職員安排咗我哋坐喺吧枱位置，可以一邊睇住廚房工作，一邊享受食物，真係食得特別放心。
我哋叫咗個薯條小食，薯條炸得香脆，令人食完一條又一條，停唔到口。
我叫咗個香煎北海道帶子龍蝦汁扁意粉配三文魚子，個汁真係好值得一讚，有濃郁嘅龍蝦味，配合香煎帶子嘅香甜，再加埋扁意粉嘅軟硬適中，味道口感一流，啱晒唔太鍾意食肉嘅我。
無肉不歡嘅老公，今次叫咗個燒澳洲帶骨豬扒配香茅芥末籽忌廉汁，豬扒火候啱啱好，食落好嫩，個汁好特別，香茅味唔會太重，淡淡嘅香味係忌廉汁中能夠令人一試難忘。
最後我叫咗杯士多啤梨奶昔，老公叫咗杯雜果賓治，喺水吧位睇住廚房整，杯士多啤梨奶昔十分足料，落咗好多球雪糕，食落味道豐富得來，又唔會太膩，仲有香甜嘅士多啤梨汁，啱晒士多啤梨控嘅我。
呢間餐廳成為我同老公必去嘅餐廳選擇之一，下次一定會再嚟拍下拖。
