fz.eaten's Profile

小店環境清新，有幾個半露天位置。店內以深木色餐枱配上葡萄牙標誌性藍白階礦點綴，整體感覺簡潔、悠閑。Basque Cheesecake Pistachio ⁷⁸為咗依款開心果巴斯克而嚟，無令我失望。口感綿滑飽滿、濕潤度啱啱好，開心果味道好突出同自然，上面舖咗薄薄開心果粒粒，提升咗啲口感層次。重點係食完成個都唔覺得好膩，加埋杯冷萃，成件事好滿足。Cold Brew Black ⁵⁰清新爽利、甘甜有層次，味道討好。…Read More

餐廳裝修佈置好有心思，從門口到入面都擺滿各式各樣露營用具。室外室內空間感充足，坐得舒服。柚子巴馬火腿薯仔沙律 ⁵⁸薯仔蓉口感綿滑，帶微微柚子香。味醂魚乾 ⁴⁸比一般出面食嘅厚身少少，食落更加有咬口、煙韌。明太子雞翼 ⁵⁸雞翼皮薄有油香，包住滿滿明太子同雞肉，好惹味。月見醬燒飯團 ⁴⁸極力推薦！充滿飯焦同醬油香，口感香脆之餘又煙煙韌韌咁，蛋黃汁令口感多一重滑溜蛋香！香蔥蒜末牛舌 ¹⁰⁸建議先輕輕燒熟其中一面，然後放埋蔥蒜再燒到牛舌邊位至焦香。爽口又充滿蔥蒜香。全牛特選拼盛 ⁴⁷⁸有牛肋肉、牛里脊肉、牛舌、牛胸腹、雪花牛小排。整體嚟講質素唔錯，肉嘅厚薄同油花適中，肉味幾濃郁，有咬口得嚟又唔會輆口。…Read More

餐廳座位夠多，室外位置有大枱可以同三五個朋友一齊。食物整體份量偏多，好啱share。芒果蟹肉沙律 ¹¹⁸蟹肉份量好澎湃，食到尾都仲可以食到。味道清新爽脆得嚟又有蟹肉咸香。泰脆炸豬手 ¹⁴⁸每件以一口大細呈現非常好，肉質緊緻有咬口，皮嘅部分好香脆惹味。馬沙文香料牛肉咖喱 ¹²⁸香料味道層次幾豐富，牛肉吸收到醬汁之餘仲保留到肉香。仲有唔少蔬菜伴碟。蒜蓉炒芥蘭 ⁷⁸助料味道豐富，一貫泰菜應有水準。略嫌偏咸咗些少。…Read More

裝修同嘢食都有啲似美麗華之前果間MUTA.以二人枱為主, 少量四人卡位同露天位.坐得幾舒服, 閒日夜晚仲可以唔洗等位𠻹.香煎帶子、蓮藕脆片 拌 日式油醋沙律 ¹⁰⁸沙律菜幾高質, 撈埋蓮藕片,多一重香脆口感, 整體味道正常發揮.三文魚籽、三文魚皮脆脆 配 明太子忌廉汁貓耳朵 ¹³⁸貓耳口感豐滿, 帶少少煙韌, 極之creamy.明太子味好濃郁, 夾雜埋魚籽同脆魚皮,成件事好配合.炸原隻軟殼蟹千島醬薄餅 ¹³⁸餅皮好薄, 邊皮位香脆, 中間保持煙韌,芝士嘅咸香味好香口, 同樣帶有煙韌口感隻蟹炸得香脆, 肉質鬆嫩,養大啲會更好 ¨̮ 芒果抹茶梳打 ⁵²濃濃芒果味, 繼而慢慢滲出抹茶嘅甘味,不過不失.可惜當晚佢哋啲甜品,因為已經賣晒食唔到.…Read More

位置於新墟村村口嘅一間小店，帶有標誌性嘅綠色外牆。成個氛圍都好chill、好寫意。炸雞牛油果Pancake配芝士薯格 ($88)Pancake鬆軟，幾香牛油味。味道主要嚟自舊炸雞，辣辣哋、炸得好香口。成件事口感好豐富，有脆辣混搭香腍再加埋牛油果，好惹味。芝士薯格更加出色，芝士咸香味好突出。開心果奶蓋椰青水 (凍, $46)上層奶蓋綿密香滑，開心果味自然、突出。配椰青水，清清哋之餘又唔會太heavy。…Read More

【拉麵×珈琲】一個好新鮮嘅拉麵體驗，品嚐到嘅食物配搭都係經過店家親自調配。店員亦會親自講解一次當日食材同流程。今次試晒佢哋個濃湯系列，同樣都升級套餐($75)，加粒溏心蛋($10)。雞白湯拉麵 ($98)味道真係好濃郁，仲帶啲漿口，並不是會涸喉嘅味精湯。配料有豚肩肉、鴨胸、白蔥、無花果、粟米芯同紫菜。蝦湯 ($98)同樣好濃郁，蝦嘅咸香味好突出，中意重口味少少建議揀哩款，無花果指明要同豚肩肉配埋一齊食，果香同豚肉嘅油脂又幾夾，甜咸之間有股微妙嘅化學作用。麵質偏向爽口同滑身。當日嘅冷卒珈琲果味突出、口感清爽，配搭濃郁嘅蝦湯，兩種截然不同嘅味道喺口腔慢慢開始變化，好特別同好新奇。套餐除咗冷卒珈琲仲有昭和硬布丁，一貫地蛋香味濃，口感滑溜。焙茶巴斯克蛋糕 (+$35)店家另一款推介嘅甜品，焙茶味香濃，蛋糕口感偏向結實，奶油相對濕潤。留意到店家仲有其他大大小小周邊產品。據了解係店員親自設計，值得支持！…Read More

裝修偏向地道西班牙餐廳風，座位數量唔算多以四人枱為主，再加上一條長型吧枱。Broken Egg ($98)薯條口感幼細，炸得香脆、惹味之餘又唔過火，撈埋雞蛋同煙肉粒一齊食，令薯條多咗份蛋香味同濕潤嘅層次。Bake Spanish Cid Fish w. Red Pepper Sause ($148)紅椒醬厚厚咁覆蓋鱈魚上面。個名雖然好簡單，但係醬嘅味道就好複雜、飽和度高。鱈魚肉質緊實細緻，帶啲咸香，魚皮爽彈有咬口。個醬汁同魚肉好配搭，加埋底下幼滑薯蓉，成件事好夾，好好味。Red Prawn Paella (100g, $368)紅蝦配意大利飯主要攞蝦膏嘅精髓，令到成個飯都充滿蝦獨有嘅咸香，口感亦都好濕潤同飽滿，撈埋沙律醬、羅勒醬同檸檬汁，味道極之豐富。…Read More

Slow Cow 招牌 ($155)頂級美國三角脊扒牛肉(並盛 90g)、蒜香醬油炒飯、芥末籽肉汁、自家製鮮忌廉、日本蘭王生雞蛋黃 & 有機水耕菜沙律。再次幫襯嘅小店，肉烹調得比之前更加出色。8片慢煮牛肉以風車形態包住炒飯，上面加咗蘭王蛋黃、鮮忌廉同炸蒜片，賣相吸引。牛肉肉質好嫩腍、厚薄程度啱啱好，邊皮位置有輕輕炙燒過，所以有股焦香味同緊實口感。肉味香濃而油脂感相對輕微。飯底充滿蒜香同醬油味，夾埋蛋黃同佢哋嘅鮮忌廉，令到原本惹味嘅咸香更加複雜。而芥末籽肉汁再濃郁多少少就更完美。…Read More

Toxic Sluch ($88)雜莓、芒果、荔枝配仙人掌汁，都係啲酸酸甜甜實無死嘅飲品。好啱夏天飲，消暑解渴同打咭一流。招牌沙律 ($118)不論係沙律菜同配料嘅份量都好多，包括有牛油果、烚蛋、藜麥、番茄同石榴，整體味道都係酸酸甜甜，好開胃。墨西哥夾餅派對 (3件, $208)夾餅口感好香脆，充滿穀物味。蘑菇、雞肉、牛肉3款食材都好Juicy，配合埋上面啲醬料，令味道好有層次之餘，仲好有墨西哥風味。海膽醬大帶子扁意粉 ($228)三隻帶子真係大大隻，有輕輕炙燒過，上面再舖咗魚子，食落口感好豐滿。扁意粉口感好creamy，但又唔會感覺好膩，有海膽獨有果種甘甜味，配上菇片令口感更加有層次。…Read More

午•席前壽喜燒 (JP Wagyu Sukiyaki, $580)有前菜、茶碗蒸、三個唔同部位嘅和牛肉片、日本野菜同其他主食甜品等等。前菜同茶碗蒸味道唔錯，喺食壽喜燒之前，師傅畀咗3款配料：蘭王雞、芥末、柚子胡椒醬、蘿蔔蓉仲有好少見嘅雲朵蛋！依度係用關東風去烹調，經過講解即係只會用自家調製嘅壽喜醬汁同水去煮，優點係可以盡量保留食材原味道，同時唔會愈食愈濃味。宮崎牛肉眼同京都姬牛肩肉油脂感豐富、油脂比例參半，口感極嫩；宮崎牛西冷肉味更濃、更有咬口。撈埋雞蛋口感會更有層次。店家仲調配咗雲朵蛋去配合和牛，甜甜哋之餘又食到好特別嘅綿密口感。野菜以同樣烹調方法處理，所以好入味。加埋其他主食同甜品，非常之飽肚同滿足！…Read More

烤菜蟹肉沙律配麻香菠蘿汁 ($118)紅黃椒同茄子經過烤焗處理，口感變得香腍，沙律菜除咗有蟹肉嘅咸香味，仲帶有丁點麻香嘅衝擊，好特別。香煎虎蝦冬蔭公扁意粉 ($168, 轉手製戒指粉+$25)戒指粉口感好彈牙、有咬口，吸收咗冬蔭公獨特嘅香辣味，惹味之餘濕度啱啱好，虎蝦亦都交足貨，新鮮而且大大隻。香辣水牛城雞塊 ($88)口感偏向紥實，有啲似印度燒雞，辣度惹味、有層次，作為配菜一流。黑松露野菌醬薄餅 ($138)餅底好香脆、厚薄程度啱啱好，上面嘅芝士同黑松露醬味道突出，舖咗好多松子，令口感變得更加豐富。薄荷朱古力牛奶 (熱, $48)兩款味道都好平均同清新，唔會偏重其中一邊。口感順滑厚度適中。總括係一間好用心製作嘅小店，食物同服務質素都好好。…Read More

裝修新淨，環境配色和諧，行輕奢南洋風。空間幾闊落，卡位坐得舒服，餐廳仲有獨立包廂。二人套餐($348)特色咸蛋雞翼 (2隻)好惹味嘅前菜小食，咸蛋黃醬處於起砂狀態，均勻覆蓋成隻雞全翼，咸香味濃郁。文華海南雞飯雞肉好滑溜，油脂感比例啱啱好，去晒骨、啖啖肉，肉質偏嫩又有啲咬口，夾埋油飯一齊食好滿足！招牌大蝦喇沙 (+$40)喇沙湯味好濃郁，味道層次豐富，唔會有死咸嘅感覺。配料質素就正常發揮，略嫌摻摻腍咗少少。…Read More

環境氛圍有格調，近似8,90年代嘅港式西餐feel，坐得舒服。牛油果芒果蟹肉他他 ($88)好清新嘅前菜，三款食材配搭得好好。酸甜嘅芒果，配搭蟹肉咸香，底層牛油果帶出順滑口感。士拉差雞翼 ($58)永無失望嘅香口嘢，外層炸得香脆，肉質嫩滑、充滿油香。滿滿蜆肉蝴蝶粉 ($118)蜆嘅份量好澎湃，每粒肉質都好彈牙飽滿。醬汁令蜆肉更加惹味。安格斯Prime西冷 8oz 配烤大蒜 ($118)厚度適中、肉味幾濃、入面仲保留肉汁，搭埋上面蒜粒或者烤大蒜更加惹味。芝士龍蝦 (半隻, $78)芝士好惹味，不過蝦肉份量真係好少，基本上三四啖就完咗。…Read More

泰式香辣冬陰功意大利粉 ($88)整體極之惹味，辣度好到位，不過唔會留喺口腔好耐。配料份量多，尤其是蘆筍、車厘茄同本菇，食起嚟口感好豐富，同時又帶啲酸甜味同食材本身嘅鮮味。十種蔬菜田園全日早餐 ($148)種類同份量都好足料，整體質素都屬於中上，兩個人食完會有飽肚感嘅 all day breakfast。台式鹽酥雞 ($68)炸得好香脆惹味，雖然無鹽酥雞本身果浸油香，不過勝在調味豐富同飽滿啖啖肉嘅口感搭夠。…Read More

屹立喺工廈區嘅一間咖啡小店，門面低調、座位數目唔多，大約15至17個左右。蟹肉牛油果貝高 ($108)價錢幾進取，不過食材份量同味道都交足貨，bagel中間厚厚咁舖咗兩層蟹肉同牛油果，蟹肉上面加咗層芝士，再經過炙燒處理，食落浸炙燒嘅香口，同蟹肉幾夾。加分位係入面個醬汁，味道層次好豐富，食得出有洋蔥同帶有少少芥末果種辛口。bagel內層香烤處理過，煙韌之餘又幾香口。整體配合度好高。除咗bagel仲有質素唔錯嘅沙律菜伴碟。Cold Brew Tonic ($55)…Read More