返黎香港後一直心思思想食自助餐！咁啱！！帝苑竟然做緊六折優惠當然唔洗猶豫啦！6點半左右到餐廳，因為唔算多客加上係星期一的關係所以唔需要等候就可以入席啦！由於之前冇黎過食，第一印象係覺得環境/氣氛都唔錯,幾有FEEL!放低左啲野之後梗係即刻拎野食!!平時食自助餐第一件事就係睇佢有冇羊架同牛扒！！帝苑的肉眼扒食落唔算勁韌，因為唔算整得太過熟，應該係五六成熟左右既程度。所以算易入口，唔會有太多血水令人卻步，應該係大部分人都可以接受的程度黎！另外有三種醬汁配搭，燒汁/黑椒汁/芥辣，都係啲大路既醬汁！羊架！！！！掛住食唔記得影！一啲都唔膻，而且個人比較鍾意食帶有小小肥肉的羊架，當晚見到既羊架都好肥美！！而且好入味，或者係燜煮的方法較好所以唔覺得好膻！食完兩樣必食item後，就試左帝苑的燒味檔！其實種類都算廣泛，由中到西再到日式泰式都有！而且燒味種類都唔少！基本既叉燒，燒鵝，燒雞，燒肉。再黎連滷味都有提供！！豬大腸，豬耳紅腸等等！聽朋友講，帝苑的海南雞飯好出名，咁梗係要試！嗯，唔知當晚係咪有少少失水準，雖然雞肉都算係嫩滑，但係冇咩味，飯亦唔算太香，冇咩想再食的衝動。食曬呢啲野我先發現頭盤的海鮮類，因為本身對蟹有敏感所以就冇食到長腳蟹！不過見到朋友食得津津有味！應該係唔錯既！自己就試左翡翠螺，青口同蜆，不過不失，唔會太腥，但亦唔會不停encore。因為仲有好多其他特別既野食等緊我！！帝苑今期出左唔少同鮑魚相關的菜式，例如要憑卷換領的酥皮焗鮑魚，講真，第一次食咁既配搭！鬆軟的酥皮入面係原隻鮑魚，不過味道就有啲淡，但係幾特別的。仲有鮑魚鍋巴，呢個真係好好食！一口的份量，鍋巴好脆而且上面唔係鮑片，而係原隻既鮑魚仔！！食返幾粒已經覺得回左本！另外仲有個日式鮑魚凍派，哇呢個真係可以唔洗試。。。簡直好似食左一舊油落肚咁！口感都有啲嘔心，食到好濟！！至於日式野食方面，基本既刺身有三文魚，吞拿魚，油甘魚，八爪魚。而壽司方面最喜歡係燒三文魚壽司！另外仲有幾款日式小食，例如八爪魚仔，螺肉，中華沙律。仲有一個擺到成條龍咁既加州捲，不過加州捲會食到太飽就冇試啦，同埋鮑魚手卷，賣相都頗為吸引！係日式攤檔旁邊有個海鮮粉麵檔！可以自選海鮮比廚師料理，可以單係海鮮亦可以加河粉，油麵米線等。當晚見到覺得好吸引所以就要左碗河粉，加左蜆同珍珠貝，揀左冬蔭功湯底，另外仲有清湯可以揀。揀好比廚師之後，佢會比個牌仔你過一陣拎返，個陣食食下都爭啲唔記得自己嗌左碗粉...過左好耐去拎以為一定會淋曬，點知原來會等我去到先幫我加湯，好彩咋。。。如果唔係我應該都唔會食。。。值得讚揚！最後甜品方面，蛋糕類都有好多選擇下，紐約芝士蛋糕係我印象較深刻的一款。不過雪糕方面就有d普通，雖然係Haagen－Dazs雪糕，但因為冇咩特別既口味，都係朱古力，芒果，士多啤梨呢啲基本野，相對蛋糕款式而言冇咁吸引，所以就將個肚留比蛋糕啦！另外令我覺得好驚喜既係，竟然會有楊枝甘露呀！！！！而且做得唔差，唔會得勁少芒果咁！！好味！總括而言，成個自助餐的食物種類豐富，味道係水平以上，某啲野食會令我帶來驚喜，例如鮑魚鍋巴。呢個價錢可以係五星級食到個自助晚餐，算抵啦！！如果唔係因為要離港，真係想趁優惠期再去食一次呀！！…Read More
今次係第一次食，同一班朋友嚟食。一早訂左檯有得送生蠔同一d刺身。唔錯環境好好 有個露天既area 冬天係度食係幾有氣氛係屯門都有間咁既放題算唔錯啦服務員既態度都好好 野食都上得好快
