karenpun0176's Profile

今日去了樂富做野，我們三個同事去了味千拉麵食飯。到達才不過十二點，舖頭入面只有兩三枱的客人，我們也不用等位。落單叫了三個午餐，一個蕃茄肥牛湯拉麵，一個叉燒拉麵和一個牛舌飯，另加了錢要飲品。店裡做推廣每枱吃滿100元送小食，我們三個午餐加起來已過100元，就選了一個炸雞。拉麵和飲品很快送到，我的蕃茄肥牛湯拉麵賣相 / 味道 / 份量也可以接受，只是下了不少味精，我一整個下午都在喝水，我只能夠給它65分吧。其他服務真是不行，還可以收加一，真係冇說話好講。點解？我已經吃得較兩位同事慢一點，但是吃完了拉麵，我發現送的炸雞還沒有來，於是同肥佬經理追單。我見肥佬經理係收銀的電腦即搞一大輪，又叫其他待應要廚房優先處理，我估肥佬經理唔記得落單。炸雞來到吃得出是即炸的，加上一點檸檬汁，也算清新可喜，但是份量少了一點，三個人一人吃了一塊就沒有了。如果叫我俾錢食，我會覺得好唔抵食。係唔係送既食物就可以得過且過，唔記得落單又冇人發現就可以慳返？！入座落單之時只有區區兩三枱的客人，這樣也可以漏單。如果客滿之時，情況實在不敢想像。其他待應不會主動為客人加水，我叫了三次才加了兩次水。食物有味精 (吃牛舌飯的同事也覺得有味精，說很口渴)，服務態度唔得，我唔可以埋沒良心俾笑臉，我只可以俾一個喊臉。…Read More

5月23日和老公到此酒樓飲茶，叫左叉燒腸、鴨腳扎、腐乳通菜、金錢肚和仲有一點唔記得左咩點心。叉燒腸、鴨腳扎、腐乳通菜熱度都足夠，普普通通唔算難食。金錢肚好像有點怪味，成碟食左兩舊就冇食。呢間酒樓冇咩冷氣，又熱又焗，我一路坐一路滴汗，真係越食越扯火。唔止我和老公覺得熱，我見隔離好多人都「撥扇」或「撥傳單」。我同部長哥哥講好鬼熱，佢一句聲都冇出，唔理我地就走左。老公同我都話俾左93蚊飲茶絕對係「貼錢買難受」，以後列入黑名單唔會再去！去食麥記或者KFC，真係冇咁慶啦！…Read More

朋友試過呢間完全唔掂，又怕自己不是會員，食評令人難以信服，於是我話幫朋友貼的。呢件事於10月24日發生，最近才記得上黎 post 返。今日和同事去呢間野食lunch。 雖然唔平，但係貪佢唔駛等位，坐得舒適。 都有2，3年冇食過呢間。平時多數食另一邊門口入的平價版 : 泰好~一坐落就發現有點唔對路， 侍應高速地"詢問" 食D咩~ 除了A/B/C 餐 約$60~ 散叫的價錢更貴。作為餐廳，這價錢都合理 ------- 如果是一間合格的餐廳的話。。食埋水準十分普通，份量又少。那個西袖沙拉，西袖四個人加埋的份量連一 "階"橙都不如。但是更離譜的事陸續有來~食完主菜，喝了一口飲料就付上帳單~ 我專登唔把帳本打開~兩三分鐘後，侍應便回到我地張檯到睇下我地埋左單未~以為埋單後可以安靜的飲野傾計， 原來是我一廂情願!我從未想過一間係太古坊附近的"餐廳"， 叫等位的客人坐係進餐中的客人隔離等位，監督著你飲野的進度。其他冇位坐的，直情企係你前後左右等！有冇攪錯？仲衰過茶記同快餐。以後唔會幫襯呢間， 仲要連同系的都唔會去。…Read More

星期一五個人試左放題，D野都幾新鮮，招呼亦算唔錯，地方闊落乾淨，可以一試！每張紙只限選三樣食物，但數量不限。讚：刺身好似三文魚、舌拿魚、甜蝦和北寄背都幾鮮甜。炸物即叫即整，唔會油淋淋。這次太飽了，只是試了芝士年糕、炸蝦和炸蠔。芝士年糕幾煙un，不過芝士味唔多夠。軍艦壽司有海膽，魷魚和螺肉，幾新鮮和甜，紫菜亦都脆身。我地有個朋友擺了烏龍，將軍艦那張紙當作刺身剔了好多張。第一碟黎左30舊，我地好肚餓照食；到第二碟又黎30舊，我地知係我地唔o岩在先，但佢未放落黎就想唔要，不過佢地唔俾我地退。咁樣我地照食啦，叫女侍應即check仲有幾多張單是壽司和軍艦未出，佢話仲有30舊壽司，我地叫佢即截唔再上，佢都好nice同我地cut單。可能因為星期一和位置比較摺的關係，有二張枱冇人坐。佢亦都冇催我地Last Order，過左二個鐘都冇趕我地走人。睇之前的食評，佢唔坐唔滿人亦冇趕人走wor。彈：冇甜品，美中不足，不太完滿。剔野食既紙又窄又長（格式改了，不是這裡Load上來那些），D字又細粒到震，差D要搵放大鏡先睇到D字。因為人為錯誤叫了很多軍艦，我們吃了很多飯，走的時候幾乎飽到動不了。第二天早上都不肚餓，只是喝了二杯水。因為剪了廣告送海膽一底，我地又冇VIP，埋單連加一，每人$152。…Read More

星期六下午約左親愛的到太子買魚，未食Lunch勁肚餓，係始創中心見到pizza hut，就算明知勁肥都忍不住食左先。叫左二個set lunch，等了十幾廿分鐘已經上菜了。餐湯要了忌廉雞湯，好Creamy，仲有好多磨菇，好好味哩！親愛的叫了香蒜肉絲意粉，我偷食左幾啖。麵條乾身香口又彈牙，肉絲其實是漢堡扒整到一粒粒，味道都可以接受。我本身唔多鐘意雜菜，覺得本身雜菜有D雪味，加左辣椒仔撈好左D先食左二啖。我叫了千層肉醬闊麵，一睇就知勁肥，不過聞到都幾香。肉醬有蕃茄味，薯蓉又焗到脆脆地，正呀！但是稍為美中不足就是茄醬下的闊麵太濕，食落仲覺得好「淋」，不過唔算好難食。 下次叫粟米肉醬薯蓉應該會好好多！餐飲叫左七喜和凍朱古力，我個凍朱古力餐後才開始飲，D冰已經溶晒但都仲幾甜，不過加埋Cream真係幾滑。有pizza card不收加一，埋單 83 蚊。都坐得幾舒服，招呼和服務都算禮貌勤快，又自動加水和收碟，野食整體黎講有80分，所以俾個笑啦！…Read More

上個星期和同事們5個人吃飯，他們選了這間日本菜的食店。環境幾舒服和乾淨，1點12分到達也只是半滿。我揀左午餐雜錦刺身飯，刺身的新鮮和味道還可以，飯量較少和沒有醋味。麵豉湯一般和甜品的涼粉一般，唔覺得好特別。午餐30蚊食到日本野，又湯又糖水都幾抵食。上業速度比較慢，第一位和最後一位上菜相隔20分鐘，晚上不大問題，但大家都知午飯時間非常短暫，在一個客人半滿的情況下，都要那麼多時間出菜，那麼坐滿了客人時豈不是等到發霉？！等到1時40分才有可以吃，因為趕住回去實在吃不了多少，希望可以改善下啦。俾個笑是因為環境和裝修靚和舒服，待應們的服務態度都幾好。…Read More

星期六親愛的約了朋友們一起吃飯，我們約了七點等，原來已有朋友預先到步拿了飛仔等緊。我們在門口坐住等了20分鐘有少少熱，對住個坑渠好多蚊，咬到我和親愛的女性朋友兩個死死下，大家既心情已經麻麻地。前前後後等左50分鐘，七點半終於入得去啦！九個人安排左一張八人枱（我估），都有少少迫，不過算數啦。有個中年男侍應 / 老闆建議我地叫餐，話呢個餐是專登為了預祝母親節寫，又o岩人多一齊食，仲有好抵食wor。我地冇咩頭緒，見餐牌有蝦、雞、燒腩、鱘龍魚、菜、湯和甜品就叫這個啦。餐牌可能是老闆手寫的，只有半張A4紙大，一叫完就拎走左。我地有兩個人未到齊，想留低等佢地睇睇都唔得。一個餐牌o者，駛唔駛咁矜貴呀！嘩，D野食以超級快既速度送上 ── 每人夾到一舊 / 啖食到落口，第二碟就已經上，仲快過打仗！我明白佢想大家快d食完走人，佢既環境勁嘈又逼到震，真係坐唔得耐。燒腩仔熱辣辣的，個皮有少少焦脆到卜卜聲，點Washabi真係幾好食，我食左三舊！至於雞、蝦和炒菜我可能我唔識食，覺得普通也沒甚麼特別。鱘龍魚我之前未食過，今次的魚肉幾爽口和肥美，我一般鐘意食魚都覺得唔錯。甜品是椰汁紅豆糕，唔會太甜紅豆又淋，真係超好味，每人一舊想食多舊都冇。加了二枝大的加士百啤酒，$1288埋單，有人生日就8個人俾錢，每人$161。可能我唔多識食，我覺得除了燒腩仔之外，其他真係冇咩特別。我唔明點解有好多人講到咁好，舖頭有好多明星與老闆既合照，多到做牆紙真係冇誇張。p.s.本來覺得我地都坐得算逼，點知食到一半有一枱人入左黎坐，我地先知「一山還有一山高」。佢地好似有成十三四個人，將一張八人枱拍埋四人方枱，有兩個人仲要「飛左出去」好似係後面搭枱，但連枱邊都掂唔到。佢地應該要前面既人幫佢夾野先可以食到野，個一刻我諗起「籠屋」和「疊羅漢」。…Read More

用左AIG卡試個推廣既「滋味盛禮」2人套餐，兩人埋單$237。Pizza Hut D野都叫有保證，不過不失。1. 意大利菜湯/ 酥皮三文魚湯──菜湯好快就到左，冇咩驚喜。酥皮三文魚湯好creamy又滑，酥皮又熱又脆，雖然等左25分鐘但都是值得既，正！不過飲完個湯都飽飽地，男友冇叫話蝕左添。2. 大蝦雞尾杯──菜、芒果和蝦都幾新鮮，千島醬冇咩特別。3. 意式青瓜香草醬汁芝脆批配軟殼蟹──上檯時成個批都是閃亮的，都預左幾肥。味道又唔覺得好咸，雖然睇到有軟殼蟹，但食落唔多覺食緊軟殼蟹。4. 酥炸海鮮拼盤──煎炸野幾香口，不過男友嫌蝦天婦羅的粉略厚。5. 椰子雪糕喱冰/ 士多啤梨柚子蜜──我揀左熱飲士多啤梨柚子蜜，唔知是不是太重手杯野甜到震，我加左半杯水都好甜。6. 黑芝麻雪糕伴紅豆──雪榚香甜和軟滑，加埋紅豆幾特別，食完好飽都想叫多杯添！今次要彈既有二樣。第一樣：我張Pizza card計埋今餐儲左680分，可以用600分換下一年既Pizza card。我問可唔可以順便換埋，女待應A搞左一大輪先明我講咩。唔知點解之後又有女待應B過黎，話俾返張單我和Pizza card我，又話咩頭先碌錯左張信用卡，但已經voild左張單。總之搞到我一頭霧水，後來我發現佢俾我張卡係藍色，唔係我原本果張啡色。我話張卡唔係我佢都唔信，這時女待應A返轉頭，話唔好意思搞錯左喎。唉...好彩我發現左o者，而且佢俾錯左我既只是Pizza card，而不是其他人的信用卡。今次好彩是我發現我張Pizza card卡不是我的，你話如果佢俾左人地張信用卡我，是一個幾咁嚴重既錯誤丫！第二樣：佢出面個商場廁所好臭，又要拎key先去到，好麻煩！所以我唔太需要既寧願行去美麗華商場先去！…Read More

早幾日去食晚飯，去到約七時零五分，見到現場不是太多客人，站在門口二分鐘才有人來帶位。這次一樣叫138蚊既二人餐，壽司和魚生都幾新鮮好食，蟹籽芒果沙律既芒果好甜，青瓜幾夾爽口好味。串燒有五串，都幾香口也不算油淋淋。雞肉炒飯只是一般好食。另外叫了一個燒雞泡魚魚乾，好香口好好好食，30蚊算係咁。唔知係太多客人，還是不夠人手，呢次招呼真係麻麻地。想叫個人加水和埋單叫了很多次才有人應，隔壁的一男一女想點菜等了十分鐘也沒有人理。有九折貴賓卡，即不用收加一，埋單168蚊。我們給了五百元紙幣找贖，找錢時除了紙幣還有些輔幣，當男友還剩下三個二元未拿時就出現"夾手黨"；那個女侍應好快手就"砰"一聲夾埋d錢走人，好似驚死我地唔俾tips。本來俾唔俾tips係客人話事，那三幾元tips亦係小事，但是出現"夾手黨"令客人覺得有些少被屈/搶，不太好受。…Read More

今日和同事出去食午飯，我地三個人各自叫了雜錦蝦醬炒飯、香茅豬扒飯和咖哩牛肉飯。我的是雜錦蝦醬炒飯，唔覺得有油淋淋，但是飯不夠乾身爽口，整體來說只是一般好食。附送的餐飲只有三款，分別是熱奶茶、熱咖啡及熱阿華田。我選了熱阿華田，但是唔知點解杯野好難飲，好似淡茂茂冇落花奶。朋友話佢地既熱奶茶都係好似飲水咁冇咩味我見佢地都飲剩半杯，真係好飲極有限。…Read More

我係秀茂坪果間食既，區內的西餐廳只有佢和扒王里，裝修都okay，亦坐得舒服。昨晚和男朋友去了吃晚餐，可能我地去到已經係晚上八時四十五分，過左最多人的時間，現場所見有好多位。唔知點解企左係門口成分鐘先有人行埋黎帶位，佢俾左窗口卡位我地坐，個view都幾好。我地叫左二個晚餐，一個係芒果軟殼蟹併黑椒牛扒，跟意粉；另一個係雜菇併德國咸豬手，跟意粉。晚餐包括餐湯和餐包，都是典型既羅宋湯和忌廉湯，嘉頓小餐\包，都好難唔好食。餐包很熱，塗上牛油即溶，其他餐廳的餐包，凍冰冰都唔知好唔好塗上牛油，我覺得都算係咁啦。我的芒果芒果軟殼蟹併黑椒牛扒意粉整體來說不錯，牛扒話要七成熟就真係七成，意粉亦有好香的橄欖油和香草味，軟殼蟹幾香口脆身又唔油膩，但是果塊芒果細到幾乎見唔到囉。男友的雜菇併德國咸豬手意粉，隻豬手大到佔據左半隻圓碟，單食隻豬手已經夠飽了。但是搵晒成碟都見唔到一舊雜菇，只係見到雜菜如椰菜花和脆玉瓜。本身豬手有咸味、意粉和牛扒都有少少味，我就麻麻地鐘意黑椒，所以好少點附送的黑椒汁。男友話黑椒汁香就幾香，但點左之後搞到D豬手好咸囉。餐飲叫左熱檸茶，冇咩特別，只是一般好飲啦。一個晚餐47蚊，不再另收加一，我地今次就坐左接近個半鐘。就算平時多客人坐耐一點，也不會催促你埋單走人。整體來說，都算食得過既。…Read More

一眾同事十一人到沙田娛樂城打邊爐吃晚飯。沙田娛樂城的地下大堂正大肆裝修中，大家仲以為間酒樓執左添......我們叫了二個湯底，有豬骨煲和沙爹湯底，在火窩湯底未到的時候，大家都先吃了熟食好似炸雞翼、魷魚鬀、多春魚等醫肚。狂剔一輪後發現漏單情況嚴重，芋絲叫左四次都是沒有來，到大家差不多吃飽時就見到等左好耐既丸類，結果每人都要勁食丸類。有種大家都未見過，很特別的「芝士繡花丸」，尖頭，個皮好似西瓜的間花花紋，真係超級騎哩，中間有些好似奶油和芝士混合的「芝士」，都算okay好吃，但是頗為肥膩飽滯。坦白講服務真係麻麻地，漏單情況嚴重，而且待應很少冇主動幫人執碗換碟。呢間酒樓有六種味道的雪糕，除了一般常見的士多啤梨、香芋和芒果味之外，還有綠茶、紅豆和芝麻味。我覺得紅豆味雪糕有整粒紅豆最有口感，芝麻味雪糕就最香濃又滑溜。不過唔知點解呢間野D芒果布甸都有幾多芒果肉，但是得個甜字，一D芒果味都冇（連芒果肉都冇芒果味=.="），可以講係史上最難食既芒果布甸之一。不得不提的是裝修和洗手間，牆邊有部份裝飾木櫃是凸出來的，角位頗尖又危險，枱又放得太近牆邊，坐在近牆位置的客人靠後時要小心不要撞到頭。洗手間的燈光不夠，女廁有一格廁所上面居然冇燈（連半枝光管都冇，要靠其他地方天花上的燈光），關上門後好黑，令人覺得好驚好恐怖囉。…Read More

黎過呢度二次食晚飯。二次都覺得okay好食，唔係覺得咁差。環境不過不失，佢個廁所行好遠先有得去，女仔一個人去就唔係幾好。有一次叫138蚊既二人餐，壽司和魚生都幾新鮮好食，蟹籽芒果沙律既芒果好甜，炸天婦羅都幾脆口，食到最後一舊都冇林晒，牛肉炒烏冬幾香，不過炒野都預左好油膩。埋單連加一152蚊。第二次男朋友叫左個活魚刺身，一魚兩食（刺物和魚鍋）二食148蚊。今次揀左"細鱗"，條魚係即撈即劏，好生猛又鮮甜，個魚頭和魚尾上枱時仲郁黎郁去。食完刺身之後，條魚就拎左去整個鍋。過左15分鐘，個鍋返左黎，都幾大個有好多野食，魚湯鮮甜好味，魚肉好嫩滑（不過魚皮上有好多魚鱗，食唔到魚皮仲一口都係魚鱗，呢樣完全唔得），配菜有娃娃菜、粟米和芋絲，索左魚湯好甜。本來我地驚唔飽，叫左個豚肉炒飯，冇想像中那麼油膩，豚肉幾爽口又彈牙，都唔錯但已經好飽食唔晒。今次埋單連加一203蚊。…Read More

和男朋友二人到這裡吃晚飯，可能我地去得早，六點十唔駛等位，大約三十分鐘後就已經坐滿晒，仲有好多人企係度等。我地叫了二個小菜，一碗白粥和一碗白飯。瑤柱魚湯勝瓜浸田雞，魚湯鮮甜香濃，田雞又嫩又滑，味道不錯。蠔仔肉碎煎蛋角，賣相好似點心"煎薄餐"，都幾脆和香口，不過我食到幾塊蠔殼。=.=附送果盤有西瓜六小塊，埋單142蚊，我覺得價錢略貴，但只是一般好食啦。…Read More

和朋友食晚飯聚舊，貪朗豪坊搭車方便。預先打電話訂位，個侍應姐姐話過左5分鐘就不留位，請準時！叫了一個$168既二人餐，份量一般和味道都一般啦。羅宋湯、蒜蓉包和凍檸水一般，冇咩特別驚喜。牛油蒜蓉焗青口薯蓉，幾香幾好食，不過有少少燶，係個殼舀出黎食個陣，有好多黑色野跌出黎。食完呢個之後，侍應主動幫我地換了餐具和碟。不過唔換都唔得啦，咁多黑色野係個碟度，唔通一陣食其他野食埋佢咩！檸檬牛油帶子併燒汁牛柳，份量略少。牛柳八成熟，燒汁又好味。但是帶子就麻麻地，我唔覺有檸檬味囉。紅酒燴鴨胸天使麵，鴨胸幾又"林"又好味，但是我食完都唔覺和紅酒有關係。甜品藍莓cheese cake一件，不覺得有什麼特別，一般好食啦！不過送得一件二個人食，略嫌不夠食。可能因為朗豪坊既三尖八角舖位問題，枱和椅子都放得好密好迫，肥d都行唔到入去個位呀！埋單連加一$185，呢間野只收現金，唔收信用卡和EPS！我覺得都唔係非常抵食，未必會再去食囉。…Read More