or#ta67448718's Profile

情人節仲禁緊晚巿堂食，咁咪食午巿囉，仲要早兩日食又有乜所謂啫。訂左枱12點半，去到時餐廳一個客人都無。坐底慢慢揀野食，老公話要揀啲唔飽既野食，唯一飽肚既係煎飯團。落左order 飲緊生啤時，就不停有客人入尼自己坐好，眼見熟客較多，有三、四枱walk in 都無位，只收左一枱walk in。無計啦，四人枱都只係可以坐兩個人，咪無位囉。老細話刺身啱啱返左靚貨，咁梗係要叫一份二人前刺身併盤啦。有吞拿魚、帶子、尢魚、油甘魚（好似係）及唔記得係咩魚。試過响舖頭自己買舊吞拿魚刺身，但有好多筋唔太好食，而尼一舊吞拿魚係完全無筋，同自己買果舊真係差好遠；帶子好有鮮味，而且個質地係我响北海道食既新鮮帶子既質地，同其他餐廳既刺身帶子質地係唔係既，可惜我詞貧我真係唔識得形容尼個質地...之後仲有燒雞脾菇，菇上面放左好多木魚調味不錯；燒多春魚，啲魚春係脆卜卜既；清酒燒廣島蠔，清酒既煮法有少少苦；燒雞皮，雞皮燒到好脆好好味；燒飯團（味增味），飯團底面都燒到變左脆皮，附有紫菜及味增，一啖飯一啖味增咁好好味。見到佢仲有個經濟啲既午餐menu，蔥碎吞拿魚魚生飲都係百零蚊，好抵食。餐廳係用openkitchen，吧枱位仲要放满酒樽，有興趣可以坐响吧枱睇住老細煮野做。雖然係open kitchen，但我地點左幾樣燒物都唔會覺得好大陣味，通風做得唔錯。 尼間餐廳座位唔多，所以記得要訂枱。今日大約見到6-7枱客，但得老細一個人做招呼及煮野食，所以等候既時間會長少少，諗住慢慢吹水既朋友仔就啱哂。…Read More

生日飯自己揀餐廳自己訂枱自己點餐是正常事。尼間隱世私房菜要預早三日訂枱，訂完枱仲要即刻點埋餐。之後先知完來所有食材都係法國訂返尼，所以先要預先點餐以預訂食材。餐廳位於尖沙咀，有室內及室外既座位，但每天最多接待12位客人，食生日飯當日只有我地一枱客，可以成個場慢慢影相。坐底左好快就上左頭盤，我留左remark 如果有磨菇湯就會飲湯，否則只係要一份頭盤，結果真係有磨菇湯。店主sasa 仲問我地要一碗定兩碗，係我同我老公都好鐘意飲既磨菇湯咁梗係要兩碗啦。磨菇湯尼講佢係比較厚身，厚到好以乳酪咁我真係第一次飲，係真材實料但我個人比較鐘意有少少磨菇粒可以咬下。另一份頭盤係半打 escargot，佢d 螺真係好大粒，而且粒粒都充滿左青醬好好味，用尼個青醬點面包都好滋味。食緊頭盤時已經聞到佢地煎緊主菜既魚，原來係銀鱈魚，塊皮煎到好香脆，食落口啖啖都係魚油好塊正。而配菜方面用左brussel sprout，我明明記得我响外國食過尼個菜係有陣奇怪既草腥味，但尼度煮到佢好有鮮味，到底係品種唔同定係煮法唔同呢？除此之外仲有一塊樹葉威化餅，造形就係一塊樹葉，但食落係就真係餅乾尼既。另一份主菜揀左素食精選，類似紅菜頭牛油果他他及乳酪，配上大量食用花，感覺特別新鮮。紅菜頭尼講尼我又係唔鐘意食既，响澳洲買漢堡包就成日都會用紅菜頭當係酸瓜咁夾入去，我一定會走左佢。之後發現佢好有益就試過榨汁飲，仲要溝大量蜜糖我先飲得落，最好味係榨左汁撈雲尼拿雪糕。但尼個紅菜頭，我真心唔知佢係點樣調味，好好味，好味到我唔洗溝牛油果我都食得落。乳酪就較為普通但都有有一塊樹葉威化餅。甜品方面叫左個萍果撻，即刻焗好真係好熱咁就炳到個咀。賣相唔算好吸引，只有薄荷葉及龍珠果點綴，但口味係100分。甜品尼講實有少少甜，但配上萍果既酸味咁就可以平衡返。每一碟食物睇落份量都好少，但食哂原來都好飽肚。食飽可以慢慢影下相，戶外方面一邊個外國風一邊係舒適既梳化椅，室內的話兩條樓梯一樣咁吸引，絕對適合打卡。另外，餐廳仲有賣茶葉及曲奇，茶葉主要係供應比酒店，曲奇都係訂貨較多。咁啱今日曲奇有現貨就買左一盒，係抺莉花檸檬漬味，啲檸檬漬又係法國入口好香甜好好味，但價錢較高。店主話佢尼緊諗住推出tea set，真係好令人期待呀。…Read More

天寒地冬又好想飲奶蓋茶，原來荃灣路德圍有幾間外賣飲品店，買完先見到仲有REAL TEA，唯有放入bucket list 有機會再試。我係鐘意飲奶蓋多過珍珠，所以好多時行過外賣飲品店無奶蓋我就唔會買。今日買左花羨沐嵐既熱奶蓋抺茶及黑龍奶蓋珍珠奶茶。珍珠都係黑糖珍珠，所以少甜會少珍珠所以飲返正常甜，問完尼杯我就唔記得左奶蓋抺茶都係要少甜。熱飲雖然加左凍既奶蓋，但拎住個杯仲係會熱到不停換手拎，凍天啱哂。因為凍既奶蓋响上面，所以即刻飲都可以，因為我唔用飲管直接飲，就可以飲到半啖凍奶蓋及半啖熱抺茶，啱啱好可以响個口度溝返暖啖茶。奶蓋尼講，我係飲開芝士奶蓋，亦飲過green common 既nutty 奶蓋都唔錯，普遍都係淡淡地夠厚身咁就正路，但尼杯奶蓋竟係都係抺茶味，飲第一啖覺得有少少失望，可能只係唔習慣，飲飲下其實同個抺茶好夾，愈飲愈覺得好飲，飲到最後仲要打開個蓋lam埋D奶蓋。另一杯飲品係黑龍奶蓋珍珠奶茶，尼間店仲有一杯叫火龍奶蓋珍珠奶茶，我問過有咩分別，火龍係用焦糖奶蓋而黑龍係用黑糖奶蓋。而尼一杯係買比朋友飲既，佢一見到尼杯野就話肯定好甜好正，飲緊時都不停話好正，珍珠煮得好稔好qq，黑糖又好甜好好味。而佢老婆飲完就覺得咪又係珍珠奶茶，佢老婆仲覺得佢係因為尼杯有奶蓋所以佢老公會覺得好飲。我落order 時完全無人等，大約等8分鐘飲品就準備好，但等候期間開始要排隊所以飲品準備時間可能會耐少少。…Read More

凍天嘛本人鍾意食湯麵多過米飯，因為米飯易凍，而湯麵有湯可以維持到個麵既溫度，食完都仲係溫笠笠。今日去到拉麵店就梗係要食拉麵，中午仲有套餐，叫左個北海道極濃蟹湯拉麵配芥辣八爪魚。唉，自己無腦以為芥辣八爪魚係平民壽司既紅色八爪魚，但原來係真芥辣，而我係唔食芥辣既，食左幾啖已經食唔到，唯有做大嘥鬼。拉麵方面，有一片叉燒、蟹肉、紫菜、木耳及半隻流心蛋。其實我係凍先會入尼食拉麵，因為拉麵我淨係食尖沙咀果間日本野，所以食返其他拉麵，我就係覺得唔好食。成碗麵我淨係鍾意食啲餸，啲麵無點食過，最滿意係果半隻會流心既蛋。另外，尼間拉麵落單到有得食等左30分鍾，當日時間為下午2點左右全餐廳得我一位客人，而飲品可樂係到我食飽問人先比我，我懷疑飲品其實係咪自己攞架呢？以上食物意見純粹係本人真係好唔鍾意食拉麵及芥辣，以上意見作參考好啦。…Read More

去得沙田STAYCATION就梗係去返沙田食飯，老公鍾意打邊爐咁咪打邊爐囉，話哂紀念日係兩個人既事，老公開心我就開心。海鮮其實點煮都好味，只要夠新鮮就可以了。今次打邊爐用豬骨湯底，海鮮包括肉蟹、蟶子王、海蝦、帶子、花甲及蠔，另外仲有6款配料。肉蟹同蟶子王都夠大隻夠新鮮，配料方面一定要揀花膠仔，而且一開始已經要放落去，到尾聲時食就剛剛好，好稔好滑好好味。兩個人食份量好足夠，丸類仲食唔哂。食飽先記得仲有個粥底，但無理由留肚食粥架喎，老闆好好人，提議我地打包份粥底。結果個粥底拎左返屋企係足夠4個人食 (可能我地細食)。8點鐘食食到10點幾，食到啲員工到收哂工咁濟。另外，早一日預定仲有9折，所以一定要記得預早訂枱去拎優惠。…Read More

我呢其實都幾鐘意飲下咖啡，尤其係响澳洲既時候飲得特別多。但慢慢發現無論我幾點飲咖啡，我都係會瞓唔著，再用多少少時間先發現奶茶甚至乎台式珍珠奶茶，都會令到我瞓唔著... 唉，咁我買左個好靚既星Ｘ克保溫杯，到該品牌買飲品有折扣但都已經好耐無用過....雖然我可以為左飲杯咖啡奶茶而瞓唔著一晚半晚，但可以避免的話我都想一晚瞓到天光。見到間靚靚仔仔既咖啡店，又有抹茶喎，咁就有覺好瞓啦。舖頭外牆維修，所以行過好容易睇唔到間舖。我見到OPENRICE 有人放埋啲面包相，以為有野食賣但原來係無既，只賣飲品。抺茶好似要等耐啲，我見到買咖啡既大概3分鐘就有，但我等左10分鐘。舖頭細細但佢既攞設好適合打卡用，所我都影左唔少相，但佢就無乜座位可以比人坐底慢慢HEA。抺茶LATTE 好夠熱，所以要即刻飲係無可能既，都要慢慢攤返涼先飲到，抺茶係好味既似係宇治抺茶，配埋適當既拉花又可以溫暖我一日。…Read More

9PM 先去食晚飯，餐廳好似收緊檔咁，我就快速睇完個MENU極速落單，但原來佢只係有一部份會先收檔，仲叫我唔洗急慢慢食。叫左個凱撒沙律及雜菜湯，睇尼佢都知我夜食飯一定好肚餓所以食物好快準備好。雜菜湯正常水準，雜菜係每粒都差唔多大細，有飲過其他雜菜湯啲菜會比較長但又有粟米，我會覺得一舊長一舊短咬得唔舒服。凱撒沙律我以為係齋，但原來有咸咸地既魚肉，撈落個淡淡地既沙律係好啱味既。菜係新鮮爽脆、芝士好味、面包乾得5料有啲少，但面包易肥都係食少啲好。尼間餐廳其實蛋糕係比較出名既，所以就加配一件西瓜士多啤梨蛋糕。西瓜就係其中一層夾心，配上杏仁味既餅底，頂層係士多啤梨。我覺得杏仁味較重，水果味比較淡，有朋友表示澳洲個原版好食好多，個分別係澳洲蛋糕既水果係嚴格挑選。另外除左HYSAN，我都去過THE ONE 果間食蛋糕，但啲員工完全無SERVE 過我，叫野食我都係去外賣條隊....再另外，我又去過IFC買外賣蛋糕，員工處理蛋糕時係會用手套，而收錢時係會除手套，非常衛生非常好。…Read More

越南餐廳尼講，除左食法式面包就係食生牛肉河粉，佢地會將河粉叫做PHO，正式讀音我唔太確定，但我已經聽過3種不同既叫法，既然咁難讀我就叫返佢做河粉啦。今日都係叫左碗生牛肉河粉，加$20 有柚子汁，飲落似係100%果汁。越南既牛肉河粉特色就係用生牛肉，個湯夠熱而牛肉夠薄就好快熟，剛剛熟既牛肉夠嫩口，湯底似係牛肉湯夠濃味，仲有檸檬及指天椒比你任你加落個河粉度。本身都好想叫多個法包，但已經差唔多9PM ，尼個時間其實已經不能食太多，年紀大了易長肉呀。餐廳座位約十幾個，有幾張細枱啱哂我尼D孤獨精。…Read More

細佬成日話去食豬油撈飯，其實我都唔知係乜，今日就出元朗一探究竟。大榮華酒樓憑外貌都睇得出佢有啲年紀，周未6:30pm 去到都要等左一個鐘先有枱，仲要有一半人到齊先只叫係開始比你等枱，到有野食到肚時都已經八點。大部份既菜式名我都唔記得左，睇返相估咋。叫左個生魚兩食，一食係豆腐魚湯，另一食係芥蘭炒魚片。魚湯一向多工夫，所以出街先飲係最方便既，魚湯好鮮甜，連豆腐都比我地食哂。炒魚片一向係我至愛，屋企食魚只係會係蒸同煎，所以我覺得炒魚片好矜貴，的確無令我失望，仲要係啖啖肉。馬蹄蓮藕炸肉餅炸得香脆，一份有八舊。魷魚炒菜心魷魚有啲少，仲有少少三色椒做配菜。陳皮豆豉炒蝦都好食，蝦唔會太細隻，夠鮮甜但無陳皮味。豬油撈飯原來只係白飯，自己撈鼓油及豬油，但又真係好好味喎。姐出街好少食飯只食餸既但都食左半碗豬油撈飯，豬油既威力真係不同凡響。食到咁上下仲叫左半份奶黃馬拉糕，家姐話佢個馬拉糕好出名，因為中間係見到夾左層奶黃，而且顏色同出面既馬拉糕都唔同，係好食好多喎。飲品方面本身都諗住飲茶就算，但見到佢一渣菠蘿檸檬(定係柑仔?)汁幾特別又試下啦，係真係有菠蘿渣架，倒出尼之前要搖均，唔太甜好清新我鍾意。每個餸都係$100一碟左右，其實係唔貴，不過等枱真係要預返少少時間囉。…Read More

難得去到港島，梗係搵返間特色咖啡店去hea 半日啦，今日揀左間可以食乳酪既咖啡店。乳酪尼講我好有要求架，必需要係希臘乳酪同埋要有生果，鬼叫自己响澳洲 working holiday 時日日食既乳酪都咁正咩。嗱嗱嗱，唔好以後係貴野，我都只係响超巿買架咋，宜家香港超巿都有賣同品牌既乳酪，但只有原味無生果味，仲要成日無貨。不過香港賣得好貴成$90一盒，姐要等佢就到期時先捨得買...出街食野就唔好慳，係我奶奶教既，所以我會捨得比$78 買一碗乳酪。藍色螺旋藻乳酪碗，配上大量水果(香蕉提子士多啤梨藍莓)及蔬菜脆片，仲有一大朵乾燥花。店員表示朵花係食用花尼，咁大朵好少有人會，但影相會靚啲。乳酪係好味既，不會太甜口感幼滑，尼個值錢係值得比既。hea 左半日又有啲餓，只好再叫個黃金香辣鹹蛋蜆肉意粉，等左大約20分鐘先有得食。意粉係真係辣既，有大量蜆肉，有一坨鹹蛋醬响意粉頂，撈唔撈其實意粉都已經好夠味好好食，撈埋就加左鹹蛋味。食物份量有啲少，不過cafe 之意本是hea/打卡，無人係為左醫肚既。既然係為左打卡，唔差在叫埋杯earl grey latte，味道夠濃唔錯。百幾蚊比我hea 左半日，其實真係唔貴。…Read More

難得去到上水，但都無乜諗法要食乜，見到DELIFRANCE 好驚訝佢原來仍然存在。讀書時魚蛋河只係$20加$3仲有埋野飲，而DELIFRANCE 要$3x 先食到個牛角包，所以我一直覺得佢係貴野。到左出尼做野先發現自己份糧無乜加過，但啲野食又貴左，要$6x 先食到份包，今時今日我都尚算食得起既。上網見到有下午茶，但原來2:30pm 之後先至有，姐很餓唔想等了，而且姐食很起。落左單等左6分鍾左右就有野食，我揀左light choice 既包，包餡有呑拿魚同三文魚。自己會錯意以後三文魚會係煙三文魚，夾包既兩種餡都係撈左蛋黃醬，不過不失但少貴又細份，用尼做午餐係完全唔夠食。驚喜係餐茶可以揀有機果茶，仲要係fair trade 既茶，會支持不同類型社企既餐廳都值得比like 既。老公遲到既關係，佢就可以食下午茶餐了，叫左個腸仔磨菇扁意粉，因為我唔飽想叫佢用優惠價加份法式凍餅比我，但賣哂了無得食...下午茶餐意粉都係$4x，抵食好多，仲係我鍾意食既扁意粉。腸仔有一條、磨菇有啲少、意粉係配蕃茄醬，抵食又好味。果茶既話其實我會落蜜糖，如果可以加錢換購蜜糖就會更啱我了。…Read More

我好鐘意飲燉湯，但老爺奶奶成日都話出面啲燉湯係味精湯，唔知係真定假但想飲我就咪去飲碗囉。今日去左觀塘工廈食飯，時間大概係兩點，餐廳無乜人。OPENRICE 睇餐單時見到有個蒜蓉蒸蜆飯，但去到間餐廳又唔見有，唔緊要啦咁我食蝦乾豆卜蒸排骨飯啦。燉湯等左大約10分鐘，見到食材有雞腳、桂圓、豬肉、葯材等，驚喜係見到有大約2粒瑤柱，雖然瑤柱好細粒但用佢尼調味啲湯好好飲。預一日訂枱及完成點餐可以升級花膠燉湯，可惜我太即興。落左單大約20分鐘先蒸好個飯，我覺得好大份囉。明明我叫左少飯，睇尼以後我要叫半飯啦....排骨係用豆豉醬，加上大量蔥花及香蒜，蝦乾豆卜正常水準。啲飯係蒸味飯其實好開胃，但我真係食得好少架咋，食得哂啲餸已經好比面。我自己會覺得，燉湯得太少湯太多食材(湯渣)，而我自己又食唔落啲食材，所以我認我係大嘥鬼。…Read More

行行下街老公又話要食下午茶，對我尼講下午茶係食下燒賣或者撈撈撈面，但對我老公尼講就要坐底食碗野，唯有搵間日本餐廳比佢坐底啦。餐廳無做下午茶，好在仲有午餐，見到有個特上海宝丼係有海膽既，咁梗係要一份另追加一份炸章魚。炸章魚比較細份，只有4粒。食慣炸魷魚既我覺得章魚比較難咬，我唔識欣賞但老公覺得唔錯。特上海宝丼係連餐盤咁上枱，有茶、湯、小食茄子、咸既啫喱(?)及一碗魚生飯。魚生飯賣相好靚，見到已經流哂口水，飯上面舖滿左蟹肉、蟹籽、2隻大甜蝦、吞拿魚及3大片海膽，全部都幾鮮甜。飯既話撈埋左三文魚肉、蜆仔及章魚，老公同我都覺得撈左蜆仔及章魚令到個飯CHEAP 左好多，章魚既口感同個飯一啲都唔夾，而蜆仔就係有種CHEAP 既感覺，或者應該問，魚生飯做乜要放啲熟既蜆仔？埋單時問返員工，先知道個咸既啫喱原來係壽司醋，撈落啲飯度就會變壽司飯。個飯上枱時無人介紹個啫喱，我又點會覺得佢係用尼撈飯架呢？食哂個飯我先食啫喱，因為我滿心歡喜以為佢係甜品....唔緊要啦，我下次都係食返啲平價魚生飯，特上 NO MORE。…Read More

返工返到好攰，仲要下午茶時間先有機會食飯，所以要食返啲會令自己開心既野食。因為太想去台灣既關係，所以就係要食台灣牛肉面。尼間店會不停播台灣MV/節目，而且WIFI 密碼仲貼到周圍都係。諗起以前去旅行食飯揀食乜時，都要睇埋間餐廳有無WIFI。宜家仲會有WIFI出尼真係好少見，但好方便我睇漫畫囉。食乜野係自己响餐單度寫，適逄下午茶仲有9折，就可以加埋香腸啦。落左單之後飲品好快到，食物大概等左10分鐘。牛肉面有三大舊牛腩，真係好大舊，我只食得落兩舊，下次唔止要叫少面仲要叫少肉。牛肉係有筋既，煮都好稔好好味，配上半隻雞蛋及一條生菜，面係我鐘意食既粗面，牛肉湯我飲左半碗。香腸就係台灣腸，係我去親台灣都必食既烤台灣腸。飲品方面我試左豆漿綠茶，好有台灣風味係淡淡的豆漿，對飲開微甜既我尼講係糖水。除左下午茶時間有9折優惠，仲有得儲印仔，儲滿10個印仔食送飲品一杯。去台灣旅行時我已經好鍾意食牛肉面，好多舖頭仲會有埋牛肉湯面，除左無牛肉會平啲，對當年食素既我有啖肉湯飲下都好正。到底幾時先可以去外地唔洗隔離呀.....…Read More

香港既冬天一日熱一日凍咁，著得多衫果日就好熱，著少件時就好凍，好在戴住口罩少左患感冒，但著得少衫時好凍我又頂唔順，只好行過就順手買杯熱野暖下手。如火如茶果棟大廈既外牆搭緊棚，行過都差啲見佢唔到。我鐘意佢既滋潤養生系列，因為我真係好凍呀...叫左個山楂蘋果茶半糖，等左大約5分鐘就沖好比我，500ML 好大杯，打開想直接飲係熱到飲唔到既。好啦，咁熱好啱我拎多陣用尼暖住我對手。都等左大約20分鐘先可以舒適暢飲，係健康既味道，叫左半糖個茶有少少酸，下次叫既話會用返普通糖份。杯底有少量蘋果乾、山楂及杞子，我就食埋塊蘋果乾。其實我好想買佢既盆裁系列，因為好靚。但凍飲既話可能要等到夏天我先有機會試了....…Read More