~*EATaly~*'s Profile

呢間餐廳以前喺富麗花園大窩口嗰邊都已經一直食開，後來韓國老闆搬咗過嚟新鋪呢邊，地方闊落左，坐得舒服咗，餐單又提升咗，多咗選擇，梗係要過嚟試吓！今次食一個以前從未試過嘅烤肉套餐，超級抵食，肉質可以話係我食過嘅烤肉餐廳之中，最香最淋滑，最好味嘅一間，兩個人食到尾非常飽！呢個價錢CP值好高，其實當日本身想試荃新天地嗰邊新開嘅炸雞餐廳，但係竟然要排20張枱，就轉咗過嚟呢邊食正宗韓國人主理嘅餐廳，結果喜出望外，炸雞軟骨一樣保持水準，又唔使排隊，與其要等餐死，真係不如行過兩條街過嚟呢邊食正宗韓國味道👍🏻…Read More

荃灣冇乜似樣嘅壽司店，諗住呢間會對板啲，點知都係好失望，俾咗幾次機會，次次都食最貴嘅餐，好可惜次次海膽都係瘀黑色，好唔新鮮。三文魚子就太鹹，冇應有嘅鮮味。之後都唔再食，因為實在太失望。唯一讚得落嘅位就係碗麵豉湯幾好飲。服務就某啲侍應ok，但係主管安排坐位真係安排得好差。全間店有一半位係吉嘅，好多個卡位都唔俾客坐，係都要迫人坐吧枱，為咗方便侍應自己serve枱，唔係以客為先，而係以侍應為先。cp值低…Read More

一去到，由於我哋拎住好多嘢，店員非常友善，主動提供協助。我哋嗌咗櫻花蝦拉麵同葱山拉麵，兩個都好味，櫻花蝦拉麵更多左一種鮮味，必點。另外要咗出面好少見到嘅芝士春卷，炸得好香脆，入面芝士味道啱啱好，不會過鹹，又夠香，我哋即場食唔晒帶咗返屋企，嗰晚攞返出嚟食竟然仲係脆嘅，唔使返熱。筷子全部係獨立包裝，食得好安心，枱面同杯都好乾爽，感覺好乾淨。食到尾聲，店員超級細心，見我周圍望即刻去攞牙籤俾我，兩位樓面店員好年輕，但係非常有禮貌又用心服務，好開心可以得到佢哋兩位嘅招待。廚房係一大塊透明玻璃，令食客增加信心，廚房入面嘅師傅亦一樣非常好人，對我嘅麻煩要求亦欣然滿足。結論：一定會再返嚟食！…Read More

訂咗呢間餐廳食午餐，試咗佢哋嘅半自助餐，主菜揀咗鹽焗原條魚，好驚喜，好新鮮又嫩滑，充滿鮮味，完全不用擔心，沒有過鹹，火候控制得好好，讚！另一個主菜係蟹肉海膽汁pizza，好多芝士，蟹肉都幾鮮味，啱晒唔鍾意剝殼嘅朋友。自助餐部份有即開生蠔任食，大部分偏向海水味，中間食咗有一兩隻比較甜身creamy，唔知係咪同一品種，呢款鹹中帶甜更好食，適合我口味😋😋其他食物都好新鮮，凍海鮮仲有大蜆、龍蝦等等👍🏻掛住食都唔記得影相，下次再去時再影過服務超級親切，店主好似朋友咁樣有傾有講，非常友善！希望更多人支持呢類型嘅高質小店👍🏻👍🏻😋…Read More

睇到食評介紹，感覺不錯，一於去試吓，估唔到有驚喜，性價比真係好高，首先跟餐嘅沙律菜10分新鮮，再來一個70幾蚊嘅軟殼蟹漢堡連薯條，漢堡入邊好細心咁放咗芝士片，加埋新鮮牛油果醬，再配搭紫洋蔥，味道好清新，同熱辣辣脆卜卜嘅軟殼蟹好夾，非常能夠感受到料理人嘅細心設計，感受到希望食客食得開心嘅心意。飲品要左Baileys Latto，欣賞餐廳提供呢啲比較有特色嘅口味，唔使次次去親Cafe都飲差唔多嘅嘢👍🏻亦喜歡佢唔會偏甜，真正飲到Baileys香味，如咖啡味再加多少少更完美。服務態度非常親切，年輕的侍應小姐服務非常周到，處處為客人細心着想，最微細處亦照顧到客人需要，食完呢餐飯，除咗帶着滿足的胃和味蕾外，更讚的是能帶着愉快的心情離開。一定會再會常常會來幫襯！😋…Read More

諗住試一試，首先我哋喺門口企左好耐好耐，入面啲職員見到我哋，都扮睇唔到咁樣，點行掂過，後來先睇到有個牌叫人自行入座，雖然你寫咗喺度，但啲侍應唔係見到啲客等左咁耐，講句「隨便坐」都咁難掛？ 咁我哋就自行坐低左，頭先冇理我地嘅時應終於走埋嚟啦！佢埋嚟並唔係幫我地落單，而係「立即收起我哋枱面嘅餐牌」！講咗句「而家廚房好忙唔會接單」就走開咗。我哋都好愕然，點解可以咁冇禮貌？好似我嚟呢度食免費餐咁，冇嘢吓話？其實你好聲好氣講句「唔好意思，廚房cut左單嘞」係完全冇問題，我都明白餐廳有時會落場，本身真係好小事，但係佢個態度好似我嚟乞食咁，咁樣都可以做一間中價餐廳嘅侍應，咁呢間餐廳真係要檢討下自己嘅請人水準。feel到呢間餐廳啲侍應好似做得好唔開心咁，完全唔想serve客，仲話係咩設計師嘅餐廳，啲咁嘅服務真係連快餐店茶記都不如。誠如另一位比喊嘅食家講：「永不錄用」…Read More

真係好好味最鍾意佢哋嘅雞絲湯米通粉據知佢哋嘅米通粉真係由越南運嚟唔怪得只喺佢哋度食過好煙韌好彈牙有咬口湯又有越南菜獨有嘅香草味雞絲分量亦足下午茶餐好抵呀$44包飲品熱奶茶茶香夠佢哋嘅米紙卷同越式法包都好推介鍾意牛油果一定要試佢哋嘅牛油果沙冰唔太甜牛呻果味又出仲要勁滑一啲冰粒都無飲到最後都無分層地方亦十分乾淨企理佢哋每個細節都好用心為客人著想老闆至員工都係真正越南華僑質素正宗有保證最近聽聞生意差左希望大家多多支持良心小店！ 加油💪🏻支持你！…Read More

未入去，門口個短髮嬸嬸態度已經唔好，好似喺門口等佢安排入座啲人係嚟食免費餐咁嘅態度，入到去，部份店員態度繼續惡劣，態度語氣都係晚娘或債主面口，見到有人喺門口等，個白髮肥阿伯，極度不耐煩語氣，加厭惡表情大聲呼叫：「兩個叫佢等下啦！」其實人哋都係啱啱到，你自己的店員問佢幾多位人哋答兩位，好正常咁樣，冇催佢冇盛，對待普通人都唔需要咁嘅態度，何況對客？入去食嘢附送「負能量無限」！講返食物，其實真係好普通，唔係難食，又唔可以話好食，只係佢喺the mills 嚟講係低價，但係食完影響心情，一定冇下次！…Read More

次次經過一有機會都會去買佢嘅Mini set ,真係抵到爆登,$120有六件,雖然係Mini版，但係工序一樣同正常size咁繁複，細件其實仲難整，所以次次都覺得抵到爆炸，食得出佢整得好有心機，口感味道甜度全部都設計過，平衡過，有香滑，有脆口，有唔同層次，唔會好似劣質甜品咁一劈魚膠粉溝假cream一舊海綿蛋糕叫自己做mousse cake，咁就敷衍你，所以當sift佢哋價錢仲抵過連鎖甜品譜嘅時候感覺真係買到賺到，非常非常推介mini set俾大家，好似唔係間間分店都有Mini set，去買之前可以打電話check check。…Read More

香港食喇沙嘅餐廳，不過出邊味道間間都差唔多，可能醬料都係用同一個供應商，冇乜邊間有特色，直至試到呢間娘惹喇沙，食得出湯底用咗好多不同種類嘅香料，味道特別得來又惹味。配料有鮮蝦兩大隻，好細心剝咗中間嘅殼，食得出冇雪藏過，十級新鮮，唔似出邊好多都係比冇晒味嘅玻璃蝦。深海魚蛋似潮州白色魚蛋，鮮味過港式炸咗嘅魚蛋多多聲，下次會試吓墨魚，應該都唔錯，。油面彈牙，米粉爽口，食到尾都唔會比熱湯浸到霖晒，加上大量芽菜，超級滿足！一定會再嚟！…Read More

出乎意料幾好食，尤其是蝦沙律嘅蝦好鮮味，好新鮮，唔係雪到冇晒味得個大字嘅玻璃蝦，炸雞粉好薄，感覺冇咁熱氣，抓飯差得好實淨，好有口感，正！飲品都好好味，果汁加燒酒好特別，燒酒嘅份量亦不欺場。我估唔到服務咁好，年輕侍應態度都非常好，值得一讚！老實講後生侍應態度好真係唔易遇到。而門口個店長先生態度一樣咁好👍另外要一讚嘅係個洗手間， 10分10分乾淨，見到洗手間都咁乾淨，對廚房嘅同食物嘅衛生都信心大增。真心超抵食！會再去…Read More

企外廳侍應黑口黑面，態度傲慢，全晚有個人黑口黑面企係你面前望住你，成餐飯都食得好大壓力。只有一位企內廳的男侍應態度好好多，有笑容，放低食物時更會跟返中高檔餐廳做法，介紹返係咩食物同材料，點解同一間餐廳啲侍應可以差咁遠，希望黑口黑面嗰位自己檢討下。講返食物， $300個烤雞餐，價錢本身冇問題，送到上嚟竟然只有兩隻雞槌，老實講亦唔講得上話好食。餐湯係豆湯，呢個真係唔啱飲，個湯好鞋，好多豆沙，冇乜鮮味，只係鹹鹹地嘅水咁，飲咗兩啖冇飲，可能我哋唔好彩，見其他食評有啲係蘑菇湯，可能會好啲。甜品係麵包布甸，細細格，兩隻手指公咁大，上邊吱舊假cream, 唔覺得好食。我係正常食量嘅女生，食完全餐飯返到屋企都覺得唔夠飽。計埋飲品加一埋單$450 ，食物質素及服務態度，完全唔值。一定唔會再去！…Read More

相比旺角店，食物質素差很遠，但服務卻好很多食開旺角店，果邊明明全店都係空枱，但都唔俾人入去。好明顯想門口長期有人做勢，不過旺角店水準的確不錯，所以都冇辦法要照排隊吃。知道青衣開咗分店，就來試吓，唔使排隊超開心，點知食落手卷內嘅海膽非常不新鮮，強烈腥味，大概係超級市場質素。喺旺角店都食過海膽，唔係話十級鮮味但都起碼冇腥臭味，旺角店嘅紫菜係溫熱保持脆口，飯亦非常軟熟，可惜青衣店完全冇呢兩個特色，整體而言水準只係香港$8連鎖壽司店咁上下。好彩白子好新鮮，不過就整體質素而言應該短期內唔會再食。相反服務方面就比旺角店好10條街，老實講旺角嗰邊服務有些少澳牛影子，黑口黑面，唔耐煩。但係青衣呢邊，一男（戴眼鏡）一女（年輕長髮）店員非常非常有禮，令人食得非常舒服，親切及常保持笑容，希望香港多啲服務員好似佢哋咁有呢種服務態度。亦希望美登利公司知道這兩位服務員做得實在非常好，為客人帶來難忘的用餐體驗。及提升旺角店的服務水準，如果青衣店兩位店員能過去旺角店服務，就完美了！因為未來應該都只會到旺角店在再吃。希望能吃到美味壽司的同時，又不用受氣。…Read More

平時都有去開呢間食素食，不過經過下面呢件事，以後都唔會再去！過年時分，每間食肆啟市日子都唔同，去之前打個電話去問定有冇開市都好正常，電話接通咗，我用好正常有禮貌嘅語氣去問：「唔該想問下今日有冇開？」有個男人態度惡劣咁答我：「咁我拎得起個電話，就當然有開門㗎啦！」咁我只好回應：「咁0係你拎起電話嗰一刻，我當然已經知道你係有開市，但我無理由直接cut你線。禮貌上我都要話你知我打黎做乜嘅。」可惜佢聽唔明我講咩，可能呢個回應對佢來講太複雜。其實佢只需要簡單回應「有開」兩個字，所有嘢都會簡單好多。之前去呢間食肆，都感覺到啲侍應好火爆，見過佢哋鬧交，充滿負能量，可能做得唔開心，所以幫老細趕啲客走。…Read More

可能因為閑日三點幾去食，完全唔使等位，仲要好少客人，好快就食得，又熱有焦香又好味，又軟滑又林，諗起都想食，完全唔似之前啲食評咁講到咁差，唔知係咪因為人少嘅關係。個湯都非常鮮味，雖然鰻魚乾細到差唔多食唔到，但係只飲過湯都值。而嗰啲所謂嘅細骨就比多春魚嘅有肋骨更細，所以我全部直接食埋，完全冇問題，食多春魚都唔會調返嗰啲又肋骨出嚟啦，咪又係直接食埋，呢個鰻魚嘅所謂細骨完全感覺唔到。呢個價錢可以喺香港食到咁嘅水準嘅鰻魚飯，仲要係日本鰻魚，啲飯都好好味，汁都好夠，完全唔覺得有之前食評講嘅問題，個人認為CP爆燈！…Read More