Wong Winnie CK's Profile

約咗山友搭船去索罟灣行山賞石，搭10:20中環開出嘅船，落船經過仁記，見到茶果賣相吸引，每個八蚊，抵喎買個試吓。有甜有咸四款味道任君選擇。甜嘅有紅豆蓉、南瓜紅豆蓉；咸嘅有眉豆蓉和雞屎藤。我哋試咗頭三款味道。大概係即日新鮮出爐，摸落手食入口感覺係暖嘅。紅豆蓉：個皮嫩滑軟熟，餡紅豆味濃，甜度適中，不甜不淡。南瓜紅豆蓉：軟糯；清甜，新鮮即造；足料；不黏牙，Q 彈。不過南瓜味被紅豆蓋過。眉豆蓉：餡料足，有𡁻口。讚👍🏻第一次幫襯。買時冇睇網上食評。原來佢哋嘅豆腐花同埋紅豆砵仔糕都多人讚賞。可能要下次再嚟索罟灣行山，一早買嚟試吓😋…Read More

古洞即將變天，政府會拆完有新發展。古洞街市有間福利冰室，聽聞都好食。唔知古洞街市會唔會拆呢？趕入去試吓先。我哋行山美食團，當然要先行山，消耗卡路里後，放心開懷大嚼。古洞街市附近有個古洞水塘，山上影落嚟係個心形湖，網上見相見短片咁浪漫，就去古洞水塘走一圈。由古洞南路入去，順時針走一圈上麒麟山，馬路入山徑前遇到成群有人養嘅惡狗，幸好有街坊喝退群狗，讓我們安全登山。四公里路程，慢行影相約兩個幾鐘，落嚟古洞街市搵食。我哋四人叫咗四個餸。（1）咸魚蒸肉餅 呢個超讚👍🏻咸魚嘅油同咸香滲入肉餅，口感好正；（2） 香煎魚餅，好味，煎得夠香，有咬口有肉哋，水準以上；（3） 客家蒸咸雞，跟麥皮唔係跟飯，送件多士添，跟麥皮原來係浸住雞上枱。雞滑夠味，第一次食咸麥皮，唔錯。但雞浸住有啲失真，如果叫飯分開上會更好，食到雞嘅原味，唔會俾麥皮蓋過；（4） 梅菜扣肉，呢個失分，梅菜爽但唔係好入味，扣肉肥膏比例太多。整體來講，值得幫襯。五十幾蚊有餸有飯，雖然略嫌碟餸嘅份量有啲少。喺古洞咁山旯旮嘅地方，居然有間隱世冰室，用心製作美食，值得捧場！服務唔錯有問必答！遲啲唔知仲有冇得食呢？…Read More

偶然在行山片見到有山客行完山嚟呢間食店，話有平價海鮮餐。食指大動😛即刻望吓食店附近有咩山行，果然初中高級路線都有，任君選擇。其實食店個位置喺油塘，大本營行過嚟轉個彎就到。先講行山。高難度嘅魔鬼山西崖、普通級數嘅衛奕信徑魔鬼山、砵甸乍炮台碉堡、BB級行街路線嘅鯉魚門石礦場兼遊壁畫打卡。總之行個圈落番嚟四山街熟食市場。今次我哋hea遊石礦場，喺年香園買埋手信（推介合桃、豬肉乾和開心果蛋卷，有試食），趕及午飯時段。環境地踎，食物一流，性價比高！我哋叫咗四樣：龍蝦🦞$210三隻蒜蓉開邊蒸鮑魚清蒸每隻@15，最後五隻我哋掃埋魚清蒸$110蒜蓉炒豆苗$55三人份$450，人均$150。抵！味道？超讚👍🏻條石斑（紅瓜子）火喉蒸得啱啱好，蔥同魚汁豉油撈飯食😋龍蝦以為$70一隻好細隻，啖啖肉蝦頭有啲糕，正！呢個價錢我收貨。鮑魚都唔錯，唔un. 俾隻叉我拮嚟食會方便啲😅豆苗正常。$55算抵食個廚師烹調技術唔錯，處理海鮮能好好掌控火喉。呢餐好滿意個肚好滿足價錢好抵！推介😉留意星期日紅假唔開，食午飯時段，我哋1:30後到，三點幾關門。…Read More

兩位山友升職請食海鮮，大家踴躍報名，有食神！話晒行山結緣，喺鄉郊揾間酒家食海鮮。主人家選址布袋澳發記，我多年前行完釣魚翁食過一次，印象良好。配合行山，本來又係行釣魚翁，但大家擇咗個潮退好日子；睇地圖，近近哋計劃去聞名已久嘅扭紋洞。下午搭巴士91號清水灣總站落車，沿大坳門路行唔夠一公里，就左轉入荒徑去海邊，輕鬆綑邊半小時就到洞口。打卡吹吓海風，原路返回大坳門路，步行去布袋澳村，全程少於3.5公里——推介為夏日潮退打卡短線，確實性價比高——我係評價條路線😆用咁多篇幅描述食店附近行山路線，皆因我哋山友鍾意行山同埋食好西。入正題，餐海鮮係山友請嘅，升職咁開心，梗係大擦一餐啦⋯⋯主人家叫咗以下菜式：1. 白灼蝦，鮮味！2. 椒鹽鮮魷，呢碟清得最快，香口又有肉哋。讚👍🏻3. 墨魚刺身，一個字，正👍🏻4. 蒸鮑魚，蒸得過咗少少，竹簽挑唔到隻鮑魚要用隻叉好用力扯離開個殼，都咬到唔算好韌；5. 上湯龍蝦伊麵底，正常發揮，伊麵吸咗龍蝦汁，龍蝦好味；6. 清蒸海星班，蒸得剛剛好，魚肉鮮味嫩口唔韌；7. 豉椒蟶子炒腸粉，嘩呢個有驚喜！「點子新穎配搭新奇味道新鮮！」主人家嘅十二字評價。驚喜係加咗腸粉，即係平時食開嘅豬腸粉。個豉椒汁連埋蟶子嘅海鮮味索咗入腸粉裡面，簡直係喧賓奪主！個蟶子都正常好味，但腸粉更加突出。直頭想encore 叫碟豉汁腸粉🤣8. 發記炒飯，加單，要有啲澱粉質落肚，炒得唔油，好食😋9. 上湯浸菜心，正常整體而言，個海鮮盛宴係值得推介，重點係有人請食。咁我哋夾少少回禮啦⋯⋯…Read More

我哋啲經常行山又鍾意食好西嘅山友們，想食靚海鮮，話要去流浮山。山長水遠，唔會淨係搭車入嚟食，睇吓地圖，附近有咩山可以行。消耗卡路里後就大拆一餐囉😉鎖定鄰近流浮山好冷門嘅淋坑山，搭屯馬線到天水圍站轉輕鐵，天恒站落車，過去天澤商場嗰邊，搵條路行上只有75米高嘅淋坑山，去埋旁邊稍高82米嘅山（有人話叫天水圍山）都係望深圳景。落山經沙江圍，由流浮山道一直行出去流浮山，都係4.3公里左右，慢慢行兩個鐘內行完，其實消耗唔多😜到神話屋打卡後，就入去搵成記，先揀海鮮。我哋其實對海鮮冇乜知識，惟有請教店員，佢哋都好耐心回答。人少少只有三個人食，叫咗四樣：1. 豉油皇海大蝦——超讚！話係野生捕獲，夠多肉夠大隻，仲有蝦膏😮點煮都係店員提議，豉油皇好夾，食到舔舔脷😋2. 蒜蓉粉絲蒸貴妃蚌——蒜蓉份量啱啱好，唔會太多，多會蓋過蚌嘅鮮味㗎。蒸嘅火喉時間控制得宜，食到蚌嘅鮮甜；只係粉絲索味太好食，我貪心啲想加多啲粉絲啫⋯⋯😛3. 豉椒炒蟶子——本來想食炒蜆，店員提示，蜆殼較重稱，蟶子殼會輕啲。真係替顧客荷包著想！亦溫馨提示豉椒煮點都會辣。我哋當中有人唔食得辣，叫佢輕手啲微辣，廚師做得好好，個微辣我哋食到☺️之前嗰兩碟海鮮太出色，呢個都合格嘅，正常水準啦。4. 金蠔——最後上枱嘅一碟，好大隻！厚肉juicy煎香咗邊有少少脆，驚喜！唔使點砂糖都夠甜。5. 送嘅芥菜豆腐魚湯——鹹咗啲，豆腐太碎。不過係免費嘅，我冇要求。1-4每人兩隻，一度食一度傾偈，坐收銀枱嘅店員都很健談，即使我哋係生客，都問我哋行山呀咁，我哋山友們傾開話估吓總共幾錢埋單，佢又同我哋傾吓笑吓，好親切友善☺️我哋食到中途，都有店員主動幫我哋收碟和倒清碟上嘅殼。服務態度真係要讚👍🏻埋單開估啦，共$1030三人攤分，價錢實惠。第一次嚟流浮山食海鮮，印象良好，有賓至如歸嘅感覺。推介成記，下次會再幫襯👍🏻食飽行出海邊影相打卡，買吓海味、蠔油，行程豐富😬…Read More

山友們鍾意行山搵美食。久聞谷埔松記大名，特登編條路線途經谷埔食好西。星期日有巴士入烏蛟騰，方便啲唔使搭好疏嘅小巴。烏蛟騰係多條山徑起步點，可環湖出咀，去三椏村、荔枝窩、蛤塘呢三條村都有好野食。今次由烏蛟騰起步，行初級簡單路線，由田心（烏蛟騰小巴站）經亞媽笏、分水凹，行荔谷古道到谷埔，再沿海岸行去鳳坑出鹿頸終點。慢慢行兩個鐘內到谷埔，肚餓要醫肚😛食完行多一粒鐘到鹿頸搭車走人。已早幾日訂位，人少少，只係訂半隻走地雞。叫咗幾道菜：1. 走地雞半隻——有雞味都算滑，水準以上；不過可能因為走地，肌肉稍為實少少，比較大澳海韻就輸個馬鼻。2. 豬肉砵——好得！五花腩有肉有肥膏夠腍，唔怕邪惡成舊食；埋枱已聞到豆豉香，豆豉入口即溶，個豆豉連汁送飯一流！同荔枝窩的記不相伯仲！3. 薑汁芥蘭苗——夠鮮嫩。4. 蒸墨魚——店家推介新鮮返貨，夠新鮮但唔算驚艷。牙菜墊底預咗，墨魚份量都算正常。叫咗兩碗白飯，加一罐啤酒，盛惠$580三人攤分當日食客都多，幾乎滿座！同隔籬食客閒聊，佢哋叫咗蒸魚，都讚新鮮好食。留意海鮮逐両計。招呼好、服務態度值得一讚👍🏻望住沙頭角海，有海景。食完行去宋伯食豆腐花，去財記鳳坑小食買埋客家茶果，做飯後甜品😋大滿足！可能入多過出，卡路里超標😛…Read More

天氣不似預期，原定晨早入烏蛟騰起步，環湖出咀摸鬼手，雨越落越大，改路線經三椏村去西流江來回印洲塘郊遊徑。由西流江折返，三椏村午膳。以前食過多次其他兩間客家菜，未試過綠悠遊，就試吓啦。三個人，只可以叫三碟餸加兩碗白飯。1. 蠔餅，咦咁少蠔仔嘅，性價比低喎。收半價$60-70會較合理囉。2. 客家釀豆腐，豆腐夠滑豆味唔濃，問題係上面舊肉粒，一毫子左右大小。3. 豬肉砵連生菜，採用瘦肉唔係花腩，完全冇肥膏，口感好鞋；個汁好淡冇豆豉香味。應該改名叫瘦肉砵。唔合格，失望🙁人均消費$130，份量不足；客家菜講求鹹、香、油，明顯唔達標。係咪主廚放假呢？睇佢食評唔差喎。有期望結果失望😞三椏其他兩間真係好食保持水準㗎。綠悠遊可取之處，係個環境，有自家栽種花。咁惟有食個環境啦⋯⋯…Read More

行山食好西，零舍有動力。尤其係消耗大量卡路里後，可以開懷大嚼！今次約好山友，到大澳行冷門嘅尖峰山（鳳山）和牙鷹山，回程大澳終點，途經大澳南涌村。一早已聽聞海韻大名，牙鷹山下來即刻訂枱。事前已做好資料搜集，叫必試招牌菜式。鹽焗雞：夠滑唔肥有雞味，必點！紅燒豆腐：豆腐滑、豆味濃，有驚喜！聽聞自家製，出面食唔到。酥甫三拼：素食果然出色，荔蓉酥卷外脆內軟，芋蓉綿軟，口感豐富，讚；酥甫很脆；腐皮卷個皮都脆，我食嗰件可能喺邊位，餡略嫌唔夠。蝦醬炒飯：唔油，材料豐富，略嫌蝦醬落得少，未夠鹹香。豆豉鯪魚油麥菜：鯪魚份量少，但油麥菜夠新鮮。椒鹽鮮魷：翻炸，漿粉厚，扣分，可以唔點。總括而言，適合一班朋友坐低食小菜，水準以上。…Read More

鍾意行山又鍾意食好西，去蒲苔島就啱晒！島上得一間酒家，我哋一吹雞有十位山友舉手參加，電話訂定枱，唔使落訂金。赤柱11:30開船，落船由碼頭轉左去明記，訂餐時段12:00-2:00。叫咗個套餐：1. 蒸鮑魚，比較黐殼，一般水準2. 蒜蓉粉絲蒸蟶子（冇大隻帶子，改為蟶子），呢個蒸得啱啱好，鮮嫩😋3. 蒸魚，鮮嫩、唔錯4. 白灼蝦，份量少囉我哋十位唔係每人有兩隻有人食得一隻☹️5. 豉椒炒蜆，ok，份量都夠6. 菠蘿咕嚕肉，正常水準7. 酥炸鮮魷，一般8. 炒飯，正常水準9. 星洲炒米，唔錯10. 郊外油菜，ok 總括來講，中等水準，適合一大班人食吓海鮮飲吓啤酒汽水。每位$290，酒水另計。食完就行山消耗卡路里。島上其他食店為士多，主要賣紫菜餐蛋麵、綠豆沙之類。食客山友有選擇。坐喺酒家望吓海食埋個環境囉😎…Read More

行山連埋美食，特別有興致。東龍二輋呢幾年行過兩次，幾年前跟人食過九記。今次為咗再食，要行多次！因為食完海鮮，要運動消耗卡路里！咁就可以開懷大嚼😘訂枱冇預菜單，唔使先落訂金講個信字。介紹吓食咩先：1. 冰凍魷魚鬚，夠爽！2. 龍江肥雞，夠滑！3. 白灼蝦，呢個最讚👍🏻夠新鮮，啜埋蝦頭，正！4. 清蒸墨魚丸，招牌菜。質素正常，驚喜不大。5. 家鄉芋頭扣肉，芋頭粉，唔知係咪唔當造？芋頭味唔夠。扣肉肉質水準以上，有飯撈汁可以食一碗😅6. 蒸石斑魚，啱啱好唔鞋，合格有餘。7. 椒鹽鮑魚，冇預訂菜式，所以冇冰鎮，惟有食椒鹽。質素中等，反而墊底嘅菜夠爽夠新鮮，係咪在地摘農家菜？8. 灼唐生菜，ok9. 腰果肉丁。豬肉太un ，唔合格👎🏻綑綁式套餐，冇餐牌，海鮮係佢強項，肉丁就唔得喇🙁$3300一席我哋12位，除開都抵食嘅，係遠啲要搭車去黃石轉船入高流灣啫⋯⋯所以要搞個行山美食團😎…Read More

已經不是第一次食深涌農莊客家菜。因為行山多次途經深涌，次次都叫蔥油農家雞，今次訂了南乳炆鴨試吓。鴨肉夠腍，南乳入味，推介！其他菜式都具水準，有足料揚州炒飯、砂窩香滑雞粥、煎蠔餅、客家釀豆腐。深涌當然要食埋個環境！對住大草地一嚐美食，一樂也！…Read More

遲咗寫食評。1/1影紅葉，入三椏村食好西。行山客有口福，三椏村各間食肆都高質！食得多福利茶室，今次一早訂枱，轉移去合益蜂場有驚喜！黃酒雞必食，冬天食更暖身；蒸蠔夠大隻夠鮮！木瓜魚湯好飲！蠔餅足料，客家炆豬肉具水準。還有惹味椒鹽鮮魷、客家釀豆腐都好食。我冇食豬手未能評論，只係白灼鮮魷較一般。買埋蜂蜜，老闆見我哋咁幫襯，送咗頭盤醃蘿蔔（夠爽）和木瓜，還有飯後甜品花生餡糯米糍。十人食攤分，性價比高，完美的一餐😋…Read More