食宜樂，飲宜節's Profile

中秋翌日見天氣好，同愛人揸車去遠啲食晏，上網見呢間burger好似唔錯，一於試試。我叫左份經典漢堡套餐配熱咖啡，由於唔食牛，所以加$3將塊牛豬肉改為豬雞肉；愛人叫左份雙層芝士漢堡配可樂，另外再加左份炸薯條。首先上左份炸薯條，唔錯，啲薯條熱辣辣、脆卜卜，加上係用粗身好似薯角咁嗰種薯條，食落口感好好，我哋仲加$2加埋類似Shake shake粉嗰啲味粉，不過略嫌少左啲。跟住上兩份漢堡，噢，原來都有跟薯條架！不過就冇味粉，只好加茄汁。至於個漢堡，塊肉都幾juicy，而且唔太薄。愛人試左我嗰個一啖，佢話始終都係牛肉做嘅惹味啲。不過，我認為最值得讚嘅係個包，咬落唔單止熱，而且仲有脆邊，正！食包包食飽，呢餐只係$131。如果下次再嚟，我可以叫個輕量餐，聽店員講個包係細個啲，唔使食到咁包…Read More

尋晚有兩個朋友响荃灣駕車出嚟大圍搵我同男友食宵夜，於是我哋就去左屋企附近呢間新開o既串燒鋪度食嘢。可能因為已經12點幾，間鋪冇咩人。我哋四個人點左以下o既嘢食：由於我唔食辣，對嗰啲麻辣嘢冇意見，但男友話個麻辣鳳爪好味，辣得幾過癮。我必食o既燒韮菜，個味道唔錯，唔會勁多孜然粉。呢個好好味，我好鐘意。份量好足，比起平時响日本鋪食o既大好多，味道都唔錯。好多金菇，都幾大包。車厘茄好多汁，面層黑豚肉好香，個配搭幾好！另外仲食左幾串雞肉、牛丸、鴨棒、鴨胸、雞腎，本來仲想食鮑魚同扇貝，但已經賣晒有樣嘢幾值得讚，枱面上有辣粉比客人自己加，男友話個辣粉好正！總體而言，大部分食物都唔錯，而且坐得幾舒服，又有電視睇，以後除左飲夜茶，食宵夜又可以多個選擇…Read More

噚日放工，男友唔得閒，我一個人又唔知食咩好，正喺我行返屋企嘅途中，經過坤記見佢仲開緊，仲有人排隊，放是就決定買腸粉＋燒賣，食個簡單又平嘅晚餐。 以前讀書嗰陣，好鐘意放學去坤記買嘢食，但自從出嚟做嘢之後，就好少有機會食，因通常都同男友或朋友一齊食飯，好少會一個人。噚日男友唔得閒，加上冇心情約朋友，反而造就咗個機會比我回味讀書時代嘅滋味，都可以話係「無心插柳」。我之前都會喺公司附近買腸粉＋燒賣做早餐，但啲腸粉食完會胃痛，啲燒賣又有啲臭魚味，所以我宜家都係食三文治多。唔知點解，硬係覺得坤記啲腸粉滑啲，啲燒賣香啲、大粒啲㗎。坤記嗰姨姨好好人，會問：「阿妹，你要咩醬？」跟住佢就會跟住你嘅喜好，幫你落調味。我唔食芝蔴，所以只係落咗蔴醬、甜醬，同埋豉油，雖然簡單但好好味…Read More

幾個星期前，有日下晝同男友喺大圍火車站附近搵食，行下行下，見到垃圾房嗰條街，有間裝修幾靚，門口用木＋玻璃砌成嘅舖頭，望入去有幾張石枱，我同男友都認為，呢度應該係開西餐廳。我哋見裏面有幾個人執緊嘢，於是行過去8下，問下食乜嘢，點知個老闆話係生蠔吧，仲要係即開即食嗰種！ 嘩！正呀！我嘅至愛之一呀！我問老闆幾時開張，佢話過多兩個星期。於是我就攞定訂座電話，打算同朋友一齊去試試佢。上星期，我就同朋友去試呢間生蠔吧。我預早兩日打電話去訂10位，聽電話嗰個負責人好有禮貌，除左問我想食咩之外，仲問我有冇小朋友等等問題，可能佢哋新開張啦，所以啲態度好好，希望佢哋可以keep住就好喇！ 喺電話度，個負責人首先問我想食咩國家嘅蠔多，佢話如果有特定想食嘅可以話佢知，佢就會預貨。我訂左男友最鍾意食嘅Gillardeau，然後我問會唔會有Ostra Regal啦，佢竟然好快同好肯定咁答：「有！」 真係估佢唔到呀！平時如果想食蠔，我通常都只貪方便會响CitySuper買，但就只會買到啲最common嘅蠔，但係我知我以後都唔駛去CitySuper啦，因為呢度啲蠔款又多，而且價錢唔貴，最緊要係唔駛搭車出去買。不過，興奮都要理性的。始終呢度新開張，我又未試過佢啲蠔係咪真係新鮮，我梗係唔訂咁多啦，加上有幾個朋友只係會食生蠔，唔係愛食生蠔，所以我total只係訂左3打生蠔10個人分，包括10隻Gillardeau、10隻Ostra Regal、10隻White Pearl，同埋6隻Coffin Bay。除咗生蠔，個負責人仲介紹我試下佢哋個豬肋骨，因為要預訂先有，其他牛扒同羊扒就可以去到先叫，又如果我哋10個人可以訂全條豬肋骨，大約有14-15支骨。我諗，我哋10個人有8個都係男人，仲要唔係細食嗰種，搵啲肉食飽佢哋都好喎~ 於是，我訂咗一條豬肋骨喇。嗰日我同男友大約7：30去到，見到佢哋已經set好晒枱（好似最後晚餐咁），基本上裏面放完我哋張10人枱之後，只係淨返一張4人枱，好似包場咁。呢間餐廳雖然都幾細，但都裝修得幾靚，啲櫈好舒服。由於呢度未有酒牌，所以唔收開瓶費，我同男友就喺屋企拎咗2支白酒同2支紅酒去。大約8點人齊，負責開蠔嗰個男人就對住啲我哋，企喺開蠔嗰個位度，一路開蠔，一路同我哋吹水。即開即食真係唔同啲嘅，啲蠔又肥又鮮甜，加埋淡海水，真係好味到不得了呀！ 開蠔嗰個人見我食得咁開心，竟然送多咗兩款蠔比我食，一隻係Kumamoto，另一隻係Pacific Rock，呢兩款都好鮮好甜，正！！！ 除咗生蠔，我哋仲叫埋珍寶牡丹蝦、甜蝦、珍寶帶子同翡翠螺，既然預咗食餐「蠔」嘅，咁都唔爭在啦！ 嗰隻牡丹蝦，嘩哈哈，差唔多有我隻手掌咁長呀！（不過我手細）食完生嘢，我哋就食熟食喇。喺食完生嘢上熟嘢之前，嗰度原來有湯送㗎！好細心呀！個湯係芝士西蘭花湯，好飲！前菜方面，我哋叫咗1個牛肋條沙律、1個蝦沙律、2份黑豚肉卷。我本來想試吓個鵝肝㗎，但咁多人又唔知點分喎，跟住男友話下次同我兩個人嚟食，嘻嘻。 主菜我哋就有一條豬肋骨、兩塊西冷（個開蠔男話呢塊其實係叫New York Steak，我唔記得佢話係牛西冷隔離唔知邊度又短啲嗰條肉，由於我唔食牛，加上又掛住食，所以冇留意佢嘅解釋）同5份澳洲羊扒（呢度有兩款羊扒，我食呢款係貴啲嘅，＄240／2件，另一款平啲嘅唔記得幾錢）。 嗰日接電話嗰個負責人真係冇介紹錯，個豬肋骨真係好好味，配菜啲薯仔都好甜。我問開蠔嗰個男人，嗰日接電話嘅係咪佢啦，佢話：「唔係，應該係大廚。」咁唔怪得佢推介我食呢個豬肋骨啦！ 食完啲扒，我同另一個女仔朋友都已經好飽，但班大食男話要叫意粉，於是佢哋就叫咗1個卡邦尼意粉、1個白汁黑青口意粉＋1個茄汁海鮮扁意粉。個卡邦尼嚟到，嘩，好香芝士味，而且上面加咗隻生蛋，好特別。雖然我好飽，但都忍唔住食咗一啖，正！跟住之後嘅白汁黑青口意粉同茄汁海鮮扁意粉我都冇食，因為實在太飽，但個開蠔男叫我試吓個黑青口，佢話出面通常都係用藍青口，而佢哋就用黑青口，話好食好多。好啦，既然人哋開到聲，又請咗我食兩隻蠔，咁我就食啦！不過，又真係幾好味喎。食晒枱面上嘅食物，大家都已經飽到捧住個肚，點知又有另一個男人問：「要唔要食甜品？我哋自己整㗎，送比你哋食丫。」我成日都話，食甜品係用第二個胃，咁梗係試啦。個甜品男話，佢哋啲甜品冇定話有啲乜，嗰日做乜就出乜。而我嗰餐就係homemade蘋果批加雲尼拿雪糕。個蘋果批好好食，唔係太甜，而且啲蘇皮好香，真係唔錯。食到飽一飽，我哋坐响度吹下水，飲下酒，由8點開始食到差唔多12點，但嗰度啲負責人都好好，冇話趕我哋走，反而仲同我哋一齊吹水添！ 埋單嘅時候，個開蠔男話新張優惠，免收加一，埋單都只係＄3900左右，即係一人＄400有找，食咗咁多好嘢，都唔算貴。呢餐真係好滿足，而且食得好開心。 不過，呢度有樣唔好嘅係個地點比較難搵，我同男友因為住呢頭，又咁啱嗰日無無聊聊先撞到入嚟，有對情侶朋友住荃灣，佢哋話揸車嚟就好快呀，一出城隧就到大圍，但就兜咗幾次先搵到呢間餐廳，不過有街泊，話慳返啲泊車錢，算佢啦！仲有，我訂位嗰日其實打咗好幾個電話去先至有人接，唔好耐性嘅真係睬你都傻。不過總括嚟講，呢餐我好滿意 我諗，呢度好有可能會成為我嘅食堂之一。…Read More

真係估唔到，呢間喺屋邨嘅大排檔（前身係冬菇亭），竟然又平又好食，而且啲阿姐嘅服務態度仲好好，住喺沙田、大圍嘅朋友，真係可以搵日嚟試吓。一行八人去呢個大排檔食飯，雖然坐出面有啲熱，但開咗把大風扇吹住，都仲可以接受。基本上，呢度有嘅食物都同其他大排檔嘅無乜唔同，我哋見有4款孖寶，價錢都只係＄108、＄118、＄128，而且又無話每枱只限一款之類嘅限制，於是我哋就叫晒4款，即8個餸。呢8個餸包括：芝麻雞、蝦、蒸倉魚、玫瑰雞、燒腩仔、菜、叉燒... 仲有一樣，諗唔起，另外我哋再叫咗3隻乳鴿、菠蘿咕嚕肉，同埋金銀蛋莧菜。勁多嘢食!！！啲餸上得好快，張枱放滿晒食物。我哋坐嗰張枱咁啱喺燒味部出面，望住師傅即炸乳鴿。嘩！真係好好食！但都只係＄38一隻！正！ 佢啲孖寶嘅份量都唔細，唔會話細細碟呃人嗰種，而且味道都好好！我哋成班人係咁食，又係咁飲啤酒，唔覺唔覺，竟然飲咗10支大啤！！ 大排檔就係有呢樣好，大啤都只係十幾蚊支，酒錢都只係百幾蚊，就飲到個個醉薰薰！飲飽食醉嗌埋單，嘩！食咗咁多，飲到咁醉，都只係8百幾蚊，即係每人$110有找！！超值呀！我冇諗過屋邨大排檔會咁有驚喜，所以冇影相，但真係好值得推介。呢度唯一唔好嘅地方，係要用公厠，而且要行一段路仔先到... 由於嗰日裏面有大枱，我哋唯有坐戶外，但係有小強出沒！！！衞生差咗啲...但大排檔，係咁㗎啦，我接受。…Read More

噚日執銀包，竟然比我發現咗呢張單，所以今日一於recall返啲記憶，寫返個食評。由於我嗰陣未開始寫食評，所以無影相，但我對嗰餐食過嘅嘢都仲有啲印象。之前睇過其他人寫有關呢間餐廳嘅食評，正面居多，加上有一次我路經時諗住book即晚食飯，佢又已經full booking，咁我就諗：呢間嘢唔通真係咁正？見佢門口貼晒雜誌訪問，而且沙田、大圍一帶除左帝都酒店有生蠔食之外，都好難搵到有餐廳食生蠔同其他海鮮食，所以隔咗個星期之後我就預早幾日訂定位，同男友＋另外2個朋友，一行四人就諗住到呢間餐廳到食餐「蠔」！不過，最後竟然有啲失望 。我哋坐喺最近門口嗰張6人枱，入面另外有兩枱（一枱係一家3口，另一枱係8個中年人）。我哋之前已經睇過呢間餐廳嘅食評，知道免開瓶費，於是我哋就自己帶咗兩支白酒去。入到去，我哋將兩支酒比咗個男嘅負責人，請佢幫我哋雪（嗰日臨上去前响惠康買嘅Oyster Bay，所以係完全唔凍嘅）。我哋去呢間餐廳嘅目的，梗係食生蠔啦。我打開個餐牌，見上面有好幾隻蠔揀，諗住試下啲唔同嘅口味啦，點知幫我哋落單嗰個男嘅負責人第一句就話：「餐牌上啲蠔無呀，今日得南非同西非。」 咁...我哋唯有每款叫半打share囉。比着平日，我哋幾個最少每人食4-6隻啦（印象中我有一次去Oyster Station，四個人就食咗4打，即每人12隻）。得兩款蠔，你話如果好食就話encore啫，但嗰次啲蠔就嘛嘛哋，奀咗啲，所以大家過咗口癮就算。喺我哋食完頭半打蠔之後，就諗住飲杯白酒啦，我哋叫個男嘅負責人幫我哋拎支白酒出嚟，佢竟然話：「你哋支酒未凍喎。」 吓？我哋諗住佢哋會醒目，幫我哋急凍支酒添，原來佢哋只係放喺普通溫度嘅雪櫃度，咁梗係未凍啦。於是，我哋就提議用個冰桶裝啲冰，比我哋自己急凍支酒（响個桶度不停咁轉支酒，等支酒每個位置都接觸到啲冰，以前睇「開心大發現」都有教過）。點知...佢哋用嚟裝白酒個冰桶好細，只係平時用嚟放夾落隻杯度啲冰嗰個size嘅桶，個桶裏面放得好少冰，支酒放咗落去根本轉唔到，所以我哋問會唔會有個大啲嘅冰桶比我哋啦，佢嘅答案係：「無，只係得呢個。」OK，算，照飲！除咗生蠔，海鮮類我哋仲叫咗一板海胆同2隻大帶子。嗰板海胆有5舊，都幾大舊，大約兩雙方指位咁粗（女仔手指），但味道較淡，我就唔係咁like。至於嗰4隻大帶子都幾大、幾甜，尚算OK。食完生冷嘢，我哋就食扒喇。我哋order咗一份羊架＋一份安格斯牛扒share。因為我唔食牛，嗰塊牛扒就由佢哋三個分咗嚟食，佢哋話塊牛幾有牛味，幾香，唔錯 。而我有份食嘅羊架，羊味都幾重（我鐘意食羶），加上佢嗰個做法令件羊架裏面啲肉汁都保存得幾juicy，所以我覺得唔錯 。食完扒，因為大家都唔夠飽 ，所以再叫多碟卡邦尼意粉。呢個卡邦尼都幾夠芝士味，味道都唔錯，但個份量就少咗啲（可能因為我哋4個人分）。由於我哋慳咗啲食蠔錢，所以決定再叫嘢食。我哋再叫咗一個大蝦湯＋一個野菌湯＋一個黑松露扁意粉。呢兩個湯嘛嘛地，有啲淡，我哋兩碗都飲淨三份一。但好彩，個黑松露扁意粉唔錯，食到香味。埋單嘅時候，喺嗰度做嘢嘅女仔笑容親切咁問我哋，啲嘢食O唔OK，我哋話：「OK啦。」就係因為呢個女仔，令我比返少少服務分呢間餐廳。嗰個男嘅，我唔可以話佢係無禮貌，但做餐廳呢種服務行業，即使你係老闆都應該要親切啲對客人，介紹吓啲食物丫，佢太冷漠喇。總括而言，呢間餐廳嘅生蠔一般，而啲扒同意粉就唔錯，可以試下 。呢餐連加一埋單HK＄1683，即係我每人食左＄400蚊多啲，但係滿足唔到蠔癮，食得又唔飽，所以有啲失望 。呢餐嘅食物同價錢：南非生蠔X6 ＄175西非生蠔X6 ＄180海胆1板 ＄250大帶子X2 ＄110羊架X1份 ＄178安格斯X1份 ＄288卡邦尼意粉 ＄88黑松露扁意粉 ＄128大蝦湯X1 ＄45野菌湯X1 ＄38水X1（大）＄40…Read More

好耐之前收到八道嘅宣傳單張，其實都已經想試吓，但有朋友話唔好食，所以之後打消咗呢個諗頭。前幾日，我同男友＋朋友約左9點幾一齊食飯。我哋嗰日唔想打邊爐，又唔想打冷，最後，我哋決定去八道，試一試佢。去到門口，我哋見到張海報寫有宵夜時段，＄98／位，我哋見差半個鐘左右就到宵夜，咁梗係等啦。望入去，見到都坐滿晒人，生意好好咁。攞嘢食張枱都有幾多嘢食，旁邊仲有一個甜品生果櫃。等左半個鐘多啲，差唔多10點，我哋就有位喇。我哋坐喺最近食物枱隔離嘅4人卡位，拎嘢食好方便。我同男友出去拎嘢食，嘩！有青口食喎！我本身唔係咁鐘意食肉，最愛食海鮮，冇諗過宵夜時段都會有青口供應。嗰盤青口好大盤，絕對唔係正價時段食淨，比人揀完揀淨咁嘅樣，而且隻隻都脹卜卜，我第一轉就拎左12隻，之後再拎多左兩次，keep住食。除咗青口，仲有好多唔同方法醃製嘅肉，男友拎咗啲牛肉、雞翼、芝士腸、牛仔骨等等，我哋坐低之後，朋友就自己出去再拎咗啲泡菜返嚟食。我唔食得辣，所以只係試咗好少好少泡菜，但個味道都唔錯，幾醒胃。男友話呢度啲嘢食，好過我哋上次去尖沙咀食嗰間（唔記得叫咩名，間食店喺搭船去澳門嗰幢一廈嘅對面幢大廈。對唔住，我係路痴，除咗沙田同大圍，其他地方我都唔識路）。男友話出面食韓燒，所有肉個味道都係一樣，但八道啲肉真係食到有唔同嘅味道，而且仲幾好食添！八道有用餐限時，無論係正價定宵夜時段，每節都係90分鐘。我哋由10點開始食，食到11：30，我同朋友各飲咗兩枝細樽啤酒（另外比錢的，不過唔記得幾錢），男友就勁飲免費豆漿，再食埋生果甜品，每人都只係＄130左右，都算幾抵食。…Read More

上幾個星期六去新城市睇戲，3點幾開場，咁我同男朋友就去食晏先。本來諗住食Tripel O，但見呢間日式鐵板燒未食過，啲價錢60-70左右，咁我哋兩個就諗住試一試佢啦！點知...早知食Triple O啦！成層都係食店，唯獨係呢間唔使等位，去到門口同個侍應講兩位啦，佢無應我哋，拎住兩本menu，行咗去最近嗰張二人枱度放低左，我同男友唔知佢嘅意思係咪叫我哋坐嗰張，我哋無郁，跟住佢拎轉頭見我哋仲企响門口，先至話：「呢張丫。」坐低之後，我點咗個黑毛豬（好似＄60左右），男友點咗個西冷（好似＄70幾），我哋都有加廿幾蚊轉做套餐，多個湯、沙律、前菜同飯／烏冬。嗰片黑毛豬嘅厚度只係好似肉片粥啲肉片咁，而且淡而無味，無肉味，無調味，好在有碟汁點下咋... 男友塊西冷尚算可以接受啦，我無試到，但佢話味道一般。我哋用咗大約20-30分鐘食完埋單，嚟收錢嗰位阿姐（望落似高級少少的），又係對客人無禮貌嘅... 埋完單，一句「多謝」都無，收完錢就走開咗 我哋終於知道點解呢間嘢唔使等位喇..........…Read More

一年四季，我同朋友都好鐘意打邊爐。大家都係沙田或者大圍人，以前都常都會响返附近打任食火煱，但呢排我哋一諗打邊爐，就會想去盛記。近呢兩個月，我哋就食咗3次。第一次去盛記打邊爐，由於有4大1細，我費事朋友帶住個B等位，所以預先打電話訂咗位。我哋無咩點睇價錢，揸住個餐牌係咁叫鍾意食嘅嘢。印象中，我哋叫咗個芫茜皮蛋湯底、黑豚肉、午餐肉、肥牛、羊片、脆骨腩、芝士腸、響鈴等等，總之成張枱放滿晒嘢食。嗰次最令我哋印象難忘嘅係，盛記嘅火鍋料好大份，而且好新鮮。鍾意用午餐肉打邊爐嘅朋友都知道，出面啲師父刀工一流，可以片到啲午餐肉薄一薄，有時滾耐左都可能會搵唔返。但係盛記嘅午餐肉就唔同，我唔記得總共有幾多件，但我肯定佢係厚切嘅，而且拼埋咁多件，個份量我諗有一罐咁多，真係好有口感！除咗午餐肉，其他嘅料都好大碟，我哋4個人不斷飲啤酒，不斷食食食，最後都食淨咗啲。 到埋單時，記憶中好似食咗700幾，但到嗰時我哋先發現，原來有個4人套餐，而且有嘅料同我哋叫嘅差唔多，價錢好似500左右。嗰次打邊爐，尤於朋友個仔得兩歲，所以迫佢坐响BB櫈唔准落地。但打邊爐一嚟就幾個鐘，小朋友邊有咁好耐性呢？正當阿B大叫之際，嗰度有位戴眼鏡嘅哥哥就响雪櫃拎咗支益力多比阿B飲，當堂乖咗！ 由於第一次去盛記嘅印象實在太好，所以第二次我哋就同第二班朋友去嗰度，帶佢哋去試一試。今次一行5人去盛記，可能我哋夜去，好似都9點幾，响無訂枱嘅情況下，我哋都有位。我哋叫咗嗰鴛鴦湯底（麻辣＋芫茜），叫咗個4人餐，另外再加點午餐肉、鵝腸、羊片。今次去食，我哋又有另一個驚喜。我自己本身唔食鵝腸，但啲朋友就好鐘意，佢哋一致認同啲鵝腸超正！ 佢哋話出面食親嘅都係「拿」到無晒味，硬掘掘嘅，但盛記係用鮮鵝腸。雖然我唔食，但我都知鵝腸係咩樣，我見佢哋食嗰啲係粉粉哋色，脹脹哋，個樣真係同响酒樓任食，或者打冷舖見到嘅唔同㗎！呢幾個朋友食完一碟之後話唔夠喉，之後又再encore多一碟鮮鵝腸。呢餐我唔係好記得幾多錢，因為有人請，但應該都唔係太貴，我估大約＄200／人。唔知係咪食鵝腸食到上癮，一個星期後，呢班朋友又話去盛記打邊爐。於是，我就去左第三次盛記。今次我有訂位，因為早食，而且天氣熱，班大爺要坐冷氣房。呢次食嘅嘢同第二次食嘅差唔多，因為佢哋都係為咗啲鮮鵝腸而嚟，所以都無咩好講。總括而言，盛記打邊爐係好嘅選擇，值得推介。…Read More