雲海滙

Open Now

Now Closed

之前食過佢嘅片皮鴨，唔貴另加小菜質素都唔錯。見佢有片皮鴨放題，KXday coupon都幾抵，買來試吓。一坐低就上三個頭盤，以人頭計，每人有一隻茄汁大虎蝦，燉湯同埋五頭鮑魚，呢三款只係上一次嘅啫，唔係任食，但係三款質素都唔錯，鮑魚好腍，個蝦好彈口夠新鮮。任食部份款式都唔少，飲品仲有果汁先生同紅白餐酒，我同老公戰鬥力其實都普通，淨係試咗圖片嗰啲，應該有五份二嘅嘢都冇試到，3小時放題，我哋其實食咗個半鐘都已經飽，坐咗兩個鐘頭左右就走。但所有嘢全部都好食，全部都夠熱，上得都好快同埋都冇漏單，片皮鴨主角正常水準，個炒麵夠乾身好味，唔係怕飽，我哋都想叫多次，老公好欣賞個炸生蠔，裏面隻蠔好大，個蝦仁炒蛋我覺得相當唔錯，隻蝦好大隻同埋都好新鮮，炸豆腐好脆，連最尾個紅豆沙我都覺得好好食。唯一有少少令人唔太愉快就係有一個侍應嘅態度好麻麻，因為我哋後尾想叫兩杯橙汁，諗住費事又寫一張紙就同佢就咁叫，佢話我哋要入紙落單，佢態度就唔係咁好，之後我有同佢講原由，其他服務員嘅態度就幾好，但見之前有人講話服務差。