熊貓人pandaman的个人专页

行經尖沙嘴諗起之前上網睇過寶勒巷有配料任食拉麵，所以就去試試。去到有隻大達摩不倒翁喺門口，諗住日本嘢又幾有特色咁應該唔錯，點知原來係噩夢開端。八點三去到，過咗食飯時間人唔算多，得幾枱客。因為都肚餓所以就好快揀咗拉麵落單。等到八點七，個staff先話落漏咗單，要落多一次同再等等。一等就等到八點十，果陣客又唔係多，食碗拉麵等足七個字都夠我食完走人。🙄🙄拉麵先係重點，上到嚟，湯唔熱簡直係死罪，仲要勁咸。啲麵痴埋晒一舊，蛋唔夠味，得叉燒算係還可以。然後追加配料，豬軟骨比較好少少，其他肉類都係賣相極差，又肥，極不吸引。而粟米芽菜紫菜果啲就正常。到第二輪追加，叫咗粗麵就嚟幼麵，都算，仲要一大陣鹼水味另外，啲餐具同杯都勁油，斟完水有一層油係面，見到都怕，水一啖都冇飲。食完已經一肚氣，一出門口仲要見到兩個staff係到煲煙，即刻形象由零跌到落負數。落漏單，服務態度差，啲野難食，永遠blacklist。(1/10分)…查看更多

專程嚟尖沙嘴試下呢間很有性格六點半就閂門嘅餐廳。餐廳係三樓，一出就係。入到去係一間好有格調嘅樓上小cafe。本來打算要全份waffle，但店員話全份有六塊份量很大，而半份係兩塊，一個人食半份都夠。因為有唔同嘅味都想試，所以我就叫咗兩個半份，分別係野莓同抹茶味加雪糕。半份嘅份量都多，一個人食tea嘅話都已經飽，而我就當晚餐咁食晒兩個。😜😜個waffle即叫即整，脆硬適中，配雪糕一流。士多啤梨都唔似出面咁得一兩粒，而係有好多粒，所以我覺得非常抵食。(8/10分)第二個係抹茶味，waffle抹茶味唔夠濃，不過雪糕都唔錯，但最遺憾係隔離舊抹茶cream太苦太澀，而且口感唔好，影響晒成個waffle。愈食愈苦，整體味道太單一，綿花糖口感同其他野唔夾，我諗如果轉做紅豆會好食啲。(5/10分)跟餐配iced tea，太甜，如果嗌記得要少甜或者走甜。整體而言都ok，waffle幾抵食，環境氣氛都唔錯，下次黎可能試下其他咸食，最可惜係收舖收太早，要早啲黎先食到。…查看更多

每次經過都覺得呢間餐廳好特別，今日終於一試究竟。名符其實嘅街景餐廳，雖然出面街景唔靚，甚至對面就係豬肉檔，過一條街仲係街市，但其實都別有一番風味。一行四人晚飯時間嚟到，先叫了幾樣主食。意粉粉量足但略嫌太乾，意粉唔夠味，煙肉太咸，不太推薦。(4.5/10分)即炸魷魚圈，熱辣辣上枱但粉漿略厚，魷魚太淋太爛冇咬口，食唔出魷魚味，不推薦。(3/10分)pizza薄餅底，夠脆夠熱，調味適中，可以encore，都推薦試下嘅。(7.5/10分)燒春雞要40分鐘，上到嚟就知道絕對值得等。春雞原隻上，啱啱熟，非常嫩口，調味都好食。一開始淨係提供咗刀叉，所以都唔知要點落手分雞，之後店員主動拎手套比我地，就熱辣辣撕開咗隻雞，唯獨中間仲有少少粉紅可能未熟得透，不過個人認為就剛剛好。係必試美食，大推。(8.8/10分)食完主食未夠喉，就嗌咗手工啤同串燒。特別要講下餐廳嘅drink lists，佢詳細介紹晒所有酒類，有咩酒咩味，酒精濃度，甜度苦度等等，非常細心。我就要咗桃味啤酒，個人覺得有點太甜，比較適合女仔飲。(6/10分)厚切牛舌，可能燒太耐，太韌。(6/10分)雞肉串都夠嫩口多汁，可以試下。(7/10分)鯖魚燒唔夠，但都不過不失。(6.5/10分)一口和牛調味唔錯，但係肉質參差，一舊嫩口一舊鞋口，新「驚喜」。(6.5/10分)飲飽食醉，最後青檸梳打作結，大滿足！四人最後埋單1200有找，整體而言食物還好，環境有氣氛，勝在坐得耐可以慢慢食野吹水，會再去…查看更多

突然心思思想食仙草芋圓，就落深水埗試下康瑞甜品。餐牌選擇唔多，主打傳統糖水。上網睇最多人食嘅都係1號仙草百配，勝在咩都有，芋圓、地瓜圓、小丸子、仙草，一次食晒舖頭最推嘅仙草芋圓。外賣拎走食，份量適中偏少，甜度岩岩好唔會太甜，仙草夠滑、芋圓有咬口，搭加紅豆西米等配料，非常夾。好食推介 (8.5/10分)…查看更多

之前已經係旺角食過覺得唔錯，今日就嚟試埋尖沙嘴呢間。book咗7點枱，6點45分到提早入座，價錢318加一。去到先發現早鳥平$100，好傷心坐低冇耐就即刻上咗頭盤同刺身。刺身幾高質，魚生新鮮，海膽鮮甜。可以加$48任食埋刺身壽司，但今日主要嚟食燒肉，所以就唔加了。(8.5/10分)而頭盤只係一堆肉同少少海鮮，比你邊燒邊嗌野食。前菜嗌咗牛肉刺身同蟹籽沙律，牛肉刺身切得唔夠幼，同韓國果啲生拌牛梗係冇得比，不過都新鮮，調味還好，但對住咁多未燒嘅生肉，又食生牛有啲食唔落，所以食到一半就冇食了。(6.9/10分)蟹籽沙律嘅蟹籽好多，配生菜青瓜蟹柳沙律醬呢個組合實唔會難食。(7.5/10分)之後就到我點嘅肉，排得整整齊齊，亦唔會醃到睇唔出咩嚟，見到都新鮮嘅，肥瘦適中。燒起啲肉都好嫩好好食。特別推薦牛舌，味濃有口感。(8/10分)海鮮類都唔錯，但我唔多like燒海鮮所以冇叫好多。蠔都好食，不過我唔太喜歡佢個香草牛油醬，蓋過咗蠔嘅鮮味，味道麻麻。(6.8/10分)燒蔬菜：金菇、茄子果啲都幾好食，佢係用錫紙盤裝好比你直接放上爐燒，但比嘅汁有啲少，要注意唔好燒焦。(7.5/10分)食到最後燒菠蘿解膩，正！(7.5/10分)整體嚟講啲肉都新鮮同靚，環境亦唔錯，但下次一定會睇清楚同食早鳥時段。最後埋單350，自己又食唔多，覺得有啲貴，但都係好食的！…查看更多

朋友介紹呢間拉麵唔錯，今日晏晝就去咗試試。去到仲未有位，店員就比咗張點餐紙我地，係出面等。原來佢係分開兩個時段，晏晝食沾麵，夜晚食拉麵，既然一場嚟到就試下佢嘅沾麵先啦！畫完餐紙仲未有位，見到佢門口有部扭蛋機抽獎，抽中一等獎仲可以免費食拉麵/沾麵；就算係五等獎都有免費加荀/紫菜/麵底，$10扭一次，咁我就試下啦，點知抽中咗三等獎增量叉燒(原價$25)，又幾抵玩喎！入到去舖頭，裝修裝飾擺設都好有特式，牆上仲貼咗好多客人嘅留言，別有一番風味。好快個麵就到啦，我要咗魚介豚骨蕃茄海蝦沾麵，凍麵普通份量，增量紫菜。就算係普通份量個麵都好多，而增量紫菜足足有十塊，份量十足。個湯味道濃郁，沾麵彈牙有口感，可惜個湯嘅蕃茄味唔夠突出，被咸味同櫻花蝦味蓋過。而最大敗筆係個湯唔夠熱！加上我要凍麵，整體凍冰冰咁唔夠暢快。(6.5/10分)不過$10扭嘅叉燒質素都唔錯，好食！(7.5/10)整體而言呢間舖仔都幾有心機，由門面、裝修設計、店員到麵都落足心思，當然有美中不足嘅地方，呢個有待改善。下次的話，我應該會夜晚嚟試下拉麵。相信叫拉麵唔會再比凍湯我喇掛…查看更多

遲遲未食晏，行經呢條食街，就入咗去「十六座車仔麵」醫醫肚。餐牌用膠片過膠，蠟筆寫餐，清晰又可循環再用，環保值得一讚。下午茶時間選三餸麵飲品半價，所以我就揀咗金沙青、雞腸、雞翼同鮮榨檸檬汁。飲品先上，檸檬汁咸咸酸酸，和我想想中的有點不同，味道有點似咸檸檬汁，飲到最尾有果肉，但又食唔出係檸檬，整體味道有點奇怪。(6/10分)之後麵都好快上枱，份量極少，拎上嚟麵都睇唔到，啲餸又沉晒咗一半。湯底偏咸，個辣汁都幾香幾好味。麵係九州刀麵，煮得太碎偏淋，口感麻麻。雞腸唔係脆腸，脂肪太多，唔好食。不過，金沙青肉爽、雞翼都入味，算係唔錯。整體而言味道還好。(6.8/10分)舊時嘅車仔麵本應係大份又抵食嘅平民美食，但近年車仔麵入舖賣裝修、賣回憶。呢餐最後埋單54$仲要唔飽，實在有點失落。…查看更多

入元朗，就去咗Yoho搵食食個午餐。餐廳位置都幾偏僻，星期六午飯時間都冇咩人，以為會伏，不過都有驚喜入到去嗌咗個Set Lunch，首先係前菜沙律同埋餐湯。個沙律汁非常好食，一啖接一啖好快就食完。(8.5/10分)餐湯係南瓜湯，以咁好環境、咁靚擺盤嘅餐廳而言，碗邊掛住湯汁真係有啲失禮，影響影相。南瓜湯唔太啱我口味，所以飲左幾啖就冇飲了。(5.5/10分)同朋友嗌咗和牛漢堡同意大利麵一齊share。芝士半融，和牛多汁，成個包一啲都唔dry，非常好食，而且份量十足，食完半個burger就已經有八成飽。個薯條更係粗切即叫即炸，熱辣辣外脆內軟，非常好食。(8.8/10分)朋友叫的蕃茄意粉亦相當唔錯，味道恰到好處，小酸小辣，絕對不俗。(8/10分)整體而言，餐廳環境裝修有格調，服務質素良好，食物高質，有機會會再去！…查看更多

尖沙嘴間shake shake海鮮開嘅時候已經想去試試，但因為價錢唔平又唔就腳所以遲遲都未去。點知！比我發現太子都有間shake shake海鮮，價錢仲相當親民，咁梗係即刻去試下啦。餐廳有提供手套同圍裙，相當貼心。一坐低就嗌咗杯荔枝特飲，＄38細細杯，賣相唔錯，但係係濃縮果汁沖出嚟的，唔算難飲，味道偏甜。(5/10分)之後就揀海鮮同醬汁，我就揀咗青檸醬。廚房烚熟海鮮之後放係膠袋入面，店員拎出嚟shake就食得啦！海鮮新鮮好食，我仲嗌咗金針菇同埋娃娃菜，青檸醬味道酸酸辣辣，不論同蔬菜定海鮮都非常之夾，蜆蚌同鮑魚都十分鮮甜彈牙，正！(8.5/10分)除咗shake shake海鮮，我仲嗌咗麻辣小龍蝦，食落麻辣味唔夠，冇咩龍蝦鮮味，呢個就唔太啱我口味，個人覺得麻麻，可以唔使嗌。(5/10分)冇嗌飯麵，淨食海鮮食飽有點空虛，但都還算ok，多人去嘅話建議嗌個主食，咁多海鮮埋單300幾，抵食！…查看更多

落車成日經過呢間「告白果屋」，睇下menu啲野飲都幾搞鬼。周街都係台式飲料店，飲都飲到厭，行過就試下呢間新鮮果汁。價錢唔算抵，新鮮果汁嚟講算係咁，選擇唔多但組合都算新穎，不過佢兩杯優惠嘅飲品只限同款，即使同價錢都唔可以兩杯唔同，有啲唔識變通。我揀左「恐龍遇上噴火龍」同埋「SA-WA-DEE-KA」，份量上細杯咗少少，但都有心機砌到靚靚比你，店舖仲有啲裝飾位，啱晒打卡呃like。杯「SA-WA-DEE-KA」係芒果蘋果香蕉椰奶牛奶，飲落都知真材實料唔係溝水，不過味道太淡唔夠濃，唔算好飲，唔會返嗌。(6.5/10分)而「恐龍遇上噴火龍」係火龍果蘋果提子，顏色都幾嚇人，不過味道ok，火龍果味濃，不過不失。(7/10分)整體尚可，價錢還好，勝在真材實料用心製作。…查看更多

係Instagram見到有間千層蛋糕店係屋企附近，又有網站網媒介紹，網上仲有人話拍得住LxdyM，幾好評價，所以就去試下。第一次去4點幾5點，未閂門，但門口已經貼住售罄，所以想試就要早啲去。門市營業時間係下午1點，12點45去到已經排緊隊，有六七個人左右，等左陣就已經買到。可惜每人限購兩件，想試唔同味就要再排過隊。店面好細，雖然話有堂食位置，但只有四個，只好外賣拎走。兩件蛋糕盒仔細細，包裝都得體有幾款味選擇，每日都會轉，價錢統一＄32/35，最後我揀咗美綠脆脆同焦糖牛奶。賣相都唔錯，兩者嘅調味都幾好，甜度適中。首先講下美綠脆脆，蛋糕食落有層次，口感唔錯，唯獨球狀脆脆同蛋糕不太搭配，而且脆脆份量偏少，食落冇乜感覺。(6.5/10分)而焦糖牛奶千層，蛋糕入口偏滑有焦糖香，但我覺得忌廉太多，千層口感唔夠突出，整體感覺普通。而且裡面竟然有同美綠脆脆千層蛋糕相同嘅脆脆，感覺誠意不足。(6/10分)整體而言，味道確實冇想像同網上評價般好，有點名過於實。但勝在價錢親民，支持一下小店也好。…查看更多