芝麻奇異果's Profile

喺復活節假期嚟到outback食晚餐，不過可能因為有疫症，唔駛等位就入得。首先係送嘅黑糖麵包，個人覺得黑糖甜味好出，反而唔駛咁甜，第一舊上嘅比較乾身，之後encore嘅果舊反而仲暖暖哋軟熟啲。之後係招牌墨西哥牛肉粟米脆片($78)，份量好夠，啱啱上嘅時候熱辣辣好脆身，配埋啲芝士同cream好香，如果啲牛肉多返啲就好啦。不過一定要趁熱食，唔係就會容易變硬難啲咬。主角係美國頂級肉眼牛扒 （BLS Rib Eye $438），叫咗7成熟，不過因為用鐵板慶住所以熟咗啲。牛扒幾大塊同埋juicy，不過好似落鹽重手咗少少，價錢方面我自己就覺得偏貴。另外有跟餐嘅細沙律，有啲生菜同幾片芝士，味道正常。另一個主菜係愛麗絲燒雞胸 ($152)，上面有好多芝士同兩塊脆身嘅煙肉，下面係兩舊雞胸。芝士好惹味，但舊雞調味偏咸而且比較乾，唔太推薦大家食佢。加$10有個忌廉餐湯，好creamy，比較杰身，飲多咗可能會覺得漏。整體嚟講，服務唔錯，嘢食份量好夠3個人食，墨西哥牛肉粟米脆片真心好食，但呢個價位我期望主菜味道亦會好啲。…Read More

呢排喺新蒲崗番工，所以多咗喺呢頭搵食，見到呢間嘢晏晝都幾多人嚟食，標榜無味精湯，又專食餃子，所以就試咗佢喇！今次試咗佢個＄３２嘅韭菜豬肉餃子麵（小）- 有４粒大大粒嘅餃子，全部都係人手包，皮薄仲有啲煙韌，而且餡多又新鮮，自家制嘅餃子真係好好食啊；- 麵條都煮得軟硬適中，無＂行＂味，份量夠飽；- 湯底佢話係花膠淮山甘荀豬骨湯，味道又真係幾清甜，食晒成碗麵完全無口乾；- 總括嚟講，值呢個價，係新蒲崗裏面數一數二好味嘅餃子麵啊！！一定會再嚟幫襯！！不過其實佢間鋪唔算大，始終係小店，所以晏晝嚟都容易爆場，同埋午餐繁忙時間人手唔係好夠，得一個人負責煮，其他店員負責落單收錢，所以要預番大概２０分鐘等上菜。…Read More

今次同friend去咗呢間話係新加坡50佳嘅莆田，平日見佢晚市幾貴，但係下午茶（兩點半開始食）都係大概$48(點心套餐) 或 $58(小聚套餐) 一位，免茶芥加一，當食lunch嘅話係呢區價錢可以接受，所以就試咗佢啦～朋友叫咗$58(小聚套餐)，有滷水自製豆腐，水晶豬蹄凍，興化炒米粉（推介）同清心雪耳糖水。滷水自製豆腐，味道正常嘅滷水豆腐，索晒啲滷水汁好香。水晶豬蹄凍，有啲似鎮江肴肉，豬蹄凍晶瑩剔透，放落口好軟滑，不過比較多豬皮，減肥人士注意吓喇清心雪耳糖水，幾香甜，仲有粒去咗核嘅小紅棗~興化炒米粉，全場最好食，好多配料例如蜆仔，蝦仁，花生仁，米粉好似絲咁幼，仲幼過平時食嘅銀絲米粉，又炒得唔油，有小小鹹香味，亦都係好夠份量。我叫咗$48(點心套餐)，有莆田糯米丸，古法蕃薯包，包菜飯同清心雪耳糖水。莆田糯米丸其實即係擂沙湯丸，甜而不膩。古法蕃薯包，外皮煙煙韌韌，裏面有啲蕃薯餡，覺得蕃薯包皮好食過唐記包點，兩個點心都令人食得好滿足。包菜飯其實即係有用到捲心菜同小小蝦乾臘味炒嘅飯，唔算好多配料，但係用豉油炒得好惹味，啲菜又夠fresh中和到炒飯嘅油膩感，而且份量夠多。埋單免加一茶芥，不過就有個要收費嘅餐前小食（大概十幾蚊？），下午茶唔多人，好寧靜，侍應態度好，嘢食精緻好味，絕對值呢個價～…Read More

今日同個friend嚟到這家開業3個月左右的潮州菜館，本身想去佢隔離嘅嗰間喇沙，不過佢有個店員好熱情咁同我哋講佢晏晝都有茶飲，所以就試咗佢喇～今次試咗4個點心，分別係香蔥炸兩腸，香煎韭菜粿，蒸合桃包同埋炸雲吞香蔥炸兩腸，假日中點($22.8)，呢個覺得好好食，睇相都知道佢幾大份，啱啱上碟嘅時候中間嘅油炸鬼仲係脆㗎，出面嗰浸腸粉皮滑同薄，呢個推介。香煎韭菜粿，假日中點($22.8)，佢出面我諗係類似粉果嘅晶瑩皮，有輕輕煎過，幾香亦厚薄適中，裏面係韭菜同少少蝦嘅餡，係咸嘅潮州點心，呢個我覺得佢入面餡料油咗少少，其實如果佢個做法係蒸（類似韭菜餃？），可能會更夾，不過味道都唔差，本身想試埋個甜嘅紅桃粿，不過兩個人唔敢叫太多驚食唔晒蒸合桃包，假日中點($22.8)，佢外面都整到好似合桃形狀咁好得意，入面嘅餡有合桃碎同埋應該落咗煉奶，我個人覺得個餡甜咗啲啲（可能係煉奶嘅關係，不過鍾意食甜嘅人應該會覺得甜度ok），同埋會想佢合桃多番啲，但係個蒸包外層真心好好食好鬆軟炸雲吞，假日小點($20.8)，味道有正常酒樓水準，雲吞皮脆，上碟時亦都係熱辣辣埋單兩人連茶芥加一$117.9（假日），平日或者下午茶嚟食會再平啲，如果要比較，覺得佢哋點心嘅味道同價錢同海港酒樓差唔多level，晏晝都可以試下呢間飲茶㗎~另外讚下餐廳環境與服務：餐廳唔迫，裝修精緻，碗碟乾淨有中高檔酒樓feel，啲嘢上得快，呢度可以靜靜地咁嘆茶，而且店員服務態度好，收碟時好客氣咁同我哋講唔係想催我哋走，希望可以keep到呢個服務質素啦，有機會都想試下佢夜晚小菜…Read More

星期二晚經酒店booking，來到了這家獲得米芝蓮推介的葡國餐廳。我們點了炸馬介休球，葡國烤乳豬，非洲雞和焗鴨飯。每桌客人都會有一些微溫的麵包和一碟橄欖當前菜。麵包挺好吃，內部頗為濕潤，不是敷衍的那種麵包。炸馬介休球，這個真的推薦，馬鈴薯泥非常的滑，跟裡面的鱈魚非常搭配，調味適宜，外層炸得酥脆。葡國烤乳豬，豬的皮烤非常的香脆，豬肉的脂肪和嫩肉在口裡慢慢融化，肉香充滿了整個口腔。伴碟的那些薯片也是自家製，很有誠意。非洲雞，起初以為是一款烤雞，原來是淋了類似沙茶醬汁的雞肉。醬汁跳的很惹味，有一種淡淡的椰香，也感覺放了很多種不同的香料，不過由於大部分雞肉的部位是雞胸，可能有些人會覺得肉稍微乾一點，我個人是很滿意了。焗鴨飯，飯面有一點焗過的飯焦，上面鋪了臘腸和煙肉，中間夾了很多鴨肉，不過吃起來味道比較咸和乾。總括來說，這餐廳的水準挺高，沒有辜負米芝蓮的推介，特別推薦炸馬介休球和葡國烤乳豬，真的好吃！…Read More

大家好，如果有睇到呢間嘢3月份嘅劣評，我之前已經試過呢間嘢伏到喊嘅西檸雞，原來沒有最伏，只有更伏。一開始有個知客同我哋推介menu無嘅粟米雞球（$78)，仲同我哋講話呢個菜好受歡迎，琴日一出就賣晒喎，我哋已經3個月冇去過呢間稻香，今次過咗咁耐，諗住重新俾一個機會佢，而且我諗，話明「雞球」，應該會同上次相比會多返啲肉掛？叫咗啲嘢成半粒鐘之後先嚟，先上個雞球。我以為佢會有改善，點知係無呀！！！呢碟嘢嘅所謂雞球，同上次嘅伏西檸雞嘅「粒粒碎雞」係同一款嚟嘢！啲雞嘅脆漿好厚，但雞切到好薄，炸完之後，啲雞變咗柴乾咁，完全食唔到正常雞嘅texture。呢碟嘢簡直係垃圾，免費俾我食我都唔會食。其實煮得咁冇誠意，點解仲可以咁樣呃啲客賺錢？之後叫咗碧綠炒老虎班球同枝竹炆斑腩煲孖寶（$238)。我屋企人好鍾意食魚，所以同上次一樣有叫魚孖寶。驟眼一睇，以為佢今次個碧綠炒老虎班球都算有好多舊魚，還可以接受。但竟然俾我母親食到一舊生魚，垃圾稻香其實唔爭在俾埋個火鍋爐我淥返熟舊魚啦！至於枝竹炆斑腩煲，裡面啲班腩少得可憐，最多係啲魚尾魚骨等等嘅嘢嚟減料。完全唔值呢個價錢。總結，呢間嘢就係伏食，食物品質差，埋單三個人$431（連啤酒，兩碗飯，加一）價錢唔合理，如果真係不幸要嚟，大家一定唔好食任何同炸雞有關嘅菜式，呢間嘢再唔改善，就好快啲執笠啦。…Read More

今日去咗食佢個公司三文治（$42），等咗大概15分鐘到，就有得食。三文治有三大件，排得幾靚，睇到橫切面。麵包稍微烘過，包邊有麥皮同瓜子仁，幾脆同埋有淡淡麥味。第一層中間夾住番茄，火腿，同芝士。番茄新鮮；芝士應該係車打芝士，不過無融到，如果有融到味道會更好。第二層係蛋沙律，煙肉同生菜，蛋沙律用咗蛋黃醬去撈，不過我覺得有少少太多醬，有啲漏，如果多番啲真蛋會更好食；煙肉唔會好多肥膏，幾crispy；生菜都新鮮。整體味道唔錯，份量夠飽肚。不過我覺得服務可以好啲，呢間餐廳成日都無位，要企喺食緊嘢嘅人隔離等，呢個安排唔太好（因為佢個定位唔係快餐，如果單食意粉，飯嗰啲都要60－70蚊，仲未嗌嘢飲，其實好應該有人嗌飛），同埋有啲枱櫈唔夠高，有啲枱矮到去到膝頭，食起上嚟會有啲麻煩。…Read More

就快兩點先食lunch，所以可以唔駛排隊即刻入去食。嗌咗個8倍濃湯蕃茄烏冬配撘餃子餐（$62另收加一），一開始擺盤幾得意，下面係烏冬，上面係用蒸籠裝著嘅餃子。稻庭烏冬煙煙韌韌，幾掛汁，蕃茄湯底似用粉開，係幾濃郁同有少少辣味，但得一塊真番茄，如果多啲真番茄會好啲。個餃子望落去好吸引，有啲橙橙哋類似千島醬喺上面，蒸出來熱辣辣，但我覺得啲醬有啲漏，之後撥走咗啲醬先食。味道正常，無乜特別，同一般超市蒸餃差唔多味。跟餐仲有杯嘢飲，叫咗熱黑糖檸檬茶，原來啲黑糖係另上自己畢落去嘅，茶味似茶餐廳啲茶咁。呢間嘢賣相好靚，食物份量都好足，但食落味道普通，如果只係貪得意都可以試下嘅。…Read More

同friend嚟食晚餐，雖然有落雨，但外面都有大概十幾個人排隊，喺餐廳外面就已經聞到好香嘅咖哩味。等咗15分鐘左右，就可以入座，唔算等得耐。個menu有好多選擇，最後都係揀咗最出名嘅豬軟骨野菜咖喱飯($69)。豬軟骨有3大舊，好軟好腍，索晒啲酸酸甜甜嘅汁嘅精華，啲軟骨好似啫喱咁好易食，食落無乜肥膩嘅感覺，好耐冇食過咁有誠意嘅豬軟骨喇!  配菜有紅蘿蔔，翠玉瓜，等等嘅蔬菜，跟埋啲咖哩汁一齊食，好香好滿足。佢話個飯有南瓜，蕃薯，黃薑，同粟米，係有啲黃黃哋色，不過唔太食出有咩味，但總括嚟講，69蚊食到個咁高質嘅飯，價錢好合理～ 有機會會再幫襯！…Read More

今日去稻香食晚餐！首先講吓正常嘅食物，食咗個龍躉兩味（148元），分別係紫茄蒜蓉蒸班頭腩，同埋翠帶濃湯龍躉球。個紫茄蒜蓉蒸班頭腩味道正正常常，不過啲茄子索晒啲蒸魚油，感覺都幾肥膩。至於翠帶濃湯龍躉球，睇相嘅樣都幾吸引，嚟到之後發覺啲湯嘅色同幅圖唔同，食落都還可以，不過啲配菜唔算新鮮，色水暗淡，啲翠帶都唔知係乜，唔敢食。然後經典菜式嚟啦，我哋叫咗個西檸雞（78元），最後嚟，一睇，啲雞碎到好似台式粒粒炸雞咁，搇滿晒脆漿，一啲都唔似平時食嘅西檸雞。食落去發覺，中伏了！所有雞都唔係雞嚟㗎，我好似食緊成舊粉咁，咬開一半，舊舊雞90%係脆漿， 10%係肉，仲要舊舊都係咁！無嘢呀嘛？雪雞柳都唔係好貴啫，使唔使俾成碟粉我食呀！酒樓嘅廚師究竟有無培訓過？點解咁難食嘅嘢都可以擺上台？所以我哋食剩咗，因為真係難食到食唔落呀！…Read More