大.寶's Profile

秋風起，想吃蛇羹是正常的，路過深水埗，見到有間蛇王弟，一於入去試吓先⋯⋯二時許繁忙時間已過，入到來食店自己可以選擇最佳位置。蛇羹套餐配細糯米飯~兩樣都只算微熱，所以要快快進食。如果熱騰騰的上來，會更具吸引性。花生芫茜葱，香口爽脆，雖然未算太多臘味，但這價錢也算是不錯。筆者最喜歡是薄荷葉及薄脆可以無限量添加，又真係幾爽⋯⋯經過首次到訪後，感覺良好，三個星期後，決定第二次到來，又係選擇二時許，避了繁忙時段。豉汁蒸馬友~上次吃完蛇羹套餐之後，今次決定蒸魚套餐，魚類有很多選擇，但筆者至愛馬友。豉汁很惹味，配上白飯很開胃。還有當日例湯~冬瓜薏米紅蘿蔔，筆者喜歡例湯更勝餐飲。整體來說，平均每個餐$68,-$75, 尤其蒸魚套餐，很有住家feel ，怕麻煩，真的好過自己煮，但記憶中，筆者曾到訪過荃灣分店沒有蒸魚套餐，而且店舖沒有坐得咁濶落，這裡適合一人食飯的一個好地方。…Read More

話說早陣子與朋友在隔離舖飲咖啡，之後出來發現依間意粉店乜咁多人嘅？於是就bookmark 紀錄在案⋯⋯後來發現主㕑係意大利人，難怪吸引到一些食客，於是相約老友過來一試。Sfizio’s Tomino Parma Ham (2 Pcs)$138~Tomino 係用產自Piedmont 用100%嘅牛奶造成，一聽依個地方，即時諗起意大利紅酒Barbera，相信應該都好夾檔⋯⋯打消念頭，中午唔飲酒。用24個月嘅Parma Ham 包住煎而成，單單看餐牌嘅介紹已覺吸引，端上枱，驟眼看好似Parma Ham包住一個糯米糍，真係好可愛。切開更像糯米糍，質感煙煙韌韌，裏面有像流心芝士好吸引，點點鹹味，又帶有牛奶嘅奶香及甜味，相信配Barbera一定最適合不過。白酒煮蜆配意大利粉$168~手造意粉，筆者最鐘情於傳統的意大利粉，㕑子炒得爽彈煙韌 ，是筆者喜歡的質感，蒜蓉牛油味香濃，筆者至愛。Chicken in Italian Marsala wine sauce $120~老實說賣相並不吸引，像一罐磨菇湯倒在一塊雞扒上，一些沙律菜伴著，由於餐牌寫著Marsala Wine，Marsala Wine 係意大利傳統酒，有點像Port 酒類型，有獨特的酒香，帶點乾果的味道，濃濃酒香磨菇醬，很Creamy ，伴著嫩滑的雞扒味美。Amerciano~咖啡未算特別，但配上甜點，兩者味道互相配合。Tiramisu $79~手造甜品，已一樽樽準備就緒，相當方便，吃時加入朱古力粉便可端上枱，甜度適中，但質地略為稀薄，未夠杰身。芝士檸檬吉士批$75~反而檸檬批酸酸甜甜配合咖啡，恰到好處。手寫單很有趣，但一目了然，有時候傳統更勝電子賬目。整體來說小小的一間食店，店員可不少，但由於小店面積少，枱也少，所以在整個用餐過程都比較急趕，建議非繁忙時段過來，會吃得輕鬆自在一點。冇辦法，香港租金貴，能夠在這一帶站隱下來，必定有其功力。㕑子及店員也很親民，用餐後會諮詢意見。值得支持的一間小店。…Read More

這店一直Bookmark 咗好耐，由於地點在青衣涌美的村屋位置，真係要專程拜訪才能嘗味，所以久久都未能拜會。今日過來青衣探訪老友，問朋友知否這間明星車仔麵，朋友二話不說即刻帶我過來⋯⋯這條村原來很多小店，有舊式茶居、菜檔、理髮店、小食店、時裝店，真係各適其適⋯⋯入村行到盡頭，如果唔係朋友帶路，筆者都應該要找好一陣子，終於來到華記小食店。我們到達已是二時許，由於食店營業至三點，而且又很肚餓，看見多種選擇，和朋友真係樣樣都想試⋯⋯點了兩碗車仔麵之後，看見排行榜，於是再點了豬扒及墨丸。點餐後揾位坐低，期間食店播放著80年代流行歌曲，別有一番風味⋯⋯朋友點的傳統項目豬皮、豬紅、紅腸、蘿蔔朋友比了一些筆者試，首先想讚下那紅腸，唔粉，現今很少地方有好食的紅腸，豬皮入味。另外筆者點的車仔麵包括: 蘿蔔，花菇，豬腸，雞翼-先講講那黑糖煙薰雞翼，$20/2隻，但筆者很喜歡，吃得出是心機小食，有陣陣煙薰香味，花菇夠大隻，切開夠入味，豬腸肥度適中，邪惡得嚟唔算太多膏，反而蘿蔔太腍，但勝在冇根，米粉底，加了咖哩汁很惹味。桂花蜜燒墨魚丸$40~有時候真係要出街食，原來這樣的配搭又幾夾，燒烤後的墨魚丸再用桂花蜜襯托，比蜜糖更吸引，下次BBQ不妨一試。陰勁豬扒$33~聽到個名已笑咗出嚟，首次到來，又怎會錯過，當㕑子熱騰騰端上枱，筆者初時以為他是店主華記，原來是華記的兒子，還有稱號，王子是也，剛才替我整車仔麵的是王妃，好一個童話式的故事，原來發生在車仔麵檔⋯⋯整體來說:車仔麵的配搭很多選擇，看出王子用了很多心思打造新品排行榜的味道，但某些項目價格頗貴，而且沒有列明價錢，作為一個消費者而言，沒有透明度，吃完再問價錢，原來$33/件豬扒，$4x 桂花墨魚丸，相信算是貴價車仔麵，但真心話，雖然濃味，但不會吃完要立即喝可樂的那種，是屬於好吃的車仔麵，不妨一試。…Read More

一直聽聞恒豐中心大食代有間手造意粉好食，上個禮拜六下午三點到來，已經沽清⋯⋯今日在佐敦工作後已是1:30pm ，相信這個時間過來，應該不會再白行一趟吧！首次到來，看著All Day Set Meal 指示十分清晰，跟住Step 選擇就可以，由前菜至甜品都有，直接在食店店舖位置點餐就可以，簡單方便又直接。開放式廚房，可看到㕑子煮食，筆者選了對著他們的枱⋯⋯不用十分鐘，整個套餐便可以出去取，雖然整套餐具只是彷造不碎膠餐具，但影相打卡並不輸蝕⋯⋯小牛肉配呑拿魚醬~真係估唔到在food court 可以食得如此多Fun 真係想飲番杯Wine 嚟配襯一吓。青醬松子意大利粉濃郁的青醬已很吸引，還有喜歡的合桃灑上芝士碎，作為快餐店已達到意大利餐廳的級數，絕不馬虎。甜品~迷你Tiramisu ，另加$10可以選擇餐飲Americano , 如唔加$10的話，可以用飲品代替甜品，但筆者認為依$10是必須加的，因為兩者實在太夾檔了。整體來說以不用$100有以上套餐，質素和一般西餐廳之上，只是環境是food court ，但攞餐具時，欠缺細匙，吃甜品用大湯匙🥄吃有點怪，但配咖啡很夾檔，一支公到來，整個套餐很滿意。…Read More

這店十多年前到過，但改了名，酒友介紹，上到嚟才發覺似曾相識⋯⋯由於最近酒友告知多優惠，嘉嘉生日，老餅一番慶祝吓⋯⋯震撼優惠於11月前，2:30pm-6:00前，生𧐢$10/隻。6:00pm 後，生𧐢正價收費，冇要緊，紅白酒任擇。生𧐢種類繁多，最好是weekend 到來會選擇更多，當晚筆者星期四晚到來，想選Cherry Store，他們話星期五先有貨，所以想食咩，請預早通知食店。全日$50買一送一徳國手工啤酒，唔帶酒嚟都冇所謂。當日一口氣點了兩打𧐢，他們竟然話我訂得少，最後追加一打⋯⋯徳國咸豬手$328~皮夠脆，酸菜不夠酸，不似德國式風格，但帶濃厚牛油味道，未算太差。蒜片活蜆意粉$188~香氣撲鼻，意粉彈牙爽身，是筆者當晚最喜歡。斧頭扒$586(11月優惠)~㕑子在你面前切，唯獨是我們點的是Medium Rare但變了七成熟⋯⋯幸好扒嘅質素尚好，雖然煮得Over 咗，但尚可接受，但大家都有點失望。自家製薯脆~這個小食是配以斧頭扒的，相信是計過人頭，一人一件，手工嘢，幾好食。堂煮卡幫尼$208~即席揮毫，在你面前煮，這個是他們的招牌項目。開心菓Pizza $88~由於點了斧頭扒，另加$88開心果Pizza 但完全沒有開心果味道，但作為甜品，甜度適中，有兩個雪糕作襯托，滿足整體來說:老餅慶生一流，自彈結他老歌手伴唱，當切蛋糕時，還會過來彈奏，免開瓶，由於食店有自家製蛋糕，所以如果自帶蛋糕會收$50，點食店的自家製蛋糕，有質素，如冇要求者，建議不用買蛋糕，因為點整個Cake都只是$168。服務員態度和藹親切，詢問之下，十幾年前都是他們，絕對親民，一讚。懷舊西餐，值得支持。…Read More

今晚又過嚟官塘開會，每每落車都會路過毅力工業中心，很喜歡在巴士站落車後，從這工業中心的地下穿過另一邊。種類繁多的小店，除咗時裝小店、賣酒、玩具店等⋯⋯尤其那超市，是從前的零食批發龍頭，所以每每發現都有一些很平的日本或東南亞零食，筆者每隔一些日子到來，都覺得有新發現⋯⋯行完超市，開始有點肚餓，作為一個餃子控，見到外賣餃子店又怎能放過。門口看見他們的下午茶2:00-5:00pm，包括餃子、小食及飲品，$50，可惜筆者來時已晚，唯有今次首次到來，作單點項目吧！內裡裝修十二節氣燈籠🏮幾吸引由於當時晚上六時許，繁忙時段已過，所以食客只得筆者，可能店主有空檔時間，可以與筆者閒聊起來⋯⋯望另一邊牆上的照片，細問店主之下，原來是妹妹為他拍攝店內的招牌美食，照片影得精美，作為外賣店都算相當認真。有趣嘅是看著這張畫，再望店主一眼，作者畫得店主很相似，原來是店主的弟弟替他畫，他們的家人可算是多材多藝，從店主口中說起，看見他臉上神情，那份雀躍，感覺到家人對他的支持外，流露出一份愛。餃子很多選擇，有煎及放湯，夏天還可以選擇菜底或麵底，相當有彈性。飲品方面也是自家調配，考慮到附近的OL健康追求瘦身之選，筆者今次一支公，吃完八隻餃子，夠了，下次再試。落單後看著店主用心製作，還忙着為明天作準備，㕑房夠大，發揮出多種作品。自製辣椒油$30~食店放著一樽現成的，筆者試了點點，辣度夠，帶點麻，喜歡麻辣者，不妨一試。外賣餃子包裝絕不馬虎，餃子和湯分開兩隔，湯可選擇紫菜湯或是古法准山魚肚湯，筆者選了後者，雖然魚湯質地未算濃厚，但渴得出是自家調製，並不是現成貨式。餃子餡料是筆者喜歡的多菜少肉比例，肉未算太肥，家庭式感覺，吃時才發現原來可以加錢作半湯半煎，店主真是貼心照顧，筆者只覺，他太寵食客了，只加$1 。整體來說價錢大衆化，用心製作，餃子種類多選擇，還有其他小食如涼拌青瓜、海蜇、炸魚柳、雞翼也有兩種選擇滷水及酒醉，還有滷水腩肉、豬大腸等等，自家製地道香港小食，值得支持的一間誠意小店。…Read More

好徳來，從前在德成街，舊舖細細，之後搬到同一條街，舖大了，熱鬧了，當然價錢貴了，更被日本人喜愛，曾幾何時，晚間熱鬧非常，粉絲就是為了他們的小籠包，一直情有獨鍾，追隨着，後來結業，筆者也傷感了一陣子。最近發現佐敦開業了一間名為”星級好徳來”, 幾次到來都摸門釘，原來他們星期三休假，於是一直未能遇上，係咪從前的好徳來，筆者沒有問道。今天星期六下午，過了繁忙中午時段，未夠三點到來，店內都算多食客，一支公，選了門口位置坐低，幸好星期六都有午市麵餐，否則一人來點單點項目，都咪話唔乸脷。店舖電子化QR Code 落單，減省了員工落單時的急趕及壓力。門口已擺放了實體餐牌，睇啱價錢先入座一支公，當然選了午市套餐啦！一碗麵加兩隻小籠包$88, 套餐包括小籠包兩隻，主食麵有五款選擇，另外還有熱茶或滾水，如要支裝豆漿另加$10招牌小籠包~套餐小籠包兩隻，如要單點$45/4隻。味道回憶往往是最深印象，一口氣，熱騰騰的吃着，唔使問，它就是從前的好德來，回憶番晒嚟，包子內的那啖湯，味道如舊。雞絲湯麵~端上枱，熱騰騰大大碗，相當吸引，如細食者，記得在QR Code 內註明小麵。雞絲嫩滑，湯底濃厚，手工拉麵，一如既往爽彈有個性，筆者不知不覺就將整碗麵KO 晒。整體來說味道仍然吸引，保持好徳來以往作風，小籠包風采依然，服務員也和以往一樣，食店沒有加一服務費。…Read More

上次過來北角錦屏街覺得這條街很有特色，朋友今晚再相約到來，試一間串燒店，試新嘢，筆者怎會說不⋯⋯殊不知，店名真係叫 “不”, 有趣的名字。店內一班年青人，看餐牌，很多有趣的菜名，最吸引到筆者的是”最愛茜茜” ，相信全部都是有芫茜。脆炸鱔骨$38~先嚟下酒小食，脆炸鱔骨, 帶點點硬淨，幾有𡁻頭。啤酒全日買一送一$78, 還有食店名字的啤酒杯，限定兩款生啤，分別是檸啤及Estrella.招牌沙嗲拼盤$58-分別是豬頸肉、雞髀肉、五花腩各一串，配上沙嗲醬都幾惹味。脆皮臭豆腐$38~港式臭豆腐都有，硬淨得嚟沒有街邊檔的神韻，單是有豆瓣醬，如果有甜醬或海鮮醬就更好。川香原條茄子$$48~蒜蓉茄子，蒜蓉控必定喜歡。雞泡魚乾$48~韓式雞泡魚乾，配啤酒相當夾檔。臭茜牛肉卷$30/2PCS~看餐牌的菜名，睇到都嚇咗一跳！但當晚筆者至愛，牛肉卷內的茜茜夠爽脆，正！芝士流心大啡菇$38~女朋友很喜歡，流心芝士夠吸引。招牌脆片豬大腸$60~爆膏邪惡代表，蜜糖脆皮帶點甜，惹人討好，誘惑得令人富有罪惡感⋯⋯一夜干$128~當日是黃花魚，燒得夠乾身，但略嫌魚味唔夠。原條大魷魚$108~辣汁調得幾惹味。關東煮$111~原本有個關東煮套餐每樣有啲$70，但由於為食貓上身，我們每人點了福袋各一，最後加加埋埋就$111了。味道方面，港式風格山東煮。整體來說食物價錢大衆化，串燒有港式風味，氣氛熱鬧，秋涼時坐在店外，別有一番風味。店員服務態度唔錯。…Read More

朋友介紹，隱世鐵板燒，重點係免開瓶，可以自帶Sake，就是這點，吸引了筆者到來⋯⋯食店在深水埗汝州街，當晚筆者來回折返行過汝州街幾次，都找不到店舖，原來店鋪真的很隱世，黑色一大道門關上，沒有打開，還有一個圓圓綠色的Merry Christmas 掛飾，唔知真係以為是沒有開舖⋯⋯之後再打開電話查證確實位置，推開一道門，再打開另一道門，原來另一片天地。一開門，原來是這樣熱鬧⋯⋯今次我們一行四人，安排了坐大廳，看著㕑子煮，是一件賞心悅目的事。安排位置後，發現到，每位食客，都沒有一般鐵板燒所提供的醬汁碟。一坐低，只見三小碟，一些枝豆、牛蒡漬、韓式Kimchi。相信㕑子對自家炮製的味道很有信心，所以沒有提供醬汁碟。先來一個沙律菜清清喉嚨先⋯⋯之後㕑子便在食客面前給看新鮮的鮑魚及龍蝦，稍後再作準備⋯⋯另外我們再Upgrade 了鹿兒島A5和牛，但和朋友太耐冇見，顧住傾計，忘了紀錄。龍蝦汁茶碗蒸~和一般的茶碗蒸嘅分別就係，加了一些龍蝦頭製成的醬汁在面。在吃茶碗蒸嘅同時，㕑子就已經泡製剛才給你睇嘅龍蝦，原來也已經為你塗上一些醬汁。接著㕑子開始製作蠔，完成後將整隻𧐢放在一大堆樱花蝦碟嘅上面。鮑魚接著是鮑魚，筆者喜歡這簡簡單單原汁原味的鮑魚。鵝肝麵包上有半件鵝肝，食物一道接一道，店員又不停地斟酒，所以不知不覺真的會飲多了。炒飯去到尾聲就是大大碗的炒飯，筆者已十分飽，吃了一口，已交給朋友處理。好立克雪糕最後反而很欣賞這好立克雪糕。整體來說以鐵板燒角度來說，覺得太多醬汁，反而搶咗海鮮的原本味道，但店員款待很親切，會令你不知不覺飲多咗⋯⋯在香港，能夠自攜Sake 到來，對於酒友來說已一大吸引，但如果唔帶酒，這裡也提供$199/2 hrs free flow，對筆者而言，自己帶酒反而會比較有節制。場內店主懂得攪氣氛，首次到來也和鄰座食客打成一片，非常熱鬧。但注意在訂位時，必須Deposit 每位$100, 另外結賬時，只有現金電子支付結賬，不收Visa Card。…Read More

久唔久都會過來柯士甸路這裡，但一直沒有留意這店，原來這店已開業一年之多，隔離店翁記牛丸開業還會注意到，反而這店，一直路過，都看不見，直到朋友相約過來午餐才知道。由於店舖面積細細，12:30pm 中午時段，全店必須預約，否則會白走一趟。店內主打西班牙特色很喜歡這個醬汁，咸香味濃三款西班牙小菜(迷你)配半條小法包，迷你西班牙海鮮炒飯(經典/墨汁)$168~當端上枱，就覺得這道菜配紅酒就最適合不過，奈何是中午時段，切勿酒精影響工作，留待下次吧！長法包做得鬆軟，筆者至愛。香蒜橄欖油煮蝦配墨汁意粉~午餐吃黑汁意粉特別怕，因怕吃得牙齒鳥卒卒，要喝多點水。法式紅酒燉牛肉配Couscous~喜歡除白飯外有另類的選擇，為午餐帶來新鮮感⋯⋯是日餐湯(磨菇忌廉湯)~午餐另加$42，初時覺得加$42有點貴，但當上枱時發現，份量十足，除咗忌廉磨菇外，還有濃濃的胡椒味，相信是多種胡椒組成，喝完已經飽滿。套餐跟橙茶 ，相對檸檬茶更具特色。如套餐想喝咖啡的話，需補差價，朋友選擇跟Long Black 另加$20。小店有趣的地方是，在結帳時，只有這收據，兩個午餐$108, 另一個套餐$168,餐湯$42/個，飲品另加$20., Total: $530平均每位$176整體來說每道菜式其實味道都算唔錯，但未知為何，每道菜式都好像唔夠熱，所以有少少失色，但看見那些年青的店員很落力的服務，雖然感到有些經驗不足，可能是Part time 學生哥吧！但睇得出也有一份熱情。支持小店，以傳統西餐外又一選擇。…Read More

今日中午又係一支公，是但求其食系列⋯⋯由於趕時間要快食，門口大大個餐牌$59個套餐，一於試試。未夠一點，食客未算多，嗱嗱臨落單，坐定定等食。百香果蜂蜜烤雞餐半隻$59~大概等了10分鐘，已經有得食。由於選擇配菜時，有焗薯5小塊，想要求加配茄汁，原來這裡加醬汁每款多收一元，慳家為大前提，套餐以百里香蜜糖為主題，就跟規矩撘上，百里香蜜糖頗甜，酸酸甜甜，相信小朋友會較為喜歡。半隻雞可選擇烤什菜及焗薯，焗什菜是豆及椰菜花，而焗薯有5塊，一開二的小薯仔，加加埋埋都很飽肚。柚子柑桔派對~雖然飲品是扭蓋預定裝瓶，但單看這個樽已覺吸引，味道唔算太甜，夏日炎炎凍飲幾清新，趕時間都可以飲唔晒拎走，一讚。以$59一個午餐，雖然雞未算太滑漏嗰隻，但以這個價錢，也算合理價。整體來說:雞嘅份量有彈性，烤雞全隻、半隻、1/4也可以選擇，見到還有海南雞，配菜隨意配搭，快餐之選的一個好選擇。…Read More

今晚和紅鞋兒上完堂都已九時許，在佐敦一帶揾食，發現有間小店，開到零晨四時？ 對，真係冇睇錯，今時今日仲有通宵經營，真的不能不佩服，不能不去支持下⋯⋯酒吧格局，通常都係酒行先，食物是其次，這店又似乎唔係喎！當晚9時許進場，還有三幾枱客人，多數都係外籍人士，看見他們點嘅菜，賣相都唔錯。這裡除了啤酒外，還有多款corktail ，更有無酒精飲品。餐牌有很多碟頭飯項目，很多款都係加頂帽，煎蛋未知係咪燶邊呢⋯⋯但宵夜時段，我們決定不吃飯了。餐牌簡簡單單，菲律賓菜式，所以大部分都是煎炸項目，圖文並茂，冇乜idea 嘅我們，圖片幫助不少。我們先來兩杯生啤，配搭煎炸野相當不錯⋯⋯Lumpiang Shanghai $78~春卷細細條，包著肉碎，及甘旬碎，襯啤酒一啖一條都幾爽⋯⋯Deep Fired Tilapia $98~炸羅飛魚，又一下酒菜⋯⋯Lechon Kawali$98~當晚筆者最愛這個燒肉，菲律賓版本，相當有特色，底味香濃，一層層的豬腩肉，肥嘟嘟得又愛又恨，紅鞋兒話肥膏好肥呀！筆者答:餐牌標名pork belly ，肥得出色有道理。整體來說佐敦一帶的菲律賓酒吧式餐館，食物質素相當有驚喜，值得支持的一間小店。…Read More

今早相約朋友睇早場，完事後一齊搵早餐食，愉景新城很多食店都是開12點，在地下樓層看到一個很搶眼的貓頭鷹標誌，11時許，還有早餐供應，二話不說，一於走入去研究下⋯⋯單看餐牌已有很多選擇⋯⋯首次到來，大家都想試很多項目，最後兩個人點了這麼多。牛舌粟米火腿湯通粉~帶淡淡的忌廉湯口味，還可以選擇加芫茜，作為芫茜控，簡直是亮點。粒粒牛舌、粟米粒，還有火腿，豐富口感。飲品很多選擇，但膠杯質地，為飲品扣分不少⋯⋯但諗深一層，會否是因為愉景新城大多是大人帶小朋友到的一個主題商場，所以用這膠杯質地，以防打爛？筆者當日選擇黑糖薑母茶跟餐另加$10有點貴，在QR code落單時，但味道可選小甜，都算貼心。牛舌粟米火腿餐，跟餐還有丹麥多士及炒蛋。芝士葱花滑蛋熱狗$36~熱狗包是烘烤過，微暖，加上葱花幾香口。法式多士三文治(黑松露蛋沙律)~早餐還可以加推$20選擇這款迷你版法式多士，還可以選擇多種口味，這次我們選擇了黑松露蛋沙律口味。以早餐嚟講，依個選擇相當有彈性，作為愉景新城這個商場，相信會吸引到一些媽媽帶著小朋友，份量剛好，輕盈早餐上加推項目，可以具有足夠彈性。整體來說早餐及餐飲項目多選擇，份量可加可減，相當有彈性，適合大人帶小朋友過來。…Read More

楊屋道街市海鮮多囉囉，今日探嘉嘉兩公婆，收工行過楊屋道街市，入去街市見到有蝴蝶蚌，原本嘉嘉打算回家煮，但又熱又倦，決定都係在附近找間酒樓加功吧！嘉嘉經同事介紹 ，有間小廚可以加功，於是試試吧！同事話就在附近，行吓行吓，原來嚟到工廠區，其實都唔算附近，但為食貓精神，食咗先算。工廠區茶餐廳格局，唔係朋友介紹，真係唔會走到過來，食店好客氣，未點菜就先來個例湯先⋯⋯椒鹽鮮魷~魷魚並不是自來海鮮，是在食店點的，粉夠薄，炸得鬆化，有驚喜。黑醋骨~醬汁味道調得吸引，奈何骨是整定，再預熱，有點失色。薑蔥醃仔~自來海鮮，原先筆者問㕑子可以作鹽焗嗎？他們話沒有那麼多粗鹽，相信下次想食要自備粗鹽吧！於是就任㕑子發揮，當端上枱時，是薑蔥炒蟹，Ok 喎！味道未算太濃，我們吃得起勁。今次買的蟹未算大隻，但膏夠甘香。油鹽水粉絲浸蝴蝶蚌~新鮮的蝴蝶蚌其實蒸已很味美，但由㕑子話事，油鹽水又別有一番風味。炒通菜~份量大大碟，抵食。乾炒牛河~中規中矩，以茶餐廳質素，相當唔錯。依個價錢，真係好過上酒樓，今餐有驚喜。整體來說從楊屋道街市行到過來，有一段路程，唔係朋友介紹，真係唔會找上門，但以加功海鮮，$60/斤，沒有茶芥加一，相當精打細算，無論店員嘅服務及煮功，也感到一份誠意，工廠區內有驚喜，值得支持。…Read More

話說有日朋友安排在朗屏揾食，正呀！又有機會試新嘢！ 店舖名字很有趣:Ada’s Not Here, Ada 不在這裡？筆者初時以為，Ada 是主㕑，原來才知是店長背後的女人，未正式開餐，已經感到滿滿的愛。店內面積細細，當晚共三張枱，一張四人枱，另一張三人枱 而我們也是三人枱，充滿小店的風情。店內有一張掛畫，大隻佬的蒙羅麗莎，上面就放著店長和Ada ，作為他背後的女人，都咪話唔冧爆。首次到來，店長推介吃Set Dinner ，因為可以試齊食店之招牌項目。由於我們自己帶餐酒到來，店長安排雪凍及酒杯後，便開始送上第一個手功下酒小吃，雖然小小心意，但絕不馬虎，將茄子整成一條條，再鬢成一個個結，像鬢邊一樣，茄子有陣陣的川椒味道，很有Fusion 感。是日餐湯~當日是番茄忌廉湯，同樣是帶陣陣的川椒味道，和前菜相映成趣。鵝肝多士(套餐另加$40)~頭盤可以選擇沙律或加錢推加項目，而筆者選擇鵝肝多士，伴著蕉糖蘋果，除去除油膩感外，配酒一流。招牌自家蟹餅(套餐另加$40)~另外朋友選擇了招牌蟹餅，筆者切了一些吃，配當天帶來的白酒，也相當不錯。烤銀鱈魚伴大蜆牛油汁(套餐加$100)~由於三個人都是晚上減澱人士，所以選擇了三個主菜都要加錢，如果唔想加錢，可以選擇意粉系列。西班牙伊比利亞100%橡果豬肉眼~當晚筆者最喜歡是這道菜，豬肉眼煎焗得剛剛好，嫩滑吸引。阿根廷安格斯牛肉眼10安士(套餐另加$150)~這塊牛要求三成熟，真的做到筆者想要的效果，喜歡。整體來說由於小店，像我們要配酒人士，會建議平日來，會吃得比較寫意，店長是㕑子總指揮，遙遠控制，裡裡外外出入作打點，這裡是收開瓶費，每枝$80,食店也有餐酒提供，而價錢相當合理，而切餅費方面，每枱會免一個蛋糕切餅費，但唔帶蛋糕來，在這裡點一件甜品蛋糕也會寫祝福字句，三兩知己來慶生都是一個不錯的選擇。…Read More