man_0919's Profile

同朋友食飯吹水，都好鍾意黎呢間餐廳食飯，皆因佢有早午下午茶晚餐都有餐食，想幾時食都可以去食，岩晒唔想煩食咩既我。呢次係食晚餐，剛好有位唔洗等。因為唔太餓，就點左個煙三文魚沙津，朋友就食卡邦尼意粉。我鍾意食呢間既蒜蓉包，脆脆地之餘，仲要成塊包都搽滿蒜蓉，大滿足而湯方面不過不失，紅湯帶點微辣，份量夠白湯香濃，配料都夠牛柳煙三文魚沙津，菜都新鮮爽口，肉比想像中大片，兩款肉加埋啲菜，岩岩好，係個沙津醬怪怪地，同煙三文魚同牛肉唔太夾，應該用沙津醋會好啲。卡邦尼扁意粉，朋友略覺得份量唔夠，但味道係幾好，汁都香濃，意粉硬度適中，配菜都夠。當晚食飯都滿座，侍應主動加水頻率都高，唔洗係咁叫人加水咁麻煩，所以去呢間餐廳食飯吹水係唔錯既選擇…Read More

朝早食完早餐行過金華，見到人流比上半年少，外面地下無左大大小小既喼，望上去一堆菠蘿包放係包箱入面，期待欣賞佢既人出現，然而等到紙袋都被油滲到開始透了。我決定買個黎懷念一下金華菠蘿包既味道。比完錢後拎個包上手，已經唔太熱，但皮依然係脆，包心都係飽滿，而唔係空心包，咬包果時包無痴牙，係麵團搓得好先唔會食到痴牙，食完有飽足感。食左咁多年金華菠蘿包，係份量比舊時細左少少之外，味道同飽滿程度係無變，加價幅度都唔高，有時食呢個菠蘿包，唔係貪佢特別好食或高人氣，而係變左一個習慣，每次經過，都會買個黎食，但只限於唔洗排隊既時候。…Read More

今日同友人慶祝生日，揀左呢間唔洗等位既邊爐食。呢間邊爐算新開，環境新淨，抽氣亦都好好，無太大陣既邊爐味。揀左$228既美國SRF和牛，揀左櫻花蝦沙嗲同豬骨湯，牛落櫻花蝦其實食落無咩特別，但落豬骨湯就覺得好食左。講完牛，就講下出面拎既食物，竟然見到有幾款炸物，仲要有三角薯餅又有湯飲。味道正常，但炸物唔係好熱，但都仲脆口，算唔錯。再望下啲丸，款式種類係偏向芝士，愛吃芝士既一定要試車打芝士丸，而個墨魚滑就一般，而其他配菜無咩特別。我飲個提子汁好淡，好似溝左好多水咁，雪梨汁就幾清甜。整體用餐感覺係良好，舒服，乾淨同唔算嘈，要讚下多數邊爐店放調味料既位都好多碎同豉油係地下，呢間就無呢個問題，普遍食下邊爐吹水係唔錯既選擇，希望可以一直保持下去。…Read More

好耐未去過深水埗，難得今日有事要去一轉黃金，突然口痕想食啲嘢，但又唔想食太飽，經過呢間雞蛋仔，寫住米之連一星街頭小食，岩晒唔太餓既我。咁多隻味之中，揀左原味，一底$18，平唔平見人見智，比完錢要等五分鐘左右先有得食，係即叫即整，好彩唔趕時間，咁玩下手機，好快就叫到我號碼。一拎上手熱燙燙，雞蛋仔面比較亮身，用手輕壓係硬。雞蛋仔係要等佢散走剛起熱板既濕氣，等佢表面脆同變硬先恰到好處，呢間有做到。先食一粒，面好脆，入面都飽滿同軟，每粒飽滿度平均，而連接每粒既薄脆都真係脆，加分。同北角雞蛋仔比較，呢間面層較厚，食落去脆得較明顯，入面軟糯，唔似北角既蛋糕口感，各有特色。係唯獨顏色唔均勻，同埋覺得蛋味不夠重，我比較鍾意蛋香多作為香港名物既雞蛋仔，算係唔錯，下次可再試多啲唔同既味道…Read More

今日工作忙得不可開交，連出去午餐既時間都無，在苦惱叫邊間外賣填肚既時候，同事話去加藤屋買外賣。在此之前，同類餐廳，我只係食過橙吉家，出於試新野同跟大隊既心態，就叫左個麻辣牛肉飯，個飯仲可以揀大中少辣，除左飯類款式多之外，真係估唔到連辣度都可以揀。食辣野當然配返杯可樂，無錯，係可樂，唔係百事。無耐同事返黎，遞左袋飯比我。而我望一望貼係膠袋上既單，外賣竟然平$5，減完個價錢都算貼地。望見個盒係鮮黃色，再加上紅紅可樂杯，在黃紅相映下，感受到加藤屋想係牛肉飯市場，展示出自己既與別不同，用顏色令食家係用餐感受留下一個獨特既印象。打開飯蓋倒下牛肉，徐徐用匙更撈下啲飯。但汁不夠多，唔能夠每粒飯都沾到汁。飯唔係粒粒分明之外，仲要有啲爛，扣分。食口牛肉，麻辣同牛肉出奇地夾，辣似麻辣燙果種辣，牛肉連飯一齊食，係非常惹味同好送飯，味蕾有種衝擊，我係食緊飯，唔係食米線既感覺。食完個牛肉飯，有種破舊立新既睇法，唔應該習慣消費特定品牌，應該勇於嘗試，對於食左十幾年同一間牛肉飯既我，有一番新體會，亦希望有更多既體會。的確食飯都可以悟出人生。…Read More

呢間餐廳，由佢新開張果時，已經開始食佢，主打日式西餐。質素算係同區附近算好，而lunch 價錢唔算太貴而有質素，環境亦舒服唔迫。呢次lunch 唔太餓，所以揀左食漢堡飽跟薯條餐。個餐有濃湯或沙津，仲有餐飲。濃湯夠濃，係每次必點。點解唔會點沙津呢？係因為個漢堡包係會跟埋些少沙津，感覺平衡一下腸胃。個包黎到，一望塊肉都好厚，比連所快餐啲足三両厚，佢都好細心咁有支牙纖吉係中間，包同肉易拎同唔易走位。咬落去係有肉汁，同彈牙，食到有肉既纖維同牛肉味，而唔係碎到散修修既肉，或者係用粉令到佢做到漢堡扒。食到中間，都忍唔住影相。伴碟既沙津係配埋自家沙津醋，非常開胃，粗薯係剛炸好，唔會加過份既鹽，可以食到外脆內軟而有薯仔味既薯條。唯一不足係有時會等十幾分鐘先會有得食，以午餐時間一個鐘黎講，食得有啲急。但即叫即製先可以食到有水準而新鮮既食物，呢方面睇得出其他食客都會理解，期待食物既來臨，亦係享受食野既一部分。…Read More

係太子普通茶記早餐多的是，黎黎去去都係食火腿通沙嗲牛麵，食都食到厭。而潮州粉麵開咁早，又有得食早餐就真係好少。呢日咁岩有時間，就去左呢度食個雲吞河做早餐。坐底完就好快點左野食，然後個侍應攝左張單寫住29蚊，有粉有熱飲，價錢算正常。等左一陣，碗粉同杯奶茶就送到，一望有四粒雲吞，啲粉同蔥蒜荽茜份量都夠。個湯清清地，加埋啲蔥有啲清香，雲吞蝦肉彈牙，皮薄無爛，河粉唔會太淋，飲埋杯正常味道既熱奶茶，簡直係一日既好開始…Read More