erozette's Profile

不僅係紅磡區，就連黃埔花園範圍內都有一隻手、五隻手指都數唔晒嘅拉麵店。要突圍而出，已經唔可以靠一個「日本開到嚟香港」嘅虛名。真係只可以靠實力 - 味道！豚道樂未必係紅磡區最好嘅日本拉麵店，但係佢嘅「曲麵」會令你不停再去幫襯。就係嗰種一排冇食就會囉囉攣想去食嘅食物。提起「曲麵」，喺香港長大嘅朋友應該第一時間就諗起由細食到大嘅即食麵。豚道樂嘅曲麵，爽口彈牙，真係不得不試試哦。豚道樂有好多款湯底選擇，小編最喜歡特上辛辣味增拉麵（當然要點曲麵):…Read More

小編叫外賣嘅兩個堅持：1. 外賣兜唔可以係發泡膠。食用發泡膠裝嘅熱食簡直好似食化學品，正在慢性自殺咁。2.食物到達時候仲係熱嘅。深井陳記燒鵝(土瓜灣店)符合本小編以上的小堅持所以亦係我差不多每星期都會叫外賣的食店。今次無叫燒鵝，點咗幾味小菜。薑蔥魚腩煲係廚師推介。薑蔥好香，食落一啲都唔油膩，包住魚嘅炸粉亦唔厚。一個好好嘅廚師推介。滑蛋炒蝦仁味道同張相一樣 - 淡。煮嘅時候應該係油未夠熱就已經落蛋，所以蛋一啲都唔滑，好碎，又唔香、蝦仲有啲出水添。係失敗之作。蒜蓉炒油麥菜顧名思義，係蒜蓉炒油麥菜。優點係，一啲都唔油。豉油雞拼叉燒豉油雞 - 皮好爽，肉好滑，好入味。好好味！叉燒 - 蜜汁香甜，肉地唔乾但係舊叉燒好似啱啱絕食完三日咁瘦。…Read More

海鮮控不可錯過！已經幫襯過蒸蒸日上四、五次。每次嘅水準都好好。冇得彈啊！簡直有種想「抱擁這分鐘」不停口品嚐鮮味嘅感覺。同其他蒸海鮮嘅食肆有少少分別，蒸蒸日上係「私房菜」嘅形式。所以每一日嘅中午就一定要confirm究竟有幾多位客人會到。因為晚餐嘅海鮮係當日晏晝先買嘅。所以食材十分新鮮。亦都因為佢哋只會買夠預定客人數目嘅份量，如果多咗人去就會唔夠食；少咗人去呢...你都要俾埋嗰份錢㗎 (都公平啫)。以下係其中幾樣我最喜歡喺蒸蒸日上食嘅海鮮；佢叫做黑珍珠貝。唔係成日有。蒸起之後黑珍珠背肉裏面會藏住一泡水。非常鮮甜。可能你會覺得賴尿蝦冇乜特別。但係賴尿蝦蒸起之後，店員會幫你起肉，食起上嚟一啲都唔麻煩。係炸芋頭丸。係好香口，食落去外皮鬆脆裏面軟林林又唔太甜嘅甜品。如果有朋友生日，仲有特製嘅QQ公仔壽包添。…Read More

經常會經過九重鮮，今晚終於初嚐哩間評分幾高嘅紅磡區韓式食店。前菜幾好食，有比較少見嘅苦瓜。點餐後大約5分鐘，載滿海鮮嘅蒸籠就上台。店員叮囑當溫度計到 95 度就通知佢哋。唔夠五分鐘，95 度達標，可以開始續層食喇！第一層：聖子+象拔蚌仔跟住第2，3，4，5，6 層都無影相因為實在係要食得幾急。WHY? 因為蒸爐一直咁樣蒸住其他層嘅海鮮，我哋怕啲海鮮整得太老，所以唯有盡快食。一直到第7層嘅肉蟹：整體黎講，D海鮮唔算好鮮味。而且蒸籠嘅溫度調校得唔係太好，所以每一味海鮮都有啲老。由於需要食得好急，整個晚飯只係用咗1小時5分鐘就食完喇。…Read More

是晚選擇食飯地點要有兩大元素：1. 好食2. 免開瓶費就係咁，J.L. Private Kitchen 被翻牌了。由於係「私房菜」形式，中午12點就要揀定當晚每個人食幾多個 course 同每個 course 食乜。小編揀左 Appetizer, Soup, Main, Dessert：意大利雜莓果醋海鮮沙律菜好嫩，仲有蝦肉、蟹肉同海膽，但係食唔到雜莓啫。黑松露野菌忌廉湯就係「黑松露」+「菇」+「忌廉」咁味。要讚跟湯嘅麵包條，好香。辣茄汁香煎大虎蝦擺盤好靚。食落一般。蝦唔係太新鮮。雖然蝦肉未至於「霉」，但係一D都唔彈牙。甜品 Tiramisu 咖啡芝士蛋糕 + 咖啡同埋朱古力粉嘅味道。唯一特別係朱古力蛋卷總結： 整體嚟講係好食嘅。好「老正」，好似酒店大堂音樂咁 - 無驚喜亦唔失望。同一個價位，唔難搵到類似。…Read More

已經有半年無幫襯，咁啱晚飯時間喺灣仔，突然想起蝦麵店濃濃嘅蝦湯就決定去食碗辣蝦湯蝦肉魚片米粉。雖然係「辣」蝦湯，但係一D都唔會覺得辣，哩個「辣」味反而吊起濃湯嘅鮮蝦味。小編最後差唔多將成碗湯飲晒。又鮮又濃又帶一點點微辣；雖然小編當日並無宿醉，但可以肯定哩碗湯一定是 hangover 良藥，宿醉 CP。蝦肉份量一D都唔摳。蝦切的薄，但係有好多片。小編只有一個給蝦麵店的建議：當人均消費最少 $6-70，俾杯水的客飲啦... ...…Read More

第一次去新景園已經係10年前嘅事。當時食嘅係「咖喱豬扒飯炒底」。我仲好記得當時食完第一啖咖喱豬之後，跟手鯨吞左成碟，因為實在太好味啦。當年叫炒底（炒飯底）係要加＄25嘅，好多人都覺得哩＄25好貴，但係我知可以話俾你聽呢＄25係物超所值嘅。因為呢個炒底係炒得好乾身好靚嘅蛋炒飯。由於本人已經比第一次去新景園嘅時候年長咗10歲，加上體重都比當時多咗20磅。所以琴晚再去嘅時候並無叫炒底。晚市有套餐，飯會跟一碟菜同埋一碗湯。湯通常都會係雪耳煲雞。好飲。豬扒同埋咖喱咁多年一樣都無變。豬扒揸得非常鬆脆，咖喱好濃好香。「咖喱專家」呢四個字，新景園當之無愧。本人最欣賞新景園嘅係咁多年佢哋嘅食物質素都完全冇變，保持得非常好。…Read More

經過宏已經好幾次，門口嘅雪櫃擺住蛋糕同埋唔同味道嘅蛋卷。有一次外賣咗舊抹茶蛋卷，蛋卷軟稔稔，好似食緊棉花咁。抹茶味好突出，而蛋卷一啲都唔會太甜，好適中。今日突然好想食甜品，所以就行咗入去宏試吓佢嘅甜品啦。果然有驚喜呀。抹茶軟雪糕芭菲就好似佢嘅蛋捲咁，抹茶軟雪糕嘅抹茶味道好出，好好味。再加上 mochi ，紅豆同埋塊餅乾仔。最特別就係成雪糕嘅底部鋪滿晒杏仁片。雪糕同杏仁片簡直係絕配！係大滿足呀！所以開心快樂其實好簡單，一份好味嘅飯後甜品就已經足夠喇:)。…Read More

星期六午飯時間，喺灣仔覓食嘅時候，突然間被一張蝦多士嘅照片吸引住。見到佢嘅Menu有蓮蓉西米焗布甸，就即刻被吸引住要試吓。呢度喺奇華餅家嘅旗艦店嘅樓上，一間新嘅餐廳，叫做奇華茶室。聽餐廳嘅名字，會以為係茗茶嘅。但係茶嘅種類唔多。Menu上面標榜住「香江小食」丶「港式三文治」丶「香港滋味」嘅大標題。但係對於一個香港土生土長嘅我嚟講，奇華茶室嘅菜式/ 食物一啲都唔港式。「香江小食」竟然係有星洲炒蘿蔔糕；「港式三文治」竟然有俄羅斯芹菜雞肉卷；「香港滋味」第一味竟然係「馬來鮮蝦喇沙」。近年有個名詞叫做「偽洋港女」，意思就係指有啲女仔明明香港出世，香港大，但係滿口英文，連講廣東話嘅時候都帶英文口音同埋淨係溝鬼仔。而我就覺得奇華冰室簡直就係「偽港洋餐」，就好似俗語咁講「掛羊頭賣狗肉」。講返食物先。我點左一個粟米燴石斑飯同埋蓮蓉西米焗布甸。粟米燴石斑飯飯係蛋炒飯。汁比較少，帶有芝士味。飯粒有啲堅硬但係尚有誠意。魚，好鹹。非常鹹。佢哋用咗西式香草嚟處理條魚。我從來都冇食過港式嘅粟米石斑飯係會用 herbs 做㗎囉。魚柳仲有骨添。如果有勇士去奇華茶室點呢個飯食就真係要小心啲啃骨呀！蓮蓉西米焗布甸蓮蓉同西米嘅比例剛剛好。一啲都唔會覺得太甜。非常好味道。佢哋嘅廚房做咗半開放式。所以食客可以見到廚房裏面嘅活動。廚房裏面嘅員工有啲帶帽，有啲無，我諗好多機會跌到頭髮落去啲食物度。另外佢哋冇一個人戴口罩，又不停喺廚房度講嘢。都幾唔衛生。正所謂眼不見為乾淨，如果要做半開放式廚房，就做戲做全套啦，唔該。奇華茶室仲會收一個好虛無縹緲嘅費用叫做服務費。點解虛無飄渺？我都唔知道服務從何來。可能餐廳實在太新，員工欠缺訓練，所以服務同餐廳收取嘅價錢嚴重不成比例。有一樣嘢奇華茶室處理得非常舊香港，好令所有人厭惡嘅處理手法就係找錢嘅時候唔知點解唔可以比一張＄50 / ＄10 紙或者一粒＄10銀/ 兩粒$5銀… 而要找到好散俾你，搏你挾俾10%虛無縹緲嘅服務費之後，再俾小費。其實小費嘅嘢，如果服務員態度或者服務比較好，大部份食客都唔會吝嗇。希望奇華茶室認真檢討佢哋嘅服務態度同食物質素。其實做洋式港餐冇問題啫，唔好扮「港式」啦。如果餐廳係因為奇華餅家所以要堅持「港式」食物嘅話，就唔該換過個Menu。…Read More

重陽節嘅早上因為要去掃墓所以想食一個比較飽肚嘅早餐。諗起已經好耐冇食粢飯，而君戶鍋貼大王比較早開，所以就去咗君戶食早餐。君戶嘅位置喺灣仔嘅正中心。平日人來人往，非常繁忙。因為係公眾假期嘅早上，店內丶店外都非常平靜，可以靜靜地食一個早餐。我叫咗一個肉鬆粢飯同淡豆漿（無糖）。當我同店員講我想我嘅粢飯多肉鬆小飯嘅時候，佢並冇問我任何嘅問題。通常黐飯店嘅姐姐都會講兩樣嘢：第一，多肉鬆要加錢㗎喎；第二，小飯做唔到個㗎喎，包唔實㗎喎。今朝早君戶呢個姐姐竟然一聲不響就幫我落單。我心諗佢會唔會真係幫我做多肉鬆小飯呢。果然係完美啊。係我最鍾意食嘅粢飯比例 。哩度個豆漿比較結。豆味唔重。OK啦。整體來講，我對哩個早餐係非常滿意嘅…Read More

相信大部份朋友對太湖海鮮城呢個名字一啲都唔陌生。太湖可以話係老牌酒家中嘅表表者。午飯時間有點心，夜晚有小菜丶海鮮。的確係同家人聚餐或者做節嘅好地方。但係大家有冇諗過午飯時間同幾個飯腳一齊去太湖食佢嘅小菜海鮮呢？呢一篇食評我主要係想推介一味上湯龍蝦煎米底俾大家。何謂煎米？就係將米粉壓成一餅，底面煎至乾身丶香囗。試諗諗喺脆卜卜嘅煎米上面再淋上上湯龍蝦。龍蝦係波士頓龍蝦。龍蝦肉非常彈牙，上湯汁稀結適中，味道恰到好處又唔會搶咗龍蝦嘅鮮味。煎米非常香口，再點埋呢個上湯汁…真係無敵嘅組合啊當然如果你多人一齊食嘅話可以叫多過一隻龍蝦，又或者加啲錢轉做大隻啲嘅加拿大龍蝦。我同三位飯腳點咗一碟上湯龍蝦煎米底（加底），一碟燒味拼盤，一個菜，埋單大約百三蚊一個人。工作日嘅午餐嚟講唔算平，咪當平時做嘢咁辛苦，間唔中慰勞下自己囉。…Read More

經已入秋，天氣非常乾燥。覺得連身體𥚃面都乾旱旱咁。經過船澳街嘅一豆花。心諗食碗甜甜哋丶濕濕哋丶軟稔稔丶滑溜溜嘅豆腐花都好喎。由於一豆花並不設堂食，門口只係放咗兩張櫈俾啲唔想買外賣，想即刻啪咗碗豆花嘅人坐。所以我就決定外賣喇。行到店員面前，噢！有驚喜即刻嗌左碗薏米銀杏豆花。店員攞起個外賣碗，將豆腐花裝到半滿，然後揭開另一個煲蓋。煲裏面就係重點：薏米銀杏糖水！店員將呢個薏米銀杏糖水填滿個外賣碗，並冇再加糖水。味道又係點呢？味道啱啱好。甜味恰到好處。豆腐花好滑，再加埋銀杏同薏米嘅煙韌，口感一流呀。食完之後真係成個人都潤晒呀。…Read More

星期日晏晝喺灣仔想食清啲，記得「靠得住」賣點係冇味精嘅粥麵，所以就去咗靠得住試吓佢係咪真係靠得住。叫咗一個午市套餐：豬膶魚腩粥加銀芽炒麵，再加一條油條。首先講吓個粥先。足底有啲稀，用魚熬嘅，有好甜嘅魚味。至於豬膶同魚腩嘅數量呢…就有啲吝嗇囉。得三膶二腩。個豬膶新鮮同食落口係爽嘅魚腩呢…一般啦，不過不實。雖然剩係得兩舊魚腩，但係一啲都唔係特別大舊㗎喎，一般魚腩粥嘅魚腩size。呢碟銀芽炒麵可以改過個名叫「堅多油炒麵加銀芽」。啲麵條條都”令蠟蠟”啊至於條油條… …好幼。真係冇食過咁幼嘅油條。咬落去都有啲硬，仲有啲油添。我諗條麵粉發嘅時間並唔足夠，所以炸起上嚟嘅時候根本發唔起。嘥晒啊。等緊食物上枱嘅時候，揭一揭佢個餐牌。嘩嘩嘩嘩嘩… 真係嚇死寶寶呀 混醬腸粉要＄26?!?!?! 斜對面街間鋪頭賣緊$14咋喎。鮮炸油條要＄20?!?!?! 粗過對筷子少少㗎咋喎，仲有油淋淋添。銀芽炒麵仲平過條油條同齋腸?!?!?!?!?!?!?!負責為靠得住定價嘅人士係咪離地咗啲呢?仲有，呢度會收取一個好虛無嘅費用，叫做服務費。點解虛無？因為都唔知嗰個「服務」是從哪裏來的總括來講，食物如其名，只係靠得住，同必食或者好食有段距離。最後要提一提會去靠得住食粥嘅朋友仔，粥𥚃面好大機會有魚骨所以食嘅時候小心啃骨。…Read More

路過旺記好多次，但係可能佢個門口實在太唔起眼，所以佢開咗差唔多成年都冇試過。偶然喺面書見到一個推介蛋包飯嘅文章，先至發現原來我一路都掂行掂過，錯過咗呢間冰室。第一次嚟旺記冰室，點咗佢嘅招牌「自家製叉燒日本滑蛋飯」。個滑蛋真係好滑，入口後好似會流落條食道咁，食得出係日本蛋，因為蛋味比本地蛋濃。至於哩個自家製叉燒呢… 質地係OK嘅，一啲都唔韌，肥瘦適中。冇咗平時燒臘舖叉燒嘅嗰陣炭香味反而比較夾呢個滑蛋。個醬汁都係旺記冰室嘅招牌，都係自製嘅。唔係太鹹，帶少少甜。總括嚟講呢一個叉燒滑蛋飯同平時茶餐廳叉燒滑蛋飯嘅分別係叉燒每一塊嘅肥瘦都好適中，唔會一舊瘦一舊肥或者成碟都係肥叉燒 / 成碟都係瘦嘅。個蛋嘅蛋味比較濃，而滑蛋係完全覆蓋晒整碟飯嘅。醬汁都冇其他地方嘅叉燒滑蛋飯咁咸。整體嚟講啱啱好。…Read More

煩囂嘅灣仔食肆林立，可以話要乜有乜。中法德意日俄韓泰印… 真係不得不講一句 “you name it”。喺哩個每行兩步就有一間食肆嘅灣仔區，Kelly’s Cape Bop 成功突圍。用既健康又新鮮嘅食材及絕無味精打響旗號。絕對係健康之選。除咗食材新鮮之外，佢哋嘅 kimbop (紫菜飯卷）極之美味。難怪米之蓮都要頒粒星俾佢。紅蘿蔔絲，青瓜絲，雞蛋絲，醃蘿蔔絲再加埋牛肉、豬肉、吞拿魚、蔬菜、芝士或者辣魷魚同飯一齊用紫菜包住。食材好新鮮，真係紅蘿蔔有紅蘿蔔味，肉有肉味，蛋有蛋味。美味得嚟又做到均衡飲食。店長 Kelly 幾乎每一日都會喺鋪頭。望住佢整每一個紫菜飯卷，真係感受到佢對食物嘅誠意。除咗紫菜飯卷之外，Bibimbop (韓式拌飯) 都好美味，仲即叫即整添。大家如果去開灣仔區，真係行過路過唔好錯過啊！…Read More