rav4's Profile

基於種種原因，小弟最喜愛的小店──北正宗已撤出新蒲崗。但憑着老闆Ray那堅毅不屈的精神，已極速找到新地點重新開業！新店位於旺角新世紀廣場三樓的食代館。菜式不及舊店般多元化，現以粉麪為主，還幸幾道招牌美食仍有供應。這天就跟老婆來吃個晚飯。小弟以前到舊店也是吃其招牌北越菜式，還未到「澱粉質環節」已十二成飽，故甚少吃粉麪。說來慚愧，這道海防鮮蟹肉蟹湯金邊粉也是小弟第一次品嚐。先喝一口蟹湯，番茄味香濃，而且非常鮮甜！金邊粉是越式闊身的，有咬口；加上鮮蟹肉、芽菜、豆卜、九層塔、鵝蒂等，味鮮富層次，好吃！ 點選粉麪，可以優惠價錢選購一款小吃，選了兩隻牛油雞翼。雞翼皮脆肉嫩，加上惹味脆蒜，邪惡無比！本想試燒牛柳撈檬，但又想多吃一點招牌菜，吃不了那麼多粉麪，老闆娘特意把撈檬改為沙律，非常貼心！燒牛柳鬆化味濃，份量十足；沙律菜新鮮爽脆，伴以酸汁，清爽開胃！ 這次點了扎肉餅作小吃，扎肉餅彈牙可口，只欠一瓶河內啤酒！這道北正宗名物──燒鵪鶉是小弟必點的菜式，鵪鶉鮮嫩甜美，烤至焦香，美味至極！店子新開業，起初也擔心客源的問題。但這晚一直也有食客光顧，似乎也不成問題！無他的，小小的舖位，有四大煲湯底。也不知用上多少隻雞和多少斤牛骨來熬湯，難怪湯底如此鮮味！有麝自然香，美食當前，一定能吸引各方食客光顧的。…Read More

也有好一段時間沒有來雅士了，今晚去到，發現換了一班新侍應，問一問經理，另一位相熟的經理是否放假，卻傳來噩耗，原來那位經理已經離開了，只能慨歎人生無常。到雅士的大都是熟客，不過相信唔係好多人知道有「堂煎 / 堂煮」呢樣嘢，其實呢度有Secret Menu：堂煎牛柳、堂煮愛爾蘭咖啡、堂煎香橙班戟等。可惜隨住經理的離開，呢D Secret Menu也不再有。呢D精彩、出色的手藝，只能成為大家的集體回憶！R.I.P. 經理…Read More

湖舟由渣甸中心搬到澳門逸園中心，裝修風格亦截然不同，舊店是深色的木製裝修，新店則以淺色為主，加上新店有落地玻璃窗，非常光猛；面向希慎廣場，景觀開揚，感覺很舒適。壽司counter成轉角，有八個位。最大的轉變是放棄了counter的雪櫃，用木盒盛載魚生。雖然令食客未能清楚看見魚生，不過其實這才是正宗壽司店的做法。跟袖山師傅已認識了一段日子，師傅對我們的口味亦瞭如指掌，所以每次都是omakase。今次師傅推介「幸福海鮮丼」，其實每次吃師傅的海鮮丼，都有幸福的感覺，因為魚生的種類繁多，而且非常新鮮，實在很滿足！另一推介就是「鰻魚飯」。日本的浜名湖以出產鰻魚聞名，師傅竟然在當地直接入貨，可見師傅對食材的品質是非常注重的。鰻魚肥美，味道濃郁，甜甜的醬汁混入軟熟的米飯中，一流！另外還有刺身、蟹肉沙律和炸蟹餅，非常滿足！…Read More

原來呢度七月先開，難怪之前唔多覺啦！有fd食過話OK，就試下啦！呢度就喺珍苑側邊，只係得「街」位，環境麻麻。今日撞啱基圍冇開，D客過晒嚟，好彩行快兩步，唔駛等位，否則起碼等半個鐘。打冷嘅款式都多白灼大頭蝦 (時價，今日賣$70)鮮甜爽口爆羔，正！鹵水鵝肉 $68鹵得夠味，唔會太鹹，唔錯！蠔餅 $45漏單，太油，麻麻！整體上唔錯，打冷嘢好味過基圍，不過價錢貴少少。…Read More

一個人喺銅鑼灣，想搵間cafe食晚飯，諗起呢度新開張，於是試一試。六點左右嚟到，時間尚早，冇乜人，座位夠闊落，圍住架車坐，環境唔錯。仲有車頭梳化位，好得意！枱上嘅擺設自然係自家品牌啦！呢度有set dinner，不過想試下D招牌菜，所以散叫。無花果拼乳清芝士聞落有好香嘅松露味，不過食落就唔覺，芝士好滑，牛奶味唔算濃郁，無花果好甜，不過一個人食晒都幾「漏」。白酒忌廉海鮮意粉試下Pasta of the Day，白酒忌廉汁好濃郁，大蝦爽口，魷魚唔韌，意粉al dente，妹味！Affogato Tiramisu呢度嘅Tiramisu好特別，手指餅放杯底，mascarpone喺中間，頂層係咖啡沙冰。第一啖食落去，感覺好冰涼，因為只係「畢」到D沙冰；再「畢」深D，先「畢」mascarpone，好滑；要挖到落底先挖到D手指餅，由於D手指餅冇浸住，所以仲好脆。都幾特別，不過三種材料分開咗，感覺上散收收咁，唔夠一致。而且冇乜酒味，試過就算。Mocha最後叫杯mocha，嘩！有粒棉花糖，好味！不過隻杯就唔係好掂！隻耳仔「唔湯唔水」，如果當佢係expresso杯咁「lim」住嚟飲，隻杯又太大太重；當佢係普通咖啡杯，個窿又太細，我隻手指穿唔過，搞到我要雙手捧住嚟飲。:(睇下menu，點解有杯expresso要成$80萬！原來係包埋架車！而且架車仲有張紙寫住SOLD，真係有人飲呢杯咁貴嘅咖啡！…Read More

喺Greyhound食完晚飯，完全唔掂，所以想搵個地方食甜品。行行下發現新開嘅TWG Tea，咁大間舖，好似好勁喎！就試下啦！餐廳非常光猛，枱與枱之間都好闊落，感覺好舒服。侍應遞上餐牌，個tea list都幾誇張，有幾百種茶，樣樣都想試，都唔知點揀。最後揀咗Red Chocolate Tea。一斟茶，已經聞到好香濃嘅朱古力味。不過D茶好濁，仲有D油喺面，我地懷疑係朱古力嘅油脂。飲落口，更不得了，茶好香，口感細滑。一流！老婆出去餅櫃揀咗兩件cake，所以我唔知佢地叫咩名。呢個朱古力波好好味。有好濃郁嘅榛子味。原來中間仲有芒果醬，酸酸甜甜，平衡返榛子嘅油膩感。呢件朱古力批，一睇就知佢勁啦！濃濃嘅朱古力味，亦帶有Earl Grey嘅茶香，好特別！原來呢度所有食品都以茶入饌，連甜品都唔例外。Red Chocolate Tea香甜濃郁，配甜品一流。之後再叫一壺French Earl Grey，清香幽雅，正好用嚟清一清味蕾。埋單時都冇留心睇價錢，只係見到百幾蚊，就比低信用卡，事後諗起，兩壺茶都百幾蚊啦！可能老婆喺外賣嘅餅櫃order嗰兩件cake冇落單，正想同侍應講返，不過見洋人經理攞張單同個侍應講，又搞咗一輪先比我簽卡，我心諗佢地應該發現有錯，所以改過張單。洋人經理過嚟話唔好意思，之前張單計錯咗，我一望，點解仲平咗嘅？經理話嗰兩壺茶計貴咗，所以改平返，我都話返比佢知仲有兩件cake未計，經理話係佢地計錯數在先，而且咁麻煩，佢唔會再去改張單，嗰兩件cake請我地食。其實唔係話貪佢嗰兩件cake，不過作為一間食肆，總要以客為先，比少少甜頭，可以留住D客，又顯得店主大方得體，呢D咪用心服務囉！最後我地嘅甜頭都係奉獻返比佢，因為D茶好好味，所以買D返去自己沖。…Read More

睇OR同埋KC個blog，一早已覺得呢度好吸引，不過老婆冇乜興趣，所以到今日先安排到一個人嚟試！電話預約，店員嘅態度殷勤，感覺良好！上到去，店員亦主動介紹菜式，雖然小弟最怕人煩，不過服務確實一流！一個人食唔到好多嘢，所以叫咗一個沙律，一碟雞翼，同埋鵝肝蛋飯。蟹子溏心蛋沙律菜新鮮爽脆，加埋沙律醋，一定唔會難食，所以其實係想試佢嘅溏心蛋。溏心蛋睇落對辦，不過食落完全冇蛋味，唔好話要有日本蛋嘅蛋香，連喺超市買到嘅普通蛋都好味過佢！梅子燒雞翼全店得我一個客，但我聽到微波爐嘅「叮」一聲，心知不妙！一見到碟雞翼，即刻打個突！唔係炸架咩？我記得睇OR d相係炸到脆卜卜架喎！不過睇返menu，佢叫燒雞翼，唔通自己叫錯咗？算啦！照食。再睇下D雞翼，每隻雞中翼中間都界咗兩刀。唔係掛！我自己BBQ燒雞翼都唔駛界開啦，要界開嚟叮，廚師嘅功力......食落口，味道唔錯，梅子味幾香。不過肉質唔多嫩滑，而且熱得誇張，所以更確定佢係叮熱嘅！鵝肝蛋珍珠飯睇落唔錯，聞起嚟幾香。店員見我影完相，就想過嚟幫我撈飯，不過我都係想自己搞。移開太陽蛋，原來有D飯素喺飯面，撈埋一齊幾香口。鵝肝夠肥美，不過鵝肝面拍嘅粉比較厚，食落有D韌，影響口感。Asahi啤酒食物唔多對辦，最正係杯啤酒！期後有另一食客嚟到，食客亦覺得不對辦，一問店員就知端倪，原來呢度已易手。之後再睇返KC個blog，原來喺回應中已提及易手一事，只怪自己爬文不夠細心，睇漏咗回應部分。…Read More

餐廳位於新葡京嘅二樓，一出電梯就見到接待處，不過仍未見到餐廳嘅格局。原來接待處嘅旁邊係鏡面自動門，門一打開，就見到神秘嘅流水金魚通道。盡頭嘅自動門再打開，就見到典雅高貴嘅餐廳。一踏入餐廳，最矚目嘅一定係中央嘅大玻璃球水晶吊燈，玻璃球高貴得嚟又唔會太俗氣，而且同水中嘅倒影形成8字圖案，貫徹餐廳嘅主題。牆上嘅絲絨金魚刺繡，生動靈巧，令優雅嘅餐廳增添幾分生氣。唔好俾呢個咁瑰麗嘅環境嚇親，其實價錢一d唔算貴，普通開壺茶，普洱、鐵觀音等，茶錢才每位MOP 10，仲有火暖住壺茶，咁嘅價錢，美心、翠園等都唔得啦！叫好少少嘅太湖碧螺春、黃山毛峰等，MOP 38*；西湖龍井、凍頂烏龍都係MOP 48*。當然仲有d最頂級嘅武夷山大紅袍、珍藏48年普洱茶餅係時價。(*menu冇寫明係每位計定係每壺計，記得自己問清楚。)點菜嘅時候，經理殷勤有禮地推介菜式。(其實從來都唔鍾意d侍應推介菜式，因為一定係hard sell自己嘅貴價菜，而且又唔熟悉時令嘅食材，所以成日都冇好介紹。)喺呢度當然冇咁嘅情況啦！我地想叫蒸蟹拑，每隻MOP 88(兩隻起)，相信其他餐廳嘅侍應一定照落單。 不過呢度嘅經理諗一諗，就話唔建議我地叫蟹拑，佢話d蟹唔合時，d蟹拑好細隻，唔似d相咁有成隻碟咁大。當我地叫乳豬焗飯嘅時候，經理亦建議我地叫半隻就夠。最後叫甜品嘅時候，經理亦能觀察我地飽嘅程度，作出合適嘅推介。喺香港好少見咁有質素嘅經理：與廚師有良好嘅溝通，對食材嘅高度了解，亦明白顧客嘅心態，更能親切、有禮、用心地推介，服務梗係滿分啦！先嚟餐前小食，豬肉粒酸酸甜甜，好醒胃，米盞鬆脆，係一道恰到好處嘅餐前小食。法國鵝肝金錢雞 Barbecued Pork with French Goose Liver懷舊嘅燒味菜式，不過以鵝肝代替雞肝，食起嚟更豐腴美味。鵝肝豐腴軟糯，肥肉甘香爽脆，叉燒蜜味香濃有咬口，三者配合得天衣無縫，如此極品竟然只係MOP 28一件，物超所值！椒鹽龍脷仔 Deep-fried Macau Sole with Spicy Salt龍脷仔炸得鬆脆香口，一d都唔油膩，可見師傅嘅星級功力。椒鹽味道啱啱好，少少香辣，送酒一流！伴碟亦絕不馬虎，車厘茄有兔仔造型，十分精緻。而且份量不少，都只係MOP 68，抵食！肉鬆欖菜炒法邊豆Wok-fried French Bean with Minced Pork and Preserved Vegetable一般都係炒四季豆，不過四季豆有條硬邊，處理得唔好就嚡口有渣。呢度用法邊豆代替，法邊豆清甜爽口，炒得有鑊氣，欖菜帶d獨特嘅鹹香，帶起成碟菜嘅味道，好味！早前同朋友去超市買法邊豆，要十幾蚊一包。呢度份量十足，起碼有兩包，才MOP 68，超抵！黃金帶子釀鵝肝醬Steamed Minced Scallop Filled with Goose Liver Pate and Coated with Shredded Ham, Sea Moss on the Bed of Carrot Sauce 食唔到蟹拑，於是諗過另一款海鮮菜式。見呢款幾特別，份量又唔太多，就試下啦！橙色嘅係甘筍汁，六粒丸子上面鋪上雲腿絲同海苔絲，色彩鮮艷，賣相一流。丸子係用帶子同蝦肉剁成，十分彈牙。入面釀有鵝肝醬，味道濃郁，亦能帶出丸子嘅鮮味。墊底嘅甘筍汁鮮甜清爽，減輕鵝肝醬嘅油膩，好味！ (MOP 128)原隻乳豬焗飯 (半隻)Suckling Pig Stuffed with Fried Rice and Preserved Meat出發前搜集呢度嘅資料，已經覺得呢隻豬仔好吸引。起初擔心兩個人食唔到一隻豬，後來知道可以叫半隻，正！一定要試！侍應將乳豬端出嚟嘅時候，見佢細細隻，燒到「蠟蠟靚」，一定皮脆肉嫩。侍應問我地要上庄定下庄，老婆話要下庄，因為上庄個豬頭冇乜肉食，又啱喎！(稍後時間見侍應拎咗份上庄去第二枱，原來唔一定有得揀，睇你好唔好彩。)侍應切去豬手同豬腳，再從豬身中間一開二。然後小心翼翼咁切咗四圈出嚟，分成兩碟。兩圈剛好拼成8字，真係好嘢！淨返嘅飯都仲有一大碗，切埋嘅乳豬足足有一碟例牌咁多！果然皮脆肉嫩，皮肉之間嘅脂肪薄薄地，好甘香。入面釀嘅糯米飯炒得乾身，亦充滿油香，無得彈！食晒兩圈，已經好飽，老婆食多一件乳豬已經投降。其實小弟應該食得晒嘅，不過無謂去到咁盡啦！所以只係爬埋碗飯，食多兩件豬就收工！經理見我地已經投降，就好醒目咁幫我地包起碟乳豬。好滿足！ (半隻MOP 240)經理執好枱，沖埋茶，再攞甜品menu俾我地。佢見我地飽到上心口，亦唔心急幫我地落單，等我地坐下，唞下，嘆啖茶先，慢慢揀甜品，真係非常體貼！最後我揀咗脆鬆餅，老婆揀咗椰汁雪蛤。經理話兩款甜品都好「漏」，提議我地叫柚子凍，酸酸地比較消滯。不過小弟係甜魔，梗係唔會放過呢個朱古力脆鬆餅啦！老婆就轉咗要柚子凍。"8" 脆鬆餅配君度橙酒Golden Crunchy Cake "8" Served with Orange Segment and Cointreau Sauce朱古力好香濃，中間嘅mousse好滑。鬆餅脆脆地，同朱古力好夾。嗰幾舊橙好鮮甜，中和返d朱古力。唯一可以彈嘅就係個君度橙酒醬唔夠酒味。清香柚子涷Chilled Pomelo with Lemon and Cointreau柚子凍酸酸地，果然消滯又醒胃。臨尾，侍應再奉上一杯「招牌奶茶」，叫我地唔駛加糖。奶茶聞起嚟幾香，飲一啖試下，口感幾滑，似港式嘅絲襪奶茶。不過超甜，雖然小弟係甜魔，食完個朱古力甜品，都仲覺得好甜。因為呢杯係「茶走」，係落煉奶嘅！好彩細細杯，啱啱好。貴為米芝蓮二星嘅餐廳，我覺得環境滿分，服務滿分，食物滿分。咁完美嘅晚餐，埋單才MOP 700!!!真係物超所值！…Read More

最早期的湖舟是在鰂魚涌的，雖然只光顧過一次，但已經令小弟兩公婆深深愛上。鰂魚涌的湖舟結業後，實在令人若有所失。後來得知湖舟於銅鑼灣重開，我們隨即成為捧場客，差不多每星期都光顧一次。我們最喜歡坐吧枱，因為可以看着種類繁多的魚生，亦可以看着師傅全神貫注地切魚生、握壽司，實在是一種享受。起初看見師傅不苟言笑，非常嚴肅，一股莫名的威嚴，令人望而生畏。我們每次都叫「特上壽司」和「魚生飯」，久而久之，師傅也認得我們。雖然我們不會日語，師傅亦不太會廣東話，但全靠侍應的翻譯，我們和師傅亦能作簡單的溝通。後來和師傅漸漸熟絡起來，我們發覺師傅其實是頗風趣的。只是不太會廣東話，所以未能與食客溝通；而且每日也專注於製作刺身和壽司，所以很少面露笑容，令大家覺得師傅經常「黑面」。袖山師傅也是一個非常固執的人，特別是對食物的要求非常固執，一定是時令的食材才會供應給人客。另外，對米的要求非常高，除了揀選優質的米，更自設精米機，自行精米，所以其米飯特別味美。有一次，小弟患了感冒，袖山師傅推介了「MAYO丼」給我，並說自己以前行船時餐餐都食「MAYO丼」，足足食了十年，很少生病。其實「MAYO丼」即是吞拿魚丼，只是上面加了蒜蓉沙律醬。蒜蓉的辛辣，加上沙律醬的酸味，竟然與吞拿魚非常匹配。吃了一半，師傅就收去了我碗丼，原來是加入蔥花和熱水，成為一碗泡飯。熱水把蒜香及蔥香完全蒸發出來，又另有一番風味。吃完令人全身發熱，感冒亦似乎不藥而癒。不過餐牌是沒有「MAYO丼」的，而且師傅也不是每次都會做的，要看看大家和「MAYO丼」有沒有緣份。今次日本東北的九級大地震，對袖山師傅的影響非常大，除了生意額下跌外，原來師傅是仙台人，師傅的姐姐亦在地震中失去聯絡，至今亦找不到。師傅不但沒有放棄，更到處搜尋新鮮的食材，以報答食客的支持。除此之外，袖山師傅更加在飲食雜誌上撰文感謝大家的支持，亦勉勵同業要堅持下去。這份心意實在讓人感動，這位師傅亦實在值得我們敬重。…Read More

約埋兩個friend，一行四人去屯門食海鮮，人少少，又想試多D款，自己買料都唔錯，可以每樣買少D，買多幾種。本來想買一隻魷魚，用嚟椒鹽，不過太大隻，四個人食唔晒，於是散叫一碟魷魚鬚。魷魚鬚炸得鬆脆，送酒一流！花竹蝦爽口鮮甜，用豉油汁煎香，更惹味！蒸嘅火候到家，唔會過火太韌，又不失咬口。象拔蚌鮮甜爽口，內臟嘅味道更濃郁，不過唔係人人都啱口味。原來都好大碟，四個人夾極都仲有，抵食！炒蟶子亦好抵食，平日去大牌檔食，只係炒蟶子殼，呢度冇呃秤，半碟殼，真係有返半碟肉。相比起扇貝就唔抵食，舊膶仲大過粒帶子，唔抵！海龍王湯好味！買海鮮時叫老闆執包海龍王湯，次次都係執D瞓覺嘢，魚毛蝦毛等，今次竟然撈咗條游水魚，雖然唔係咩貴嘢，但已經正好多啦！已經好飽，諗住叫甜品，侍應跟手上埋碟蟹，係喎！仲有奄仔蟹！不過蟹殼上有D油光，唔似淨係搵鹽去焗，一開蟹蓋，蟹羔都算多，雖然唔太黃，不過都香！最後送甜品，紅豆桂花糕麻麻地，紅豆唔夠腍，桂花太多太濃，有D似藥水味。南瓜西米露就好正！南瓜夠香，唔太甜，完滿嘅終結！買料$1300，加工費$700，埋單$2000，每人$500，抵食！…Read More

之前喺商場抽獎抽中張$50coupon，呢日行過IFC見到有i-Scream，就用咗佢啦！一杯兩球嘅雪糕$48，啱啱好用咗張coupon，蝕兩蚊比佢啦！試咗幾款味都麻麻地，係兩款nuts味(開心果、榛子)可以接受，唔駛錢就算啦！見佢可以轉cone，於是叫佢轉用兩個cone啦！點知............佢竟然張兩個cone疊埋一齊，然後"畢"兩球雪糕上去，我同老婆都O晒咀，稍為有common sense嘅都識分開做兩個單球cone啦！都唔知好嬲定好笑！…Read More

朋友生日嚟食dinner buffet，不過食物款式唔多，味道普通，都係甜品最正！海鮮唔新鮮，完全唔掂！蟹腳OK，不過冇幫人剪開，食嘅時候比較麻煩。後來發現每枱有把鉸剪，不過二人枱又係一把，我地八個人都係得一把！:(刺身OK！沙律幾好，車厘茄好鮮甜，同水牛芝士係絕配！芝士款式唔多！燒牛肉唔錯！生肉部分嫩滑，有yorkshire pudding跟埋，仲有horseradish！星洲炒米同埋炒飯OK啦！頭盤、主菜都普通，唯有食甜品啦！D朱古力最正！最後要杯熱朱古力，淡，唔夠香濃！Clipper lounge主打甜品，high tea，佢嘅dinner buffet食物款式少都可以原諒。不過以文華嘅品牌嚟計，食物質素咁普通，就不能接受！所以都係嚟嘆杯茶、食件cake、傾下計算啦！…Read More

臨近冬至，梗係要同班兄弟食餐飯啦！不過好多出色嘅食肆已經book滿晒，而北角鳳城竟然仲有位，即刻book位，仲寫埋D預訂嘅菜式先。去到未人齊，叫D餐前小食送下酒先，叉燒唔錯，唔太腍，有咬口，不過小弟略嫌佢唔夠肥。友人話雞腳都好正，不過小弟唔啜腳趾，冇食到。大家談天說地講是非後，人齊啦！起菜！先嚟金錢雞，原來全枱大部分人都未食過金錢雞，大家都覺得好新奇。小弟細個跟老豆都食唔少，D童年回憶即刻返晒嚟！呢度D金錢雞都唔錯，如果舊冰肉厚DD就更正！再嚟係煎藕餅，大家一致讚好。熱辣辣，表面煎得香脆，鯪魚肉夠彈牙，加埋爽口嘅蓮藕粒，又係送酒嘅佳品。鍋貼大明蝦脆口嘅食物自然受歡迎，大蝦夠彈牙，不過用千年油炸嘅麵包，始終有D油「益」味。金錢蟹盒:(最有期望嘅一味，通常都係最失望嘅！油浸嘅蟹盒，雖然香脆，不過咬一啖，成口油。而且唔見有蟹肉，只有少量蝦肉，有D搵笨之嫌，老婆嗰舊仲有多條蝦鬚，真係唔多掂！主菜嚟喇！煎釀鯪魚，其實同藕餅差唔多，只不過有D汁。小弟都係鍾意煎藕餅多D。紫薑彭公鵝超正！隻鵝夠肥大，鵝肉夠入味，個汁酸酸甜甜，好開胃，大家唔湊米氣嘅都忍唔住要叫碗飯嚟撈汁。最後要個焗布甸埋尾，布甸唔太甜，啱晒大家嘅口味，不過嗜甜嘅小弟就覺得爭D，而且唔夠香滑，食唔返以前舊式酒樓用玻璃兜焗嘅蓮蓉布甸，不過都已經算唔錯！食物有一定嘅水準，不過最緊要係成班兄弟一齊有講有笑，一齊摸住酒杯底，食餐好嘅，真係此刻無價！…Read More

結婚五周年，同老婆嚟Hugo's慶祝。新嘅Hugo's以古堡式嘅裝修，燈光較暗，較以前更有情調。可惜駐場嘅吉他手竟然彈"Nobody"，真係激死！今晚食牛扒，想配紅酒，不過睇嚟睇去都揀唔到，侍應即刻自動過嚟幫忙，服務態度一流！佢大約問咗我地嘅口味，就推介一支美國嘅紅酒，Pinot Noir 2006，價錢少貴啦！不過真係啱我地口味，易入口，果然唔錯！頭盤叫咗煎鵝肝，我地話share嘅，侍應就分好兩份先上枱，服務好好。可惜鵝肝煎得太熟，要扣分！:(堂煮嘅龍蝦湯，味道偏甜，龍蝦味唔夠濃郁，不過口感好滑，唔錯！我記得舊Hugo's嘅龍蝦湯係有一小杯XO，比你自己加落湯度，不過而家冇咗，因為煮嘅時候已加咗，但只係用VSOP。主菜我要咗西冷，西冷燒得夠香，不過冇乜肉味:(，好似Ruth's Chris好味d。今期有野味，老婆要咗黃猄柳。黃猄柳唔肥，好腍，而且好有肉味，正！每個主菜可揀兩款配菜，老婆要薯餅&邊豆，我要焗薯&炒雜菌。配菜有個熱盤熱住，非常細心。薯餅同焗薯好味！炒雜菌同邊豆就普通。最後加個Souffle，外脆內滑，好好味！可配橙酒醬，令Souffle更香，而且冇咁漏；亦可配朱古力干邑醬，令味道更濃郁，更豐富。原來仲奉送一個甜品，朱古力Bonbon，好味！已經好飽，未能一試魔鬼咖啡，下次再嚟試過！是晚Hugo's都差唔多滿座，我諗大約有七成客人都係嚟慶祝紀念日嘅，因為吉他手都唱咗好多次Happy Birthday。另外見經理攞咗九十九次紅玫瑰去其中一枱，相信係客人求婚用嘅！所以呢度真係幾適合慶祝紀念日嘅。…Read More

平日食下午茶總喜歡食d甜嘢，嚟呢度應該會叫咖央多士，不過今日想食咸點，所以試咗蝦米麪包。套餐有蝦米麪包2件，半熟蛋2隻，咖啡1杯。先嚟半熟蛋及咖啡，半熟蛋加上黑醬油及胡椒粉，好味！咖啡用煉奶開，味道唔錯，係略嫌唔夠熱。等咗一陣先嚟蝦米麪包，原來要烘一烘個麪包，脆得嚟又不失麪包嘅鬆軟，正！蝦米好香，食落辣辣地，好惹味！唯一要彈嘅就係地殼(托盤)傾斜，搞到我倒瀉咗少少咖啡！…Read More