雙葉幼稚園's Profile

年初三赤口冇去拜年，就同女朋友去咗銅鑼灣行街同睇Slam Dunk。新年有好多餐廳都冇開，我哋行咗去登龍街搵食，竟然發現金朝陽一樓間浪居酒屋竟然有開。更加估唔到嘅係佢冇加價之餘，仲提供午市套餐，午餐選擇繁多，我諗超過三、四十款，價錢就由$98起，喺銅鑼灣來講其實算OK。午餐用便當盒裝住，每盒都有三款前菜以及壽司刺身卷物，老實講真係超豐富。美國和牛鍋 $268佢係一燒一鍋，意指先食鐵板燒，再食鍋物。碟中左手邊嘅係日本和牛同黑豚肉，佢哋同埋南瓜蕃薯係用嚟燒烤；而另一邊就係美國和牛用嚟打邊爐。鐵鍋先用脂肪預熱，然後放上肉，好快就燒熟食得。兩款肉油脂都重，食落好Juicy。食完燒肉之後，店員主動幫忙加湯，我哋要咗壽喜燒湯，湯頭幾正喎，甜甜鹹鹹，唔會過重口味，而且個鍋仲好保溫。美國和牛片脂肪分佈均匀，唔係低質肥牛。另外仲有兜蔬菜，入面有金菇同娃娃菜等，全部都好索味，但食完就覺得好似爭隻雞蛋咁，哈哈。鍋物配以刺身兩點拼壽司兩貫，三文魚刺身係厚切，質素唔錯喎。另外仲有兩款壽司同卷物，加州卷抵讚，因為蟹籽脆卜卜，爆曬漿。三款前菜分別係枝豆、麻醬沙律同埋帆立貝裙邊，佢哋全部夾夾埋埋令到午餐好繽紛！厚燒美國和牛西冷和食盒 $158燒牛扒放喺左下角，上菜時經已切開，由於疊起兩層，所以份量都幾多。牛扒好味道，本身件扒都靚，肉質軟腍多汁，係調味稍為重手啲，如果配飯食就啱晒。依款午餐係御膳盒嘅其中一款，可揀配腐皮烏冬或者白飯。我哋要咗烏冬，雖然話係迷你，但不至於幾啖冇咗，而且仲有半塊好入味嘅腐皮添。年初三食咗個唔錯嘅午餐，我哋都食得好開心，咁就唔怕俾女朋友同我開年。食物質素不俗，分量同價錢合理，而且環境同服務都好出色，所以我認為值得一食啊！…Read More

我同女友都係牛魔王，最鍾意食牛扒，網上見到Lab Eat Bistro推出咗大廚主理牛扒Omakase，價錢$488/head，其實都唔算太貴，另外仲可加配wine pairing。最緊要嘅係要預先訂位！Starter有兩款，第一款係帶子刺身薄片配青蘋果，帶子味道好鮮甜，雖然係薄切，但有成六片，而且配上青蘋果粒食，味道清新。第二款係薯蓉泡泡流心溫泉蛋，佢係餐前小食，唔係Side dish，溫度只係微暖，份量亦較細份。溫泉蛋非常流心，蛋汁好香。薯蓉打成泡泡，具空氣感，食落好得意，無乜飽滯感。主角Main係廚師發辦牛扒拼盤，Platter有三件牛扒，店員細心逐一介紹，建議由淡味食到濃味。每件牛扒有一定大小，所以勁飽肚的呢！Sides就有意式香草烤新薯及田園沙律，兩者簡簡單單都唔錯。牛板翼即係肩胛部位，一隻牛唔係有好多，由於油份重，食落好柔軟。生熟度控制喺五成左右，保持肉汁。牛腰肉係連接西冷同臀嘅位置，肉質軟稔，肉味濃郁，係比較常食到嘅位置。但呢件就稍為熟咗少少。澳洲M4和牛牛腹扒係幾款之中最矜貴，牛味最強。和牛嘅香氣真係份外濃郁，每啖肉都散發油和，但又唔覺膩，係難忘嘅！餐廳就連調味料都好講究，鹽有紫菜味同藍莓味，牛扒沾少少鹽同芥食可吊吊味。最後，就係甜品法式迷你檸檬撻，我諗餐廳係有經過考量，而精心安排檸檬批。因為食咗咁多肉，點都有啲滯，食返啲酸野中和一下味蕾，又可醒神。餐廳精選咗幾枝酒做Wine Pairing，每款設有簡單介紹，等大家更能認識枝酒。香檳配前菜食，來自法國嘅Piper Heidsieck Cuvee Brut NV獲獎無數，飲落夠汽，易入口，爽！紅酒係配牛扒食，澳洲Torbreck Shiraz Barossa Valley Woodcutters，飲落帶莓味同埋更有浸胡椒香，好特別。…Read More

女友話要食泰國嘢同糖水，即係命令我出九龍城，不過佢都算好，揀埋食乜。BTS落單個哥仔以至門面啲姐姐都好有禮貌，而且勁有效率，我買完糖水返去，前後都唔過十分鐘，啲姐姐話啲嘢食得咗喇，你去咗邊🤣👍。餐廳好鬼抵食，難怪平日晚市都咁爆場。外賣無縮水，份量勁多，而且包得好好。兩個人$400都唔使，就夠食兩餐咁濟。泰皇咖喱法包軟殼蟹, $174🦀本身驚外賣會唔會整到淋晒，但原來餐廳將咖喱汁分開上，所以法包同軟殼蟹都保持狀態。咖喱汁好正，首先佢香而不辣，而且仲混入咗大量蛋絲，口感好實在，同時亦滲出青椒嘅味道。軟殼蟹炸到好脆，無好韌嘅衣，又厚肉。農夫包好大個，喺屋企食有好處，可以邊食邊烘，反而仲脆卜卜。多數出街食都食唔晒個包，因為食到尾段濕咗，但今日反而輕鬆KO。泰皇鐵板蠔餅, $124🦪蠔餅同個加大碼嘅盒裝住，其實無鬆起，都超大份，估唔到係飽肚菜嚟！蠔餅用蛋同麵粉嘅比例好好，充滿蛋香，唔會成口粉。蠔仔份量唔吝嗇，我諗成份蠔餅夾埋應該都有成廿隻，而且每隻都好肥美，鮮甜唔腥，最重要係無殼碎。底部墊咗唔少芽菜，不過太生，我哋都食唔到。小曼谷炒河粉, $82🇹🇭見佢係招牌菜就試吓，估唔到炒河都幾有驚喜。首先佢係用上粗河粉，寬度有成吋，同時亦夠薄身；同茶記炒牛河嗰隻好唔同，我認為好食好多。女友同我講呢種河粉先係正宗泰式風味，長知識了。河粉唔係用豉油炒，而係類似星洲米嘅味道，幾惹味。餸料亦豐富，有鮮蝦、蟹柳、蛋、扎肉同蔥菜等。唯一可改善嘅地方，就係避免唔到個底都係有少少油，雖然食炒河就預咗。第一晚我同女友主要食晒個咖喱，另外兩樣食唔晒，所以可想而知佢份量有幾多。餐廳非常有水準，絕對值得encore，下次會堂食！推介度: 🌟🌟🌟🌟…Read More

友人離港在即，襯而家可以晚市堂食同佢外出食餐飯。之前lunch食過Amici，食物有水準，環境靜靜地，所以今日特意前來。店員好似認得我，佢一如以往咁有禮貌，並詳細介紹菜式，語氣節奏不慌不忙，令客人舒服。佢推介食套餐，友人唔食海鮮，所以大家揀左$428果set。第一道前菜係Prawn Tartare，我一人獨享，相當滿足。他他份量幾多，造型靚仔。蝦肉削成粒狀，再加入芒果肉同細蔥，味道鮮甜。個汁亦好啱襯，青檸椰子汁清爽，唔搶味。第二道前菜係牛仔肉veal loin，佢被厚厚嘅泡沫所遮蓋，驟眼睇似甜品多啲。黑松露香味撲鼻，係一種享受。牛仔肉質有口感，煎得幾香。底部唔係一般薯餅，而係Rosti，即係將薯仔切成一絲絲，可花功夫。餐湯係俄羅斯雜菜湯borscht soup，越平凡嘅菜式越能顯出廚師嘅功力。羅宋湯口味正宗，落咗紅菜頭beetroot一齊煮，酸味剛好，而碟邊亦利用咗紅菜頭作點綴。第一款主菜係羊扒拼羊T骨，羊扒即係羊架，呢樣食得多，肉質嫩，無乜騷味，而T骨就比較似牛肉眼，口感更豐富，而且配好適合燒烤風味。我哋要咗Medium，出到嚟唔太生，啱啱好。醬汁係紅棗泡沫，第一次食，幾有趣，搭羊食係可以蓋過羊騷味，但本身都好接近。第二款係煙肉牛柳卷，不得不讚嘅餐廳嘅松露汁真係整得好出色，無論香氣定味道都能先聲奪人。菜式唔係就咁一塊扒，而係加埋煙肉，而煙肉亦唔係死鹹。成個組合新穎又好食，當然件牛柳本身都靚，無筋位，易淋易咬。side dish有飯餅同雜菜，前者由餐廳首創，幾特別！焗蘋果杏仁芝士撻，依個甜品幾好，因為甜度適中，個人真係好怕太甜。tart皮酥香，蘋果蓉味突出，但唔太酸，同雲呢嗱雪糕係perfect match，反而芝士味就唔太濃。4-course dinner set推介度: 🌟🌟🌟🌟🌟…Read More

今日中午去咗尖沙咀買嘢同食晏，我去咗厚福街搵嘢食，貪佢選擇多。唔係好肚餓想食碗麵，就揀咗食農米莊，之前經過都想試，但門面冇乜特別，所以多數都揀咗第間。依度出名食雞湯米線，雞湯底有差唔多成10款選擇，我試咗沙嗲雞湯，老實講沙嗲味就麻麻哋，但反而雞湯本身就幾出色。雞湯米線本身已經包左雞肉，所以我覺得唔使加餸。雞胸有成排，好抵食，而且味道都OK，唔會太鞋。佢另外仲有腐皮冬菇同菜，整體感覺唔錯。想食米線都唔一定要去連鎖店。加埋凍檸茶都係40幾蚊可以埋單，喺尖沙咀來講算抵食啦。題外話，餐廳入面播啲廣東歌，而且仲有無間道，在座食客聽見精神為之一振，成個場面好搞笑😆。…Read More

去咗黃埔睇醫生順便食晏，今日幫襯左拉麵天王，佢好似係區內幾出名。門面就夠晒風味嘅，我坐喺吧枱位，第一個感覺係張枱好笠痴痴…，店員又無乜招呼。拉麵有幾款選擇，限定湯底係胡椒天王，見湯底幾特別就試試。出到嚟感覺一般，不過起碼係熱辣辣嘅。胡椒味係濃，但有啲搶喉，唔似胡椒豬肚湯嗰種飲完好舒服，而且上面堆芝士感覺好九唔搭八，溶唔晒，又無拉絲，而且湯底面有層油。至於其他部份就冇乜賣點或者記憶點。價錢接近成百蚊碗，都幾貴，而且味道唔係咁值囉。我反而最印象深刻係嗰幾隻公仔擺設囉。…Read More

星期六同兩個女仔朋友食飯，佢哋揀咗海港城地下嘅Coffee Shop，我哋都等咗一陣位先入得，雖然有個店員負責安排入座，但感覺都有啲混亂，而且落單佢又喺另一邊。不過食物味道OK就算啦。我嗌左Matcha Latte，拉花幾靚，抹茶味正常，但口感都幾滑。Tiger Prawn Pasta虎蝦意粉唔錯，辣度都幾明顯，但可接受。意粉口感Q彈，而且我鍾意佢混入左蘆筍，脆卜卜。虎蝦亦有成三隻，唔算孤寒。Pesto Chicken Salad雞胸沙律係兩位港女話要嗌，心諗雞胸有咩好食，點知佢又整得幾鬼滑。Pesto味亦幾重。沙律出奇地大碟，我諗我一個人食呢碟應該都飽。…Read More

有時要去尖沙咀做嘢，自己一條友唔知食乜好，多數都係食米線。尖東有間三哥，冬天去嗰陣時，次次等位都要等成半個鐘至九個字，等嘢食就再多三個字，食餐晏要成個半鐘😅。前幾日去，已經見門口冇太多人，點知原來唔使等位就入得👍。而且上菜快咗好多，效率有所進步。題外話呢間舖啲姐姐幾好禮貌。自從有咗砂砂湯底之後，我就冇再食過麻辣，佢其實係沙嗲湯底，味道都幾香，不過辣度就好似隨心，感覺5小辣同10小辣冇分別。米線少少淋，但可接受。牛肉有幾多片，另外仲有隻新餸，鴨鎚$7，佢大小同KFX雞鎚相約，但無乜肉，而且原來係滷水味，我覺得麻麻，唔會再叫。…Read More

終於放監可以出街食晚飯😍，我同女友再次幫襯咗第一街嘅The Bottle & Steak。佢係我近黎最為推介嘅飯堂，拍拖或朋友聚會都好適合，皆因食物價廉物美，氣氛好。我哋冇訂位，去到Full House，所以要等陣先入得。小店面積唔大，一眼睇晒，裝修簡約，行工業風，後方有大大個啤酒櫃，感覺好Chill。我同女朋友唔係第一次嚟食，所以佢嘅幾款扒都曾一嚐，但可能一段時間冇黎，佢多咗啲菜式。最終我哋繼續嗌咗必食嘅招牌Flat Iron Steak，另外再加小食。呢度唔使收+1服務費，等同Free你飲品👍。餐廳定價大眾化，平則百頭有交易，貴則三百蚊，飽到你食唔落，其他西餐廳分分鐘一件扒都收你三舊水啦。Flat Iron Steak$128平鐵牛扒再次冇令人失望，肉本身未必係好Premium嗰種，但都屬正常水平，不過最重要係個烹調方式。佢保留原始燒烤風味，食落好重牛味，唔沾汁食都已經夠味。牛扒幾大塊，夠厚，估計可能有成八安士。Side Dish仲有沙律同手切薯條，我相信男仔食都一定夠飽。Mexican WingStick$68佢類似水牛城雞翼，重口味得來好正，微微辣令人流晒口水。佢用上雞鎚，算得上係大啖肉，而且肉質亦都嫩。佢份量好多，一份有成6隻，平過韓式炸雞店，同快餐店差唔多！Smoked Salmon Rosettes$58煙三文魚砌成一朵玫瑰花，除咗造型精美之餘，其實份量仲幾多，攤開有成四塊。煙三文魚伴辣沙律醬食，令佢唔只止得鹹香。Trio Cheese Pita Bread$58呢個係之前嚟幾次都無食過，見隔離枱爆晒芝就試吓，估唔到真係咁出色！中東包本身超軟熟，絕對唔係硬卜卜，刮喉嚨嗰種，而中間就夾住拉絲mozzarella cheese🧀 。咁多芝士都難得唔覺溜，不過一定要襯熱食。Popcorn Prawn Balls$68蝦球細細粒，外層唔係普通炸粉，而係蘸上粟米片再拎去炸，所以口感特別酥脆。入面就係新鮮蝦肉，彈牙鮮味，一客有八粒，啱啱好。飲品方面，自己出雪櫃揀，啤酒汽水任君選擇，價錢合理，比起其實餐廳平好多！暢飲一返都無負擔。不過雪櫃前方有枱，所以如果多人揀就有啲迫。我哋要咗Lemonade同Taipei Honey Beer，兩枝都幾好，我就唔係好識飲，但呢度入啲貨夠多，夠特別，可以試吓新嘢。題外話，雖然店舖極旺場，不過店員仍然好細心。話說我哋切開塊扒後，發現生熟度稍為差少少，但其實都唔太大所謂，所以冇出聲，但店員竟然主動關心我哋，有冇需要再處理一下。今時今日有咁嘅服務非常難得！基本上我冇任何嘢可以挑剔，餐廳值得高度推介。…Read More

放工後上女朋友屋企食飯，當然唔可以兩手空空，知道佢屋企人鍾意食泰國菜，於是我就去小曼谷加餸。我同女友之前食過覺得好食，所以先想佢哋試下。晚市開返大家果然有報復式消費行為，哈哈。夜晚未夠7:00，餐廳已經坐滿人，超誇張。由於我嗌炸嘢，所以要等耐啲，但阿姐好好禮貌，叫我行個圈再返嚟啦。食物一到手我已經聞到香噴噴，熱辣辣。食物賣相吸引，外賣包裝妥當，未食已經加分！泰脆炸豬手$220炸豬手好大隻，一個盒都近乎裝唔晒。餐廳炸得好完美，因為近乎每一塊都炸得好脆，而且連啲轉角邊邊位都係。皮就炸得脆，而肉亦無因此炸到硬。調味啱啱好，唔會過鹹，肉質又夠軟，再加啲骨膠原筋位，口感好豐富，富咀嚼感。豬手配啤酒簡直冇得輸，雖然好大，不過一人一啖好快將佢K.O.。伯母仲話可以拎條骨去煲湯添lol。BTS五星蒜香炸雞(半隻)$130炸雞係呢期嘅特別推介，外賣盒上面都有個公雞嘅印花，好有心思。炸雞size唔細，有大大件雞髀、雞胸同雞翼，果然係半隻冇呃人。佢哋炸至金黃香脆，火候啱啱好，毫無油膩味。炸雞咬落爆晒汁，體現何謂Juicy。雞肉亦係出色嘅部份，因為冇諗過肉質相當細嫩。最後蒜香調味就係預期中嘅惹味，佢能保持炸雞乾爽。香葉辣椒海鮮炒米粉$98食咗咁多肉都要有啲澱粉質落肚嘅，我要咗盒炒米粉。大家都食得辣，所以要咗香葉辣椒炒，佢嘅辣度出乎意料之外的辣，而且係有種甘味，但我認為可以再鹹啲。米粉用上銀絲幼身果種，口感煙韌，唔易截斷，海鮮幾足料，有蝦、魷魚同帶子等，另外仲有菇同蔬菜一齊炒，每啖都食到餸。即使係外賣，但餐廳都盡量還原堂食滋味。佢搭左兩兜酸蘿蔔同炸蝦片俾我，兩樣都唔錯，前者好開胃，後者卜卜脆。佢用最原始嘅方法用膠袋裝，蝦片好鬼正，大大塊又酥脆，相信係餐廳自己炸。佢直頭有一包包咁賣！見佢屋企人食得咁開心，我都滿足。其實餐廳有好多海鮮菜式，但買外賣就始終冇咁好，所以今日冇機會一嚐，下次同佢哋出街食過啦。…Read More

WFH多時嘅我今日竟然要返工開會，放工就順便喺公司附近買埋晚餐先返去，因為女朋友呻話屋企附近嘅嘢都食過晒喇。我用外賣App搵定食乜(自取有折)，最終揀咗幸屋。小店位置幾隱蔽，係內街入面，不過好彩門牌都幾顯眼。店內環境具特色。我一入去，店員就問我係咪嗌咗外賣，叫我坐低等等，好快有。外賣包裝得好企理，抵讚。🦐蝦武士$88餐廳作為拉麵屋，就梗係要食返碗拉麵🍜。拉麵會主動將湯分開上，以保持質素。呈橙色嘅蝦湯味道濃郁，估計用咗好多蝦殼熬煮，鮮味十足，唔腥。由於湯分開裝，喺屋企食感覺似食沾麵。拉麵自身無乜特別，軟硬適中，反而啲餸料比較吸引，有大量櫻花蝦，加入湯底食更加香。豚角煮好邪惡，肥肥位炆到好軟，入口即溶。另外仲有原隻糖心蛋、木耳、蔥同紫菜等，還原返堂食味道。🐷黑豚丼$83我嗌飯開初係為咗想飽肚，不過估唔到出品超有驚喜。黑豚片採用豬腩片，疊埋原來有成十塊咁多，調味係精華所在，佢有微微燒烤嘅香味，而且好似係蜜糖燒，所以甜甜的勁正，又附芝麻香，就連旁邊啲椰菜都變得好惹味。米飯就係珍珠米，軟熟又大碗。❄️冷豆腐$32冷豆腐以為係伴麻醬，但原來係醬油昆布汁，更加啱食。佢帶啲酸，幾開胃！豆腐本身就滑嘟嘟。🦪吉列廣島蠔$42炸蠔有四隻，吉列皮拎到返屋企都仲脆，蠔味道都幾鮮，入面熟透唔潺。唯一挑剔就係佢哋有啲大小不一，我純粹雞蛋裏挑骨頭啦哈哈…Read More

女朋友話想食麻辣火鍋，霎時間都唔知邊到搵比佢。好彩佢原來一早網上搵定，只係老點我去拎咁解哈哈。今次幫襯嘅係瘋狂小麵推出嘅沸騰二人豐盛套餐，承惠$258🔥🔥🔥。成Set野Pack得好好，輕鬆安全拎到返屋企。基本上錫紙兜入面就放哂所有食材，成個兜放上加熱器就搞掂，連倒湯都唔使，非常方便！值得一提嘅係餐廳提供埋加熱器連架，貼心呢。佢個加熱器火力十足，仲可以燒幾個鐘。沸騰大鍋用料唔馬虎，勁足料🍲。首先，主菜可揀牛肉或者魚，牛魔王嘅我哋當年要牛。佢啲牛係手切牛肉，每片大大塊又厚切，肉質嫩滑，好正。如果佢比肥牛就真係會失色不少！佢另外仲有大量配料，其中午餐肉同蓮藕都令人眼前一亮😋。午餐肉究竟應唔應該拎去打邊爐嘅呢個議題一向都好具爭議性，而一直反對嘅我居然有所改觀，由於佢厚切嘅關係，再加上溶溶地邊，估唔到都幾好食🙈。蓮藕好爽脆，又唔會太過索油。其他配料包埋大白菜、芽菜、金菇、薯仔同萵筍，佢哋都比較掛湯，所以食到尾段就有啲辣！如果有薯粉墊底就不得了。另外，值得一提湯底辣度🥵🌶好似無得揀，而佢嘅辣都唔係咁小兒科，要注意呢。我哋預先就加配咗成都老冰粉$18，解辣一流，佢唔太甜，仲帶啲酒香添。整體來說，在家沸騰鍋都可以好地道，算係為居家抗疫帶來樂趣🥲。…Read More

呢日過咗大角咀嗰邊開會，我知呢邊好多嘢食，收工後直接喺到買埋晚餐先返去。女友今晚竟然有明確指示話想食東南亞菜，所以我好快就經已鎖定目標。本身仲頭痛緊食咩，店員話而家全日都可以嗌午市套餐，抵啲咁話喎。晚市可以五六十蚊落樓實在難得，茶記嗌個小菜都要咁上下。午餐有九款選擇，大部份都好吸引。第一個餐嗌咗蟹肉炒粉絲，粉絲比起炒粉炒河感覺無咁heavy同健康啲。蟹肉雖然拆到好碎，但其實撈埋食都幾多，每啖都食得到，而且最重要係真蟹肉，而唔係Hea你比蟹柳。粉絲幾爽又唔油，女友果然識食。第二個餐就嗌咗招牌海南雞飯，始終我係仔，要食返啲飯落肚至夠飽，哈哈。成盒飯都黃啊，同餐廳一樣，你懂的💛。油飯唔錯，夠入味，但如果乾身啲更佳。雞肉好滑好嫩，雞皮好爽，佢唔係完全去骨，例如翼位無，但我覺得冇乜所謂。我哋另外仲嗌咗菜同小食，雖然套餐有得加配，但心水唔係入面，而且店員話份量唔會太多。蠔仔炒蛋勁正，佢應該係泰式蠔餅，啱哂女友食，因為唔腥又無蔥，佢價錢係貴過午餐，不過份量亦然，我哋食淨左一半，留返第日帶返工做晏。馬拉盞豬頸肉炒通菜好惹味，每條都好爽，鹹香十足，份量同樣多，不過菜多多都食得哂。套餐其實包嘢飲，但我冇轉特飲，都係嗌檸茶就無影lu，而且仲要倒瀉咗啲，比女友鬧😿😿。Anyway泰嘟嘟食物質素咁好，難怪咁多人幫襯！下次要再嚟堂食先😸。…Read More

放工去觀塘買埋飯先返屋企，呢日去咗幫襯同事激讚嘅金飯館試下。餐廳近牛頭角多啲，呢邊舊區更加多好野食，正過工廈多多聲。門口呀姐大大聲嗌外賣自取有八折！小店菜式選擇唔算多，不過勝在樣樣都好吸引，老闆仲推介咗兩款招牌添。🐷即叫即炸椒鹽豬扒飯炸椒鹽豬扒拎到返屋企都仲脆脆哋，椒鹽好香口，微微辣。豬扒有四大件，份量一啲都唔孤寒，而且肉厚，質感一流。雖然係豬，但肉質唔會嚡啊，亦並唔係雪到無嚟味道嘅雪豬。🍳秘製沙嗲牛肉燶邊蘭王蛋飯沙嗲牛肉就食得多，撈飯亦得。沙嗲汁重香不重辣，大人細路都啱，唔會過鹹。鮮牛肉片有好多塊，每啖飯都有肉配。兩隻煎蛋吸睛到爆，日本蛋黃紅卜卜，而且仲要燶邊，做哂主角。🏆🍚炒飯雖然上面啲餸好正，但我諗餐廳嘅主角應該係炒飯。炒飯炒得好乾身，而且粒粒金黃分明，外賣食都食得出高水準。餐廳嘅外賣碗會將餸同飯分開，令兩者保持最佳狀態。🍗蜜汁雞翼雞翼好甜啊，而且每隻都係巨無霸Size！雞翼大隻會擔心入面唔熟，但佢熟得嚟肉又保持鮮嫩。墊底嘅菜絲都好甜好好味。…Read More

之前食過呢間係屋企附近嘅泰國餐廳覺得唔錯，見最近夜晚禁晚市堂食，佢推出左晚市小菜餐廳就一於試下。我差唔多返到去嘅時候就打電話落定單，所以好快就有得拎🥡。晚市小菜分兩個價格，分別係$98同$158，價錢就少貴啦，不過都九折優惠。小菜會配白飯同是日湯水🍚。🦴小火山排骨($98)，呢個可算係餐廳嘅招牌菜，亦係辣嘅代表，店員喺落單時亦有特意作提醒，哈哈。排骨有四條，份量都OK，肉質煮得幾淋。不過菜式嘅精華所在絕對係個汁，皆因佢相當惹味，🌶辣度強之餘，仲好重香茅同青檸味。🍤小食拼盤($158)，拼盤就還好，但份量偏少，始終價錢都唔平，感覺無排骨咁吸引。拼盤包括幾款炸物：芝心蝦丸、炸雞同魷魚。芝心嗰粒堅係流心咇出嚟🧀，正。炸雞亦都唔係咁單調，好似釀咗啲嘢喺入面，而且仲帶點辣味。是日餐湯係南瓜紅蘿蔔湯🎃，估唔到係西湯呢。味道幾濃稠，真材實料。如果外賣想食泰國菜🇹🇭都唔等如一定要食炒飯或Pad Thai，食小菜一樣得。如果將軍澳街坊想換換口味，可以考慮嚟呢到啊。…Read More