erinyesdark's Profile

Lost Stars之前在大角咀時已有很多朋友向我推薦，可惜一直未有機會去，今日行過K11 見到，立刻決定試試。店內環境優雅，雖然星期五六日才有Live Band表演，但今天餐廳內也放着富情調的歌，感覺舒服。菜式以西餐為主，如扒類、意粉、意大利飯、沙律等，今晚還有價格十分相宜的套餐，$288不但有餐湯、8安士肉眼牛扒，還有紅酒。是日餐湯是番茄湯，番茄味濃郁，還能嘗到粒粒番茄碎，口感豐富。以為這價錢的牛扒會很小，誰知出乎意料的大，牛味濃，肉質軟，不柴，配菜是香甜的南瓜。我不是紅酒愛好者，不太會評價紅酒，只知道這杯紅酒容易入口，不會苦和澀。另外加了一個提Tiramisu，非常有驚喜！芝士軟滑，咖啡味香濃，很久沒有吃過如此高質的Tiramisu。這裏的服務非常好，職員有禮，我和朋友一直吹水，職員一直殷勤添水，沒有限時或趕客，態度令人欣賞。下次有Live Band時會再來👍…Read More

買一送一，嚟試吓港麗嘅自助午餐。環境舒服、好坐，空間感大，侍應服務殷勤，態度好。但食物真係令人失望，選擇少都算，質素又唔高。凍海鮮分別有蟹腳（蟹味淡）、龍蝦鉗（蝦味淡）、青口和蜆。質素一般。魚生有四款，三文魚算肥美，其他正常。熟食麻麻，牛扒韌且無牛味，羊同雞非常一般，叉燒較瘦+鞋。沙律吧就幾優質，兩大櫃幾十種配菜可以揀，連新豬肉都有兩三種，如果鍾意食沙律會幾開心。甜品是難食重災區，意式奶凍完全唔滑，較似啫喱，有一杯直程淡而無味。除咗芝士蛋糕，其他例如紫薯撻和朱古力咖啡cake都好粗糙。最近啲cream好貴咩？雪糕有提供四種movenpick口味，但要問職員拎先有，i人地獄。最後，碟未用就有硬咗嘅污漬，好驚驚。因為之前未嚟過，好難講係咪將貨就價，畢竟二百幾喺金鐘食嘢的確唔算多，但酒店盛名之下，如此質素令人失望。…Read More

一直聽人講家全七福好正，今日終於可以親身試下。由於唔想煩，所以直接點咗tasting menu，連埋甜品共12道菜。雞子戈渣：外面炸脆入面好軟淋淋蜜汁燒脆鱔：鱔表皮燒得酥脆，肉質鮮嫩，蜜汁甜味剛好。皮蛋醬蘿蔔：皮蛋的鹹香與蘿蔔的清爽相結合，味道平衡。雞茸燴官燕：好厚料，啖啖官燕，亦充滿金華火腿香味為，濃郁口感，好正。釀焗鮮蟹蓋：香脆外皮包住鮮蟹肉蓋，每一啖都係蟹肉，好滿足。燒雲腿大地鴿脯片：雲腿邊脆口的，好得意。鴿脯肉質鬆軟，味道唔錯。彩椒炒手切牛肉牛肉鮮嫩，同彩椒一齊炒非常香口。油雞樅菌炒四季豆四季豆嘅爽脆配埋樅菌同雞油嘅香氣，食一大碟都仲得。瑤柱荷葉飯每一啖都充滿瑤柱味，飯粒粒分明，唔會一嚿嚿，口感豐富。生磨合桃露濃濃嘅合桃味，豐潤口感，甜味濃郁，想食又驚肥。鴛鴦棗茸糕好香紅棗味，好煙韌。懷舊芝麻卷芝麻味濃，不過口感唔係平時個種煙靭感。不論食物，環境同服務都唔錯，絕對附合米芝蓮嘅條件。…Read More

今晚太興有七折優惠，排咗大半個鐘終於入到去。西蘭花炒青衣魚球無味，廚房係咪用曬啲鹽🥲魚肉尚算實淨，唔會一夾就散開，但全碟都無味，唯有拎啲豉油點。雙拼飯（叉燒+燒肉）估唔到七折的質素高過平日😂兩款都好靚，燒肉大大嚿又脆卜卜，叉燒又唔會乾瘦。呢間青衣分店啲叉燒好多時瘦到似柴，今日竟然不錯。金銀蛋肉鬆扒時蔬又係無味，不過呢碟無味就可以原諒，扒時蔬本身都係比較清淡。沙嗲肥牛粉絲煲同我想像中有啲出入，我以為係乾身的煲仔粉絲，但原來係濕的，整體還可以，但無乾的香口惹味。整體嚟講七折十分抵食🤣…Read More

銅鑼灣方叔叔就喺渣甸坊。位置超方便，裝修行簡潔優雅古樸風，座位寬闊，點勁多碟火鍋料都絕對放得落。🍲今次點麻辣鴛鴦鍋，唔辣嗰邊揀咗養生花膠雞湯，每位要加$20 ，但係值得嘅，因為超大條超厚嘅花膠有三四條，雞件竟然食落嫩滑有雞味，真材實料。🧠腦花第一次食腦花！勇敢走出安舒區！味道原來超軟滑，完全無想像中嘅怪味，真係相逢恨晚🤪🐟白鱔片今晚嘅白鱔片超正，魚皮爽彈，魚肉切得夠厚，軟硬適中。🐷香鹵豬大腸一上枱其貌不揚，本身有啲後悔，落咗湯之後完全唔同曬，吸收水份後飽滿有油香，即刻唔再後悔😆🐥鮮鵝腸每次幾乎必點，洗得夠乾淨，爽脆有咬口。🐖大刀豬腰片朋友鍾意食唯有叫，我本身唔鍾意食內臟，驚有苦味，好彩呢碟完全無，醮埋微辣嘅乾碟食好惹味。🫘現炸豆皮身為魚皮/響鈴嘅忠實擁躉，炸豆皮我點會放過？好食嘅秘訣在放一浸即走，半脆半軟，完全無油膉味，仲吸曬湯汁❤️🥬霞浦海帶苗其實餐廳啲海帶有時腥腥地，呢度唔會，只會食到軟滑嘅口感。總括而言，方叔叔環境食物都令人非常滿意，七點前埋單或九點後入座有八八折就更令人開心🤣📍 方叔叔重慶老火鍋 (渣甸中心) (銅鑼灣)銅鑼灣渣甸街50號渣甸中心8樓…Read More

平時食得太多濃味重油鹽食物，莆田係較健康的選擇。尖沙咀店樓底好高好舒服，枱與枱之間有足夠距離，枱面夠大唔會撞嚟撞去。餐廳自設洗手間夠曬方便。餐牌超厚，圖文並茂，忍唔住點咗七個菜式😆🥟莆田扁肉湯外表似迷你餃子，實際上連餃皮都係用肉製成！唔怪得之食落有明顯肉香肉汁，加咗蝦米令味道更鮮。湯底用紫菜，帶醋味，酸酸地幾開胃。🐟跳跳魚撞豆腐跳跳魚其貌不揚，但用嚟煲湯超級香濃，奶白色鮮甜魚湯可以連飲幾碗！豆腐一食就知唔係普通貨色，有炭火香，好有農家氣息。🦆芋香鴨芋頭綿滑，鴨肉酥香，外皮炸得香口，咬一啖口感豐富，明顯吃到一絲絲的鴨肉，又帶有芋香，非常滿足。🐠鹹香黃花魚煎得香脆，味道不會死鹹，特意加了花椒令味道更香口，不知不覺就食曬🤣🎋家鄉燜筍乾筍不是爽脆的口感，較軟綿，完全沒有苦澀或酸味，而是有隱隱約約的甜香。🍲福建紅菇海鮮鹵麵號稱鎮店之寶！靈魂是野生紅菇，簡直像福建版藏紅花，用少少已會把整鍋麵染成迷人的粉紅色，加上其餘十多款配料，如豬肉、蜆等，濃郁而不油膩。🦪九層塔香燜海蠣海蠣節菜式之一，海蠣醮了炸漿炸得香脆，上面還淋了點甜甜的醬，再配上九層塔的濃香，又香又鮮，不錯。總括而言，若想吃家常鮮味菜色，推薦莆田👍…Read More

某旅遊網賣澳門酒店自助晚餐$315連加一，到底會有乜嘢食？🦪生蠔排隊一次拎三隻，蠔味淡肉瘦，凍青口無味。🍣刺身一開始連三文魚都無，得八爪魚鯛魚吞拿魚，鯛魚完全無魚味，其他壽司竟然求其灑肉鬆、沙律醬喺面，見到都唔開胃，得啖笑。🥗沙律款式較多，因為最平，但醃蘿蔔又當一碟，醃青瓜又另一碟，所以真正會食嘅唔算多。🍖全晚最高質係燒烤肉類，脆皮燒豬肉卷幾好食，其他烤薯仔烤蔬菜都不錯。燒烤檔水準明顯較其他食物高。🥣冬蔭公湯好難飲，似用水開出嚟再加冬蔭公味，完全唔香，好耐無飲過咁難飲嘅湯。中湯煲蓮藕正常，可以一試。🍨甜品普普通通，最好食朱古力撻，用嘅朱古力唔cheap，但好快無曬。奶凍無奶味，其他蛋糕多數唔係奶油蛋糕，例如carrot cake、杏仁蛋糕等，要睇你本身鍾唔鍾意呢類蛋糕。軟雪糕任斟，不過我無食。🥂飲品較多，紅白酒、汽水任飲。💁🏻‍♂️服務算友善，早期有努力收碟，後期滿座收唔切。🪑環境沒有高級感，較平實。整體嚟講三百幾蚊，食得飽就唔好太高要求，但澳門咁多嘢食，點解要食呢啲？…Read More

好多餐廳標榜「傳統」、「正宗」、「古法」，好少好似呢間1908bc講到明自己係British Chinese ，賣點係英式中菜，即係「雜碎」等紅遍歐美嘅偽中國菜。最近我好多朋友移民各地。今晚我雖然身在香港，但仍可同佢地食同一口味。🪑餐廳裝修精緻，餐枱比別人的大一碼，空間感充足，就算隔離枱有人都聽唔到對方講乜。值得一提的是我左右兩邊的食客都不是香港人，真係好有去咗外國嘅感覺😂🦆香酥鴨跟薄餅 $200幾乎枱枱都叫，類似片皮鴨，有青瓜、大蔥、甜麵醬作配料。鴨並不是原片上，而是以香酥形式碎上，既少了片皮鴨的油膩，又有香脆的口感，鴨肉也香而不騷，怪不得旁邊的小朋友食完一碟再叫一碟。🍖甜酸咕嚕肉 $180外國人最愛，香港人都喜歡💕呢個洋式中餐果然配合喜愛煎炸的洋人口味，咕嚕肉有一層脆皮，比平日吃到的更脆口，肉也彈牙有肉汁，而且仲無骨添！🥬豆腐什菜煲 $130除了十分入味、炸得金黃的豆腐，仲有爽口芽菜、香軟冬菇、白菜、紅蘿蔔等，口感豐富，味道濃郁，健康又不寡淡。🍜集會脆麵 $170呢個應該係「雜膾」脆麵？有點像潮州兩面黃的做法，只是改用肉片海鮮等配煎得香脆的麵條，配上紅醋吃，卜卜脆又鮮香，兩個人好快就清碟🤣🍹呢度仲有特色雞尾酒，我點咗用意大利檸檬酒調嘅Saint Clement’s ，酸酸甜甜易入口。可惜今晚落雨，否則坐係餐廳嘅露台睇住燈火夜景同朋友吹水，真係幾chill！總括而言，擺盤、味道都有質素，今晚無嚟錯👍📍1908bc British Chinese (上環)上環文咸東街22-26號柏廷坊5…Read More

行過海防道見到有宣傳，上到嚟見環境都幾乾淨，就坐低揀咗晚市精選牛肉吃到飽 $298頭盤——味鮮卜卜蜆 蜆幾大隻，數量亦唔少，最重要係無沙！蝦都爽口，新鮮好食。鍋底——藥膳養生牛奶鍋藥材幾多，有黨參（？）、棗等等，可能有奶味平衡番，唔會太重藥材味，最尾打完邊爐個湯超好味。牛拼盤可以一次試曬所有牛，我主要食嚴選牛板腱，好食，一啲都唔韌，淋滑有牛味，正。嫩滑脘魚片 嫩滑無骨，而且唔會碎濕濕，滿意。花雕醉雞件呢個有驚喜，熟咗都仲食到花雕味，雞竟然都仲嫩滑，嘴刁嘅朋友都話「啲雞幾好食喎」👍自取食物的蔬菜全部好乾淨，粟米勁甜，芋泥貢丸好多芋泥，芋頭片超粉。甜品有雪糕不過我無食，自製咗個黑白配（仙草凍+豆腐花），外面糖水鋪起碼都要$40，呢度自己整埋超抵🤪。…Read More

家人生日，食中菜最穩陣，揀咗尖沙咀嘅香港老飯店，食川揚滬菜。🪑環境入門口要上好多樓梯，老人家點嚟？除此之外環境都幾好，夠光猛，裝修企理，枱與枱之間距離足夠。🍳燻蛋 $108比較普通，唔覺有咩煙燻味，琥珀合桃甜甜地幾好食。🐟松鼠王魚 $268造型幾靚但偏細條，肉唔多。炸得夠脆，醬汁比較甜。🐍清炒鱔糊 $218鱔而家好貴，呢度份量算足。調味比較淡，真係「清炒」，勝在無骨+啖啖肉。🥬冬菇油炆津白 $138炆得夠稔，好入味，鍾意食軟菜嘅人就啱。🥯蔥油大餅 $98有麵粉香，但本身無乜味，要沾其他醬汁。🍝擔擔麵 $68我無食，家人話還可以。總括而言，味道普通價錢偏貴，最大賣點係位置好+坐得舒服。…Read More

天氣轉涼，有啲秋意，係時候食煲仔飯！朋友介紹黃金海岸嘅秋香，今日特登嚟試試。🪑餐廳唔算大，有分室內和室外座位，兩種各有特色。室內的裝修精緻中帶型格，店內還有很多精美的裝飾，氣氛有格調又不拘謹。🥄食物種類頗豐富，有日式刺身、串燒、炸物，但又有煲仔飯。花多眼亂，決定叫一個二人套餐，什麼都可以嘗試嘗試。🐟刺身有三文魚、油甘魚、帶子。我喜歡三文魚肥美香甜，厚切所以口感非常令人滿足。帶子也很鮮甜。🦪磯煮鮑魚是贈送的，但仍然爽口入味。🍢燒物多元化，豬牛雞都有，口感亦軟稔。秋葵能吃到蔬菜的新鮮口感，不錯。🍗炸物三種中特別欣賞炸雞，很多餐廳炸得太乾，這裏外皮香脆，內裏竟然仍然軟嫩，有驚喜。炸蠔完全唔腥，有蠔味。🥘今晚的主角鹽燒白鱔煲仔飯終於上桌，份量比我想像中多，肥厚的鱔肉足足有五大塊！鱔醃得入味，有油香，配上脆卜卜飯焦，十分適合秋冬享用。🍷套餐不包括飲品，我另點了一杯Sangria。這杯Sangria頗有本地等色，紅酒味不重，較易入口。飯後仲有甜品，OK。飯後在黃金海岸走走，吹吹海風，又是一個美好的夜。…Read More

餐廳裝修瑰麗堂皇，冷氣不會太冷，適合怕凍的人士，又環保。陳皮脆香燒鵝皇可能是我味覺遲鈍，吃不到陳皮味，但燒鵝皮脆肉嫩，鵝肉鮮甜有口感，不軟爛，不錯。薑蔥焗美國桶蠔很有煲仔小菜的鑊氣，上桌時仍然吱吱渣渣作響。份量頗多，蠔比手指更長，多肉肥美。金蒜銀絲蒸鮮元貝大方得體，宴客也絕不失禮。元貝開邊後仍然厚肉，配上粉絲和蒜蓉一起吃很滿足。蔥香油鹽焗軟蟹每位限點一隻，但絕不欺場，上桌時新鮮熱辣，炸得金黃，外脆內軟，蟹肉入味，而且蟹身很濕潤，廚師應記一功。西米露本來想點杏仁茶和焦糖燉蛋，但因為太晚已經售罄，唯有吃西米露。西米露加了椰果，令口感更豐富。下次再來的時候我會預早點杏仁茶，以免向隅。…Read More

🪑環境：不限時，枱夠大，廁所乾淨，但環境比較嘈，唔太適合傾偈。小館鴛鴦叉燒 $138豬肉有少少乾柴，唔彈牙，唔夠味。🌟推薦指數：6/10小館冰鎮咕嚕黑豚肉 $188打咭必點，放咗乾冰，仙氣飄飄好誇張！味道幾好，糖汁做到脆皮感覺，裏面的豬肉都彈牙。🌟推薦指數：8/10鮮茄腐竹泡菜苗 $108味道夠，菜新鮮飽滿，不過價錢略貴。🌟推薦指數：7/10肉絲兩面黃 $128麵餅炸得香脆，肉絲足料，調味唔會太咸，好食嘅。🌟推薦指數：8/10小館獅子頭 $136都幾細個，好彩肉都有彈性，汁醬調味唔算太重手。🌟推薦指數：7/10紅酒雪梨 $58好難食🤮！藥水味，仲要係粉紅色果種咳水！🌟推薦指數：0/10八味金磚(小) $78豆腐算嫩，皮都香脆，少少咸味唔太搶，ok。🌟推薦指數：7/10總評：如果環境靜啲我會再嚟，但而家就普普通通，間唔中可以嚟一次。…Read More

朋友好鍾意打邊爐，而且好有要求，約佢食飯自然唔可以失禮，搵間位處型格酒店嘅火鍋店試試佢。‼️OpenRice 訂座 5:30-7pm入座75折優惠‼️💰為方便閱讀，以下價錢為正價。🪑環境乾淨企理，闊落，坐得舒服。🦀火焰沙白蟹鍋 $328呢間餐廳我估花膠雞先係signature，但朋友話想食蟹就揀蟹鍋湯底啦。估唔到係原隻藍花蟹，比平時嘅紅花蟹矜貴得多，蟹肉亦更鮮甜。花白亦好鮮味，完全無沙，連埋魚湯一齊煲，愈滾愈滋味。最特別係落酒嘅時候會有熊熊烈火🔥，當表演睇勁有氣氛🤣🐮美國安格斯牛肉（中） $248本身我內心暗暗疑惑點解安格斯都咁貴，但一上枱見到乾冰仙氣特效，牛肉片片都有均勻雪花❄️，再加埋入口嘅牛油香+軟，我就明白咗一分錢一分貨嘅道理😂🥟鳳城水餃 $48真正皮薄餡靚，外皮薄又滑，餡料有原隻鮮蝦+爽脆木耳絲等，好足料好豐富。🥬萵筍片 $58鮮嫩滑，ok。🍯蜂巢豆腐 $48雪得夠，吸海鮮湯一流。🌟總括嚟講，如果對食物有要求，唔介意俾多少少食好啲，呢間絕對適合。…Read More

海港薈 (青衣)📍青衣青敬路33號青衣城3樓310A號舖屋企人想食長腳蟹，格完價話海港薈平啲，咁就去啦。🦀長腳蟹 $298/斤加蛋白蒸+$100，個蛋白係咪鑲金，所以我地揀咗清蒸。🌟蟹膏好creamy，一流👍🌟蟹肉就普普通通，有蟹味但未算令人有驚喜。🌟三個人食唔曬一隻，打包咗兩隻腳+蟹汁番去蒸水蛋。（反轉個蟹蓋影相前，記得倒曬啲蟹膏落碗先🥲）推薦指數：6/10🎃南瓜煎堆 $38呢度煎堆幾好食，唔油，香脆帶少少煙韌。推薦指數：7.5/10🐦燕窩蛋白燉奶 $28燕窩都幾多，仲附送燕毛😂蛋白燉奶少少甜，少少滑。算唔錯。推薦指數：7/10整體不過不失。…Read More