MS_JOVI's Profile

好耐無寫食評同大家分享吓近日飲飲食食，今次要介紹位於天后嘅小店，成日行過都想買嚟飲嘅take youe time，但可惜人太多，今次終於有機會可以買嚟試吓，確係十分推薦！！同男朋友一人買咗一杯，分別係：紅肉火龍果優格果昔藍莓桂花烏龍優格蓋茶紅肉火龍果優格果昔味道淡淡清甜，飲得出無加糖水唔係死甜味，加埋優格令味道帶少少酸，飲落好清新，而且打卡亦一流，咁足料HK$36一杯價錢十分合理呢。另一杯藍莓桂花烏龍優格蓋茶出奇好飲，飲得出淡淡桂花烏龍茶底，仲有藍莓嘅清甜，一讚係兩者味道好夾，飲落好fresh好舒服，啱哂夏天解暑，而且面層用咗yogurt取代一般嘅芝士奶蓋，所以完全唔膩，意料之外咁match同好飲。加上成間店好igable，好多打卡位影靚相話咁易，由於我太鍾意飲，決定行過會再買，因為好多款口味都想試試，推介大家可以試試。…Read More

上星我趁放假同家姐上咗Café 100 by The Ritz-Carlton，品嚐春曉下午茶，仲喺天際100影吓相打吓卡，當日天氣放晴，可以望住維港景色傾住計，品嚐賞心悅目嘅甜品小食，真係幾relax，畢竟呢段時間，特別年尾，真心身心疲累。Café 100最出名就係可以360咁睇哂維港全景，喺咁高同咁開揚嘅地方，享受一下悠閒時光，重點係好天氣時，是但拎起部電話都可以影到靚相，絕對係香港打卡好去處，而且下午茶更加係由The Ritz-Carlton酒店團隊精心設計呢。由於臨近新年，今次品嚐嘅下午茶名為「春曉下午茶」，對住落地玻璃窗飲住一杯香滑嘅咖啡，心情都特別好，單係環境都經已值回票價。三層架放上四款咸點同四款甜品，份量剛剛好，咁靚嘅環境又有咁精緻嘅下午茶，好難忍手，當然要不停咁影相。Café 100「春曉」下午茶四款咸點：烤雞配橘子果醬，甘筍麵包中式鹵水雞蛋沙律，迷你麵包煙三文魚醬多士烤蘑菇芝士蛋撻四款甜品：芒果布丁，芒果莎莎荔枝玫瑰慕斯杯朱古力紅桑子撻英式鬆餅配果醬及奶油忌廉咸點之中，中式鹵水雞蛋沙律，迷你麵包最討我歡心，因為當中嘅沙律比一般更入味，而且仲更加有特式，食落更滋味又有層次。煙三文魚醬多士味道非常滋味，一口一個，作為下午茶咸點適合不過。右邊嘅烤蘑菇芝士蛋撻食落有淡淡烤蘑菇香味，而且蛋撻好香滑，撻皮亦好鬆化，好香口呢。而我最愛食嘅英式鬆餅，Café 100呢度做得不錯，充滿奶香味，塗上一點奶油忌廉，入口係外脆內軟嘅口感，我很喜歡這個呢。芒果布丁，芒果莎莎味道酸酸甜甜，似係布丁口感但食落又似係楊枝甘露，入口充滿濃濃芒果味，咁多款甜點之中最深得我心。仲有呢款荔枝玫瑰慕斯杯，味道清甜仲要帶有荔枝果肉，口感好好，而且玫瑰慕斯非常香滑，一值呢個玫瑰同荔枝嘅配搭。Café 100 by The Ritz-Carlton環境用來打卡一流，食物味道亦相當不錯，如果同朋我或者另一半輕鬆下，絕對係一個唔錯嘅選擇。…Read More

我非常喜歡食煙韌嘢，芋圓、小丸子等，簡直係我最愛嘅事甜品，老實說一直無喺香港食過一間好好味嘅芋圓，除咗太子嘅芋圓圓我覺得都okay，但係佢嘅糖水底就屬於一般。早前lunch time行過見到哩間開咗一排嘅嚐仙，同同事一齊外賣拎返公司食，真心覺得好食，但價錢有少少貴。選擇都算多，不過飲品方面就比較少一點，之後都有叫過一次飲品，可惜無熱飲，只有凍飲，就算走冰都係偏凍唔係室溫，而飲品價錢就大概三十幾蚊杯左右，都幾大杯。右邊就係我嗌嘅「紅豆湯一號」(HK$45)，以紅豆糖水做底，再加上芋圓、小丸子同珍珠。芋圓、小丸子同珍珠一啲都唔少，紅豆糖水唔會太甜，甜道剛剛好所以可以食哂成碗。芋圓能夠食到淡淡芋味，但芋頭味略略可濃多一點，深信會更加好食，不過哩家都經已好高分；小丸子同樣非常煙韌，入口帶有淡淡糯米香，做得相當唔錯；珍珠有微微甜度，同樣好煙韌好Q，比起坊間嘅真係得分高好多。所以隔咗唔夠一星期，我又再去食，今次就堂食點咗「小丸子一號」，但堂食感覺比外賣細碗少少，所以HK$45一碗真係有少少貴，不過偶然過吓口癮，減低對台灣相思之苦都係一個真心唔錯嘅選擇。…Read More

成日聽到幾位同事話茶墨幾好味，特別係麻糬好出色，造得好煙韌，一向喜歡食麻糬嘅我終於一試啦，果然無令我失望，分享一吓先。茶墨都幾多選擇，而且有豆奶取代牛奶，就算牛奶敏感或者素食者都啱飲，真係幾細心。由於食完lunch先叫杯嘢飲，唔想太飽所以無叫到人氣高企嘅口味，嗌咗杯「焦糖芝士濃香鐵觀音茶」少甜少凍，加咗HK$6 要麻糬。鐵觀音茶茶味係幾重，飲落都幾香，不過帶有少少苦澀味，同埋芝士奶蓋味道比較淡，唔係太飲得出芝士個香味，不過其人手製嘅麻糬幫得加返唔少分，食落好香又煙韌，又唔會太過甜，真係幾好食同好有咬勁，但如果能細粒少少就更加方便飲用。整體不過不失，不過因為我係麻糬控，為咗食咁好味嘅麻糬，我會試吓下次嗌第款飲品，睇吓會唔會有驚喜。…Read More

同屋企人食糖水，叫咗幾款share，問店員可唔可以畀幾隻叉我哋share，點知個答案係：「我哋無多餘嘅叉」，其實，如果因爲未洗得切，畀唔到我哋無問題，但係態度真係可以好少少。最後問多兩次，先至成功攞到兩隻叉，四個人用三隻，唔緊要我哋將就一下。其他糖水味道係正常嘅，但係「黃金丸子白雪卷」一放入口，我第一次食丸子係有酸宿嘅味道，問店員話嗅到有酸嘅味道，無沾過任何芒果汁㗎喎，店員只係好肯定答：無可能，丸子係唔會變壞！ 第一次聽有人答嘢食係唔會變壞，態度唔特別好唔緊要，不停話佢哋幾位店員食都覺得無問題，咁我亦都唔會無啦啦要開聲問個甜品係咪有問題ga⋯真心好失望，我諗如果下次喺太子呢便食甜品，我唔會再嚟呢間食，亦唔會推薦朋友食呢一間。…Read More

有時候成班朋友喺旺角，真係會唔知食乜好。而哩間東大門韓國料理放題我就光顧過幾次啦，因為價錢合理、CP值高，而且啱晒食肉獸，就算同行有男仔朋友，都唔會擔心佢地唔滿足食唔飽！座位同座位之間嘅空間感十足，環境幾好乾淨企理，一班朋友聚餐都可以坐得幾舒服，食足兩個鐘頭都冇問題。呢度係半自助半寫紙嘅放題餐廳，例如頭盤、湯品、刺身壽司、汽水同甜品就可以自助去拎，而主食類就主要用餐紙點，另外可以加錢嗌其他熱食。老實講呢個價錢收費本身唔係抱有太大期望，但係一坐低就見到餐廳供應汽水一啲都唔馬虎，而且仲有啤酒提供，誠意十足！冷盤有泰式鳳爪、醃青瓜、泡菜，款式算多選擇，呢啲冷盤要來配燒肉的確唔錯，可以減低油膩感。一去到肚餓，仲有小食可以先食為快，炸雞翼、春卷、蝦餅等等大量泰式小食，味道唔錯。一讚嘅係呢度嘅冬陰公湯，味道好香濃，微微嘅香辣，入口好惹味，連我呢啲BB班都可以飲到，仲好足料，嚟食飯嘅朋友必定要試呀！呢度仲有免費刺身供應，而且店員比得好大方，唔使排隊之餘，仲大大碟今日拎俾你。雖然三文魚唔算話好肥美，但味道比起係超市買的好，我就鍾意燒熟嚟食。一坐低，店員就送上一碟海鮮俾我哋，絕對非常有心意，冇諗過呢個價錢，仲會按人頭送上免費海鮮，海蝦入口肉質彈牙爽口。厚切五花腩我覺得係必點嘅，經燒烤後會大幅收縮出油，食落口好香，建議原塊燒熟唔好剪開燒，等D肉汁可以鎖住係肉入面，入口肉味更濃郁。上菜嘅速度好快，而且份量一啲都唔小家，唔會好似出面啲放題咁，落幾次單先嚟，圖中為2嘅份量。最鍾意嘅呢度係佢地嘅肉唔會加好多調味料，所以一食就知道會唔會唔新鮮。最後甜品仲有西米露、泰式糕點、西米布甸、生果等等，質素都OK，講真呢個價錢提供咁多選擇，由頭盤至甜品都有提供，仲有免費汽水同啤酒，整體質素又唔差，店員嘅服務又快，絕對比起好多放題做得好。…Read More

男友喜歡食川菜，見到旺角呢間新派川菜店成日咁多人食，所以book咗枱同佢試吓，呢間餐廳主打雞煲、酸菜魚同特式香鍋，最特別嘅係先食完主菜，然後可以再加湯嚟打邊爐，兩種唔同食法，啱哂兩口子食齊兩款味道。餐廳裝潢簡約，坐位同坐位之間空間感不錯，坐得都幾舒服，而且呢度抽氣都做得幾好，就算咁多人打邊爐，食完之後個身都無咩味，唔會覺得成身臭。有小食、主菜、又有雞煲同特式香鍋，打邊爐同香鍋都有好多配料揀， 幾多選擇。HK$58 (推薦指數：4/5)男友話有別與平日食開嘅口水雞，食落都幾新鮮，唔算話好辣，因為叫咗BB辣，入口好香，唔錯。必食冷鍋酸菜魚 HK$148 (推薦指數：4.5/5)呢個價錢呢個份量都幾抵食，絕對無因為平而魚得幾塊，因為我唔食辣嘅關係，所以走咗辣，但同平日喺大陸食有少少唔同，唔係話太酸，不過個味道唔錯，魚都好入味。魚片好多肉，分量都幾多吓，一讚係好嫩滑同入味，唔算好多魚骨，就算有都係大大條嘅魚骨，可以好放心咁食。安格斯雪花肥牛 HK$188 (推薦指數：4.5/5)呢個肥牛好食，牛味夠濃而不且份量都算幾多，肉同油脂分佈都幾平均，所以入口相當不錯。呢個價錢同質素比起好多火鍋點還好，如果要喺度打邊爐，呢客雪花肥牛必點呢。炸響鈴 HK$25 (推薦指數：3.5/5)響鈴放入酸菜魚湯底確係好滋味，能夠索盡湯，雖然唔脆同唔係即炸，但係打親邊爐我覺得響鈴係點必。萵筍片同花菜 前HK$28後HK$25 (推薦指數：4/5)呢度嘅蔬菜都好新鮮，連我最愛嘅萵筍片都好嫩好鮮甜。總結人均消費大概HK$290，食物唔錯，可以安歌，但好似圖中呢杯芒果沙冰就只用果糖打出嚟，完全無鮮甜水果味，如果連飲品質素再提升，相信得分更高。…Read More

Crêpe源自法國西北部嘅布列塔尼地區，仲記得上次係法國街頭食熱辣辣嘅可麗餅，真係好滋味。但係要係香港搵好食嘅Crêpe，都唔係度度有，上星期去開新世紀，見到Crêpe Delicious，所以試試。餐廳有提供Gelato雪糕，仲有鹹味同甜味嘅Crêpe、意粉同飯等等供應，一讚係餐廳座位寬敞，坐得好舒服。以紅、白色調作裝潢主調，簡約得嚟好舒服，喜歡嘅可以買杯Gelato雪糕堂食都可以，又唔會另外收加一服務費。款式都幾多，連可麗餅鹹味同甜味都各有成十幾款選擇，不過價錢有少少貴，但即叫即整質素就會有保障多啲～Mango & Yogurt HK$40 (推薦指數：4/5)甜度剛剛好，而且芒果同乳酪味道一向好夾，飲起嚟好凍涼，絕對能解炎夏嘅苦悶！Salmon Deluxe HK$128 (推薦指數：3.5/5)煙三文魚、cream cheese、牛油果、菠菜等組合而成嘅crape，呢個配搭真係好吸引，而外皮幾薄，入口鬆軟又暖笠笠證明真係即叫即整，雖然同係paris食嘅有少少唔同，不過都幾好食，只係略嫌牛油果分量比較少，如果再多少少相信口感更加好。Black & White HK$78 (推薦指數：4.5/5)朱古力榛子醬同香蕉絕對係完美配搭，不過朱古力榛子醬本身比較甜，幸好內裡嘅醬唔算太多，所以食落唔會好甜。不過甜味嘅crape都比較膩，所以一個人食就未必食得哂，2-3個人share就無咩問題！見到成櫃Gelato，絕對會動心吧！色彩色繽紛而且有好多好特別嘅口味，蜜瓜、芒果、Birthday Cake、西瓜⋯⋯真係好吸睛，而且店員仲會畀你試味，試啱先再揀。最後嗌咗兩種口味 HK$58 (推薦指數：3/5)藍色係生日蛋糕口味即係雲尼拿，不過食得多覺得略甜，而黃色呢隻係蜜瓜口味。Gelato食落都幾滑，但係我認為香味唔夠濃，甜度比較高，如果無咁甜同埋香濃少少咁就更加高分。…Read More

話說今日要幫公司返工，當然要飲杯珍珠奶茶爽吓啦。見到呢間鮮茶道 Presotea，就試試，一行買咗四杯同同事一齊happy sharing，點知⋯出咗事！我呢杯「紫芋珍珠鮮奶綠」有個皇冠推薦，諗住點都唔會太難飲掛。嗯⋯我覺得自己好似飲緊奶水咁，係無咩味㗎，連茶味都無咩，當然同事們其他飲品都一併伏啦！呢杯珍珠奶綠索價31蚊，但真心覺得唔值，因為是但揾一間都好味啲，我直頭諗緊係咪店員唔記得落茶。紫珍珠鮮奶綠HK$31…Read More

成日行過Make it，都總會被佢嘅蛋糕吸引住，好老實以立體蛋糕嚟講價錢真係唔算費，比起好多品牌平，而且仲有細細個，啱2-3人食用嘅立體蛋糕，買嚟幾個frd食生日飯就最好不過。呢排仲見到佢地新陳列嘅保鮮花蛋糕，真係好吸睛，將甜品同花合而為一，實在係冧女仔必選，因為食完個蛋糕之後，可以將水晶球拆出嚟收藏，聽店員講水晶球入面嘅保鮮花仲可以保存一段時間tim呀！另外店內嘅獨角獸蛋糕都好cute，不過今次收蛋糕嘅主角係我爸爸，所以呢個就唔太個適啦！(雖然我自己就好鐘意)最後我訂咗個粉藍色嘅月球蛋糕畀爸爸，tum下佢開心，因為呢個蛋糕係將蛋糕同禮物夢幻結合，上面嘅月球燈部分唔食得㗎，因為係拎嚟當小夜燈用，送畀男女朋友、家人、朋友都好合適。Make It店內另有多款嘅雪糕蛋糕供選擇，重點價錢唔貴。當然要寫返個朱古力牌送畀爸爸，祝佢爸爸節快樂。月亮蛋糕真係好靚好夢幻，成個設計都好有心思，收到蛋黃嘅人相信一定會非常開心。而且蛋糕上嘅設計亦造得好細緻，仲有啲星星同珍珠糖點綴，月亮蛋糕5吋只係賣HK$520，呢個價錢同質素值得讚。拎住嚟影相真係好靚，簡直係無得唔影相留念呀。雖然呢個蛋糕係比爸爸嘅，不過我都要搶嚟影一兩張相，哈哈，而且月亮燈仲有兩隻色㗎，有黃色同埋白色，輕輕一按就可以轉色，仲跟埋一個木架，放係睡房都幾浪漫。蛋糕味道係紅桑子忌廉朱古力，勝在唔會好甜，忌廉好香滑，食落有淡淡嘅紅桑子味，朱古力蛋糕好鬆軟，所以連婆婆都喜歡食。而且伴旁嘅Macarons同樣造得幾好，唔單止係賣相靚，杏仁味十足好好食，好驚喜！順帶一提，訂蛋糕果日我忍唔住買咗獨角獸士多啤梨乳酪雪糕，賣相精緻仲好好食，士多啤梨味香濃但唔會覺得太甜，夏天食真係覺得好清新，連個筒都好脆口呢！…Read More

想食好嘢又怕食完好肥？但如果每道菜你都知道卡路里咁就唔洗怕啦！位於炮台山站 A 出口嘅呢間Helfit Life Club，著重食材的營養及熱量，主打推廣健康飲食文化。Helfit Lifestyle Club有瑜珈課程提供，而餐廳更有營養師駐場，所有嘅食物會註明卡路里同埋其營養價值，更選用健康方式來烹調。餐廳環境簡約整潔，裝修帶有田園風，令人感覺放鬆。除咗有set dinner之外，亦可以散嗌嘢食，不過見到set dinner價錢咁抵，所以就同男友每人嗌一個試試。當日晚餐都有好多選擇，我就點咗紅酒比目魚伴香煎帶子配紅酒汁(HK$288)，而男友就點咗焗寶雲酥羊架伴新薯配百香里汁(HK$358)。雅枝竹准山湯（卡路里：127)呢個係我從未飲過嘅湯，對我嚟講非常新鮮，原來雅枝竹又稱朝鮮薊，係菊科類植物的嘅花蕾，湯口感幼滑，入口有點似忌廉湯但帶有少少酸味。另外，附湯更有熱哄哄嘅餐包同埋橄欖油陳醋，食落好開胃。蟹肉及蟹子沙律（卡路里：127)雜菜沙律再加上頗多嘅蟹肉同蟹子，配以沙律醋上場，係一個好開胃嘅前胃，而且口感清新。焗寶雲酥羊架伴新薯配百香里汁（卡路里：422)羊架係採用咗蒙古羊，而蒙古羊含有8種人體必需胺基酸同鋅質，對於免疫系統好有益，有助於穩定血糖。寶雲酥係法國南部一種傳統嘅焗羊架方法，男友話呢個羊架處理得好好，首先食落完全唔油，而且肉汁豐富，又好入味，重點食哂都唔覺得膩。紅酒比目魚伴香煎帶子配紅酒汁 (卡路里：242）比目魚無論係味道、營養、功效價值上都好好，而且魚肉細嫩，好多時我都會嗌比目魚食。一讚係餐廳嘅紅酒汁做得唔錯，能有提鮮作用，加上魚肉嫩滑，只可惜魚皮未夠脆身，失咗一點分數。不過伴旁嘅帶子好大隻，盡顯餐廳誠意，而且帶子煎得剛剛好，食落仍然好juicy。另外一個得分位係餐廳除咗注重卡路里之外，仲好著重營養，主菜嘅伴菜份量好足夠，絕對唔會出現多肉少肉嘅問題，而且伴菜亦好新鮮鮮甜呢！！法式奶凍法式奶凍加以藍莓醬，味道清新，唔會太甜。薄荷茶最後來一杯薄荷茶，作為晚餐嘅總結，能促進血液循環同時紓緩壓力，實在令人感到relax呢！三百幾蚊有齊頭盤、主菜、甜品同飲品，實在係一個抵食價錢，而且呢度上菜速度好快，環境又簡約舒服。同男友嚟食完飯之後，佢經已約咗同事食幾次lunch啦～…Read More

身為火鍋控必定會四處尋食，而前排接男友收工，搵到滾得囍宮廷火鍋，兩個人滾完之後，真心覺得滾得盞！呢度係一間走華麗宮廷風嘅火鍋店，除咗火鍋之外，亦有好多小炒供選擇，而我地當然主功火鍋啦。一入門口就有張金碧輝煌嘅龍椅，店內裝修得好似以前嘅宮廷咁，連燈飾、座椅全都一絲不苟，著實係心底裡加咗分。好啦，一坐低餐桌上有道「聖旨」同「接旨」，原來係點餐紙同埋簡介，哈哈，真心覺得有心思。前菜同醬料方面都盡顯餐廳嘅誠意，前菜都幾好食，雖然我地只係兩個人，但係餐廳絕不欺場，依然提供四款前菜俾我地。特濃冰凍洛神花茶 HK$38 (推薦指數：4/5)味道香濃飲落無糖水味，好冰凍，飲落味道帶少少酸，所以打邊爐飲更加令人胃口大增。康熙花膠雞湯鍋(半隻) HK$288 (推薦指數：5/5)呢度嘅湯底實在太多選擇，而我地見到其他枱都有點康熙花膠雞湯鍋，所以被呢個花膠雞湯鍋吸引住，真係好正好有誠意！！湯底雞味濃郁，色澤金黃，而雞係另上嘅，養顏花膠大大片而且非常厚身。餐廳教我地可以先飲雞湯，我飲咗兩碗先停口，然後再放入花膠，而本身雞經已有7成熟，所以食幾多落幾多就唔怕會嚡口。放落湯底滾一滾就可以食，龍崗雞嘅雞肉非常嫩滑有雞味，食落絕對唔油膩，呢個湯底呢個配搭個人覺得超值，如果唔係太飽，呢個湯底絕對可以湯撈飯嚟食！！手切飛驒和牛(100g) HK$288 (推薦指數：3.5/5)老實說呢個牛就有點點失望，上枱賣相非常精緻，可惜油脂紋理分佈不算均衡漂亮，雖然店員話可以兩食，但係見到仲係好冰，難以當刺身。不過輕輕一涮之下，入口仍有入口即溶嘅感覺，牛味挺濃而且食落好軟腍，不過不失，可能打邊爐食返安格斯牛會比較合適，下次多人嚟會點手切牛肉拼盤三試。珍珠帶子墨魚丸(8粒) HK$78 (推薦指數：3.5/5)自家手打嘅肉丸值得一試，入口彈牙，絕對同平日街邊嘅肉丸口感完全兩回事。墨魚丸入面有粒細細粒嘅珍珠帶子，能增加口感同鮮味。海鮮拼盤 HK$368 (推薦指數：4/5)我係一個海鮮控所以打邊爐點都要有海鮮先夠滿足，不過兩個人打邊爐又真係好難嗌幾款海鮮，所以呢個海鮮拼盤確係好啱兩個人share食。拼盤入面有好多款海解，海蝦仲係新鮮到識郁㗎，份量都幾足，兩個人食海鮮都食到飽飽呀。特別一讚隻鮑魚好大隻又新鮮，入口彈牙爽口，實在非常好食呀！！窩荀 HK$32 (推薦指數：4/5)窩荀係我每次打邊爐must have item！呢度嘅窩荀好嫩口又唔老，好味道。菜心苗＆竹笙 前HK$28 後HK$58 (推薦指數：4/5)菜心苗好新鮮。而竹笙份量非常足夠，抵食，食落好爽口，加上又索哂雞湯，真係食得好爽。窩荀係我每次打邊爐must have item！呢度嘅窩荀好嫩口又唔老，好味道。原來呢度每日都會有唔同嘅糖水送俾客人，今日就有幸收到木瓜雪耳，煮得好好食，唔會太甜但又可以清下熱氣，而且雪耳仲仍然入口好爽呢。兩個人打就貴少少，每人6百蚊度，但係呢度所有嘢食都好好食，我肯定會係短時間再嚟過！！…Read More

我好喜歡到台北四處飲飲食食，而每次我必定會book食胡同燒肉，他們係喺台灣有多間分店嘅日式燒肉店，店內裝潢走中式路線，以中式古門同窗花，以及燈籠營造復古中國味。台灣分店店員好友善，除咗介紹食法之外，仲會同客人傾下計講下笑，非常熱心，每次去到都會逐一介紹食物點處理同有咩推介～講返香港分店先，店內嘅裝潢同台灣相若，同樣走走中式路線，以香港地嚟講店內空間都幾好大，除咗卡位同用餐區外，仲同台灣一樣設有吧枱區，可以睇住店員燒肉。有去過胡同燒肉嘅朋友對於呢part絕對唔會陌生，因為店內設儲物櫃，客人可以按需要將隨身物品擺放係儲物櫃，輕輕鬆鬆咁享用燒肉。食物款或同台灣嘅差不多，肉類款式繁多，牛、豬、雞、羊都有，當然價錢上就會係有所提升啦，但加幅都合理，可以接受嘅！連餐具都同台灣一模一樣，令人好懷念台灣嘅旅行時光。同日式燒肉店最唔同嘅地方係配料好特別，有蔥花同洋蔥碎，仲有一碟檸檬汁，配以烤肉帶出另一番滋味！達拉斯 HK$188 (推薦指數：4.5/5)達拉斯係招牌牛肉嚟，取自牛前胸肋骨中間位置，由於每日嘅供應都有限，所以聽到一有當然要點嚟試下啦～原來達拉斯係因因為胡同燒肉老闆特別鍾意睇NBA，所以以球隊達拉斯命名，肉味濃郁又Juicy，好好食。牛舌 HK$98 (推薦指數：4/5)牛舌面頭鋪上大量葱花，加上肉質較薄身，入口清新，不過個人覺得香港分店嘅牛舌無台灣咁好食，牛舌燒完須要同葱花捲住食，入口爽口但係肉味無咁濃郁，同埋無咁Juicy，比起台灣遜色一籌。蟹膏生干貝 HK$100 (推薦指數：3.5/5)呢客蟹膏生干貝我每次去台灣必點兩客食，其實佢係帶子配蟹膏，大大粒帶子刺身肥美肉厚，加埋蟹膏更能帶出鮮美！不過係香港點就比較貴啦，要成HK$100一客，但由於我太想回味呢個鮮美嘅味道，所以都點咗一客。不過，呢客蟹膏生干貝食落雖然軟嫩但不太有鮮甜味道，同樣比起台灣遜色一籌。青椒 HK$30 (推薦指數：4.5/5)燒青椒好好食，雖然非常簡單，燒起來完全唔考功架，但勝在店家嘅蔬菜都幾新鮮，食落鮮甜。HK$30 (推薦指數：4/5)同樣燒得剛剛好，唔會話燒到好乾咁，食完咁多肉當然要食多D蔬菜。日本山藥 HK$70 (推薦指數：3/5)雖然呢份山藥比起平日嘅貴，不過個山藥略嫌燒得唔夠香口，份量亦比較少，相比起台灣點兩份先係呢個價錢，而且又燒得香口，著實有D失色。三份肉類再點了三份蔬菜加兩杯飲品，埋單唔洗四百蚊一個人，但係全晚有店員幫手燒，唔洗自己親自落手烤肉，再加上服務都很不俗，呢個價錢合理，但相比台灣就無得比啦，嚟呢度叫做解下思鄉愁。…Read More

有時候兩個人想食潮州打冷美食，但潮州打冷通常大大碟好難嗌餸，再加上個人覺得港島比較少D選擇，所以都好少兩口子食。前排睇報導話西營盤開咗間精緻小巧嘅潮州菜，為食嘅我當然一試啦。同平日去開嘅潮州菜好唔同，呢度別緻又乾淨，同一般以往去開嘅潮州菜館完全唔同風格，由牆身啦、桌椅啦，至到去餐具都以不同嘅綠色作為主。好鍾意佢地嘅綠色雲石紋餐具，雲石紋大熱又young，食嘢都心情好D呀。一坐低就奉上「禮貌茶」俾我地，原來小館話潮州人天生熱情好客，同朋友一見面就會以喝茶為見面禮，所以就奉上「禮貌茶」俾我地，茶以玻璃杯加木盤奉上，感覺好young又新穎，功夫茶易入口，唔會太濃，有煥然一新嘅感覺。一邊飲緊「禮貌茶」，一邊當然睇下有咩好食啦，呢度嘅食物價錢唔貴，所以嗌多幾款食都唔會心痛。呢度走年青路線，原來可以一邊飲cocktails潮州菜，都係一個幾新穎嘅選擇，可惜當日無cocktails提供，否則一定試試。椒鹽九肚魚 HK$78 (推薦指數：5/5)呢個九肚魚造得相當唔錯，不但外脆內滑，而且亦好入味，平日食九肚魚都要點酸醋但呢度完全入哂味，食落又唔油膩，唔會太咸，剛剛好！！食落一D骨都無，啖啖肉又香口，好惹味呢！太極素菜羹 HK$78 (推薦指數：4/5)因為湯係一位位上，同男友一人點一款湯試。呢個太極素菜羹賣相上實在要俾多幾分，左邊綠色嘅係用菠菜打碎成菜汁，而白色果邊原來係雞湯煮成，所以同平日用豆腐造嘅分別好唔同，呢個羹會相對鮮味得多，味道好平衡，好味又好睇，可見小店相當花心思。青欖螺頭湯 HK$88 (推薦指數：4/5)燉湯飲落好舒服同埋好足料，係香港比較少餐廳會提供青欖螺頭湯，所以見到呢度有都忍唔住order咗一個俾自己。青欖有清熱解毒、止咳潤肺功效，呢排忙住搬屋嚨喉有少少乾想作病咁，飲完嚨喉舒服咗好多，而螺頭份量多食落又唔韌 。火腩春菜煲 HK$68 (推薦指數：4.5/5)對於我嚟講，正宗潮州菜必定要有春菜點，好多餐廳都會用排骨煮春菜，但呢度就用上火腩，令到個清湯更濃味，菜就相對更入味啦。雖然話係用火腩，但係一點都唔油膩，因為小店有飛水去油，湯頭完全唔油，所以我成個湯飲哂tim呀，加上春菜又煮的好稔，好味道！潮州蠔仔烙 HK$78 (推薦指數：4/5)呢個蠔仔烙並唔係用炸嘅造法，而係用煎嘅方法，所以食落唔係滿口炸漿而係非常香口嘅蛋漿味。蠔仔份量都算幾多，而且食落新鮮又無沙，加上煎得鬆化，入口煙韌彈牙，有誠意之作。福果芋泥 HK$38 (推薦指數：4/5)因為平時好少見到有呢款甜品食，所以忍唔住嗌咗，但嗌嘅時候都擔心會好甜，點知嚟到又唔錯，芋泥帶微甜，濃濃芋頭味，鋪面嘅白果又好軟身香甜。芋泥食落比較飽，個人覺得可以兩至四人share一份都okay，食完又唔洗驚太濟。反沙芋條(4條) HK$58 (推薦指數：4.5/5)呢個甜品個人都係覺得必試，係極考功架嘅傳統甜品，佢地採用咗荔浦芋頭，所以食落粉嫩香軟，而出面嘅糖漿完完全全炒到起哂沙，食落外脆內軟，呢個咁出色嘅潮式甜品值得一點。個人覺得環境舒服加食物又幾好，埋單每日二百幾蚊，呢個價錢可以試到咁多唔同嘅潮州菜，嚟開西營盤呢邊都係一個幾好嘅選擇。…Read More

有時想同班friend聚下腳又唔知去邊好，今次有介紹俾大家～就係位於佐敦漢國中心對面嘅串酒里KEBABEER！串酒里KEBABEER引入火山石燒技術，所以串燒食落唔會乾爭爭，能夠鎖住肉汁，令食物外脆內軟～要搵到串酒里要穿入一條小巷，有室內同埋室外兩部分，我地就選擇坐係室內，枱與枱之間富有空間。最吸引我地嘅係串酒里有全港獨有粗口手工啤，所以成間小店入面有好多擺設，哈哈，可以慢慢試下唔同手工啤，又可以同三五知己傾下心事！餐廳嘅menu明顯落過心思設計，而且獨有粗口手工啤實在好搶眼，佢地嘅手工啤喺發酵中期加入冷泡啤酒花，再配以唔同口味，所以款款手工啤都各有特色。左邊：蜜桃菜頭右邊：香甜蜜糖手工啤酒(各HK$68)非常易入口，味道唔會太濃，岩哂一眾女生，香甜蜜糖嘅味道比較特別，飲落帶有微微甜香。而啤酒背面都有講返呢個字嘅意思，好生動好特別，簡直係可以推動到香港嘅文化，而且啤酒仲可以買走tim！至於食物方面都幾多選擇下，唔單止有海鮮，亦有一些特色串燒，例如日本雞蛋燒廣島蠔、黃金扭扭薯條、芝心日本廣島蠔脆棒等等。汁燒豆腐串 HK$25 (推薦指數：4.5/5)意想不到嘅好食，豆腐外脆內在嫩滑，加上燒得夠熱，而燒汁又被豆腐索哂，我同男友都覺得非常出色！黑松露蒜蓉燒日本廣島蠔 HK$59/2隻 (推薦指數：4/5)日本廣島蠔燒得岩岩好，而蒜蓉夠多食落好香口，再加上面頭嘅黑松露，簡直係兩重香味係口入面，價錢唔貴，值得點嚟食下！川式脆燒雞軟骨 HK$25 (推薦指數：4/5)燒得香脆嘅雞軟骨要嚟送酒一流，爽口彈牙，味道好好。左：札幌芝麻香燒雞翼 HK$28/2隻 (推薦指數：3.5/5)右：川式麻辣香燒餃子雞翼 HK$49/2隻 (推薦指數：3.5/5)札幌芝麻香燒雞翼燒得幾好，唔會太乾，食落仍然幾juicy，而且雞皮頗脆，食落香口惹味。川式麻辣香燒餃子雞翼其實係明太子釀雞翼咁，不過外皮塗上了川式麻辣，所以入口時好惹味，男友話食落都幾麻辣，忍唔住飲多咗幾啖啤酒呢～～鹽燒厚切牛舌 HK$59 (推薦指數：4/5)牛舌好厚切，可見小店絕不小家，燒起喛爽口彈牙又唔會韌，而且入口仍帶juicy，好味道！燒麻吉 HK$20 (推薦指數：4/5)來自台灣麻吉，好特別而且唔係度度都有得食，煙煙韌韌，食落好似年糕咁，而外皮又脆卜卜，好得意。生蝦配特色泰醬 HK$68 (推薦指數：3/5)生蝦比較細身，但係醬汁造得幾好，所以加返唔少分數，當然呢度嘅生蝦唔可以同泰國餐廳比較，但係都可以過下口癮。燒菠蘿 HK$29 (推薦指數：4/5)食咗咁多串燒，最後當然要食返串燒菠蘿作為總結啦。外皮帶有焦糖香甜脆口，而內裡嘅菠蘿則相當juicy，好好食！好多汁！埋單每人大概HK$400，價錢合理唔算太貴，但係可以輕輕鬆鬆咁過一個晚上，食物質素幾好，環境又舒服，嚟開呢頭不妨可以試下！…Read More