lamchel's Profile

今日約咗朋友喺旺角見面，求其見到呢間好似幾抵食，就入咗去食。佢有得揀午市套餐，或者散叫再升級12蚊變套餐。食物種類都幾多元化，有意粉焗飯、咖喱、蛋包飯。本身感覺以為會好似茶餐廳咁，但其實都幾有Cafe嘅感覺。環境都幾好坐，幾有情調。我就冇叫到午市套餐，叫咗個蛋包飯配馬蘇里拉雞扒，另外加咗個蘑菇湯同飲品。蘑菇湯都幾有驚喜，有好香濃嘅蘑菇味，識落亦都有粒粒蘑菇。至於個蛋包飯，蛋皮好薄，入邊啲飯都有驚喜，通常蛋包飯入邊嘅飯都比較濕，呢個反而仍然keep住到乾爽，飯粒粒粒分明。個雞扒其實喺面頭有好大塊芝士，再燒燶佢。一切開就有好勁嘅拉絲效果。雞扒好Juicy，夾埋啲芝士一齊食好好味。朋友就叫咗個卡邦尼意粉，上面有隻生蛋黃，撈埋落啲意粉一齊，真係有好香濃嘅奶味同蛋味，而且意粉煮得啱啱好，係有咬口嘅意粉。60幾蚊真係有驚喜。朋友就另外叫咗個中湯，嗰日係青紅蘿蔔煲豬骨，個湯都有啲湯料一齊飲，佢話都冇乜味精味。另外我哋叫咗一個小食，椒蜜單骨雞翼。其實係黑椒同蜜糖雞翼，食落都幾有驚喜，甜甜地得來有少少辣味。唔錯！飲品朋友手叫咗一杯凍朱古力，我就貪新鮮叫咗一個薑菊蜜。飲落就真係有少少薑味嘅菊花蜜，感覺都幾養生哈哈！重點其實食咗咁多嘢，買單都唔使$200。而且食完仲可以慢慢坐，店員都冇吹我哋執嘢走，下次再食過先！…Read More

好耐冇黎城門河呢邊食飯啦！今次約左朋友再食呢間日本野，中意佢又平又好味。餐牌一如以往既多款，款色多到真係好難揀啊！首先食左個左口魚邊牛油果沙律。個沙律底好豐富，有牛油果生菜蕃茄仔等等。加埋啲和風汁，酸酸甜甜好開胃，完全冇油膩感。加埋上面既左口魚，甜甜地，作為前菜一流！另外仲叫左一個5點刺身盛，有三文魚甜蝦帶子油甘魚等等，全部都係啲好大路，大部分人中意食既刺身。質素唔錯，好鮮甜，抵食！主食方面叫左個白咖哩烏冬配炸雞。一上碟就見到個烏冬上面全部都係忌廉，好靚。至於咖哩就係好典型日式咖哩，食唔到辣既人都可以食。佢個份量都幾大，兩個人食都完全足夠。炸雞都唔錯，外皮炸得好鬆脆，內裡好juicy. 三件有啲唔夠喉添！另外想過下壽司癮，叫左火灸鵝肝三點。係鵝肝壽司，分別配唔同魚生（帶子三文魚鰻魚）。效果出奇地好！鵝肝好香，配魚生都好夾，值得一試！小食方面，叫左芝士厚燒玉子。個玉子真係好厚啊，而且好香蛋味，加左芝士令成件事更有層次，但唔會搶左啲蛋味。最後叫左個燒雞翼，呢個我同友人都大讚，外皮燒到金黃，帶少少微焦，而入面就好juicy, 而且肉質好嫩滑，令人想一試再試！今餐食到好飽，叫左咁多野都係5百幾蚊，真係十分抵食！…Read More

由於疫情關係，原來我已經好耐無同朋友夜晚出街食飯。最近終於約到飯腳可以放工之後係大埔食下飯吹下水，今次就揀左依間好近太和站既果子。我地約左夜晚7點，餐廳唔係特別多人唔洗等位，入面裝修比較簡單，都係走平民路線。一打開個餐牌就好有驚喜，平均一個套餐都係$70左右，已經包主食小菜同飲品，如果一個人食飯都係一個唔錯嘅選擇。之前聽人講佢地既新加坡火山包好出名，見到餐牌可以揀配軟殼蟹、牛腩同大蝦。我地嗌左軟殼蟹，上菜個陣先發現佢仲有其他配料，有青口、蝦同蜆，成個海鮮拼盤咁好抵食。個包淋上特製既辣醬汁，非常惹味，個包索晒啲海鮮嘅鮮味。食馬來西亞菜就緊係要食喇沙摻摻啦。摻摻其實本身有「兩溝」既意思，碗麵通常係米粉溝油麵，食起上黎會幾有口感。我地今次揀左個一人套餐，主食係海南雞喇沙摻摻，小食配左南乳雞翼，另外仲加配左個細肉骨茶。首先碟海南雞份量好足，如果係一個人自己食一定食唔晒。D雞肉好滑食落唔會太乾，而且仲好肥美添，我另外都幾鍾意佢個湯底，酸酸甜甜好啱香港人口味。差唔多飲晒成碗，哈哈！南乳雞翼好香口，但係外脆內嫩，而且好Juicy，兩隻完全唔夠！肉骨茶都好香濃，飲得出係下過吓功夫。下次可以叫一大煲飲。坐左一陣友人話好似未仲夠飽，我地再加多左一份小食拼盤同馬拉盞炒通菜。小食拼盤本身以為好細碟，點知有好多件豬頸肉，每一件都好大塊。另外仲有豬牛雞串燒各兩串，配埋沙嗲汁真係一流。而且無論係豬頸肉定係串燒，個肉質都好juicy！成個晚餐真係好豐富，希望可以係疫情下再約朋友夜晚食下飯聚下，係忙碌既生活中忙裡偷閒。…Read More

今次去到元朗食西餐，原來呢個地方附近都有好多好嘢食！而且距離yoho只係幾分鐘嘅路程!今次我哋就搵咗間小店去試吓啦！呢間小店環境細細地感覺好溫馨，餐牌相片有好多選擇，平均百零蚊就有一個主菜加湯、蒜蓉包、飲品。都幾多嘢揀，食扒、意粉、意大利飯等等都有。湯我哋就各自揀咗一個蘑菇湯同一個南瓜湯。蘑菇湯好香蘑菇味，唔會太鹹亦都唔會太假，口感都食到有少少蘑菇粒，值得一讚。而我就比較鍾意南瓜湯，因為個口感好creamy，而且個南瓜都好甜，如果再大份啲就好啦。至於蒜蓉包都好有誠意，上邊有好厚嘅蒜蓉。而且食落好鬆軟，拍得住某大薄餅店嘅蒜蓉包！主菜我哋叫咗個豬仔骨配意粉，一上菜就發現佢比我想像中大份好多，兩個人食就真係太多啦，佢都燒得啱啱好，唔會好硬。至於個意粉都幾有驚喜，通常呢啲跟餐意粉都係白烚好乾，但佢係有用橄欖油炒過。睇得出落過心機！另一個係雜扒配薯條。雜扒有雞扒羊架牛肩胛煎蛋紐倫堡香腸。超級豐富。啲薯條上到嚟仲係熱㗎！至於扒就好多唔同嘅選擇，啱晒啲食肉獸！另外仲叫咗個Buffalo wings! 50幾蚊六隻大大隻！而且啱啱炸好，味道好惹味！值得一試！飲品方面我哋就冇特別叫佢既特飲啦！我哋叫咗一杯凍檸茶同一杯凍朱古力。凍檸茶個茶底都唔錯，有茶味！至於杯朱古力都好香濃！總括嚟講成間餐廳，係好抵食同埋可以食到一個好完整嘅dinner! 兩個餐加小食都係三百幾蚊！好多細節位睇得出佢哋好擺心機落去做！係一間可以再試嘅餐廳。…Read More

最近好中意食泰國野啊，今次黎到大埔一間大埔都算新開既泰菜。一入到去，環境都好闊落，坐得好舒服，而且仔氣氛都好好，好岩夜晚同朋友一齊吹水食飯。一打開個餐牌都好多選擇，除咗傳統嘅泰國菜，都有啲好有香港特色嘅fusion菜，另外亦都有好多海鮮可以選擇。本身諗住食炒蟶子，不過可惜今晚咁啱冇得食，唯有下次再試下啦。一開始叫左一個冬陰功湯，個湯夠酸夠辣，好啱好似我咁重口味嘅朋友。另外亦都非常足料，入邊有好多蝦同菇，而且上嘅時候仲跟住個火一齊上，保證熱辣辣。第二個係咖喱牛腩配薄餅。估唔到啲薄餅都好多塊，而且亦都好酥軟，配埋啲咖喱汁一流。至於個咖喱亦都好好味，牛腩好軟熟，另外薯仔份量亦都啱啱好，亦都好入味。第三個係椰子焗海鮮飯，估唔到佢有跟埋杯椰子水，椰子水好清甜。個飯入邊係炒飯底，而且亦都好多海鮮，有好多蝦青口帶子。個椰子味都好香好甜，係一個好有特色嘅飯。另外仲有個馬拉盞炒通菜，碟通菜超大碟，超級抵食！另外亦都嗌咗串燒菠蘿，呢串菠蘿比我想像中大好多，個菠蘿好甜好多汁，而且面頭再加咗少少焦糖，真係好好味。飲品我哋叫咗朱古力巨人，上邊有啲cream，同埋百力支同Kitkat。撈埋啲cream之後都唔係好甜，啱晒我。間餐廳都幾好味，可惜今次冇叫到海鮮，下次叫返先！…Read More

好耐冇食泰國嘢啦，今次去旺角食！今次呢間泰國餐廳，喺通菜街附近，非常就腳！本身以為佢好細間，點知原來佢有兩層，而且非常多人食添！我去個晚兩層都爆曬，非常熱鬧。餐牌有好多選擇，而且價錢都好平添，就算係海鮮都一啲都唔貴。可以話係平民之選啦！我哋total叫咗四樣嘢。 第一樣係馬拉盞炒通菜，唔好見佢細細碟，其實佢超多通菜，而且炒得啱啱好。啲菜林得來之餘亦都帶啲爽口，而且唔會好鹹，我個人就好鍾意啦！另外叫咗個鮮蝦冬陰功，佢有得揀大同細，我哋兩個人就梗係要細碗啦！佢入邊都好足料，有好多蝦、菇。口味上面我覺得比較適合香港人，唔會太辣同埋太酸，非常適合大家嘅口味。第三個我哋叫咗燒魷魚，估唔到$88就有咁大條魷魚喎！而且燒得啱啱好，唔會燒到好硬咬唔郁，亦都燒到好香口，夾埋個泰式辣醬岩岩好！最後叫咗個軟殼蟹咖喱包，呢個真係有驚喜呀！個包比想像中好軟熟，而且入邊超多咖喱，啲包用嚟點咖喱汁好好味。而且軟殼蟹份量都好多，食極都仲有。反而嗰包面就偏硬少少，唔同口味嘅朋友都照顧到。兩個人食買單先三百幾蚊，真係好抵食。下次再嚟食先！…Read More

好耐冇食泰國嘢，決定要搵一晚食一食先。原來呢間木船做主打泰式粉麵飯，另外可以再加一啲小食，好適合如果自己一個又或者好趕時間嘅時候食。入到去環境都同個名一樣，真係有一隻船嘅裝修，啲位都好闊落好舒服。我呢一晚人唔多。店員推介我哋食燒豚肉飯，一黎到見到成個碗面全部都係豚肉。而且個肉味好香，肉食落都好多汁，好有燒肉嘅香味，但唔會好乾。啲肉下邊原來仲有隻流心蛋。撈埋啲飯食真係一流！唔怪之得係佢哋嘅招牌菜。令一個係冬陰功金邊粉配燒豬頸肉。豬頸肉好大份，而且煎得岩岩好，唔會太乾亦都好鎖住肉汁。冬陰功個湯底好好味，不過個人就覺得唔係太辣， 比較適合大眾口味。小食都有好多選擇，我哋叫咗個春卷、蝦餅同魚餅。一上到黎真係熱辣辣，新鮮炸好。春卷外脆內軟，口感一流。蝦餅同魚餅都好有蝦味同魚味。最重要係三樣嘢夾埋先至10幾蚊，好抵食呀！另一個小食叫咗芝士磨菇釀雞翼，呢個真係一流！芝士味好香連埋蘑菇塞入去隻雞翼度，一咬落去全部都係芝士嘅香味，而且啖啖肉，另外仲食到粒粒嘅蘑菇粒，口感非常豐富，呢個真係值得一試！嘢飲我哋本身叫咗一杯泰式奶茶同一杯泰式咖啡，不過可惜嗰晚賣晒咖啡，最後飲咗兩杯都係泰式奶茶。泰式奶茶比起出邊嗰啲，冇咁重椰子味，亦都唔會太甜，都幾啱我口味。希望下次有機會再試買個泰式咖啡啦！總括嚟講，呢間都係幾豐富嘅泰式粉麵，下次可以再嚟。…Read More

好耐冇出街食西餐，今次就同朋友嚟咗呢間喺旺角嘅餐廳，估唔到都有驚喜喎！入到去成個環境都好舒服，位同位之間都幾闊落，講嘢都唔會俾人聽到。枱面仲有蠟燭，好有feel呀！佢個餐牌同埋drink Menu都算多嘢揀，值得一題係，佢將所有素食嘅餐單都擺埋一齊，方便晒啲食素嘅朋友！我哋叫咗一個主菜、一個飯、一個小食同埋一份甜品。一開始就上個餐包先，個餐包睇好似好硬，點知食落去仲係好軟熟，而且係熱㗎！值得一讚主菜我哋叫咗半份豬肋骨，其實價錢都真係幾抵，百幾蚊就有半份，而且好多肉，口感好林，個汁都好濃味。飯我哋叫咗燒白鴿脾忌廉雜菌意大利飯。個白鴿俾燒得啱啱好，而且有預先醃過，鹹鹹地但肉質仍然好鮮嫩，如果再大塊啲就好啦哈哈。至於個意大利飯我就覺得啱啱好，有少少硬但係食得出係意大利飯嗰個質感，我個人就唔鍾意一pat pat好林嘅意大利飯，所以我幾推薦呢個。小食叫咗個炸洋蔥圈，一上到枱大份到嚇親我哋。唔算好多炸漿，只係一層薄薄咁咁包住洋蔥圈，而且炸得好香口，唔會太油。甜品叫咗個心太軟拼柚子雪凍。甜品都等咗一段時間，可能真係因為佢即刻整。個心太軟好好味，唔會太甜。一切開啲朱古力醬流晒出嚟。柚子雪凍就有好香柚子味，好啱我胃口。呢間野都幾好味，下次可以再試！…Read More

今晚約左朋友收工去沙田市廣場既永年冰室，去到大概8點幾唔洗等位。餐廳入面有好多香港舊式茶餐廳既設計，仲狂播廣東歌添！應該能夠勾起大家對傳統茶記既回憶。餐廳既主打一定係以鮑汁花膠為主，再配上豬手、冬菇同豆卜既「女神麵」。湯底好濃郁，我揀既油麵質爽口，一定要試，同埋碗麵既份量可以夠兩個人食，我自己一個都食唔晒。花膠好厚身，而且好爽口。而豬手冬菇就好林，而且好入味。女神麵套餐另外可以加配懷舊小食一份，我地最後揀左蝦多士，多士脆身得黎又有蝦肉既彈牙。講到食車仔麵，可能有D人會鍾意食牛腩，所以我地都另外叫左一客永年辣汁牛腩試下。個辣汁好有風味，辣得黎又唔會搶晒腩汁本身既味道，個配搭岩岩好，我同朋友本身唔食辣既都覺得唔錯。至於朋友就叫左一份鐵板什扒餐。話明係什扒，緊係有晒雞扒、煙肉、豬扒同腸。每次食什扒最期待就係淋汁個下既炸炸聲！ 啲肉好大份，而且係本身餣過，唔會食咩肉都同一樣味。飲品就叫左樽仔黑牛同紅豆冰，都係永年推介既飲品，值得一試。香港唔同冰室各有特色，我自己就幾鍾意好似永年依種現代化D既冰室，舒適既環境又有港式餐廳既風味。…Read More

疫情左咁耐，好耐冇特登出去食飯。今次就嚟到元朗呢間食泰國菜啦。原本以為佢好隔涉，但其實朗屏站行10分鐘就到，都算方便。入到去佢有分室外同室內位，我呢啲怕熱嘅人，梗係揀室內啦。不過室外我都估唔係好熱，因為都好大風。入邊裝修都好有泰國風味，仲有個Projector, 喺度播啲泰國MV，好有泰國feel餐牌都幾多選擇，酒水嘅選擇都多。就算唔係食正餐，同朋友坐低飲杯嘢，食串串燒，都好正㗎！一坐低就有啲青瓜做開胃小菜，酸酸地都幾好味。我哋叫咗個馬拉盞炒椰菜苗，都幾好味，唔會太鹹或者太油。菜苗識落都仲好爽口。另外叫咗個菠蘿炒飯，估唔到佢個炒飯入邊仲有啲海鮮，有啲魷魚、蝦。仲有好多菠蘿，真係好足料。個炒飯用木桶裝住，感覺都幾得意。個飯炒到好乾身，係香港人鍾意嘅味道。我哋仲嗌左幾串串燒，有豬肉雞肉同牛肉。個人就最鍾意雞肉，因為食落又嫩又滑。佢啲牛肉係有預先醃過，亦都燒到啱啱好唔會太鞋。至於豬肉都好有豬味，值得一讚！最後仲有個香葉肉碎玉子豆腐。個玉子豆腐有一層薄薄嘅炸漿，咬落去外脆內軟，好特別。肉碎都好惹味，啱晒撈飯食。友人就話呢個係最好味！飲品我就叫咗一個薄荷啤酒，飲落都幾得意，有淡淡的薄荷味。又唔會搶咗啤酒嘅香味，未飲過嘅話都值得一試。朋友就叫咗一個椰子，個椰子真係好大，有好多水，椰子肉都好甜，正！總括嚟講，呢間野都唔錯，下次可以試埋佢其他嘢食！…Read More

呢間Cafe開咗好似都好耐，但一次都冇食過。一於今日試吓佢先！間野裝修都幾靚，而且啲枱好闊，坐得好舒服，啱晒幾個朋友一齊食下野傾吓偈。一坐低仲好貼心派左個紙袋俾我哋放口罩，值得一讚！佢個主餐牌都好多嘢食，不過我哋今日就唔係好肚餓，所以就咁叫兩個dinner set算啦個餐包都幾有驚喜，估唔到唔係行貨。係帶啲顆粒嘅包，食落鬆軟得來又好有texture。忌廉龍蝦湯個口感都好creamy, 亦都唔會太咸。第一個主菜係軟殼蟹墨汁意粉。隻蟹都好大隻。配埋啲蟹子同蟹肉，口感好有層次。值得一提係，啲意粉比平時嘅意粉偏幼，估唔到都幾好味。第二都係店員推介嘅威靈頓牛，本身見佢賣百幾蚊，估唔到都幾好食。cp值極高！個酥皮金黃色，焗得好靚。一切開，個牛煮得啱啱好，唔會太熟好鞋。最好味係佢嘅蘑菇蓉，蘑菇味好香但同時又唔會搶到牛肉嘅味道。百幾蚊有呢個質素真係好抵！我哋仲手多多叫咗個薯菜，薯條係細細個又曲又粗嗰隻粗薯條，啲童年回憶返晒黎！另外都嗌左個是日甜品，一個係伯爵茶味嘅馬卡龍，一個係好似復活蛋咁嘅甜品。馬卡龍食落個皮都幾煙un。至於個復活蛋，佢係白色朱古力嘅外殼，入邊有啲好似雪糕cream, 好特別。啱晒最近復活節啊飲品就各自叫咗杯熱朱古力同凍朱古力。我個人就覺得熱嘅對我來講有啲甜，反而凍嘅就好飲啲喎！食咗咁多嘢，埋單每人都係百零蚊。真係好抵食呀！下次再嚟試吓其他嘢先。…Read More

之前聽同事講奧海城地下有一間好出名既泰國菜，今次放工就約左友人一齊去試下。可能因為而家唔俾四人以上既聚會，所有間餐廳無咩人等位，七點幾去到就即刻有得入座。餐廳既一個特別之處就係勝在有戶外座位，但個晚比較凍所以我地揀左坐入面。餐牌好有泰國既設計特色，入面菜式都算幾多，整體黎講價錢價錢中規中矩。我自己就首先叫左杯椰汁冰，椰香十足，飲落仲有少少椰絲。雖然我地只係得兩個人，但係見佢個泰式拼盤價錢唔係特別貴又多小食，所以就叫左一份。炸蝦餅好脆好爽口，炸魚餅就普普通通，另外春卷入面既料多到爆晒出黎，而串燒雞就比較軟身幾易入口。另外叫左一份泰式炒椰菜苗，熱辣辣炒得好惹味。個菜係面頭鋪左少少炸蒜，令到食落更加香口，唔知依個係米就係泰式既做法呢？食泰國野緊係要試下佢既海南雞啦。雖然我地只係叫左半隻，但佢既份量遠遠比我地想象中大好多，足足係我地Expect既雙倍份量。雞件好滑身，油香十足，加埋酸酸甜甜既醬汁簡直係絕配。最後我地再叫左一個菠蘿海鮮炒飯。淨係睇個樣都知道d飯多到跌晒出黎，而且都好足料，有幾隻蝦同青口，飯粒都炒得好粒粒分明，超級好食！咁既價錢食到咁足料既泰國菜，十分值得推介！…Read More

估唔到白色情人節竟然係食米線！ 不過其實係我見佢幾得意而叫既我地去到就太遲啦，冇哂青瓜，比左兩個唔同汁既雲耳我地。麻辣就勁啲，口水汁就清爽岩我呢啲食唔到太辣既人。過橋米線冇咩特別，不過可以轉我最多既砂砂湯。雞翼都係大路野。我地另外加左份豬排，好抵食又大份！雖然食得出係雪藏味，但都一讚！飲品藍色係有薑味既梳打，紅色係辣既fruit punch。不過我覺得紅色太辣啦，最後放棄左。最後啊姐仲送左兩粒朱古力，同我地講情人節快樂添！so sweet!…Read More

好耐冇食ruby Tuesday 啦！一於去食下先！可能因為平日夜晚，又有疫情，所以人唔算好多，坐得幾舒服。叫左個cheese stick! 份量比我想像中多、炸得啱啱好，好脆好香口，所以前菜唔錯。跟著叫左個烤餅，呢個係男朋友最愛！上菜個陣仲好熱，入面肉同埋醬既味唔會太濃。餅係少少軟身個種，個人中意呢種多過脆個隻。Main叫左個ribs同三文魚意粉。個ribs啲肉好林，而且好入味。個薯蓉好creamy, 值得一讚！至於意粉，我冇諗過係成份三文魚上哈哈，不過都幾好味。飲品叫左個passion fruit smoothies 同Oreo smoothie. 熱情果就酸左啲，oreo反而冇咩oreo味wor!最後忍唔住叫埋個pancake做甜品，飽哂！…Read More

厚福街一直係尖沙咀既美食街，款式包羅萬有。自從上次係隔離既一間冰室食完Lunch之後見到依間翔壽司就一直好想試。難得今日放工唔係太夜，就決定一於試下依間日本野啦！入面環境唔算特別大，餐廳設計幾有傳統壽司店既風格。我地第一輪叫左10件壽司左右，先試下廚師既手勢。首先係大吞拿魚腩壽司，睇落幾肥，又有豐富油感，算係唔錯，但如果油感再重少少會好食d。跟住既係三文魚腩壽司，厚身同無筋，好食。火灸左口魚壽司，油感十足，完全係天堂級享受。而油甘魚一直都係我既偏好，但可惜有少少乾身，油感一般，可能唔太新鮮。另外仲叫左海膽軍艦同蔥吞拿魚腩軍艦。雖然只係一般海膽而唔係北海道海膽，但感覺仍然好新鮮，完全無腥味，又甜又夠份量，值得一試。最後每人食左300蚊左右，下次可以再Encore。…Read More