WinnieCheung2084's Profile

今次食左佢個xo炒面，佢個炒面66蚊就真係得xo 醬少少、麵同白菜仔3條。麵既分量基本上就10啖以內食曬，食落完全無炒既感覺，似撈多過炒。咁樣收66蚊覺得極貴。另外嗌左個茴香餃子面，佢既麵係上海麵 幾q彈既。總括而言，份量好少，俾左百幾蚊唔知食左咩，唔好俾佢啲手指公呃！！…Read More

係德福食完飯想食個糖水見佢咁多好評咪試下。食左個椰皇，佢個甜品味道質素正常，蛋白幾滑，上面既椰奶又唔太甜而有椰水味，但係環境上，真係好迫，全場滿座個陣膊頭頭掂膊頭咁制，男朋友坐過啲有返啲空間順便俾人行岀泥，又俾職員行過黎講：「呀生，坐過啲呀唔該🙂」但個語氣係呼喝式。啲員工啲樣好似得罪佢咁 真係唔多想再去🙂…Read More

完全俾佢fb廣告呃左第一，食物質素唔得，安格斯牛解凍過度，岀水。88蚊呢個價好eye catching，但實質係食菜，丸，面同急凍內臟。咁88蚊都唔expect啲咩。講20蚊另外追加個啲，芫茜牛同豚肉正常，鴨血唔好食，安格斯牛衰過肥牛，油紋係0，寫鮮鵝腸但實質係急凍鵝腸。唔係難食，但你唔好亂寫囉。第二，湯底。今次叫左麻辣同沙嗲。麻辣就係大陸街邊串串個隻味。上沙嗲湯個陣個姐姐俾埋個殻我地，話易痴底，我已經即時liu下個底但發現已經痴左，仲搵到一塊焦，真係唔知係洗得唔乾淨定係痴得咁快。最尾，fb明明答唔收加一，但係間舖大大隻字寫加一，已有矛盾，或者老闆同職員溝通好定搏懵，唔知道。資訊好唔統一同menu亂寫咁已經覺得間野好搵笨。最後埋單265 呢個價係mk絕對有更好既選擇。…Read More

今次去到尖沙咀既一間流水蝦試下，之前去過泰國食，就睇下做唔做到個感覺啦！食物質素平均既食物質素都幾好。蝦就一定新鮮架啦，不過唔係隻隻蝦都好多膏，睇你好唔好運啦🙈不過基本啲蝦都爽口彈牙。另外既配料都幾多，淨係雞翼佢都提供左6隻口味，川味同孜然味較出色，個味做得好足，川味食到細細既花椒料夠辣。另外豬頸肉同豬扒都好食。豬挵肉係厚肉個隻，食落好有口感，帶骨豬扒嫩滑，juicy🥰另外仲有啲特別啲既食物，例如法包同菠蘿。不過另外既海鮮(沙白，生蠔，帶子)就偏細同埋無咩驚喜，食一兩隻好了。甜品方面，佢甜品櫃有椰汁糕，椰青大菜糕，泡芙等等，淨係試左大菜糕，硬到一個點又無味😂不過！佢地入左一隻香港製造既雪糕，奶茶芋頭牛奶味都好好食！！有驚喜！😍服務態度今次去既體驗好好，店員好friendly同好主動幫手。主動幫我地換網，教我地捉蝦，點樣燒最有效率，有個姐姐仲幫我地燒左少少野食添🙈今次既體驗幾好，而家7點30前去仲有85折，有折都會去食多次既，唔洗次次食放題都食好多肉嘛🙈評分7.5/10…Read More

去到大圍幾間想食既餐廳都full左，見呢間評價好似幾好就去試下。位置係有啲偏僻，由mtr開始行約大約7-8分鐘。一入到去個感覺麻麻地，燈光同枱櫈既配撘一般。今次我地被安排坐梳化位，最大既問題係啲梳化開始殘落，已經被坐到凹曬，唔好坐。好講返食物。隻豬手係幾好食既，個皮好酥脆，肉質都嫩滑，食多幾舊其實會覺得幾咸下。係一個好適送酒既菜式，可惜呢度無得嗌酒。絕不推薦金沙軟殻蟹pizza。好既就係佢落芝士落得好重本。唔好既就係: 第一，軟殻蟹太細粒，實質食唔到咩軟殻蟹，要好仔細食先食到dd蟹皮，就咁大啖咬就好似食到舊炸粉咁大把，仲有幾條蟹柳，不過作用不大。第二，佢既餅底好粉同好油，其實呢個脆餅底應該係先焗好個底再放面料再焗，但佢個餅底食落好粉，好似生生地咁，然後又吸曬面料既油，好嘔心。食完呢個已經有啲反胃，dum曬啲底。今次既經驗唔太好，環境麻麻，食物等左接近35分鐘先有個pizza，豬手就接近45分鐘，等到人都就訓著，無下次。…Read More

經石塘咀街市上到二樓岀去轉右就會見到一間細細既西餐廳。見到價錢唔算貴就叫左4樣野食加2杯野飲。首先 caecer salad，個醬偏輕型，重口味既我會想要多少少蒜味，同埋唔太食到鯷魚味。菜夠新鮮同脆。面包好明顯係用油炸既，因為食得岀陣油味。無咩特別。第二係肉醬芝士焗薯條，芝士俾得好大方，厚厚一層。但焗薯條有個通病，好淋同好油，可能改做炸薯條淋肉醬同芝士係面反而會好食啲。之後係值得食同好食既野！第一！一定要食佢有牛既burger。一上枱已經聞到好香既炭燒味，加上啲牛既邊燒到有少少乾，好香口，加埋啲配料。perfect！第二！豬助骨。啲肉夠軟同埋好入味，但又唔會有陣擺左好耐既怪味，處理得幾好。佢啲薯條配埋佢地既黑松露醬好夾，個醬調味岩岩好，唔會太重松露味(太重會有煤氣味)，食完個口會回一陣香味，好食！最後，飲左杯Oreo crunch。痴左半塊oreo係個杯度，好有興趣，哈哈。一開頭飲，覺得有啲水同無咩味，但後尾攪勻埋啲cream落去又飲到奶香味，唔重冰感又唔太甜，幾好，但未去到必試。環境好chill，聽住Joseph Vincent 既歌好舒服。 但如果爆場應該會有啲迫。…Read More

一直見到啲fd po啲貓貓就一直都好想泥呢度，今次終於有機會。貓cafe以呢個價錢，又有得俾貓玩，又有得食野同飲野，可以叫超值。 入餐廳之前就要著鞋套，應該係保護返貓貓。今次好好彩坐正個貓岀口隔離，見到好多貓。呢度貓既品種都好多，暹羅貓英短長毛貓都有，全部都好可愛🥰不過我吸貓吸到腳上一隻，枱面一隻，無位食飯😂😂講返食物質素，今次叫左個肉醬意粉，不過不失，應有既都有，好多肉碎，意粉既質地軟左少少，不過以呢個價錢可以接受。然後嗌左杯梳打，顏色幾靚，不過就係糖水架梳打水，無特別。不過朋友嗌左杯榛子咖啡就話幾好飲。…Read More

肺炎期間去食野真係無咩人，包場咁濟哈哈。難得星期一撞正佢個青口優惠，咁就緊係食啦。今次食曬所有既味，覺得佢既house同白酒個隻最好食。今次食同上次係上環就咁食half，就覺得啲青口既肉好似細隻啲，唔知係季節問題定點。好講返咁多隻味先House 個隻好creamy，如果中意奶香味既人呢隻就可以試下。蕃茄個隻好多蕃茄粒，但同蕃茄好似無一種好夾既感覺。白酒蒜頭味，最經典既味，同青口好夾，而且煮完都仲有酒香，好食。Hoogarden 味，食落有啲苦，個人而言唔好食，好奇怪，hoogarden 就咁飲生啤算啦。辣個隻味無咩特別，唔太辣。Laksa味好香椰汁味，食落辣辣地，都香既，但有啲搶左青口既味。甜品部份叫左apple tarte tatin 有驚喜，個蘋果仲有少少脆，有少量既玉桂味但就唔會太勁，岩岩好。個底係酥皮底，焗完都無冧曬仲有少少脆。成個甜品再加上最尾倒落去既vanilla cream，好夾好好食。就咁飲都好香。最後服務方面，唔知係咪因為得兩枱，staff都好熱情咁serve我地，又有啲溝通，感覺好舒服好friendly。…Read More

本身想食隔離既沙嗲豬頸肉串燒，點知無開門，行前見到咁多人排隊先發現有間岀名既雞蛋仔係度。佢有朱古力，咸蛋呢啲新興味，但食餐廳功力緊係食返原味。等左接近20分鐘終於到手。雞蛋仔好熱，熱到辣手。佢個皮係偏硬身個隻，硬過平時街食個啲。但正因為咁，佢都比普通既雞蛋仔脆好多。我成粒擺落口所以都唔記得佢係一半內心係全實定半實lu。食落個味有淡淡既椰漿味(?)唔知有無食錯。20蚊食個街頭小食又唔飽，有人可能會覺得貴。但20蚊底有咁既質素，飲少杯珍珠奶茶，支持返香港小食，都抵啦。Btw等個個位有啲多蚊，同埋新鮮到有啲熱氣，記得飲返多啲水…Read More

之前食過藍田個間小明珠，唔知係口味問題定點，覺得食落好酸，同埋佢地用粗個隻紅薯粉，食到好攰，炸豬扒都唔特別，個炸粉有啲硬，同埋同塊肉係分開既。咁今次食宵夜，去到觀塘個間試下啦。叫左個口水雞，戈酥，炸銀絲卷同椒鹽鯇魚骨腩。個口水雞係好冰凍個隻，再加一大pat辣醬係面。仲有啲花生粒係面。啲花生好脆口，幾好。但係個辣汁好辣。加上啲雞冰到一個點，簡直係傷害緊啲牙齒。好食既有戈酥同埋個銀絲卷。個卷外脆內熱辣辣，加埋啲煉奶好好食。個戈酥大大粒，個粉調教得幾好，夠脆但又唔會太厚粉。但係個魚就有啲腥，唔加啲炸蒜基本上係無味…Read More

想食炸雞，又聽過outdark幾次，咁就bk枱試下啦。6點去到，包場😂服務員有韓國人有香港人，幾有韓國感覺。落完order就有4隻醬，分別係韓式甜辣，蜜糖芥末，蒜味沙律醬同香蒜蜜糖(食岀泥估架炸，唔comfirm架) 男友話香蒜蜜糖好難食😂然後叫左雙拼炸雞，就係香蒜蜜糖同醬油。香蒜蜜糖就係一入口有好大陣蒜頭味，然後就無啦。一pat好痴既漿係啲雞上面。個口味一般，但啲雞係炸得好既。入面juicy，唔會乾，夠脆。就係個味唔岩食。醬油又係食唔到咩味。個拼仲有好多炸薯既野。全部都好脆，仲加左啲蜜糖bbq味粉，我中意。但係有2舊薯格食落有陣臭荀味，完全係大陸螺絲粉個陣味，勁嘔心。另外加左個蕃薯芝士條，芝士味係無既，個皮炸得好硬，就係甜甜地咁，唔洗試最後就係泡菜煎餅，好多料，好多泡菜，食食下有少少辣。同埋呢間係厚身既煎餅，但唔會硬。但食到有少少面粉味，唔知係咪未熟曬…Read More

行到mk唔知食咩，見到呢間個menu好好幾吸引就試下啦。一坐低就擺左杯蝦片同茶。蝦片幾香，食到淡淡既蒜頭味，食完又唔會口臭，幾正。另外佢杯茶係浸住茶包既鐵觀音，幾香唔gip。幾中意杯茶。我就叫左個雞叉燒粉絲，另外2個朋友叫左鵝肝飯。個雞叉燒粉絲個湯唔太濃味，清清地。粉絲份量好多，食極都有咁😂佢另外有豉油俾你加，粉面個隻似indome個包黑醬油咁，但加落湯都無乜味。但加落隻半熟蛋就好正 另外要改善既就係個雞叉燒好鞋，又係無咩味。朋友食既鵝肝飯，有三塊鵝肝，ok香啦，但未去到好甘香個種，但108蚊 有3舊都對得住個價既。飯既豉油係似食壽司個隻豉油，朋友表示好食。…Read More

因為之前學校project做呢間舖頭 睇完啲menu好似好好食，就去試下啦一開𨋢門好多萬聖節吊飾哈哈我地叫左3樣食物 2杯飲品第一個係好多人都推薦既nachos，上到枱真係好大盤，適合3-4人share，啲牛肉碎有啲辣辣地，幾惹味，加埋脆既粟米片同牛油果醬同sour cream ，好正！然後就係雞既taco， 少少辣 唔夠酸。不過枱面有支green pepper既辣椒仔加埋就岩岩好。入面有紫椰菜絲同紅蘿蔔，好爽脆幾夾。但個皮有啲重面粉味，我都係中意nacho多啲，男朋友話正常水平。然後叫左個grill steak with mushroom。呢個有驚喜，一上枱好香燒烤味，食得岀真係燒而唔係煎完再辣啲坑紋上去。肉質都嫩既$198 對得住呢個價有餘，個side既菇都好香菇味，係有啲油。綜合而言，食物質素8/10。我地6點到 食完7點，都係包場狀態，waiter會睇住我地食到咩進度再上菜，唔會有張枱無位既情況。但係我上網睇呢間有得儲asiamile 但埋單佢又話無，好奇怪。…Read More

得奶昔好飲。呢間five guys都聽左好耐，行過無乜人就入去試下啦，叫左個burger，一個薯條（辣既），同埋一杯peanut butter milshake。個包黎到好熱但係系個錫紙既包裝搞到隻手好油，食到有的le hea，個包無咩牛味，以呢個價而言，無特別，唔值。另外，聽講呢度既薯條係新鮮薯條，但唔知係咪新鮮既關係，啲薯條好軟身，完全唔脆，衰啲講m記的薯條都好食啲，另外叫左辣既關係，佢會加啲Cajun粉，但太多啦，好咸。最值得講係杯奶昔，好濃既花生醬味，好滑好好飲，雖然上面啲cream無セ奶味，但都值得飲下。SHAKES SHAKES GUYS HAK…Read More

男朋友話之前食一間川菜好好食，不過幾年前既事，成日係度講，睇食評又好似唔錯，咁就去啦。入正題 蒜泥白肉個味較得幾好，特別中意佢佢蒜泥，佢真係磨成泥，入口即溶，而且好香，白肉既厚度適中，可以一戰。第二，口水雞。呢度既雞就唔係好多油，食落唔算好辣，但唔知點解食多幾舊就有啲麻脾既感覺。佢底啲青瓜花生好好食，哈哈。第三，麻辣魚春魚卜煲。呢個係有啲失望既。聞落去無好香既麻辣味，魚春食落都無乜特別，仲有少少怪味。魚卜份量足夠。煲野越食越辣，要係咁飲野。一定要食底個啲薯仔同蘿蔔！好食。青瓜就不了，煲到淋曬，唔明擺落去既用意係咩，擺蓮藕會開心啲。涼拌萵筍。明顯係刨岀黎，太粗，而且口感唔夠爽脆。可能係無浸冰水。…Read More