Li Nok Hang's Profile

Apt Coffee 入到去咖啡店，大部份人都係比個環境/打卡而吸引著。當然除咗一杯好咖啡之外，食物對我都同樣重要，但有時黎黎去去都係嗰幾樣野，而今次呢間店就可以由咖啡到open toast都可以自己揀。 Apt 故名思意指係「A Personal Trailer」。老闆之前有喺精品咖啡店度打過工，但總係心諗自己沖比客人嘅咖啡，自己鐘意又未必啱客人嘅taste。於是就決定要開間cafe令每位客人都fit佢哋自己嘅taste bud。 「就正如咖啡咁，有D人鍾意奶泡打得厚D先有口感，有D人鍾意薄奶泡可以拉得更多pattern。但同意又唔好唔記得，咖啡店推出一款咖啡都有事先經過思考邊個配搭夾D啊咁。就正如手沖咖啡中沖煮時嘅咖啡粉磨得較幼的話，水流就要快D，粗D嘅則可以慢慢流。」現時apt就有三間分店，其中西環店位於新嘅住它樓下，近地鐵站，環境仲要係最開揚；灣仔店就要行上一段斜路；中環店相對較樓底比較矮小。 三間分店嘅menu都有D唔同，但主要都有自選配料嘅open toast/沙律/三文治，西環新店則有埋自選意粉同taco(晚上先有)。大部分較昂貴嘅topping係要加錢嘅。 Toast tailoring $68 (Breakfast hour，中環店) (Meatball+$10，Truffle scrambled egg+$10) 論賣相黎講，toast 就當然吸引過三文治。而toast tailoring又有得揀兩款麵包同醬。Lunch嘅toast tailoring當然多好多餸菜選擇，但同時又貴咗一倍(不排除係份量會增加嘅源故)。(P.S.大部份早餐要加錢嘅餸喺午餐就唔洗再加錢) 原味Sourdough外皮硬脆，但食咗冇幾耐條邊就開始硬到切唔開，因為佢較薄，所以就食唔到佢內裏軟綿濕潤嘅效果，但質素其實唔錯。Raisin & walnut版嘅酸種包就多咗黑麥嘅成份，核桃唔會孤寒到只比粒碎你，我就鍾意呢隻多D。 蕃茄cream cheese就唔只係gimmick，輕微帶有茄膏嘅清新，但就唔係好smooth。Green mayo內裏充滿菠菜泥，解除一般蛋黃醬油膩成份，但調味就有D太淡。 肉丸算係個額外嘅收穫。佢每面有焗烘/煎香過，咬落香軟多汁，入面含有蔬菜，肉嘅顏色較深，同平時嗰D有差別。番茄醬汁唔會比得太多，調味充足食落唔會淨係得好寡嘅酸味。松露蛋炒得水嫩軟綿，偏向西式炒法，落咗牛奶/cream，松露醬又做到畫龍點精嘅效果。 Toast tailoring $68 (Breakfast hour，中環店) (Smoked salmon+$20，prosciutto ham+$15) (Cold smoke)煙燻三文算係高質嘅，色澤光滑，香鮮嬌嫩，但就應該唔洗加$20 lor。prosciutto並唔係指咩部位嘅parma ham，但其實parma ham(aka Proscitto di parma)係眾多prosciutto (prosciutto crudo)嘅其中之一個嘅種類。呢個係偏瘦嘅部位，但都唔會乾到支火柴咁。…Read More

喺呢個疫情之後，當然要去報復式食飯，食盡哂所有料理，而今次呢個料理，對我而言係一個新嘅接觸，好似發現一個新嘅大陸。Anjappar呢個品牌其實已經遍佈全球各地，主打印度南部嘅chattinad料理，掌握各種香料嘅應用去打造個香港人少數接觸嘅料理文化。香港分店位於尖沙咀K11附近嘅商業大廈，環境寬敞但衛生就麻麻。 食物選擇係多到令你頭痕，影哂嘅話要額外出多兩個ig post有餘(一個ig post最多出十張相)。真係你諗到D乜呢度都應該有齊哂架啦。連我最鐘意嘅naan/薄餅都各佔一頁，冇選擇困難症都變做有。「泰米爾納德邦料理(chattinad cuisine)源至於印度南部嘅Tamil Nadu地區。出名於比其他東南亞地方用得更多香料，有時又會用乾嘅蔬菜類，因為嗰個地區都比較乾嘅。特別D嘅煮食材料有羅望子(tamarid)，胡蘆巴(fenugreek)等。」 Butter Dosa $70 上枱嗰咗真心嚇咗一吓，大到爆炸😂，同埋佢真係用盡鐵板嘅每一吋面積。性價比以香港人角度就幾高，至少三個人食先好啊。 「Dosa係一個印度南部料理嘅代表作，其中佢嘅麵漿並唔係用麵粉，而係用某一種白米/扁豆加上水磨成漿。傳統做法仲會經過半日至一日發酵先至再倒入大型圓板去煎嘅。」 一用手撕開，聲音清脆誘人，入口輕盈，唔覺唔覺只會覺得佢係個脆而較淡味嘅可麗餅，但牛油嘅香味就唔太顯著。 旁邊配上D傳統嘅dosa chutney。白色嘅應該係椰子味，最主要係椰絲/扁豆/孜然籽等，佢係照咁blend埋一齊去serve嘅，並冇炒過，食落綿密，偏向清新，但莫明奇妙又好似酸酸地。 綠色應該係有香菜版嘅chutney，呢個就更啱我口味，口腔微微有陣青味。紅色應該係冇椰子嘅蕃茄chutney，呢個就明顯更似西式嗰D蕃茄沾醬。所有chutney仲有D額外炸香嘅芥末籽同咖哩葉，呢個又係非常傳統嘅。 Anjappar chicken meal $120 比呢個dosa驚喜嘅係咩？咪係更加多醬/更加多澱粉嘅終極拼盤lor🤣🤣(開始為D洗碗工可憐🥺)。呢樣野本身就係放喺banana leaf度用手食嘅(P.S. 香蕉葉一定係必需嘅)，但當然，餐廳為咗迎合唔同地方嘅文化，就加多咗個大鐵碗盛着。 先講個雞先，應該佢哋就用咗chattinad/varutha嗰隻做法，聞落非常之複雜，一入口所有獨立嘅香料都好似融和於一體，有茴香籽/葱頭/椰子絲等嘅味道。雞肉入面係有成隻雞脾，但可惜係偏乾柴，大缺點之一。 旁邊嘅醬料我就真係有D摸著個頭咁去食。最有印象嘅有咖喱雞隔離嗰個，佢係個甜到爆登嘅醬，但同時又有蜜棗/椰糖喺入面。有一個係sambhar，佢係辣到我唔敢再試另一啖。有一兩格係一D香料薯蓉(aloo masabi)，嗰個就幾香口。 而中間嘅主糧：全麥roti/chapati，白飯，脆片就正正常常。Mutton Curry $150 四個字：反差極大！大家可以睇吓個size comparisons，$150就得個飯碗size嘅羊肉，羊肉係貴料，但大家接唔接受得到啊？！我睇咖喱一向都會望吓佢面頭嗰層油，因為層油通常係由椰奶嘅油脂製成嘅，其實呢個先係味道嘅來源。比起拼盤嗰個咖喱雞，呢個就更加濃郁同深厚嘅，同樣有好complex嘅香料味。羊肉就好似手撕咗咁軟腍而肉味重。…Read More

餃子冰室 上次就去咗長洲角酪/陳通記...，而呢次我諗都冇諗過會去餃子店，有圖應該都留番去食糯米糍/紅豆餅啦，但我又諗都冇諗過會咁好食嘅。 餃子冰室創辦人係長洲原居民，起初店舖只得佢哋兩個包辦廚師/侍應，只能提供三款餃子，但佢哋都堅持每日轉吓款式，默默研究更多搞鬼嘅饀料。其中創作「南乳豆卜餃」呢個靈感係黎至於阿媽平日嘅家常便飯。 店舖位於唔喺海傍嘅新海傍路，招牌顯得非常隱蔽，如果冇埋個招牌乍看更似一間路邊民居村屋。店內就行復古風，破舊嘅枱櫈，冇遮冇掩嘅燈泡，疊滿黑白淡奶嘅counter等，都呈現著70s嘅冰室作風。 食物選擇以佢咁細間舖黎講都整到好多野，但佢叫「冰室」。當日就有十款餃子，有D就要額外加錢。套餐選擇包含4-10隻餃/飯/酸辣湯或是日飲品。想細食或當係個正餐都得，但注意每位低消費係$35。 4隻餃子+酸辣湯$45 (黑白土匪餃+$5) 價錢黎講就算一般啦，但佢嘅份量真係唔講得笑。望落唔似係煎餃，更似炸餃，但好少見到餃子嘅饀料係咁肥大嘅。 餃子皮煎/炸得均勻，雖然話係偏厚嘅，但每面都酥脆誘人。一咬開香脆嘅外皮，裏面係好澎湃嘅肉汁，好似小籠包咁，真心估佢唔到。 網上有見過係土匪雞肉餃，但當日唔知點解係豬肉。豬肉磨得非常細膩，脂肪比例高，滿口都係香口嘅豬肉。上面就灑咗D土匪粉，最主要有黑/白芝麻，孜然，香茅，花椒/胡椒粉等。香氣比想像中更強烈，如果入面都有就更好。 酸辣湯就好在唔會太酸，辣度可以再強D。芡汁唔會拉得太多，主要有香醋/輕微嘅醬油底韻，配有蛋花/木耳/豆腐粒等。 餃子x6 $42 (咸蛋黃黃金餃+$5) 咸蛋黃比得非常之多，除咗醬之外又有咸蛋黃本身。口感就好似「沙沙地」咁，除咗邪惡/滑膩之外都冇乜好補充。但我就覺得佢令成個餃子變得油膩，因為餃子本身都係炸嘅，肉又偏肥。餃子皮/肉大致上就冇乜分別，同樣係好豐滿嘅。最主要係呢度多咗D冇乜口感嘅蔬菜。…Read More

上次去完食芋泥蛋餅之後，先發現原來呢個地方隱藏著好多小店。今次本身就想去間拉麵店，但佢就熱門到兩點前已經賣哂，跟住我就再直行入到去呢間台式料理新店。 「好吃吃光」位於大角咀博文街，位置唔太顯眼，但人流都幾多吓。店舖呈木白系風格，店內佈光較灰暗，可能係隔離裝修搭棚先會咁嘅。座位/空間偏向擠逼，侍應經過都要就吓我對手。 食物選擇都算唔少嘅，有午市套餐(配涼菜及是日涼茶)，可選海老滷肉飯/醉雞飯/鯖魚飯etc，都算有特色嘅。亦可以加配少量嘅小食(e.g.台灣腸/花枝丸)，飲品都算係平。仲有正價嘅蛋餅類/滷水拼盤/芋圓等。叫夠$120有免費嘅甜不辣。估唔到咁細間舖都做到咁多野，但可惜就冇乜麵類。 月見海老蚵仔滷肉飯$68 咁嘅滷肉飯餐真係好少見，又有海鮮同家禽，$68黎講就當係個港式飯咁，性價比就唔錯，望落真係有好多料㗎。當日配菜係芽菜，微微帶醋酸，但個人麻麻地豆卜+醋呢個配搭。 蚵仔呢樣野通常只見到喺蚵仔煎/蠔餅。處理得唔好可能會有蠔殼，又可能會唔小心用手壓到爆咗必屎...etc，而呢度就冇呢D情況。蚵仔有淡淡嘅海水味同時又水嫩柔滑。蝦粒就估唔到係有煎過架(仲以為只係白灼)，質感爽口彈牙，亦有層焦香。 滷肉嘅五花肉，竟然比蚵仔少，不過又有樣感動嘅野。佢滷肉嘅汁竟然係佈滿於全碗飯中，唔係照咁係上面放D汁嗰隻。一𢳂起，飯粒輕微噴煙，每啖都有甜而唔太重口味嘅滷肉汁，加上肥瘦均勻嘅豬五花，掛在飯粒上嘅蛋液，一口接一口，真心有種暖笠笠又滿足嘅感覺。 大滿足蛋餅(起司+雞排+薯餅+蔬菜)$48 初頭就冇諗住叫蛋餅嘅，但見佢其中一款有咁多料，就叫咗佢。價錢就當然係貴D嘅，但望吓佢入面有幾多料先啦。 蛋餅皮係脆身嗰隻，但就唔脆嘅，反而係微微煙韌，入面有少少蔥花。蛋就反咗去表面，配上唔算太濃厚嘅甜麵醬。Morzarella cheese上枱時仲有拉絲嘅，唔洗多講啦。 薯餅切到一粒粒，外層焦黃爽脆，內裏嘅薯粒/絲就唔係「蓉」嘅texture，而係「粒」嗰隻。雞扒我唔知點解食食吓會覺得係豬扒，可能係佢有D柴掛，而佢同蝦粒一樣係煎得靚仔嘅。所有材料都均勻分佈於每片中，唔話佢滿足又真係唔得。 芋圓糖不甩(芝麻粉)$30 又一特別之作。餐廳將糖不甩湯圓變成芋圓，除咗花生粉外又可以叫芝麻粉，但其實佢個擺盤反而更似係鮮奶麻糬咁，可能就係差咗個薑汁糖水掛😆。望落好似有D空虛，但你一粒一粒咁食都好飽嘅。但係佢比嗰支牙籤就...佢用咗個牙籤紙包做咗個DIY咁lor，其實就唔洗咁啦。 芋圓有四隻顏色，應該係紫薯/番薯/芋頭/綠色嘅抹茶味，口感煙韌黏身。如果齋食嘅你會食到佢DD原材料嘅味(我知冇人會齋食)。黏上甜而深厚嘅黑芝麻粉，為芋圓帶來生氣。但呢道菜其實可以再進步吓，例如牙籤嗰part，令芋圓黐咗喺個木板咁，好似都未算係好完整咁。…Read More

疫情放寬，雖然話各行各業都暫時脫離難關，但有唔少店舖都被迫結業。我之前都介紹過兩間，而呢間就在疫症嚴重時係寧願唔開舖，「輸少當贏」。 Rempah 嘅意思係「香料」咁解。東南亞嘢就出哂名係又辣又重口味又多香料，餐廳最主要就係想唔打破傳統，但同時又要融合現代元素嘅食材/煮食方法。 店舖位於軒尼詩道，我個人覺得比起灣仔站，佢離金鐘站仲近一D，但其實店舖都係比較偏僻嘅。當日去到午市時段，係有好多人排隊，可想言知人氣有幾高。 店內裝修以黑白風為主，望落地下有個令人有密集恐懼症嘅歐式黑白磚頭地板，望出窗外又有個好奇怪嘅路邊街外位。鍾意佢有D油畫/綠色植物去中和返個氣氛，如果唔係我會覺得有種「唔敢整污糟張枱嘅feel」。 餐牌就好簡單，主食就得三款麵-蝦麵/湯叻沙/乾叻沙，飲品有四款。順帶一提，呢度嘅Kopi/Teh係咖啡/紅茶+煉奶，Kopi/Teh O係咖啡/紅茶+糖，但有D講話teh/kopi係咖啡/紅茶+糖+煉奶。 Nonya Laksa Lemak $98 「叻沙同其他東南亞菜一樣要先整個paste，最主要就有乾/鮮辣椒/香茅/南薑/峇拉煎/薑黃...etc，特別D就有蝦乾仔/石栗(candlenut)去令個醬厚身D。之後就炒到個醬變色再加蝦湯/椰奶/椰糖/魚露...etc調味。 叻沙都有分唔同派系，但究竟係源自馬來西亞/新加坡?...我就唔加入喺呢個戰團度啦🤣。Lemak係指「脂肪」咁解，即係叻沙必有嘅椰奶。而Nonya-娘惹菜即係中式X馬來料理(e.g.椰汁糕)」 價錢同我平時食開嗰D就偏貴嘅，一碗嘅份量就唔算好多，但食唔飽可以免費添麵。網上睇佢會連湯去俾你嘅，所以就唔會驚唔夠湯嘅。 湯底舀起黎厚身適中，見到入面有好多磨成蓉嘅香料同辣椒碎，飲落濃度適宜，香惹鮮美，椰奶嘅比例係唔算多嗰隻，主要係食佢嘅湯頭同所有香料結合嘅正宗口味。 蝦肉見到係事先用人手挑蝦腸後切開一半，蝦嘅鮮味就唔太顯著，口感爽嫩，紋理緊緻，勝在有六舊。蛋就估唔到有整到七成熟，微微漿身。豆卜就似係個吸汁嘅海綿。炸魚片頭切成長條型，彈牙鮮美。 麵條就用咗米線，好奇怪會見到呢樣野出現喺東南亞菜度。米線就算係成碗麵嘅缺點，感覺就太熟啦，冇任何口感。仲有D芽菜/乾羅勒，整體都算係非常之唔錯嘅。 Kaya Toast $38 通常咖央多嘅饀都係由一個以椰漿/蛋/椰糖...etc煮成嘅醬再加軟化牛油嘅。但呢度就只加班蘭咖央醬。佢堆疊得好高，又好似好吸引咁。 多士烘得香脆，或許更脆都得。內裏嘅醬冰凍厚身。比起抹醬，佢食落更厚身更漿身(應該係煮得耐D?)，班蘭嘅香氣漂泊四散。濃縮後嘅椰漿，佢好濃郁而甜度剛好嘅，幾啱我口味。…Read More

深水埗就出哂名係coffee shop嘅勝地，近年亦都開咗好多間新奇百怪嘅食店，有D係土耳其菜，仲有D裝修到成個太空倉咁。 但其實喺大南街西面行過南昌街就好似去咗另一個世界咁，有派飯碟頭飯嘅良心店，環境較為樸實，就似返現實嘅深水埗。而大南街對上嘅基隆街都係諸如此類，有唔同嘅大街小販同傳統港式食店，就好似呢一間咁。 家後以閩南語(主流於台灣/馬來西亞等國家嘅言語)解的話係指「妻子」。呢間餐廳其實係個家庭生意，老闆嘅父親本身喺做布行生意，但因疫情令事業前景變得唔明朗，所以就轉行試吓做飲食業，由零開始做起。 一開頭只有三款餃子賣，到而家有八款，同有D日式嘅野。講起日本野，老闆個妻子係個日本人，鍾意整甜品，其中basque Cheesecake係佢嘅拿手菜，於是就決定放喺店門外售賣。起初食堂令人以為只係賣D cheap野/急凍貨，所以一開始就賣得唔好。但好在老闆就响興cheese cake呢樣野之前佢就開始去賣，令店舖人氣急升。 裝修就冇特別嘅，並唔係行新潮嗰D，呢度就只係傳統白色裝修。食物就有港式嗰D飯餐/滷水小食，湯/煎餃其一，數量得八隻揀，可轉set。仲有日式飯糰/各種麵條/雞翅。甜品芝士蛋糕有原味同是日口味。 煎餃$42 (雙拼+$2) 煎餃望落顏色相若，煎得好均勻。佢嘅饀料雖然唔及而家新開嗰D店咁足料，但都包得算飽滿，性價比依然唔錯。題外話，男店員佢好nice，會聊吓D食客問D野好唔好食，好少見呢D港式舊店會有呢類店員(當然總係會有啦) 。先講佢嘅餃子皮，餃子佢本身都係近一口size，餃子皮都roll得好薄，唔會有唔熟而粉粉地嘅情況。口感微帶嚼勁，煎嘅表面只停留喺面層，其實我就鍾意呢種做法多過平時每面都煎嗰D，咬落有脆皮但同時有蒸熟嘅texture。 洋蔥豬肉餃：洋蔥驚喜地用咗紫洋蔥，爽口甜美，冇任何澀味，係未到煮淋哂嗰隻，但我就幾鍾意，加上佢比得超多。豬肉一咬入口汁水四濺，肥瘦適中，調味亦都足夠，就咁洋蔥+豬嘅配搭簡單而絕配。但如果8隻都係食呢隻味的話就有D單調。 香菇粟米雞肉餃香菇粟米雞肉餃：入面嘅饀料就好鬼健康咁，仲以為自己食緊素餃。椰菜爽脆，蘑菇軟韌，仲有木耳同粟米。雞肉就話係少D，但佢品質都唔錯而唔柴口。 日式手作芝士蛋糕$28/件 佢呢度嘅芝士蛋糕最吸引我嘅係價錢，$28真係夫復何求，不過size同出面比係細咗D。餐廳用咗鋁箔紙左右包住Cheesecake，但有D位就黐咗入張紙度。 芝士蛋糕佢中間仲係微微流心，質感絲滑細膩，cream cheese嘅奶香帶微微酸感，外層嘅焦位唔會食落太燶，令我一口接一口係咁食，正。…Read More

駱駝漆一向都係我嘅覓食之地，相信唔少觀塘嘅打工仔都係架啦。上次去咗一間高質慢煮牛漢堡後，搵搵吓又發現到呢間同樣係主打burger嘅小店，而且又冇乜人排隊添，當然要去懲罰一吓。 保家山其實係解作burger-saan1，喺餐廳入面嘅枱真係見到有個將平安包改造漢堡包嘅搶包模型，真係好應景XD🤣，未食野都已經吸引咗我嘅注意🤣🤣。 餐廳就位於三期嘅5樓，呢層就冇咁多食店嘅，冇乜人行過。環境寬闊幽靜，少見喺呢D工廈都坐得好鬆動。埋邊嘅木板貼上食客嘅即影即有相，又有種溫馨感，但最吸引我嘅都係有個私家廁所🤩🤩🤩😏。 一睇餐牌，發現佢哋真係好鐘意玩拼音，burger嘅口味有“fu²-釜(山)”嘅韓式豬肉堡，"Kwai⁴-(山)葵”嘅wasabi堡，仲有一個芫荽控必試嘅青色burger。漢堡本身已經包埋個薯格/沙律同埋汽水，唔夠喉可以另加小食/西湯。 “Saan¹-山”手工和牛漢堡$98 漢堡嘅size真心比想像中細，但價錢又連埋薯格同可樂，其實都算合理。提埋餐具/食物都係self service 嘅，如果有埋手套就更好。 呢隻麵包有金黃嘅外層，內裏純白。佢內層冇乜點烘過，反而只是熱溶咗D牛油喺入面，我又幾鐘意呢個setting。口感輕盈軟熟，牛油香分佈於包中而帶有甜味，我覺得呢個就幾好。 漢堡肉就聲稱係和牛，通常漢堡扒70%都係瘦肉，呢度就似係60%瘦肉。首先，漢堡扒內裏係半生熟嘅(通常餐廳整得5/7成熟嘅，我都安心去食嘅)。 睇相都見到佢D汁水滴漏而出，內裏口感濕潤軟嫩，牛肉磨得幼細而係好「smooth」嘅，脂香感十足，調味唔多，而主要都係食返肉味，我就覺得好驚喜。 醬汁望落乍看好似芝士咁但其實一定唔係，落得就算好多吓。顏色唔係一般紅紅地嗰隻(冇茄汁)，食落就偏酸嘅，主要酸味都係來至酸瓜粒，下面再講。 蕃茄我一向都唔鍾意佢出現喺burger度，而佢呢度整得厚之餘又唔出水，可能係加咗鹽。仲有D紫洋蔥同生菜，我就覺得唔錯。 薯格就揀咗牛油味，但聞落同食落都係欠缺嘅。欣賞薯格切得好厚，外脆內綿，充滿黑椒/鹽嘅調味，呢個就一般啦。 “juan⁴ seoi¹-芫荽"手工和牛漢堡$108(麻辣薯條+$3) 我第二次去嘅時候就叫咗我嘅favorite嘅芫荽，但就冇網上嗰D咁多。Burger內每樣野嘅份量/品質都大致上冇乜差別，個包就更似係potato bun多於brioche。牛肉就變咗全熟，但都係juicy嘅，建議可以多少少調味。配料就只得芫荽同車打芝士，我覺得少配料反而可以主要食到佢嘅肉/芫荽嘅刺激感。 Burger醬汁以我所知令人愛戴嘅原因係因為有“酸”“香”同“滑(夠多油)”，酸味呢度就有酸瓜.etc，香就有「山」漢堡冇嘅乾羅勒同油潤嘅芫荽，加上佢又creamy又唔膩，我就好鐘意佢嘅汁。 我今次就upgarde咗做薯條，強烈建議大家都去upgarde+叫麻辣味。佢切得厚薄適中，口感比當日嘅薯格脆得多，內裏軟熟。乾辣椒粒均勻佈滿喺薯條度，加上有埋辣椒籽，麻嘅持久度係不容忽略，我嘅嘴唇係會好似食完四川麻辣粉咁不自然地震動，加上孜然粉同黑椒，雖辣但令我一口接一口咁食，好鬼爽皮🤣。…Read More

呢幾年coffee shop開到成街都係，有D shop選擇自己炒生豆，有D就去批發商到攞。Cupping Room/Espresso Alchedmy等，就算係最出名有自己炒豆同自己嘅連鎖分店。而今次介紹呢間都同樣係咁，但好似被人遺忘咗嘅一間本地品牌。 Reaction Coffee Roaster，同樣一開始只係間咖啡豆批發商。佢哋17年喺沙田開咗Reactor Coffee，隨後再度開展Reaction/Boundless呢幾個品牌，目前有五間實體店，但都好似未夠其他品牌盛行於全港。 今次去到呢間尖沙咀店位置非常接近K11，面積頗大，以石磚/白系裝修為主，比起而家日式木系嘅潮流，呢度就偏向歐陸田園風。不過，我就好唔鍾意餐廳喺朝頭早都好似夜晚咁熄哂D燈而好黑暗(本身佢個位透光已經好差)，我朝早九點入到去係令我更加眼瞓。食物款式其實都幾多吓，有意粉/漢堡/open toast再加單點麵包同(全日)早餐，乜種類都有D咁，亦都有個menu講咖啡豆(手沖)，呢度就真係滿足到我嘅要求。Parma Ham Cream Cheese & Fig Toast $110 呢度嘅食物價位差唔多全部都由$100起跳，雖然話係有早餐menu，但大部分都係素食，我就唔啱啦。我揀呢個toast嘅性價比就一般啦，Parma ham只得兩片仔，但無花果同個包又幾足料。 Parma ham睇落個顏色就幾靚仔，有足夠嘅脂肪同油香，配上蜜糖嘅甜蜜，焦脆硬身嘅焦糖核桃/火箭菜，質素不俗！如果火箭菜有落D油醋調味就更好。無花果意外地多，熟度剛好，香甜，配上parma ham直頭絕配。 麵包堆疊至兩層，我個人就唔明白呢個設計嘅好處，配料又要自己分去比另外一片toast。麵包入面有好多合桃同杏甫粒，切得厚身而可以烘到外脆內綿，有淡淡嘅麥香，我就幾鍾意。柚子味忌廉芝士意外地清新開胃，亦都係spreadable嘅，香滑嘅奶香帶有柚子汁嘅甜美，有驚喜！Baked Portabello with black truffle and scrambled eggs burger $105 早餐又唔想食大大塊漢堡扒咁heavy，所以就叫咗呢個。賣相就真係落足功夫，炒蛋擺到好似溶岩瀑布咁，加上紫色嘅麵包真係好吸睛，但我都係覺得唔值$100。 炒蛋睇個樣都已經覺得好creamy同綿滑，蛋香十足，再夾雜著品質唔差嘅黑松露醬，調味可以再多少少。 主角大啡菇毫無意外地令我失望啊！大啡菇處理得唔好，啡菇D水係會流到四圍都係而浸到個包變做海綿，而呢度就令呢個歷史再次重演。 麵包唔知落咗D乜野變到好紫，可能係紫薯？？兩面都有烘過但都係逃唔過被啡菇浸濕嘅現實，好在佢夠厚，仲係有口感嘅。 蕃薯條切得偏幼，外皮微脆，內裏香綿，甜而不膩，雖然我就prefer厚切多過薄切，但呢個都算唔錯。 Sous Vide Chicken Breast Tomato Panini Roll $95 份量比以上嗰兩款更加大型，Panini唔係平時壓到扁哂嗰隻，呢度只係輕微烘脆，較有咬口，蕃茄味道就少到食唔到，但又聞到有茄蓉香。 雞胸以慢煮黎講就有更多進步空間，未夠水嫩，仲有少少乾，但都算係唔錯嘅，因為有煎過。呢個包嘅火箭菜反而有用油調味，仲有D蕃茄乾，勝在真係夠哂飽肚。…Read More

據上次去咗大角咀試咗個痴L線咁大嘅排骨便當之後，一直都想再去返嗰間再回味一吓。但喺一切都正常返之後(冇全民檢測)，人龍都恢復返以前一樣多人。當日唔想排隊嘅我，就去到呢間同樣有便當嘅台式小店。老厝邊呢個名係指台語嘅「老鄰居：lāu-tshù-pinn」。餐廳有荃灣/大角咀分店，兩者都係以台式懷舊風為主。荃灣店以淺藍色嘅清新風格為主，而大角咀店嘅格局就偏向灰暗。 一入到去見到天花掛滿懷舊玩具嘅海報，牆上就有D睇唔明嘅油畫同假窗口，盡頭嘅水吧更突顯街外屋子小攤嘅風格。但始終我都係鐘意荃灣店tiffany blue顏色嘅明亮環境。 餐牌就同一般台灣菜咁有好多樣野揀，欣賞餐廳有將食物分類，唔洗睇到頭都爆。食物算好齊全架啦，詳細可以睇相，講唔哂。平日有午市套餐(飲品減$10)同下午茶餐。 香滷排骨便當$65 排唔到隊去食排骨便當都要去第二度食！賣相絕對唔差，排骨嘅size係正常地大，係一般人都可以食得哂嘅份量，性價比都算係唔錯。另外，店舖門口有個黑板會寫住當日嘅便當會有D咩配菜，睇定啱唔啱食先啊。 通常便當上嘅滷排骨都係指炸完再浸入滷汁嗰隻。外皮裹上木薯粉令佢有一粒粒嘅脆皮，炸嘅時間恰當，酥脆誘人，唔會俾滷汁浸到發漲哂而失去口感。因為件排骨係新鮮炸嘅關係，肉中仲夾雜著好多肉汁，但其實過咗無耐，就已經變得乾柴(咁本身呢個部位都冇乜脂肪)。滷汁就有D藥材(e.g.八角)嘅香氣，唔鐘意滷汁偏甜/太濃嘅人可以黎呢度試吓，但可惜白飯過熟而變得溶溶爛爛。 當日嘅配菜有干扁四季豆/甜椒西蘭花/涼伴芽菜同滷蛋。四季豆伴有肉燥，口感腍中帶爽，西蘭花掛滿香口嘅汁液，芽菜則油潤爽脆，滷蛋就滷得未夠入味，同埋喺烚嘅時候出現凹陷，但個飯整體都非常之唔錯。 超濃芋泥蛋餅$40 網上好多人講話呢樣係必點之一，而呢個蛋餅都冇辜負我對佢嘅期望。份量正常，勝在饀料夠多，有四樣材料。一拎起見到滿到瀉嘅芝士/芋泥，夾有微量嘅肉鬆同蛋，但後兩者响芋泥面前都好似有D多餘。…Read More

倆口小吃 米芝蓮呢樣野就好豐儉由人，有米芝蓮又唔代表好食，有D餐廳就之前好食依家就退步咗好多，有D餐廳就當正佢只係個綽號。而呢間米芝蓮小店只得一個人喺個廚房度，由開舖到收舖都做到冇停手，要排足兩個鐘食客都願意等待，呢D先至係實力嘅真實所在。 倆口小吃老闆曾經喺置地文華酒店嘅AMBER及倫敦四季酒店嘅法國菜度打工過，佢有呢個實力甚至可以喺米芝蓮fine dining餐廳做主廚，但佢始終追求嘅只係一間貼地而親切嘅街坊小店，令街坊可以認得呢度嘅出品。 小店近期入選咗2022年米芝蓮必比登推介嘅其中之一，入選咗之後人流真係多咗好多，兩次經過都打哂蛇餅。餐廳位於一D平常人都唔會走入嘅巷仔入面，以灰綠色嘅清新風格以及得意嘅油畫打亮全間店舖，行人路過都可以見到師傅煮野食嘅過程。 店铺就主打刈包同壓餅。刈包有最傳統嘅控肉口味，新派嘅蝦餅/炸雞味。壓餅就要睇吓當日有D咩口味供應，仲有黄豆粉白玉/雪糕潤餅等，售完即止。 傳統刈包加柚子醬$42 賣相就好精美，充滿饀料，但有D食材就唔係人人鐘意XD(芫荽)，但其實芫荽先至係香氣嘅來源。價錢都非常之合理，一般女士一個已經食得飽，但我就要埋甜品先夠喉。 餐廳嘅刈包堅持用人手每日自製，材料簡單，只需發酵後整面再搽層油拎去蒸就得。呢度就突意加入澄粉(wheat starch)，呢樣通常用喺蝦餃/腸粉嘅麵粉，為麵包帶黎煙韌嘅口感。 刈包最主要都要有一定嘅厚度同大小去包住D食物，口感要濕潤柔軟，有蒸包嘅香氣，唔會濕到似海綿，而呢個都有以上呢幾點，除外又有D甜味，但煙韌呢個點我就食唔到啦。 控肉(豬腩肉)size就片得偏向薄，唔似傳統咁大大舊，但同傳統一樣連埋豬皮(呢個睇個人喜好啦)。肥瘦比例剛好，唔會覺得太膩，口感就當然軟嫩而溶於口中，而滷嘅醬汁就調得偏甜，也許係柚子醬嘅功效，如果多少少八角香就更香口，而本人最鍾意嘅「煮到淋哂嘅蒜頭」亦喺呢度出現咗。 酸菜佢就放得啱啱好，有D餐廳係為咗做效果而放得過多，就變到好酸。再加上花生粉同黃糖令佢有更多種味道同層次，如果唔洗排隊嘅話我應該會成日黎食。 抹茶cream cheese壓餅$35 壓餅呢樣野其實我從來都未聽過，望落就似係壓扁咗嘅迷你版墨西哥卷餅(quesadilla)，但入面就夾住cream cheese。排緊隊嘅時候見到師傅將預先包好嘅壓餅放入鐵板上四面煎到有脆皮，叫嗰陣時先喺個鐵板旁拎出黎。 乍看就覺得細細舊但，其他都幾飽吓，但建議大家決定要排足1-2粒鐘嘅話都要試吓。佢個餅皮就加咗糯米粉，令佢喺香脆嘅外皮中帶出彈韌嘅口感。 入面嘅cream cheese先至係戲肉，餐廳就用咗小山園若竹嘅抹茶粉。點解要用呢隻，小店嘅IG就解釋用呢個粉嘅顏色就更鮮綠，較適合同cream cheese一齊高速打發。熱到有少少燙口嘅cream cheese，口感輕盈，响濃度剛好嘅抹茶中帶輕微嘅乳酪奶香，極之有滿足感。…Read More

提起蕃茄湯專門店，時不時都會諗起呢間蕃茄仔。餐廳我都唔洗多介紹，銅鑼灣店有日三點幾去到都要排隊。最高峰試過3:00就買曬，非常之熱門。 最近佢又喺九龍灣工業區開咗分店，喺正大渣哥樓上，做成同一個路口中黃店之一(仲有光榮/時代/渣哥/享樂)。 呢間餐廳由80後老闆打理，原本只係間位於小西灣嘅小食店叫「滑蛋仔」，主打多款滑蛋蓋飯。睇完兩間餐廳後，先發現雙方嘅招牌都好相似，都係非常之可愛嘅。 其後喺20年六月疫市開設番茄仔，亦成為銅鑼灣嘅熱門店。 喺eastmark呢個大廈上一層，呢個咁唔起眼嘅地方都見到有超多間小店聚首一堂。其中有D街坊小食店都黎到呢度開檔。呢度嘅蕃茄仔比起銅鑼灣店當然就寬闊得多，偏向開放式設計。大大個光到爆嘅霓「紅」燈引人注目。 睇吓餐牌，佢比起銅鑼灣店仲多咗幾款餸菜，有齊豬牛鴨雞。同樣以蕃茄湯同多款麵條做基底，而呢度就更主打拌麵。飲品有花茶/奶茶...，可能呢D野飲就唔太為意，但最令我深刻嘅係個價錢。就咁睇，所有食物都貴咗$3-$1x，但有D又平咗(可能係用料有變啦)。喺原店最平一碗麵+飲品要$68，到呢度就要$78。(p.s.當日係週末，平日係會平D嘅。 )蕃茄湯底：湯底每日以30斤新鮮蕃茄，加上豬骨同大量蔬菜，洋蔥，西芹，蒜頭等多款香料，熬足4個鐘，仲要用blender磨粹再隔渣。其工序煩複，嘥力嘥時間，加上可能嗰度舖租貴，貴D可能係正常事情。 淡湯飲落已經唔係蕃茄湯，而係番茄蓉，每一淡都充滿著茄蓉，質感非常之細膩，creamy又厚身。 味道酸甜，溫和，既有豬骨同牛油嘅脂香感，又有少少香草，檸檬葉，炸蔥蒜同蔥花嘅點綴。 一滴不剩，超好飲。 餸菜：炭烤風味雞扒$68 雞扒算係幾大塊，排得齊齊整整，外皮見到好似用火鎗燒過咁，而且食落爽脆誘人，充滿焦香。雞肉唔會太瘦，厚度良好，水嫩多汁，品質相對地非常之唔錯 。牛魔王(雙拼牛展，牛肩胛)$90 牛展牛肩就各兩片，size正常。牛展筋位份佈均勻，肉味極為濃厚，軟嫰香口，筋位微帶嚼勁，有D似啫喱咁。 牛肩肉冇辨認錯嘅就係top blade嘅部位，因為有條筋位喺中間，雖然話呢個部位本身都冇乜脂肪，但都煎得唔韌，同樣係充滿肉味，但缺點都係得兩片真係唔夠過癮。慢火豬手$78 豬手多到嚼都有排你嚼。豬手炆得好腍，豬皮爽彈，入面嘅肥膏都唔少架，亦有少少豉油/滷水味，連舊骨都好入味。 但就食到有少少豬毛未清走，有改進空間。 麵條：唔加錢嘅都有得揀兩款麵條，上海麵就相對可以掛得多D湯，感覺比較多層次。刀削麵就主要食佢煙韌嘅咬口，兩者都可以一試，隨你所好。 麻香惹味拌麵 拌麵我就揀咗要上海麵。拌麵香油就偏向麻多過辣，而佢麻都唔講得笑，我條脷係震著黎食，而基底都係夠味嘅，配上炸䓤蒜/海量嘅木魚絲/白芝麻，聽到都覺得夠哂香啦。…Read More

深水埗，一個近年成為年輕人嘅薈萃之區。喺每條大街小巷都充滿藝術，手工藝，但最顯著嘅，都係咖啡店。撇開咖啡，有時見到咖啡店供應嘅食物黎黎去去都係賣嗰D open toast/tiramisu...，成日都揀唔到一間啱心水嘅店舖，而呢間正正係我有興趣專訪嘅一間。 Ppalli Ppalli「빨리 빨리」英文直譯就係「fast fast」，店舖可能就係想客人盡快黎品嚐呢度嘅特色fusion韓國菜。 老闆Marco Livoti係一位意籍米芝蓮廚師，喺香港擁有品牌Holy Cannolli。Cannolli係一個意式甜品，由一個筒形脆餅入面夾住甜嘅ricotta cheese仲有朱古力/開心果等口味(有興趣就自己查吓)。可惜holycannoli就冇實體店，但有幾間合作商戶有响佢哋嘅餐廳供應呢樣野。 返返黎(又講得太遠)，餐廳位於大南街一棟新住宅樓下，樓底高得離譜。每次經過都會被佢個銀色+金屬材料嘅破格裝修吸引住，入面就以藍色嘅圍板/燈光更突顯佢太空嘅感覺，但我就返而覺得有D唔comfort，感覺唔係太習慣呢種全部都係銀色嘅環境。 食物選擇比我想像中少得多(仲以為真係嗰D韓國餐廳，其實都只係間cafe)。平日就有個午市類似乜都有D嘅bento餐，而主餐牌一頁紙已經寫哂，有最出名嘅泡菜煎餅/紫菜「飯」卷，反而咖啡仲多過食物一倍。 紫菜「飯」卷 Gimbap $78 一上枱我同朋友都呆咗一吓，諗都諗唔到佢入面嘅飯係完全被蛋絲替代。價錢係比平時貴咗D，畢竟全部都係蛋。但如果你諗住黎呢度食個「飯」卷當午餐的話，咁你只會餓足成日，你就當係多人分享小食咁就啱架啦。 蛋絲佈得密密麻麻，但估唔到佢同飯喺幻覺上都有七成相似。佢輕柔軟化，薄身，同飯一樣有層次感，帶有蛋香但並唔甜，出乎意料地融合。 饀料就唔算太多，畢竟蛋本身都係饀嘅一部分，有常見嘅筍絲醃漬，青瓜蘿蔔牛蒡。而主角就有蟹+蝦嘅沙律。蝦驚奇地水嫩彈牙，而蟹柳就唔驚奇地只食到蛋黃醬，但整體都可以一試，睇吓啱唔啱你口味。 和牛面頰酸種包$98 望落就係牛+泡菜嘅酸種包lor，冇乜其他裝飾/沙律，夠實際👍。牛肉(肉類)罕見地厚過麵包，大大件上，餐廳就用上牛面頰，因為夠多骨膠原，所以通常用黎燉煮同埋手撕咗佢。 牛面頰食落軟嫩化身，唔洗點用力就夾得開，欣賞佢嘅外層有煎過，充滿肉味同西式gravy嘅深厚風味，如果有更多調味就更好。個人對泡菜就簡單地分有超市嗰隻同手製嗰隻，兩隻嘅味道同texture都具有分別，而呢隻係偏似手製版。 酸種包嘅講解就參考返我之前嘅post，喺呢度都只係「臨時演員」。外皮唔會好難先至切得開，有烘過，口感偏向結實，但酸味超級顯著，我就幾個鍾意。8282煎餅$68 8282簡單講就係ppalli嘅數字讀法。煎餅size就中規中矩，而我就當然叫有店名嗰隻，仲有泡菜口味嘅。 粉漿偏向薄身，個人期望如果有D脆邊就更正。口感就軟糯綿密，食到應有嘅蛋香，如果有D炒蔥蒜香就更香口。內裏有乜味都冇嘅魷魚，同飯卷一模一樣嘅蝦同蟹柳，都算好足料嘅。…Read More

咖啡店文化喺香港越黎越普及，有更多人會對自己嘅咖啡有深入嘅了解同講究，但一杯好咖啡都要有個好嘅食物去襯托，酸種麵包都係常見嘅搭配好選擇。隨著咖啡店嘅興起，亦都有更多人關注用酸種製作嘅天然麵包，而呢間麵包店就滿足到我嘅喜好啦。Sour Dough位於灣仔皇后大道東，老闆Gérard Dubois-來自瑞士嘅糕餅大廚，同時亦都係連鎖店Passion嘅創辨人。店舖嘅綠色門面非常之搶眼，內裏則是暖和嘅燈光，感覺典雅 。我個人係非常之欣賞會用酸種去整包嘅麵包店。酸種(天然酵母)比起商用酵母更加講究發酵嘅時間、爐嘅温度同蒸氣，以達至有完美嘅脆皮同內裏氣孔蓬鬆嘅工匠麵包。 而酸種麵包嘅靈魂-sourdough starter更要每日「餵佢食麵粉同水」令佢活化各種有益嘅菌類，店舖嘅酸種更有三十年歷史，風味亦都會隨著時間而變得繁複。 店內排滿麵包/糕餅，係非常之吸引嘅，如果想外賣嘅，就要入到去一條line度同店員講要乜，之後再拎住張單走去cashier比錢，同時可以叫埋咖啡。如果想堂食嘅話我就唔係咁清楚，詳情請問返店舖。所有買到返屋企嘅麵包:酸種牛角包$23 依照本頻道嘅作風，無論係麵包/其他外賣食品，我都會用焗爐焗或用其他廚房用具加熱先至食嘅，而個post封面嗰D包係焗之前去影嘅，我之前嘅post都係咁架啦。 牛角包係麵包店嘅考牌菜之一，而呢度就做得唔錯。外層有搽上蛋液後嘅焦脆外皮，一層層嘅麵團，內裏呈一個均勻分佈嘅蜂巢氣孔，而佢入面嘅顏色就出奇地偏黃，可能係蛋嘅關係。 入口份外酥脆，邊位更是最脆嘅部分(呢樣係我細細個就鍾意食牛角包嘅原因)。內裏口感輕盈，層次多重，牛油香顯著而帶有輕微嘅酸種香氣，價錢就正常啦，大部分歐式麵包店都係呢個價。 朱古力丹麥酥$25 丹麥酥其實只係牛角包(準確D講係laminated dough)嘅另一種形態，味道上根本係冇差別，分別就係多咗D花紋同加咗「兩粒仔」嘅朱古力碎入去。咁都唔出奇嘅，大部分bakery都係咁，而佢只係收多兩蚊雞啫。可麗露$21 呢度嘅可麗露就算係幾抵架啦，而呢家野又係好講求技巧㗎(我唔多講啦，如果唔係個post就會pk咁長)。外皮全面焦黑，冇「白屁股」，香脆甜蜜，內裏香口軟糯，充滿蛋/雲呢拿/奶嘅香氣，甜就一定係甜D架啦，如果唔係就做唔到層焦皮。 酸種意式麵包Focassia(橄欖+洋蔥味)$17 唔想要橄欖同洋蔥亦都可以叫原味，只差$1。意式麵包特別在佢容易整同有好香嘅橄欖油味。內裏雪白鬆軟，香氣四溢，加上橄欖同洋蔥係絕配。 (P.S.圖片中嘅迷迭香/紫洋蔥/朱古力/朱古力醬/牛油都係自己加嘅，沒有任何廣告/商戶合作成分，純粹係想D相靚D/吸引D而去擺嘅，冇浪費到架。)…Read More

話說又係上個禮拜嗰陣，當全香港都處於可能要全民檢測之際，一般旺角嘅街頭都冷清清。響呢個時候，小店先更加需要幫助。今次就去到呢間出名「隱世」同排隊嘅米線店，估唔到當日午市時間都冇乜人。 肆年八月，原先位於顯徑下口徑村嘅一條巷仔，近排搬咗新舖响唔係差好遠嘅地方，但距離顯徑站就近D。喺疫情之前，此店就被好多人視為訓練香港人忍耐力/腳骨力嘅最佳排隊地方。店名肆年八月，我就揾唔到佢嘅具體意思，究竟有咩嘢隱藏喺四年零八個月度呢? 餐廳老闆就想食客食得好之餘又坐得好，所以有別其他傳統米線店，舊店嘅裝修清幽，設有戶外位，就好似「由樓上住客無聊經營一間小店過日神」嘅feel，而新店就有望窗高枱，冇咁「村屋」，門口有D食米線嘅油畫。 食物選擇比其他米線店就多咗好多特別款式，例如湯飯/撈米線/炸饅頭/泰式春卷etc。米線湯底有8款，餸有14款餸，主打有滷鵝肉/手撕雞/豬頸肉/蕃茄蛋花湯等。 招牌滷鴨片撈米線 $52(+一餸麻香手撕雞$7) 賣相係我近排食撈麵之中最靚嗰個，份量就反而係肉多於米線。你見佢有幾多花生都feel到呢碗米線係唔簡單，性價比就當然高啦，餸都已經cover咗D麵。 撈米線有得揀酸辣/香辣/醬油口味，我就叫咗醬油味。撈米線附有花生肉醬、芫荽同葱花。先講底醬，即係未撈之前放喺碗底嘅底味醬油。佢食落係充滿醬油嘅咸香，但又帶有甜味，係幾清新而唔算太油膩。 肉醬又係精髓之一，肉粒切得碎細，但又有口感，同樣濃縮著所有醬汁嘅風味(好似有D甜麵醬)。花生事前有烘香+炸過，爽脆香口，好鬼脆！加埋芫荽又有D刺激感。 呢度嘅撈鵝片就出哂名，用咗蜜芽糖同啤酒入滷汁。鵝就有三件，唔知點解店員切野又切唔到落底，又唔知係咪我黑仔，有兩舊都係邊位。邊位就靭D lor，中間位皮香肉酥嫩，滷汁入味之餘又咸鮮，帶有淡雅嘅甜蜜，如果有多D香料/藥材味就好。 麻香手撕雞估唔到地肉質係幾嫩嗰wor，冇雞胸嘅柴口，入口清凉多汁，而餐廳就調得偏向麻，辣都唔算少嘅，咁樣就令到成碗米線又多咗個辣嘅層次，如果留D脂肪層就更香口。…Read More

呢間小店我已經想去好耐，由一開始喺旺角開業嘅時候已經盯實咗佢，可惜旺角店上年結業。到咗近排就登陸荔枝角，就黎個“新店”報導啦。其實新店開業無耐就因疫情而停業，係呢個禮拜先再開返。咁都唔出奇嘅，中哂嘅人呢個禮拜就出返哂黎...没事兒！黑布小巷現時仲有葵芳掃街店同北角便當店。餐廳由三個90後主理，疫情之前，佢哋已經去過N次台灣。佢哋成日幫櫬當地嘅「阿姨」舊式早餐店，心諗香港又冇呢類嘅早餐店菜式，於是就帶咗返黎香港，19年開業，同時又撐住港人共渡難關。 其實話佢係早餐店又唔算係，佢又冇開早市，但當佢係台式食堂就更好。荔枝角新店位置較寬敞，但有一半嘅枱都冇用到。格局就好樸實，就係飯堂look，乾淨潔白嘅飯堂look。 落單就用手機落order，有得綁定信用卡而線上付款。食物方面有最出名嘅豬肉蛋吐司，更有新店先有嘅雞扒蛋吐司。仲有滷肉飯，花枝丸之類嘅小食，自家製芋圓糖水同冷泡茶等。(葵廣店都有滷肉飯/芋圓/吐司，北角店就有多款便當但冇吐司而係外賣店。) 慢烤雞腿芝士蛋吐司$53 店員有講話所有食物都即叫即製，上枱時成tray連甜品飲品上，咁樣就已經加咗唔少分。再加上又有提供手套，令你唔洗食到成手都係，又或至少有個tray墊底，就唔洗整到個枱一塌糊塗。性價比就唔錯，見到佢有幾多料都心滿意足，但又冇想像中咁飽。 雞腿佢切開咗一舊舊，見到佢非常白滑。外層有焦香咗嘅顏色，肉質爽彈嬌嫩，明顯有醃料醬油等濃厚嘅調味，呢part有驚喜，又可能有人會嫌佢太咸/蓋過肉味。 雞蛋方面，佢唔係台式早餐店嘅多層次(玉子燒式)蛋，而係半熟流心蛋，師傅咁啱切正有蛋黃嗰個位，成個toast都沾滿蛋液(唔怪得要帶手套🤣)，蛋白就簡單用黑椒調味。 芝士真係有D過份lor，背面全都係熱溶後嘅黃金，更可以用手拎起塊熱溶芝士感受佢嘅香氣。麵包有一定嘅厚度，外層微烘脆，食落唔係空氣包嗰款。食食吓發現有陣蜜糖嘅甜味，原來中間係搽咗層秘製醬汁，但我就食到只係蜜糖。 凍頂烏龍茶$28(跟吐司+$3 only) 杯上寫上飲品經過八小時嘅冷泡而成，不含防腐劑。飲落一開頭冇乜味，但飲多一兩啖就有香濃嘅茶味，微帶回甘。 黑糖紅棗薑三色圓$38 一上枱望到只係一片啡水，但其實d料潛哂底。糖水嘅黑糖味後韻強，帶有紅棗如蜂蜜般嘅甜美同一丁點嘅薑味，仲有多個紅棗肉。三色圓就當然係蕃薯/芋頭同紫薯。形狀呈正方體，有數多舊都痴埋一齊，呢點要改進一吓。質感係我鐘意嘅唔太煙韌而內裏冇粉粉嘅口感，而且三種味道都各有各本身嘅原材料味。芋頭明顯有D沙沙地嘅芋頭泥口感。但缺點就真係少咗D lor，三兩吓就食完，唔適合share。…Read More