shamino's Profile

早兩個星期六去荷理活食日式一人火鍋，等位嗰陣見到隔籬新開呢間網燒，見佢平日啲午市定食都賣相唔錯，價錢都 ok，一直心郁郁想試。之後個禮拜即刻同同事報料有新嘢，醖釀咗一個星期，今日終於以即興形式拉埋兩位同事去試。話晒臨年尾工作量比較多，去食番餐好少少慰勞下自己叉吓電吖嘛。雖然係新開張，但去到坐低已經差唔多滿座。由於暫時未有訂檯服務，所以都係「早為上著」。呢間餐廳地座位好寬敞，我地一行三人坐張六人檯，加上地方又新，裝潢亦都好具日式味道，感覺非常良好。由於有優惠，叫咗牛腹胸、雞肉、牛肋肉同肩脊肉四款定食，其中一個免費。定食除左主打嘅一份肉之外，仲跟前菜，湯、飯同飲品。前菜係一碟三款嘅韓國泡菜（咦？網燒唔係日式架咩？)，味道不過不失。湯係牛尾湯，有牛肉粒同蘿蔔，幾清甜。落 order 時侍應會問埋你每個定食要鹽醬定醬汁，即係咩呢？哦，原來份肉上碟前會用其中一款醬料醃一醃，咁燒完就即刻食得唔駛沾醬囉。燒呢個過程其實好快，小心燒焦。咁多樣之中，雞肉算係最易燒，燒完雞皮好脆口，正！而牛肉方面，真係一分錢，一分貨。最平嘅牛腹胸當然係最煙韌，肉身較厚而肥榚較集中，至於貴丁點嘅牛肋肉同肩脊肉就軟滑很多。至於招牌金舌同和牛就未有機會試。雖然三人食四人餐，但啲肉都係唔夠食，幸好醬汁撈珍珠飯相當好吃，若果可以任添白飯就最更好，飲品方面質素一般，咖啡亦似乎唔係即磨。服務方面侍應態度都好好，落單嘅時候仲特登提我地有買三送一優惠。臨走前經理仲送咗左張會員卡我地，話下次散叫有9折添。唯一可以彈嘅就係食物上檯速度真係有待改善，明明係一碟碟嘅生肉，都要攪咗成十幾分鐘先上到檯，趕時間的話就分分鐘會激死。整體上講，午市定食以網燒嚟計真係好抵食。返到公司我地周圍同人講，大家聽完不知幾恨想快啲再嚟試試添！…Read More

尋晚約左班舊同學同老師食飯，事前有同學提議去咖啡弄，箇中短訊對話內容蹄笑皆非。除咗呢間Cafe 人氣旺盛之外，食物素質聽聞都略有口碑。有趣的是，餐廳嘅侍應同顧客才是亮點。當時心諗，唔通係啲，唔通係啲好似日本嘅邪氣 cafe，但又無理由丫，事關論討嗰陣啲女同學都無咩顯得反感。原先約 6:30，有朋友比原定時間早左大半個鐘，嗰陣拎位無難度，但由於大部份人都未嚟，而檯亦要90 分鐘還，於是叫知客畀住其他人入去先。入下一個又一個，最終都係決定轉移陣地去對面馬路間台灣上海菜食。食到中途再上返去咖啡弄拎籌，食完飯差唔多近九點，點知仲未叫到，結果等到9:30 先入到去。雖然等得耐，但由行樓梯見到排晒隊，跟住同操國語侍應拎籌嗰陣，我就好似有啲了點解啲人做乜肯等位等咁耐⋯⋯ 這種感覺，要親身體會一下先得。聽講，咖啡弄係來自台灣。朋友話喺台灣咖啡弄係唔駛等位嘅，但香港就等到頸都長。明・沈璟《埋劍記·柔遠》：「自古道物離鄉貴，人離鄉賤；這語話，信非假，到如今轉憶家。」就是這個道理。我有理由相信，大部份侍應生都係來台灣，都係後生仔女，加上整間 cafe 的顧客都係年輕人，整間 cafe 比一般 cafe 足滿住極濃厚嘅青春氣色。連間唔時會畀小朋友叫叔叔嘅我，都突然覺得年輕咗十年。另一亮點係，感受台灣年輕人嘅文化。喺香港，無論大型連鎖店，或者小型上樓 cafe，招待顧人的一套用語彷彿從錄音機播出的，太 standard、欠缺語氣上變化、甚至有點型式主意，了無生氣。因此對於呢度侍應嘅招待，會頗有新鮮感。可能因為我少接觸台灣人，又或我未去過台灣嘅原因。由於大家都食飽先嚟，都只叫左杯飲品傾下計。其間，有兩三個侍應走嚟問我地駛唔駛叫小食。若果換著係港式餐廳發生，我一定會覺得佢地想 hard sell。而今次，我會認為係大家文化嘅差異，又或者佢地真係好奇怪我地做咩唔叫小窩夫三文治小食，都幾有趣，亦唔會覺得反感。順帶一提，侍應係同你講國語嘅。國語唔流利嘅我，尋晚竟然爆發小宇宙，流利左一番。…Read More

話說早幾個禮拜樓下幫襯開呢檔街頭小食舖既老闆，突然講話會休息兩個禮拜裝修。當時我都打個突，心諗裝修都好既，舖面望落會整潔啲舒服嘛。點知過左個幾禮拜都無咩動靜，差啲以為佢唔做，少咗檔咁多香港街頭小食既檔口會好可惜架嘛。最後過左兩個幾星期，見到遠處有檔新開張，門口放晒花牌祝賀。再望真啲賣啲咩同班伙記係咩人，發覺原來係係街頭小食呢檔搬左舖位。第一時間，梗係買番個炸蠔餅，止下癮先。其實尋日中午嗰餐先食完生蠔嚟，今晚再食蠔仔。一個貴，一個平，但都同樣好味。美味，真係可以好簡單。呢期啲蠔仔好鬼肥，望見到流口水。老闆「蠔餅專家」話啲蠔仔呢期「當造」喎。今次叫左老闆幫我加啲碎芫茜一齊炸。蠔、芫茜、葱花幾種都係帶有腥味既食材，炸完加上胡椒粉，真係香到街尾都聞得到。正常老闆炸啲蠔餅係炸完先加芫茜的，但我覺得加埋一齊炸會有多陣清甜味，正！由於未食晚飯，今次加左幾串串燒。唔知係咪街頭本身有檔都賣串燒有競爭，感覺上依家好似大串咗，幸好價錢不變。所以話，有競爭，先有進步。當然，最開心嘅梗係消費者啦。除此之外，可以挑剔下嘅就係，好多時佢啲串燒已經係燒好咗放喺度，好處當然係客人可以快啲買到唔駛等咁耐，但唔好嘅係，翻燒的話啲肉質有時會乾身咗少少，比著我就寧願等耐啲嘞。仲有，我個人較喜歡啲肉唔好醃得太重鹽，否則會蓋過咗本身肉味同沙嗲味整體上就會缺少咗份鮮味了。…Read More

十幾廿年前住友愛村，一過十點 D 車仔檔就會出黎聚集o係友愛村巴士站一帶做生意，印像中最繁盛時期至少有三十檔以上。有賣衣服玩具日用品等乾貨，而熟食檔種類非常多，除左煎釀三寶同滾魚彈牛柏葉水魷之外，另外仲有炒河粉麵、車仔麵、清湯牛丸豬肉丸（以前啲粒粒手打既好香）、沙嗲串燒、雜果涼粉珍多冰、自製燒賣粉果牛肉球、豬腸粉、格仔餅雞蛋仔、炒雞翼尖、炸蠔餅、炸大腸等。雖然呢啲嘢好似大部份依家都有人賣，但當年o果種成條街都係車仔檔，人多擠迫得好比會展美食展既「繁華」場面已經不復再。可能因為再無機會再食既關係，又或者依家間間賣既工場大量生產既貨，硬係覺得以前嗰啲好味好多。當中炸蠔餅係我既至愛，而食蠔餅呢個習慣係老豆影響既。最初食蠔覺得陣味好腥，加上生蔥花芫茜o係面頭簡直腥上加腥。蠔，正如芝士紅酒、黑松露、榴槤、海膽等，當你懂得欣賞箇中獨特味道既時候，就係你上癮之時。呢檔小食檔開業已經有一年，最初佢掛個牌寫住「蠔餅專家」四隻字，我走去問老闆講笑話：「專家咁勁呀？」傾左幾句發覺原來佢係以前都有o係友愛村度賣炸蠔餅，當堂覺得倍感親切，夜晚放工就算唔幫親，見到都會打聲招呼。以一個炸左十幾廿年蠔餅既人來講，「專家」二字當之無愧。講番正經，我試過好多潮州打冷、廟街、酒樓既蠔餅，我對蠔餅自問幾有要求。呢檔賣既蠔餅真係幾有水準，好過廟街好多檔同好多打冷檔。要知道人地賣炸蠔餅只係店內其中一樣食物，而佢專心一意賣炸蠔餅，原先只得 80 分，我都會比多 10 分佢。這 10 分，就係畀佢既敬佢既專業，同街坊食肆嗰份人情味。講到咁好，點解都唔比滿分呢？無他既，o係我心目中最好既始終係細過夜晚老豆加班買番黎屋企o係底蠔餅。另外，好似所有食肆一樣，佢每次整既，水準間唔時都有上落。有時整得餅底鬆軟香脆，蠔仔又夠香又 juicy；而有時食落就一般般。總體上都係值得返轉頭幫襯。仲有一個貼士，就係我會叫老闆落芫茜去粉漿度一齊炸，芫茜碎炸過之後有清甜味道，好夾蠔仔陣味的。另外老闆問要炸得脆啲定要淋啲既時候，我會選擇淋啲，咁啲蠔會 juicy 啲架！…Read More

o係香港，一講食日本野，應該有唔少人都會有多少去食高尚野、貴野o果種虛榮。這可能源在日本國土的食肆，人地真係大至裝修佈置，及至一烹飪細節上都會花左唔少心思，加上消費物價指數整體都高於香港，連o係街邊食碗拉麵都可以成舊水都係普遍事。o係香港？樓下食碗$20 既雲吞麵，分分鐘都比客人話貴。福島核事故後，一向都以（／扮）日本進口食材自居的日本野舖頭，都立即貼上告示同日本食材劃清界線，由日本料理食肆，「正名」為日本＊製法＊料理，看見香港食肆老闆靈活拆招值得稱讚，但亦同時揭露了，以前大家比貴o的諗住食日本進口食材的同時，其實背地裡也只是給你其他地方進口的較廉價貨。世上沒有幾多個食神，沒太多人會真的分出食材的質量。食野主要功能是填肚子，其次是作為一種社交功具，當然亦有人希望藉此去享受生活。回說正題，八王子拉麵在這裡食評不算差，讚多彈少，加上團購廿多元的價錢，亦都值得一試的。一坐低，Waiter 就說沒有牛朋清湯底，好似話未煲好。o下？拉麵湯底不嬲係成碗麵既精綷，傳統係要用真材實料煲十幾個鐘先得既。我食o果陣下晝六點，佢竟然話未煲好？！早排睇報紙講話某拉麵連鎖店被發現部份湯底也只是使用濃縮湯底，提醒自己「一分錢一貨」定律，估計行內大多數的做法也差不多，令人懷疑佢呢度係咪唔想比o的成本高既湯底我，而淨係比超市都買到既豬骨濃湯濃縮液開水比我算。我同朋友叫了豬組拉麵和玉子拉麵。兩碗拉麵配料都好足，都有半隻溏心蛋，芽菜、魚片、昆布等。豚組即係豬肉粒，佢有烤過，幾香幾軟。而玉子拉麵就多了一隻溏心蛋，加幾片好好味既煎香左豬頸肉片，好好味呀！環境方面，我這副著XL 碼的身驅似乎要坐上 M碼的桌椅的確擠了少許，由於椅背和椅背差不多是對靠的，背囊或袋子也只可許在大腿上，坐得不太舒服，冷氣又很弱，吃很我同朋友都成頭汗，不知是否老闆想著人客吃完快點走做多兩輪生意的鬼主意呢？唔好當自己做梗賣$10 雲吞麵先得架！…Read More

早兩個月上網見到呢個鐵板餐團購，見到佢廿九蚊，就算唔好食都唔會點蝕底，於是一口氣買左幾張coupon諗住下次同朋友re-u 食。丫，點知re-u 前一日想去book 已經full 左，o果次結果就揀左去第二度食。事隔一個月又心血來潮，再約另一班朋友去食呢個平價鐵板餐。心諗有咁多人買左團購，實有人去完之後o係呢度寫食評既。嘩，一睇就不得了囉。心諗死勒，篇篇都係喊晒口咁濟，點算好？唯有不斷咁同自己講，廿幾三十蚊一個鐵板餐，都唔好咁高期望啦。好彩今次約呢班都唔會好港男港女性格，就算唔好食至多比人即場鬧兩句，唔會事後背後唱你一大輪話你貪小便宜厄人去咁咁咁。正如其中一位朋友講：o係大O樂一個鐵板餐都要四十幾。對我黎講，食抵食先係開心既。出發前，我已經叫左朋友們睇一睇人地o的食評，留意下要額外加費既地方，有定個心理準備。雖然o的食評批評得有o的負面，但其實睇真又真係有o的好笑。我真係未聽過鐵板餐轉第二隻汁係要加錢 ($3)，薯菜轉飯或意粉又要加錢 ($5)。雖然個團購優惠真係算幾平，算係種幾好o既宣傳，但太計較反而令到顧客食左一次就唔返轉頭，仲分分鐘比人唱衰個招牌，就真係因小失大。團購鐵板餐有六款揀，跟湯及飲品，看過食評的我們都不願冒險吃牛扒，點了雜扒、雞扒和豬扒餐。白湯配料較少，幸運的話，會有機會吃到兩、三粒雞肉，素翅或紅蘿蔔碎，而紅湯正如其他食評所寫較稀，但蕃茄味、酸味仍是有的，算上有一般快餐店水準。鐵板餐方面，我們全都要了不用加錢的燒汁和薯菜。說真的，鐵板上桌時是熱辣辣的，有煙霧出，吃薯條配菜時也熱到唔可以即時放入口。至於份量方面，其實和市面一般快餐店茶餐廳食肆差唔多。配菜每份有大約十條薯條及總數8粒翠肉瓜及紅蘿蔔，女士吃絕對足夠，男士吃的話就真係爭少少。咁梗係啦，通常呢o的餐最飽肚係碗飯架嘛，佢其實比多一倍薯條或者比多少少飯就已經可以令到顧客飽番晒，要知道成本最貴係o的扒，飯意粉根本都唔值錢，依家扣減左最唔值錢既飯，攪到有人食唔飽o係度嘈既話又有乜為呢？ 飲品方面，我們全叫了凍檸茶，屬正常水準。講真，就就係貴價餐廳，o的檸茶奶茶其實都係差唔多，都冇咩話特別好特別差。最後埋單每個餐比番$3 服務費，即係連團購價錢 $32 一個餐。其實只要安份守紀，唔好轉汁，唔好硬係改飯或者意粉，唔好當自己去左高級餐廳或者酒店食梗餐，比番$32 一個餐既價錢真係已收貨有餘啦！老實講，平時下晝去食個碟頭飯都要三四十蚊。晚飯時間 + 尖沙咀區 + café 環境，佢平時正價五十幾蚊都真係叫公道啦！總括來說這個團購餐算抵食，雖未至於話有驚喜，但至少唔會話失望而回。由於食團購餐，未有機會試佢有o的咩特式食物，所以都唔會話會推介，但若果行過呢頭搵個地方坐下食下野傾計，呢度都唔會係一個令人抗拒既地方，當然若果山長水遠特登黎既就唔會啦。…Read More

龍門居呢頭出名小食宵夜選擇多，除左煎釀寶寶、車仔麵、夾餅雞蛋仔、師奶方便小菜、即炒粉麵飯、粉仔碗仔魚翅、炸雞印尼串燒乜都有。咁多年黎好多唔同既小食店出現過，但唔係間間都做得住腳，主要原因就係好多都缺乏新意冇賣點，又或者客路少。呢間老朱o係呢度都差唔多有十年，算係老店之一。老朱以前淨係賣早餐，主要賣豬腸粉、炒米炒麵，同皮蛋瘦肉粥；呢兩年可能經濟差左，或者毛利少左，依家做埋午市夜市宵夜市，夜晚就主打賣生滾粥，見幾個老細由朝做到晚真係都幾佩服。見佢地通宵咁整幾百粒燒賣肉牛第二朝賣，都真係唔敢再同人講自己返工辛苦。呢間舖頭無裝修可言，舖頭大部份空間都係廚房，食物就o係門口賣。門外望入去，話好衛生就講唔上，但考慮到間舖做左咁多年，都好正常，最梗要就係食左咁多年都未試過有肚痛，所以都冇問題！舖頭冇堂食，只有外賣，o的客多數都係買完趕住搭車返工，所以唔覺有咩問題。不過舖仔雖小，但服務真係無得彈！買腸粉買炒麵，佢實會問駛唔駛加甜醬辣醬芝麻等等，要多要少，個個客人都問足呢幾句。有時間o的熟客o黎買，佢仲會記得佢地o的喜好。要知道你只係買梗 5蚊 7蚊野食，所以佢地呢種服務態道真係無得彈！腸粉最梗要係腸粉夠熱夠軟，醬料好味，佢完全乎合到（但晚市可能去貨慢，有時會蒸耐o左硬身o左少少）；而炒米粉炒麵方便，佢既正常份量係會爆滿一個飯盒，攪到我每次都要同提佢幫我「扣底」，而佐料都好豐富，有好紅蘿蔔絲、椰菜、炒蛋，仲有大大粒既午餐肉！咁都不特止，佢仲要比個飯盒你裝住方便食，都$7 ，抵到宇宙大爆炸！另一特式小食係佢既自家製燒賣同牛肉球，燒賣$5 三粒，用料口感味道都好過平時街買o果o的，牛肉球就大到好似個乒乓球咁大，一串兩粒都係$5，基本上四粒就夠飽。自從上開市區o的茶廳餐o的早餐脹價超過廿蚊心理關口位之後，早餐我就多數幫襯佢。正當出面舖頭都仲大幅加價，佢仲維持梗幾蚊幾蚊既價錢，就有咁好既服務態度，真係無得彈，難得難得！係現今大財團既攏斷底下，呢類小店真係藉得大家多多支持。咁多年o黎o係 Openrice 都冇建樹既我都覺得係時候做番o的野，寫番篇食評去表揚一下呢間老朱先得！…Read More