睇左youtuber介紹，一直都好想試吓，台式火鍋任食任飲成人每位$298，上星期卒之訂咗位，我揀左星期五早鳥時段5pm-7:30pm離座人頭費有8折，食足2.5小時，相比之下，已經好過嗰啲限時只可吃90分鐘或2小時，可以任吃2.5小時真係鬆啲，唔使咁趕。張長枱好大，應該可以坐6人，但而家疫情關係只可以坐4人，所以都坐得好寛鬆，好舒服。湯底 - 跟嗰youruber推介，一邊椰子雞，一邊麻辣蕃茄牛肉，聽講係店家用新鮮蕃茄自家打醬特制，唔係就咁落茄醬茄膏，所以一定要試下。先飲下椰子雞湯底，好濃好甜好味，入面仲有幾舊大大舊嘅雞腿，直頭可以當湯飲，而麻辣蕃茄牛肉湯底其實就咁飲都好好飲，我叫左小辣，所唔會太刺激口嚨，佢啲麻辣好順口好舒服，湯底好濃郁，仲有幾塊牛肋條，好足料，兩款湯底已經好滿意，叫鴛鴦湯底要另加$48。店員 - 旁邊有兩支杞子清湯係俾你冇湯嗰陣自己加湯，好欣賞如果清湯有一支差唔多用完，店員會好快咁換過支俾你，裝火鍋料嘅吉盤，店員都會好快收左佢，食物係用QR Code落單，嗰頭落完order，頁面都未close，食物就送到嚟，速度之快真係未見過👍🏼一坐低覺得風口有啲大風，店員都即刻調細嗰風，好貼心。我覺得椰子雞加杞子湯還可以，不過麻辣蕃茄牛肉加多左杞子湯就會偏甜，唔係咁適合，所以我之後改咗加水，水可以自己去水吧攞，一樣如果水倒曬，店員都會好快幫你換過一支，但加得水多，麻辣又會越嚟越淡，問店員可否加返啲辣，初時店員話唔得，但過左陣就攞左一碗麻辣醬嚟，真好！個人認為加一殼等於小辣。黃金魚皮 - 一開始店員會放低一碟咸蛋炸魚皮，雖然係凍，但係都幾脆，幾好吃，不過吃多塊就覺得有啲咸，如果可以減返少少咸就更好啦！Prime Grade美國安格斯肥牛片 - 雖然得一種牛肉，但覺得肉質唔錯，幾有牛味，果然美國牛嘅牛味係比較濃啲，亦好過有啲店二三佰蚊一碟嘅牛肉都冇呢個好吃，呢度仲可以任食，正！如果可以切返厚少少就更好啦！而家太薄，好易散！丸類 - 一黎到嚇親我，咁細粒嘅！一方面覺得咁都好嘅！可以吃多啲野，唔會吃丸都吃飽，但另一方面又覺得真係細咗少少，如果可以大返一倍就差唔多，因為太細粒真係冇乜口感！但都吃得出啲丸味道都唔錯！幾新鮮好味！墨魚丸吃到粒粒墨魚肉，所以之後我只叫手打墨魚滑，一分二或三粒，咁就大粒啲啦！^^西班牙無激素豬肉片 - 都唔錯吃，不過只吃左兩碟，主力都係猛攻安格斯肥牛片。鴨血 - 覺得切得薄左啲，不過都夠入味，不過不失，唔算最好吃，不過都算唔錯，可以滿足到鍾意吃鴨血嘅我！蜂巢凍豆腐 - 幾好味，尤其放落麻辣蕃茄牛肉湯底，豆腐吸晒湯汁，因為小辣又唔會好刺激口嚨，好順好正！台灣黑糖冬瓜檸檬茶 - 冬瓜茶味唔夠濃，檸檬味多啲，又甜左啲，如果比例上再調整下會更好！烏梅山楂茶 - 打邊爐吃咁飽，飲呢個就啱啦！解膩！不過我個人覺得有啲酸，甜多少少會好啲，不過如果唔鍾意甜嘅！呢個比例可能啱啦！飲品 - 另外仲有兩款冷泡茶，各式汽水、鴻福堂飲品，仲有一個暖櫃放咗飲品，旁邊有室溫飲品，非常體貼細心，照顧到不同需要嘅顧客，抵讚！1664 ($38/500ml) - 我覺得都好抵飲，酒吧一支都要$60-70，街買都要$1x/罐，所以叫咗杯嚟飲，嗰頭用app落單，app都未熄，呢頭啤酒已經嚟咗，速度之快令我地好驚嘆！自己都有試過買罐1664返屋企飲，但覺得冇乜特別好飲，都係比較鍾意飲Hoegaarden，但今次可能係新鮮啲，定係我之前買錯味呢？(聽聞1664有好多味)，今次好飲喎！都有果味，果味比Hoegaarden多少少，但鍾意邊隻多啲，暫時未分得出，飲多啲再算^^總結 - CP值好高，食物都有水準，又有足夠時間，好似如果唔係早鳥8折時段，仲要唔限時，真係唔知去邊度搵！服務好，出菜、收碟超高速，我會介紹俾多啲朋友嚟！自己都會再嚟！希望餐廳可以一直keep到水準！…Read More
