SindythebestHK's Profile

復活節假期最後一日，同朋友去咗奧海城 theSky睇忍忍忍者亂太郎劇場版毒菇城乜乜乜，支持吓嘉禾大銀幕戲院嘛。套戲都幾得意，忍蛋新丁繼續為食攪到我睇完套戲都即刻想搵野食，咁啱戲院隔離有間「月詠」日本拉麵店，裝潢以木為主配黑灰色系格調十足，決定入去試試。睇睇餐牌，選擇唔多，於是嗌咗《檸檬牛油雞白湯拉麵》，《 原味雞白湯拉麵》和《月詠炸雞》，8分鐘左右，香噴噴嘅拉麵送到面前。首先個奶白色湯底打到起哂泡上面仲放咗塊「牛油」已經夠特別，飲落去味道非常濃郁唔油膩帶少少甜味少少芝麻味完全唔似一般雞湯令我幾Surprise；D拉麵係全麥麵小彈牙幾獨特；3塊雞胸肉處理得幾好唔太嚡；溏心蛋好流心；D蔥好香原來係來自京都的九條蔥，食材真係唔惹少。再講份炸雞，炸得外脆內嫩爆肉汁，大大舊味道唔錯$68算係咁。後記：由於個湯底實在幾特別，所以問咗待應姐姐有關資料，原來佢個湯底係用日本雞肉高溫熬到奶白色的，冇加其他配料或人工調味料，唔怪得咁濃味咁飽肚啦。…Read More

又來到火炭喱個工業區，真係唔知有乜好食，行行行行到喱間洪記麵家，一裡面環境又幾乾淨冇異味，決定入去試試。坐抵睇睇餐牌，決定嗌碗牛腩河試試，當然要多蔥啦，加杯熱奶茶添。唔駛5分鐘，大大嘅牛腩河放喺面前，首先，好香好多蔥；然後，好多腩。牛腩肥瘦均衡而且夠腍，湯底唔太濃味幾清甜。熱奶茶夠滑夠濃絕對唔係某連鎖餐廳嘅奶水，埋單 $49 算係幾抵。後記：餐廳阿姐幾細心，見我碗河粉清湯比較少，主動埋黎問要唔要加返少少湯比我，真心抵讚。…Read More

次次去奧海城都經過喱間「燒肉LIKE」，但次次都勁多人等位，見佢今日比較少人所以攞咗張飛等吓，50分鐘左右就有得入。店舖抽風系統幾好冇異味，可惜坐位比較窄，張枱比較…油。一坐低就點咗《200g牛小排&牛板腱套餐》包括：牛肉，白飯，和風湯，迷你沙律。唔駛10分鐘d野就到齊都算幾有效率。沙律好食個湯好飲白飯唔錯，200g嘅牛肉薄砌一片片薄到透光，醬汁有10款任君選擇，個人比較鍾意「辣味噌醬」，「蒜香醬油」和「胡麻醬」。總結：算幾好味，但唔飽，去咗茶餐廳宵夜。後記：這家餐廳的侍應哥哥好有禮貌好有耐性非常抵讚，但，QRCode 落單 及 全電子支付不收現金，極之討厭。…Read More

話說最近麥當勞出咗個抹茶系列好似幾吸引，今日心血來決定試試喱個價值 $11.5 嘅《抹茶麻糬批》。未試之前當然要講吓個包裝啦，50周年+將軍漢堡logo一睇就知係限定版，如果唔係裝住個批，我一定會儲起佢。講返個批，外皮酥脆抹茶味非常濃郁而且唔太甜確實令我有點驚喜，至於嗰坺白色嘅麻糬就唔係太煙韌彈牙嗰種，不過兩種餡料配搭得唔錯，值得一試。後記：喱間火炭麥記都算幾乾淨，有特定嘅員工掃地執枱，收銀嗰個阿姐好有禮貌。…Read More

情人節未有情人，於是同朋友去咗喱間隱世又Chill爆嘅「廿一由八」享受吓單身嘅浪漫。初時以為好偏僻，點知原來喺香港大學對面過條馬路行3分鐘左右就到。Cafe 裝潢以木為主，大型落地玻璃加埋幾棵中型植物，感覺悠閒寫意非常舒服。坐底睇睇餐牌好快就決定嗌個 DUET SET 二人套餐，揀咗「巴馬火腿忌廉芝士果仁卷」，「進擊的美式孖醬炸雞漢堡」，「美國肉眼扒配時蔬及壓薯」，仲追加咗個甜品「楓糖碧根脆脆」。果仁卷口感Creamy鹹鹹地有微少Rum酒味非常特別冇得輸。炸雞漢堡兩塊炸雞好厚超大塊肉汁非常豐富。肉眼扒嘅配菜種類多壓薯煎得幾香。個脆脆其實係 French Toast，有個雲尼拿雪糕球喺上面賣相幾好，厚多士外微脆內鬆軟仲有非常濃厚嘅...玉桂味，真係超邪惡。為咗中和吓，最後嗌咗杯熱Latte，上面個拉花應該係...梵高個徒弟拉嘅，都...幾有創意吖。非常欣賞「廿一由八」嘅店內環境和傢俬，特別係張梳化坐得我好舒服，食物質素唔差，日後一定會再拜訪。…Read More

天寒地涷身處蔡瀾美食坊，諗緊食乜好，見到一樓盡頭有間「湯加」，張海報大大隻字寫字住煲仔飯，唔理三七廿一就入咗去了。坐低當然係點咗海報裡面嘅《叉燒臘味糯米煲仔飯》和《鹽焗雞臘味糯米煲仔飯》啦。等咗20分鐘，兩個煲仔飯終於喺眼前，仲有個細火爐㷫住添，又幾有綽頭噃。滿心歡喜嘅我即刻夾起隻鹽焗雞脾放入口，點知.....唔熱嘅？再𢳂羹糯米飯試試，稍為熱DD，好，一於等個細火爐㷫佢一陣先，唔夠60秒熄埋，無言。萬念俱灰之際，朋友夾咗舊叉燒比我，係熱嘅，仲灰。總括而言，湯加嘅煲仔飯買相相當唔錯，整體味道唔差，價錢亦算合理，但 you know，煲仔飯唔熱是死罪來的，所以...4星變2星。…Read More

YOLO！正所謂人生在世咩都要試吓，何況食？平時絕少試油炸菜色嘅我，今日坐言起行同朋友去咗有「日本第一天丼」之稱嘅「金子半之助」試吓佢地嘅天婦羅丼飯，聽講佢地用嘅丼飯醬汁係三百年來從不外傳嘅古老秘方。揭了揭餐牌就決定嗌價值 $118 嘅《二丼•麵》套餐 (包括：迷你丼 + 稻庭烏冬/北海道蕎麥麵)，怕唔夠飽，所以追加了《鮭魚親子天押壽司》。唔洗10分鐘，侍應好優雅地將一大盤野放喺我地面前，我就睇住嗰碗迷你丼懷疑咗 20 秒人生：究竟甚麼是「迷你」呢？不過，話說回來，又幾好食都...食得哂。醬汁當然超正，但值得一提是那舊乜乜菇菌天婦羅，口感幾特別，爽脆多汁唔太油膩，值得一試。至於鮭魚押壽司，簡直醋味十足，都幾...特別。總括而言，金子半之助嘅天丼的確可以用「美味」來形容，咁嘅價錢有咁嘅份量算幾抵食。餐廳環境乾淨舒適，唯坐位不算太寬敞但可理解。…Read More

新年流流處處人山人海，逛完成個新城市廣場腳都軟埋，突然好想食肉骨茶小籠包之類嘅野，於是去咗鼎泰豐。噢！原來佢係米芝蓮一星餐廳，真係失敬失敬。等咗一陣就有位，都算幾好彩。餐廳環境乾淨，個餐牌簡單得黎幾靚，睇咗兩睇就決定嗌《小籠包》，《紹興酒醉雞》，《台式酸辣湯》，《菜肉紅油抄手》和《迷你芝麻包》。小籠包同細細個嗰時食嘅都係一樣咁好味；醉雞唔係幾夠醉；酸辣湯用料足；芝麻包非常芝麻唔太甜；意料之外係佢嘅紅油抄手，皮薄餡靚唔太辣，非常抵讚，自從同類型餐廳嘅紅油抄手改版後，真係好耐冇食過口感咁正嘅抄手喇。最後，要讚一讚喱間鼎泰豐嘅侍應，除咗細心不時為我們加茶之外，佢地真心顧客至上，一句「嗌外賣去收銀處分開嗌唔駛加一噃」非常大體令人敬佩，服務態度絕對襯得起「米芝蓮餐廳」喱個名。…Read More

今日約咗好友去又一城...踩冰，雖然仆咗好多次，未夠2個鐘已經傷痕纍纍，不過又真係幾好玩嘅。又餓又渴的我(們)醒起對住冰場嗰間EXP有鮮榨果汁飲，於是就…躝咗入去了。重新裝修嘅EXP係唔同D嘅，我講緊D價錢，不過，都坐低咗啦。揭幾揭餐牌就決定嗌《橘香燒烤醬炸雞翼》，《封門牛柳紅酒燒汁蛋包香菇飯》，《24個月西班牙火腿燈籠椒薄餅》和《蜜糖紫薯迷你薄餅》，飲品當然係勁多選擇嘅鮮榨果汁啦。特別想講講佢碟雞翼，食落口帶點酸帶點甜帶點辣，非常濃味送飯一流可惜佢冇白飯。另外，紅酒牛柳飯牛柳軟腍腍又多汁，煎蛋好滑之餘D飯好多菇粒所以非常香，可說是色香味俱全。總括而言，EXP係OK好食嘅，份量亦足，只要維持水準，個人認為目前價格...尚算合理。…Read More

話說海港城嗰間翡翠拉麵小籠包執咗之後，我就懷緬咗佢嘅小籠包大半年，今日喺黃埔比我見到間翡翠江南，即刻彈咗入去。諗都唔諗就嗌咗我嘅至愛《翡翠小籠包》，《女兒紅醉雞》，《甜酸小排骨》和《酸辣海鮮湯麵》。上菜速度唔差，20分鐘左右Order已到齊，而且賣相幾靚。先講講小籠包，依舊即叫即蒸皮薄餡靚D肉汁又多又熱焫親我條脷；甜酸排骨擺落去酸辣湯度浸浸之後再食會別有風味。然而，令我最驚喜嘅係佢嘅醉雞，因為用紹興女兒紅，所以雞肉帶甜但又有小小鹹，而且非常入味，值得一試。其實仲想嗌多D，例如：《豆沙鍋餅》和《銀絲卷》…但太飽食唔到，唯有等下次。最後，我睇到佢嘅下午茶餐牌，點心+拉麵$48/$68 真係超低，可惜只限星期一至五...囉！…Read More

星期日嘅旺角，食飯時間度度都人頭湧湧，間間都要等等等...，行行行行到朗豪坊後面，有間門口細細，叫 「一品麵家」嘅小店，𥊙一𥊙見佢個地下幾乾淨，一於入去幫襯！其實我都算幾鐘意食牛腩麵魚蛋河，但佢個自家製《手打墨魚丸》好似幾吸引，加上我又好耐冇食過墨魚丸，決定嗌喱樣，多蔥。只係6分鐘，墨魚丸河已經送到，冇失望，首先多蔥真係多蔥！而且湯底清甜，墨魚丸新鮮冇雪味，仲撈埋少少蟹籽添，咬落幾得意，加埋杯《凍檸茶少甜》都係$50，旺角鬧市算係抵。最後，我真心幾欣賞一品麵家嘅 「乾淨」，保持店舖整潔好似好簡單，可惜，隨口噏得出嘅幾家連鎖式麵店都未能做到。…Read More

好友知道我最近沉迷「燒肉」，專程帶咗我嚟喱間位於天后嘅YAKINIKUYA燒肉屋。店舖唔大坐位唔算寬敞，但木枱木凳紅白藍燈籠高高掛，再加埋個「燒肉研究所」燈牌，十足十置身於「二十世紀少年」電影嘅舊日本街道，好有mood。未坐定就決定嗌佢個$198套餐，雖然冇牛，但係有黑豚有五花腩，又有雞肉雞軟骨仲有我最鐘意嘅燒雞翼，有前菜有特飲有甜品，真係誇張D講句睇到都飽…燒燒燒，食食食，食到一半左右，侍應埋嚟問：「要唔要幫你地加D泡菜呀？」吓？乜原來5款前菜係 Free Refill？真係OMG無諗過。最後，侍應送上朱古力雪糕，上面有塊好Cute嘅櫻花脆脆，75分鐘完了，一個完滿嘅句號。順帶一提，燒肉要夾埋生菜一齊食！鮮甜生菜包著㷫烚烚嘅燒肉，一啖咬落去又涷又熱又鹹又甜又多汁，完全震動你味蕾。…Read More

講到日本居酒屋，冇可能唔講「穴」，食物質素保持水準是必然的，但一間餐廳在同一位置經營多年，環境仍能維持當年開張時嘅乾淨優雅，一枱一凳歷久常新，真係非常難得，要一讚奧海城分店嘅管理人和員工。純粹個人喜好，嚟親「穴」九成都係點喱幾道菜，包括《燒河豚魚乾》，《燒雞翼 》，《日本海膽》和《豚肉烏冬》。今次想特別講吓佢嘅日本海膽，主角海膽固然鮮甜，配角紫菜亦非常乾脆，新鮮海膽夾喺乾脆紫菜中間再一大啖擺入口咀嚼時所產生嘅化學作用……我唔識，只能用極度美味來形容，可惜，市面上有好多日本餐廳都經常忽略了這個「配角」。最後想講嘅係...「穴」嘅 LunchSet 真心抵食，而 Dinner 就...比較多選擇，囉。…Read More

得閒無事約舊朋友下午茶嚟到喱間 Terrace in Seaside。餐廳裝潢以淺木色為主，門前擺咗棵柑橘樹，未入門口已經見到侍應戴住頂Cute到爆嘅柑橘帽，所以一坐低就點咗杯《濟州柑橘乳酪》襯返吓。講到明「Chill Time」就梗係要點「Chill Dishes」啦，於是點了《布拉塔芝士沙律》和《粒粒魚籽與三文魚蛋黃醬飯卷》。布拉塔沙律水果新鮮開胃，BurrataCheese 大大嚿圓轆轆擺正中間賣相唔錯；飯卷嘅三文魚籽爆大粒，個醬好足料有啲似吞拿魚沙律，簡直驚喜又飽肚。跟住仲點了個$88嘅兒童餐，唔太記得個餐有乜，只記得跟餐嘅迷你版《清甜柑橘窩夫》既可愛又好食。講到最尾要講返杯乳酪，味道酸甜甜幾清新，拳頭咁大嘅柑橘就包咗返屋企做飯後果，估唔到又真係幾清甜噃！…Read More

同老朋友聚舊跟佢嚟到喱間深宵食堂，一出𨋢門就見到四周圍都是櫻花和懷舊動漫海報，背景音樂仲要播緊太田貴子嘅小忌廉主題歌，雖然地方唔大坐位亦比較窄，但夠哂mood亦非常乾淨。事但求其點咗D比較安全嘅菜色《蟹籽沙律》，《鹽燒雞軟骨》，《豚肉露荀卷》，《蒜燒大啡菇》，《芝士年糕》和《醋鯖魚茶漬飯》。蟹籽沙律清爽開胃；露荀卷露荀非常鮮甜；芝士年糕芝士味十足但唔會太腬；至於茶漬飯，鯖魚帶酸但茶是帶甜的，酸酸甜甜渾埋一齊感覺有點…「特別」。另外，《巨峰提子梳打》都幾好飲。美中不足的是要掃QRCode落單，但也能諒解小店人手不足才有此舉，侍應笑容滿面且非常有禮貌已彌補一切。…Read More