siuyi133's Profile

最近天氣轉涼，又係時候打邊爐。朋友訂咗呢間新開任食火鍋店，好彩有訂位，平日都爆晒棚，無限時任食火鍋每位只需$268，仲有得任食手切牛頸脊，難怪咁多人捧場。先上雞煲，小辣辣度剛好，香而不辣，雞肉幾滑，一啲雪味都無。食完雞煲就食蒸海鮮拼盤，有龍躉、鮑魚、花蜆、扇貝、蟶子、海蝦，全部都好鮮甜，蒜香唔會蓋過原本鮮味。跟住就開始打邊爐，湯底係淮山蟲草花燉烏雞，啖啖都係精華，飲完湯就出去拎配料，推介墨魚滑同黑椒牛丸，彈牙多汁。菜都好新鮮。除咗配料，當然唔少得主角手切牛頸脊，牛味濃郁又夠腍，食咗好幾碟。打完邊爐食返碗椰汁雪燕，充滿椰香，又甜又潤。…Read More

朋友介紹話北角新開左間Cafe話幾抵食個喎帶咗我去試吓。入座嘅時候店員好有禮貌，仲安排咗個四人嘅位俾我哋，坐位都好舒服。加分！一打開見到個Menu即刻心心眼，我都係第一次見到個Menu係咁靚，係咁掛住玩…呢度Menu都幾豐富，主打石燒牛扒，仲可以揀set dinner或者單點，我同朋友就每樣都揀啲。美國頂級穀飼牛肩胛肉眼扒呢度嘅牛扒係用石燒上，$78但質素一啲都唔差，肉質好Juicy好有肉味，店員仲特登提我地可以自己控制生熟度，加多$30仲可以升級套餐，有湯沙律同甜品，好抵食。美式BBQ豬排骨朋友唔係好好牛就揀咗ribs，份量都幾多，排骨好入味，配搭bbq汁好開胃，伴碟揀咗配薯菜，連唔起眼嘅薯仔都好好食。小食拼盤本身朋友好想揀大食拼盤但我有啲擔心食唔晒最後揀咗食小食拼盤，點知食完有啲唔夠喉，4款雞翼好好味，分別係咖喱雞翼/蜜糖雞翼/水牛城雞翼/蒜香雞翼，仲有酥炸芝士都好正，$78好抵食士多啤梨乳酸特飲/凍薄荷朱古力咖啡跟餐加$15就可以轉特飲，飲品嘅份量都幾大杯，啱晒同朋友坐低慢慢傾慢慢飲，士多啤梨個杯配埋乳酸酸酸甜甜好開胃，而朋友每次去親唔同餐廳都會揀薄荷朱古力，佢就話覺得呢度唔會太甜都唔錯。甜品跟餐基本係配啫喱嘅加$25呢就可以轉其他$50以下甜品，我地其中一個轉咗做士多啤梨泡芙雪山。…Read More

NUTTEA旺角彌敦道688號旺角中心1樓F52號舖///減肥嘅朋友唔使再忍口了，可以隨時飲番杯台式飲品😍nuttea嘅奶係由五種堅果打成嘅堅果奶，包括榛子、杏仁、腰果等等！如果杯茶叫埋無糖嘅話，其實好健康，一啲都唔肥。☺️四季春堅果奶蓋茶 $35上面嘅奶蓋好厚實，就係用五種堅果打成嘅奶蓋，比一般牛奶打成嘅奶蓋更加濃厚，要用個產產嚟食。鹹鹹地，好濃烈嘅榛子味，上面仲有粒粒嘅堅果粒，超級好食，好似食緊榛子朱古力咁，食到停唔到口。四季春即使無糖，但仍然飲到茶香，濃郁得來回甘。最後將奶蓋同茶攪勻，就好似一杯奶茶咁。☺️粉紅莓好堅果奶 $45一樣叫咗無糖，佢有用到一啲新鮮嘅士多啤梨打成，非常有驚喜！感覺健康不少！同堅果奶加埋一齊，酸酸甜甜，好似一杯好健康嘅士多啤梨奶昔，值得一試。…Read More

早幾年韓國熱潮仲未減退嘅時候，想搵間食韓國野既真係排到天荒地老，唔知叫唔叫好彩啦，近排韓風冇吹得咁行，又加上疫情，所以我哋好順利咁book到都幾受歡迎嘅韓燒running燒。呢度食飯係分時段嘅，有少少似食放題咁樣，我哋就揀咗比較平嘅9:30時段。呢度嘅裝修都好有韓國燒烤嘅感覺，圓枱加上一條條嘅抽油煙機，好有去咗韓國嘅感覺。店員安排咗我哋坐喺窗邊嘅位，四人位嚟嘅，我哋得兩個人坐落都幾舒服，加分。因為第一次嚟嘅關係，我哋第一輪乜都點下，叫咗好多唔同嘅肉類同埋海鮮。呢度嘅肉雖然都係冰鮮肉，但係品質一啲都唔差，切出嚟嘅五花腩唔會薄chitchit，塊塊都差唔多一cm厚。總括嚟講豬肉係比較好食嘅，五花腩加埋生菜加埋啲韓式辣醬非常之咁好食。同埋呢度值得讚嘅係連韓國好地道嘅豬皮佢都有得叫。海鮮嘅話除咗常見嘅秋刀魚、魷魚之外，仲有酒店自助餐先會見到嘅生蠔，當然係要燒熟先食得個隻啦。咁我哋都唔執輸叫咗幾隻食，出奇地唔差喎，幾新鮮。除咗呢啲之外，仲有熟食叫，仲要係韓式炸雞，有成六款口味，淨係叫多幾件炸雞其實都已經值回票價，出邊叫五六件雞都差唔多要$200，呢度仲可以任食，超級抵。仲有15分鐘嘅時候店員提醒我哋要買單同埋last order，最正嘅係仲有一支韓國雪條做甜品添。買單大約二百幾蚊一個人，希望佢個promotion可以做耐啲啦，等我可以嚟多幾次。…Read More

以前好中意去中國食太二酸菜魚，原來香港呢間廚十三係太二班底😍😍，唔怪得咁熟悉！之前去荔枝角分店都唔知添！今次就試下cwb 分店！一去到就派膠袋for 放口罩，貼心衞生。每枱都有一樽茶，我地一去到就叫定嘢飲，因為驚陣間啲嘢太辣，叫左酸梅湯同柚子蜜梳打，透心涼！頭盤點左泡椒鳳爪，肉質唔會過腍過硬，仲有點彈牙，泡椒味道好麻，又不會太辣，熱身一流！跟住就到靈魂酸菜魚，我哋叫咗二人份，小辣。配菜就揀左紅薯寛粉、豆卜、腐竹、餐肉。先飲一啖湯，果然係太二酸菜魚嘅味道，都係我哋最鍾意嘅重麻，然後嗰陣辣慢慢侵佔味蕾。魚肉啖啖肉非常嫩滑。豆卜當然係吸飽湯汁，而我最中意係食紅薯粉，又滑又煙韌。食食吓見到廚師推介避風塘魚柳，雖然都係魚，但係炸魚，所以都諗住一試。一上枱，真係一把汗，勁多辣椒，食魚柳反而就冇想像中咁辣。但係煎炸嗰種鑊氣配上淡淡嘅麻辣，好正。最後叫咗麻辣牛展，呢個真係打大佬，好辣，要不斷飲嘢，不過都食到牛展味，推薦食得辣嘅朋友嚟食。…Read More

講到食泰國嘢可能好多人會諗到去九龍城食，但如果想食泰國嘢正宗得來，觀感上亦有泰國feel嘅話，我會推薦你黎泰爸爸。泰爸爸係一間半開放式嘅餐廳，可以揀室外，亦都可以揀室內，之前嚟過幾次坐喺室外真係有種去咗泰國嘅錯覺，啱晒而家冇得周圍走嘅香港人。除此之外，泰爸爸嘅嘢食當然都相當出色啊，今次專登揀室內，就係為咗俾你地睇吓嘢食幾咁精緻好味🤤我哋分別叫咗生菜包，冬陰功烏頭，香芒蟹肉炒飯，同埋椰青。生菜包既肉碎調味好出色，香料嘅味道唔會蓋過肉碎本身，食得出每一樣材料嘅原味，生菜亦好新鮮，如果肉碎可以再炒乾身少少嘅話就真係完美一百分冬陰功烏頭就啱晒啲好似我哋咁貪心嘅你哋，有得食魚，側邊仲有一碗冬陰功俾你淋上魚身，剩返嗰啲仲可以飲添🤤🤤正香芒蟹肉炒飯落足料，入邊見到一絲絲蟹肉，食落口每一啖都有蟹肉味，加埋芒果嘅甜味，異常地夾，推薦雖然只係帶咗三個餸，但係已經完全夠飽，每一樣都好足料好大份，正…Read More

香港本地連續幾日零感染，急不及待要去食雞煲打邊爐了，幾年前食過呢間，呢日醒起，所以來了！侍應安排左卡位比我地坐，有啲獨立空間，位置亦夠闊落，食都食得安樂啲，仲一人派左2個紙袋比我地放口罩，非常貼心！雞煲未嚟，先拎野飲，除左汽水，仲有無糖綠茶、烏龍茶可以揀，算係健康之選！雞煲來了，我地叫左小辣，微微的辣度剛剛好，唔會太濃遮左啲雞味，肉都夠嫩，唔會老，食唔停口！食到7788,自己去拎上湯打邊爐，餐墊紙有溫馨提示，落兩吋湯味道剛剛好，連鼓油都唔洗點！事實上真係夠味，唔洗點鼓油仲健康！Scan qr code 點菜，十分中內上齊！肥牛嘅色水不錯，食落有牛味，豬肉肥瘦都有，正！特別推介自家製韭菜餃同埋自家製響鈴，前者皮薄餡靚，後者炸得好香脆！好味！…Read More

疫情問題冇得去旅行，但係又好想食泰國嘢，見到呢間船皇有得食船麵，即刻入去試吓。呢度嘅船麵可以揀湯麵或者撈麵，麵底亦有四款揀，而且仲有尖沙咀分店限定嘅小食，選擇唔少。最吸引嘅係和牛升級優惠，我就冇試啦，男朋友叫咗。我叫咗牛肉湯麵，配料有肥牛、牛丸同埋牛腩。見到湯底好濃郁，米粉索晒啲湯汁，超級好味。肥牛雖然唔係乜嘢靚牛，但至少嬾滑同有牛味。驚喜嘅係牛腩，炆得好稔，腩汁亦都好入味。男朋友呢碗豬、雞、牛乜都有。上面嗰塊係好有泰國風味嘅炸豬皮，男朋友話略嫌唔夠脆。但係其他配料一樣好味，而加一蚊嗰塊和牛質素亦都唔錯。其實兩碗湯面份量都好足，但黎到當然要試吓佢啲小食啦，我哋嗌左通菜、魷魚蘇、炸蝦春卷。剛才就講唔出啲乜嘢大道理啦，至少夠嫩囉。魷魚鬚嘅燒汁略帶甜味，幾特別。最驚喜都係炸蝦春卷，外面嗰層係炸咗嘅薯仔，好香口。我哋仲叫咗青檸梳打，咁多樣野加埋兩個人$200都唔使，我就覺得好抵食啦！…Read More

打邊爐陪着香港人好多年，近年越食越嘴刁，越食越講究，作為火鍋控嘅我當然都一樣啦。知道佐敦有一間開係樓上嘅隱世既火鍋私房菜，老闆對於食材非常執着，今日一於同朋友黎試吓舖頭好骨子，加加埋埋應該唔超過10台，我諗應該係因為私房菜要控制好客人數量嘅關係，睇得出老闆嘅細心。坐低之後老闆俾咗個Menu我哋，有火鍋、串燒同埋私房菜揀，睇到我心大心細。左諗右諗之後都係決定打邊爐，睇下食材係咪真係咁新鮮！落完單冇耐就上咗第一道菜，冰鎮鮑魚伴生蝦，一上枱我同朋友已經哇一聲，隻鮑魚好大隻好肥，齋睇個樣已經好吸引，食落口更加不得了，醃料唔會過鹹，鮑魚唸得黎同時不失口感，呢個前菜好加分。湯底我哋揀咗芫荽皮蛋併麻辣湯，兩個湯底都飲得出個高湯嘅底味，唔係就咁用水開俾你，有用心煮出嚟，又加分。終於嚟到戲肉，海鮮拼盤同埋安格斯肥牛，海鮮拼盤份量唔多，但係勝在樣樣都有，有海蝦、珊瑚蚌、蠔、花甲、鯇魚片，啱晒啲唔大食但係乜都想試吓嘅我。肥牛一睇個色水就知道唔野少，油花分布好均勻，色澤粉嫩。食落口更加不得了，海鮮樣樣都好新鮮，食得出海鮮嘅甜味，同埋食材嘅鮮味，肥牛入口即溶，又有牛味，平時食開嘅肥牛完全冇得比。最後食埋時令蔬菜同埋烏冬做一個完美ending，好期待下次嚟食埋佢個串燒同埋私房菜…Read More

以前會返中國食酸菜魚，家下不了，但係又想食喎，於是搵左呢間餐廳！餐牌介紹話鋪頭老闆係資深吃貨，最鍾意食酸菜魚，仲鑽研咗酸菜魚嘅13種做法，講到好勁咁搞到我都好期待。我同朋友兩個人叫咗個小份酸菜魚。另外仲叫咗兩款小食，分別係青椒土豆絲同埋正經的雞被撕，即係手撕雞。啲名好別出心裁！唔好以為呢支係油，其實係茶，小麥茶之類，清淡解膩！最貼心係次次飲淨三分二，waiter 都會嚟換新茶！座位方面都好寬落！所有櫈都有軟墊，坐得好舒服！<正經的雞被撕>送到！岀奇地有擺盤🤣本身覺得手撕雞都係咁㗎啦，冇乜特別，但係竟然有驚喜！雞肉嫩滑唔再講，個麻辣汁唔係一味得個死辣，係有層次嘅麻辣，仲好入味。平時啲花椒一食到就要lur, 因為太辣，但係呢一個竟然可以咬埋吞埋，嗰種麻係食得入口嘅麻！大推！至於青椒炒土豆絲，唔好以為呢味菜好簡單，要炒得好食都唔易！又炒過嘅香口，亦炒得好爽身，完全唔油膩，雖然係澱粉質，但係一啲都唔會食到飽飽滯滯。重頭戲終於嚟到，就係酸菜魚，成個面盆咁大，非常誇張！除左有最重要嘅魚，當然我地亦有叫配菜，包括腐竹、豆腐、連藕丶粉絲、木耳。湯底非常特別，唔係一般中國或者我哋心目中正宗嗰種酸菜魚味。係探探嘅書同埋淡淡嘅麻，層次係分到，唔會一味死酸死麻，一開始有啲唔慣，但係食食吓又覺得幾好味，算係比較輕口味嘅酸菜魚，大部份香港人都接受到！唔知佢係邊款魚肉，但係好嫩滑，亦都冇乜骨！平時可能都會嗌碗白飯，但今次竟然唔使，仲食唔晒添!…Read More

今日又同朋友做yoga, 玩完都9點，即上openrice 睇下有咩餐廳未收，見到呢間拉麵店就喺d2 place 對面商場，橫掂無去過，一於試下！由於都幾夜，舖頭已經無乜人，可以坐超大卡位，食得舒舒服服！睇下有咩食先，淨係拉麵都十幾款！另外仲有冷盤同燒物等選擇，可自選配搭做套餐！我叫左個松梅竹自選套餐！一見到牛油拉麵就流口水，雖然做完運動咁食好肥！溶左牛油嘅湯底，更加咸香濃郁，但唔覺得膩！麵質軟硬適中，不錯！小食揀左燒牛舌同燒冬菇，朋友就揀左雞軟骨。全部都即叫即燒，熱辣辣脆卜卜，正！牛舌最驚就係燒到乾爭爭，佢完全無呢個問題！雞軟骨夠熱夠脆，一人一串爭啲唔夠喉！冬菇燒太乾都係死症，佢可以保持乾身得嚟又唔乾，菇味濃郁，正！總括而言，拉麵喺住宅商場嚟講ok,而串燒係驚喜！…Read More

馬鞍山最近新開左一間食東南亞菜嘅餐廳，主打泰國菜，我自己好鍾意食，所以約埋朋友試一試。店鋪環境好有東南亞民族風情，卡位好似一節節船咁，而且夠大，坐得好舒服，廚師、serve我哋嘅姐姐真係東南亜人，感覺好地道。頭盤叫咗我最鍾意嘅青木瓜沙律，正正常常都唔會失手，青木瓜好爽甜好開胃！冬陰功都係必叫，細size啱啱好夠兩個人一人一碗。味道應該好啱香港人口味，酸酸地，椰奶味重，唔會太辣。隻蝦都正正常常，唔會霉或者有雪味。飲完個冬陰功，嚟一杯嘢飲係好合理嘅。我叫咗青檸梳打，成支梳打俾我慢慢倒！開心！朋友係雞翼控，點左蒜蓉越南牛油雞翼,好香蒜味同牛油味，肉質嫩滑，如果可以再脆身啲就更好！終於嚟到重頭戲，主食嘅部份，泰式燒春雞釀香茅黃飯。隻雞燒到好香，卜卜趣，一切開，香茅黃飯嘅香氣撲鼻而來，真係流晒口水。放入口亦都冇失望啲，飯煮到啱啱，由於釀入雞入面，亦都吸收左雞嘅精華，非常好食！大推！今餐我同朋友合共食咗$600，價錢唔算最抵，但質素高，而且環境舒服，推薦大家試一試！…Read More

最近屯馬線開咗，去大圍食飯勁方便，約咗朋友食呢間風車西餐。鋪頭有種懷舊小酒館嘅感覺，浪漫得來都幾溫馨，同朋友或者另一半談心係好好選擇。最重要係乜呢？佢唔係播CCTVB，係播Viu TV㗎!!叫咗兩個頭盤，分別係巴馬火腿蘆筍火箭卷同埋煙三文魚凱撒沙律。巴馬火腿、蘆筍、火箭菜三樣嘢夾埋一齊本來就冇得輸。至於沙律，煙三文魚卷到成個玫瑰花咁，賣相吸引，生菜切到一口一塊，夾埋啲醬汁好好食，好新鮮爽口！主菜方面，同人叫咗兩個，分別係西班牙脆皮乳豬配彩椒汁，同埋紐西蘭肉眼扒配焦糖菠蘿。以前喺西班牙食過乳豬，一直都好回味，呢度竟然有得食，即刻試吓！個皮真係好脆，豬肉亦都好嫩好稔，相當唔錯。至於牛扒就我哋嗌左五成熟，的確係啖啖肉，而且都好嫩滑就好重牛味，食一啖牛再食焦糖菠蘿，原來味道係咁夾！飲品方面，因為我哋三個都唔飲酒，所以分別叫咗三款mocktail!呢杯係strawberry colada,中咗士多啤梨、菠蘿汁、椰奶同鮮奶調配，好濃香、甜甜酸酸！另外朋友嗰2杯分別係cool mint 同Apple mojito, 前者用左荔枝、薄荷、ginger ale and soda, 後者用左青蘋果、薄荷、lime、soda,兩杯都好refreshing!!三個人食咗八百幾蚊，八成飽左右啦，兩個人會夠食啲，有個地方比大家舒舒服服咁傾計唔錯啊！…Read More

今日約咗好耐冇見嘅朋友食飯，朋友話呢間兆萬中心嘅點鍋係任飲任食火鍋，選擇好多，而且用料質素好好，所以決定一試！呢期因為肺炎關係大家都唔太敢打邊爐，所以都幾冷清，但係其實環境好乾淨，而且鋪頭都好貼心，一坐低就用消毒噴霧清潔枱面，亦都送上信封同紙巾俾我哋裝住個口罩，更加提供熱水洗餐具，配料方面全部有蓋遮住，衛生意識好高，大讚！點餐方面用咗平板電腦，選擇真係好多，淨係丸類都勁多種，而且有得細分半份或者一份，兩粒至八粒，好適合胃口細嘅女仔可以試多幾種食物！湯底叫咗白菜豬肉鍋，非常足料，而且湯底好好飲，好夠味！食材話咁快就送上，枱面有個三層高嘅架俾我哋放食材，令到張枱唔會太雜亂，如果唔夠放，佢仲會推多一個三層高嘅架仔喺枱側，俾你放食材。食材佢都放得好整齊，感覺舒服。先來左一個極上牛脊肉，見到啲紋理已經知道係靚野，食落口果然相當有牛味！然後嚟咗個海鮮拼盤，啲蜆肉好大粒，魚腩亦都好嫩滑新鮮。呢度竟然有鴨血叫，擺落白菜豬肉鍋嗰度，即刻食到台灣風味，至於重點其實係啲丸，有黑松露丸、極濃芝士丸、手打蝦丸、墨魚丸、韭菜丸等等，每一粒都好好食，好有驚喜。特別推薦黑松露丸，皮好薄，好有黑松露味，絕對唔係街市嘅海膽丸可以媲美！另一大大力推薦嘅係鹹蛋黃炸魚皮，即叫即炸，入口熱辣辣脆卜卜！而且真係有好濃烈嘅鹹蛋黃味，就咁點嚟食都食唔停口！總括而言，大力推薦呢間任飲任食嘅火鍋店，因為用料真係好有誠意，一個人大約要二百幾蚊，而家有八折，下次都會繼續去食！…Read More

平時諗唔到食乜，打邊爐都係一個好選擇今晚約左友人係佐敦附近食飯，山林道出名多野食，但一直都未試過呢間邊爐，於是就決定去試下喇。一上到去就覺得環境幾舒服，燈光唔會太光或太暗，我地兩個人食，餐廳安排左我地坐圓枱，枱同枱之間都唔會太迫，坐得幾舒服。一坐低已經俾咗一盤好多配菜嘅調味盆俾我地自己混醬，唔使自己出去「針」，用完就有人同你收返，都幾貼心～我地揀左沙爹同螺片雞湯兩款湯底，湯底黎到本身已經好足料，有各種菇菌呀芽菜呀，就算野食未黎都可以食住先～沙爹湯底夠濃味，岩晒我呢D重口味一族；雞湯都清甜呀呢度野食選擇都幾多呀，我地兩條友叫唔到太多野食，所以都係叫D打邊爐基本野，再加多個四寶丸，可以一次過試多幾款丸丫嘛。價錢唔算特別平，好在D料都真係幾新鮮，特別推介豬頸肉片，四寶丸都唔錯，尤其係手打墨魚丸堅正最最最想推介既反而係杯大咸檸七，你知啦打邊爐實頸渴架，呢杯Jumbo size野飲真係飲到勁「gur」，搞到忍唔住encore左杯不過兩個人黎試唔到太多野食，如果一大班Fd約gathering呢度都應該係一個唔錯既選擇！…Read More