小桃bb's Profile

日式燒肉店很大，店內空間感十足，位座寛廣舒適，食物都新鮮乾淨，燒肉的爐也夠火力，抽煙力強，而且燒到個網燶左，可以換網，非常貼心。有A至D價錢選擇，我地揀左B 嚴選牛肉放題 ，2小時任飲任食 $448，自助取食物有沙律吧、飲品、甜品及雪條，用手機掃碼自助落單，點菜很快很方便，亦無漏單，收碟也勤快，服務很好。用木船上菜牛肉，又有乾冰煙，感覺好華麗。有特選牛肋肉、特選牛里脊、特選牛肋條。牛味濃郁，肉質柔軟鮮嫩，肋肉有咬口，里脊嫩滑多肉汁，呢3款牛肉都少脂肪，食完唔膩，但有牛香。大大隻蝦，肉質爽彈，蝦味都重。帶子嫩滑鮮甜，加牛油更正。另外，用木桶擺盤的肉，包括有牛肋肉、牛里脊、豬肉、雞肉。呢2款牛更瘦，食落牛味較重，更有咬口。五花豬肉多油花，燒完好香豬油，配生菜食解膩感。雞脾肉又嫩又彈，連皮都香口。香蔥同鹽漬 牛里脊，味道更豐富，前者香口惹味，後者更顯鮮甜嫩肉。有多款口味醃的牛肋條，洋蔥醃的有微微甜味，而牛肋條真係柔嫩得來帶彈性，口感很正。兩色蔥花牛舌，用2款蔥，都係超好味。蔥花就清香提味，蔥白蓉就刺激微辣，有大蔥的香。薄切上等牛舌芯，爽彈口感，味道佳，食多d都唔膩。壺漬牛外橫膈膜，醃得入味，而且都用厚身肉塊，入口夠肉感，多肉汁又多油香。壺漬牛肋肉也夠入味，肉嫩微甜，份量多，味道更香濃，肉味更出。壽喜燒牛里脊肉，薄而大的牛肉，輕輕燒熟就放入蛋汁醬汁，充分沾滿醬汁同蛋汁，又香又甜，肉質嫩腍，真係食緊壽喜燒嘅感覺。極上厚切牛舌，超厚的牛舌，雖然燒耐一點才熟，但入口勁爽口，嚼勁十足。有四款果茶，四款果汁，白桃汁好香好正，仲有兩款茶包，可沖熱茶。汽水都有好多款。醬料也有幾款，有柚子醬汁，酸酸地消膩感。沙律吧好多蔬菜，都新鮮賣相靚，但我點蔬菜來燒。牛奶布丁味道濃郁又香滑，木槺布丁綿滑軟身。牛奶雪條奶味超濃，角十棒都好正，酸甜清爽。…Read More

新的一年同朋友來食日本料理，獎勵一下自己。餐廳裝潢像極日本，門口位於的流水及小庭園很優美，我們坐的大枱光鮮寬闊，可以放齊食物打卡影相。另外係門口見到有日本房好靚，係tatami 位，而且私隱度高。我們對住吧枱位也能遠望廚房正準備刺身。餐廳的服務也很好，店員都很了解菜式，上菜速度也剛好。毛蟹醋啫喱，賣相精緻高貴，有魚子醬及金箔，毛蟹拆肉拌蟹膏，味道極鮮帶蟹膏濃香，加魚子醬提鮮，醋啫喱酸酸地好開胃又清新味蕾，真係罕見的前菜。(特上) 雜錦刺身拼盤 $1288，赤貝很大，爽厚脆甜，鮮味十足。海膽放上紫菜食，一脆一軟好味，海膽鮮甜濃郁，入口軟綿很快化開，有餘韻。剝皮魚點酸汁食，有清新魚香，味道清淡優雅，肉質爽彈微微韌性。牡丹蝦肉質細膩軟綿，刺身都保持彈牙爽口，鮮甜好味。鰤魚好厚切肥美，清甜鮮味，魚味濃厚。中吞拿魚腩，魚味較重，魚脂芳香，肉質柔嫩。鱸魚炙燒魚皮散發香味，味道清甜口感柔嫩。鯛魚清淡鮮甜，肉質微彈，魚味唔會好重。池魚好厚身，肉質爽口很有咬口，味道較清爽不膩。大吞拿魚腩入口即溶好有魚油香，肥美油潤魚脂香濃。照燒羊架 (1件) $128，唔會太肥只帶邊位的脂肪，很油香且不羶，羊肉熟得剛好，越咬越多肉汁同羊味，近脂肪的肉質更加嫩腍，少少筋位有咬口，照燒汁很香，咸中帶微酸可消膩感。西京燒銀雪魚 $268西京燒即用白味噌、味醂、料理酒、糖 的調味料漬銀雪魚，待入味後抹走醬料再燒烤銀雪魚。金黃色的銀雪魚，肉質雪白細嫩，豐富脂肪令魚肉更香更滑溜，魚皮也燒得脆口，魚肉味道甜甜，很想配米飯。雞腎串 $78 (2本)，串燒食bar枱後的半開放位燒，但店內都無味，抽氣做得很好，雞腎串帶有陣陣燒烤香，雖然只用鹽同黑椒，但燒得很香口惹味，雞腎唔乾反而很爽脆帶嫩，配酒必食。牛舌 $108 (2本)，特別在爽中帶嫩彈，比一般串燒店更多肉汁更嫩潤，易咬開又有嚼勁。甜品係紅豆湯伴燒年糕配黃豆粉小丸子，紅豆湯好甘甜帶咸味很有層次，燒年糕熱熱的，軟糯帶香，配紅豆湯超好味。紅豆湯味道會較甜，因為要配搭丸子食，將丸子沾紅豆湯食，口感煙煙韌韌不痴牙，很喜歡呢款日式甜品。…Read More

呢間餐廳嘅燒春雞好受歡迎，必食之選。每次去灣仔都會忍唔住去食。燒春雞可以揀配薯條或沙律或意粉。今次揀意粉，係茶記嘅意粉，口感會腍d，但蕃茄醬個味係由細食大嘅味，個人覺得幾正，不過凍左d。燒雞今次燶左d，不過仍然保持水準，皮夠薄唔肥，香脆都不得了，雞肉超嫩超多肉汁，沾鹽食原味最正，雞胸也嫩滑，沾甜辣醬好滋味。另外叫左吊燒雞跟飯，所以叫多個菜食，炒得好香有鑊氣，份量多好抵食。吊燒雞好香好入味，個皮都好香，不過唔夠燒春雞咁嫩，反而呢款食個味道，惹味d。…Read More

閒日晚上8點，大約排隊20分鐘，都算快。最近天氣轉涼，就開始想食煲仔飯，不過呢度個蠔餅都好吸引。蠔餅（細）$53，鴨蛋已轉左雞蛋，不過都炸得好透好脆身，蠔肉超大粒，蠔味濃郁，非常香脆，油味偏重。金銀蛋芥菜肉片湯 $68，原粒咸蛋同皮蛋，介開連湯飲，好正。芥菜唔苦又腍身，肉片3塊都幾滑，個湯好夠菜味，清爽順喉又下火，好好飲。白鱔滑雞煲仔飯 $96，保持水準，白鱔好滑好有彈性，加左豆瓣醬更香甜，滑雞份量少左d，但都嫩滑多汁。個飯好有飯香，飯焦幾多。梅菜排骨牛肉煲仔飯 $76，牛肉好滑，排骨入味又嫩，加梅菜咸中帶甜，拌飯好味，呢煲飯焦少d，但仍然好香飯味，米飯乾爽好咬。…Read More

估唔到呢間小店嘅上海野都幾好味，價錢親民，份量又夠，抵食。自選冷盤 $68/3款，好抵食，可以試哂3款，份量亦剛剛好，岩哂2人share。招牌醉雞成隻雞腿好正，夠入味，酒香不醉，雞肉嫩滑。糖醋排骨酸酸甜甜好開胃，煮得好入味，肉質鬆化，份量都幾多。鎮江肴肉好爽彈滑溜，入口溶化有肉汁香，沾醋食更香。鮮肉小籠包 $32/4隻皮薄餡靚多湯汁，肉汁好鮮味，肉餡軟腍香。酸辣湯 $28都幾多料，有金針菇、木耳、雞絲......酸度幾勁，越食越辣好刺激，但好快退去辣感，唔會太杰身，都幾好飲。豬排擔擔麵 $50個湯式夠濃郁，有花生同麻醬嘅香，微辣好惹味，加正麻油所以更香，個麵掛到好多湯汁，超正。炸豬排香脆，不過乾左d，浸落湯汁度會正d。上海粗炒 $52炒得幾香，但唔夠味，肉絲同椰菜都好味，粗麵有咬口煙韌，唔會好油，食完唔膩。…Read More

同友人慶祝食晚飯，揀左尖沙咀間意大利菜，走親民路線，傳統正宗風味的意粉同PIZZA 都好吸引，而且飯後甜品都好出色。日本北海道珍寶帶子墨汁意粉 $238，珍寶帶子係超級大隻厚身，煎得剛剛好，入口外面香口，內裡嫩滑微彈，而且厚身的帶子口感非常好，有肉感又滿足，海鮮味突出。墨汁意粉口感 al dente，爽口彈牙、有嚼勁，沾滿墨汁好鮮味，加左三文魚籽更加爆發鮮味。意式香辣烤雞 $298，烤雞上面有好多香草，醃得好入味，簡單烤焗食出雞原來，調味唔重微辣好開胃。一整隻雞好有家庭風味，自己切開分享，雞肉保留好多肉汁，而且都好嫩彈，雞皮沒油同埋好香脆，平時唔食雞皮，都忍唔住食左。巴馬火腿芝士佛卡夏薄餅 $208，自家製薄餅厚薄適中，上面的蕃茄蓉幾濃，芝士仲好香好正，好多ham 透薄柔軟有肉味，特別咸香同少少脂肪香，仲有大量芝麻菜帶香微辣。Tiramisu $78， 平時食開都係奶味同咖啡味平衡，呢款加多左朱古力，多左層次感，質感細膩輕盈，唔會太甜。from miles away $98，由熱情果漿、雲尼拿、青檸汁、菠蘿汁等等調成的特飲，果香四溢，酸味較突出，好開胃消膩，面層的泡沫輕盈綿密增加口感。…Read More

今次又同朋友去尖沙咀食鐵板燒，呢間餐廳好推介，除左食物高質又好味，環境同服務非常好，高樓底夠空間感，又乾淨舒服，食完個身無油煙味。前菜三小點，由左邊開始食起，冷豆腐好嫩滑清淡，正好清清味蕾準備享受美食。中間的木魚絲漬茄子，木魚帶出鮮味，茄子清甜。右邊的煙燻雞刺身，燻製的咸香味同煙燻香，質感微爽。時令生蠔係宮城縣生蠔，肥美鮮甜，蠔味重，肉質爽口，膏位creamy，辣蘿蔔蓉同醬油提鮮。沙律用左海葡萄，脆口質感為沙律增加口感，沙律菜乾淨清爽，醋汁酸酸地好開胃。極上刺身有五款，最重味又最正係拖羅，豐富油脂入口即化，滿口脂香。牡丹蝦份量十1足，鮮甜質感細膩。油甘魚又肥又香，口感微彈 。帆立貝嫩腍甘甜。 赤身柔軟重魚味。鮮活南非鮑魚，賣相好靚好高級，肉質細膩嫩彈，口感非常好，食得出食新鮮貨，連海藻醬食更鮮，仲有牛油炒的海帶爽口又好味。帝王虎蝦，擺盤超級靚，完全表現大廚實力，將虎蝦分切煎熟，再重新排列出蝦型，肉質爽口彈牙煮得剛剛好，加上用蝦膏煮成的蝦油，令蝦味更濃更香，而且唔會蓋過蝦的鮮味，蝦頭仲有濃郁惹味蝦膏，而旁邊連腳的部位也煎得脆卜卜好香口。茶碗蒸打開蓋就傳來好香的松露香，雞蛋加左鰹魚湯蒸煮，特別鮮味甘甜，蒸蛋水嫩細滑，配三文魚籽食仲鮮。鹿兒島黑毛豬肩，份量都好夠同朋友share，豬肩邊位有少少脂肪，入口微彈肉感滿滿，中間豬肩有咬口，細嫩多汁，且豬味突出，配埋餐廳特調醬汁，更將味道提升。鐵板燒日本蔬菜，帶有香烤味，蓮藕爽爽脆脆。蘆筍好大好正，清甜無渣。冬菇很香，而且好多汁。南瓜很甜又外脆內柔綿。鐵板炒飯加左梅醬，除左顏色靚，其酸味有助解膩，炒飯好香又爽口，鐵板夠熱所以炒到粒粒分明，仲有左櫻花蝦，特顯咸鮮味，食左半份炒飯後，加餐廳提供的上湯做茶漬飯，上湯令個飯更鮮更特顯梅味。味噌湯好夠熱，味道唔太咸飲完好舒服。甜品係紅豆雪糕，夠哂冰凍，紅豆味好香甜，加左d脆脆好咬口。…Read More

今次去呢間好正既放題，有勁多海鮮自己撈，又有刺身、小食、炸物、煮物、雪條同啤酒飲品，全部任食任飲，淨食海鮮都值回票價。地方都好大，冷氣夠又坐得舒適。價錢分三個，分別係上忍、中忍有120分鐘同牛肉會靚D貴D，而下忍90分鐘有牛小排同牛板腱，我加左$58要清酒蜆鍋，有勁多蜆。先出去撈海鮮，有個大魚缸放滿幾款海鮮，有賴尿蝦、海蝦、蟹、鮑魚、蜆，先拎左冰粒用黎冰住海鮮，因為d蝦一夾就彈，撈鮑魚同蜆就最安全，蟹就有繩唔怕郁。賴尿蝦全部都好大隻，個裝海鮮小筒都差d唔夠位放，d肉嫩嫩地，好鮮甜。海蝦好巨大，d肉勁爽彈，口感超好。蟹唔算好大，但係蟹肉一絲絲好新鮮，d汁仲好鮮味。鮑魚比平時街市買到既大隻，好厚身但唔會硬，反而勁軟腍同彈牙，可以勁食。蜆就同個鍋一樣，都肥美嫩無沙。牛小排，雪花好靚分佈平均，肉質鮮嫩，肉味重又香。牛板腱，好咬有彈性，味道濃郁。豚肉片，嫩彈滑口又唔算好肥，食完唔膩。呢度仲有啤酒任飲，有兩款揀，配海鮮同牛肉真係好爽，仲有特別既玻璃樽裝汽水同茶，自己開同夠哂凍，都好正。炸蝦天婦羅賣相靚，個炸粉薄，蝦都大隻同明確好爽口。帶子天婦羅好食，帶子都大粒又夠嫩。炸香蕉甜甜地又綿又香。蒜片牛柳粒係厚切粒，一咬爆肉汁，牛味重又惹味。雪糕有幾款，雪糕糯米滋好味，仲食左甜筒同威化格仔雪糕。店員好勤快清走枱上個裝蝦殼蟹殼既筒，而且環境都乾淨衛生，食左好多海鮮好滿意。…Read More

天氣轉凍就掛住煲仔飯，同友人去食煲仔飯，呢度仲有埋串燒，好吸引。豉汁白鱔飯 $98白鱔肥美有魚油白，肉質嫩滑充滿彈性，個汁好入味，加甜醬汁，個煲仔飯更香更好味，飯焦好香脆。臘腸排骨飯 $82排骨大粒多肉，入口都嫩腍好咬，醃得入味，配油潤甘香的臘腸，腸皮微脆，味道咸中帶微甜，好夾煲仔飯，米飯乾身有咬口，個底仲有飯焦。豬、牛、雞 串燒 $42好香好惹味，微辣且加孜然粉，更有風味更香，豬肉串最正，爽彈口感仲要厚身肉粒。雞肉較扎實但都唔會乾。牛肉有咬口。肥牛金菇卷 $28賣相味道都正常，肥牛燒到油脂香味出黎，金菇吸哂牛肉味。燒娃娃菜 $38燒得夠乾身，好香口，加甜醬油好爽甜，份量偏少。香蒜黃金菇 $35大量蒜蓉超級香，金菇吸哂d味，且份量頗多，好正好食。黑糖珍珠鮮奶，黑糖味唔太重，同奶味幾平衡，但珍珠勁硬。荔枝玉露，好飲夠凍，唔會太甜，食煲仔飯同串燒都岩飲。…Read More

今晚特別來食燒牛肉飯，開左都有一段日子，仍然大排長龍，幸好店舖座位較多，所以等約15至20分鐘就可以入座，都接受到。有牛或豚做主材料，分別有清淡的鹽燒或濃味的醬汁燒，另外，還有定食、咖哩及小食，自由配搭，彈性大。其中鐵板更是特色。燒牛肉丼 配溫泉蛋 （大 $65）飯的份量分兩款，（並）或（大），肉及飯都會多左。燒牛肉份量幾多，有濃郁醬油香，微甜帶咸味，牛肉味也濃郁，肉質微彈充滿肉香，洋蔥絲也甘甜惹味。牛肉唔會好肥，邊位係有少少肥牛的脂肪，大部份比例係肉，食完唔膩。飯量亦很足夠，珍珠米好咬又有飯香，餐廳有教食法，要拌勻飯、牛肉同醬，每口都食出日本牛肉飯的真味。餃子 （3件）$15價錢偏貴，但都煎至熱辣辣上菜，皮薄餡靚，個皮煎得香脆，餡唔算好滿，但有菜肉香。個飯配溫泉蛋，令牛肉更香滑，蛋黃汁的濃郁與牛肉汁同飯混合，味道豐富好味。味噌湯 $10雖然點左汽水，但食日本飯要配味噌湯，先叫完整。個湯唔會過咸，帶味噌香，帶海帶及豆腐皮絲，味道都幾好，係份量有點少，好飲但唔夠喉。…Read More

今晚同友人去食鐵板燒，有幾款套餐都好豐富抵食，襯新開人流唔多，即刻去食，所以都好易預約有位。前菜三小點，右邊的天婦羅紫菜海膽，脆口炸衣內裡係軟綿綿海膽，甘甜帶濃郁海膽味。中間的木魚絲醃茄子，有木魚鮮味，微咸的茄子，軟滑清甜。左邊的螢光魷魚入口爆發鮮味，有醃製的咸香味，魷魚也很爽口。刺身有四款，三文魚及油甘魚很肥美嫩滑，魚油係口中溶化，特別有魚油香。甜蝦入口鮮甜，口感軟綿細膩。吞拿魚赤身，魚味較重。季節時令生蠔，估唔到生蠔好大隻，蠔味濃郁很肥美鮮甜，肉質清爽細膩，醬汁帶咸且加了點辣。香辣大蝦沙律，調味很到位，香中帶辣好惹味，特別提供一款辣油，由大廚用鐵板整成，有芝麻香味且辣椒香氣突出，加入沙律或配大蝦，味道更提升。鐵板燒鮮活南非鮑魚，超級好味同新鮮。口感嫩彈，肉質細嫩，廚師特製的海藻醬更為鮑魚提鮮。仲有鮑魚肝臟，味道微咸香口，有濃郁內臟香，有別於一般餐廳製成的醬汁，感覺過咸，而呢度可以食到真正食材味道。茶碗蒸熱辣辣好溫暖，有蔥花清香同鰹魚鮮香。火喉控制很好，蒸蛋非常嫩滑，魚籽很鮮，有爽口木耳絲。鐵板燒日本蔬菜，有微微香烤味，有陣陣菇香，且保留濕潤感。南瓜口感柔綿，甜味重。蓮藕及蘆筍都很清甜爽脆。帝王虎蝦，果然係帝王級，虎蝦超級大隻，煮得剛熟，鮮紅色加上晶瑩剔透蝦肉很吸引，肉質細膩爽彈，鮮美嫩滑，上面層油都好香蝦味。A5宮崎和牛西冷，油脂非常豐富且分佈平衡，肉質細膩順滑，有種入口即溶嘅感覺，滿口牛脂香，牛肉味也很濃郁，蒜片很香也很脆口。個人喜歡沾幼鹽食和牛，食到真正原味，但開始膩時，我更喜歡個蘿蔔蓉酸汁，微酸清新解膩。其次係個味噌汁，有咸香味噌味，而芝麻醬較普通。鐵板炒飯粒粒分明好香，口感乾爽有飯香，飯內有櫻花蝦和白飯魚乾，所以更加香口更有鮮味。仲提供左上湯給客人做茶漬飯，個飯更綿糯更有鮮味。味噌湯暖和，飲得舒服，最讚係唔會過咸，有少少海帶同豆腐。甜品有三款，其中的咖啡凍最吸引我，咖啡凍質感軟彈滑，唔係硬膠質感，所以口感非常好，而且味道濃重回甘，配埋上面的忌廉，甜度岩岩好。…Read More

今日掛左成日風球，決定外出晚餐，食完回家休息。夏天無咩胃口，加上疫情無旅遊，太掛住泰國美食，所以決定食呢間泰國餐廳，主要想食蝦餅，但估唔到呢間咁特別有芝士蝦丸。香濃芝士蝦丸 $98好邪惡好難抗拒，超爆多芝士，非常香濃芝士味。爽口彈牙帶濃郁蝦味的大大粒蝦丸，外層炸至香脆，內裡係爆餡的芝士軟心，入口咸香濃郁，彈牙口感豐富，沾甜酸醬更加滋味，份量剛剛好，食完唔膩。芒果沙冰 $36好重芒果味，鮮甜帶果香，味道濃郁唔會太甜，沙冰打得細滑，好好飲。海南雞飯 $68賣相吸引又份量足，海南雞有齊雞翼、雞脾、雞胸部位，平均又可食到唔同部位，仲配有事日例湯，好豐富。雞肉超嫩滑，雞脾彈滑嫩腍，雞翼唔會好細隻，雞胸都嫩而不乾，雞味重又唔肥膩，雞皮也爽滑。沾酸辣汁，味道更香。油飯做得好，乾爽有飯香，雞油都食得出，帶點黃薑味。配埋雞腳例湯，雞腳有咬口，腳筋有膠質，冬瓜清甜，個湯唔油仲好溫順。…Read More

今日星期日同朋友來觀塘一間餐廳食午餐，幾多人排隊，等左一陣就可入座，餐廳幾靚，藍色牆身，配一大塊玻璃窗，外面光帶入室內，感覺舒服。我係見到個甜品而吸引來食，就係Tiramisu。Pork Collar Butt擺裝精美，配菜種類多，味道亦好，份量十足。用豬肩肉配搭蘑菇蠔醬汁，為豬肉提鮮，唔會過鹹。肉質嫩彈，豬味都重，唔會油膩，但有少少油香；配菜有新薯，口感佳；火箭菜好香，加上芒果粒同紅桑子減油膩，食完唔會有負擔。比較特別係有d菇粒，亦有炸脆的菇片，好好味。Hunt Signature Tiramisu我期待嘅Tiramisu，超級好食。手指餅浸過咖啡酒，有咖啡香同酒香，口感鬆軟綿綿，非常輕盈，蛋糕好幼滑，有奶香同淡淡cream cheese 味，香甜味美。上面朱古力脆片好正，仲有裝飾的橙脆片都好味，脆卜卜又唔會酸，甜甜地，口感估唔到咁好的果乾。Green Tea Latte奶泡密度高，輕身綿滑，抹茶味濃郁，茶甘奶香，而且唔太甜。心心拉花好靚，飲完心情變得更好。…Read More

朋友介紹呢間石燒牛肉，今晚終於來食，原來仲有埋海膽三文魚籽，和牛鵝肝丼飯，選擇多左，好吸引。餐廳基本有6款牛部份／款的選擇，加$32可揀5選3的湯、飯、薯條、沙律、汽水。廚師推介就寫在黑板上，今日我地叫左羽下牛肉。牛県燒肉海膽丼 $168賣相吸引，份量也足夠，呢個燒肉配海膽的組合亦好夾好正。先食薄薄燒肉，外層燒得香口又脆，肉質嫩腍且肉味重，都有肉汁，少少脂肪位，入口好香。配搭海膽同提鮮的咸香三文魚籽，味道更提升，口應亦豐富。另外，用紫菜包海膽三文魚籽及飯，味道也超好，好似邊食壽司，邊食燒肉，雙重滿足。另一食法，就係刺開生蛋黃，用牛肉沾蛋汁食，特別滑溜和香濃，加芥末食就更消膩。羽下牛肉 200g, $168配搭2款醬汁，一款係紅酒牛肉汁，用黑醋、紅酒、牛肉汁煮成，味道好夾燒牛肉，令味道更濃更突出。另一款阿根廷青醬，用蘿勒、蕃茜、薄荷、蒜蓉、檸汁……味道清新又重香草味，令肉味更香。餐廳先煎封牛排，以1成熟放上熱石上菜，客人可切開牛排，按個人喜好慢慢煎熟，熟度自己控制，好玩又好味，仲好熱辣辣。羽下牛排就是牛肩胛中軟嫩的部位，口感就如牛小排相似。豐富的油花、分佈均勻，肉中間有點細筋，好有咬口，肉質香甜且牛味濃郁，配珍珠米飯真係好香好正。味噌湯溫和暖胃，咸度剛好，仲有兩隻蜆，肉質爽口，還有海帶同豆腐。薯仔沙律好粉綿好香，口應非常好，味道調得也好。…Read More

今次食秋冬限定（食慾之秋），有多款特別壽司，其中揀了數款有興趣來食。鱈魚白子軍艦，軟綿綿好creamy好濃郁，配酸酸甜甜醋jelly，味道幾夾。白子係香港少見，有興趣又未試過嘅朋友，可以試下，價錢及味道都好吸引。帶子雙味，醬油炙燒唔會好咸，燒過有醬油香，味道也濃縮左；味噌炙燒偏咸，但味噌沉實的咸香味，仲有種田野feel。海松食貝，爽爽地有微微鮮味，幾清爽。螢光魷魚，味道好咸鮮濃郁，咬落去爆發鮮甜汁液，估唔到咁正。蝦三味，好抵食，有甜蝦的柔軟鮮甜，仲有熟蝦的爽彈甘甜，還有虎蝦的彈牙鮮味。吞拿魚蓉好肥美甘香，魚脂入口更易溶化，滿口魚香。池魚肉質結實爽口，味道清淡，魚味明顯。巴斯克烤芝士蛋糕，果然特別香軟，味道濃郁，口感軟綿輕盈。…Read More