fattyfatttyy's Profile

我哋星期六18:34入座，限時90分鐘，用餐時間去到20:04。18:38落單嗌咗鹽燒牛舌、鹽燒牛小排、燒白鱔、同日式叉燒手打烏冬。第一樣嚟嘅係叉燒烏冬，味道正常。之後一直等，等到19:18都仲未有一樣串燒上到枱，我哋都明串燒要啲時間去燒嘅，但足足成40分鐘都未燒到出嚟！真係忍唔住同店員催單啦，19:20佢就上咗碟鹽燒牛舌，牛舌食落普通，一串仔賣$48，唔係平，仲要等42分鐘，完全唔值！！！😠好啦，諗住牛小排同白鱔應該都會跟住出啦，結果係諗！太！多！😠😠19:35落單個系統已經顯示：「你的點餐時間已過，請繼續享受你的餐點」 😠😠😠19:39 落咗單足足60分鐘，都仲未見到牛小排同白鱔呀！我哋決定埋單走人！😡伏伏伏！超級大伏！入咗嚟60分鐘，冇嘢食，仲要嬲住走！😡😡繁忙時間有限時，我係理解嘅~但你出唔切餐，又要限時，仲要提早截單，真係不能接受！ 價錢唔係特別平，質素唔係特別好，仲要浪費自己嘅時間，奉勸各位三思呀⋯⋯…Read More

自家製龍蝦汁蟹肉寬麵條 $178龍蝦汁好香，而且蟹肉份量足，食到最後仲可以用塊麵包嚟沾醬食，讚👍🏻 寬麵條軟硬度適中，口感彈牙😋卡邦尼手工圓粗麵 $138呢到嘅卡邦尼比起平時食到嘅唔同，可能係用嘅芝士唔同？芝士味超濃郁～ 圓粗麵嘅質感比寬麵條唔同，但都係有咬口嘅，值得一提嘅係佢嘅豬腩肉粒，煎到好香脆，食到唔停口😆炙燒白松露雞翼 $58雞翼好juicy嫩滑，有淡淡嘅松露香氣，好食👍🏻百香果菠蘿桂花烏龍茶 $42〰️〰️〰️〰️〰餐廳極具人氣，好彩我提前一日book到位，當日眼見好多人都因為冇book位而失望而回。餐廳嘅食物質素唔錯，手工意粉係好食嘅，但味道未到驚艷，反而雞翼做得好好，好少地方會做到又滑又多汁，呢個幾有記憶點👍🏻餐廳要自己係門口scan menu，然後出去cashier先落order，用完餐再出去cashier俾錢嘅，算係半自助形式？所以冇乜服務體驗可言，但照樣收足你加一服務費㗎😆〰️〰️〰️〰️〰️食物: 4/5性價比: 3.5/5 環境: 4/5服務: 3/5Revisit: Maybe〰️〰️〰️〰️〰️…Read More

雅 黑毛和牛盛合（二人前）$998盛合有鹽味牛舌、和牛腹前小排、黑毛和牛內橫膈膜、和牛西冷、特上牛胸腹肉、黑毛和牛上肋骨中肉。整體質素唔錯，腹前小排肉質軟腍，肉味香濃；而和牛西冷就比較重油脂，入口即溶。醃製嘅醬汁調味好好，唔會過鹹，唔洗額外沾醬都好味。加配紫菜飯 $38食燒肉一定要配飯先冇咁膩，但呢碗紫菜飯太令人失望😞 啲飯太軟腍，再撈埋溫泉蛋，成碗飯超濕，好難食👎🏻〰️〰️〰️〰️〰餐廳嘅肉類質素幾好，有和牛嘅肉味，而且基本上肉質軟腍，唔會有筋咬唔開，視乎返部位多唔多油脂，會唔會入口即溶。餐廳仲會送每人一客甜品，杏仁奶凍同雲呢拿糯米糍，我本身唔食杏仁同雲呢拿，所以冇特別加分🫢值得一讚嘅係餐廳嘅抽風幾好，食完都冇油煙味，而且環境乾淨，唔會黐黐立立。〰️〰️〰️〰️〰️食物: 4/5性價比: 3.5/5 環境: 4/5服務: 3.5/5Revisit: Maybe…Read More

醬油蝦濃湯麵 $118配菜有2隻醬油蝦，蝦肉實淨爽彈，而且味道醃得好好；上拉麵時店員會落一圈蝦油，增加湯麵嘅香氣；面層有一層泡沫，呢個泡沫都帶有蝦味，湯底唔會死鹹，又唔會有臭嘅海鮮味，配埋櫻花蝦，每一啖湯都充滿濃濃嘅蝦味，好香好好飲😋 拉麵質感正常，冇乜驚喜，反而刀削麵煙韌有嚼勁，鍾意有口感嘅朋友可以叫刀削麵試下～〰️〰️〰️〰️〰餐廳座位唔多，大概得6張枱，我哋係星期六13:30到，等咗半個鐘左右。未入座嗰陣，店員已經比餐牌我哋揀麵先，入座後就唔洗等咁耐～蝦湯底真係好濃好香，令人一啖接一啖咁飲，飲完又唔口渴，正呀，大推😍 仲有醬油蝦已經事先剝咗殼，好貼心，加分👍🏻餐廳免收加一，食物質素係對得住個價錢嘅，順帶一提，餐廳只收現金。〰️〰️〰️〰️〰️食物: 5/5性價比: 4/5 環境: 4/5服務: 4.5/5Revisit: Yes〰️〰️〰️〰️〰️…Read More

醬香味烤魚（淩波魚）$298配大白菜 $30店員推薦淩波魚冇咩細骨，食魚唔算好叻嘅我哋就揀咗淩波魚，的確係容易食嘅，但魚肉就普通，食唔到魚嘅鮮甜味。我哋仲加咗一份大白菜，店員上菜嘅時候話大白菜已經加咗係底，一開頭比條烤魚吸引住，係咁食魚，食食下先醒起啲大白菜，搵匀成盤魚，反埋條魚，先搵到5片菜碎，但收我哋$30，定價完全唔合理。黑椒杏鮑菇 $48杏鮑菇味道唔錯，仲好juicy，幾好食。〰️〰️〰️〰️〰關於嗰幾片大白菜碎（有圖：一隻匙羹裝得哂），我問店員：「係咪本身嗰鍋有少少大白菜，我另外加嘅菜係未落嗰鍋到？」店員答：「呢款醬香烤魚係冇白菜㗎，你散叫嘅已經加咗落去，係咁少㗎。」然後佢指住鍋裡面嘅蔥：「呢度咪有菜囉。」我唔肯定佢係咪試圖魚目混珠咁耍我，但佢仲同我講啲菜煮得耐會溶，叫我嗌多一份$30嘅大白菜嚟睇下，就會知真係份量咁少⋯⋯（無言)之後我同經理傾，經理見到我鍋裡面嗰幾片菜碎，就即刻叫店員拎一碟大白菜比我哋，仲話：「唔係咁少㗎，唔好意思，可能廚房嗰個今日第一日返工。」後尾嚟嘅大白菜份量我唔會話抵食，但至少係合理嘅。建議如果去試呢間餐廳，唔好一開頭就話要加配菜，嚟咗條魚先再另加會好啲，起碼佢另外上比你，就唔洗懷疑究竟係個鍋本身有，定係份量真係咁少🥲平心而論，餐廳食物味道唔差，烤魚係好香好惹味嘅，但配菜就⋯⋯餐廳嘅裝潢係走型格風，用哂紅色嘅燈，行cyber路線？但其實啲燈搞到我睇餐牌都有啲難度，係手機掃code睇menu反而清晰啲。另外值得一提嘅係，餐廳嘅抽風系統唔夠，一入去就已經聞到好大陣烤魚味，食完都係原汁原味咁行返出嚟，行街行成日都未散到陣烤魚味。如果介意自己全日都係烤魚味嘅話，建議唔好嚟😅〰️〰️〰️〰️〰️食物: 4/5性價比: 2.5/5 環境: 1.5/5服務: 1.5/5Revisit: No…Read More

焦糖芒果芝士蛋糕酥 $88表面有一層好厚嘅焦糖，好脆口，但略嫌偏厚過甜；千層酥好脆口，有牛油香，而且唔油膩；內餡有滿滿嘅芒果粒同芝士蛋糕，雖然話係cheesecake，但佢係流心嘅，係流心版嘅Crème Burlee，味道酸酸地，可以平衡返焦糖脆面嘅甜度。〰️〰️〰️〰️〰呢個係Bakehouse 6週年限定嘅新品，只限1月係灣仔本店先有，雖則話每日2點出爐，限50個，但今次我哋係平日下午3點左右都遇到佢啱啱再出爐，好好彩。呢個Mango Brûlée Cheesecake Danish唔係唔好食，係定價太高，性價比極低，如果佢賣$58，我可能會再買嚟食，但$88真的不了，我都係食返佢$12嘅Sourdough Egg Tart就夠了🤣〰️〰️〰️〰️〰️食物: 4/5性價比: 1/5 環境: 4/5服務: 4.5/5Revisit: No for this Cheesecake Danish〰️〰️〰️〰️〰️…Read More

招牌牛柳餐 $142叫咗5成熟，熟度啱啱好，肉質粉嫩軟腍。美國牛小扒餐 $188都係叫咗5成熟，肉質粉嫩，同牛柳比較就會肉質感重啲，但都冇筋唔會靭，肉味亦都比牛柳濃郁，私心鍾意牛小扒多啲👍🏻〰️〰️〰️〰️〰餐廳比起傳統扒房光猛啲，闊落啲，感覺衛生環境比較好🤣鐵板餐配牛油餐包、餐湯同餐飲，傳統扒房我一定飲羅宋湯，經典酸酸辣辣嘅味道唔係普通西餐廳可以整到，呢度嘅羅宋湯都唔錯，惟一唔夠經典嘅係個餐冇甜品，細細個食扒房都一定會有彩虹朱古力碎裝飾嘅雪糕球㗎嘛，呢到爭咗少少🤏🏽〰️〰️〰️〰️〰️食物: 4/5性價比: 4/5 環境: 4/5服務: 4/5Revisit: Yes〰️〰️〰️〰️〰️…Read More

1. 餐廳職員服務態度非常差點單時，幾樣菜式都售罄，再問職員有咩菜式有，職員答：「你嗌嗰幾樣嘢冇囉。」態度非常惡劣。我哋叫咗片皮鴨•鮑魚•龍蝦超值回饋宴，套餐有椰汁馬豆糕，後尾上甜品時，職員聲稱椰汁馬豆糕已售罄，要轉咖啡糕或杏仁茶。 我哋一開始就已經點咗呢個餐，唔係應該已經留起比叫咗套餐嘅客人咩？點解會話賣哂？會預唔夠份量？再者，我哋要求要同店長傾，職員講：「你叫店長都冇用㗎啦！」咖啡糕同杏仁茶我哋真係唔啱食，問有冇紅荳沙，職員再講：「今日啲紅荳沙唔靚，食咖啡糕啦！」呢啲究竟係咩態度？餐牌嘅嘢食貨不對版，19:30嚟到已經有幾樣菜式話賣哂，食到最後竟然連餐嘅馬荳糕都冇！個餐一早已經叫咗，竟然話賣哂，而且態度仲要咁差。2. 嘢食份量少又唔好食我哋今次一行9人，叫咗12人嘅片皮鴨•鮑魚•龍蝦超值回饋宴，原本諗住食唔哂就打包，點知我哋食完個餐，都完全唔覺得飽，之後再要散叫多2個飯同一個餸先頂到肚，佢個12人餐份量會唔會少得可憐⋯⋯個餐啲嘢食味道仲要好淡，個雞絲羹仲要怪怪地味，真係飲唔落。中肯啲，散叫嘅嘢味道就還可以，但個餐就完全唔掂呀！總之今次體驗非常差，請我去都唔會再去！…Read More

脆皮無骨雞排 $38雞排好大塊，而且即叫即炸，超級辣手🤣 炸粉脆口，但偏硬身，唔係酥脆嗰隻炸粉，雞排肉質嫩滑有肉汁，幾好食👍🏻脆皮杏鮑菇 $25杏鮑菇大大粒，而且好多汁，好食😋〰️〰️〰️〰️〰小店所有食品即叫即炸，新鮮熱辣，大概要等十幾分鐘。調味粉有7隻味揀，可揀2款：原味、辣味、芥末、麻辣、梅子、海苔、芝士。台式炸雞排嚟講呢間有質素，可encore! 依家喺旺角同荃灣都有分店啦，終於唔洗走到咁遠啦😛〰️〰️〰️〰️〰️食物: 4.5/5性價比: 4/5 環境: 3/5服務: 4/5Revisit: Yes〰️〰️〰️〰️〰️…Read More

特上吉列豬扒豬柳定食（二人前）$468吉列豬扒帶有油脂，脂肪分布並唔均匀，食到邊邊嘅肥膏位會好膩，但肉質較豬柳軟腍；炸粉係脆口嘅，不過好鬆散，一咬炸粉就同舊肉分離，而且未係好做到酥脆嘅感覺。每個套餐都包白飯、麵豉湯、漬物同生果；白飯同椰菜絲仲可以免費refill添。椰菜絲配上柚子汁或紫菜汁，食落好fresh，可以balance返食吉列豬嘅油膩感。〰️〰️〰️〰️〰餐廳主打食吉列，但我覺得吉列嘅質素未算好出色，炸粉粉漿偏厚，而且一咬就會皮肉分離，普普通通。店員嘅服務都好好，會主動問要唔要refill白飯或椰菜絲，雖然都好進取咁問我哋會唔會join會員，但會比足空間你諗同埋唔會死sell爛sell，唔join都唔會轟炸你😂特別一提係餐廳會收$9一位茶錢，係日式餐廳嚟講都比較少見，如果介意嘅話，就自己衡量下😅〰️〰️〰️〰️〰️食物: 3.5/5性價比: 3.5/5 環境: 4/5服務: 4.5/5Revisit: No〰️〰️〰️〰️〰️…Read More

柚子鹽味撈麵 $89配料有雞肉、紫菜碎、生雞蛋、柚子、筍等，雞肉唔算柴，柚子味好清新，不過味道有啲單薄，後尾加咗黑胡椒同醋就冇咁寡。同埋唔知係咪冷麵嘅關係，個麵比較硬身，唔係彈牙煙勒嘅口感😔山椒麻辣撈麵 $129配料有叉燒、肉燥、筍、豆腐、紫菜、溏心蛋等，都幾豐富。麻香味突出，食落去好似麻婆豆腐醬嘅味道，會令人上癮，一啖接一啖咁食，而且好夠汁，唔夠飽可以免費加白飯，撈埋啲汁好惹味，好食👍🏻〰️〰️〰️〰️〰餐廳有撈麵四步曲嘅guide：第一，先將醬料攪勻；第二，食咗三分一後，加黑胡椒；第三，食咗三分二後，加Kokoro 秘製香醋；第四，吃完撈麵後，可免費加白飯，變成肉燥飯😋餐廳質素唔錯，不過份量偏少，要加白飯撈埋先有少少飽嘅感覺，性價比唔高。裝潢方面，餐廳都係日式木系風，簡單輕鬆為主，地方就比較細，冇乜隱私度。〰️〰️〰️〰️〰️食物: 4/5性價比: 3.5/5 環境: 4/5服務: 4/5Revisit: Maybe…Read More

燒肉酒場羊肉大盛 $298（羊柳、羊頸柳、羊腿、羊卷肉、羊腩、羊後膝）全部都有羊肉味道，但唔會太羶；印象最深係羊腩，juicy得嚟又有咬口，但一啲都唔柴。燒肉酒場牛肉大盛 $298（厚牛舌、牛板腱、牛小排、牛肋條、橫格膜、牛肉片）牛嘅質素好一般，基本上肉質都偏靭，又有筋，唔推薦。〰️〰️〰️〰️〰餐廳唔係主打普通嘅日式或韓式燒肉，而係以圓拱型嘅烤爐配上洋蔥、椰菜等嘅北海道成吉思汗烤肉。既然係賣北海道嘅烤肉，咁就一定主打羊肉啦，餐廳嘅羊肉種類都唔少，仲有羊心、羊肝等內臟，如果鍾意食羊嘅朋友仔，不妨嚟呢度試吓，羊肉質素都唔錯~ 如果只係食牛嘅話，就可以放棄呢間，因為有好多餐廳牛肉嘅質素都比呢間好🫢今次係星期六13:30到餐廳，只有我哋一枱客，可能係冇乜人係呢段時間食烤肉？😆 Openrice提早book枱仲有7折，不過$25餐前嘅椰菜絲沙律同圍爐蔬菜就冇得減啦~〰️〰️〰️〰️〰️食物: 3/5性價比: 3/5 環境: 3.5/5服務: 4/5Revisit: No〰️〰️〰️〰️〰️…Read More

酥皮筒 配2款配料+1款醬汁 $58(布朗尼/麻糬/蜜糖)酥皮筒酥脆但冇牛油香、布朗尼好重朱古力味、麻糬少少煙韌但冇味，配料全部都好普通，冇咩記憶點，蜜糖嘅份量好少，接近3分2杯乳酪都係食緊原味⋯⋯ 乳酪酸酸地，唔會太甜，味道都幾好。〰️〰️〰️〰️〰小店裝潢係有用心嘅，走小清新風格，仲有紅磚牆比客人打卡用，店舖非常細，最多容納4個人排隊點餐，所以店外經常有人龍😅 總括嚟講，配料普普通通，乳酪味道都唔差，但小店位置唔算好方便，路過嘅可以一試，我自己就唔會專登過嚟食啦😗〰️〰️〰️〰️〰️食物: 3.5/5性價比: 3.5/5 環境: 4/5服務: 4/5Revisit: No〰️〰️〰️〰️〰️…Read More

越式法包 $50法包饀料有豬手、扎肉、醃蘿蔔、青瓜、蕃茄同肝醬。麵包新鮮熱辣又脆口，質感唔會過硬👍🏻 豬手肥瘦適中，唔油膩，而且切成粒狀，增加咗口感；肝醬係老闆親自調製嘅，唔腥，但略嫌唔夠香。〰️〰️〰️〰️〰基本上小店係冇堂食，只係有2張櫈仔比你坐係舖入面涼吓冷氣速食，我哋去到嗰陣咁啱有客坐喺舖裡面食緊，老闆好好人，叫我哋唔介意嘅話，可以企係佢前面cashier位食，仲夾埋一部風扇仔比我哋吹吓☺️小店得一款法包同三款飲品，我哋只係叫咗一個法包share，老闆仲好貼心咁幫我哋分咗2份，等我哋易啲食。味道上嚟講，之前介紹過嘅葱仔比較出色啲，但呢間嘅法包味道唔錯之外，仲食得到老闆嘅用心，係一間值得支持嘅小店😌〰️〰️〰️〰️〰️食物: 4/5性價比: 4.5/5 環境: 3/5服務: 5/5Revisit: Yes…Read More

海老愛食者拉麵 $148每日限定15碗嘅拉麵！我哋13:30去到仲有！拉麵一上枱都覺得好澎湃呀！有赤蝦、蝦頭、櫻花蝦，蝦頭食落唔腥唔臭，咬落個殼仲脆口，唔會唔新鮮；赤蝦係炙燒過，有燒過嘅香氣之餘，仲食到赤蝦嘅甜味！湯底有濃濃嘅蝦味，同櫻花蝦嘅香味，絕對唔係死鹹又臭嘅蝦湯，好飲👍🏻叉燒拉麵 $98叉燒比基本拉麵多2倍叉燒，叉燒肉嫩唔柴，不過冇咩味；溏心蛋熟度剛好，有蛋汁；湯底揀咗濃湯原味，飲落濃厚，好香豬骨味，但唔會鹹。拉麵雖然有質感，但咬落會糊口痴牙，煮得過熟，扣咗分。〰️〰️〰️〰️〰拉麵湯底好飲，濃郁之餘，食完都唔覺得口渴；海老愛食者嘅赤蝦亦都好好食；但失色嘅係個麵，食拉麵，主角當然係個麵啦，糊口嘅麵真係唔得！所以其他嘢質素幾高都好，都未必會回訪！餐廳免加一，計落其實唔算貴，而且平日lunch time仲送汽水，路過唔洗等咪試下囉，話唔定今次個麵咁啱失手啫🤭〰️〰️〰️〰️〰️〰️〰️〰️〰️〰️食物: 4/5性價比: 4/5 環境: 4/5服務: 4/5Revisit: No…Read More