Bi Bi Ellen 波波狗's Profile

因為關注咗beyond日記主角嘅關係，知道尋日係beyond之夜，第一次嚟到呢間餐廳。據知呢間餐廳每一個五/六/日都會有一場嘅live show，尋日係音樂劇beyond日記兩位男主角Bosco 同Oscar 嘅演唱。今次嘅入場費320蚊，包咗六個餸同兩杯drinks，每次嘅package都唔同。按正常二人分量嚟講佢係偏多嘅，又有好嘢食，又有好歌聽，weekend消閒係一個唔錯嘅選擇，亦為本土未為人所熟悉嘅音樂人提供咗一個可以近距離接觸群眾同有即時互動嘅演出平台。餐廳嘅環境就係一般嘅茶餐廳， 兩邊有幾組四座嘅卡位，中間有可移動嘅二人枱組合，場中有一幅巨型嘅油畫，畫咗幾十年前餐廳所在嘅街道， 我諗應該係1989年佢開業嗰陣時嘅街景嚟嘅，做表演場地嘅背景，整體感覺都好和諧，好有復古嘅味道，襯托live band 剛剛好。食物方面，整體嚟講嘅味道唔錯，分量亦都好足夠。紅酒燴牛尾， texture 剛剛好，唔韌亦都唔會太淋，但就略嫌甜咗少少，坐我隔離嗰位阿太都係咁講，牛尾嘅二人份量係ok嘅。胡椒豬肚雞， 呢個就略嫌胡椒味唔夠，一般飲呢個湯都會prefer個胡椒同咸菜味重啲，同埋個人鍾意胡椒碎同胡椒原粒並用， 層次會複雜啲。呢味餸唔適合用碟嚟上， 啲湯凍曬根本就唔會飲，我prefer佢當係湯品，好似後來我哋request加湯，一人一碗嘅份量比例就啱啱好喇，因為基本上精華係落係啲湯度，呢個菜式嘅主角唔應該放系雞度，雞嘅話未必會食。如果客人一入到舖頭第一道菜就係個湯品，整件事個舖排就會有規劃一啲。蜜桃咕嚕肉， 蜜桃好甜，咕嚕肉嘅質感同味道亦都好好， 醬汁嘅texture同味道都恰到好處。酥炸生蠔個口咁好ok，但係個味道就靠晒個醬，個醬又唔係特別配，我會expect嗰個炸漿再多一啲咸味，帶番多少惹味，再點嗰個sauce就應該會好味啲同充實啲:)。咖哩海鮮配蒜蓉包，老實講食到呢一味餸嘅時候，我同我朋友已經飽喇，所以直接打包。我就用咗少少嘅咖哩汁點咗件蒜蓉包食， 點都要親新鮮試下味嘅。食咖哩嘅餸菜最緊要梗係個咖哩汁啦，呢款咖哩汁唔夠香，辣度係可以嘅。蒜蓉包就麻麻地喇，包嘅軟硬度係適中嘅，但係因為佢唔夠熱，蒜蓉唔多蓉，唔夠蒜亦唔夠香。西蘭花炒鮮魷，呢味餸唔錯。佢嘅份量亦都好合適，西蘭花嘅口感好好，個汁嘅味道配鮮魷或西蘭花都好夾，個汁非常好食，汁嘅比例亦恰到好處。大致上餐廳分咗三輪出菜（3-1-2），一開始坐低出頭3個餸，中途出炸蠔，最後再出最尾兩個餸，個flow係ok嘅，但係可能佢一開始牛尾會有啲膩，已經有裹腹感，接住落嚟嘅餸菜亦都食唔得多喇，出第四道菜已經full晒要打包。建議可以換下出菜順序，甚至係少個肉，加個流質口感嘅dessert，如 jelly/西米/芋丸/凉粉之類，咁個set就完滿啲喇！呢間茶餐廳平時同一般茶餐廳一樣，唯一特別嘅係 每星期都會有一場live show， 茶餐廳入面大約可以容納36位觀眾，都有啲迫，啲伙計出菜成日撞到我張櫈，哈哈！但我諗都要視乎live band嘅規模， 如果對band嘅樂器/成員係多嘅話，或者能夠容納嘅觀眾數就會再少啲，想去聽live嘅就要留意， 一啲熱門嘅音樂人或者演唱者可能會好快爆場，好似今次咁就爆咗場，要下月再加場喇！茶記配live show確實係唔錯，遇到有興趣嘅表演者，我相信我再去幫襯嘅可能性都幾高。…Read More

以前日日食，但自從帶米返公司煮飯後就好少食，但係一唔煮又無約人同唔係星期日就一定食佢！今日係星期六，有糖水送。平時三餸一湯外賣係$29蚊，星期六有埋糖水都唔加價㗎！我本身唔係食齋嘅，所以會點啲比較薰食嘅素食料理，即係唔係純齋啦。呢間啲素食料理係比較濃味同油嘅，如果食齋嘅朋友就要點番比較傳統嘅羅漢齋會比較合適！本來我想order我的至愛～～菜甫叉燒炒蛋同椒絲腐乳炒唐生菜，點知两樣都無。最後點咗香煎美味鮮竹卷、椒鹽紫菜素鴨同金銀蛋炒菠菜。香煎美味鮮竹卷裡面全部係什菜，有沙葛（唔知係咪叫沙葛）、紅蘿蔔、白蘿蔔等等，應該落咗胡椒，少少spicy味，好乾身嘅，唔係有肉鮮竹卷咁濕濕哋嘅。但其實我唔鍾意食什菜，所以覺得麻麻哋，有其他揀我就未必會叫佢，對我嚟講係後備菜式！椒鹽紫菜素鴨ok嘅紫菜卷系腐竹入面，係叫腐皮定腐竹？？但無佢嘅素乳豬咁好食囉！味道全靠椒鹽。金銀蛋炒菠菜係第一次食比想像中好，菠菜好嫩嫩好滑滑，味唔重唔會好乾好咸。Very delicious糖水係腐竹薏米完全唔覺有腐竹，亦都唔係溶咗嘅感覺，唔算好味！同埋佢不嬲啲糖水係得七分滿，就算係送嘅我都expect佢多番少少會比較好，咁樣两啖就無好嘥個紙杯料嘅比例係ok嘅！個湯係南北杏煲青紅蘿蔔佢啲湯不嬲都出咗名係超多湯少，但我覺得個比例可能啲湯多番少少會好啲，而家兩啖湯跟住就半碗料～～我prefer七三比囉:)。…Read More

尋日有一位識咗成廿年嘅朋友約我食飯，我哋去咗呢間泰國🇹🇭台灣🇹🇼菜度食。之前已經食過一次台式同泰式菜，今次再去試一啲純泰式比較傳統嘅菜式，包括有泰式生蝦🦐、海南雞飯🐥、黃咖哩軟殼蟹🦀、蝦醬通菜🥙、蒜蓉包🥖同埋芒果糯米飯🍚。今次冇叫到台式，係叫叫吓唔記得咋！🖍️入到正題啦，開始講嘢食喇！首先講下泰式生蝦🦐。啲蝦🦐🦐好新鮮，賣相都唔錯上面。上面有蒜片同埋紅辣椒🌶️，紅辣椒🌶️呢我就無食，因為我唔係好食辣，本身個醬汁都已經係夠辣了，個汁好惹味，又唔算勁辣，我都食得入口。跟住黃咖哩軟殼蟹🦀🦀佢同我上次食嘅黃咖哩蟹🦀有好大分別，啖啖肉，咖哩偏甜，對於鍾意食甜嘢嘅我覺得好滋味。蝦醬通菜🥙就so far so good啦，冇特別嘅咩comment。蒜蓉包🥖就冇上次咁好喇，唔夠熱同埋燶咗啲。海南雞飯🐥呢啲飯質比較乾身，雞亦都係比較偏乾，個人嘅喜好係比較喜歡食多油嘅，所以呢個我唔會畀佢滿分，但有啲人鍾意食乾身嘅，佢就算好唔錯喇！最後係芒果糯米飯🍚芒果好甜無根，糯米飯好綿，分量作為甜品剛好，两個人食，唔會覺得頂住或好滯，食飽晒都仲食得落，好好味！我哋仲叫咗一支象啤🍻添好抵飲呀，16蚊💰一支咋！我哋一支兩份share，本身我唔係咁鍾意飲酒但係係咁以飲少少啦，高興嘛今次去比上次人多，都full咗大半場，全部卡位都爆滿，卡位坐得舒服，我都磨爛蓆到差唔多11點🕚，人哋收工先走，老朋友聚舊，仲要佢記得我就生日🎂，大🈵足。…Read More

話說沉日我要去愉景新城到做啲嘢，就喺荃灣西行咗個愉景新城。喺走嗰陣時諗住過眾安街食雞煲嘅時候，路過咗大鴻輝中心見到有大鍋口，咁跟住呢就行咗過去，喺樓下嗰度見到好多派街招嘅姐姐，其中小肥羊嗰個姐姐呢，就好熱心同積極，除咗派街招之外，仲有好多嘅推介包括咗有50蚊嘅coupon。畀我印象嘅好唔同，因為我未食過小肥羊，一直以為佢係貴嘢，所以姐姐話宵夜（9點半後）138仲可以减50，我哋就最後揀咗小肥羊火鍋喇。上到去比較有啲似一啲舊式嘅火鍋店，比較類似稻香啦，感覺上就比稻香會好少少，因為人唔多啦同埋，坐位亦都好闊落。佢有七款湯底可以揀，我就點咗麻辣雞鴛鴦鍋。跟住呢食品嘅種類亦都好多，我哋一埋位坐咗佢個卡位嗰度四人嘅卡位，坐兩個人係幾舒服嘅。佢有幾個唔同價錢嘅plan，咁我哋食緊宵夜就係138蚊加一，全單減多50蚊coupon。138個plan呢佢包括咗好幾款嘅羊肉啦同埋肥牛啦，仲有雞件啦鯇魚呀基圍蝦嗰啲，都係任食嘅。有好幾款嘅羊，唔知幾多A級嘅羊，但我唔識分。唔蘇… 都ok。另外仲送兩吋嘅羊鞍串燒喺出面嗰個公眾area嗰度呢，就有好多嘅配菜，包括有蔬菜、豆品、丸、粉面等等，每類都六七款。佢個豆品類真係多㗎，有豆卜啦魚豆腐啦鮮豆腐啦響鈴卷啦腐竹等，夾夾埋埋嗰度都有幾十款嘅配菜，仲有青口添，羊鞍串燒（每人得一串）、黃沙潤同魚皮好好食！仲有十幾款醬料比你任配。啤酒汽水係任飲嘅佢，仲有幾款嘅熟食，包括有炸雞翼、薯角等等，仲有甜品椰汁糕同埋桂花糕。我哋兩個人食埋單就折實254蚊，平均每個人120幾蚊，我覺得喺呢個價位嚟講，佢係算係幾豐富同埋幾抵食嘅。，畀稻香嘅性價比高。 服務方面呢你就唔好expect佢好professional或者係好高端嘅service啦。但係普遍嚟講都係親切嘅，因為佢啲員工都係比較上咗年紀啦，啲姐姐同埋個廚師都好好好nice。總括嚟講我老公同我都應該會再encore嘅，佢喺呢個嘅平價放題火鍋裏面呢都算係唔錯。…Read More

因為一啲事情，我老公嘅工作夥伴分別同一時間由關島同廣州嚟到香港。我老公做東道主請佢哋食晚飯。因為佢哋住喺太古同埋將軍澳嘅關係，我推介咗呢間喺砲台山嘅泰式餐廳畀佢。 我哋一行五人八點幾嚟到呢間餐廳，星期五嚟講呢間餐廳唔算好多人，直至攞到離開嘅時候，入座率都係得一半左右。可能因為地方較偏，同埋新開冇耐，所以未有人識，咁樣仲好，唔使同人逼，唔使等位就可以食到隱世美食。但其實佢距離砲台山地鐵站，只係六七分鐘嘅步行路程，一啲都唔遠。想嚟試下嘅朋友可以喺砲台山嘅A1出口出，向左手邊過對面馬路一直向左手邊緣轉彎位行，過咗巴士站過咗一條街跟住到過埋木星街，右轉入下一條叫水星街，行幾個舖位就到㗎喇。裏面嘅空間感唔錯坐得幾舒服，冷氣亦都好足夠。今次嘅菜單係由老闆發板，我哋分別試咗好多泰式同埋台式嘅經典菜式。呢間餐廳可以話集合咗台式同埋泰式嘅著名菜式，我哋分别點咗有頭盤嘅辣魚皮啦，泰式鳳爪啦，台式嘅蠔仔煎，烏頭魚，咖哩蟹，三杯雞，泰式小食拼盤。我哋仲叫咗兩個湯包括冬陰功湯同埋椰子雞湯，仲有甜品椰汁糕。另外我就試咗凍泰式奶茶同埋香茅茶。我原本想試埋佢個生蝦㗎，但係後尾好似叫得太多餸，所以就冇落order。個人覺得呢一間泰式餐廳系泰式菜方面係做得比台式菜出色嘅，佢雖然唔係泰國人開，但係啲味道好唔錯，食落亦唔覺有味精，同埋好切合到香港人嘅口味，絕對可以encore嘅。…Read More

原本想去 #大掌櫃 食一人一鍋買嘢遲咗無得食…… 嚟咗呢間隱世的 #東京一品拉麵好好味！！環境不錯，播著舒情的流行曲～需要係高枱為主，坐得都舒服，呢個鐘數，聽住歌可以好放鬆，一個人嚟都好ok。。（要呢個鐘數囉，人多就未必😂）（我今次两個人）佢晚市飯餐$45-47左右，拉麵餐就要$60，見到餐牌有$39下午茶拉麵就好抵食啦！！之前成日經過都想試，今日終於有機會。今日點咗咖哩吉列豬扒飯$45同豚肉拉麵$60, 吉列豬扒香鬆脆，又唔硬，勁正！！豚肉好好味。分量亦好足，跟埋嘢飲，yummy yummy***…Read More

話說我仲系度猶豫緊，有4個心水菜色，揀3個落order時候，我揀咗我至愛的乳豬，仲有茄子同素鴨，放棄了第2最愛的菜甫蛋(考慮沈日食咗好多蛋)。可能乳豬同鴨太類似，居然執錯number,無咗鴨，變咗蛋。係你始終係你，今次的出錯沒有想像中的不開心，反而好開心，唔洗我揀，帮我揀咗，哈哈，與蛋有緣。不過星期六唔係有糖水送咩? 我見張紙寫係薏米腐竹㗎，點解得湯嘅? 唔通送晒? 由佢啦，我都行走咗咯。始終無緣嘗嘗佢啲糖水，一次都未試過。…Read More

平時 egg mayo set 係$27， 宜家$20有Turkey加$8 egg mayo, 但無嘢飲。我一向唔飲汽水，就多$1可以多個餸，好抵，加塊chocolate cookie飽晒。唔好以為食包唔飽，其實好8飽㗎。超鍾意佢個egg mayo, double chocolate 同 chocolate cookie。…Read More

今日再食福祿壽，好方便，可以上facebook睇菜單，日日update。今日個滑蛋係涼瓜，唔食lu。 牛腩蘿蔔唔得囉，得半粒丸就叫牛腩，加得一小塊枝竹同無限多嘅蘿蔔，味道仲好一般。紫菜素鴨都ok, 都係素乳豬好食好多。我幾鍾意食呢間，平吖嘛，又唔遠，款式多，都ok好食。最好係佢嘅炸嘢，啲素鴨素乳豬真係款款唔同味㗎，唔係坊間所謂嘅深圳齋，一大包深圳做運嚟開包翻炸，似係佢哋自己整嘅。湯仲日日不同，星期六仲送湯送糖水添，$28 超級抵食啦。…Read More

呢間舖成日聽同事講，之前係搭單叫同事買，今日終於自己行咗嚟買。$25 2餸$28 3餸送湯仲有十幾個菜式任揀去邊度搵，仲要中環喎啲嘢食都好味㗎，餸菜仲好夠份量，反而飯真係算少。最鍾意就係佢個叉燒菜甫炒蛋同素乳豬，同事嫌佢油咗啲，我都可以接受嘅。…Read More

機緣巧合下見到一張poster有關呢間non-profit making既cafe, 與其話係cafe, 倒不如話係一個小小的聚腳地, 呢個site係12位志同道合既基督徒咖啡師開既。店里既環境好簡樸, 全部都係自己粉飾設計, 物資大多係來自有心人捐贈的, 有個小小的圖書角, 小朋友大朋友都可以放輕鬆嘆番杯咖啡, 同朋友聊聊天, 坐一日都可以。入面主要係提供coffee, 仲有少量的茶和小食, 全部都係免費既, 營運係靠大家自發捐錢, 有個叫益下家的設計, 鼓勵用餐者每次捐出$20請下一位朋友飲咖啡。啲咖啡好原汁原味, 可以試到好多好天然既咖啡好味, 唔識咖啡既都可以問吓咖啡師, 佢哋都好樂意介紹。聽其中3位咖啡師話, 佢哋仲有攪啲好優惠既咖啡班比青少年, 同埋店裡所用既咖啡豆都直接同窮困的咖啡農買, 沒有經過中間商家多番的抽水, 直接幫助農民, 咖啡師仲會親自去越南等地體驗咖啡農的辛勞, 好有意思。搵日可以帶埋小朋友去坐吓玩吓。…Read More

2月4日大年初八, 經朋友介紹下, 我哋一行10大4細嚟到位於大埔廣福道9號既一間隱世私房菜度食 steam steam鍋, 係我哋相識3個多月的第2次每月聚餐。未去之前, 朋友send咗3份菜單比我哋睇, 今次揀咗398。我淨係留意到第一行係steam steam, 當時完全唔知原來全程都係steam steam, 哈哈, 未食過蒸氣鍋, 大鄉里出城其實間私房菜唔難搵, 如果你蒲開大埔又識去廣福道既話。去到廣福道, 搵號碼會比較難, 未去過既可以搵呢個門口, 大埔鏢會x溢恒語言中心, 中間有條小樓梯行上去。(我諗因為好多私房菜都係有人去過, 一個帶一個咁介紹, 好少未去過就撞上去, 所以未必會系大街大巷有大招牌, 呢間食肆我就好似無見到個招牌, 見到一定selfie啦, 仲洗講咩)上去到一樓一梯兩伙, 右邊先見到嗰個唔係, 對面(即左邊)個門先係。係呢個門口喇, 㩒鐘啦!!地下入口、樓梯同門口都係舊樓嚟, 其貌不揚, 所以話佢係隱世呢, 估你唔到佢入面好鬼靚, 好時尚、簡約、舒適同好warm㗎(最鍾意係個厠所同個寶麗來wall)係咪好trendy呢? 坐系入面好舒服, 細路仔都有空間周圍走, 玩得好開心。今次專登p咗圖先upload, 因為人家影得太靚太pro, 我呢啲攝影二逼, 只好玩吓p圖搶吓鏡, 借寫食評機會乘機練吓P先到主菜喇, 首先係見到個元貝粥底系大圓枱既中間, 上面放咗第一味菜式, 有椰菜花墊底, 西蘭花同粟米圍邊, 上面舖半瞉鮑魚。食材好新鮮, 聽老闆娘講係每日9點去街市買既, 鮑魚好味唔在講, 粟米仲超級甜, 我仔仔食咗2舊, 叫晒 yummy第二味係叫刀貝蜆, 係外國貨喎, 都幾大隻, 一啖一隻啖啖肉, 好鮮甜, 完全可以唔點醬料。講開醬料, 唔記得講佢既醬料添, 簡簡單單幾款任你溝, 個賣相都好得, 要比讚左起係辣椒粒、葱花、蒜蓉同辣椒醬。仲有jar醬油的無影到。呢個蒸蟹好多羔又好多肉㗎, 唔係好識拆蟹, 雖然老闆娘有準備無數咁多把較剪同鉗, 但係我都唔識用, 最後要班救兵, 請隔離朋友仔幫我拆魚肚都吸咗味, 好好味。呢隻仲茜利, 啲羔同肉多到呢, 老闆娘仲教大家點分公乸。呢條朋友仔話叫呢2條叫沙巴龍躉, 我唔識㗎, 淨係知幾鮮甜幾好食囉。跟住到紅肉喇, 順序唔係好記得, 唔知係牛、雞、菜邊樣先。小牛排就咁蒸, 蒸牛排?? 好玄啊~~ 仲有橋妙㗎, 金菇墊底就梗係唔少得啦, 最重要係, 嗱, 有無睇到牛下面的小圖, 有手磨器㗎, 要落玫瑰鹽同胡椒食㗎, 未試過用手自己磨, 感覺超正, 估唔到咁好食。哎呀, 講咗咁耐, 唔記得講飲品添, 嗰度有飲品發售㗎, 不過今次我哋無飲一般嘢, 變咗去品酒。系嗰度嘗咗5支酒, 4支係專家朋友仔帶去既手工啤, 我完全唔識佢哋, 朋友講完我都係一頭霧水, 學另一位朋友仔話齋, 個口感係酸、苦、啡、黑(大嗰支開始順序數) 唔係唔好飲, 每款既味道都好獨特, 唔同風味唔同味道, 係完全四種唔同感覺嚟㗎, 係我個腦記唔到呢啲咁專業既野。(my favourite is the 3rd one, coffee taste) 啤酒送海鮮的感覺唔錯 我哋仲開咗支呢間店裡的香檳, 我暫且叫佢橙色銀河啦, 我都唔知係咩, 好靚, 都幾好飲, 好易入口, 似桃味汽水。嘉美雞係乜?? 我唔記得問, 食到呢度其實都已經8.9成 full, 所以食唔多, 松茸同雞都試咗少少, 雞好滑同好入味:)。哎呀, 呢味我無食到噃, 掛住去同阿仔換片, 哈哈~~最正既梗係要系最好啦, 個粥呀, 吸晒所有海鮮、牛排同菜既天地日月精華, 正到呢~~~~~~ 重要既嘢要講三次仲有呀, 仲有個糖水呀, 超鍾意食甜既我梗係唔執輸啦, 仲食咗2碗添, 下次試自己整先得。第1次食桃膠, 朋友解釋話係樹膠、樹脂之類的東西, 我第一直覺係, 風化千幾年同億多年後應該會變琥珀同蜜蠟, 哎呀, 比人話職業病添。唔係咩? 都係樹脂啫。總括今次的晚飯 係超開心、超好食、超輕鬆、超好玩, 今次試咗398, 但係我想食陳村粉喎, 下次一定要再encore, 叫老公開團試個498大滿足先得…Read More

同事一直大讚呢間好好食, 仲要一星期去兩晚, 攪到我鬼死咁想去食, 啱啱沉日行完百萬行, 班同事話想去食韮菜豬紅, 咁就嚟咗祥利喇。坐低原來打冷嘢要夜晚先有, 即係無韮菜豬紅囉, 同事叫咗仔粥同砵仔焗魚腸, 我仲叫咗我去到邊度, 有就一定會嗌既炸餅同炸大腸(佢係椒鹽白飯魚併的), 想加個菜, 大廚推介蝦乾炒菜苗。因為係下晝2點幾, 我哋係落場前最後一枱客, 佢上菜真係傳說中好快㗎, 仲好熱添。老實講, 打冷店嚟講, 佢就唔算乾淨喇, 地下好滑, 我覺得坐得唔係咁舒服同放鬆囉, 平時去街邊打冷可以好hea㗎嘛。仔粥 : 同事叫走芫茜, 我諗有芫茜其實會好食啲, 我唔食醃菜的, 佢落超多冬菜, 喊到苦, 湯唔多, 飯就多, 係飯呀, 一粒一粒好硬既飯呀, 與其叫佢仔粥, 我諗叫佢冬菜仔泡飯會比較適合, 不過仔都算多既 (呢個大既$70, 仲有中既$60, 細既好似係$45)炸餅: 仔唔多, 而且好細粒, 蛋同粉就好多, 炸得係靚㗎, 不過燶咗啲, 邊亦無。仲有佢個魚露係十級咸, 得個咸字, 無其他味, 所以好鍾意食既我, 食咗一角仔就放棄咗, 無魚露又失色嘛, 如果要食炸既, 食過既商舖中我會推介北角七姊妹道既阿一豬扒酸辣米線既炸餅, only炸餅咋, 佢啲米線無咩特別, 都幾多人排隊㗎。蝦乾炒菜苗: 咸囉, 同埋同事話呢啲叫菜苗咩? 成條芥蘭咁粗既??砵仔焗魚腸:(: 好多魚肝, 好少魚腸, 至少我一大匙插落去食唔到魚腸囉, 好乾身, 可能因為我淨係食到肝, 食唔到腸, 個邊鬼死咁燶又硬, 入面就得肝, 唔好食。椒鹽白飯魚併炸大腸: 呢個就一般般啦, 算係唔錯, 不過又唔叫得上好食, 大腸都夠脆, 味道都可以, 椒鹽白飯魚就都係嗰個魚露出事囉, 要系呢度食炸嘢, 自己帶支魚露去先好點菜, 哈哈。炸大腸我推介泉章居。班同事個個系度話好食, 係我覺得好唔ok, 出到去門口我先系度講每個菜有咩唔ok, 佢哋和議㗎喎, 但係依然覺得抵食好食, 我覺得係因為啲菜色比較少見, 香港唔係度度有得食, 搵到一間有既就覺得好喇, 據我話呢, 屋企阿爺整既魚腸蒸蛋好食過佢多多聲啦, 佢既炸大腸亦不及泉章居, 餅亦不及阿一豬扒, 如果要食呢啲菜色, 其實深圳大把啦, 我上開惠州陳江, 食開間新鐵涌好味大多喇。睇吓你同邊度比, 系香港既話, 咁既質素可能好多人已覺得滿足, 因為食唔到嘛, 物以罕為貴啫, 唔係因為好食囉。我就唔會再encore囉~…Read More

運作依然有點未純熟, 但人流不錯啊.. 我去到時2點幾3點, 爆場架, LUNCH SET 三十幾蚊, 都幾抵食丫!! 嘢食都依然係好有水準~~ 希望佢既營運流程、服務同設備配套可以快啲優化吓啦!! 今次係我兩公婆、我奶奶同兩個BB(2歲同4個月), 仲有一對五六十歲既COUPLE朋友一齊去!! 對COUPLE朋友退咗休LU, 本來係系外國唐人街開中國酒樓既, 佢都哋都覺得啲嘢食好OK! 我老細沈晚去食, 佢就話好味, 但係D定價一盅既好唔抵, 一窩既好抵, 覺得佢定價有啲奇怪囉~~講番嘢食: (有個好好好好味既腰果露唔記得影相, 腰果露要試呀~~)…Read More

今日係呢間料理新店開張之日, 經營既不足在此不提, 只講嘢食!!  一家大細包括一位70歲既老人家, 我俩公婆同兩個小朋友, 一個2歲一個4個月!! 總括係好食既, 值得一試, 只係運作流程等未純熟, 有好多嘢需要fine tune囉~~ 價格ok, 平均每人幾十蚊可以落到樓, 食豪啲都係百零蚊啫~~…Read More