Immanuel's Profile

昨晚經過此店，原來剛在試業中，一見到呢張10元外賣飲品嘅價目，極度吸晴，我平日好少買凍飲都立即打咭，影低慢慢研究。由於係附近番工，翌日中午食晏時立即黎試下。食晏時間堂食人龍較多，外賣在另一門購買及等候。我揀左黑糖波霸奶茶，走甜，走冰，確實為10蚊，真超值，以台式飲品來黎講，尚算有點茶味，黑糖珍珠少甜，珍珠份量絕不欺場，大概有杯的1/8份量。朋友點了鮮檸檬紅茶，朋友說少甜少冰后，確實有點酸，可見檸檬汁份量足夠，味道也不錯，檸檬味較濃。朋友話下次再黎飲過嘅話，正常嘅糖味道應剛好。總括，此店CP值極高，一定再次回購:)。…Read More

餐廳位於UNY 超市內，如非進入UNY逛逛，真的不知內有食肆。餐廳屬銀杏館系列，想起來我尚算粉絲，過去曾食過婆婆廚房、越老、越老仔、銀杏館等。本以為此餐廳為一般茶餐廳之類，再細看清楚下午茶餐單，套餐甚為Fusion，結合中、西及越式等，看起來也幾吸引，一次過滿足不同食客需要，價格都較為親民，為38元至48元不等。用餐當日為平日，全餐廳連我枱只得三枱。一入進餐廳，是一位男性長者服務員迎接，他不但有禮貎，還很主動給我和朋友各人一張餐牌。見到他的服務態度，確實較其他餐廳相對年青侍應為好。鮮蝦香草車厘茄意粉一放上餐桌，實在太吸晴，意粉上碟整齊，且有伴碟的芫茜賣相一流，看似在高級西餐廳用餐的體驗。鮮蝦較為爽口彈牙; 香草味芬芳，邊吃都聞到不少香草味; 車厘茄味道香甜，食落不會變得過酸，加上顏色漂亮，令意粉賣相更靚。意粉茄汁醬味濃郁，味感不會太酸，實在開胃，汁的份量適中，不會像湯般的; 意粉爽口彈牙。熱奶茶較為苦澀及會感覺嚡口，真的不太欣賞。至於醬香豚肉叉燒拉麵，豚肉叉燒以瘦肉為主，較適合注重健康的進食，口味清淡，入口軟綿，肉質嫩滑。拉麵算尚爽彈，還有進步空間; 醬香湯底，顏色似麵豉醬，算是較淡味的麵豉醬，咸味適中。唯一美中不足就是少了半顆溏心蛋。大大杯常温咖啡，由於點了凍咖啡走冰，凍飲不用加$，咖啡味不夠濃，仍有進步的餘地。兩份餐送齊後，我們沒提出，那位男性長者服務員很主動給我們多一雙筷子，服務確實一流。餐廳沒有收加一服務費，反而其他收加一服務費的餐廳也沒有棒的服務。今次用餐體驗不俗，要支持一下長者就業及聘請長者的企業:)，加油…Read More

餐廳位于觀塘迅達工業大廈2樓，用餐當日為公眾假期，不能于大廈正門進入，需于旁邊的殘舊停車場進入:(，工廈停車場環境確實令我不安:(，惟已訂位不想臨時更改地點。見前幾篇食評，半自助午餐都係百幾蚊一位，一坐低見餐牌先發覺中伏，完全唔係呢會事，都坐低左就冇辦法:(。觀塘區200幾蚊一位午餐算貴，所謂自助部份只有一張枱，提供沙律 、凍腸、餐湯、三款小蛋糕，後來發現有凍蝦、凍海螺及凍青口，雪糕需另行付款:(。我同朋友分別點了蒲燒鰻魚海膽忌廉汁扁意粉及韓式柚子蜜山椒板燒雞扒。蒲燒鰻魚海膽忌廉汁扁意粉完全食唔到海膽味，橙色忌廉汁好稀，似湯汁，扁意粉味道較咸，意粉麵質硬，未煮夠軟身就上碟，蒲燒鰻魚正常，配左橙色忌廉汁的鰻魚更咸:(，以女生份量黎睇尚可接受。韓式柚子蜜山椒板燒雞扒賣相不錯，兩塊雞扒算大配紫薯，實在吸睛不少。雞扒烤得剛好，惟冇配汁，好dry ，配菜以紫薯較為特別，紫薯林滑，味道可以，份量尚算足夠。凍蝦及凍青口味道正常，配以茄醬，凍蝦如一般急凍蝦般鮮味較少，口感仍有少許爽口彈牙。凍青口未煮夠熟，有未開口情況。南瓜湯冇南瓜味，溝水及湯質感較稀，且咸。沙律菜新鮮，汁醬有麻醬、醋及意大利醬三種，我選了麻醬，配沙律不錯。飲品我和朋友點了常温的檸茶及凍檸茶少甜少冰，冇影相，味道同茶餐廳一樣，正常。服務一般，冇乜客情況下，只幫我地加左一次水，整體味道、體驗與價錢不相配，CP值極低。…Read More

去年同媽慶祝生日都係係太子餅店o既九龍塘分店買件裝海綿蛋糕，今年就貪方便係將軍澳店買。我共買左四款海綿蛋糕，共八件，包括芒果凍餅、藍莓乳酪蛋糕、鮮士多啤梨蛋糕及紅豆綠茶卷。藍莓乳酪蛋糕: 藍莓係用新鮮o既，藍莓醬唔算太甜，乳酪同藍莓混埋一齊整，味道好有藍莓味，仲有啲藍莓粒食下，甜度適中，蛋糕底夠鬆軟。鮮士多啤梨蛋糕: 士多啤梨好新鮮，唔只係蛋糕面果二片，連夾心忌廉裡面o既士多啤梨都係好新鮮，粒粒果肉。粉紅色o既忌廉好吸引，且有有濃濃o既士多啤梨味，忌廉甜度適中，並增添滑順口感。海綿蛋糕鬆軟，甜度剛好。紅豆綠茶卷: 成件蛋糕好似冇配料咁，紅豆份量得幾粒，唔算甜，蛋糕面放左o既糖粉做裝飾，好似幾靚咁，且唔甜。蛋糕中間夾左忌廉做餡，味道適中，唔會太甜，蛋糕口感紮實左同乾左啲，且完全食唔到綠茶味，呢款係咁多款中最差。…Read More

朋友極力推介黎呢間餐廳，竟然平日的下午茶時間都會咁多食客。 朋友點左香草忌廉三文魚意粉配熱檸茶。朋友推介我點正價飲品，再以優惠價點下午茶。結果我就揀左玫瑰荔枝椰果紅茶配香腸西蘭花芝士薄脆。香腸西蘭花芝士薄脆:熱辣辣香脆可口嘅薄脆有六片，脆到好似食緊薯片咁，真係夠晒薄而脆。薄脆面放左好多芝士，芝士味濃，食落似食pizza 咁，啖啖芝士，份量恰到好處，唔會食到好漏咁。薄脆餡有西蘭花，平時西蘭花好少出現係pizza ，都幾新奇，西蘭花味較淡。蕃茄醬落得比較少，所以茄汁味唔濃，薄脆就更乾身了。香腸唔會好鹹，因茄汁唔多，咸味就剛剛好，而每片薄脆都有一片仔嘅香腸。香草忌廉三文魚意粉:意粉煮得剛剛好夠彈牙，忌廉汁都幾creamy，大大片煙三文魚係面，配埋香草，令成個意粉好有色彩。煙三文魚都OK，少少咸。啲香草就似火箭菜，食落好香口。玫瑰荔枝椰果紅茶:茶成壼上，大大壼，同朋友係度傾計可以慢慢飲。下午茶就係悠閒，最啱飲玫瑰花，夠晒 relax。荔枝味都幾濃，配埋幾粒椰果，不過椰果就食唔到味了。呢間餐廳算係旺區嘅綠洲，最啱傾計、休息。…Read More

近九龍灣地鐵站嘅 food court 得PIAGO 內，food court 內嘅食店唔多，總可以揾到一間啱食。黎神戶北之板已經好多次了，黎親呢度 food court 多數食呢間，呢度food court勝在唔多人，比起德福廣場內嘅食肆，呢度算幾抵食，又唔駛點等位。從店名會以為神戶北之板係食日式定食，呢度係食和式洋食，帶點西餐風。今次點左芝士焗意大利肉醬千層麵套餐，除左主食外，仲有沙拉、湯同飲品，凍熱飲品價錢一樣。芝士焗意大利肉醬千層麵:  睇見芝士好似好厚，仲以為份量好多，非也。其實千層麵並非千層麵，而係濶條麵而已，三層濶條麵其實食幾啖都冇晒，極度唔夠飽，濶條麵撈埋少少肉醬，味道一般。芝士唔算落得多，少少而已，所以唔多夠芝士味。肉醬亦都唔多，肉醬味唔濃，一般而已，唔似其他餐廳嘅肉醬意粉咁啖啖肉醬。食咁多次之中，呢次份量係最少。沙拉係最穏定，每次味道一樣，沙律菜夠新鮮清爽，惟沙律汁太多，如果另上沙律汁或放埋一邊，隨自己喜好落幾多就最好。湯係麵豉湯，少少咸，配意粉就怪怪咁。之前多數係粟米忌廉湯，洋食飲麵豉湯好似唔多夾，粟米忌廉湯比較適合啲。飲品就要左凍檸茶走冰，正常好味。如果下次再黎，都係穏定啲，食番之前果啲就冇甩拖了。…Read More

我同媽黎呢度食下午茶已經係第二次啦，只有平日先至有下午茶套餐，唔駛諗食乜好，又夠晒抵食。我就揀左椰香咖央多士配馬來西亞熱拉茶 $26，加$15有埋檳城福建蝦油麵。媽話午餐仲好飽，只食椰香咖央多士配檳城熱白咖啡。我話加多 $15 可以有多一個麵食，而且平時都好少機會食馬菜。上次黎媽食佢食檳城福建蝦油麵同檳城白咖喱麵都話好辣，食唔到辣野。結果佢話點左招牌老鼠粉。檳城福建蝦油麵: 呢隻麵都算辣，且湯底算幾油，辣味蓋過蝦味，加埋油麵，更覺油膩。除蝦外，仲有半隻蛋、肉片同少許通菜，混埋湯底都幾入味，但真係辣左少少。招牌老鼠粉:  老鼠粉其實似係銀針粉，加上醃左嘅肉碎、葱花同青瓜絲，完全唔辣。肉碎醃入味，唔會太咸:)，落左葱花同青瓜絲，成個粉唔會咁 dry ，似台式魯肉碎咁，且令到成個粉更香口。我媽話食落似佢細個時食嘅狗仔粉。椰香咖央多士: 呢隻多士我覺得係必食，第二次食都好好味，多士烘完好香口，好脆。椰香咖央嘅椰香味好香濃，唯咖央真係幾甜。另真算幾細心，一份多士切成四份，細細件容易入口。檳城熱白咖啡: 香濃白咖啡味，可惜太甜，最好自己落糖。馬來西亞熱拉茶: 香濃茶味，同港式奶茶唔同，冇苦澀味，可惜太甜，都係自己落糖最好。有時間，值得再 encore。…Read More

中午時間黎親，通常都要等位，竟然今次一黎即有位。檀島雖有唔會套餐，其實黎黎去去都只係得麵類或小食，有時我都想係呢到可以有飯食下。我就揀左是日套餐o既黑椒叉燒豬扒炒意粉，朋友就揀精選套餐o既香草雞肉忌廉炒意粉。黑椒叉燒豬扒炒意粉:雖然係話配黑椒炒，一啲都唔覺有乜黑椒味，完全唔辣。意粉炒得都算幾乾身，o岩晒我平時少油o既習慣。意粉用左豉油炒，帶少少咸味，都OK。叉燒同豬扒都差唔多味，兩者主要靠豉油入味而已，肉質都算鬆軟。仲配有彩椒同冬菇絲，令成碟意粉唔駛咁 dry 。意粉份量算少，我食完都好似冇乜野落過肚咁。香草雞肉忌廉炒意粉:忌廉汁真係好 creamy，係呢度食咁多款，最好味汁醬，如果啲汁再杰啲就會更好。雞肉就有啲雪味，味道一般而已，都係靠忌廉汁吊味。意粉仲配有彩椒、蠔菇絲同洋葱絲，意粉就fresh 好多了:)。熱奶茶: 夠香滑，夠茶味，唔澀。…Read More

朋友之前黎食過，極力推介要帶我黎試。之前都去過九龍灣店，我就覺得麻麻地，份量又少，唔知呢間係唔係一樣?!雖然話呢間係台式餐廳，佢o既餐牌幾 fusion ，乜都有。餐廳剛好有個1週年午餐精選優惠，都算幾抵食。朋友就揀左牛肝菌汁牛柳粒牛乳蛋包飯，我就揀左日式咖喱汁吉列豬排牛乳蛋包飯。日式咖喱汁吉列豬排牛乳蛋包飯:蛋包飯其實只係一大片炒蛋舖係飯面而已，絶對唔係包住，蛋好滑:)。日式咖喱汁唔辣，甜甜地，下飯唔錯，豬排醃味唔夠，只靠日式咖喱汁吊味。吉列豬排炸得鬆脆，但唔夠熱，豬排已切成細塊，較易入口。最驚喜係配埋沙律，唔係沙律菜，係落埋沙拉汁，食落好fresh，好特別，食吉列豬排都冇咁熱氣。牛肝菌汁牛柳粒牛乳蛋包飯:蛋包飯算ok，蛋好滑，牛柳粒就有啲韌同硬，份量算ok，牛肝菌汁就似平時啲燒汁咁，食唔到菇味。配埋雜菜沙律，好豐富，夠健康，唔會只得啖啖牛柳粒。其中一個餐要左升級優惠，即加 $5有是日餐湯同蒜蓉包，飯已食完都未黎。曾經都叫過侍應，不過叫極冇反應，又係我睇你唔到。最後都費時摧，總之埋單時講明冇黎就算。…Read More

是日朋友舊曆生日，試下平時少去o既餐廳用餐慶祝，於是就去左抺茶館了。我地兩個都揀左特色定食，因定食包左五項，都幾豐富。我就揀左香葱芝麻生薑豬肉定食，朋友就揀左黑麻油濃厚豬骨拉麵定食。香葱芝麻生薑豬肉定食:  大大碟o既生薑豬肉，生菜份量唔少，配埋蕃茄，實在難得，宜家出黎食飯，好少有菜食。生薑豬肉醃得入味，薑味唔算好濃，配埋沙律菜，下飯，又健康，且白飯係免費加添，值得添飯，再添飯。配菜係蕃茄同少少辣味嘅芽菜仔，芽菜仔味道清爽，兩樣配菜攞埋黎送飯，都唔錯。豚肉野菜湯就一般，味精味好濃，飲唔到任何豬肉味。黑麻油濃厚豬骨拉麵定食:拉麵湯底黑麻油味重，不會太咸，又香又好味，其實都幾有味精味。薄薄o既日式叉燒有二片，叉燒唔算太肥，味道唔係太濃郁，配埋半隻溏心蛋，味道都算ok:)。拉麵麵身夠Q彈又爽，可惜份量較少，得半碗左右，男士食左都唔夠飽。三文魚壽司有二件，三文魚尚算新鮮。配菜都係少少辣味嘅芽菜仔，辣辣地湯麵味道更突出。炸雞有二件，炸得夠酥脆，算落得多炸粉，雞肉唔係 juicy 果類，攞出黎都唔多熱。冰綠茶: 我同朋友都揀左冰綠茶，天氣熱唔想飲熱野，餐廳冷氣凍，要求走冰，侍應又話唔走得冰，話少許冰，都比左好多塊。冇走糖啲綠茶都係淡淡，綠茶味亦係淡，抹茶館飲綠茶確實有啲失望。甜品: 是日甜品為日式年糕，年糕煙韌QQ不黐牙，年糕面蘸左砂糖同黃豆粉，甜味剛剛好，唔會太甜:)。服務就麻麻地，好難先叫到侍應，叫親都係我睇你唔到，我聽你唔到咁。…Read More

最近去過食九龍灣o既北海道牧場餐廳食下午茶，味道都算OK，係環境比較差啲，加上餐廳係報紙刊登一個月內o既優惠券，經過開咪可以平平地食下午茶餐。朋友午餐食唔飽，所以就揀左飽肚啲o既鮮魚湯雜菌魚丸米線配冰火山阿華田。我就食番上次o既火腿蛋三文治茶餐配熱奶茶。火腿蛋三文治茶餐: 三文治麵包鬆軟，炒蛋炒得都幾香滑，配埋火腿，好滿足。熱奶茶: 茶冇苦澀，落左奶都算滑。鮮魚湯雜菌魚丸米線: 湯底真係過得去，確實好有魚味，都算鮮甜，帶有少許辣味，仲有二舊西蘭花添。雜菌有冬菇絲同木耳絲，靠湯底雜菌就入味，魚丸就正常OK冇特別。朋友竟然飲晒成碗魚湯，真唔錯:)。冰火山阿華田: 特飲要加 $9，的確唔值，朋友話呢杯只係勁落阿華田粉而，冇特別，係普通阿華田 (即朱古力味)，後悔我幫佢點左。見其他食評都寫到好差，我就覺得下午茶就唔係所講到咁差，但冇優惠券我就覺得呢到貴左啲啦。…Read More

TKO Gateway Food Lane 開左後一直都未有機會試試，中午12點幾未算太多食客o既時間就先坐低了。除左午餐/晚餐餐牌外，主餐牌選擇都不少，唔想諗咁多當然係揀午餐/晚餐啦。水牛城雞翼就聽得多，但未食過，唔知乜味，又唔知辣唔辣?!  當然立即問侍應，侍應竟然唔知係乜味?!  侍應唔係淨識落單嘛?  再問第二個侍應都唔知，都幾失望。第一個侍應應該問左廚師，話有少少辣，咁我就照揀黎試試何謂水牛城味o既水牛城雞扒火腿飯配熱奶茶及西蘭花茸忌廉湯。朋友就揀左安格斯牛扒炒烏冬同熱奶茶。落完單叫侍應比二杯水，都叫左二次先至攞黎，服務真唔掂。水牛城雞扒火腿飯: 所謂水牛城汁只係似平時茶記食果啲燒汁，醬汁帶啲辣同咸，期望越大，失望越大，汁醬都尚算OK，冇話太咸。雞扒煎過香口，醮左水牛城汁都算OK入味，但雞扒太細塊了，仲細過塊豬柳o既大小。安格斯牛扒炒烏冬:  安格斯牛扒都煎得香口入味、鬆軟，烏冬以黑椒黎炒，一啲都唔覺好油。配以彩椒，感覺清新，更可用黎吸油，成個烏冬就唔會好油了。唯烏冬份量真係太太太少，似兒童餐份量，朋友話食完好似食左陣風，冇野落過肚咁，朋友仲立即話去第間再食過喎。西蘭花茸忌廉湯: 飲唔到西蘭花味，係有啲綠色點浮係湯面，湯飲落似飲生粉水，並帶少許咸味，完全唔掂。熱奶茶: 都算OK正常，唔會太苦澀。呢度廳對我黎講，一次就夠了，食物味道一般，份量細小。…Read More

每次黎親尚德商場，我必黎呢間餐廳食佢o既泰式下午茶， 好幾個月冇黎，餐牌都更新左款式了。但我就始終如一食泰式咖喱配手抓餅同熱奶茶，唯一唔同係之前一向食開黃咖喱，宜家餐牌轉左係青咖喱，餐牌都講明有少少辣，我就唔理一於試下。朋友就食香辣肉碎炒泰式金邊粉配熱鴛鴦。泰式青咖喱配手抓餅: 青咖喱汁好夠濃、好惹味，比起黃咖喱辣左少少，亦冇黃咖喱咁香，仲有幾舊薯仔食下，無論咖喱汁下飯定醮薄餅都咁。我最愛o既係呢度o既手抓餅，共有四片，唔夠可以 encore $10 有三片，但我今次就唔 encore了。手抓餅真係百食不厭，有牛油香味，餅又有少許酥脆且鬆化。香辣肉碎炒泰式金邊粉: 肉碎份量唔多，都算入味，仲有少少辣，金邊粉炒得油左少少。另仲有蛋絲、葱、芽菜同芝麻，令到個粉冇咁 dry，落左芝麻個粉更香、更惹味:)。我就覺得油就落多左少少，下次再食就要少油。熱奶茶: 香滑夠茶味，冇苦澀:)。熱鴛鴦:  正常及香滑。以係將軍澳站黎講，呢間星泰越餐廳不但價錢實惠，且真係食過番尋味。…Read More

與朋友聚聚，係開飯揾到呢間餐廳，見其他食評都大讚餐廳抵食又好味，就一於同朋友黎試試。午後輕食共有5款定食揀，價錢都只係$23 - $33，仲可以享用自助區無限添加白飯、味噌湯、椰菜同麥茶。我就揀左食天婦羅丼飯，而朋友就食三文魚壽司配烏冬。天婦羅丼飯:  炸物有六件，有蠔、矮瓜、青椒、蝦同番薯，菜類炸粉落得唔夠多，又可能炸好後放耐左，唔夠脆，只有蠔同蝦就炸得夠脆口。餐廳冇提供天婦羅汁醬，所以淨食炸物就 dry左少少，只食番炸物本身原味，確實唔夠味。白飯唔算熱，唔係珍珠米果種，但餐廳可以免費添飯實屬少有。天婦羅雖味道一般，賣相就唔錯，以包埋加一 $26黎講真係唔可以要求咁多了。三文魚壽司配烏冬:  湯烏冬有海帶、腐皮同魚卷，味道都OK，湯底唔算咸:)。三文魚壽司有三件，三文魚壽司當然係爭鮮o既質素，唔算好新鮮，以包埋加一 $26又確實唔可以要求咁多了。配菜有椰菜同海帶，都係自助區無限添。生椰菜絲冇提供任何汁醬，就咁食冇味，似食草咁。海帶就有調過味，帶少少咸味，用黎送飯都OK。味噌湯開頭飲都幾好味，後來就覺得似飲味精湯，勁口渴，落左好多師傅了。以咁超值o既價錢同環境黎計，餐廳算唔錯，可以好悠閒咁享受下午茶。…Read More

當日跟團體做義工，與長者係此中心寫美味人生回憶。此中心飯堂位於度假中心二樓，中午12:30開餐了，因為此飯堂有指定午餐供應時間，當日午餐提供六餸一湯 ，包括菠蘿肉片、清蒸龍脷、雜菜煲、白切雞、麻婆豆腐、郊外油菜，菜干豬骨湯及白飯任裝，每8人一圍，但我果圍得6個人，可以食多啲。 菠蘿肉片:  未食前係用碟蓋住，聞到味仲以為係甜酸排骨，原來係菠蘿肉片。肉片醃得入味，且好軟，切到薄薄一少塊。菠蘿、彩椒令成個餸好清新爽甜，好o岩宜家天氣熱o既時候食，食左個個都更加開胃。清蒸龍脷: 平時多數食龍脷都係雪藏，真係未試過攞黎蒸，且呢條龍脷完全食唔到雪味，龍脷柳蒸都好滑又夠味:)，亦都係好易入口，且魚柳冇骨，o岩晒長者食。雜菜煲: 有粉絲、紅蘿白、草菇、蝦米同白菜仔，煮得好林，對我黎講就淡味左少少，但對長者就好適合。白切雞:  肉質嫩滑，雞味濃，雞肉有彈性。好少可以係度假中心食到咁高質素o既白切雞。麻婆豆腐:  豆腐同鯪魚肉一齊蒸，冇話水汪汪，豆腐同魚肉味道調到o岩o岩好，下飯，亦都好適合長者食。郊外油菜:  清炒唐生菜，味夠，但對長者而言，菜硬左少少，難咬。菜干豬骨湯: 清清淡淡o既豬骨湯，味道剛剛好，唔會好淡，有媽媽的味道，飲左冇口渴。呢間飯堂絕對美味團體餐，係好質素，好味。…Read More