palboy's Profile

好耐無食過放題，趁朋友呢排放大假，約埋一齊嚟荃灣呢間「御滿屋」試下。餐廳地方好大，裝修新簇，環境光猛闊落，坐得挺舒服。今次係午市時段到訪，放題有「A B C D」四個餐可供選擇，揀咗經典Set A，每位只係 $238+10%，就可以任飲任食三個鐘。先出去自助區行一圈，有沙律、炸物、小吃、冷盤同飲品，另外仲有好多款甜品、雪糕、雪條等供應，超適合小朋友及甜魔。返埋位後，友人已經點咗好多刺身、壽司同天婦羅等，馬上開餐。幾款刺身都好新鮮，三文魚厚切肥美，赤蝦微爽黏滑，而鮑魚亦彈牙有口感，配泰式調味料，香辣惹味。壽司方面，幾款嘅質素都唔錯，三文魚經過火槍洗禮後，油脂肥美，香味撲鼻，加上惹味醬汁，入口即溶。牛肉經火炙後，迫走油脂，入口甘香又不油膩。燒物、串燒同炸物都點咗好幾款，西京比目魚好滑溜，魚皮脆香，魚肉滑溜，伴蛋黃醬吃，香甜美味！鹽燒牛舌幼嫩爽彈，而流心球味道亦一流，入口啖啖椰香。另外仲點咗日式炒蜆、瑤柱海皇粥、御品鮑汁燴花膠同古法羊腩煲。花菇肉厚，花膠煙韌，兩者都扣得入味又香濃。羊腩啖啖肉，配馬蹄同竹筍，風味十足。最後梗係要食埋甜品同雪糕先走，花款同口味勁多，CP值超高，絕對值得encore！…Read More

朋友外遊回港，相約飯聚兼派手信，友人愛吃上海菜，上網search到黃大仙中心新開咗間「上海婆婆」，餐廳主打傳統上海菜，店內環境寬敞，裝修骨子，座位闊落，好適合同三五知己嚟聚餐。上海小籠包一籠有4隻，上檯時熱辣辣，外皮厚薄適中，入口有韌性，足夠承托住啲湯汁，肉餡用新鮮豬肉炮製，入口味道好鮮甜，點少少醋食，更添風味！砂鍋原條黃魚雲吞湯，黃魚原條上，兩面都煎到金黃色，魚肉鮮味幼滑，湯底鮮甜；雲吞大大粒，皮薄餡靚，飽滿又多汁。婆婆擔擔麵，揀咗唔辣，湯底有水準，入口充滿濃郁花生香。麵條Q彈有勁，順滑又掛湯，配埋鮮美嘅肉末一齊食，滋味滿分。甜品點咗客高力豆沙，即叫即炸，外皮脹卜卜，入口軟綿綿，充滿蛋白香，加上內裡甜而不膩嘅豆沙餡，絕對係誠意之作。…Read More

波斯富街呢間「小魚兒」主打烤魚、雞煲同串燒，店內裝潢亮眼，以紅黑為主調，時尚型格，加上一排半落地大玻璃窗，通透感十足。烤魚有 10 款口味，包括甜辣相宜嘅醬爆鳳梨香辣豆花、惹味嘅古鎮水碼頭毛血旺、養生嘅花膠筒蟲草花辣豆花等，另有4 種唔同口感嘅原條鮮魚可供選擇。我哋揀咗海鱸魚配不辣黃金特濃蒜香豆花，海鱸原條上，廚師非常細心，已預先將魚分半起骨，方便客人享用，魚肉嫩滑厚實，有彈牙口感，蒜味香濃。配料份量十足，有大豆芽、青瓜、豆腐、紫洋蔥、木耳同寬粉等；豆腐軟嫩滑溜、寬粉剔透煙韌，相當有誠意。追加紅薯粉滑捋捋，質感煙韌，加上吸收曬蒜香湯底嘅精華，入口啖啖滋味。另外仲點咗香蒜燒茄子同脆焦糖燒菠蘿，茄子大大塊，肉質軟綿綿，面頭鋪滿了香噴噴嘅蒜蓉，入口即化。菠蘿以脆皮焦糖包裹，入口酸中帶甜，非常醒胃，食完再嘆番罐冰凍嘅加多寶，最佳享受！…Read More

約咗朋友嚟天后食晚飯，朋友想食泰國菜，帶咗我嚟電氣道呢間「泰出色泰國餐廳」。聽朋友講，餐廳主打正宗泰菜，喺區內開業超過10年，一直深受街坊歡迎，而且咁多年都依然屹立不倒，實力可見一斑。我哋點咗👇碳燒豬頸肉，豬頸肉燒得好香口，肉質爽彈又軟滑，外脆內Juicy，點埋個秘製泰式辣汁食，超惹味。平時去食泰菜，最鍾意就係點泰式明爐蒸烏頭，今次搞搞新意思，試下燒原條烏頭魚。烏頭即叫即燒，外層用鹽包住，入面塞滿泰式香料。掀開魚皮，魚肉鮮甜嫩滑，點少少泰式辣醬食，香辣醒胃。泰出色海南雞飯轉髀，海南雞皮薄肉滑，入口雞味好濃郁，加上已經全部去晒骨，食得好方便。油飯水準亦唔錯，粒粒油潤，乾爽又帶香味。泰式蝦球炒雜菜，雜菜好足料，有西蘭花、粟米仔、紅蘿蔔、芥蘭同椰菜等。蝦球肉厚爽彈，有6大隻，配埋啲雜菜食，有營又健康。 臨尾仲嗌咗椰青糕同椰汁西米糕，椰青糕味道清甜、口感爽脆；西米糕柔軟細緻、甜度剛好。…Read More

將軍澳中心西餐廳「Table」門面採開放式設計，店內裝潢簡約，以大地色系為主調，配以場內嘅圓拱形卡座和四周嘅植物擺設，環境開揚雅緻。黑松露蛋黃醬美式炸薯條，薯條新鮮即炸，香脆又唔油膩，配黑松露蛋黃醬吃，滋味倍添。是日餐湯為蕃茄南瓜忌廉湯，湯身濃稠滑溜，酸種包外脆內軟熟，蒜蓉香味突出！京醬煙燻鴨肉榲桴青瓜薄餅，餅底好薄好脆，鴨肉軟嫩，入口帶陣陣煙燻香，搭配香濃嘅芝士和青瓜，口感非常豐富。招牌酒香脆燒雞賣相好靚，色水均勻，雞皮鬆脆，雞肉嫩滑Juicy，啖啖肉很滋味。飲品點咗杯焦糖忌廉爆谷咖啡同Table水果茶，咖啡香濃順滑，爆谷香脆！水果茶真材實料，入口帶微酸，挺開胃。甜品焦糖香蕉比利時窩夫伴雪糕，窩夫酥脆；香蕉有焦糖脆面，配搭朱古力雪糕，冰涼透心！…Read More

同屋企人嚟荃灣攞包裹，搞掂就順便喺附近食埋晏先走。揀咗大壩街呢間「BnR」，餐廳主打濃雞湯、鮮魚湯同特色湯，有河粉、泡飯、米線、淮山麵及小食等供應。點咗海南雞淮山麵、胡椒豬肚釀魷魚筒泡飯同炸蜜瓜奶，午市點任何主食均送熱奶茶、熱咖啡或汽水，星期六、日及公眾假期除外。海南雞淮山麵湯頭金黃鮮香，入口不油不膩，帶濃郁雞味。海南雞皮爽肉嫩；淮山麵煮得啱啱好，爽滑富彈性。配料下得很慷慨，有油條、雲耳同粟米芯，份量十足。另外仲追加2隻手工韭菜餃，採用上等豬肉和韭菜以全手工製作，外形脹卜卜，入口皮薄餡多。胡椒豬肚釀魷魚筒泡飯湯底味道好濃郁，帶陣陣胡椒香，非常暖胃。豬肚爽口唔韌；魷魚筒入面釀滿了墨魚膠，食落彈牙有口感；飯粒浸得非常入味，令人回味無窮！炸蜜瓜奶外脆內軟滑，入口有奶香之餘又有果味，好睇又好食。…Read More

好耐冇食過火鍋放題，趁新年假期，專登同屋企人出去齊齊滾，揀咗旺角創興廣場呢間「鍋霸」。餐廳主打無限時吃到飽台式養生火鍋，湯底選擇非常豐富，共有 16 款，另外仲有超過 60 款火鍋配料同飲品等供應。 選了藥膳椰子雞涮涮鍋，湯底用咗椰漿代替椰子水，一上檯已經聞到聞到陣陣椰香，雞肉全用雞髀位置，入口肉嫩肥美，啖啖滋味。至於肉食方面，我哋揀咗個肥牛火鍋餐，套餐包任食PrimeGrade美國安格斯肥牛同西班牙無激素豬肉片，另外每檯仲會奉送Shake Shake鹽酥雞及花枝丸一客。將鹽酥雞和花枝丸放入紙袋，再加入調味粉搖勻，即可享用。花枝丸彈牙有口感、鹽酥雞金黃酥脆，入口鹹鹹香香，非常惹味。 安格斯肥牛食落好重牛味，肉質細緻，脂肪分佈均勻，呈大理石花紋；而無激素豬肉片亦柔嫩富彈性，入口充滿濃郁肉香，食肉獸一定滿足！ 至於其他火鍋配料就仲有海鮮、台灣鴨血、手工丸類、自家製手工餃子、蔬菜類同麵食等。海蝦新鮮爽彈；而鴨血亦細膩嫩滑，吸汁又惹味。飲品款式多，除咗大路嘅罐裝汽水、紙包飲品外，仲有手工冷泡茶、烏梅山楂茶、台灣黑糖冬瓜檸檬茶等， 全部都可以任飲，毋須額外收費。 最後食埋個甜品先走，每人可以揀一款雪糕，有 Mövenpick、Häagen-Dazs 同 Dreyer's 可供選擇，而且有好多口味，食完飽到天花板！…Read More

之前見有網友介紹旺角嗰間「九鼎記粉麵世家」，話店舖嘅出品價廉物美，經濟又抵食，尤其是崩沙腩麵，每碗只係 $55，性價比極高，所以已經即時mark低咗。今日同屋企人嚟旺角辦年貨，搞掂就趁機過嚟試下。點咗👇招牌雙沙河湯，底味道非常清甜，入口帶微微油香。雙沙即係崩沙牛腩同牛沙瓜。崩沙腩肥瘦剛好、軟腍味香；牛沙瓜口感爽脆又不失嚼勁，以河粉伴吃，食味亦不俗。招牌八寶河極之足料，一碗有齊8種食材，包括牛腩、牛筋、金錢肚、手打牛丸、汕頭魚皮餃、墨魚丸、潮州魚蛋同香菇貢丸，絕對係大堆頭之作。牛腩鬆化入味、牛筋軟糯腍滑、金錢肚爽中帶韌勁、牛丸彈牙多汁。魚蛋白雪雪，鮮味突出，而魚皮餃味道亦唔錯，餃皮好滑，餡料飽滿，口感實在。將河粉轉咗做魚麵，魚麵採用天然海魚炮製，麵條粗如烏冬，口感煙韌，食落魚味好濃郁，鮮味自然，即使不嗜魚嘅朋友亦會喜歡。另外仲點咗酥炸魚皮同酥炸雲吞，魚皮脆卜卜，點湯食好滋味。酥炸雲吞真材實料，內有豬肉同蝦肉，一啖一粒，啱啱好。凡惠顧各式粉麵飯，點凍/熱飲品，只需另+$8，非常經濟。…Read More

今晚在竹園廣場地下嗰間「第五街冰室」晚飯，餐廳裝修得幾有特色，有很多figures擺設，地方整齊企理，而且餐牌選項非常多元化，小菜、西餐，樣樣有齊。我哋點咗幾個小菜。清蒸石斑蒸得啱啱好，肉質嫩滑又富魚香，沾少許豉油吃，更添滋味！豆腐雙腩煲，雙腩係魚腩同火腩，魚腩新鮮炸起再入煲，入口外脆內軟；火腩肥瘦適中，肉同肥膏比例各佔一半，味道唔會過鹹，豆腐索晒啲燒汁，非常惹味。BB乳鴿即點即炸，皮脆肉嫩又富肉汁，唔使點淮鹽同喼汁食都已經好夠味。另外呢個香芋臘味滑雞煲水準亦唔錯，雞件肉嫩多汁、芋頭粉軟綿糯，臘味有臘腸、潤腸同臘肉，鹹香惹味，用嚟佐飯一流！…Read More

嚟西環做嘢，見天氣凍冰冰，晏晝想食碗熱粥暖下胃。記得早幾日路過卑路乍街，見到有間新開粥店，一於試下。店舖主打傳統粥品，單係生滾粥就已經有成十幾款，另外仲有腸粉、油器、炒麵和鹹肉粽等供應。點咗炸兩、腸粉、兩碗粥同一隻粽，回味炸兩做得唔錯，腸粉皮厚薄適中，油炸鬼脆卜卜，點埋甜醬同麻醬食，真心好味。碟叉燒腸亦頗有水準，腸粉皮拉得好滑，叉燒有調味過先捲，做得好有心機，食到叉燒香味！狀元及第粥材料好豐富，有豬腰、豬潤、粉腸、豬肚同肉丸等，另外仲加咗皮蛋。粥底綿密細滑，濃稠度啱啱好，豬潤粉嫩爽滑、大件又厚身；肉丸自家製，富豬肉鮮味。至於呢碗生滾魚腩粥亦很有驚喜，魚腩有好多件，新鮮肥美，肉厚又無泥味，加咗鮮牛肉，牛肉鮮香嫩滑，粥底綿甜富米香，食完大滿足。蛋黃鹹肉粽大大隻，鹹蛋黃靚，肥肉入口即化，用嚟送粥一流！ 見鄰桌點了黃糖糕同白糖糕又跟風試下，兩款都好好味，糕身鬆軟，甜度適中，絕對值得一吃。…Read More

「金亞淶泰國餐廳」，店舖位於億利工業中心，由正宗泰國人主理。門面好易認，大大個紫色底「金」字招牌，內在環境寬敞，裝修走小清新路線。我哋點咗泰式蝦餅、咖喱軟殼蟹同菠蘿海鮮炒飯。蝦餅外形圓碌碌，炸至金黃色，入口香脆彈牙，配酸酸甜甜嘅泰式醬汁吃，令人停不了口！泰式咖喱軟殼蟹，軟殼蟹炸得很香脆；咖喱唔辣，椰漿味重，入口甜滑，配軟殼蟹吃，滋味滿分。原個菠蘿海鮮炒飯，賣相好吸引，配料非常豐富，有蝦仁、魷魚、雞肉、新鮮菠蘿和肉鬆等。大蝦爽彈、魷魚煙韌有咬口、菠蘿甜美多汁，加上乾身又夠蛋香嘅米飯，味道一流！飲品點咗杯金鑽鮮菠蘿冰，用上新鮮菠蘿肉炮製，入口清新香甜。椰汁涼粉冰味道亦唔錯，涼粉軟滑、椰汁飄香撲鼻。最後食埋甜品先走，客椰皇三重奏分成三層，由上至下分別為烤香椰絲、椰汁布甸及椰青啫喱，三重椰香融為一體，入口清爽帶椰子甜香，椰子迷必食之選。…Read More

約咗朋友嚟尖沙咀行街，晏晝想食碗粉麵做午餐。路經漢口道，見到有間「何富記麵家」，主打牛腩、牛雜，價錢幾親民，一於坐低試下餐牌選項都幾豐富，有潮式粉麵，精選飯餐，特色咖喱飯，淨食、酥炸小吃和飲品等；點粉麵飯，更可以用優惠價加配小食及飲品。我哋點咗香滑崩沙牛腩河 ($65) 同 酸辣京都炸醬麵 ($38)，而小食、飲品就揀咗鮮炸魚皮 (+$15)、郊外油菜 (+$15)、酥炸雲吞 ($38) 及 熱奶茶 (+$8)。 崩沙腩肥瘦剛好，夾喺兩層筋膜中間，爽軟而不硬，入口啖啖牛味，充滿油香。河粉很滑，條條分明，配著湯一起吃很順口👍🏻炸醬味道有層次，醬汁微甜帶酸，肉絲甘香鬆化，配上爽身彈牙嘅幼麵，食得好滋味。魚皮炸到脆卜卜，食落香口又無油膉味，用嚟浸湯吃，倍添滋味。菜心爽脆嫩綠，鮮甜又無渣。雲吞即點即炸，內裡包著大大隻鮮蝦，滋味踏實。食完午餐再嘆返杯熱奶茶，一樂也，茶香幼滑濃郁，飲完成身暖笠笠。…Read More

記得第一次光顧「閨•家」是在炮台山蜆殼街店，食後感覺良好，印象不錯。「閨•家」食品標榜不用味精，讓客人食得安心，深受街坊歡迎。轉眼間，「閨•家」在西九龍廣場都有分店，當然也不能錯過這裡家的味道。這裡的香煎蓮藕餅、招牌豬扒、秘製咖喱、小食、自家製作手工麵等，都有水準，滿滿住家風味。本來想吃手剁香煎蓮藕餅配波菜麵，可惜手工麵售罄，惟有改配烏冬。手剁香煎蓮藕餅，雖然功夫多，又要材料新鮮，又要調教好蓮藕粒和豬肉比例，兩塊厚厚蓮藕餅煎得又香口又好味，保持水準，簡直系實力派嘅表現。雖然手工麵售罄，改配烏冬效果也不錯。手剁鹹魚肉餅飯，同樣做得出色。肉餅做得鬆軟入味，配上晶瑩剔透飯粒，飽肚又好味。我最喜歡這裡的老火靚湯，火候十足，是絕佳抗疫湯水，跟飯餐有一客小湯。今天老火湯是五指毛桃淮山煲雞，湯底清甜，五指毛桃健髀袪痰，是合時抗疫湯水。意猶未盡，再來單點小食滷水鳳爪和炸饅頭。滷水鳳爪一客有4隻，隻隻肥美飽滿，慢慢咀嚼最惹味。炸饅頭外皮炸得金黃香脆，內裡包身香軟，配煉奶食最合胃口。…Read More

養生好簡單，食碗藥膳養生麵，都係養生之道，而且可以不分季節，四季都可以吃得到，灣仔盈記四季養生麵館就係唔錯既選擇。盈記四季養生麵館主打多款藥膳農場雞湯，特色蕃茄系列湯通粉和叻沙湯，全部都可以自由選擇米線或米粉。另外還有多款小食如古法炆蘿蔔、鮑魚汁炆花菇、紅油抄手、藥膳浸雞腳和涼伴手撕雞等。盈記佈置簡潔，環境舒適，於是坐下食碗養生麵，享受一下養生之道。首選來個藥膳農場雞日本花菇養生湯米線，藥膳湯湯底清甜，藥材出味，農場雞嫩滑，日本花菇夠厚身，米線滑溜溜。鮮茄牛肉湯通粉一樣可以轉米線，番茄湯底色澤鮮艷，濃稠得宜，滿滿天然蕃茄味道，幼滑米線亦滲透番茄鮮味。配上肉質嫩滑鮮牛肉，味道很夾。紅油炒手，餃皮做得厚薄適中，餡料充足，配上特製酸辣醬油，很惹味。古法炆蘿蔔有水準，蘿蔔炆得又腍又入味。追加凍奶茶和凍檸檬茶，冰凍可口。…Read More

講起深水埗，大家通常只會想起高登電腦同鴨寮街。其實深水埗講飲講食一樣好聞名，深水埗福榮街一帶食肆林立，亦是香港其中一條人氣食街。小弟通常逛完電腦商場，都會係深水埗福榮街食番餐，今日亦都唔例外。今日想吃餃子，於是就幫襯在福榮街的米亭，米亭主打用高質本地黑毛豬泡製的多款豚肉餃子，還有酸辣米線/上海麵和多款小食等。米亭店內佈置簡潔，環境舒適，牆上一幅大卡通圖畫很搶眼。這裡餃子套餐都配靚湯、涼菜、醬菜和飲品，真係一門五傑，非常豐富。餃子加錢可轉煎餃或炸餃，叫了炸韭菜黑豚肉淨餃套餐，一客有6隻餃子，炸餃隻隻飽滿，外層香脆，饀料豚肉韭菜味美。特濃雞湯，色澤金黃，雞味很濃郁，而且非常熱燙，有水準。再撈埋涼拌雲耳、米亭菜甫和惹味蝦醬一起吃，份外滿足。全日套餐叫了脆汁豬扒配豆乳豚骨湯米線，豬扒賣相不錯，肉質又腍又滑，米線滲透滿滿豆乳豚骨湯鮮味。跟餐麻醬蓮藕很入味，蓮藕夠爽口。秘製醬脆手撕雞都好夠份量，除手撕雞外，材料還有青瓜絲和蓮藕片，惹味開胃。追加油菜承惠$10一碟，好抵食。黑白豆漿豆味豐富，潤喉好味。…Read More