honky00's Profile

行過路過唔好錯過， 炊豕店呢間舖嘅嘢食真係大件夾抵食。是晚八點三左右去到，等咗五分鐘就有位。 舖頭入面只有十幾個位，坐既係圓凳， 所以都係速食店，唔好預可以坐低慢慢傾計。我地叫咗蔥油秘製豬扒飯同埋沖繩豬軟骨飯。 如果唔怕熱氣， 個人係高度推薦食豬扒飯既。 豬扒炸到香脆內軟，外面嘅炸粉唔會好厚， 而且豬扒嘅份量好多，加埋啲蔥油食無得頂。 佢仲有咖哩汁同埋肉澡汁可以揀， 如果怕食完蔥油個口好大味嘅話，可以有其他選擇。因為小弟最近食得太多熱氣嘢，所以唔敢再食炸豬扒喇， 叫咗個都係好多人食嘅豬軟骨飯。 豬軟骨好入味好淋，無牙既婆婆都食到但相對份量就細少少喇。另外值得一提既係，店舖既嘢飲喺良心價， 加罐可樂/熱飲都只係要五蚊，冇乜地方可以搵到呢個價嫁咋。…Read More

幾次行過尖沙咀嘅霸嗎拉麵想都排長龍，食唔到。 點知中環呢間係放工時間都仲有一半空位， 就入去即刻坐低。一般拉麵鋪都唔會預期坐得好舒服，多數食完就走，所以乾淨衛生就ok啦。而霸嗎拉麵係呢點係做到既。兩個人，一人一碗拉麵，加一份餃子已經好飽。豬骨湯湯底味道好rich, 好香濃，係我係香港暫時試過的no 1。 豚肉夾雜幾層肥肉， 加少少焦香味，入口即溶，雖然好邪惡，但係咁係咁先正嫁ma。麵底同玉子都above average。好味因為淆底關係，辛辣湯底淨係揀咗少辣。湯底相對無咁油膩，加上有少少辣地，非常開胃。雞叉燒既香又滑，又唔肥。想食清淡d 既，可以揀雞叉燒系列。餃子都好食既，但相對無驚喜。Encore指數：9/10…Read More

呢間南朗餐廳午市主要食意粉焗飯等等，夜晚仲有得鋸扒。 午餐價錢四十至七十蚊左右，考慮埋味道同分量，cp值係高嘅，我會再食。先講環境，相對熟食市場入面嘅其他快餐店，佢嘅枱同凳都企理好多，衛生環境算唔錯。咖哩好香，少少甜，唔辣， i like it. 魚柳好大件， 香脆得黎入面好juicy, 唔會好乾， 魚柳醃得夠哂味。10個推介！ 白湯係跟餐嘅，都幾creamy好飲。焗豬既芝士有拉絲效果，豬柳夠腍夠入味，唯一美中不足嘅係個飯底唔係炒飯，但overall也不錯。下次要試埋佢啲意粉…Read More

去到觀塘，稍為搜尋一下就見到呢間人氣好高既"小時光"， 諗都唔諗，一個字"試".入到去環境確實好懷舊，好似去返十幾年前讀小學嘅環境咁，我覺得不錯。 但環境呢啲好主觀嘅。點解咁講？因為坐低無耐隔離枱有個5-6歲既小朋友， 好大聲咁問佢媽咪，"點解個哋下咁污糟嘅？"個刻我係心入面不禁笑咗下， 係童言無忌吧講番食物質素，先黎個總結：唔試都無損失。食麵類嘅嘢，通常即刻飲口湯先， 湯底好味已經贏咗大半。 但呢碗牛肉麵湯頭無乜味，雖則個麵同牛肉不過不失，但亦補救唔到出色。 2.5分!呢個滷味拼盤唔好食，本身個鹵水汁已經唔好味，加上滷得唔入味，.而鹽水意麵我就第1次食，唔知係咪應該咁既味，但唔係我鐘意個d.3分！(主要係加分比佢個份量) 總結： 觀塘咁多野食，應該無下次了…Read More

食宵夜黎講，住太安樓附近既話真係無得輸。是晚9點幾去到，仲燈火通明，好多食店仲開緊。因為未食晚飯關係， 就決定食大半年前試過嘅海南雞飯。呢間海南雞飯嘅人氣好高，每次行過都排長龍，亦都可能因為咁，當晚我去到已經賣曬我想食嘅海南雞飯($35), 唯有叫淨得一份嘅 海南雞髀飯($48) 啦。回想一下，好似都加咗唔少價，已經唔算抵食既行列。海南雞脾飯配薑蓉，醬油同辣椒醬。3款醬我最like薑蓉，辣辣地夠惹味，加分。份量黎講係合理既，有雞味，但雞脾唔算滑，對比我上次食好似無咁正，但可能關我太夜食既關係吧。下次可以試下其他野…Read More

父親節前後， 隨街搵一間酒樓食餐中菜都要三四千蚊起跳， 仲要食埋嗰啲例牌菜式， 所以我哋見泉章居喺父親節前一日都可以散叫， 就決定再去會一會佢。我哋一行十大三小， 叫咗一個六人餐同四人餐，都已經夠哂食。叫咗啲咩食大家可以參考下下面張單泉章居嘅食物質素不嬲唔差，全部都係可食用範圍。喺度講返我當中嘅推介：1. 霸王雞： 嫩滑有雞味， 另備有沙薑汁， 鍾意重口味嘅可以點嚟食。 我自己鍾意連埋面頭d蔥點沙薑一齊食2. 梅菜扣肉： 送白飯最正， 但亦都係最肥最邪惡嘅講完嘢食，要提返大家泉章居不嬲啲座位都係比較迫，加上我哋嗰晚係父親節前夕，爆曬場，啲侍應個個都已經做到黑口黑面，完全零服務，但我一早有心理準備，所以我係體諒既。但追求舒適好服務嘅朋友仔就諗清楚先啦。…Read More

位於isquare 27樓嘅名家， 居高臨下，窗口位望出去，飽覽維港， 先講景觀真係冇得輸。食物質素方面對得住佢嘅價錢，。我叫咗烤牛肋骨套餐， 套餐跟一碗飯同湯。 牛肋骨用鐵板上，包保夠熱。 牛肋骨好重牛味， 而最正嘅都係連住骨嗰兩嚿， 係全碟最重牛味嘅，冇得輸。 洋蔥作為配菜亦完全唔失色， 最後成碟洋蔥連牛一嚿不漏畀我食曬但呢一餐要略為彈下嘅地方有兩點。1. 可能serve我哋嗰張枱嘅侍應係新嚟，好多嘢都唔熟手。上菜嘅時候手震震，我地仲驚過佢。2. 亦都可能係因為個待應新嚟，我哋一行13人，前菜比得12碟我地。但我哋走嘅時候見到其他枱，兩個人都有六碟。 不過算啦,淨係依食個主食都已經好夠飽。…Read More

喺銅鑼灣諗唔到食咩，就諗住散步過去天后搵食。行過見到間麵鋪既裝修似係歷史比較悠久嘅老店，所以就入去試喇。麵鋪面積唔係好大，大概有十張枱左右。 可能我哋去嘅時候比較夜，入面得返兩枱客人食緊。我哋叫咗佢嘅招牌排骨擔擔麵同埋五香牛肉擔擔麵。排骨擔擔麵我哋揀咗唔辣，個面同湯抵幾好味，加埋啲花生，幾香口。 炸排骨嘅厚度偏簿，少少甜甜地，味道可以。五香牛肉擔擔麵我哋加咗辣， 比起清湯仲惹味，但唔知關唔關加辣事，定係個牛肉嘅關係，湯面頭有層油， 食落去會覺得有啲膩。 個牛肉係牛展嚟嘅， 似係現成嘅牛展，買返嚟切片就上碟。 牛展唔太熱，比較韌。另外跟餐會送一杯豆漿。豆漿無乜甜味同豆味，比較稀，叫做有野濕下口。…Read More

“ 三蚊嘅價錢，十蚊嘅質素” 用嚟形容亞玉豆腐花絕對不為過。當日中午行開荃灣， 係接近三十幾度嘅太陽關照下， 真係人都畀佢曬熟。諗起之前電視賣過嘅兩間豆腐花舖， 又咁啱喺附近， 所以就諗住過去食玩冰涼嘅豆腐花啦。當日亞玉豆腐花大概有二十人排隊， 但係佢哋手腳好快，大概等咗五分鐘左右就買到。我叫咗碗凍既豆腐花溝紅豆， 盛惠三蚊， 另外加咗兩蚊換個比較的色嘅缽仔糕。抵玩！豆腐花可以因應自己喜好加黃糖，糖漿或者薑汁。 冰凍既豆腐花好滑，好重豆味， 加上甜甜嘅紅豆， 成個人即刻透心涼，正。抵食指數100分。…Read More

星期六叫一圍中菜全包只需要$1888， 確實係幾抵嘅。所以，我哋就揀咗龍寶酒家提前食我哋嘅端午節飯。呢個套餐叫一路發九大簋全包宴，平日$1688，星期六日order要加200蚊。啲嘢食質素同一般酒家差唔多， 不過不失。比較出色嘅係個酥炸日本廣島生蠔同埋蘿蔔清湯牛坑腩。 而且個大蟠桃壽包係有蛋黃嘅，值得一讚。但係條魚就蒸得過咗龍， 嘥咗條魚。特別提一提嘅係隻乳豬如果要幫你切埋嘅話係要加100蚊嘅， 所以我哋就原隻上，自己剪，慳番一舊水都好吖。但真心要彈嘅地方就係啲服務質素同態度。 首先啲嘢食上得勁快，完全食唔切， 有兩味菜甚至一上枱就要換細碟。 另外大堂侍應完全唔夠， 仲要好多都面口唔好，。因為我哋啲食物食淨好多，問佢哋拎外賣盒同膠袋打包，都叫咗好多次先拎黎，同埋態度明顯係差嘅，希望酒樓可以改善下呢一方面啦。總括嚟講， 如果服務質素冇改善，呢間酒樓應該係冇下次。…Read More

波波奶茶，飛仔華田，雪糕紅豆冰...呢啲都係老鳳冰室嘅招牌，飲品賣相非常吸引 ，而我亦都係畀呢啲嘢飲嘅買賣相吸引咗入去。老鳳冰室裝修懷舊有特色，但坐位唔多， 一般要等齊人先畀入座。 我哋大概等咗15分鐘左右就入到坐，唔算太耐。除咗裝修之外，佢嘅擺設，餐牌，都好有老香港嘅感覺。食物質素都唔錯， 我叫咗焗芝士海鮮保齡球。 焗飯質素屬於中上，面頭舖滿濃厚嘅芝士，好邪惡。另外個焗飯係用個包裝住，個包外皮焗到好脆， 可以用另上既芝士汁點黎食。 加埋杯有三個奶茶冰球嘅波波奶茶，實在係大滿足。有機會我應該會再食老鳳冰室，試下佢都好多人叫既芝士撈丁系列同埋其他特飲。…Read More

年紀大咗食得唔多 自助餐基本上都唔會自己畀錢食，除非有人請或者公司食飯啦。今次又有人萬歲，所以我地又揀咗去薈景食喇。薈景個位置喺灣仔會展， 所以基本上好多位都可以望住維港食飯，景觀冇得頂。自助餐包咗橙汁汽水啤酒，可以自己喺外邊拎， 另包一杯餐茶。 如果想飲白酒嘅，每位加50蚊就可以任飲。自助餐最緊張要既梗係夠多食物種類啦。我覺得薈景既食物款式都唔少，但未到花多眼亂。基本回本位既燒牛肉，羊架，龍蝦，長腳蟹腳，生蠔等等通通都有，另外haagen dazs雪糕有 3種味， 雲呢拿，朱古力同埋咖啡。 大家可以因應自己嘅喜好重點出擊。因為嘢食嘅種類太多喇，我自己都淨係試咗50 ％左右， 我大概講下自己嘅preference。推介既： 燒牛肉，羊架，長腳蟹腳， 椒鹽鮮魷唔推介既： 燒龍蝦仔（0鮮味）， 燒腩仔（ 啲皮係唔脆㗎）因為是日係星期5既關係，人頭588加一，再用匯豐卡有八折。呢個價錢如果要自己畀錢，我會揀食其他嘢😆 但自助餐嚟講佢嘅質素係ok嘅…Read More

香港仔呢個咁細嘅地方住咗咁多人，係各餐廳兵家必爭之地，有好多我諗都冇諗過嘅餐廳都嚟咗香港仔開分店，呢一間馬來喇沙就係其中一間啦。呢間店以前我已經喺銅鑼灣嗰間食過，覺得性價比幾高，咁佢嚟咗香港仔開分店我梗係要支持吓啦。入正題之前想先稱讚下佢喺商場樓下派傳單嘅嗰位叔叔，好落力，絕對唔係Hea住做，一定要比個like 佢。同埋佢傳單入面夾咗張coupon，有得減$20，如果大家見到可以拎左先上去。今次我哋叫咗無骨海南雞喇沙，馬來蜜汁炭燒厚切豬扒配特色菜飯，同埋芭堤雅蝦醬炒飯。三個飯都好值得推介炒飯炒得好惹味，但係怕肥嘅女士就要三思喇，因為佢都有啲油同埋啲面頭啲腩肉都幾肥。個飯另外跟咗啲蒜頭洋蔥辣椒，你可以根據自己喜好加黎食。我就覺得全部加哂之後個飯仲正，升多2個lv。炭燒豬扒菜飯塊豬扒係厚切既，加上燒到少少燶，好香口，食落好有口感。而喇沙一如以往的出色。喇沙麵由兩種面底組成，一種粗啲有趙口啲。另一款有啲似米粉嘅感覺，會比較索湯吸味。撈堆埋一齊食係夾既。而因為我個人唔係特別好海南雞，就唔comment啦。順帶一提，午餐係跟前菜，甜品加嘢飲，嘢飲加幾蚊就可以揀珍珠奶茶，都好抵飲嫁…Read More

今日落大雨，公司附近冇乜選擇，就決定去試下呢間韓式外賣店喇。排隊揀野食之後再順住條隊比錢，比完錢就可以去外面既公家枱搵位食。但可能因為落雨既關係，好多人，所以就拎返公區司食喇。我今日揀咗泡菜豬肉便當，盛惠78蚊，有點少貴。泡菜豬肉都幾辣，絕對比一般既泡菜辣，送飯既話都ok，就咁食就...但個味道係對得住個價錢既，讚。另外我幾鍾意佢既白飯，粒粒分明，軟硬適中，幾好咬口。除咗主菜外，仲有5小食同埋炒韓式粉絲，味道都唔輸蝕。由其是個魚干仔，好惹味總括黎講，食物質素係幾好既，但如果日日食就對荷包唔係咁好喇…Read More

半年一次既一田大減價又黎啦，商場人頭湧湧，由下晏行到夜晚都未行哂，所以搵間唔駛等位既茶記黎個速食算數。聚樂居環境有d昏暗，裝修比較舊，不過為求快，咩都冇所謂la，所以入去之前都冇抱咩寄望。入到去叫咗個焗飯同意粉，加多個什扒。個焗豬扒飯同焗雞扒意粉不提也罷，個汁唔好味，兩塊扒都亦完全冇味。但係反而個什扒above average（相對焗飯）。鐵板做到最基本既夠熱，淋汁落去炸炸聲，有feel。薯條同雞翼炸得好香脆，最令我驚奇既係鐵板既雞扒同豬扒比焗飯既雞同豬整到好味好多。所以如果大家真係揀呢到解決晚餐，建議揀什扒…Read More