eat@quality's Profile

食生日飯？食咩好？方便(for me)梗係又係嚟尖沙咀啦。呢度食LUNCH buffet其實就西式為主啦，咁唔係好使諗。淨係食佢出邊嘅buffet bar，又或者你加埋計main course。其實你加埋個main course都係加多$40一位，咁我哋就唔諗啦，咁揀埋個main course啦。如果你真係唔係太肚餓嘅，淨係出去食佢個buffet bar 都一定夠滿足。佢啲食材其實非常之新鮮! 我好鍾意佢個salad bar，因為嗰啲菜同埋佢啲salad真係好味又新鮮。另外佢哋個湯都真材實料，話就話buffet，不過你食à la carte 都應該係一樣嘅質素。佢仲有個Grill, 都唔係Hea 㗎。你出去某一啲餐廳淨係食grill 嘅地方,講真嗰句其實唔係好輸蝕。唔好唔記得嗰個甜品Bar枱，佢賣緊嗰啲Cake要成4-5十蚊@, 響個dessert bar嗰度都有埋，咁仲有一啲special whole cake。因為我細佬生日🥳，咁佢就直頭俾咗一個Cake Platter俾佢。幾好吖 😙 有人唱埋生日歌俾佢聽㗎。呢啲嘅Service唔錯。Love ❤️ this restaurant! …Read More

見完客，過咗嚟呢度食lunch。搵吓搵吓搵吓不如嚟食日本菜啦。靚女侍應推介叫我哋食呢個和牛餐，佢話性價比高，啲嘢多到你食唔晒。仲有個quality同夜晚嘅牛係一樣quality，不過可能細舊啲，不過就平好多。咁梗係試吓啦。由頭盤食到海鮮，再食到和牛，甜品食到生果。樣樣都俾你六、七月唔去日本，你都食到日本嘅味道。食好味野，我通常都揀晏晝食。因為性價比應該都係高嘅。尤其是 - 唔知係唔係，個侍應話個牛同夜晚個和牛係同一個和牛扒，咁點解唔試呢？雖然佢呢個餐係比其他lunch set貴一啲。睇完嗰啲影嘅相，我都回味嘅。其實佢仲有烏冬，不過因為我哋食唔晒嘅關係，叫佢冇上到啦。已經托住個大肚dum走人Lu。…Read More

今日老公阿仔去完旅行返返嚟香港，話好多日未食過中菜。咁今晚約咗朋友去神燈食飯，咁佢哋晏晝話要食點心，但係又唔想去酒樓，咁我就去OP search下, 就嚟咗呢間點心舖試啦！估唔到嗌嗌吓，嗌到就差唔多成10樣嘢。其實樣樣點心都好精緻同埋好好味。啲點心係紮實，唔係鬆散嘅。尤其是腸粉，如果你唔介意佢有埋粟米包埋一齊，個叉燒腸連埋粟米都幾好味。我自己唔係好鍾意食薄餐，不過今日嚟到依度見到佢張相煎到脆卜卜嘅，咁就試吓嗌。嚟到嘅時候真係冇反差，上碟嘅時候真係卜卜脆！食落嘅時候真係中式薄餅咁樣，好好味。咁佢都有啲盅頭飯，不過啲中頭飯 size 就比較細，一人一個就差唔多。咁我哋嗌咗兩個。窩蛋牛肉飯同埋梅菜肉片飯…… 都好入味 & 好惹味！最後要講返就係佢嗰個花茶，真係好好飲。…Read More

吃早餐，整體ok ar!我叫咗肉絲米粉，加多士加煎熟蛋。肉絲米粉OK 多士有烘過，顏色nice, 可惜唔夠脆。煎熟蛋真係煎熟個喎。奶茶少甜，但係飲嘅時候又好似唔算少甜⋯⋯Hubby 叫咗薑汁牛肉通粉.佢話個湯底鹹得滯 - 不過佢已經食得好鹹嗰啲人，但係都覺得鹹 - 即係真係好鹹？ 咁我就唔係好敢試啦，鹹得滯就唔啱我。裝修都係OK嘅，光猛嘅。阿姐就正常服務啦。乾淨就正常啦，又係，因為始終茶餐廳好難太高要求。可以再嚟試吓佢嘅lunch啦，因為好似都幾好味。…Read More

點了$988 鐵板燒和牛 set for 2.有前菜、刺生、蒜蓉牛油帶子燒、鵝肝、和牛、大阪燒、和牛炒飯和芝士蛋糕🍰食物整體質素可以。不過以$500@ lunch 嚟講, 我覺得唔係好值得。前菜好味刺生三文魚有骨蒜蓉帶子鮮甜新鮮鵝肝無筋，不過燒得唔夠脆面和牛正常大阪燒冇其他食評燒得咁脆面。裏面都唔係太Juicy和牛炒飯唔知點解唔係響我哋面前炒喎⋯⋯ 係響廚房攞出嚟Pat好晒上碗芝士蛋糕都滑同埋好味嘅不過冇咖啡茶…Read More

成日都鍾意發掘新嘢食今日去油麻地的茶餐廳之前睇OpenRice，見到早餐都成六、七十蚊一個早餐嘅茶餐廳，真係覺得好鬼貴。不過又想試吓。我哋點奶茶，冇奶茶。點檸檬茶，又冇檸檬茶。我個心諗咁搞笑嘅，就問佢你哋淨係得咖啡㗎咋咩？跟住佢就笑笑口，先至反轉個餐牌話俾我聽可以點特色咖啡。🤣 任揀$40以下嘅價錢咖啡，多個就補差價。咁我個心諗唔怪得你收成$70一個早餐咁鬼貴啦。原來呢間係懷舊嘅Fusion Cafe。唔講咁多，你哋自己過嚟食，因為有誠意嘅年輕人懷舊咖啡廳。一定再嚟多次食埋佢個lunch & Tea。…Read More

今日好想食粥，順路經過嚟咗呢間生記食，試吓好唔好味，因為添好運執咗。入到嚟嗌咗兩碗碎牛，加炒麵，再加炸兩。等緊嘅時候已經不停見到好多街坊或者附近返工嘅人嚟買外賣。當中就見到啲老夥計不停同啲老街坊打招呼👋🏻講笑話，真係覺得好有人情味。啲嘢嚟到嘅時候個粥底真係好綿同埋有米味。(今日新聞仲講緊日本搶購大米，真係要好好珍惜米。）個炸兩條油炸鬼仲係少少暖同脆卜卜。炒麵就食返細路仔食嘅味道。我覺得下次都會再嚟，臨走嘅時候嗰啲夥計自己又喺度鬧下交，真係覺得人真係會老，呢班夥計日日傾吓偈鬧吓交，咁樣又可能過咗佢哋嘅大半生。走嘅時候就買咗個鹹肉糭外賣。因為聽日龍舟節🐉。試吓好唔好味。✨人情味係咩味㗎，咪就係鬧下交同埋講吓笑話囉。💫…Read More

之前喺舊店食，環境當然冇新店咁好，啲枱枱凳凳就夠一啲，同埋環境迫一啲個光線亦都冇咁光。但係講到食物，都已經覺得好好味。今次同老闆們一齊去新店，環境裝修當然靚好多。因為全部都仲係好新。坐喺附近都有一啲外國人嚟食。乳豬夠脆！蒸魚腸：老闆同事都話好好味。叉燒口感好好，好香，食落都唔多油！其他菜式都水準以上。地點咁好，趁而家新開張容易啲搵位食多幾次，如果唔係遲啲又可能好似舊舖或者瑪寶鮮咁樣要成一個月前訂位。下次再同朋友食飯，神燈一定係其中首選。…Read More

一日之味在早餐😂唔講咁多，直接嚟試吓。個蕃茄湯+爆脆卜卜午餐肉食到我巧滿足！沙嗲牛肉麵就okok la🤭花生醬鹹牛肉「生財」蛋治烘底三文治🥪： 超級mix & match 有口感，仲多層味覺享受。試過你就知😏其實我本來冇諗住影相寫食評，但係到咗黃昏仲記得今朝早食嘅好味早餐，真係忍唔住寫返個食評引吓大家。不過就影咗一張相，佢係一個日本畫家Mango Naoko 為呢間餐廳畫嘅作品。…Read More

好彩呀！今日入大澳，嶼山漁水有開呀！上咗11:30am 船，入到大澳就啱啱可以食lunch 喇！多謝大家的uploads & share, 可以搵到呢間隱世好味餐廳。我哋嗌咗椒鹽魷魚🦑，啲魷魚真係好新鮮、又彈啦，經過丹爺巧手製作，真係啱啱好脆皮而裏面仲係好彈牙！另外嗌咗咕嚕肉🥘，嗰個汁同出邊酒樓嗌嘅咕嚕肉好唔同。個豬肉仲要好林，唔知係邊個部份，總言呢一味餸都係一個推介。仲嗌咗個魚肚蘿蔔，呢個餸就比較清淡一啲，不過嗰個魚肚真係發得好林好入味！如果早到就上最高嗰層，咁嗰度有個望到條河嘅靚位，得兩張枱㗎咋！望住靚景食個lunch或者晚飯應該好開心。…Read More

食完飯之後…… 最驚訝四眼經理好冇禮貌同好大聲同我朋友講：唔鍾意下次唔好嚟囉！因為朋友生日，我哋專登搵一間尖沙咀有好好好評嘅日本餐廳食飯。都唔好意思就係即日book，呢間餐廳仲有一間房俾我哋。仲諗住我哋好好彩。我哋book嘅時候，個小姐同我哋講可以食到晚上12點。咁因為我哋放工先至去，所以都成7pm 先到達，諗住有5個鐘頭都好啊!貴唔貴，好唔好食…… 我都唔想評住。因為最令人地激氣就係10pm 已經話last order，跟住我哋話唔係坐到12點咩? 佢哋就不停搵人入嚟收嘢同請我哋走，因為佢哋不停話收10pm，咁樣其實我哋九個人都食咗成$9,000, 其實已經超過佢哋個Minimum charge 。我真心想講，今時今日如果你真係收10點, 你應該book枱嘅時候講清楚，唔好因為即日仲有一間房，然之後又想擸埋個 min. charge去講大話。因為我哋expect玩到12點. 走嘅時候仲四眼肥經理仲好冇禮貌同我哋朋友鬧佢，我真係真心覺得唔醒唔得。 唔知大家去食過有冇試過咁嘅待遇，如果你哋有朋友識得呢間餐廳嘅老闆，希望都可以幫手反映一下。真係感激萬分。…Read More

去到紅磡唔知食乜，見到呢間上海店冇乜人就入去食，叫咗兩個餃子麵同埋一個粢飯。個湯冇味精。啲餃子直頭係住家風味。講緊係自己都包唔到嘅住家風味，我哋食到舔舔脷。我哋一路食一路好陶醉之際，見到前面嗰個阿伯不停不停不停咁樣包粢飯，先至醒覺原來出邊好長龍，仲要好多人喺度等外賣。心裏面直頭覺得好好彩，誤打誤撞入咗嚟一間咁好味嘅上海譜嗰度食麵，仲要唔係自己覺得好味咁簡單，見到咁長條龍就知道唔少嘢！…Read More

其實經過呢間小店好多次，因為佢個門面唔係話好靚嘅裝修，次次行過都會比其他門面靚啲嘅吸引咗. 今日晏晝的起心肝務必要試吓佢啲點心同埋主餐。我哋嗌左兩個套餐，一個就係獅子頭菜飯，另外一個就係韭菜餃上海幼麵。點心呢就係佢嘅春卷同埋小籠包。獅子頭有兩粒中size嘅獅子頭，質感好好，再加埋佢個獻汁真係撈多一碗白飯都仲食得！菜肉餃個麵就都好味，不過就冇乜好大驚喜。春卷同埋個小籠包，食起上嚟唔會覺得好濃味，有啲清新嘅感覺，我覺得真係好住家feel。佢每一個餸上到嚟我就已經忍唔住食，所以影到啲相好核突。…Read More

新開張，入去光顧下。我自己成日都好忍得住口，唔會輕易食牛角包，因為知道超級邪惡。但係見佢個樣咁靚，又好想飲杯咖啡，就入去食佢個all day breakfast!份量不太多，但係個croissant 真係靈魂所在。你可以隨便點佢任何邊一款嘅croissant 都得, 我食輕量型嘅，就可以揀多兩款餸. 然後再order一杯咖啡。坐返埋位慢慢嘆，一食佢個 croissant, 真係成個心都溶化咗！我諗我要遠離呢一間餐廳，如果唔係唔知要點樣減肥先得😮‍💨…Read More

入西貢staycation, 梗係search下有咩好味先啦。其中揀咗呢一間，我哋真係去搵呢一間嚟食。間餐廳一啲都唔起眼，經過左都可能會見唔到…… 好彩老公眼利，捉住我話係咪呢一間？其實原來裏面好細嘅咋，好彩我哋平日嚟，可以坐低慢慢食。我哋三個人嗌咗二人餐。個海南雞真係好滑！好好味！然後我哋嗌咗個煎肉餅，我個仔食到舔舔脷！個南瓜湯都超級濃郁好味道！點算呀！咁好味！下次如果唔係平日嚟，咁咪好難食到？我哋一路食嘅時候，其實不停不停不停都有好多人嗌外賣。所以我估平日啲街坊都係嗌外賣嚟食。如果連街坊都不停不停不停嗌外賣，咁你就知有幾好味。…Read More