食而不肥's Profile

餐廳喺觀塘工業區，裝潢色調以啡色為主再加深綠色植物點綴，用色自然、溫暖，好有喺屋企嘅休閒感覺。我哋叫咗套餐，有齊頭盤、湯、主菜、甜品，每項都有得揀。餐廳好有心思，先送上welcome drink。【糖漬檸檬薑蜜梳打】，酸酸甜甜幾開胃。【芝士焗元貝釀蟹肉•蟹膏野菌忌廉汁】元貝都幾大粒，芝士焗出嚟幾惹味，沙律菜上面落咗啲士多啤梨汁，清新又sweet sweet。【磯煮南非鮑魚伴醬油漬三文魚籽】鮑魚口感爽甜，磯煮嘅醬油味同鮑魚嘅鮮甜味道平衡，再有三文魚籽將鮮味再提升。【干邑龍蝦湯】鮮蝦同露荀排得整整齊齊，再倒入龍蝦湯。龍蝦湯夠香濃，配露荀同鮮蝦兩隻不同嘅爽甜各有特色。「中場休息」有refreshment tea，今日係【松柏高山茶】，清清口腔迎接「下半場」美食。【鹿兒島A4和牛西冷配慢煮和牛臉頰配露筍 奶油千層薯】兩款牛肉各有千秋，和牛西冷脂肪同肉味均勻，肉味油脂味都豐富；牛臉頰本身係牛隻最嫩部位之一，用慢煮保持鮮嫩仲保持肉汁；配菜有口感帶creamy嘅千層薯，同埋露荀解吓膩。【慢煮西班牙八爪魚伴野菌枝豆墨魚汁意大利飯】八爪魚味道濃，肉質爽彈；墨魚汁意大利飯就大大粒，食落有咬口。配菜有野菌同枝豆，幾有日式風味。甜品時間到啦！【Keto Cheesecake 原味】生酮芝士蛋糕口感軟滑，糖係用零卡路里嘅羅漢果糖，夠晒健康。【Relish Tiramisu】外型似千層麵，咖啡味唔算好重但食落輕盈唔heavy。跟餐+$28就可加配飲品。我哋叫咗【Mocha】【Dark Chocolate】兩杯飲品都有拉花。出面得十幾度，喺咁warm嘅環境飲返杯熱朱古力，暖心又relax。…Read More

晚上嘅荔枝角道比較僻靜，舊區之中一間和風裝潢嘅餐廳份外吸睛。餐廳裡面除咗普通座位仲有榻榻米座位，加上柔和燈光好有日式古風，吧枱就幾有時尚感。整體感覺有格調又不失溫暖感，同街外嘅寂靜形成強烈對比。餐廳夜晚餐牌係走居酒屋形式，酒類選擇多，食物款式不多但精，由佐酒小食到主食、鍋物都有。【IPA啤酒炸漿炸雞】炸雞外皮香脆，肉質鮮嫩兼juicy。蘸咗蜂蜜WASABI醬，少少甜+少少刺激，同炸雞好襯，美味加倍。【三文魚幽庵燒】係懷石料理常用到嘅菜色之一，以特調醬汁來醃食材然後燒烤，醬汁味道甘甜更帶出三文魚鮮味。三文魚魚油豐富肉質嫩滑，食落都幾飽肚～【悄悄醉酒鮮魚湯鍋】湯鍋上枱後先煲一陣，開始滾起時店員就倒米酒然後點火，好有視覺效果。先飲頭啖魚湯，魚味香濃帶少少酒味同辣味。材料有街市鮮魚（今日係帶魚）、沙白、魚腐、豆腐等等，都幾豐富。鍋物可以加配食材，我哋揀咗響鈴、沖繩黑毛豬五花肉。響鈴吸收魚湯精華，好鬼正。沖繩黑毛豬五花肉就肉質軟嫩，肉味濃郁。飲品我哋揀咗【青森縣五種品種新鮮蘋果汁】，食到飽飽飲返啲果汁幫助消化。青森蘋果係日本第一蘋果，味道清甜而不膩，果香十足。…Read More

食buffet唔一定去酒店食嘅，Mr. Steak buffet相信大部份buffet愛好者都食過，最大特色係採用開放式廚房，亦唔少即刻製作嘅菜式，保證新鮮熱辣～Mr. Steak buffet咁受歡迎，想食就要趁早訂位。去到餐廳雖然仲要排隊入座，不過餐廳安排都幾有效率，好快就可以入座。最受歡迎當然係海鮮啦，未夠鐘開始就已經有食客攞定碟排定隊等攞。龍蝦、蟹腳、蟹鉗、青口、蜆、蝦排列整齊，數量夠晒多，食客都好有秩序亦手腳俐落，人人都滿載而歸。最好食係蟹腳，juicy、冰涼嘅蟹肉，好似對住個大海食咁歎；龍蝦都相當不錯夠大隻，有啲仲有橙紅色嘅蝦膏，肉質爽口。不過餐廳俾嘅剪刀比較細把難用，建議自備就拆得更爽。另一邊受歡迎嘅係生蠔，師傅喺面前即開，保證新鮮。入口先嚟一浸海水鹹香，感覺好fresh，之後慢慢回甘，非常鮮美。食完海鮮就到靚牛-飛驒牛，有唔同煮法。日式有壽喜燒、鐵板燒、火炙壽司，都係即整。壽喜燒有蔬菜同菇減低膩感，甜甜哋同肉味又幾夾；鐵板燒就比較油膩，但油香肉香就好突出。西式有即切燒牛仔肉，半熟再加脂肪口感超嫩，淋上燒肉更能帶出肉味。各有千秋，雖然「邪惡」但真係忍唔到口。除咗以上必食，仲有各類熱葷、即炸天婦羅、刺身、燉湯等等都好高質，係西湯嘅龍蝦湯唔係好飲得出龍蝦味，有少少失望。自助餐點少得甜品，有豆腐花、各式水果、蛋糕，但最受歡迎就係即整心太軟，食客可以喺紙仔寫低祝福語句或者想表達嘅說話，由師傅用朱古力漿、糖漿寫出，好有心思。…Read More

位處大角咀的“漫花燈火”，一直以來都是文青聚餐的好地方，無數美女們到此打咭。 就算是一杯一碟，也是美美的。 聽說食品質素高、煮得入味，無怪乎日日高朋滿座了！一進門已經見到很多三角形鏡和彩色地磚，仿如進入夢幻世界。 枱上還放上兒時的玩意 – 萬花筒，滿滿童年回憶呀！我們二人點了兩個菜式。安格斯牛肩胛很大塊，肉面點綴了一些黑胡椒粒。 伴以醬汁及烤得入味的茄子和瓜，賣相引人！ 茄子雖然是伴菜，但煮得也極之細緻，甚具特色！牛肩胛是慢煮的，餐廳已細心地切好，肉汁豐滿、牛味十足、軟腍嫩滑，吃在口裏，非常香口回味！ 蟹肉意大利粉表面鋪滿拆散下來蟹肉，新鮮入味。 意粉煙韌，攪拌後吃起來蟹味濃郁，好食！ 還有金箔做點綴呢。餐廳佈置得非常吸睛，最喜歡入口處三角形鏡折射出光影，添雅意！加上垂吊的彩色裝飾，喜歡！…Read More

之前睇咗電視台嘅一個飲食節目介紹呢間餐廳，覺得環境好舒服，今日就趁假日嚟慢活一下。餐廳喺油麻地砵蘭街M1酒店1樓，上到嚟見到充滿大自然氣息，全部佈置都係木系列同草系列，令人心曠神怡，彷彿置身於都市中嘅森林。我地周圍影吓相，留意吓四周嘅環境，聽住輕快音樂，再慢慢搵野食。牛油果忌廉蟹肉意大利飯$168頂層鋪滿一梳梳蟹肉，好有睇頭。 中間係切成一片片嘅牛油果🥑，份量頗多。 底層係被醬汁包住嘅意大利飯，煙煙韌韌有咬口，但火侯就爭少少，中間仍然有啲生同硬。英式豪華早餐$148材料繁多，有德國豬肉腸、煙肉、炒滑蛋、煙三文魚、多士、烤蕃茄、集菌、茄汁焗豆。 煙三文魚捲成花型，有心思又美觀。 最出色係炒滑蛋，滿滿蛋汁，蛋味香濃又軟滑。黑松露野菌扁意粉$138超級大碟，每條意粉都沾滿黑松露，味道獨特而香濃，好食。給您吃的泡沫咖啡$88碟上用朱古力醬寫上sweet day。 甜品四層，最好食係底層嘅餅底，紮實嘅脆粒，口感一流。美中不足係lunch冇lunch set，配埋野飲或餐湯會更好。…Read More

餐廳主廳呈長條型，樓底高，幾盞瑰麗吊燈，燈火通明，盡頭有個西式壁爐，上面更有圓鏡。 感覺似喺間歐式公館、博物館食飯咁，浪漫又典雅。【干邑龍蝦湯$68】味道濃郁鮮甜，感覺係所有龍蝦精華匯聚淆製。入面有一件龍蝦鉗肉，咬落去滲出厚重干邑白蘭地味道，有驚喜。水準好高嘅龍蝦湯，必點之選。【白菌焗田螺$78】田螺下面係原粒蘑菇一齊焗，夾埋又幾好食。下層嘅薯蓉都不可忽視，焗得香口仲帶少少蘑菇味，幾特別，平時我未必會食晒啲薯蓉，今次就清晒~【英式蘋果酒炸蝦$88】份量大，薯條同蝦都係即炸熱辣辣，小心辣口。薯條係極粗身； 蝦爽口又食到鮮味，但食唔蘋果酒味道；沙律亦清爽開胃。【烤特級安格斯西冷牛扒(十安士)$280】薄身但巨型，肉汁豐富牛味濃郁，如果肉質再嫩滑啲就perfect啦。配有燒汁，帶少少酒味，幾特別。【香煎珍寶虎蝦配黑松露菌意大利飯$188】第一啖入口感覺係濃厚黑松露味，虎蝦鮮爽香口。全個飯每一啖都好多黑松露同菇菌味，足料。【朱古力心太軟蛋糕伴雪糕$68】用小木板上，再加糖醬同糖霜裝飾，別緻得嚟又有啲溫暖感覺。流心效果做得好，朱古力味濃郁。 比較特別係配芒果味嘅雪糕，不過個人都係覺得心太軟配雲尼拿味雪糕會夾啲。食物水準相當唔錯，有啲菜式仲有啲小驚喜或特別之處，而且地方就腳，價錢合理，服務優良，Encore之選！…Read More

每次經過呢度附近都會聞到好香好香嘅味道，好吸引。心動不如行動，今次就約朋友嚟試吓。有唔同嘅煲或者鍋選擇，但火鍋料唔算多選擇。餐廳有川式燒烤，睇相都幾吸引，不過我哋今晚都係想打邊爐，下次再試下吧～【花生小食$10】，圓碌碌嗰啲唔知係咩豆，比較少見，但又幾好食喎。既然店名叫做烤活魚，咁就梗係要試吓佢嘅烤魚鍋啦，我哋揀左【烤魽魚鍋$258】，配BB辣嘅麻辣湯底，過下癮。烤魚上枱，上面鋪滿左大量芫茜，係我嘅至愛😍。撥開啲芫茜就會見到魽魚，魚皮烤到微焦好正咁。開火之後仲傳嚟陣陣麻辣味，濃郁撲鼻。魚肉滑得嚟幾結實，唔易散開亦冇碎骨，食得方便。其實最好食係佢個魚皮，又滑又香口。芫茜控嘅我哋再叫左半份【芫茜$22】，落多啲先夠喉嘛！【手切特級安格斯肥牛(小) $198】肥牛當然少不了，特級安格斯肥牛喎，牛味夠晒濃，而且好有彈性。【丸類三拼$68】係平時買到嗰啲丸。【鬼馬雙拼$58】係蝦膠同墨魚滑釀油炸鬼，即炸夠晒熱辣辣，可以做小食，佐酒一流，用嚟打邊爐又得。【自家三拼$88】水餃、鮮蝦雲吞、韭菜餃，自家製夠新鮮，用料十足。【粟米半份$22】【炸枝竹$32】索左個麻辣湯之後特別好食。…Read More

聞名已久，一路都好想食呢間餅店嘅戚風蛋糕🎂。今日喺朗豪坊食完飯，就打算滙合雀友開戰🀄🎲，朋友 總需要聯誼一下嘛😜。就落到地鐵站口時就見到la famille，呢度人流好多。眼明手快，俾我影到張冇途人嘅相，hehe~其實我係俾個玻璃櫃吸引住，七個字形容：「好正、好靚、好吸引！」啲小蛋糕用個玻璃罩罩住，增添唔少「貴氣」✨，仲可以保持蛋糕濕度同軟熟度。好多款味道。另外有款Cake叫「伐利亞(BAVAROIS)」個樣超靚，即時令我心心眼😍😍😍！我最終揀左大蛋糕，因為多人聚會，大大個開心啲，而且口味仲多：揀緊口味時俾我見到有款「期間限定」。【香印青提戚風蛋糕】(SHINE MUSCAT Chiffon Cake)，一磅$420，雖然好似幾貴，但期間限定，唔食怕會錯過，一於買嚟同朋友分享吧🤗！雪袋無印餅店名，簡潔！蛋糕盒係白色，我鍾意！送左支長蠟燭，啲小朋友鍾意吹蠟燭😗🎂，啱晒！香印提子出名外皮脆果肉甜香味重，一串都幾百蚊，先食提子，一啖入口，確實係好正~入面係幼滑忌廉，輕甜。而個戚風蛋糕係青綠色，幾醒神，口感特別鬆軟，食多啲都唔會覺得膩。你一件我一件，大人細路搶住食，好快就清晒，好食，個個都話要encore🤯！…Read More

想平平地食個自助餐，揀左嚟呢間酒店，我地大半個月前已經訂位，因為用Coupon之後只係$288，家人享有長者價(60歲以上就當長者喇)仲只係$208，個價錢已經包左加一。睇過啲食評都唔錯，但唔會期望太高，畢竟只係二百幾蚊。上嚟二樓，環境舒適，用白色為主調，我最鍾意就係白色架喇，令到個環境感覺倍大。每人送一客嘅冰鎮日式璣煮鮑魚，冰涼多汁又彈牙，唔會韌，作為第一道菜，so good~自動濕紙巾機放左喺近門口位置，可以自己去攞，好方便。清潔完就開動~~刺身只有三款，味道唔錯，問姐姐可唔可以俾三文魚腩我，hehe，成功，厚切，好美味！凍海鮮方面有青口、麵包蟹、蜆、海蝦、小龍蝦、長腳蟹，麵包蟹竟然有蟹膏，比較少食到；長腳蟹多肉，但都幾咸吓。最重要係全晚不斷REFILL，長食長有，唔駛爭。寫住係中式老火湯，但味道似羅宋湯，好奇怪囉。中式點心有蝦餃，都幾晶瑩剔透，蝦肉夠爽口。照燒牛肉芝士卷味道唔錯，可惜係凍嘅，如果用火槍燒熱佢，令牛油味更出，芝士半溶，咁就更好食。燒鴨、叉燒都係過瘦，外皮亦唔夠香。仲有其他野食：MOVENPICK雪糕任食，記住加埋脆脆雪糕筒。甜品選擇唔少，我最鐘意係Tiramisu，朱古力味濃，咖啡味亦濃。普通熱飲都有：成為粉絲，就會有杯特飲添。但我鍾情咖啡，咖啡機可以揀即磨咖啡或者Cappuccino，當然要嘆返杯啦。二百幾蚊咁唔錯嘅質素，算係咁啦，好評！…Read More

喺尖沙咀shopping完就到覓食時間，去亞士厘道行一轉，見到Amitie Kitchen易拉架，寫明厨師喺五星級酒店任職多年，見食品圖片賣相幾吸引，一於試吓。星期六晚上全場滿座，樓上餐廳嚟講算係相當旺場，相信食物質素一定唔會差得去邊。先嚟一盤麵包，用木板上，上枱嗰陣仲係暖架。全部麵包都好鬆軟，配有牛油同來自澳洲嘅杏甫果醬。誠意十足！【芝士焗松葉蟹羔大啡菇$68】溶咗嘅芝士冚住大啡菇，入面有大量香菇、紅黃椒、真蟹肉、洋蔥等等，加埋蟹羔香味，味道豐富。大啡菇本身亦肉厚juicy，味道濃郁。用料十足兼有質素，抵食。 【紐西蘭肉眼扒$118】係碳燒處理嘅肉眼扒，我哋叫咗五成熟，切開見到粉嫩肉質，咬落軟腍兼肉汁豐富，食落濃濃牛肉味同可口碳燒味並重，再加上牛扒本身肥瘦適中，所以仲有陣陣牛油香味。$118嚟講CP值幾高。精選晚巿套餐【吞拿魚他他伴日式芝麻醬】粉嫩吞拿魚蓉入面有香蔥碎粒，口感綿密而味道新鮮，不過就唔係好食到芝麻醬味。【厨師是日餐湯 - 周打蠔湯】周打魚/海鮮湯就飲得多，周打蠔湯就係第一次飲。湯呈黃綠色似青豆湯，飲落好幼滑，鮮甜蠔味完全融入喺個湯度。個湯仲有餅塊同粟米，如果有返一兩粒蠔就完美啦。【油封鴨脾伴迷迭香蒜味粗身馬鈴薯蓉、藍莓醬$288】鴨脾都幾大隻兼多肉，煮得入味，外皮封煎得好脆。比較特別係配藍莓醬，甜得嚟又唔會搶走肉味。難得嘅係厨師喺薯蓉都花心思用咗迷迭香做材料，食落冇咁悶咁寡。餐飲我叫加咗$20轉熱果茶。隻杯好靚架！果茶係用透明茶壺上，底下用蠟蠟㷫住，保持溫度。生果多種類但果肉係細細粒嘅，飲落覺得味道酸咗少少。整體嚟講食物質素係水準之上，價錢合理，原本諗住食完就嘆個甜品作結，不過已經冇乜戰鬥力，留返下次吧。…Read More

今日Sunday陽光普照，梗係約埋friend慢慢嘆個big big brunch先去行街街啦。之前已喺Shine食過dinner，今日就試吓佢個brunch先。餐廳好多窗戶，充滿天然光線，感覺更舒心，啱晒食Sunday brunch。【Brunch set - 芝士雞扒牛角包配薯角$98】一上枱當堂嚇一跳，勁大份薯條，似係薯條配牛角飽先啱。牛角飽鬆軟，雞扒上面有啲半溶芝士，但食落芝士味較淡，好在雞扒都幾嫩滑juicy。熱辣辣嘅薯條山又脆又大條，不過真係太大份食唔晒。跟餐配嘅即磨咖啡，味道偏苦，不過大大杯成碗湯咁，如果拉埋花就靚啦。抵讚位係個奶加熱左架。【Banana Chocolate Smoothie$58】都算大杯，上面係加左朱古力醬嘅忌廉，再加幾片香蕉。味道方面，香蕉味同朱古力味平衡。飲落亦唔會太濃稠太膩，不錯。【黃金蟹餅配菠蘿莎莎$118】菠蘿莎莎酸酸地幾清新開胃。餅皮炸得唔夠脆，好軟身，而入面係一梳梳香濃蟹肉。可惜只得一個蟹餅，$118嚟講就貴咗啲啦。【加拿大芝士焗龍蝦意粉$178】半隻大龍蝦，龍蝦肉爽彈味豐，蟹羔又多。用咗幼意大利粉，初初以為醬汁係龍蝦汁但原來係蕃茄汁，有啲失望，好彩蕃茄汁味道適中無過濃。【Tiramisu$78】上枱嗰陣都幾驚喜，大大件Tiramisu，旁邊有龍珠果、雜莓伴碟，再灑上可可粉，賣相靚。甜度適中，芝士味濃，仲有粒粒雲尼拿籽，口感極之軟滑，連一向唔係太食甜品嘅朋友都讚不絕口。以如此高質甜品完成呢餐big big brunch，整天嘅心情都愉快愜意。…Read More

今日同一位好耐冇見嘅老朋友聚舊，大家都想靜靜哋談天說地享受美食，佢就推薦喺銅鑼灣嘅Otto法國菜。Otto係一間法國藍帶美食協會推薦餐廳，要成為推薦餐廳係需要通過該會嘅美食專業評審團隊評選，質素無容置疑。餐廳喺銅鑼灣地鐵站C出口對面嘅駱克駅，過條馬路就到，上到16樓電梯門一打開，即刻有位靚仔侍應招呼我哋上樓梯。原來餐廳有兩層，但坐位唔多，適合夫婦情侶拍拖、閏蜜好友相聚。一坐低侍應就幫我哋拉櫈就座，鋪好餐巾、斟暖水，令我哋迅速進入食嘢嘅狀態，然後奉上麵包。裝麵包個籃有張卡介紹麵包係用米粉麵團製作，營養價值高，感覺麵包更軟綿，配上黑松露牛油，更突出牛油香味。我哋叫咗兩客set dinner。【Starter 精選生蠔一隻】大大隻蠔，水潤乾淨，但蠔肉唔夠飽滿。入口一陣就回甘，食落海水味唔重，感覺舒服。【Starter 夏威夷香蔥吞拿魚紅蝦沙律】吞拿魚係切成粒嘅刺身，質感更軟糯軟滑。紅蝦刺身大隻兼膠質重，用醬油醃好入味，配上清新沙律又幾夾。【Soup 番茄蘋果蟹肉湯】頗特別嘅配搭，味道酸中帶甜幾開胃，啖啖蕃茄蓉同蟹肉絲，好足料。【Soup 黑松露花膠燉湯】食法國菜有燉湯飲真係未聽過。大大塊花膠，滋潤養顏。成個湯菇味香濃，但就冇乜黑松露味，因為係燉，所以都好清潤，飲完口腔有淡淡餘味。【Appetizer 海鮮鮑魚酥】酥皮非常鬆脆，而且好有牛油香味。酥皮同鮑魚之間係魷魚肉，食落冇一般魷魚咁硬身。鮑魚就一啖入口夠爽彈。【青檸雪葩】食法國菜喺「中場休息」嗰陣會上一道青檸雪葩俾食客清清味蕾。用雞尾酒杯上碟配紅紅綠綠嘅水果肉(士多啤梨+青蘋果)相當別緻，雪葩下面仲有青蘋果粒，都幾花心思。【Main course 澳洲頂級牛柳配法國鴨肝】餐廳用鴨肝而唔係鵝肝，鴨肝色澤冇鵝肝咁金黃，不過食落味道差別不大，外層皮脆一咬就咇油。牛柳炭燒味濃，肉質軟腍肉汁豐富。伴碟有蔬菜同焗薯，焗薯落左沙律蛋黃醬，食落冇咁飽肚，不錯。【Main course 海鮮拼盤配蟹肉番茄多士】初初以為「海鮮拼盤」會有多種海鮮，但連同多士入面嘅蟹肉絲只得四款，而每款只得一件，期望過高，有啲失望～帶子肉味鮮甜，蝦亦煎得惹味可口，魚柳就鮮甜爽滑，可惜份量唔多。主食嘅蟹肉番茄多士，蟹肉絲佈滿整塊多士，不過口味同個番茄蘋果蟹肉湯有啲重覆。【Daily dessert 桂花糕】除咗燉湯外原來仲有中式食物。擺盤別緻，中間淡茶色嘅桂花糕係用玻璃杯裝住，都幾亮麗。桂花糕清香少甜，食完覺得口腔都清新咗。【Daily dessert 抹茶木糠布甸 】同一擺盤格局，玻璃杯裝住淡綠色嘅抹茶木糠布甸睇落幾可愛風。口感綿滑，不過抹茶味稍微不夠濃。食法國菜除咗食物味道同擺盤外，其他都好講究。餐廳燈光柔和，伴以悠揚音樂，氣氛高雅中帶輕鬆。而且食得好舒坦，食完一道菜先上下一道，感覺冇咁hurry之餘又確保食客食到最啱溫度嘅食物。我哋就喺度享受咗一頓完滿晚餐；一晚愜意時光。…Read More

很喜歡吃鐵板燒，望著「大師傅」在面前即席烹調，展示廚藝與技巧，鐵鏟不斷揮舞，發出「叮叮」聲響，已經很吸引。以前很難吃上鐵板燒的，有做鐵板燒的店舖很少，現在已經普及化，就算在Food court一百幾十元也能吃上，也有鐵板燒午餐提供。今天就大破慳囊，來一頓高貴高質的鐵板燒吧！店內環境高尚，我們馬上坐到鐵板燒枱，點了一個二人餐【伊勢海老鉄板燒$2088】後，食材很快便送到，師傅亦蓄勢待發。先來個【手作前菜】開開胃，是沙律菜和芥辣小墨魚。再來是一款白肉【汁煮東星斑】，看著師傅用心烹調，未食已覺得很美味。魚肉厚身彈牙，魚皮香脆可口，加入大量洋蔥，令醬汁多一份甘甜。接著【海膽汁煮龍蝦】是原隻龍蝦，雖然被開成兩半，但上枱是還在動，絕對是「即撈即劏」，極之新鮮。看看這隻日本龍蝦，巨型，頭大身也大，厚肉多汁，絕對不是頭大大的波士頓龍蝦可媲美。先將龍蝦起肉：煮溶牛油再加海膽，成為濃味的海膽汁。煮成後味道濃郁，龍蝦肉超級美味彈牙。【熊本縣產A5和王牛】滿滿雪花紋︰中間仍然保持粉嫩，入口甘香鬆化，非常嫩滑。配菜的大啡菇、南瓜、露筍也不可以錯過。【和牛炒飯】採用日本米，米粒分明，每粒飯粒也被雞蛋包著，就是「金鑲銀炒飯」！雖然看得見粒粒牛肉碎，但和牛味道不夠突出。【清酒煮蜆】即席用錫紙摺成錫紙鍋，加入海帶和酒烹煮。蜆肉飽滿，蜆湯鮮味無比。【甜品】玫瑰紫薯布甸，用上真玫瑰作裝飾，玫瑰味糖漿加紫薯布甸，清香軟滑！看著烹煮的全過程，是一種極尚享受，加上食材高質，值得點讚！…Read More

朋友介紹左一間隱世餐廳俾我，雖然位於尖沙咀，但餐廳只做晚市，宣傳亦唔多，多數都係靠熟客介紹，口耳相傳。餐廳大概喺加連威老道中間，都幾易搵，再搭𨋢去四樓就見到。內裏空間唔算好大，但有分室外室內位置，都幾優雅舒適。今日天氣好舒服，我地就揀左坐室外。打電話訂位時留左電話，之後餐廳就WhatsApp左啲餐牌我參考，亦有推介啲時令食物，有啲食材係要早一兩日訂先會安排到，我哋就揀左個二人餐。【紐西蘭托托蜆配香草牛油白酒汁】份量幾大，托托蜆呈長身，蜆肉大兼飽滿無沙，吸收左香草牛油白酒汁嘅香味，份外鮮甜。【帶子薄切配檸檬橄欖汁】帶子係刺身級別，切成四薄片，上面再加左啲黑魚籽，配埋沙律菜，一道好清新嘅頭盤。【法包】可以配搭牛油或者橄欖油。【法式龍蝦濃湯】第一次見到龍蝦湯上面有咁靚嘅花紋，好大碗，中間仲有啲蟹肉，可惜唔夠濃。【香桃雪葩】食法國菜中段時間會上一道雪葩，清清口腔，refresh一吓。味道幾香，帶少少酸味。【風乾火腿香草意大利飯】風乾火腿刨到一大片好薄片，咬落去好似紫菜咁脆，但又有濃郁火腿肉香，鹹中帶甜，香脆可口。意大利飯唔似一般意大利飯咁煮到黏糊糊，少少黏度又帶少少乾身。【澳洲M5和牛肉眼扒】和牛肉眼牛味香濃，又帶有油脂。雖然大片但好薄身，好快會凍，唔趁熱食就會影響味道。配左巴黎牛油香草，味道普通。【朱古力心太軟】用76%比利時黑朱古力製作，蛋糕中間啲朱古力漿比一般心太軟濃稠，朱古力味特別濃。最特色係配搭薑味雪糕，好特別，甜度辣度適中，都幾啱冬天。【法式焦糖燉蛋】份量大，面頭薄薄一層脆焦糖，下面係香軟綿滑嘅燉蛋，正！【Sangria】西班牙傳統酒精飲品，美食當前當然要配搭美酒，完滿！好鍾意呢度嘅環境氣氛，想食得安靜高雅啲就坐室內，要輕鬆寫意嘅可以坐室外。當晚有一枱有食客生日，店員喺甜品上面插上煙花蠟燭，壽星即刻成為全場焦點，好開心！…Read More

新年團拜，友人搵嚟一間台灣料理店，坐落喺尖沙咀金巴利道，地點方便大家集合。第一次嚟，感覺裝修佈置都好似港式酒樓，仲有點心食。午市套餐都幾抵，我地就叫左個【午市商務2人套餐$248】，已經有兩款點心、兩款小菜、兩盅足料老火靚湯、兩份肉燥飯或擔仔麵同埋甜品。【足料老火靚湯】夠晒熱，除左瘦肉、霸王花、仲有雞肉同大大粒無花果，好足料，味道清潤甘甜，但偏油。【水晶鮮蝦餃】估唔到一籠有五粒蝦餃，脹卜卜，入面係包滿蝦仁，爽口彈牙。【台式小籠包】味道一般，冇乜太大驚喜。【蝦皇大白菜】想像中係蝦干，但嚟到係大蝦嚟，仲好仔細剪晒蝦鬚同蝦腳，食得方便。個汁味道似係龍蝦汁，好重蝦味，大白菜吸晒啲蝦汁，份外甜味，我覺得好好食！【蚵仔煎】煎得好乾身，蠔肉係預先煮過，比較重味，唔同一般食啲蚵仔煎咁直接放入蛋漿入面煎。【肉燥飯】肉燥偏肥，但都幾惹味。【擔仔麵】麵身夠滑又彈牙，湯底好油膩。小朋友點名要食【即撞木桶豆腐花$68】幾個人SHARE一齊食就啱晒，好夠熱，仲好香滑，豆味幾出，配埋黃糖perfect match！店員仲幫手分埋，服務唔錯！美食有中式有台式，味道唔錯，選擇亦比較多，加上地點就腳，係個唔錯嘅選擇，會再嚟。…Read More