水番's Profile

三叔喺東大街已經一段時間，客人唔算多，不過佢嘅小食其實係做得唔錯嘅～今日買咗佢嘅甜餅同撈麵做午餐， 兩樣都係即叫即做，等咗約十分鐘.甜餅攞到返屋企仲好熱辣，咬落去好軟熟，花生涵料香口，欣賞佢用錫紙包一包塊餅，好似西餅咁精緻，食嗰陣又唔會整污糟隻手，值得一讚！:)打開盒撈麵，又有驚喜，配料款式多，樣樣都有啲，豬頸肉，魚片，腩碎，春卷，牙菜，排得靚靚仔仔 ，味道整體都算唔錯，賣廿五蚊我覺得係抵食！…Read More

連續落咗兩個星期雨, 今日終於見番個太陽, 心情同天氣一樣咁爽, 放工後約咗老婆出外食飯.之前行過東大街後面條巷, 知道開咗間唔肯定叫"八沢" 定"沢八"o既料理, 今日終於有機會試一吓.佢o既裝修同佈置都幾有心思同情調, 餐牌上o既食物同價錢都好似幾ok~店員推介咗一個"廣島蠔肉碎烏冬"俾我哋, 另外我哋叫咗一個"和風安格期牛扒飯"~牛扒飯o既賣相都幾吸引, 有葱同蘿白蓉做點綴, 感覺好清新~牛扒煎得幾香, 唔會有太多醃料, 保留返牛肉o既原味; 啲飯淋咗少少, 如果少返啲水就perfect.廣島蠔肉碎烏冬真係冇推介咗, 有四隻都幾大吓o既蠔, 好肥美; 湯底好似係鰹魚湯底, 好鮮味; 烏冬比較扁身, 好索湯; 好滑.埋單先知原來唔洗加一, 真係幾抵, 一定會再黎~:)…Read More

我好少寫食彈o既食評, 但今次真係忍唔住.嗰日星期日晏晝, 我地坐低睇睇餐牌, 好多優惠都停用, 如果叫個面同嘢飲, 每人消費要六十蚊~ 都幾唔抵~女朋友叫咗紅燒牛肉面, 我叫紅燒三寶面等咗一陣, 兩碗好大o既面上台, 不過都係得啲湯, 面同餸其實好少,湯底好重味精, 食完超口渴~牛肉一舊舊好實, 又鞋, 啲牛肚又炆得唔淋, o趙得好辛苦.:(面質同平時食開係有啲唔同, 但唔算係好食, 彈牙亦談不上.店員o既態度似MK仔, 又不停o係我後面高談闊論, 後來人客多咗, 佢又移咗我地兩次台, 仲講咗句"地方淺窄, 將就吓", 但講o既語氣好唔誠懇囉~一食完即刻收碗, 勁有趕客feel. 不過你唔趕我都會走, 留多一陣都周身唔聚財.四, 五十蚊食碗咁o既面, 不如返屋企煮康師傅紅燒牛肉面or"滿漢全席"碗面~…Read More

一早已經聽過臨記呢個名, 有時放工經過天后都想去試, 不過每次都太夜去到, 已經關門. 後來聽到佢結業o既壞消息, 真係令我覺得好可惜!後來知佢o係附近又再開業, 值著燭光晚會又經過天后, 一於捉埋gf去光顧一下~當時八點半左右, 人不算多, 對上有個大叔等緊格餅, 我地都一樣order咗一份, 知道製作需時, 我地又oder咗燒賣同牛肉食住先. 燒賣同牛肉都係普通嘢, 叫做多個選擇俾客人.等多兩分鐘, 期待o既格仔餅終於到手, 賣相相當吸引, 連紙袋設計都好講究, 亦有多一張tissue包住紙袋, 都幾細心.格仔餅味道同其他地方差唔多, 餅底係幾香, 但有啲稔, 如果可以吹耐少少先入袋, 咁會好好多. 始終客人想食到o既係香脆o既格仔餅, 快一陣慢一陣都唔係最重要.希望老細睇到我地o既食評, 會再改善吓, 下次丟會再去試雞蛋仔~…Read More

昨午跟baby去了西環辦年貨, 之後走回去上環搭地鐵. 途經上環街市, 乾脆就上去食晚餐, 反正附近的選擇不多了.街市外係冷冷清清的, 走進去又是另一番新景象, 我們好不容易, 婉拒了其他店舖的招來, 轉了一個大彎入到最偏僻的角落, 終於找到了"泰之味".當晚有團体包場, 但還未入座, 所以人不算多, 店員安排我們坐一張坐五人枱, 很闊落.我們坐下, 翻看著餐牌上的菜式, 這小店的菜式種類也不亞於大型餐館, 厚厚的一本餐牌, 我們想了十分鐘, 才決定點了: 1.) 豬頸肉沙律: 上菜時被嚇了一跳, 一碟滿滿的, 份量可真驚人. 雖然沙律主要都是菜, 但豬頸肉的份量也不少! 而且用料新鮮, 醬汁酸辣醒胃, 不錯!2.) 四季骨: 將醃好的金沙骨炸香後, 再淋上用咸金吉製成的醬汁, 咸中帶甜, 甜中帶甘, 比老是吃咕嚕肉來得有新意.3.) 椰青海鮮炒飯: 賣相吸引, 飯充滿著椰青味, 海鮮用料一般, 椰青保溫效果很好, 吃到最後一粒飯都還是熱的!此店的厨師都是泰國人, 味道正宗. 店員的服務也很殷勤, 所以值得推介! 最後我還從店員伯伯口中認識到什麼是"飛天"芥蘭呢!:)…Read More

早前去過銀杏館同女友慶祝生日, 食過六百蚊有兩張coupon回贈, 可以享用一頓免費午餐~心諗香港地冇咁著數o既事情發生, coupon放埋咗一邊冇理到, 直至差唔多過期, 女朋友終於都係打咗去book枱.星期日下午兩點鐘, 依然有唔少客人, 不過我地留咗位, 即刻可以坐低. 睇完餐牌, 問吓侍應, 佢話A-H餐都揀得, 食完真係唔洗錢可以走得, 其實聽完都有啲半信半疑......既然係咁, 我地都唔客氣啦, 女朋友叫咗個大蝦天使面套餐, 而我就哎咗個什扒餐~我個餐配青豆湯, 好creamy, o答落好有青豆味, 青頭湯用碟上, 感覺都幾特別~ share咗啲俾女朋友飲, 大家都讚好~女友跟餐o既沙律都好新鮮, 保持一貫o既水準!:)天使面o既白汁好香蒜蓉味, 面質彈牙爽口, 大蝦開邊上, 加上少許辣椒粉釣味, 醒胃. 伴菜o既細蝦, 野菌, 露荀, 都令面o既賣相更吸引, 味道更豐富~:)等咗一段時間, 雜扒餐仲未黎, 叫咗侍應幫我跟跟, 好快一碟非常有份量o既雜扒餐終於黎到! 嘩, 有德國腸, 雞扒, 羊架同薯角, 全部嘢都好熱辣, 我諗要花好多時間去預備, 其實再等多陣都係值得!碟上每一款扒都咁好食, 女朋友鐘意雞扒同個汁, 我就覺得羊架肉嫩多汁~ 薯角香脆, 驚熱氣又引唔住要食多幾舊~享用完豐富o既食物, 再嘆埋杯咖啡, 呢個什餐真係好享受~我地臨走前再去櫃台問洗唔洗俾加一, 佢地都係話唔需要~ 不過禮貌上或者我地都好樂意咁留低咗啲小費, 先至離開~ 銀杏館, 真係又要讚多你一次, 有機會一定再嚟幫襯~~…Read More

尋日去鯉魚門三家村影完相, 回程搭船到西灣河搵嘢食~喺太安樓掃蕩完一輪小食之後, 終於黎到景福茶樓食真正晚餐.呢間"茶樓" o既格局好似懷舊茶餐廳, 但係又真係會開壼茶俾你飲o既,牆上面o既菜式都好懷舊, 欖角, 仁念菜式好似係呢度o既主打, 我地兩個人, 食得唔多, 叫咗:蒜蓉蝦乾粉絲蒸聖瓜:一上菜, 已經俾佢o既賣相吸引, 有紅色o既椒絲, 白色o既蒜蓉, 橙色o既蝦乾同綠色o既聖瓜, 連平日食飯好少影相o既我地都要影一影~蝦乾冇沙唔腥有鮮味, 聖瓜清甜冇菜腥味, 粉絲吸哂啲蒜蓉味, 好惹味. 成個菜感覺好均衡, 有菜有肉, 唔會淛, 好!:)欖角蒸排骨:即叫即蒸, 熱騰騰, 成張枱彌漫住欖角o既香味, 咸中帶甘甜, 極惹味. 排骨肥瘦適中, 肉淋. 平日茶樓都係獨孤一味鼓汁蒸, 今次用欖角蒸真係幾新鮮. 原本想攞少少汁黎撈飯, 不過實在太飽啦, 留返下次先~服務態度都幾好, 一入門口, 阿姐指我地行到入面張枱就唔洗我地搭台, 問侍應哥哥, 佢都有介紹吓菜式同價錢, 老闆娘冇崔我地落單, 廚房阿叔行過都幫我地加水, 老闆收錢都好似有講多謝.整體感覺良好, 下次會叫多幾個friend一齊黎, 可以試多幾個菜~…Read More

同意樓下Waltz 同 Guipo o既講法, 呢間舖頭o既速度真係有待改善, 最好請多個樓面, 可鄰食客要喺外面又要等, 又要吸一輪小巴站廢氣先入到去~講番食物,炒蛋: 七成熟, 軟又滑, 有蛋汁, 食到尾都唔覺得乾, 同佐敦比, 各有所長~多士: 明明係烘過, 但上到台都只係微暖, 牛油唔夠香.火腿: 冇乜特別, 可以試吓改配芝士/ 蜜糖腸.叉燒意: 叉燒幾大舊, 仲有蜜汁, 唔會淥到淡哂, 不過見個砌口有啲乾, 好似好耐之前砌定咁, 個湯幾有味, 真係落咗奶?熱奶茶: 茶味濃, 茶色靚, 奶夠滑, 味道細膩, 幾好~:)順帶一提, 裏面有雜誌睇, 不過擺到成個垃圾堆咁, 唔會有人再走去睇. 同埋有冇讀者知道, 放雜誌同招財樹嗰兩舊石本來係咩黎架? 好阻掟喎~ …Read More

中學時代o係香港仔返學, 偶然都會同同學嚟謝記食魚蛋粉. 嗰時唔覺得佢啲魚蛋有乜特別, 河粉又少, 睇見人地買炸魚片食, 自己又冇錢買, 所以都係去巴士總站出面, 可以自己落冬菜嗰間面餔多...今個sun約咗女朋友去數碼港睇"波兒", 經過香港仔, 於是做咗東道主帶佢黎試吓啲魚蛋粉.差唔多十年冇黎過, 裏面裝修依舊, 仲見到當年嗰個大水煲, 可以自己斟茶飲 (雖然有人只係黎要洗筷子)...我地等咗十五分鐘終於有位, 叫咗魚蛋瀨, 魚蛋牛腩河, 腐皮卷, 炸魚片搭多幾粒炸魚蛋, 兩枝可樂.炸魚蛋啲皮好香脆, 裏面好彈牙, o趙咗幾吓先咬得爛. 味好鮮, 少鹽少味精.:)炸魚片啲皮同肉炸到分開, 咬落去都好彈牙爽口, 不過個人認為炸魚蛋好味啲.跟粉面o既炸魚蛋魚片都沉淋咗, 略為遜式, 未炸過o既魚蛋亦唔係太過特別.女朋友讚啲炸魚蛋同魚片係佢食過最好食o既, 聽佢咁講我都好有滿足感~ 突然間, 又好懷諗細個o係街邊食到o既豬油炸魚蛋同埋傳說中o既"艇仔粉"呢~…Read More

尋日同女朋友嚟到呢間"公司"食lunch. 佢話之前成日去隔離書局攞書, 但次次見到咁多人排隊, 所以都未入過去食~我地今次一點鐘去到, 門口都有十幾廿人等緊, 不過等咗五分鐘左右就有位, 果然好有"效率"!舖裏面真係人山人海, 淨係伙記都十幾人. 我地被"安排"坐低, 然後叫咗炒蛋多士, 叉燒通粉, 想叫奶茶o既時候又俾伙記"提醒"我食完先叫(係呢度o既規矩, 但次次都唔記得)我已經好耐未嚟過啦, 啲味都唔係太記得, 今次再食返, 又覺得好好味喎!多士夠厚, 外面香脆, 裏面鬆軟, 牛油味濃, 女朋友話好食過澳門茶餐廳嗰啲.炒蛋軟滑, 好重蛋味, 加少少鹽食仲正.叉燒通冇乜特別, 純粹要嚟填肚. 熱奶茶香,濃, 滑, 好過灣仔檀島多多聲~冷氣都幾大, 要食快啲, 凍咗唔好食. 不過入得去食都唔會坐得耐. (坐到半個鐘都好野, 坐到一個鐘o既話, 唔該話我知!)伙記做嘢好爽手, 有teamwork, 唔算有禮貌, 但又唔係態度差. 會叫俾錢o既人行快啲, 但又會提啲大人睇住自己小朋友~女朋友仲發現cashier有個牌寫住"唯我獨尊", 雖然有啲牙擦, 不過炒隻蛋都可以炒到咁好食, 真係當之無愧~…Read More

最近都要OT到好夜, 返到大埔好多舖頭都已經收哂啦~見到廣福道有"利廣成魚蛋粉" 咁鬼大個招牌, 仲話營業到一點, 啱哂我呢啲夜鬼~上次入到去鬼形都唔多隻, 淨係聽到冷氣機啲呼呼聲, 以為自己攪錯, 係咪已經閂咗舖呢?後來有個嬸嬸叫我隨便坐, 好有禮貌同殷勤咁幫我落單, 呢啲真係好多香港侍應要向嬸嬸學習下~我叫咗魚蛋米, 腐乳通菜同凍0水. 啲魚蛋唔會好實, 但都幾爽幾彈, 有魚味, 唔會好重味精, 碗粉真係幾大, 夠我食~ 菜同飲品我都冇乜要求, 俾佢passed.後來食食下又多番啲人入黎, 嬸嬸即刻較大兩度冷氣, 我見個場旺番啲, 都替佢地地開心~講返今次, 再黎食墨丸河, 佢啲墨丸好多墨魚粒, 有咬口. 啲河粉唔係好爽而係食落有啲"粉粉地"嗰種, 都幾索味, 我覺得幾特別喎~多謝呢間舖頭咁夜都煮嘢俾我食, 食完俾錢嗰陣都仲有啲感激~…Read More

星期四晚放工, 返到屋企附近週圍搵食, 輾轉嚟到群記門口, 見入面難得有位, 牛腩癮又開始發作......住咗大埔四年有多, 今次係第二次幫襯(之前黎親都閂咗門), 二話不說, 即刻落order整番個爽腩河, 不過阿姐都係答番嗰句"爽腩得番淨食, 河粉賣哂!", 個個黎親都係呢句, 其實係咪應該將爽腩河喺餐牌上刪除呢?! 有淨食但又唔俾人跟粉面, 玩哂野......退而求其次, 叫咗個肥腩米(心諗再冇我就走, 好彩有). 冇乜人, 但厨房都好似好忙咁, 等咗十分鐘, 終於黎到.肥腩比想像中肥(六成肥, 四成瘦), 不過我接受到, 而且都幾爽口, 米粉一般貨色. 最鐘意都係個湯底夠濃, 好重肉味, 帶少少酸(唔知係咪落咗唶去炆, 定香料味), 有食九記o既感覺(但"師父"比九記多, 九記食完係唔會頸渴), 我最後連湯都飲埋, 好滿足. 廿六蚊一碗, 簡唔中食, 唔貴丫~…Read More

今日同朋友去咗西貢潛水, 返到碼頭又餓又赲, 咁啱又經過有新鮮葡撻出爐, 梗係要買個嚟醫醫肚啦!要$6.5一個, 貴咗少少, 不過呢間舖啲面包好似都有啲特式, 店外面又要露天茶座可以坐, 貴少少都可以接受o既.一咬落去, 個皮鬆化到呢~ 啲牛油味又"bit"哂出黎, 啲蛋漿熱辣得嚟又好滑, 甜度啱啱好~ 我即刻同個friend講: "好得, 呢個係我食過最好食o既葡撻!", 攪到佢忍唔住拿拿淋返去買番個食~雖然葡撻唔可以同傳統o既曲奇餅底蛋撻比較, 但我覺得佢甚至好食過中環同九龍城嗰兩間蛋撻~…Read More

尋晚一行六人, 原本諗住喺厚福街舊店幫襯, 但冇位, 俾阿姐帶咗去"隔離街"新店坐低.(即係寶勒巷, 其實隔咗幾條街有突).打開餐牌, 散叫粉麵廿零, 炒粉麵三十零, 大眾化假錢.一番討論後, 叫咗個六人餐, $428, 有:1. 越式拼盤: 有扎肉, 酸辣鳯爪, 春卷, 有蕎頭味o既香腸, 都幾豐富.2. 蒜茸法包: 三大塊, 好脆, 好香蒜茸味.3. 咖喱雞煲: 咖喱好惹味, 蘸法包都唔夠, order多兩個"靚仔"撈汁, 一流.4. 黑椒牛肉粒: 食咗一粒, 想再挾已經俾人挾哂, 但印象中係幾惹味, 牛肉粒爽口唔韌.5. 橙汁斑塊: 一般, 似西檸斑塊多啲, 冇乜人吼, 我食咗幾件.6. 菠蘿炒飯: 都幾多料, 有蝦同魷魚, 好味, 不過個菠蘿挖得好淺, 份量多啲就好.7. 馬拉盏炒通菜: 淨食會咸咗啲, 但送飯又好ok喎.8. 黑糯米/西米露: standard野, 但個人認為黑糯米會好食啲.埋單前用咗八張五蚊coupon(入門口前阿姐送o既, 每滿一百蚊可以用兩張), 除番每人七十五蚊, 可以食到咁多嘢, 坐得都舒服, 叫店員加茶都好快手, 整体嚟講, 大家都幾滿意.…Read More