豬Ladys's Profile

住左香港仔咁耐, 啲朋友成日問香港仔有咩好食。講真香港仔要揾風土人情美食係有既。但係如果純講味道,呢間係香港仔開業唔夠兩年既麪尊絕對係個人大推必食店。麵尊係食車仔麵。鍾意呢到既湯底夠哂清甜。仲可以免費加汁,有咖喱, 麻辣同腩汁。我每次食都會加呢到既咖喱醬。加左湯底會更加香濃。如果第一次唔知點咩餸,可以跟menu推介。個五香牛腩超入味,又夠淋。豬頸肉就爽口彈牙。一碗份量都唔少,每次食完都有種唔夠喉既感覺。因為真係好好食🤤。…Read More

同老公拍拖紀念日揾咗呢間位於尖沙咀既樓上餐廳，餐廳用色暗黃頗有情調，個人好推介情侶去。落完order好快就上咗一份餐包前菜。雖然係免費餐前小吃，不過一啲都唔馬虎，仲要熱辣辣，牛角包好鬆軟，食到一層一層既口感。綠色嗰款勁香綠茶味。真係意想不到。火炙半熟三文魚伴紫蘇葉莎莎呢個沙律前菜，酸酸甜甜好開胃。厚切三文魚啖啖肉，唔錯。去到主菜部份，先上西冷牛扒。7成熟既牛扒肉質好嫰，又Juicy，不過去到筋位部份有少少韌。但整體質素都有中等以上。配菜同樣出色，種類多之餘，又煮到夠哂火喉，入哂啲牛味。大推。牛肝菌蘆筍意大利飯，呢個味道好特別。加入咗黃椒，紅椒同芝士片，感覺冇咁膩之餘，味道口感都好豐富。飲品同甜品賣相都好精緻。…Read More

又到我同好姊妹既生日月。雖然喜來稀肉唔係第一次食，但唔想生日正日食到伏野掃興。所以都係揀返有信心保證既餐廳。鐘意呢到燈光暗暗，有氣氛。食物價格親民又高質，菜單最貴嗰款燒肉都係講緊二百幾蚊，仲要份量好多。食燒肉最鐘意就係食多脂肪既部位，燒完既脂肪特別香口。今次揀既兩款肉，一牛一豬，都係我最愛既五花部位。五花肉位於腹部脂肪豐滿既部分， 肉質柔嫩，肥瘦相間。即使我地成掛住傾計燒過龍都唔會鞋口。肉夠嫩，味夠香。秘製醃料味道甜甜地，岩哂我口味。喜來韓豚五花肉生菜任食， 值得一讚係生菜每次放係自助bar 數量唔多。冇哂，職員好快會再refill，所以感覺乾淨又新鮮。配菜同樣都係自助bar任食任拎，有麻油豆芽，芝麻海帶 ，醃蘿蔔同一定唔少得既泡菜。泡菜味道夠哂辣，夾住醃蘿蔔配燒肉，超好味。炸醬麪有驚喜，麪質夠彈牙。最重要係味道唔會太重口味，撈埋配菜荷包蛋同青瓜，味道好fresh好夾。蟹籽紫菜飯團睇菜單就細細份，估唔到實物係咁大碟。剩係睇相都唔洗多講，足料抵食。最後值得一提，呢到職員做野好爽快，又helpful。個爐板燒燶咗，職員好自動自覺幫忙更換。…Read More

天氣忽然轉涼，又係打邊爐嘅好時機。今日去咗觀塘工廈呢間巧得鍋覓食。呢到鍋底有多款選擇，可選雞鍋、烤魚鍋、酸菜魚鍋，牛腩鍋等。我地就揀左雞煲鍋底。等候期間職員會將醬料放到枱上，唔洗出去拎，好細心。調好咗啲醬汁後，雞煲就到喇，上菜速度都幾快。呢度係半隻雞份量，兩三個人食都無問題。今次揀左小辣，味道岩岩好。雞肉好嫩滑味道濃但不是那款味精死咸味。食完之後唔會勁飲水。兩個人食完個雞煲後都已經飽飽地。之後可以叫職員加湯底打邊爐。呢到用料好新鮮。牛肩胛: 紋理豐富，肉質及脂肪比例啱啱好，口感夠嫩。鮮淮山：打邊爐必食。脆鯇魚腩：肉質清透，爽口彈牙，要新鮮先食到嘅口感。即炸嚮鈴：呢個係最遲上菜的火鍋料，本身以為漏單。原來因為即炸原故所以要時間耐少少。呢個本身都微微暖，口感極度鬆化，極力推介。最後仲會送生果。…Read More

男朋友突然想食海南雞飯，誤打誤撞去左呢間餐廳。當日平日未夠7:00pm，所以客人唔算多。環境乾淨，枱與枱之間隔板夠高，私人度高，坐得舒服。先試佢個招牌海南雞飯，雞肉夠嫩滑，絕不鞋口。仲要係無骨雞，大讚👍。黃油飯夠香，入口絕不油膩。剩係睇色水都感受到佢陣濃郁香味，呢碗係鮮蝦喇沙麵，有少少咸香味，勁開胃。麵質夠粗，又夠哂彈牙。蝦肉新鮮又大隻。呢個班蘭多士係我全晚最愛，多士外皮夠脆，班蘭醬就甜甜地加埋塊冰凍牛油好好食。香辣魚蛋唔會煮到皺皮，外皮微脆保持到彈牙口感。…Read More

深水埗行街，無意中畀我發現呢間隱蔽串燒小店。店舖唔算好大，但枱與枱之間有一定距離，乾淨企理，坐得舒適。呢度用QR Code 落單，每串串燒都可以選擇辣度非常方便。因為第一次嚟，唔知辣度，所以全部點哂小辣。結論：如果食得辣可以選擇中辣以上辣度。招牌花甲粉花甲粉上的蔥及芫茜勻可選擇多少，另外仲可以追加配料。花甲粉絲用錫紙包住，即使依家天氣咁涼，食得慢都唔擔心食物變涼，能保持到熱辣辣既温度。花甲份量多，唔算好大隻，但非常鮮甜，而且一粒沙都食唔到。粉絲吸收哂花甲鮮味，非常好食。燒茄子原條燒茄子上枱非常震撼。呢個比平時食開仲要大。上面一大咋孜然蒜蓉醬好惹味。串燒整體質素好好，保留到肉質又唔會太乾。調味亦都恰到好。一路食，唔會不斷想飲嘢。每串份量都好足。十幾蚊一串既丸，竟然可以有4粒大大粒。絕對係良心小店。呢個豬仔嘅肉十分推介。豬肉間夾雜住脆卜卜軟骨，口感勁好，味道又香。…Read More

呢間餐廳喺三五知己同情侶約會既好地方。餐廳整個氛圍好warm好舒適，空間感大，加上sofa椅子坐得舒服，令人好放鬆，不知不覺就坐咗好耐。餐桌擺設別有用心Dinner set 做緊優惠買一送一，兩個人$498就有齊前菜、主菜、甜品同餐飲。如果用環境，食物質素比較，性價比極高。蜜桃玫瑰花茶養生必選，用黎打卡就岩哂。前菜牛油果西柚沙律🥗 餐包一啲都唔馬虎，份量仲要唔少。麵包熱辣辣，外皮香脆，內面鬆軟。蒜蓉包都好夠味。黑松露野菌意大利飯飯煮得剛剛好，口感煙煙韌韌，黑松露味道好突出。加埋上面一塊塊芝士薄片更提黑松露香味。香煎三文魚配檸檬牛油汁三文魚火候煎到剛剛好，有皮脆效果。最出色係個汁。有煙肉碎，帶少少酸少少甜，味道濃郁，同三文魚好夾，中間夾住既蔬菜，薯仔入哂味。法式焦糖燉蛋焦糖面好厚好脆，燉蛋口感好好。朱古力控既我，甜品點會少得心太軟。呢個味道唔會太甜。中間流心效果突然。加上曲奇味雪糕同藍莓，士多啤梨，一冷一熱的味覺刺激，好滿足！…Read More

去過銅鑼灣分店好幾次，今次終於有機會去尖沙咀分店。食物同環境都冇好大分別，依舊咁高質。黎到韓式餐廳當然要先來個大醬湯。呢個湯係韓國家庭常備既一種湯，等於日本既味噌湯。當然呢個湯配料相對豐富，海鮮同肥牛餚製，鮮甜好味。燒肉就揀咗濟洲五花肉同牛肉眼。濟洲豬特點肌肉纖維細密，脂肪分部均勻，肉質細嫩。燒完唔需要特別調味料，已經好好食。牛肉眼靠近胸部的肋肌，肉質鮮嫩，脂肪紋多而且分佈均勻。牛味重，有韌性，但絕非鞋口咬唔開那種。免費美食推介：爐邊蛋，不過要好食，時間要控制得好好。燒得太耐蛋會鞋口，8成熟，蛋有漿住漿住質感就岩岩好。泡菜，好地道，味道偏辣，好食。…Read More

呢間日式居酒屋位於堅尼地城，鄰近海邊。日式裝潢mix酒吧式設計望落簡單且帶點奢華，地方雖少，但環境舒適。外邊吧枱除左可以望住師傅即叫即燒仲可以欣賞到海旁景觀。裡面就有二人及四人餐桌，隱蔽度高，可以約三五知己靜靜地傾下計。串燒非常高質👍✏️回頭率💯 之作：黑豚五花腩脂肪滿滿嘅五花腩，一層肉質，一層脂肪，非常有口感。脂肪部分油脂香濃，入口即溶。安格斯牛柳 牛柳燒到岩岩好，裡面仲係粉粉地色。肉質好淋，牛味重。鍾意呢到用簡單嘅調味手法，保留住食物原有味道👍。✏️驚喜配搭之作：煙肉荔枝 荔枝配煙肉都系第一次食。煙肉本身嘅咸香味比清甜嘅荔枝味中和，估唔到兩者味道咁相配。雞皮餃子餃子好食與否，重點在於外皮。呢個餃子換上燒到脆樂樂嘅雞皮，當然好食😋。✏️健康之選 （冬菇+ 翠肉瓜+ 甜蕃薯）蔬菜燒完仲咁多汁多水份，就一定好食。蕃薯超甜，非常建議當甜品最後先食。✏️其他孜然薯條薯條夠乾身，外脆內軟，少見孜然口味值得一試。味噌飯糰燒飯檲外邊正正就係我最嘅飯焦。口感煙煙韌韌，記得趁熱食。蘋果，提子梳打提供貼心防疫用品❤️…Read More

同朋友喺哩頭吹下海風散步～延住長廊直行，見到Enso啱啱開門，望咗下原來有Lunch仲要門口menu「第二位半價」！！即刻同朋友entrance啦🙃話說朋友好鍾意日本文化，見到牆後幅酒樽已經大讚我無揀錯😎👍我哋一於落單咗串燒、炸物、飯定食同烏冬。酒 留返下次 夜小小嚟再嗌💁🏻‍♂️鰻魚飯個份量好足夠，我哋坐bar檯可以邊睇廚師操刀，邊欣賞廚藝！手法同衛生程度一目了然，可以順便偷師。連隔離朋友都大大欣賞廚師好有料👍擺盤同食物留咗好高印象👍豚肉烏冬 個湯好清好鮮甜，個盤仲有兜小食酸酸地可以配埋烏冬一齊食！得知雞肉喺新鮮空運返嚟，我哋特登嗌咗炸物串燒，咬落真係唔同d，有雞味👍望住個海嚟食真心好舒適！！…Read More

今日去呢間餐廳非常滿意。先由外觀睇，大部份日式餐廳會以木色為主色，感覺會和諧温暖一點。但相反呢到主色為黑白灰，感覺好高貴雅致。另外餐廳中央位置牆身有幅大型中式畫作，與餐廳本身偏向西式風格有強烈對比，中西設計交錯，令人眼前一亮。部份位置可以睇住師傅煮野食。雖然近住爐具，但係一啲熱氣同味道都冇。靜岡縣水果茄沙律 沙律醋酸酸地，作為開胃菜就最岩。海膽松葉蟹肉拖羅他他呢個剩係賣相都非常吸引。海膽、松葉蟹、拖羅係刺身之霸，可以同時食真係好幸福。味道鮮甜，口感又豐富，加埋脆口紫菜真係好夾。燒物：虎蝦雞皮串、阿波尾雞翼、秋葵、大䓤呢到既燒物火喉剛剛好，唔會燒到好乾身。最令我難忘既係呢個虎蝦雞皮串，虎蝦本身都夠哂大隻，足足有手掌咁長。外邊用燒好咗既雞皮包住，唔單止虎蝦爽甜，仲食到陣陣肉汁香味。鍾意食重口味既，可以加少少七味粉。聽講係餐廳秘製，比平時果啲辣味會再重一點。鵝肝茶碗蒸蒸蛋熱辣辣，食完個人當堂暖笠笠。蛋夠滑嫩，鵝肝味超濃郁。金鏻鯛配自家制宮崎粟米蓉鯛魚肉本身味道偏淡，有粟米蓉提味又變成一道新穎菜式。明太子燒飯團（明太子&辣味㬝）經網燒燒過既飯團外邊有少少飯焦，食落好香口。脆卜卜紫菜包住食，咬落咯咯聲。甜品糕點上邊淋咗些少黑煻，再含一兩片即食小菊，甘甘甜甜，味道唔錯。值得一讚呢到既服務質素好好👍🏻。…Read More

忙咗成個月，終於有時間約下閨蜜朋友食飯。今次揀咗位於尖沙嘴墨西哥菜餐廳。呢到環境好CHILL，服務都好好。鍾意呢到背景音樂夠大，可以同朋友大訴苦水又唔怕咁容易俾隔離枱聽到。今次係我人生第二次食墨西哥菜，所以呢到嘅大部份菜式對我來講都好新穎。雞肉墨西哥脆玉米片 呢個脆玉米片好香脆，再加埋酸酸，辣辣既雞肉同醬汁，食落非常開胃，大大碟都冇有怕。頭盤食佢就岩哂。玉米芝士炸丸子 呢粒丸子外皮硬硬地，咬落煙煙韌韌，裡面滿滿拉絲芝士非常邪惡，玉米味唔算好出，但整體味道唔錯。三文魚伴厄瓜多爾醬　呢道菜淨係賣相已經非常吸引，利用玻璃器皿裝住本身已經好有格調，下面仲放咗啲乾冰，煙霧下更顯不凡。呢到菜式細細碟，但材料非常豐富，有紫洋蔥、牛油果、蕃茄、青瓜、菜苗同酸酸辣辣醬汁，而主角三文魚粒粒份量非常之多，睇佢碟仔細細但食極都仲有。芝士菠菜墨西哥酥餅 芝士配酥餅本身已經合夾，仲有三款醬配搭，真係啖啖有驚喜。如果鐘意食肉類可以㨂牛雞肉餡料。…Read More

呢間泰式食肆位於銅鑼灣橫街小巷，位置唔太顯眼，朋友推介下先第一次黎食。呢到裝修乾淨簡樸，坐位間夠寛敞，環境舒適。店內最吸睛係門口格Tuk Tuk 車擺設，見到就即刻想去泰國行一轉。餐廳食物款式唔算多，不過就有香港泰國餐廳較為少見既船麵。今次就試咗個卜卜蜆冬陰功湯麵。麵份量好多，海鮮都非常足料。卜卜蜆有6大隻，仲有蝦，味道鮮甜，一粒沙都食唔到。冬陰功湯底同海鮮好夾，啲菇菇都入哂味，好食。湯底唔辣，食完個麵，仲可以飲哂成個湯。小食拼盤有齊哂我最愛既小食，有蝦餅，雞翼同炸雲吞。蝦餅真材實料，食到有蝦肉，好彈牙。炸芝士雲吞，皮薄夠脆，芝士份量恰度好。泰式炸腩仔，呢個平時出街好少食，因為好擔心腩肉肥膩，不過呢個炸腩仔完全冇油膩感，食落好乾身，外皮爽口，本身腩肉有啲香料味，再點埋個泰式醬就非常好食。…Read More

近排返工好忙，日日OT，已經好耐冇返屋企飲媽媽靚湯。今日俾我發現深水埗呢間有藥膳嘅舖頭，岩哂我呢啲成日捱夜，又冇湯水補補既人。先嚟鮑魚雞湯翅，呢碗湯真係冇得彈，非常足料。除左有原隻鮑魚，雞肉，仲有好多翅。飲到底部仲發現金華火腿，難怪個湯味咁香濃。仲足料過我媽媽啲老火湯。呢到個砂鍋生滾麵非常吸引，有好幾款湯底可選，仲可以選米線、米粉、白飯、賴粉同比較少店可揀嘅粉絲、刀削麵同銀針粉。砂鍋人蔘雞米線有滋補養生功效。個湯底好清甜，真係無添加味精。人蔘味唔算太突出，做麵湯底我覺得好夾。雖然湯底需要長時間熬製，但一啲都冇影響雞肉肉質，保持到肉質嫩滑。砂窩醉藥雞米線有助行氣活血，岩哂我呢啲手腳冰冷人仕。醉藥雞個湯底中藥味濃，淮山，紅棗，雲耳當然唔少得，淡淡酒味同樣做麵湯底好夾。雞份量好多。另外呢到有好多小食，試咗兩款都唔錯。皮蛋豆腐豆腐好香豆味，凍凍地，個醬甜甜地。食麵食到熱辣辣，食呢個降温中和下都唔錯。麻辣豬耳辣辣地勁開胃，豬耳爽口好彈，好食。店內整齊乾淨。…Read More

男友話好耐冇同我去旅行，所以今日準備咗一日大埔小旅行俾我。第一站去呢間L’amour法式餐廳食午餐。餐廳燈光好暗，深紅色牆身，黑色餐桌，加上金黃色吊燈同大酒櫃。氣氛好高貴，有情調。估唔到男友咁sweet。Lunch set有齊前菜，餐湯，主菜，甜品同餐飲。呢道每一碟菜式都好精緻，好似藝術品。餐飲：白酒食法國菜當然要配返杯美酒。Lunch set可選生啤或紅白酒。呢杯白酒加咗乾冰，有大量白色煙霧酒內飄出，好有氣派。前菜：波特酒釀葡萄.法式鵝肝凍呢個菜式都係第一次食。質感有啲似薯蓉，但再smooth啲，味道就比原塊鵝肝味道更濃郁。葡萄甜得來帶點甘味，同鵝肝出奇地夾。餐湯飲到好香菇味。 新鮮整好嘅蒜蓉包烘到好香脆。主菜：慢煮西班牙黑毛豬鞍.焦糖蘋果慢煮烹調絕對有質素保證。豬鞍肉質好淋，肉汁完全被鎖起，每切一下肉汁都會從肉裡流出。微微炭燒味再加上鹽嘅簡單調味，已經好好味。焦糖蘋果唔會太淋，保留到蘋果本身脆口感，甜甜的。另外其他配菜都好用心。甜品：美女與野獸個名完全估唔到係咩甜品，男友見我咁有興趣就點黎試。意想不到係一件唯美藝術品，一開透明玻璃蓋就有大量白煙飄出，甜品雕琢成玫瑰形狀，非常靚。終於明白點解叫美女與野獸。味道好似中式糕點。小食（1）：牛油烤焗美國甜薯薯條呢個並非一般薯條，係用美國蕃薯做咁薯條。甜甜地，雖然用牛油焗但一啲都唔油膩，夠乾身，焗到好脆。唔需要配茄汁或者其他醬汁都夠哂味。小食（2）：烤加拿大海膽多士海膽配多士，呢個食法真係好奢侈，好令人回味。海膽份量一啲都唔少，厚厚的，好鮮甜，完全冇怪味。配埋香脆多士好好食。Cocktails: Cinderella如果酒量唔好建議點呢杯。呢杯果汁為主，有輕量酒精。而且賣相都好靚，好吸引。呢餐好滿足。另外值得一讚上菜速度拿捏得好好。 適逢當日係放假日，我同男友都以慢活心態享用午餐。基本上邊傾邊食，食完一道菜隔一陣先再上另一道菜，可以好專心慢慢品嚐每一道菜，好relax。…Read More