馬克斯's Profile

先由結論講起，佢嘅雞煲真係唔出色，但以任食邊爐計就係唔錯嘅。深水埗食雞煲地方真係好多，求其去間傷X酸辣粉都有雞煲食。紅火雞煲開左好耐，但一直有種烏煙瘴氣感覺所以無幫襯。今日兩公婆食飯揀咗呢間，部份原因係為咗發晦氣。一黎到叫左個招牌雞煲，兩個人半隻雞真係唔多夠食。味道方面，佢唔算淡口，但又無其他知名雞煲店做得咁惹味，有啲尷尬。食完雞加湯打邊爐，可能本身雞煲個汁太少，烚親乜嘢都係淡茂茂。但係佢啲食材都真係食得出幾靚，內臟類無乜腥味，田雞新鮮，蝦滑彈牙（但海蝦有啲糜），脆骨腩爽口，金錢肚牛筋都合格。最驚喜係普通任食肥牛會俾牛板腱，雖然唔係塊塊都係，但整體都優質過一般注脂牛或者急凍疆屍肉。雞煲做得麻麻，火鍋料靚頂盡都係俾個中等評價。但我留意到每次叫啤酒老闆都會順手幫你添酒（仲要係免費任飲啤），呀姐跟枱執碗加湯都跟得好足，係香港食店越黎越小見嘅服務禮儀，呢個位我係加咗幾多印象分。其實除左雞煲外佢都仲有幾他湯底，所以唔會再食佢嘅雞煲，但都唔排除為咗任食邊爐再幫襯嘅。PS:任食邊爐生料要填紙仔，真係寫幾多數字就俾幾多件你，但寫多啲佢都數番夠份量俾你，因為佢真係好怕浪費食材。…Read More

一間門口掛滿大紅燈籠嘅咖喱專門店，感覺有啲獵奇，令人幻想中式咖喱到底會係點。今次叫左兩款生咖喱，羊同埋豬膶，落完單後師傅即刻開鑊煮，都算比較少見。咖喱味道的確同日式、印度有啲分別，多洋蔥就有少少似巴基斯坦，但佢加埋花椒八角一齊煮，辣度都偏高，應該係老闆自創嘅風格。咖喱豬膶配搭幾有新意，效果我就覺得一般般。咖喱羊就做得幾好，可惜餸嘅份量真係好少，比例可能仲少過銀咖喱，連熱飲開價近百蚊，定價有啲進取。雖然定價偏貴，但店內兩隻貓貓都非常親切，見到每位客人都會主動打招呼，甚至會坐喺身傍陪你食飯。如果以幫襯貓Cafe嘅心態就會覺得價錢合理晒😹…Read More

Menu選擇唔多，店面空間都唔大，感覺好似一間專食蟹dish嘅日式拉麵店。海鮮拼盤好食嘅，但唔夠驚喜，唔睇價錢當個頭盤都幾fresh，budget有限可以skip。特濃蟹粉拌麵真係好正，撈之前先逐碟試番晒每個小碟，發現不論蟹公膏、蟹乸膏、蟹油都各有特點，唔係同一種味道。撈埋一齊其實蟹粉掛到麵，唔明其他食評點解咁講。最後推介蟹粉黃魚湯，魚味好濃，飲到尾好大啖蟹乸蛋黃膏，飲完會想encore。貧窮限制想像，呢個價位係尖咀絕對可以食垃圾，呢餐質素我個人覺得對得住價錢。…Read More

話說去開荔枝角想搵野食，開openrice 睇下見呢間咁少負評，直覺唔好食都應該唔會差得去邊，穩陣起見都係見兩碗麵試水溫。兩碗麵皂水味都好重，我會形容呢啲叫港式日本拉麵，當然唔少得港式拉麵常見配置既粟米粒，去到呢度都知已經衰左。地獄拉麵，辣就係辣，但感覺係師傅唔小心甩左個蓋倒多左辣椒粉果種辣，可以形容為味精辣，質感味道都無深度可言，感覺上三哥果種辣還比佢優勝，其他方面無咩值得評論。另一碗Ankake拉麵，英文叫Sticky soup ramen，店員同我講其實係醬油拉麵，仲煞有介事同我講個麵已經「改良咗」無咁杰。黎到果然無呃我，真係唔杰，真係一碗港式醬油拉麵，然而我真係唔知邊一忽sticky。食拉麵唔好食我大可當自己去左搵三哥，但兩碗麵開價七十幾蚊碗，其實都幾離譜，基本上去foodcourt俾四十幾蚊都係呢啲質素。…Read More

相比令人嘩同然既驚嘆，金蘭花果一種地道風味、親切感覺，更加令人齒頰留香、令人懷念。今次無叫到比較特別既菜式，只係叫左常見不過既生蝦，蝦餅，炸點、柚子沙律同芒果糯米飯，地道泰國風味與泰國當地餐廳無異。三五知己把酒談歡感覺輕鬆自在，溫馨環境完全配合私房菜主題。用咗openrice提供訂位優惠，唔駛等位仲攞埋九折，性價比再次提升。隔離台有壽星慶生，店員唱住泰文生日歌、端出芒果糯米飯做既「蛋糕」，歡樂氣氛連其他食氣都感受到。如果只追求簡簡單單既泰式地道風味，坐得舒舒服服享受一頓晚餐，金蘭花總算交足功課，有機會必定會再次encore。…Read More

今年情人節本來預左花費一千蚊左右，但因為買俾女友既禮物重手得滯搞到剩番既budget所餘無幾。之前都有諗過去Z字頭果間食，財政情況唔容許下最後都係放棄左，之後去S字頭果間望望，加埋10%SC勉強俾得起，但係望過menu之後覺得個set 好似太簡單五百零蚊好似唔係咁抵。正當我地面臨要去老麥食情人節大餐之時行過Wildfire Fresh，望過餐牌298其實都唔錯，只係我女友嫌佢有d似快餐店唔係咁like，不過相比要係老麥食dinner佢最後都係屈服入左去，而我亦估唔到坐低之後佢又會鍾意番間餐廳。入到去第一時間係要搵位同埋排隊俾錢落order，真係好似係大家樂食野咁(甚至連餐具都要自己去櫃枱拎)，作為一個情人節dinner呢一part係比較失色，不過之後佢都係會幫你上菜大家唔駛咁擔心。裝修方面亦都唔算太差叫做幾整齊。首先黎既係house wine，個人黎講本身對紅酒冇咩研究但係入口感覺都算ok唔會太酸太澀起碼好過酒樓果d。之後一次過黎晒什錦拼盤同埋兩碟主菜，忽然間張枱好充實。什錦拼盤有炸魷圈、蒜香雞翼、沙律醬炸青椒同蒜蓉包，唔算好特別。主菜方面pizza亦只係波蘿火腿，簡單得黎味道都ok，但我估唔到"sweet heart pizza"原來真係整左個心形薄餅出黎幾有心思喎，算得上係睇得又食得既菜式。另一個主菜係大蝦露筍磨菇汁意粉，我覺得清淡少少但我女友就話好味。最後dessert 係石板街朱古力蛋糕同果仁cheese cake，反而成餐飯我最鍾意係呢兩樣。整體黎講除左價錢之外其他最多都係B級水平，同埋隔離枱兩個小朋友比較嘈，後面又有一兩對等緊位既情侶望住你食飯感覺唔係太好。不過相比起其他食水深既餐廳幾舊水一位仲要食唔飽，而且因為某D餐廳名氣太大客人太多以致侍應分身不下招呼不週可能六七百蚊只換黎一肚氣。有時簡簡單單係環境唔太差既地方食一餐淡得黎有心思既晚飯都唔錯，女仔食得開心男仔俾錢唔肉赤先係最好既結果(食滿二百蚊仲有兩張回程船飛送，船飛24蚊位變相餐飯平左54蚊)。雖然我都覺得自己好似幾硬銷，不過我見其他人大多介紹同區比較貴既餐廳，同時呢間餐廳冇人寫食評，所以我想係度提供番個較為經濟既選擇。各位學生哥或者情人節唔想駛太多錢既朋友不妨考慮下。PS: 呢間餐廳大節日唔會規定一定要食SET，可以照樣order平時提供既菜式。…Read More