bettytong17's Profile

今日活動又去屯門，今次揀咗呢間試。之前已經喺網上睇過佢嘅Menu，價格同款式都好吸引。嚟到唔使等位，大約八成滿，服務生好快就俾咗麵包我哋，我哋好快點咗餐，法式紅酒燴和牛牛面肉配白飯，意大利牛肝菌醬雜菌意大利飯，兩個餐都揀咗湯，今日個湯好似係蒜蓉忌廉湯，老公揀咗唔使加錢嘅咖啡，嚟到好靚喎，仲有心心拉花，我見特飲加錢唔算太貴，我就加咗$22叫咗個芝士奶蓋四季春配芒果，再add on$28朱古力心太軟。佢個包都好好食，杯嘢飲幾好飲，但係有少少似楊枝甘露嘅感覺。意大利飯好快到，老實個賣相就真係唔係幾好睇，不過味道真係唔錯…. 好味嘅。個牛面肉就等咗比較耐，接近半個鐘，嚟到試咗真係好食嘅，但係我老公食咗一嚿發覺係凍嘅，個心入邊仲係凍得有點兒多，小小冰咁，所以都忍唔住即刻同侍應反影，咁佢就同我哋即刻換過一份，服務值得一讚，今次就等咗唔耐喎，嚟到就熱到標晒煙，食落仲熱到有啲焫嘅，所以我覺得第一份咁耐係因為佢比較多單，我見到有不少外賣，所以正常唔使要等咁耐嘅，最後上埋個心太軟，食係幾好食嘅，不過老公話唔似佢自己整，似係現成嗰種，不過唔緊要啦$28都唔係貴。整體評價我比86分，佢除小插曲第一次個牛面肉唔夠熱，否則90分全部嘢都幾好食，而且佢唔使+1、性價比非常之高，我一定會再嚟。…Read More

之前見佢KKday有$108點心放題，買咗嚟試吓，不過每人另外要比$15茶錢同埋正價+1…$21.8，茶錢亦要+1。:)地點真係唔多就腳，有少少山長水遠，不過價錢算幾吸引就試吓啦。去到見到門口寫住成人$128星期日及假日就加$20….. 即係$148。就算地點偏遠同埋假期，入邊都差唔多坐滿晒！服務人員態度非常之好，一坐低就即刻俾個燉湯我哋，出邊有幾款嘢係可以任食嘅，包括鮑魚，海蝦，青口，紅豆沙同埋藥膳豬腳，鮑魚尺寸唔算細，而且肉質都幾腍，海蝦都算新鮮冇霉，青口正正常常，紅豆沙合格，藥膳豬手好味好腍，點心款式其實都唔少嘅，不過我哋都食唔到咁多，全部質素都係中上，我覺得好食嘅係嗰個雪山叉燒包同埋炒麵，呢兩款我哋都有再叫，但係第二次嘅質素就爭咗少少，另外蘿蔔糕我哋嗰個就白雪雪嘅，但我見到有啲人嗰啲就有濃邊嘅，所以佢啲質素係有少少參差嘅，落單啲嘢嚟得都好快，全程都冇漏單，佢所有嘢嘅尺寸都唔算大，細細件比，份量亦唔算多，所以就可以試多幾款。如果地點唔係咁遠，都真係幾值得推介，不過老公幾滿意，佢話下次再約屋企人嚟。…Read More

尋日出動去屯門，本身諗住試呢間食早餐，因為佢開得比較早，款式同價錢都幾吸引，點知遲咗出門口結果要食午餐。午餐價錢正正常常，唔算平、又唔算太貴。地方好大好闊落，坐得幾舒服，門口仲有好多麵包，如果即日收據就有八五折。:)咁我哋叫咗個$104匈牙利牛肋條意粉：套餐配飲品，$138大蝦泡菜卡邦尼燴飯：套餐配是日餐湯或田園沙律及飲品。牛肋條意粉好快就嚟到，依個可能比較預製，賣相一般，味道唔錯，但牛肋條好少，碎濕濕，呢個價錢真係唔多值，餐湯本來有兩款。雜菜湯同蘑菇湯或田園沙律，但係蘑菇湯同埋田園沙律都話冇，所以只可以揀雜菜湯，飲品就揀咗唔使加錢嘅芒果熱情果梳打，牛肋條就揀咗熱檸茶，熱檸茶整得差過茶餐廳，老公話冇味，芒果熱情果梳打就唔錯，好夠味，餐湯上咗連埋一件包，都算熱辣辣合格，跟住等咗好耐個燴飯都未到，追咗佢一次跟住就上嚟，呢個明顯好似真係即做，所以要少少時間，呢個就好有驚喜啦！泡菜味唔會太濃搶咗個卡邦尼味，蝦就四隻唔係多，正正常常尺寸唔算大，不過部分就有蝦腸，呢度扣少少分，但係個飯底就幾多煙肉，變咗成個飯好好味。午餐唔算太吸引，下次再嚟我都會想試早餐，整體可以一試。:)…Read More

之前見到介紹，見佢嗰個厚切鹽燒海苔牛舌溫泉蛋丼幾吸引，咁啱今日去旺角就特登去試吓，途經附近見到有唔少食肆，選擇都好多，中午時間唔算多人，大約三份一左右，但係見佢有好多外賣。特登嚟試嗰個牛舌嘅，不過睇佢餐牌都好多種類嘅嘢食，小食同飲品都好多款式，點咗個套餐$125包前菜、湯同嘢飲，單點就$105。之前有問佢前菜係乜，佢同我講話螺肉，嚟到嘅時候同我話轉咗芽菜，不過話如果我唔食可以同我轉，我話轉….因為我最唔鍾意食芽菜。上餐都好快，賣相都好吸引，我數過有7件牛舌，而且每件都幾厚好足料，不過食嘅時候可能個溫泉蛋係凍嘅，所以一入口蛋連飯都係凍嘅，牛舌都唔係好熱，另外食另一邊飯都係暖暖哋，個湯就好熱，不過味就淡咗少少，個螺肉味道正常:)。整體主角牛舌係好食嘅，但係美中不足就係唔夠熱，呢度扣分，鍾意食牛舌可以試吓，佢其他嘢都好多選擇，另外啲健康餐都好多人食。…Read More

上次搭枱工友推介下午茶，咁啱朋友約我下午茶，啱晒去試啦！平日下午茶時間冇乜人、同上次人山人海對比好大，今次可以坐下邊啦!我哋叫咗粒粒西多士配胡麻醬沙律菜，懷舊蝦多士配薯條，粒粒西多士幾特別，大大粒好味唔太甜，個沙律都幾正，蝦多士就唔係真係細個食嗰啲，但係都幾好食，個薯條炸得好脆，佢啲餐送凍熱飲品，就算汽水都唔使加錢，呢個俾個讚，擺盤幾靚，見人哋食啲炒嘢都幾正，如果唔係地點比較吊腳要特登坐輕鐵嚟，都會試多幾次。…Read More

有事去中環，順手約中環返工老友食飯，佢俾咗幾間選擇我，後尾我揀呢間。:)佢驚我唔識去，約咗我喺娛樂行等跟住行上去，佢話好爆又冇得book位，所以我哋兩條腿快速行上去，，時間尚早仲好吉、環境都幾清靜感覺舒服、睇咗餐牌即刻點餐，我哋兩個都叫咗7號餐：吉列豬柳炸蝦套餐，上餐都好快，嚟到….嘩！同餐牌一樣、好靚呀！老友之前同咗我講，飯、麵同沙律菜係可以無限refill，另外佢話嗰個麵好好食，試咗真係唔錯，豬柳係比較瘦，但佢都唔乾，蝦都算大隻同好脆，個麵真係好好食，嗰個湯汁有少少酸酸地咁，服務員好有禮貌，見到我哋食完即刻問我哋需唔需要refill、我哋加咗麵同沙律菜一次，唔知泡菜可唔可以refill呢？依家星期一至五午餐有八折，好抵。整體好滿意好滿足、有機會再去想試芝士豬扒。…Read More

老公睇電視見「美食X X報告」，介紹嗰個叉燒好正，今日特登踩單車過嚟試吓。嘩！食飯時間人山人海，因為附近冇乜食肆，而且好多地盤，所以好多工友喺度開餐，冇位咁滯。下邊有個位做多餸飯，好多款餸全部都幾吸引，我哋揀咗碟三餸飯另外叫咗個煎蛋叉燒飯，送冷熱飲品、汽水都可以，例湯任舀。不過你想飲都未必有，因為佢可能太多人啲碗都洗唔切，我咁好彩有一隻碗先有得飲。三餸叫咗燒肉、南瓜肉片同埋薯仔牛肉粒，味道唔差，正正常常而且抵食，不過最期待嗰個叉燒煎蛋飯，個叉燒真係有啲難食，完全唔係電視嗰回事，我老公話口感似香口膠非常之失望，千祈唔好試，費事中伏，不過隻煎蛋就整得好靚嘅，但見前邊食評有人夜晚食叫一碟例牌個樣又好靚喎。同枱工友話下午茶幾正同特別，下次可以試吓，午餐都會再試嘅，不過呢個叉燒我就唔敢再搏。，…Read More

星期日有活動去屯門，上網見到呢間開10點，而且幾多食評，打去問仲話一開就已經可以食午餐，一於嚟試吓。環境幾文青，服務員態度友善，坐得都幾舒服，Holiday Lunch Menu包飲品，價錢合理，選擇正常但唔算多，值得一讚係飲品選擇非常之多。其他單點食品款式好多，不過冇包嘢飲，散叫就比較貴，而且要加一，性價比就爭少少。😔午餐；日式紫蘇烤雞意大利粉配果茶，散叫：肉食狂歡薄餅、Espresso Tonic，老公本來諗住叫老例…..檸茶果類，但係一杯都要成$28，所以情願叫杯貴嘅，不過成$46杯真係有啲貴，但即時做咗會員有得減$10 coupon。上咗杯果茶先，雖然係跟餐，但係真係幾好飲，個顏色都好靚，裏便有橙同西柚，味道適中，之後上埋個意粉，真心高質，個意粉個底好好味，老公嗰杯嘢飲其實係好飲嘅，佢話依啲出邊一般都係咁上下價錢，我真係唔知米貴。最後上埋個Pizza，顏色好鮮艷，睇落都好正、食落真係好好味，而且好多料，呢個真係強烈推介。整體全部嘢都好食，下次會再嚟，見佢有好多分店，下次去其他區都可以再試，我見到佢下午茶個Menu都好正，如果時間夾到都會試。…Read More

老友生日🎂飯聚，壽星女揀咗呢間，好方便，啟德站行去好近，平日夜晚人流都幾多、幾旺。:)餐廳環境唔錯，幾有情調，地方亦幾大。我哋點咗1。煙燻火腿巴馬臣芝士西班牙薄餅2。北海道帶子海膽醬墨汁意大利麵3。燴牛臉頰，羊奶芝士粟米蓉4。拖肥布甸蛋糕。整體樣樣都好食，特別係牛臉頰，好腍份量好足，有兩大嚿，出邊唔係咁多餐廳有，份量亦不會太多，意大利麵帶子好大隻夠新鮮，好多蟹籽定魚子。咬落去卜卜聲，之前打個電話問，有朋友生日可以點甜品，同我安排點枝蠟燭同插個生日牌。整體大家都好滿意，會再嚟同朋友或家人食。…Read More

見介紹中午半自助餐，book咗尋日去試，記得要book位，平日都好爆，walk-in室內完全冇位，室外兩張枱咁熱冇人會位。主菜加$20自助吧，叫咗最貴兩款餐，牛扒好好食，個人喜好，我哋通常食七成熟，但好多餐廳一係就整得太生、一係就整得太熟，但佢就啱啱好，啲肉又完全唔韌，豬柳正常冇乜特別，反而底嘅薯蓉磨菇炒菠菜好好味。自助餐啲嘢食全部都幾好食，個湯都唔錯，蛋沙律同薯仔好正，甜品唔多款但款款都幾有質，反而最差就係個免費飲品，凍檸檬茶還正常，個橙汁同埋嗰個咩西柚茶….可能溝得太多水好淡完全冇味，後尾同佢反映跟住個橙汁再加過就正常好多啦！我哋認為下次再試可以食啲平啲嘅餐，咁個性價比就會高好多。冇任何優惠，自己book位去，唔知點解個食評成日都唔俾出。…Read More

之前食過佢嘅片皮鴨，唔貴另加小菜質素都唔錯。見佢有片皮鴨放題，KXday coupon都幾抵，買來試吓。一坐低就上三個頭盤，以人頭計，每人有一隻茄汁大虎蝦，燉湯同埋五頭鮑魚，呢三款只係上一次嘅啫，唔係任食，但係三款質素都唔錯，鮑魚好腍，個蝦好彈口夠新鮮。任食部份款式都唔少，飲品仲有果汁先生同紅白餐酒，我同老公戰鬥力其實都普通，淨係試咗圖片嗰啲，應該有五份二嘅嘢都冇試到，3小時放題，我哋其實食咗個半鐘都已經飽，坐咗兩個鐘頭左右就走。但所有嘢全部都好食，全部都夠熱，上得都好快同埋都冇漏單，片皮鴨主角正常水準，個炒麵夠乾身好味，唔係怕飽，我哋都想叫多次，老公好欣賞個炸生蠔，裏面隻蠔好大，個蝦仁炒蛋我覺得相當唔錯，隻蝦好大隻同埋都好新鮮，炸豆腐好脆，連最尾個紅豆沙我都覺得好好食。唯一有少少令人唔太愉快就係有一個侍應嘅態度好麻麻，因為我哋後尾想叫兩杯橙汁，諗住費事又寫一張紙就同佢就咁叫，佢話我哋要入紙落單，佢態度就唔係咁好，之後我有同佢講原由，其他服務員嘅態度就幾好，但見之前有人講話服務差。…Read More

今次第三次嚟，終於試到啦！第一次活動完時間比較晏，打去問…..原來已經差唔多落場，第二次直接嚟，點知原來放特別假。今日試咗牛舌意大利飯，黑毛豬肉眼，追加餐湯同小食炸海苔魷魚鬚。餐湯係黑松露蘑菇湯，好夠味同口感夠滑，魷魚鬚同薯條友人個人口味略嫌乾咗少少，我覺得正常，兩個主菜都好好食，牛舌有三塊都算厚，個意大利飯裏便有菇同埋牛舌肉，好豐富份量亦都唔少，豬扒夠腍，我下次嚟都要試，個餐只係跟嘢飲，冇加一，老細好 nice，地方唔大、洗手間好乾淨，呢個價錢同質素好值得試。…Read More

本來諗住去嗰間餐廳，點知放特別假！臨時轉軚去十年，本來都想嚟試㗎啦，咁今次就試佢先啦！舊舖有去過，不過冇幫襯、因為當時個Menu唔係太啱食，而且嗰度好細得幾張枱，lunch通常都有人等，而且唔係太好坐。而家依度大咗好多，坐得幾舒服，Menu多咗啲嘢食，可以QR code落單，叫咗豬仔髀$70冇加一，包湯包嘢飲，今日粟米湯味道都唔錯，豬仔髀有四件夠份量，肉質唔硬唔乾好味道，薯條夠熱夠脆，但如果可以轉沙律就仲好，再叫咗追加小食，$6件價錢唔貴可以逐件叫幾好，飲品我要咗橙汁，正正常常冇乜特別要求，全部都熱辣辣幾好味會再去。…Read More

今次第2次嚟，補返個食評！招牌牛肉麵超級好食，$72蚊超多餸，有牛丸，牛肚，牛腩，牛筋同蛋，好大碗包冷熱嘢飲，仲可以免費升級指定加大版，追加小食個排骨唔貴好食而且好大塊，鹽酥雞我就覺得普通，始終粉比較多其他小食都唔錯，花枝丸都彈牙，夜晚唔知但下午冇加一，最衰有啲遠要特登過去。第一次我食雞扒係好食嘅，老公上次個牛肉麵好吸引，所以今次一人叫一個，不過太多嘢後尾個麵都食唔晒，我同佢講下次叫一個招牌牛肉麵加底再加小食應該都夠。…Read More

之前諗過想試但一路未試！熊貓外賣優惠見到有佢，啱哂試吓。牛骨湯刀削麵，大雙拼餃子，牛肉蔥煎餅，另外跟咗個細細份泡菜。牛骨刀削麵個湯唔錯嘅，奶白色唔會冇味同好鹹，麵嘅份量好多同埋都幾彈牙，配菜蛋絲唔少，有啲紫菜個湯裏面有少少菇，牛肉有五片味道可以，不過好薄呢度扣分，大餃子真係好大隻，裏面嘅餡好夠，食到都幾開心，泡菜就辣咗少少，第一次叫做試吓，下次都係會叫返豬肉餡，牛肉蔥煎餅唔錯，底少少脆，牛肉就唔多㗎啦，但味道唔錯嘅，嗰個泡菜都幾好食，唔會好鹹，如有優惠算抵可以一試。…Read More