Pazu20's Profile

好耐無見個朋友, 響旺角等佢收左工一齊食飯聚下舊, 佢帶我黎呢間餐廳, 話呢度好多款式既野食都有, 而且坐得舒服, 又無時限.睇佢餐牌中式, 台式, 日式咩都有D, 而且仲有中西糖水, 選擇真係好多. 不過我同朋友都餓, 所以都係叫小菜食.見餐廳有個燒味檔口, 應該都賣好多, 所以要個燒味三拼. 有燒腩仔, 油雞, 义燒, 份量足, 2個人食一定夠飽.燒腩仔個皮夠脆, 腩部份唔會太厚脂肪, 肥瘦分明.油雞個皮都唔肥, 好香, 雞肉嫩滑.义燒就係半肥瘦, 肉質唔會好乾, 個邊位燒到微焦, 咁樣先係最香口.仲要個蜜椒薯角牛柳粒, 一口牛柳粒炒得剛剛好, 肉質唔韌夠嫩, D薯角甜甜地, 唔會好硬.小菜可以跟白飯同飲品, 唔覺唔覺就可以邊食邊傾一整晚.另外見到佢有時令古法羊腩煲, 不過今次太飽食唔落, 下次會再黎食過.…Read More

新都會睇完戲想食宵夜, 但係好多餐廳都早左last order, 所以黎呢間泰國菜食, 佢算係葵芳夜D收既餐廳.香葉炒大蜆, 都真係幾多香葉, 加埋D辣椒蒜頭蔥, 特別惹味.蜆既SIZE適中, D肉唔會好細粒, 肉質好彈牙, 又鮮甜, 隻隻都開晒口.夜晚唔好食太多肉, 黎個泰式炒雜菜, 菜爽口, 唔會炒到腍晒, 泰式口味唔會太咸.鐵板蝦仁蛋, 呢個雖然唔似泰國菜, 但係個人好鍾意食蛋, 呢個蝦仁蛋真係好大堆蛋, 蝦又大隻爽口, 令到呢餐宵夜好滿足.…Read More

假日去商場行街, 攰攰地想搵個地方坐下, 見呢間春水堂好大又好多位, 但無人排隊, 反正響香港未食過, 所以一於試試.兩個人都唔係好肚餓, 所以叫左一個照燒雞排便當, 雞排份量都幾小又細舊, 肉質比較乾.側邊既菇同菜都好淡, 白烚一樣, 成個便當唔值呢個價錢.之後要珍珠奶茶, 茶味唔香, 珍珠軟腍正常, 無咩特別.叫左呢2樣已經係百幾蚊, 味道一般, 祗係環境OK可以坐下, 都係去台灣旅行再食好過.…Read More

雖然香港無左冬天, 但係邊爐就日日都可以打既.想同朋友慢慢傾下偈食下野, 所以黎靚煲皇最好, 因為收得夜, 又唔似其他餐廳吹交枱.朋友唔想太重口味, 湯底要個正宗豬骨煲, 里面用左好多大大舊既豬骨肴湯底, 非常濃郁既豬骨味, 仲可以食埋骨上面既肉絲, 再加埋粟米, 個湯飲落更加清甜, 果然夠真材實料.打邊爐又點少得牛肉, 每片都切得剛剛好, 唔會太厚, 淥一淥已經食得, 唔會過晒火變韌.雖然邪惡, 但鵝腸都係必點, 每條都夠肥厚, 但食落口感好爽脆.…Read More

今晚老細請食飯, 唔想去都要去啦, 老細話平時成日黎, 所以去到佢自動波點好晒餸, 我地等食就得喇.呢度主要食傳統潮州野, 睇餐牌好多野都未食過, 好D期待.先黎個凍盤潮式凍龍蝦, 平時既龍蝦多數清蒸或者刺身, 呢個煮熟之後再雪返凍佢, 原來鮮味道更加濃郁, 而且肉質飽滿結紮實, 更覺彈牙, 確實不錯.另外仲有潮式蒸鯧魚, 鯧魚間中都會食到, 咁潮式有咩特別之處呢, 原來係會用咸酸菜, 酸梅蒸既. 食落有種咸咸地, 酸酸地既味道, 好開口, 啱晒而家潮潮濕濕既悶熱感. 魚肉夠軟嫩細緻, 鮮味濃, 一D腥都無.老細真係無介紹錯, 下次一定要再同佢食飯先得.…Read More

工作繁忙, 每晚既晚餐都搞到好遲先食, 所以都唔知算晚餐定宵夜, happy Friday所以黎左開到好夜既靚煲皇.夏天有新款小菜, 安格斯炒牛肉, 有油炸鬼一齊炒, 油炸鬼索左D汁, 腍腍地, 咁樣食, 口感又唔錯啊.安格斯牛肉厚薄適中, 炒得唔會太熟太韌, 牛味都幾重, 送飯一流.蝦膠腐皮卷, 呢個一炸完上枱, 已經聞到好香口, 個腐皮脆脆地, 唔算好油, 點D甜酸醬提升味道, 特別開胃. 里面個蝦膠打得好均勻, 外脆內爽, 夜左食呢D小菜都唔覺太heavy.…Read More

午餐得好少時間, 快手響美食廣場搵野食, 未食過呢間車仔麵, 而且見幾多人食, 試試先.豬手雲吞魚旦蕃茄麵, 仲有菜. 豬手稔身而且入味, 個皮夠彈食落黏口, 食完膠骨原好豐富.雲吞皮薄多餡, 餡料唔會太多肥豬肉.魚旦既咖哩味濃味中但又唔會死辣, 好香又入味, 放左落湯少少辣更開胃.湯底係蕃茄湯底, 呢個湯底響車仔麵鋪較少有,蕃茄清甜唔酸, 食到一舊一舊既蕃茄, 唔會滾到溶晒, 而且蕃茄湯底食落無咁易濟, 就咁飲下D湯都好味.仲有個麵底好爽口, 唔會太腍.下次同同事黎要叫埋D小食試下.…Read More

好朋友搬左去土瓜灣, 果邊D食肆已經試過好多, 而家轉戰九龍城, 呢邊既食肆都好多, 而且夠集中, 呢間多人可以試另一間, 好多選擇.大鄉里既我雖然以為九龍城主要得泰國菜, 但行行下發現都有好多其他菜式, 今晚揀左呢間意大利西餐.響門口已經見到有乳豬食, 全隻要900蚊, 但原來可以要四份一, 呢個份量剛剛合二人份. 乳豬外皮香脆, 表面呈金黃色, 唔會太過火. 一咬入口, 脆到卜卜聲, 脆得黎又唔油膩, 好香口. 皮下脂肪薄薄一層, 入口夠晒香, 但口感唔油. 而肉質保拎到嫩滑, 唔會燒得太乾, 肉味濃香.之後要多個青口帶子意大利飯, 青口肥美飽滿, 漲卜卜, 入口煙韌無渣.帶子夠彈牙, 夠鮮甜, 好有帶子味. 而意大利飯唔算太濕, 腍度剛剛好, 帶點點creamy.…Read More

朋友響旺角做sales, 等佢收工一齊食野已接近宵夜, 平日D餐廳都唔會收太夜, 又唔係食茶餐廳, 好彩明記收得好晏.明記打冷為主, 所以好多冷盤, 海鮮野, 鹵水野亦唔少得, 有圖睇好吸引.鹵水鵝片, 唔會切到好薄, 肉夠厚入口有口感. 肉滑唔韌, 片片都入晒鹵水味, 但又唔會死咸, 越食越開胃.佢地D小炒好多選擇, 要左款京蔥豬頸肉, 真係好多蔥, 不過食落好香, 好爽口, 呢款有好輕微既辣, 所以好開胃, 豬頸肉好腍, 配飯一流.…Read More

荃灣成個區每個位置都好多野食, 大窩口有間酒店, 連帶酒店下既商場都好多餐廳, 而且價錢仲比荃灣中心區域平, 所以有時間都會黎呢邊.呢層好多間拉麵, 但鍾意呢間夠日式, 感覺良好D, 而且除左拉麵, 仲有好多小食同飯餐, 多D選擇.今日好肚餓, 所以要咖哩飯餐(大), 真係非常大碟, 餐仲配埋沙律, 蒸蛋同麵豉湯, 好豐富.咖哩唔會太稀, 撈到飯, 咖哩味濃, 唔會太咸或太辣, 帶少少甜.入面仲有D肉粒, 紅蘿蔔粒, 洋蔥, 用料十足. 蒸蛋都唔馬虎, 好滑溜, 熱熱的.另外要多串燒牛舌, 都幾厚切, 特別有咬口, 好爽口唔韌, 加D黑椒燒已經好夠味, 而且好入味, 好香口.份量足所以十分飽,好值得.…Read More

朋友黎過呢度食卜卜蜆話正, 今晚約左佢食飯話再黎, 一早訂枱, 全場爆滿.黎到好肚餓, 先要左幾款熟食食住先.燒元貝用蒜蓉燒, 特別惹味. 元貝肉厚彈牙, 蒜蓉亦蓋不住元貝既鮮甜味, 好新鮮.炸黑松露鮮蝦餃, 炸既餃好特別, 一咬夠晒卜卜脆, 好清香既黑松露味, 蝦肉又夠爽口, 食D香口野特別開胃.椒鹽雞軟骨香口唔油膩, 雞軟骨唔會太硬, 椒鹽黎炒好入味.仲有個龍蝦鍋, 好多海鮮, 樣樣都好新鮮, 之後仲加錢換個芝士黑松露海鮮飯, 因為好鍾意食芝士.芝士夠creamy, 味道唔算太搶, 感覺無咁易漏, 入面有D海鮮, 食到陣陣鮮甜味. 飯唔會太腍, 口感不俗.…Read More

工作上的不快, 相約朋友宵夜肚心事, 去左開到半夜既旺角靚煲皇. 夏天有點熱, 都係唔打邊爐, 要左刺激一點既麻辣雞煲, 莞茜, 紅椒既配料再炒多幾下, 令舍惹味.雞煲麻味唔算太重, 點到即止, 唔會麻住個口, 辣度則剛剛好, 好開胃, 啱晒口味.雞肉肉厚, 質感滑溜唔鞋口, 份量十分足料.仲有炸蝦丸, 我見隔離枱好多人都叫, 可能夏天食D香口野開胃D.大大粒, 手打蝦丸咬落好爽口彈牙, 外面炸到好脆口. 呢度就算唔打邊爐, 其他小菜, 雞煲都好好味.…Read More

響中旅社整完野都有D肚餓, 就響隔離食個快飯, 呢度主要係台灣野, 有飯有麵餐, 都幾多選擇.環境好舒服, 有卡位, 地方又夠大光猛.豬頸肉肉燥飯, 肉燥都幾多, 肉碎細細粒, 唔會太多肥膏. 味道聞到好香, 不過如果汁多番少少撈飯會更好. 豬頸肉睇落好似好乾, 但食落又唔覺, 肉軟腍唔韌, 夠晒入味, 唔會太多脂肪.飯餐配珍珠奶茶, 奶茶味就係台式既味道, 比較甜, 不過珍珠好軟腍煙韌, 有嚼頭.…Read More

開完OT好肚餓, 行到西鐵附近商場食完野就歸家, 隨意揀左呢間日式食店, 閒日晚唔洗等位.主要有定食, 有拉麵, 選擇算多, 較簡單既日式食品, 唔會太多花巧野.要左鰻魚豆腐定食, 定食餐入面仲有麵豉湯, 白飯, 沙律等.沙律都算新鮮乾淨, 白飯唔係珍珠米, 不過都夠大碗.至於個鰻魚豆腐, 鰻魚份量唔算多, 不過幾肥美, 肉質滑溜, 唔算太多骨.豆腐都幾滑同入味, 滑蛋亦幾多, 成個味道算幾清淡, 唔會太濃味.…Read More

放假去食下午茶, 抵食D就係去大家樂食燒味, 原本想食瀨粉點知一早賣晒, 唯有揀米粉.燒味雙拼米粉加汽水唔洗30蚊, 算係幾抵, 而且份量亦唔會太少.米粉略為硬左D, 要浸下湯腍少少先易食, 好算爽口, 不過個湯無咩味, 所以個米粉都無咩味, 偏淡口.白切雞雞油較多, 整到個湯都較油, 不過雞肉幾滑, 而且肉厚.义燒肥瘦平均, 而且個皮少少脆香, 食落外脆內嫩.大家樂既燒味質素都算好穩定, 平平地既好選擇.…Read More