aqrcraft's Profile

响屋企附近揾野食，見到有間手打漢堡，試下伏啦。比完錢，話等十分鐘，前面有個熟客，同佢哋吹水，聽到話佢上次一次過訂左35隻炸脾😱 內心即刻想褲返隻炸脾試下。整體黎講，係好好味既！牛肉漢堡夠Juicy！（但我因為張poster有芝士，以為preset有芝士🥲，所以只係加左煙肉）佢可以自己加topping同選醬料，topping唔貴，$5就有一款，醬汁既選擇性亦多。手打漢堡黎講，呢個價位我收哂貨。如果你要炭香、Flame Grill咁就梗係唔响呢度啦。炸雞塊亦好有水準，爆汁👍🏻 而且細份炸雞$28已經好大盒，有成5、6件。性價比好高，可encore。 …Read More

今日早放工，返到屯門先7:30。屋企附近周圍行下揾食，見到呢間即炒小菜外賣店。抵食又好食！！我叫左個蝦仁炒蛋，佢比兩個盒我放，一盒飯、一盒餸，企企理理，加分！小弟對炒蛋系列既菜式好有要求，佢既蛋嫰滑，蝦仁足，夠鑊氣，高分👍🏻 $45有埋白飯（大約兩碗飯既份量），我覺得抵。因為本來無諗過會寫食評，所以無相放，但個蝦仁炒蛋既size，係多過白飯既份量既！間野仲有好多古靈精怪野賣，三寶、蠔餅、炒公、撈烏冬。我見前面啲人買蠔餅，見到廚房出品既一剎那都對版。下次會試！佢仲有一個兩餸飯、單餸飯系列，好似啲蕃茄蛋、葱油煎豬扒、鹽酥雞、粟米肉片咁，都係即叫即炒！！仲要只係$35！！唔心急既，我覺得值得等下佢炒!街坊野，價廉物美，支持下，一定再幫襯！…Read More

呢間新開張串燒好好味！又抵食！真係要讚下廚師好識用個火！我哋嗌既每一款食物都燒得恰當好處！！串燒上既醬汁上較輕身，啱我胃口，唔會死咸死甜，重口味既人可以問店員拎香料。特別提下，清酒花甲有Heart，收埋左大量爆香左既蒜片、仲有車厘茄。重點係好多地方都唔會落既粉絲，好聰明既做法去吸收返啲精華！呢間舖仲有d限量secret menu，店員專登過黎問我哋要唔要，一級好味👍🏻至於係乜secret menu，就等大家去發掘下啦🤣容乜易食哂我無得食🤪…Read More

難得今日一班舊朋友難得得閒出黎聚下，因為好多HKU人，就揀左HKU附近既呢間墨西哥餐廳。每道菜都中上水平，有幾樣仲特別好味道！仙人掌蘋果特飲好refreshing，第一次飲，唔錯！脆卜卜既Nacho配上熱呼呼溶左既芝士勁好食！！芝士唔係果啲好濃好漏既type，份量好Generous，可以狠狠咁dip落去大啖食！再飲返啖仙人掌特飲，又可以食多塊🤪牛油果係呢度招牌，唔少菜式都有佢身影，個牛油果沙律真係好正，可惜唔近我公司，如果近既，真係可以當做我set lunch。海鮮飯同串燒都係正野！平時墨西哥常見既夾餅（？）完全合格啦但我最鍾意既，竟然係甜品！牛油果雪糕好滑無冰粒，好香牛油果味，牛油果控必食！烤左既香蕉船亦非常特別，值得一試食到十點埋單走人，個墨西哥大廚仲咁啱走出黎做同我哋say good bye~ …Read More

前排因為大利天后老店結業，食左碗。了起我食清湯腩條癮。屋企附近洪強，一早食過佢既咖喱牛腩伊麪，今次試試清湯牛坑腩伊麪，小弟就覺得高大利、華姐果啲一個grade啦。屯門友真係要黎食！點知我分享完比朋友，朋友話最正係爽腩，一般7pm前都賣哂，想食就一係早一係打去留。非常期待下次食到爽腩！其實N年前食過既咖喱牛腩伊麪都好好食，小弟都推介各位巴打絲打去食下。撐下小店老店。抵食、好食、食得飽！仲有唔同牛腩部位選擇，筋腩、肥腩、爽腩（雖然經常賣晒）、牛坑腩，啱晒牛（腩）魔王。…Read More

唔知啲人係咪食神上身，以為自己入左米芝連餐廳咁黎評，真係唔公道囉。黎左好多次嗌兩餸飯拎走，次次都頂爆個盒，成年男人食都飽到上心口。唔止份量多，餸亦多！（支竹魚柳有成8-10舊魚）而且未試過食到難食既餸，乾淨企理多選擇。我好鐘意食炒蛋，中式炒蛋黎講，我覺得係高水平。炒咁大盤蛋，每次都係嫩滑有蛋香，師傅功不可沒啦！兩餸飯仲連埋例湯、或咖啡茶。例湯日日唔同，足料有湯渣無味精，咖啡茶係有驚喜，係好飲有奶香既港式。而家啲懶靚茶記，$60幾蚊迷你焗飯可以食唔飽，常餐既炒蛋變煎蛋皮。呢間平民兩餸飯店，我唔會話蔗渣嘅價錢食到龍蝦既味道，但味道、份量對得起個價錢有突，抵贊！仲未講，平時啲兩餸飯店嗌三餸飯，係每樣餸俾少啲你，份量又係一個盒。呢度聽到你嗌三餸飯，係即刻拎個吉盒同你裝餸。十分公道！性價比之選！…Read More