yumshackyip's Profile

久唔久都要有女朋友去打吓卡食啲靚嘢食嘅，唔係真係好容易地位不保（而家佢多咗12個老公）呢條街本身都好多餐廳，所以每次經過見到都想試吓，今日趁星期日終於可以嚟試吓經理BLT潛艇叫得blt ，一定知係穩陣嘢，煙肉煎得香口又唔會乾爭爭，蕃茄同生菜夠爽嫩，配埋沙律醬，清新隱陣之選。國王全天早餐係囉，唔知點解女人真係特別鐘意食全日早餐，佢都一樣，仲要係國王食量，呢個啱晒，咩都有，煙三文魚，牛角包，炒蛋，大啡菇，沙律菜…最緊要佢打卡打得開心，覺得好味個陣又會賞我食兩啖，一雞兩味，唔錯唔錯跟餐飲品自己揀咗咖啡，嗯，無下次。下次都加錢轉特飲啦。而女朋友就睇相揀咗杯焦糖朱古力，嘩，一嚟到靚到佢已經心心眼影咗一輪，飲落係好飲兼大杯嘅，好抵飲，佢飲唔晒都分咗幾啖畀小弟包尾。最緊要女朋友影得高興，我又食得開心，帶佢嚟啲又靚又💛嘅小店，大家夠晒高興。…Read More

女朋友嘈話要食酸菜魚嘈咗成個月，終於夾到時間試吓呢間新開小店蒜泥白肉想試吓同譚仔有咩分別所以揀，又真係好唔同，呢度係厚身少少，本身已經入味，偏麻多過辣，都幾頂癮，如果再多少少蒜泥更好，個底仲有幾片荀（？）夾埋一齊食感覺清新啲，無咁膩酸菜魚（2-3人份）本來仲諗住加配幾樣餸，不過店員姐姐話入面除咗木耳同頭腐皮，其他本身都有，所以淨係加2樣就算我本身就好懶食魚嘅，要剔骨好麻煩，但女朋友就好鐘意食魚，所以平時就到佢食魚又唔洗剔骨就啱晒我，肉質好鮮嫩，份量都唔少，好在阻止咗女朋友仲想加嘢（佢成日眼闊肚窄）成兜嘢成半張枱咁大，唔怪得姐姐提我地唔夠食先再加嘢會好啲。抵食提外話，呢度啲茶又幾好飲，我地估應該係麥茶？…Read More

自從女朋友轉咗工之後，（同埋追咗mirror之後）見面時間少咗，要成日自己食晚飯，一個人有咩好地方好去？唯有屋企附近是但食個飯就算。今日心血來潮想食個邊爐，你知啦，香港人幾鐘意打邊爐先得㗎。最近佢做緊個個沙嗲湯底都唔錯，68蚊配一份牛肉，蔬菜盤，烏冬，水餃，芝士腸，扎肉，冬菇等等。一個人食夠晒飽，唔夠仲可以再加下啲火鍋料，例如我就加咗份午餐肉，同埋將飲品升級做巨峰提子特飲。而且呢間北角分店算新開，好乾淨企理，仲有人送埋餐，呢個價錢好抵食啦（最重要係一條友去食都唔使驚尷尬囉）…Read More

班同事好鬼鍾意叫嘢飲，就快要比月費熊貓咁濟成日飲開有黑糖珍奶都想試下飲吓果味梳打，今次試吓呢間心事如塵，睇相好似幾文青，應該d飲品幾特別啦，叫咗杯白桃梳打黃桃肉欣賞佢嚟到都仲係好梳打，無走晒氣，而且真係足足有半舊黃桃係度。不過除咗梳打同黃桃之外，無其他了。唔計熊貓價再貴啲同埋運費，單價都要成＄32。嗯。 題外話，同單同事仲加咗2碗烏冬同幾杯嘢飲，但佢都係就咁一個袋盛住，外送員送到樓下個陣因為袋濕到穿咗，成杯熱飲跌咗，烏冬湯又瀉晒，要再補送，真係難為了外送員要走2轉，呢一點店家真係應該要留意下。…Read More

由細到大都鐘意食麵多過飯嘅我最常就係去榮記整返碗車仔麵，貪佢開靚正，店員話不多，唔會有好理想嘅服務，一句食咩，重覆食物，上菜，食完埋單，有時想靜靜地快食個晚餐，就係咁簡單。咁多年嚟都係咁嘅服務咁嘅味道，呢啲就係香港小店嘅味道三餸河粉呢度每碗粉都會跟少少菜，而我每次都走唔甩一定會叫牛根、豬紅、墨魚頭，睇心情會配吓河粉或者米線。湯底超濃，本身已經係腩汁湯底，食嗰陣再落少少辣油（記得少少好喇）味道再惹味多啲。女朋友掛住去睇咩鏡粉應援，一個人嘅晚餐就係咁簡單。…Read More