得閒哈哈笑's Profile

夏日炎炎，最好就係室內食串燒。今次黎到呢間重慶燒燒烤專門店食串燒。講吓食左乜野先。燒雞脾。皮脆內嫩，保留到肉汁，同懷舊炸雞脾或燒味鋪嘅切脾油脾感覺好唔同，可謂別具一格。燒牛脷。醃得幾好。醃料分佈平均，唔會太咸或太辣。燒出黎有咬口之餘，又有充足嘅肉汁。燒司華力腸。肉質幾鮮味，燒出黎個皮脆卜卜，配合埋個酸酸甜甜嘅酸辣醬，味道一流。燒蒜香茄子。整到成塊蒜蓉茄子葱餅咁，好勁，夠覇氣，蒜味濃爆，我鐘意重口味。正爆。燒鮮露筍。好幼嫩，細細條易入口咬落爽脆啪啪聲又幾多水出，仲散發著陣陣露筍鮮香，香過花露水。燒菠蘿。實而不華，清新多汁，酸酸甜甜，食完D肉食幾片菠蘿感覺幾正。…Read More

晚飯吃了個京燒銀鱈魚飯餐。首先食沙津。生菜幾新鮮，咬落索索聲，又酸酸地咁，開胃醒神。再黎食個味噌昆布蕎麥麵。味噌湯幾濃郁。麵條彈牙，有蕎麥味。昆布滑溜，爽脆。跟住到銀鱈魚飯。銀鱈魚煎得甘香，啖啖肉，油脂夠得黎唔會過火。燒汁夠濃，濃得黎又夠味，夠味得黎又唔會搶晒D魚味。飯粒非常煙靭，加上所有餸及燒汁蓋上飯面，令到飯的熱度保存得非常好。最後試埋個抹茶小蛋卷。抹茶味夠濃，而且忌廉打得好幼細，食落好滑，有層次。甜度較得幾啱，唔會太甜。佢地之所以能夠靠呢件抹茶蛋卷打響名堂，真係有原因。…Read More

放工後，同事帶左我黎呢間板燒郎燒肉鐵板專門店食晚飯。一坐底就點左好多野，我地都淨係燒牛肉。有厚D嘅，有薄切嘅，仲有牛肉粒。整體質數同味道都唔錯。其中牛肉粒最好，燒完之後香得黎依然又腍又多汁。除此之外我見到仲有D海鮮可以燒，好似蝦，扇貝等等。除左要生野外，都叫左唔少煮熟左嘅野。我覺得整得都幾好。好似牛舌，豬頸肉等。細緻得黎，又燒得香脆加埋有D咸香。估唔到仲有燒黃花魚，都燒得幾香脆。另外仲有壽司。我淨係食左兩件玉子壽司，甜甜地又幾軟綿綿咁。我好鐘意佢地安排既份量，樣樣都係一件到兩件。每樣試少少，咁就可以有胃口試多D唔同款式嘅野。飲品款式都幾多，連冬瓜水，忌廉溝鮮奶都有。仲有沙津，雪糕咁。都幾抵食。…Read More

這盒飯來自一家小店，小店位於繁忙的中環，在中環一條狹窄的小巷之中，小巷之中的一家小店,名字叫好燒味。盒子是蔚藍色，像天空，像海洋，懷抱著暖洋洋的生命。打開盒子，有一排白切雞，檸檬黃色的皮，冰清雪白的肉。黃色的皮晶瑩通透。雞肉新鮮，肉汁保存得相當好，又沒有多餘的肥膏，充滿雞的味道。配上附帶的葱油，味道瞬間昇華到另一境界。由於蒽油的味道恰到好處，葱的香味作為一種引力，使鮮雞爆發出一股蘊藏在雞肉內一種潛在的特質，細嚐之後，我認為是兩種不同的享受。另一排是燒鴨子。棗子紅色的外皮，十分香脆，脆得咬下去會發出嗦嗦聲，十分動聽。除此之外，那棗子紅色的外皮又帶著油香，融合了底下薄薄的油脂，再滲透入那嫩滑細緻的肉質之間，咬下去，每啖都是濃郁的鴨子香。肉質因此更顯得腍滑，既有澎湃得滿瀉的肉汁，又不失其應有的質感。再添上附上的燒味汁，實在非常匹配。…Read More

近來天氣又潮濕又陰寒，最好就係食D麻辣野驅驅寒。見呢間肥姐麻辣館評價不錯於是走來試試。分別叫了口水雞，黃金皮蛋同辣子肥腸，都係中辣。口水雞賣相不錯，又紅又黃又綠咁，幾醒神。入口滑溜溜，肉質鮮嫩。醬汁麻辣郤令人不能停口，我認為配白飯一流，食三碗都唔夠喉。黃金皮蛋晶瑩剔透，啫喱般滑嘟嘟的口感配那種醒神開胃的麻辣醬汁簡直係天衣無縫。辣子肥腸一上枱已經香氣撲鼻，作為一個喜歡麻辣的人，一嚐已經覺得辣得爽辣得妙，大腸當中的花椒八角香味發揮得淋漓盡致。最精彩係沒有油膩的感覺，實在係高水準之作。…Read More

今日咁啱黎到呢間Burgeroom食飯，揀左一個幾特別嘅鵝肝漢堡食吓。睇吓可唔可以用D鵝肝油潤一潤我呢個咁Dry嘅人。果然不負所望，一咬落去鵝肝D油響口入面爆晒出黎，配合果塊同樣DryDry地嘅包真係Fit晒。佢地自家製嘅醬汁同塊牛肉餅好Match,而塊煎得啱啱好嘅牛肉餅賣相吸引之外，裏面又十分Juicy同嫩滑當然仲有最緊要嘅牛肉味。再加埋D蕃茄生菜同塊勁濃郁嘅芝士，整體上份量十分充足，食左一半已經飽飽地。D侍應個個都好smart同friendly, 下次唔返黎encore都唔得。…Read More

中午，我在永樂園買了一個飯盒帶回公司吃。飯盒裏面是揚州炒飯。平日一至五，那個狹小的外賣部總是黑壓壓擠滿了人。炒飯是即叫即炒，包一杯飲品。等了十分鐘，我就拿到我的揚州炒飯。十分鐘後，我回到公司， 打開那個飯盒。炒飯依然熱辣辣，香噴噴。份量相當多，填滿了整個飯盒。因此打開的時候呈現了一個有趣的梯形立方體。份量爆棚不止是米飯，裏面亦有充足的配料。包括有蝦仁，雞蛋，叉燒，生菜。米飯炒得粒粒分明，又帶點醒神的咸香。好吃。…Read More

今晚點了蕃茄濃湯意粉配牛乳炒蛋，仲有招牌瑞士雞脾。雪白精緻設計精巧的湯碗裏，盛載着嫵媚明艷的蕃茄濃湯，濃湯之中充滿一絲絲幼滑誘人的意大利粉，意大利粉之上鋪上了金碧輝煌閃爍耀目的牛乳炒蛋。由於佢咁閃爍咁燿目，細心的大廚不忘灑了一點點又一點點綠悠悠的香草，猶如為凝固冰冷的黑夜，點綴了生氣勃勃的小星星，使人盡享視覺上的快感。蕃茄湯的表現比預期出色，啖啖自然清新的茄香的確無添加味精，喝罷也沒有帶來口乾的感覺。至於另一主角炒蛋，嬌嫩潤滑之餘又不失雞蛋獨特的輕盈舒爽口感，香草活潑的配合使整體表現更勝一籌，突出了整碗意粉的主題，使其背景意大利粉的味覺效果推上歷史高峰，令人無論從舌根到舌尖都能輕易捕捉到整碗意粉的精湛風味。瑞士雞脾絕對是今晚的驚喜之作。肉質層次分明又爽口又彈牙又滑溜溜又鮮甜甜。陰暗深沉獨特濃郁仲出奇地帶有一點普世歡騰甜薑醋味的瑞士汁漫不經心地喚醒了沉睡於源源肉汁內活潑可愛的鮮雞味。深信好脾不妨一食再食，下次一定叫兩隻打孖食。在晚飯時間甚為虛冚的情況下，店員的表現仍十分殷勤有禮。地方坐得舒服之餘，又裝潢着懷舊冰室風格，呢間樓下冰室絕對是必然再黎回味之選。…Read More

今日朋友帶我黎呢間位於大角咀嘅小店食漢堡和薯條。面積大約一百呎左右，頂盡坐得七個客。點了一個香草牛油煎魚堡，同一碟窩蛋芝士焗薯條。飲品方面除左汽水，我更欣賞佢地仲有中國茶提供，好似普洱咁。間舖雖然細，但係佢地都放左好多書俾客睇，真係周到。而且仲將菜式嘅相片同資料填滿牆上每個空間，既能令到環境更有特色，亦方便D客揀野食。個飽黎到，睇到裏面就有生菜，蕃茄，魚柳同D醬咁，就係一個普通漢堡。但一食落去，嘩!! 塊魚柳醃得同煎得真係非常出色，入口每一啖都惹味到好似嘴嚼緊一枚華麗奪目嘅煙花，一吓又一吓咁響味蕾中綻放艷光四射嘅繽紛色彩，實在令我驚嘆。好快碟薯條都上埋黎。煙靭纏綿散發著濃郁芳香嘅芝士溶晒響一條又一條粗獷得黎食落香脆可口嘅波浪紋薯條，熱氣騰騰同時又閃出金黃色的耀眼光芒，簡直係震古鑠今嘅黃金組合。好食到唔駛一分鐘，我同個朋友已經清晒。能夠嚐到美食固然高興，但令我更加高興嘅係睇到呢兩個廚師努力用心製作菜式後交俾客人果刻嘅成功感同滿足感。凝聚了希望，理想，恰似在石屎縫中掙扎求存嘅盛開小花，不屈不撓，散發著人情味。…Read More

夜，十點。走進澳洲牛奶公司，點了一份奶油多。環顧四周，伙計們依然快速地在狹窄的通道中穿梭，提供極速的服務，舉手投足都是效率的體現。此時一份奶油多已經端在眼前。雪白的厚方飽，經過烘焙後，與牛油融為一體，好似披上了一件黃金外衣，閃閃發光。上面再塗上了煉奶，滋潤了乾燥的表面。精準的烘焙時間阻止了貪婪的熱氣掠奪方飽中間的濕度，食落既煙靭又香脆。牛油均勻地溶入厚多士，因此清甜的煉奶也滲透著淡淡的咸香。看似簡單的小食，像一份奶油多，一份炒蛋，往往最能反映製作者的用心和功夫。配合可能係世上最高效率的團隊，幫襯了十幾年，在我心中依然地球上是最好的冰廳。…Read More

夜晚約左大班朋友黎大埔熟食中心食海鮮。早到，天氣又凍。忍唔住去咗隔離呢間鴻發牛什專家叫個魚蛋河打打底。先唔講食物質素，淨係見到呢個加入左炸魚皮嘅陣容，已經相當滿意，魚蛋魚片嘅份量仲要唔少。河粉色澤通透，晶瑩亮麗，具備江西吉水大米嘅鮮，又有長白山九龍泉水嘅甜。炸魚皮鬆脆可口，油而不膩。白如冰雪嘅魚蛋入口滑溜溜咬落軟綿綿但又不失彈性。上湯與河粉比例啱啱好，簡直是完美。咁先係廿幾蚊，抵到爛。雖然臨近收舖時間，老闆見我匆匆食完，收錢時不忘提我其實可以慢慢食埋先走。好呀！下次一定會!…Read More

每次見到呢D大排長龍嘅地方就諗起一眾火山孝子急不及待去進貢一名過氣名妓。唔係有位朋友約出黎再加上佢已經排左成個幾鐘，真係唔會黎囉。多謝朋友先。埋位後我點左個Rib Eye Steak. 彬彬有禮嘅侍應上菜時碟上果一灘蕩漾嘅血水吸引左我大部分嘅視線，肉汁豐富到噴曬出黎，可惜雖然係五成熟但食落去覺得肉質未夠柔軟，唔咸唔淡咁，就係無乜味囉，仲有陣燶燶地嘅味。金黃色的薯條，炸到外脆內嫩，有薯香又唔會太乾。籚筍多汁爽脆唯獨略欠鮮甜。響呢d地方食飯，大部分錢咪都係攞黎交租，都無乜期望，以二百蚊黎講呢道菜算唔錯啦。…Read More

同麥記廚師早餐一樣，都係賣三十幾蚊。呢間位於旺角砵蘭街嘅'村爺爺'嘅All day breakfast質素就高得多啦。一塊啱啱炸起卜卜脆吉列雞扒搭上果條巢皮得黎香噴噴嘅廚師腸。新鮮爽口蕃茄生菜。仲有熱辣辣嘅牛油法包，油淋淋嘅炒蛋，凍冰冰嘅茄汁豆。食完之後心中暗叫一聲：好滿足呀！呢餐絕對係蔗渣嘅錢就有燒鵝髀嘅享受!…Read More

我好鐘意食薯條。而食薯條呢方面我都好奄尖。唔粗嘅唔食。唔熱嘅唔食。乾得滯嘅唔食。無薯仔味唔食。太多鹽太多味精唔食。呢間位於淘大嘅Hot Dog Formula, 佢地嘅薯條就無以上嘅缺點。我都幾滿意。佢地有好幾款醬汁俾人揀，貪得意揀左個肉醬汁，味道有進步空間。可能我個人比較傳統，覺得薯條始終都係配茄汁好。店內仲有鹽呀胡椒粉俾客自己加，認真唔錯。…Read More

寒流下細雨紛紛, 當日真係凍到震騰騰.途經開源道, 就衝左入觀塘廣場諗住食碗麵暖吓身. 睇到商場可以俾呢幾間小店擺D枱櫈出黎俾佢地做生意, 實在抵讚. 行吓行吓見到呢間主打車仔麵的明記食店. 有個姐姐夾緊D餸俾自己做LUNCH, 我就好放心咁去幫襯, 因為我好相信一間食店的員工會食番自己整的食物的話, 即使味道未必一定好好, 但至少一定乾淨. 我揀左兩餸麵. 我好鍾意個湯, 清清地, 真係無味精. 一個餸係菜甫煎蛋. 一睇個樣就知道係出自師奶之手, 實實在在無花巧野, 有蛋味, 油香, 配上菜甫, 充滿返左屋企食飯的意味. 另一個餸係炒椰菜, 椰菜炒得很香, 火喉十足, 食落不油不膩, 甘甜清爽. 個阿姐將我揀的上海幼麵煮得啱啱好, 熱辣辣得黎煙韌彈牙. 一碗又平又好食車仔麵只係廿幾蚊, 最緊要係食到個人暖笠笠。…Read More