AngelkChoi的個人專頁

去咗大名鼎鼎嘅"金鳳"据扒，未去呢間之前，我好多年前食過山林道果間，但對佢d食物都無乜印象。不過成日將佢同灣仔果間"金鳳茶餐廳"撈亂，直至前年去過一次果間"金鳳"飲奶茶，我先識分佢哋兩間，超級低B！講返今餐飯先，呢間總店歷史悠久，由門外嘅招牌到入面嘅裝修都保持住果種懷舊味！玻璃門有塊黃色布襯托住一張紅色嘅新年剪紙，而家就覺得好「娘」，可能當年好流行！燈光又氛氛暗暗咁，可能爸爸年代都屬於拍拖勝地。入面地方其實唔大，兩邊都係迫迫細細嘅卡位。雖然今日係星期一，但依然坐滿客。羅宋湯&餐包同平時去花X餐廳一樣，每個餐都跟湯同餐包。湯落足料，有椰菜、甘筍同西芹～～平時嘅西芹我一定唔食，不過佢煲到淋晒無晒味我就照吞。西冷牛扒 & 荷蘭豬扒牛扒雖然大件，但拿到粉紅色，好淋，連無牙阿婆都食得，bf表示唔知自己食緊乜！我食呢件豬扒比較好少少，不過同樣拿過，只係無件牛扒咁嚴重。只有d蒜同黑椒汁叫正常d~餐飲…查看更多

因為病所以要揀d清淡d嘅野食，但其實出街食十居其九都係味精，一係太多煎炸野，食完口乾到死！而且呢個商場都無乜嘢啱病人食，最後決定入呢間台灣嘢，唯有自己忍口唔點台灣菜必食嘅鹽酥XX。金牌小籠包略嫌頂頭d皮厚咗少少，味道幾好，肉餡新鮮，入面d湯包一咬就咇出嚟！古早魯肉飯成日聽到台灣嘅魯肉飯同肉燥飯，以為係一樣，原來係有少少分別嘅，但製作方法都係大同小異。而今晚叫嘅係魯肉飯，係肥肉多過瘦肉，肉會切成肉丁。利用大火將油脂逼出，加入其他配料爆香，再加入醬汁熬煮近3個小時!!再熄火冷卻，利用冷縮現象將肥肉裡嘅油脂再逼出，等d醬汁滲透到肉嘅組織裡。所以每粒肉丁都好夠味，配以糖心蛋同白飯一齊食，唔錯！蚵仔麵線蚵仔麵線又係一道台灣特式小食，不過佢d蚵仔唔夠肥美，可能唔係季節！但整體麵線味道較淡，原本可以加醋調味，不過我對醋無興趣。花雕醉雞呢個醉雞賣相就一般般，不過酒味都幾出，d雞都夠入味，ok啦！台灣A菜我一直以為A菜就係油麥菜，原來A菜同油麥菜係同科嘅親戚。A菜其係萵苣嘅葉，俗名「妹仔菜」或「鵝菜」原產於地中海沿岸，葉呈尖形，食落有d苦味。A菜大約喺10世紀初傳入中國，當時係上品嚟㗎，要用千金嘅銀碼先食到呢種略帶苦味嘅青菜，所以又叫「千金菜」，不過而家都冇人咁叫嘞！台灣人呢種用麵士炒菜嘅方法，同平時廣東人炒菜唔同，少少甜少少鹹，間中食下幾特別！水果紅茶/百香果梳打水果紅茶較甜，水果其實只有一片橙同士多啤梨一小粒。百香果梳打都係一般般。而家越嚟越多餐廳為咗響應環保而用不鏽鋼飲管，其實我自己就覺得除咗環保之外，最重要係要注重飲管嘅清洗方法，希望每間餐廳都留意呢點，咁我哋d食客用不鏽鋼飲管就放心得多。…查看更多

每次嚟天水圍，我最愛同兩個朋友去新北江商場呢間舖頭仔食辣嘢！雖然我哋三個人食辣嘅程度都唔同，但呢度嘅辣度可以自由要求，咁當然係食得最辣果個就我哋兩個食小辣，所以啱晒全部人食啦！有去過新北江商場嘅人都知，呢度d舖頭仔真係好細好細，而海南小廚未裝修之前，其實已經擴展咗好幾個單位，不過都依然長期爆滿！每次嚟都要等位，不過，嚟得呢度食嘅朋友仔都預咗，佢哋上菜都幾快，所以大家都會拍爛檔食飽就走，唔會阻住晒！其實裝修後嘅檯櫈係明顯比之前排列得好咗d，但始終地方淺窄！大家為咗食好嘢，都會張就張就！手撕雞懶人食手撕雞最啱，皆因雞已經去骨只剩底雞皮同肉。雞肉用醬料撈過，雪凍咗少少，食落唔會笠囗，加入花生同青瓜絲食落減少油膩感。辣子肥腸好多人好抗拒食豬大腸，其實只要食店處理得好就完全無問題。肥腸經油泡過後香脆可口，唔好以後油泡後一定會好油淋淋，咁就錯喇！可能喺油泡過程中將肥腸本身入面嘅油脂都炸走咗，所以，加入辣椒乾落去炒完之後，食落就好乾爽，碟底都冇一層好厚嘅油！涼拌青瓜正常水準涼拌萵筍基本上個醬汁同青瓜嘅係一樣，但唔知係d萵筍出水定加多咗油，略嫌呢個有d水汪汪同油淋淋。虎皮尖椒唔知點解而家喺街食到或者自己去街市買返去嘅尖椒，同樣係10隻只有一、兩隻辣，所以喺呢度都差唔多，不過呢喥勝在夠平，$35一大碟！食到你夠皮！水煮魚(生魚)呢喥嘅水煮魚只有一款魚，就係生魚。我第一次試食用生魚整，事關我食魚好揀擇，不過朋友極力推薦下，加上有人包底，我就唔怕試。生魚肉肉質好滑溜又冇乜骨，魚肉又入曬味，我哋叫咗小辣食落少少麻少少辣，好惹味。而且佢個底係墊咗薯粉，d粉索哂辣汁，呢個真超級正！…查看更多

自從喺荃灣返工開始，間唔中行過心思思都想食返碗米線，唔理佢外面人龍長到死，唔知要排幾耐，唔理佢加價加到飛起，都一定會去食！不過，睇怕今次都係最後一次！不停加不停加不停加價，所有價錢用卡紙蓋上去，加完又加，不過都係願者上釣啦！米線其貌不揚，我一向都叫佢做垃圾米線！我每次都係食少辣，不過今次食完之後，堅係覺得差咗好多！唔止啲餸比以前少咗、米線冇以前咁爽滑彈囗、啲湯仲好油，所以今次食完之後就肚子痛，今次食完真係怕怕！從前最恨食呢度嘅米線，依家竟然係怕咗食，真係可惜！…查看更多

車仔麵，我由細細個讀小學開始就食，皆因最愛食粉麵嘅我，每朝早餐都係車仔麵！喺我行路返學嗰條路喥，有個叔叔推住車仔賣車仔麵，所有每朝返學前我實會嚉碗豬紅+油麵，因為我細個時食嘢好慢，媽咪怕我會遲到，所有佢教咗我一個獨特嘅食法，就係篤爛d豬紅，因豬紅原粒食中間係會好熱，仲要碗麵走埋湯，咁就可以食快d啦！（不過好多人覺得我好古怪，大大下已經冇用呢個食法lu~）講返呢間千色車仔麵先，完全唔明點解會係米芝蓮囉！味道好一般，Size又細碗，價錢仲要好貴添！真係試一次就夠啦！…查看更多

又一餐冇planning 嘅晚餐，揀咗喺旺角食放題，喺旺角嚟講，呢間嘅環境都唔算太迫夾，地方都幾大，又多卡位，可能時間尚早，隔離枱仲未有人坐，我哋兩個人坐咗4個位，超級寬趟！沙律小食出面有沙律bar 任攞，沙律我冇食，但睇落都幾新鮮。泰式鳯爪、中華沙律、螺肉~味道正常，勝在任食!刺身三文魚、油甘魚、珍寶赤蝦、劍魚腩、八爪魚、甜蝦、帶子、榮螺、虎蝦全部都唔錯，第一次基本上我哋全部刺身都有點到，但上嘅時候就發現有啲冇嚟，就係北寄貝、希靈魚同象拔蚌， 第二次再點就有齊！碗仔翅呢個係放喺出面任食區，好似食buffet一樣有兩個選擇，不過佢就冇西式湯，只有中式老火湯同呢個碗仔翅。味道都算唔錯，好似細個喺街邊食嗰啲碗仔翅嘅味道，有木耳絲、冬菇、蛋絲同最重要嘅粉絲。海膽手卷 ~海膽都幾甜、舊飯幾細、食果陣紫菜未完全淋，証明上菜都唔係好慢！蟹子軍艦/芥辣八爪魚軍艦/黃金魷魚軍艦好少可食放題我會叫壽司或軍艦，但呢間d飯都唔錯，所以我都叫咗幾件軍艦，都係正常水準。鹽燒左口魚裙邊/醬燒珍寶蟹棒/原條海鰻鹽燒牛舌 ~彈牙無酥味，正！鹽燒海蝦~OK!鹽燒雞軟骨~正常無特別!燒有機菠蘿~有無機我唔知，但我好鐘意食燒菠蘿，我覺得好好味！牛油燒翠玉瓜呢個係全晚最攪笑嘅，明明order紙上係以串為單位，我就點咗一串，點知我哋見到得一件好脆肉瓜，超攪笑！即時起咗今次食評個Topic~清酒煮蜆~正常無特別!炒珊瑚蚌~好少可見到有炒珊瑚蚌，味道唔錯幾惹味！份量唔多，其實可以再點多份。萵筍炒鮮菇~無乜特別天婦羅海鹽虎蝦天婦羅/蟹棒天婦羅幾好唔錯！粉漿唔算厚，蟹柳天婦羅係好味嘅!牛油炒粟米~無乜特別冇翠玉瓜嘅炒野菜~最特別係唔見有脆肉瓜!…查看更多

前前後後幫襯咗3次，食完第一次覺得好味又抵食，之後都會繼續幫襯，而個酸辣湯次次都有食，真係平靚正！第一次幫襯酸辣湯雖然佢唔係我食過最好味嘅，不過佢有木耳絲、豆腐絲、荀絲，都算足料，而且酸辣味適中，加上呢碗係大size，只係$35蚊，真係超抵！（好似賣廣告咁tim!）涼拌青瓜夠凍又爽脆，配上醬油蒜茸，少少鹹味，正！醉雞個賣相係麻麻地，味道中規中矩啦！菜肉雲吞雲吞大大粒，皮厚度適中，雖然味道係冇隔離舖咁好，加咗少少紫菜同蛋絲，幾好！第二次幫襯酸辣湯醉雞青瓜拌海蜇第一次食睇到係以海蜇為主，拌入少量青瓜絲、甘筍絲、麻油、芝麻同少少葱花，不過不失！涼拌海帶好大碟海帶絲，有少青瓜絲同甘筍絲，其實幾好味，不過有我最唔鍾意嘅莞茜。蟲草花雲吞呢個係素餃，除咗蟲草花仲有幾款菜同木耳，真係有d驚喜，唔錯，可以一試！第三次幫襯酸辣湯唔記得影相手撕雞本身d雞肉冇乜味，好似柴柴地，不過加埋佢果d蒜茸，食落又幾好味！下面墊咗d生菜都照食曬！青瓜拌海蜇一睇就知呢碟比第一次食少咗好多海蜇，多咗好多青瓜絲，🤦🏻‍♀️🤦🏻‍♀️🤦🏻‍♀️水煮韭菜餃之前試過湯雲吞，今次試吓水煮餃子，一咬吱曬d汁出嚟，哈哈！味道唔錯！…查看更多

今晚放工做完facial，肚餓兼唔想行咁遠，所以係附近搵食。椰子煲雞湯有椰子味同幾條雞絲嘅水海南雞飯唔可以話唔好食，普通雞咁冇特別有海南雞嗰種香味。油飯係超級油又冇嚟味道。泰式炒通菜算最正常嘅炒通菜，但係唔可以話係泰式炒囉！薈亞三小拼炸魚餅、串燒、泰式酸辣鳳爪一般般～燒豬肋骨(半份)唔好味，超級鹹！全晚最得係杯龍眼冰，可惜我冇影相！…查看更多

我無記錯，我應該之前都有寫過明發餃子嘅食評，我覺得佢係全港數一數二嘅餃子，我每次去到深水埗都心郁郁想去食！以前喺舊舖食就懷舊風味重d要，而家搬咗去新舖細間咗，裝修又新潮咗，都係掛住舊舖多d！Anyway，d嘢食依然係咁好味！碗仔翅呢度嘅翅係我細個食嘅味道，自己一個人嚟就食唔晒全部嘢，所以我同bf嚟又或者朋友嚟，都會叫碗碗仔翅share。湯鴛鴦餃 (椰菜/韭菜)餃子每日即場包，材料新鮮，由第一次食就即刻愛上。椰菜餃入面唔止有椰菜，仲有冬菇同沙角，超鮮甜。韭菜餃入面除咗有豬肉、韭菜，仲有蝦米同馬蹄，少少鹹香味，好正！煎鴛鴦餃 (椰菜/韭菜)湯餃同煎餃同樣可以叫晒兩款，餃皮夠薄，香煎後脆口。韭菜+肉鮮味香濃，一咬落去肉汁吱晒出嚟！椰菜煎餃相對無咁出色，湯椰菜餃比較襯！…查看更多

唔知點解香港既沾麵店開到成行成市，今次呢間係日本沾麵連鎖品牌「三田製麵所」，2008年喺東京創立，喺日本有19間分店，例如旺區新宿、池袋、涉谷、大阪難波等，香港暫時有登龍街同K11兩間分店。據聞初初開時大排長龍，但我都唔知我7月初去嘅時候開咗幾耐，不過我係下午茶時段去到，唔洗等直接入去坐。沾麵其實喺日本已流行咗數十年，好多人話起源自東京池袋大勝軒，專為低下階層而設，麵條份量較一般拉麵多，湯底溫度稍低，比勞動者快d食飽有氣有力快d做嘢。濃湯豚骨魚介沾麵原來沾麵都有分好幾個派別，酸甜系、濃厚魚介豚骨系、新派系，好明顯三田製麵所就屬於濃厚魚介豚骨系，主打都係濃湯豚骨魚介沾麵。2000年由埼玉縣「頑者」所創，主打自家製極粗麵、魚粉、濃湯汁沾麵。湯汁加入大量魚介豚骨，兩種口味混合變得香濃，配合極粗麵食起嚟較重口味，但就係現時日本沾麵嘅大熱主流，好多人龍店都係賣呢系沾麵。沾麵分大中小份量，同樣78蚊，麵條可以揀熱或者冷食，個人覺得質素一般，麵身較粗略嫌較硬，但帶有陣陣鹼水味。湯底以大量豬骨、雞骨熬製，味道可以但太過杰身太糊口，食得太多會好膩，好彩我哋一碗兩份。(不過餐廳設有最低消費) ，電而配就真係麻麻地，叉燒得一塊細又乾柴，主要係筍條同半隻溏心蛋，全部都好一般。三田流燒餃子齋睇Menu就覺得好似好好味，可能係餃子癮發作，呢個三田流燒餃子面頭鋪滿木魚片，加上燒汁，食落好似大阪燒咁！三田流手羽先揚胡椒風味呢個雞亦係三樣嘢中最好味嘅，雞亦外皮香脆入面肉嫩多汁，仲充滿胡椒香味！…查看更多

其實我間唔中都會酸辣湯同雲吞癮發作，咁啱行過阿純唔洗排隊，就入咗去開餐！基本上，太子區嘅酸辣湯或者餃子雲吞我已經食過晒！當中有好幾間我都會encore，呢喥係其中一間！不過食咗今次之後，都應該酸辣湯呢個酸辣湯其實唔算好足料，但味道ok，酸同辣都夾得啱啱好，而且細碗只賣15蚊，其他舖頭一叫要叫成鍋，呢喥就可以叫一碗止下我經常發作嘅酸辣湯癮。香辣海蜇醋味太濃辣味欠奉，我麻麻哋鐘意，最後bf仔自己食晒！XO醬炒麵無咩特別嘅炒麵，味道正常，但偏多油，要快手食，如果唔係凍咗食超濟。北方小雲吞之前試過佢呢喥d餃子，其實都唔知點解會係米豬連車胎人美食，我又覺得一般般，可能我比較鐘意食皮薄果款餃子。所以今次無叫餃子，見到佢有個北方小雲吞，又諗起大陸d小雲吞，於事就叫嚟試吓！呢個小雲吞其實都唔算小，d皮都係算厚，肉就的而且確係細粒嘅，味道正常，唔可以話好好味果種。涼拌土豆絲味道較淡，土豆絲唔算太爽口，一般般。…查看更多

20幾年前，跟媽咪去東門唐宮茶樓飲茶，當時嘅唐宮只係一間茶樓仔。過咗咁耐唐宮已經係一個飲食集團，喺內地好多個城市都有分店，近年更加喺香港有分店，分店嘅裝修較簡潔清新，以綠色為主調，加上落地玻璃大量天然光線射入餐廳，如果太陽光唔係太猛烈，坐落都幾舒服！佢d碗好攪笑，初初仲以為污糟咗，睇真d原來碗底畫咗兩隻烏蠅～哈哈！食物都幾多元化糟滷醉蝦一上枱先聞到酒香，入口嘗到酒醇，酒滲透入蝦身，蝦肉又爽又甜，超好味！超級推薦!黑金流沙黑色竹炭包上掃上金色，賣相好型！食落味道唔錯！點來聚聚呢份點心都幾攪笑，有墨魚汁餃、芋蓉流沙、柚子蝦餃、蜂巢糕、賽螃蟹餃每樣一件，一件一個蒸籠仔，size 都幾大粒！不過我只食咗一件墨魚汁餃，味道正常！其他果d屋企人食完無差評！蒸鮮薺菜餃食落無乜特別味道，一般般雲吞湯麵呢個係叫比同行小朋友食，見雲吞大大粒，不過不失啦！白玉王鴿又一重點推介，新鮮熱辣，皮脆肉嫩，超級juice，好味都停唔到，所以我食咗成隻！脆蝦多士因為得3件，我無食到，媽咪食咗話好好味！非常山竹呢個好特別嘅點心，外形做到山竹咁樣，以為同生果有關，點知原來佢入面係龍蝦汁蟹肉，外面就炸到有d似咸水角！可以一試！金菇翠苗金菇絲炸成脆條非常香口，妹B食到停唔到口，不過好熱氣，而下面d菜苗似做拌碟多d，份量非常少。荷花蒸飯細個果陣荷葉飯好多茶樓都食到，但而家買少見少。利用荷葉包住d飯，有淡淡嘅荷葉香味，而入面嘅飯粒粒分明，每粒都均勻地沾上醬油，雖然有少少油膩，不過size唔算大，每人一小碗啱啱好！十三么麻雀造型攪笑，啱晒鐘意打麻雀嘅我，麻雀其實係椰汁糕，再係上面加張好似白兔糖果張紙，仲印埋一萬、九萬、九索、九筒同發財。如果張紙可以放啱位仲靚d~…查看更多

好耐之前已經聽人講，荃灣漁屋日式放題好得！雖然我喺荃灣返工，但我一直無試過，原因係每次行過都勁多人，我哋好少預早book定位，因為我哋食放題都好即興。今日收工去大埔搵食，即興去咗漁屋，其實都幾多人，大約都等咗20分鐘位。一入去坐低，侍應就講而家餐廳係冇order紙落單，而係要下載一個叫飯團嘅Apps，係Apps裏面落單！老實講，後生仔搞呢個Apps都要搞20分鐘先開始落到單，仲未計上菜嘅時間，計埋上菜嘅時間，起碼半個鐘頭後先有得食！換句話講，有啲對上網唔係咁熟悉嘅人，明明只係想簡簡單單食放題，就要搞一大輪先可以開始食，大家都知放題係有時限，就係咁搞你半個鐘頭，等你食少半個鐘，加上經常有漏單，咁佢已經賺咗！小食：八爪魚、螺肉、櫻花魷魚，炒埋一兜上～蟹籽沙律刺身：鮑魚、北寄貝、赤貝、三文魚、吞拿庶、阿根廷紅蝦、帶子、松葉蟹腳，水準正常，不過不失。第二次刺身叫咗鱆紅魚，阿根廷紅蝦、赤貝日式海蜇海膽三文魚籽軍艦呢喥有比較貴價嘅海膽同三文魚籽任叫，好彩粒飯唔算好大，而且紫菜食果陣仲脆！唔錯！慢自味無骨鳯爪其實則係泰式鳳爪，不過味道唔錯，可以一試！蔗蝦、燒菠蘿、香煎鵝肝多士、蒲燒鰻魚、清酒煮蜆、鹽燒牛舌正常水準，同坊間放題分別在於有庶蝦同鵝肝呢d非日式食物。鐵板炒韭菜有好香孜然粉味又有少少辣味，好惹味！Haagen-Dazs雪條每人只限一條 伏中之伏～自家制特飲叫咗兩杯，一杯都勁藥水味！一杯係怪味水+無味水果冰。…查看更多

今次去咗一間食日式海鮮丼嘅小店，舖頭唔算好大，得十張枱左右。可能時間尚早，我哋入去果陣6點左右，只有兩枱客，之後就陸陸續續有客人，絕大部分都係一個人來。除咗丼之外，其實仲有小食、壽司、拉麵、烏冬...等。店名講到明叫丼家，我哋當然要叫丼食啦！呢度嘅丼同其他舖頭嘅唔同之處就一定係個器皿，通常都係用碗裝住，而佢係用方形木盒裝住，賣相都唔錯，成個盒面鋪滿晒餸，唔好以為個盒深度唔太高d飯就好少，其實已經有成碗幾飯，對唔係飯筒嘅我已經夠有突。蟹皇丼身為蟹妹嘅我，一見到呢個蟹皇丼就發青光。有齊蟹肉、蟹籽、蟹膏、蟹腳同蟹鉗，真係好似叫一個丼可以食齊一隻蟹咁！但老實講，味道唔算突出，始終$128都係罐頭/冰鮮貨，鮮味欠奉。甘蝦三文魚香蔥吞拿魚另外叫咗個以刺身為主嘅丼，三文魚同甘蝦各3隻再加一小球香蔥吞拿魚蓉，呢個反而唔錯，剌身都幾新鮮。蟹籽沙律我哋食日本嘢都係有個情意結，就係每次都要叫蟹籽沙律，但呢度個份量都幾少，味道極普通，如果唔係好似我哋咁有情意結，可以唔試。…查看更多

咖啡灣都可以話近年冒起嘅抵食cafe,我覺得係西式茶餐廳，意粉同飯價錢頗合理，其他小食、飲品就有d貴。而且每間分店都好細，座位迫夾，而粉嶺呢間開喺商場中間，有d位置好似坐喺街邊咁。第一次去幫襯係6月中，勁多人排隊，等左起碼超過45分鐘，仲要坐係街邊果個位。第二次去幫襯係11月尾，熱潮已經過去，只係等咗5分鐘就已經有位，仲可以坐喺入邊嘅卡位添！第一次幫襯菠蘿藍蝶雖然Menu話係推介，但我覺得冇乜特別，可以唔使試。櫻花蝦明太子煙肉意粉意粉唔會太淋，面頭舖咗好多櫻花蝦同木魚片，幾好味！玫桂山雞亦有3款味道嘅雞翼，其中一個係桂花味，好香好清幽嘅桂花香，冇諗過桂花同雞翼可以咁夾。另外兩隻味係玫瑰同山椒，味道一般。不過，6隻雞翼要80幾蚊就太過份，所以食過一次就算！蘇格蘭三文魚沙律正正常常，不過不失。第二次幫襯黑白松露香濃蘑菇湯味道普通，試過一次唔會再試。熱帶森林水果茶大蝦蟹籽沙律呢個沙律有驚嚇！雪藏蝦肉爽但冇蝦味，沙律差唔多食哂果陣有小昆蟲～😱香辣蒜香帶子意粉味道一般般芝士肉醬薯條普通厚切薯條，鋪上茄汁肉醬，而d芝士好似未溶咁仲見度一粒粒。…查看更多