yuennnnnm's Profile

因為我同朋友都想喺觀塘一帶約食飯，但大家都諗唔到食咩好。上網search搵到呢間，駱駝漆又近大廈，menu睇落吸引，就決定去呢間。我叫咗牛油果軟殻蟹漢堡，其餘兩個朋友都叫咗唔同款嘅漢堡，另一個唔鍾意食漢堡嘅朋友就叫咗一個扒餐，然後我哋四個就有叫多一個雞翼。我叫果個漢堡有落我最愛嘅蛋黃醬，加上牛油果襯住隻軟殼蟹，有炸物果種香口但同時又帶少少清新嘅感覺。我朋友個扒餐叫咗七成熟，紅肉但未致於切出血水。成餐飯都唔算貴，如果唔另外叫雞翼，$100內都有得找，性價比頗高。…Read More

補祝母親節，媽媽話想食西餐，我哋就帶咗佢嚟呢度食。門口就咁望落以為唔大，上到二樓其實有一個好大嘅空間，間隔舒服。我哋一行五個人，佢俾咗二樓嘅一張枱我哋。啲櫈張張唔一樣，有啲款嘅櫈可能無咁好坐但都唔係大問題。我哋嗌咗個四人餐再加排包(全份排包有四片，半份就只有兩片)。雖然話係慢煮，但上菜速度都唔慢嘅。排包有極多嘅芝士，芝士愛好者一定會鍾意。四人餐包括海鮮拼盤、肉類(雞髀、豬仔骨、牛扒)、一份焗意粉同埋一壺特飲。份量之多係五個人都差啲食唔晒，上菜嘅時候賣相好靚，絕對可以拎黎打卡。但味道就不過不失，就係好正常嘅扒餐。媽媽表示對呢餐好滿意，同埋佢見到同場嘅絕大部份都係年青人，佢話覺得自己都好似後生咗咁話喎！…Read More

其實今次係第二次去幫襯啦！第一次係因為有人介紹，就去試咗個百香果蘋果汁。之後就覺得念念不忘，一路提自己如果再經過要去飲多次。今日約人喺太子食飯，早咗好多到太子，天氣又熱我又行到口乾，心諗要即刻去飲番杯啦！今次試咗同樣係百香果系列但係加橙汁，咁熱嘅天氣飲果汁感覺上真係清涼又比較健康。佢有唔同配搭揀，除咗百香果系列都仲有其他系列，任君選擇。由睇住佢切生果、榨汁、入杯，等嘅時間都唔算太耐。其實喺鬧市有間咁嘅果汁店真係好難得，希望大家都幫襯多啲支持呢啲小店啦！*不過惟一唔好處係，每次幫襯用一個膠杯都覺得自己浪費咗🥺…Read More

之前成日經過都好想試，今次終於約朋友食飯試到！預早訂左枱，唔駛等就入去坐低嗌嘢食。我同朋友都俾佢個石燒系列吸引住，於是嗌咗個石燒紐西蘭牛柳食。牛柳放喺塊好厚嘅石板上面，其實我覺得視覺上睇係幾靚嘅。切落去淋嘅，一啲都唔難咬開。如果想食熟啲就可以自己煎多陣，但惟一唔好處就係你要不停咁食，如果唔喺就容易變得太熟......薯角係脆嘅，但唔特別所以唔多介紹啦🙈另外加咗$30變咗套餐，有埋餐湯飲品沙律同埋甜品，份量滿足得嚟唔會覺得過多。全程食咗兩個鐘，環境舒服服務幾好！…Read More

雖然過咗一段時間先寫呢篇食評，但仲記得佢啲嘢食有幾吸引，好想搵機會再去一次:)我同朋友兩個人夜晚去食，地方舒適，傾計都幾舒服。第一輪嗌咗紅酒燉牛腩、蕃茄豬軟骨同埋千島單骨雞翼。紅酒燉牛腩雖然唔錯但比預期中失望；蕃茄豬軟骨就真係好有屋企嘅味道，我仲忍唔住飲咗啲湯佢。至於千島單骨雞翼，真係完全令我哋喜出望外！沙律加落雞翼好食不單止，呢個價錢有咁嘅份量，CP值真係勁高！但我同朋友都係覺得有啲唔夠飽，又見到隔離枱個蒜香肥牛賣相好吸引，於是就追加咗一個餸。佢嘅味道無令我哋失望，令我哋不斷講「好好味呀好好味呀」講到最後。原本我哋仲想試隔離枱果碟賣相唔錯嘅炒菜，但肚皮真係太滿足嗌唔到多一樣，惟有下次去再試啦:)…Read More

我係晏晝既時候同另外兩個朋友去食既，唔算太多人，都坐得幾舒服。我地叫左佢個叻沙米線，鷄飯同咖椰花生醬三文治。前兩個都無咩特別，米線有少少唔夠飽。但個咖椰三文治就好好食，應該係有特別既醬料，值得推薦。…Read More