我哋亦另點棗皇糕作為甜品，都keep住水準。一間好嘅餐廳，不外乎好嘅食物，好嘅服務態度。食到一餐安樂茶飯，係樂事。嚟緊會繼續寫食評記錄我哋去過嘅餐廳，多謝支持。…Read More

紮根上環嘅聚點坊，相信街坊同上班族都唔陌生，今日我哋午市時間去，目測9成滿座，唔需要等位，唔算闊落，志在嘆番一盅兩件。先嚟春風得意腸，熱氣騰騰，內裏嘅腐皮卷夠脆，而醬汁甘甜，可謂開個靚頭。淮山雞扎，包裹喺腐皮下嘅冬菇、魚肚、雞肉、淮山好似一幅描畫山水同飛鳥嘅水墨畫，內容豐富而輕描淡寫，試得出餐廳對食材嘅處理。我哋嘅第一感受係：不過不失啦。而點心之王嘅蝦餃，就比到少少驚喜，蝦餃皮厚薄彈性適中，蝦肉彈牙爽口，筍粒帶嚟些微清爽，平民點心嚟講，加上堂食熱辣辣有加成，冇挑剔嘅位。相反，我哋每次飲茶，或者食上海嘢都必嗌嘅小籠包，偏厚嘅皮遇上蒸得太耐嘅問題，令到口感過硬同「食麵粉」嘅感覺，湯汁唔多亦有啲扣分。廣東酒樓每枱一盅嘅鳳爪排骨飯，我哋偏好硬飯同多汁，硬橋硬馬，唔會暴露肉類，特別係排骨嘅雪藏味。呢盅飯就正好滿足上述條件。成餐飯嚟講，茶水就一定冇茶樓咁靚，呢度嘅點心夠熱，「一熱遮三醜」，至少食得滿足。食物味道偏濃，健康路線嘅朋友或者老人家要注意。印象中聚點坊係COVID期間頭幾間出現個案嘅鋪頭，好彩捱過疫情，唔係嘅話街坊街里又少一個嘆平民點心嘅聚處(5個點心加茶水大概150，中上環嚟講算make sense嘅)。嚟緊會繼續寫食評記錄我哋去過嘅餐廳，多謝支持。…Read More

三號波嘅星期六，嚟到位於黃埔嘅滿堂樂滬京風味，牆上嘅大字餐牌，滴住水珠嘅豆漿機，喺店面包餃子嘅阿姨，係上海食店嘅標準佈置。店內只有兩張大枱，預咗要搭枱，但未至於膊頭撞膊頭。主打嘅粢飯鹹豆漿套餐，粢飯味道清淡，用料充足，但如果飯身再黏啲同包得紮實啲，食起上嚟會更可口。鹹豆漿配料包括油炸鬼、鹹酸菜粒，蝦米。未撈勻就咁食，有啲似雞白湯嗰種milky，對好少飲鹹豆漿嘅我哋，係新奇嘅。撈勻之後，feel到更明顯嘅鹹同酸感，同豆漿本身嘅豆香同濃郁平起平坐，嗰種湯嘅感覺，啱番乾爽轉涼嘅季節。作為主食嘅擔擔麵，我哋揀咗辣嘅，麵身偏硬但有彈性，湯底係一種直接嘅辣，味道唔算好有層次，記得要撈勻沉澱嘅肉碎同花生醬，先「wake」到碗擔擔麵。另加嘅豬扒薄身但油脂豐厚，食落有少少酸，未知係咪肉質問題。黃埔食店林立，選擇眾多，而呢一間滿堂樂主打精簡實惠嘅上海菜，喺附近搵食嘅朋友可以一試。…Read More

晚飯後未飽，再到渣甸街老店上海香港麵家食少少嘢😛油豆腐粉絲湯足料，但味道偏鹹，對食到半飽嘅我哋heavy咗少少，相信配搭豆漿，味覺會更balance⚖️而粢飯作為招牌菜，平時多數外賣。堂食嘅話，溫度適中，一人半個啱啱好，飯偏乾身，如果係新鮮包好即食，口感更佳🍙店面都係老人家打理，晚餐時段稍忙，態度親善。而衛生環境比起其他老店，都算中規中矩👍渣甸街麵食同荳品店林立，又近地鐵小巴，上海香港麵家，不妨一試🤝…Read More