hhw16's Profile

名門私房菜不是經常出沒灣仔，若不是朋友的介紹，未知灣仔竟有如此出色的樓上私房菜！感謝友人的介紹。從餸菜中，感受到店主對飲食的熱誠和樂於創作丶嘗試的心。經過一輪防疫手續，由侍應引領入座。侍應們親切有禮，令人有賓至如歸的感覺。餐廳內環境舒適寬敞，是三五知己、家人相聚聚腳的好地方。我們點叫了杏汁豬肺湯丶冰鎭鮑魚丶黃金蝦多士丶釀鯪魚丶蝦子柚皮丶蒸污糟雞丶啫菜丶XO醬名門炒飯和白果腐竹薏米糖水。杏汁豬肺湯湯濃得像奶一樣，杏香撲鼻，經處理後的豬肺不但沒有豬的「唒」味且腍，是廚師的功力！雖然大熱天時，喝了一口這熱辣辣的湯後，仍忍不住想再喝幾口，用「料足湯靚」來形容，當之無愧！冰鎮鮑魚鮑魚－想不到的腍，配上自製的醬汁：蒜丶醬油、醋等等；再細心一看，你會發現一條幼幼的Wasabi躺在醬汁中，讓你能嚐到不同的味道， 十分細心！鮑魚放在沙律菜上，配合起來一起吃，十分美味！黃金蝦多士大多數的蝦多士，最底部都是以麵包作底，但這黃金蝦多士，是一隻鮮蝦被蝦膠包圍着，堆成方形，先煎再炸，爽口彈牙，上面鋪滿黃金，真的超吸引，食到停唔到口！釀鯪魚一道滿有童年回憶的家鄉餸，鯪魚去骨，挖空了，用鯪魚肉打成膠加入其他攪拌成碎的食材，釀回魚身內，煎透，從頭到尾都食得！滿滿的回憶！滿足！蝦籽柚皮一道看似簡單，但功夫繁多的菜式！柚皮腍而味濃，拌著蝦子撒在上面的醬汁一起吃，真的吃過返尋味！欣賞廚師的手藝－能做到中間溏心的，廚藝了得！是下飯的首選！蒸污漕雞別看樣子普通的一盤蒸雞，以荷葉墊底，與紅棗丶冬菜丶黑胡椒等等一起蒸，雞滑肉嫩丶熟得剛好，調味恰到好處！辣得有道理！啫菜以瓦煲盛載端上來，揭開以匙攪拌，發出啫啫的響聲，這是這道菜得名的由來。生菜脆口鮮嫩，辣得出色不過火，讚！XO醬名門炒飯飯炒得乾身，以自家制的XO醬炒制，除了炒香了的乾瑤柱外、還有冬菇粒、叉燒粒、蔥粒等等，色丶香、辣味俱全，口口都見用料豐富，雖然已經飽了，亦忍不住吃了一大碗！ ！白果腐竹薏米糖水許多餐廳都是紅豆沙、綠豆沙或是西米露。白果腐竹薏米糖水就很少有了，欣賞糖水不太甜，且有益。為這豐富的一餐，畫上了一個完美的句號。…Read More

呢間野會將壽司飯加上好多自選或設定好嘅材料，每一份叫做a bowl。曾經食過一個叫「protein」,覺得好正；第二次想去食佢嘅「unforgettable」，但那次話賣晒。今日係特登早放工去買，果然好正好正😋😋。這碗的主打材料是龍蝦，大大隻半隻，有好多拆了出來的肉、仲要龍蝦有好多膏；有大大粒的三文魚子；有三文魚和吞拿魚，切成正方體，一粒粒好有口感；有好多毛豆、三色椒🫑、山藥等等的配料，我仲用$18加咗芥末魷魚，還有一些脆粒在吃之前加上去增加口感，沙律醬可以揀辣或者不辣。我感覺係食每一啖都好似喺度尋寶咁，會咬到不同嘅味道，啊！仲有柚子，完全能夠提升到啲飯味。我諗緊幾時再去食！😍😍😍咁樣嘅一大碗壽司飯加好多好正嘅材料賣$160 ，足夠我同老公做晚餐，所以真係好抵👏👏👶🏻…Read More

不嬲鍾意打邊爐，今日黎左鍋居。本來唔鍾意食餐廳送的小食，但依碟花生有驚喜！鍾意食辣的朋友仔一定鍾意，花生香脆得黎有小小花椒味，停唔到口啊！我地叫左花雕雞湯底，一開始係聞到少許酒味，但一放落鍋到煮一陣，其實好淡味，所以食開清淡的人可能會鍾意。至於食材，特別特別要讚佢嘅芋頭同響鈴，真係新鮮熱辣炸出黎架！芋頭外脆內軟，響鈴先勁鬆脆，好味啊，真心推薦！至於肥牛，我地叫左頂級手切牛，好味，同好新鮮，值得點！最後想讚讚服務，餐廳員工好細心，親自幫我地烚聖子，令聖子熟的程度剛剛好！…Read More

有一種朋友喺疫情下都要相約見面,今日就約咗呢位好朋友去交銅鑼灣呢間餐廳食好嘢,傾吓計舒緩抗疫嘅壓力。餐廳座位舒服，唔會太迫。侍應服務周到，經常為我哋換碟。前菜叫咗個冷盤蕃茄，個汁好特別，香濃嘅汁，加埋清新嘅蕃茄，係絕配。之後食咗個刺身，刺身鮮甜，一啲都冇令我哋失望。小食月見免治豚肉，豚肉肉質鮮嫩，燒得啱啱好。另外雞翼串的肉質香滑，配合燒汁，令人食唔停口。朋友叫咗個燒三文魚魚頭，廚師嘅廚藝實在了得，魚頭燒得外脆內軟，香脆外皮完全無搶過魚肉嘅鮮甜。最後我哋叫咗個豚肉芫荽卷，芫荽嘅香味同豚肉一齊，多重香味享受，俾我一種清新嘅感覺，油膩感大大降低，配搭新鮮，值得再食！我哋仲叫咗杯柚子梅酒，一邊食，一邊飲酒，傾足兩個鐘，非常滿足地離開餐廳，以後同朋友聚會，又多一個好選擇。…Read More

第四波疫情來臨前，難得同老公去二人世界，呢排食得太多西餐，想轉轉口味食中餐，揀咗金公館，果然冇令我哋失望。餐廳嘅佈置好有中國特色，位置寬敞，坐得舒服，喺疫情底下都食得特別放心。我哋叫咗個二人套餐，我最鍾意個杏汁白肺湯，啱晒冬天飲，又滋潤又足料，不過呢個湯會限量供應，我哋好好彩係最後兩個。除咗個湯，我另一個好鍾意嘅就係北京填鴨，二人餐只係包括半隻，不過份量好大份，好夠食。鴨肉香脆，餡皮新鮮熱辣辣。老公就好鍾意個香蔥雞蛋豆乾粒和味菜豉汁炒豬青肉，兩個餸都非常惹味，火候十足，睇得出廚師嘅功力非凡。蔬菜方面，個雲耳炒勝瓜都相當出色，健康清淡，可以消減油膩嘅感覺。二人餐仲送埋甜品，甜品係桂花杞子糕，唔會太甜，又有陣陣桂花嘅香味，令人齒頰留香。下次會帶埋屋企人一齊嚟食，咁就可以試到多啲唔同款式嘅小菜，呢度都係一個家庭聚會嘅好去處。…Read More

今日同老公拍拖,嚟咗交通方便嘅尖沙咀搵好嘢食,一段日子冇出街食嘢,今次嚟咗呢間餐廳,一啲都冇令人失望,仲食得好安心,入座前有職員負責量體溫,座位亦有隔板分隔。職員安排咗我哋坐喺吧枱位置，可以一邊睇住廚房工作，一邊享受食物，真係食得特別放心。我哋叫咗個薯條小食，薯條炸得香脆，令人食完一條又一條，停唔到口。我叫咗個香煎北海道帶子龍蝦汁扁意粉配三文魚子，個汁真係好值得一讚，有濃郁嘅龍蝦味，配合香煎帶子嘅香甜，再加埋扁意粉嘅軟硬適中，味道口感一流，啱晒唔太鍾意食肉嘅我。無肉不歡嘅老公，今次叫咗個燒澳洲帶骨豬扒配香茅芥末籽忌廉汁，豬扒火候啱啱好，食落好嫩，個汁好特別，香茅味唔會太重，淡淡嘅香味係忌廉汁中能夠令人一試難忘。最後我叫咗杯士多啤梨奶昔，老公叫咗杯雜果賓治，喺水吧位睇住廚房整，杯士多啤梨奶昔十分足料，落咗好多球雪糕，食落味道豐富得來，又唔會太膩，仲有香甜嘅士多啤梨汁，啱晒士多啤梨控嘅我。呢間餐廳成為我同老公必去嘅餐廳選擇之一，下次一定會再嚟拍下拖。…Read More

疫情下好耐冇同過老公去拍拖,難得近日疫情有啲緩和,所以放工約咗同老公去二人世界撐枱腳!今次揀咗去太子呢間餐廳,位置好方便,地鐵行幾分鐘就到達,環境亦都非常舒服！門口有齊量度體溫工具,令人食得安心!最值得加分嘅就係佢嘅服務,由於遲咗放工,原定訂咗枱嘅時間到達唔到,打電話俾侍應 ，佢哋都好熱心肯幫我留住張枱,仲叫我唔使急!老公叫咗個燒薰豬仔骨，肉汁鮮嫩，火候啱啱好！我就叫咗個燒羊架，份量啱啱好，入口即溶，食材好高質素！小食方面，我哋仲叫咗個芝士焗蠔同黑松露芝士薯條，芝士焗蠔嘅芝士加埋蠔一齊，唔會比芝士搶咗鮮味，食到我哋舔舔脷！黑松露芝士薯條炸得香脆可口，配埋個黑松露汁簡直一流！飲品方面我哋叫咗杯荔枝接骨木特飲同香茅蜜桃特飲，兩杯都好清新，接骨木同香茅仲可以增強抵抗力，啱晒呢個時候飲！雖然已經食到好飽，但係都忍唔住叫咗個甜品，慢煮伯爵茶梨子，真係好特別嘅甜品，梨吸收晒汁嘅香味，咬口爽脆，再配埋個雪糕，一冷一熱多重口感。同老公一邊食一邊傾偈，唔經唔覺就過咗兩個鐘，呢度真係一個坐得舒服、食物美味、服務又好嘅好去處，我哋一定會再嚟！…Read More

今日揀咗銅鑼灣嘅呢間餐廳同老公慶祝生日,地點好方便鄰近地鐵站出口,食完可以去附近行吓街!餐廳嘅佈置好舒適,特別係令人好放心,入口處有清潔用品,枱同枱之間裝咗膠板，唔單止可以保障食客，仲好似增加左私隱，令我同老公可以安靜咁傾偈。老公叫咗個最出名嘅燒美國安格斯西冷扒配黑松露薯蓉，西冷扒口感一流一，肉質香濃，仲有兩款好特別嘅汁一款係比較清淡嘅，最啱怕食肉嘅我，令一款執就好香濃，能夠進一步帶出西冷扒嘅香味，啱晒鍾意食濃味嘅老公。我就叫咗個燒吞拿魚扒，啱晒鍾意食得比較清淡嘅我，吞拿魚扒，燒得啱啱夠火喉，咬落去好軟滑，又能夠保持吞拿魚嘅鮮甜，真係令我一試難忘。至於跟餐嘅甜品一啲都唔馬虎，法式椰奶凍配芒果汁，香甜嘅椰汁同酸甜嘅芒果汁配埋一齊令口感好豐富，有唔同嘅層次，睇得出係廚師用心之作。另外我哋仲用咗個餐飲優惠，一人叫咗一杯，我嗰杯orange squash,淡淡嘅橙味啱晒大熱嘅天時飲,老公杯aperol spritz甜甜地,好容易入口,連我都忍唔住偷飲咗幾啖!最後好值得一讚嘅係餐廳嘅服務,侍應好主動介紹唔同嘅菜式,亦都好勤力咁幫手添水，非常有禮貌，令人有賓至如歸嘅感覺。…Read More

為咗提早慶祝父親節，放工特登去買咗幾件精緻嘅蛋糕，早前喺社交平台見到呢間餅店嘅蛋糕圖片已經覺得好吸引，今日終於有機會食，餅店位置方便，好近地鐵站。今次揀咗三款蛋糕，有選擇困難症嘅我，真係實在太難揀啦，因為餅店有成幾十款咁多，最後揀咗綠茶,荔枝紅桑子，檸檬。三款蛋糕都唔太甜，綠茶食落有香濃嘅茶味，用料十足。外型精緻，睇得出師傅用咗好多心機去整。荔枝紅桑子係時令嘅款式，味道好特別，隱約嘅荔枝味好適合夏天食。檸檬味一啲都唔酸，反而有陣陣嘅檸檬香味，令人越食越想食。其中一樣最緊要嘅係，蛋糕用料天然，食多幾件都唔驚。最後值得一讚嘅係蛋糕個外賣盒，非常穩陣又好拎，我拎咗兩個鐘 返到屋企個蛋糕都完全冇移位。…Read More

屋企人生日，但疫情下都係留係屋企食安心啲，所以放工去咗尖沙咀麻辣派對叫咗個古法咕嚕肉、波士頓龍蝦（蒜香牛油）加餸。外賣包裝穩陣，搭巴士返到屋企都完全無漏，仲好夠暖添。咕嚕肉酸酸甜甜小朋友至愛，即刻合作食左一大碗飯，咕嚕肉個汁味開胃，肉質嫩滑多汁。至於個龍蝦都好出色，份量十足，調味得宜，個汁令人一試難忘，加埋菇，口感更豐富同多層次。堂食環境裝修好有特色，疫情好轉，一定會訂位再去食過，到時候可以試多幾個餸。…Read More

今日同老公拍拖去食好野，揀左交通方便的旺角，餐廳有兩層，我哋坐上層，玻璃窗前視野開揚。我哋叫咗單骨蜜糖芥末雞翼，雞翼肉好滑，味道一流，平日怕熱氣嘅我都食完又食，最多之後飲涼茶。主菜BB豬肋骨肉質好鬆軟，好入味，值得推介。另一個叫左黑松露雜菌燒春雞意大利飯，意大利飯軟硬適中，食落好香口，燒春雞燒得好香脆。飲品叫咗杯芝士奶蓋士多啤梨紅茶，芝士同士多啤梨味道好夾，味道唔太甜，啱啱好。最後，叫埋宇治金時心太軟，心太軟係綠茶味，唔係一般食開嘅朱古力，容易入口好多，食完都唔覺得太飽。可能食得飽，再食埋個美味嘅甜品，心情都特別好。臨走見到餐廳原來做緊買一送一套餐優惠，我諗我會再嚟多一次享用呢個優惠。…Read More

今日約咗幾個好耐冇見嘅朋友一齊食午餐，由於大家都係尖沙咀返工所以揀咗呢間餐廳，餐廳環境一流，光猛舒服。服務都唔錯，係上菜慢咗少少。朋友叫咗呢個漢堡包，包鬆軟，漢堡味道濃郁不過肉質硬左少少。我就叫咗一個意粉，不過等左好耐先有，兩個朋友都就嚟食完，我個意粉先至上，稍為有啲美中不足。…Read More

今日約左好姊妹去食甜品，擇左交通方便嘅尖沙咀，甜品店鄰近地鐵，好容易搵到，環境都幾舒服，座位闊落，佈置有心思，特色牆就係好繽紛，玻璃窗嘅窗台小擺設都非常有心思。侍應招呼周到，一坐低就送上一壺薄荷水，啱晒食甜品嘅時候用嚟開胃。朋友叫咗個74%特濃朱古力軟布甸，用蒸籠做裝飾已經好有特色，上枱嘅時候，侍應淋上糖水，即時冒出一陣白煙，咁有心思嘅上枱設計真係少見，食落去朱古力味非常濃郁，啱晒朱古力控。我就叫咗個冰綠茶x70%朱古力，綠茶同朱古力簡直係最佳拍檔，綠茶嘅雪糕味，配埋濃郁嘅朱古力甜，簡直令人食完一啖再想食下一啖。由於環境舒服，我同好姊妹一坐就坐左三個鐘，聽住餐廳播嘅音樂，真係一個好寫意嘅下晝。…Read More

難得放假，又接近母親節，梗係同屋企人一齊去食餐好嘅。今次揀咗呢間餐廳，其中最令我難忘嘅係個串燒，燒得啱啱好夠火口，最令我驚喜嘅係個配菜燒菠蘿，菠蘿又甜又多汁，令我越食越開胃。最後食埋我最愛嘅芒果糯米飯做甜品，真係非常滿足，可能芒果季節當做，真係又香又甜。…Read More

難得一連4日放假，我約咗朋友去行街，行到攰攰地，每人買左一杯嘢飲、朋友嗌左個鳳梨紅茶、我嗌左個蜜桃烏龍，兩杯嘅茶香都好夠，並且唔太甜，好啱飲。最令我驚喜嘅係蜜🍑烏龍，打開個杯入面竟然有一塊塊嘅新鮮蜜桃，果然係真材實料。…Read More