marydy's Profile

其實係我錯，我無食呢間舖出名食芋頭，而走去食綠茶雪花冰，所以覺得$148呢個冰真係唔多值，裡面有紅豆同珍珠，味道是ok的，但$148在同區有更多更好選擇。都應該唔會再有下次。…Read More

見到咁多好評，心諗，無死啦，一定會好食，唔會差得去邊嘅！咁我就滿懷期待咁走嚟買咗個海苔肉鬆bagel, 未食之前已諗定下次要買埋紅豆抺茶bagel同酸種麵包試，點知食咗一啖後，呢個念頭響腦海中就隨即飄到世界另一端，個bagel 咬落既唔厚實又唔煙韌，只係覺得乾同韌，感覺有啲柴皮，又或者可能係我無即場食，隔咗兩三個鐘頭先食呱....但即使係呢個關係影響質素，我都說服唔到自己再買多次嚟試，廿幾蚊會有更好選擇。…Read More

無論天氣幾熱都唔會影響到想麻辣火鍋嘅心, 是夜又拉隊烚烚吓啦...麻辣鴨血豆腐湯底無走雞, 另一半配白肉酸菜試吓, 白肉係豬五花, 唔太肥, 有D白軟骨黐住, 好有咬口, 正! 湯底越滾越濃郁, 我哋仲免費追加咗一份酸菜白肉, 食到尾聲就真係重口味咗D啦!蟹子墨魚滑 - 呢個墨魚滑堅彈牙, 所以一嚟到就同朋友講必選架啦, 果然無失望, 墨魚爽口又彈牙. 老油條 - 炸到實實嘅一條老油條原來打邊爐係好好食嘅, 只要烚幾秒就得, 食落香脆可口, 食到唔停口呀.厚脂黑毛豬梅花肉 - 雖然話係厚脂, 但其實一D都唔肥, 肉質嫩滑, 唔會UN.日本山藥 - 一向喜歡食新鮮山藥, 用嚟打麻辣火鍋就最好不過, 吸收晒湯嘅精華, 非常惹味. 海中蝦 - 新鮮又大隻, 蝦肉扎實又鮮甜.即炸脆響鈴 - 新鮮即炸, 非常薄脆香口.今晚又食到捧住個肚走啦!!!!!!!!!!!!!!!!!…Read More

4月頭放假後仍然keep 住 holiday mood, 放工約埋朋友繼續去享受假期餘溫…我哋果然無揀錯, 店內環境擺設都頗有特色, 令人心情愉快.Gazpacho & Tortilla – Gazpacho 係一個蕃茄蔬菜湯凍湯, 味道甜美, 非常醒胃. 而 Tortilla 西班牙蛋餅就整得幾juicy, 薯仔洋蔥十分香口. Tomato Toast – 脆脆多士上面有新鮮蕃茄蓉加上橄欖油香, 食到停唔到口呀!Deluxe Jamon platter 分別有Serrano ham 24 months, Iberico Ham 48 months Jabugo, 54 months Extremadura 同60 months Guijuelo, 而sausage 就有3款, 個人當然比較喜歡食ham多D, sausage 味道感覺會偏咸. 60 months嘅Guijuelo 真係無得輸, 味道香甜, Extremadura食落就軟滑D, Jabugo 帶點點果香味, 真係各有千秋.Baby Lamb Rump – 羊肉肉質柔軟, 味道羶香, 伴碟蔬菜新鮮美味.甜品是rice pudding, 賣相不錯, 點住支玉桂條上枱又幾得意喎, 米布甸咬落煙煙UN UN, 有D似薏米咁, 呢個甜品幾好食喎.…Read More

之前買過muji出品嘅麵包，覺得幾好食，所以一路都想試埋餐廳嘅食品，擇日不如撞日，見有個幾鐘空檔咪中入嚟試試囉！天生餓底嘅我揀咗2冷盤2熱食嘅set, 加$15有埋咖啡。冷盤-波菜芝麻豆腐，波菜一d都唔會鞋口，豆腐軟滑配上芝麻香，好清爽嘅前菜。而南瓜沙律都好新鮮，醬汁酸酸甜甜好開胃。熱食揀咗炸雞同排骨，肉質同味道都ok嘅，未見突出，而且食物溫度都唔多夠。主菜外可配麵包，白飯或十六穀飯，我就揀咗十六穀啦，感覺上比較健康，食落有軟，有un嘅飯粒，非常不錯。整體覺得冷盤比熱食出色，或者下次試吓甜品得唔得啦！…Read More

開年食好D食飽D, 搵個坐得舒服嘅地方同朋友仔食番餐先. 陳醋海蜇頭 – 陳醋香味濃郁, 配上爽脆海蜇頭, 十分惹味醒胃.海鮮酸辣湯 – 酸度溫和, 帶點香辣, 海鮮用料十足, 木耳, 荀絲切得很仔細, 仲有咬口彈牙嘅蟹肉, 味道用料都頗出色.酸菜桂花魚 – 桂花魚肉質細嫩,酸湯菜香甜鮮美,辣而不膩, 配菜大大條嘅薯粉亦好有嚼勁, 非常開胃。公館炒飯 – 炒飯粒粒分明, 配料十足, 芥蘭蟹子嘅爽脆配上新鮮幼滑嘅海膽, 鮮味十足.XO醬粉絲大蝦煲 - 大蝦肉質新鮮彈牙,粉絲吸收晒蝦汁鮮甜及XO醬香辣惹味,非常滋味可口.瑤柱蟹肉豆苗 - 大大碟豆苗新鮮翠綠, 清甜美味.…Read More

同朋友一年一度做冬，梗係要食好d啦！呢排食得太多中餐小菜，所以我哋就搵間日本磯燒試吓。先嚟個沙律醒醒胃 － 磯野火灸刺身沙律 － 真係好開胃，新鮮嘅沙律菜加埋酸酸哋嘅醬汁，再加埋粒粒芝麻好香口。刺身就大大件又夠新鮮，蝦肉彈牙鮮甜。鐵罐酒煮白貝殼－ 白貝煮得剛剛好，鮮甜帶點清酒香，貝肉鮮嫩香甜。深海池魚刺身 － 刺身魚肉嫩滑鮮甜，魚油唔太肥膩。日本海膽味噌甲羅燒 － 松葉蟹膏＋觸肉＋北海道馬糞海膽嘅甲羅燒非常美味，海膽仍然保持濕潤香滑，配上梳打餅非常可口。北海道毛蟹 － 啖啖肉，蟹味鮮甜，蟹膏甘香。黑豚肉紫蘇卷 － 黑豚肉表面燒得香脆，咬落內裡仍保留到肉汁，唔錯唔錯！蕃薯雪糕 － 好濃郁嘅蕃薯味，清甜軟滑，好似食緊雪凍咗嘅煨蕃薯咁，好有趣。…Read More

朋友嚟中環做開嘢, 相約一起晚飯, 唔想同人迫, 行上少少食上海嘢, 傾到計又抵食. 兩個人本來話食少D當keep fit, 點知叫叫吓都叫咗唔少嘢....脆皮素鵝, 回鍋肉炒年糕, 煎餃, 醉雞同荳沙鍋餅...果然天生餓底!脆皮素鵝 ($58), 即叫即煎, 嚟到熱辣辣, 皮香餡爽口, 蘿蔔絲, 冬菇絲, 雲耳絲清甜爽口, 一D都唔肥膩.回鍋肉炒年糕 ($89),  豆瓣醬味道濃郁, 五花腩肥瘦適中, 我就最鐘意個年糕啦, 咬落煙煙un un, 十分惹味.煎餃 ($38), 呢度最好係樣樣食物都夠晒熱, 煎餃又係熱辣辣上碟, 肉質嫩滑帶有肉汁, 餃子皮底亦煎得香脆可口.醉雞 ($75), 涼涼嘅醉雞肶咬落啖啖肉, 帶點微微紹興酒香, 食食吓又KO咗成碟.荳沙鍋餅 ($40), 份量十足嘅荳沙鍋餅, 厚厚荳沙蓉, 甜度剛好, 餅皮煎得剛好, 十分香口.另外一提, 呢度嘅服務員十分友善, 令人感覺好似當我哋係熟客咁招呼, 又不時幫我哋添茶, 不失為聚餐好地方.…Read More

吃貨們好耐無聚, 今晚約出嚟吹吓水, 途經去朋友家附近嘅天山小館, 吃貨們最愛試新嘢, 當然二話不說入去坐底啦!先來酸菜魚, 味道酸中帶點點香辣, 味道唔錯, 好惹味, 至於魚方面就有驚喜, 因為係用龍躉魚煮, 魚肉非常爽嫩, 味道鮮甜, 酸菜唔會死鹹.跟住嚟嘅新彊手工羊肉餡餅都好有驚喜, 估佢唔到咁香口, 餡餅皮非常香脆, 但唔會好油膩, 羊肉餡十分多肉汁, 而且羊騷味濃郁, 肉質扎實彈牙嘅羊肉配埋香口嘅洋蔥粒, 真係啱晒愛食羊嘅我. 再嚟新彊手抓羊肉, 原汁原味羊肉無得頂, 肉質鮮嫩加上夾雜羊膏脂肪, 咬落啖啖羊騷味...而家諗起都回味呀!!最後嚟個大盤雞半隻, 原來半隻份量亦不少, 除有蕃茄同薯仔, 仲有手拉麵響底, 本來之前想叫個新疆手拉麵嘅, 但店主同我哋講大盤雞有麵底, 食咗先, 唔夠再加, 終於明白佢點解咁講啦...因為份量的確係名副其實幾大盤吓. 大盤雞帶點辣, 雞肉夾雜住蕃茄嘅鮮甜味, 薯仔亦煮得非常腍. 至於手拉麵果然出色, 麵質好有彈性, 咬落煙煙un un, 有D似上海年糕, 又有D似刀削麵咁有咬口.今次可惜嘅係我是晚狀態不佳, 所以未能再試埋其他川菜小炒. …Read More

朋友仔生日, 見呢間台式火鍋幾特別, 剛巧麻辣癮又發作, 所以約嚟試吓先...女人當然要懂得補一補啦...所以湯底除咗揀台灣必食嘅麻辣鍋外, 見到美人鍋寫住女仕養顏至寶喎, 咁無走雞就揀佢啦!! 麻辣鍋揀咗小辣, 唔太食辣嘅朋友絕對能接受, 如愛辣者要中辣以上, 湯底同台灣嘅一樣有各種藥材香料同鴨血, 凍豆腐, 雖然唔似台灣有無限refill, 但都可以免費追加一份鴨血, 我哋兩個人食, 其實唔追加份量都足夠. 鴨血非常之軟滑清甜, 凍豆腐吸收晒湯底精華, 好惹味!至於美人鍋都好足料, 湯頭非常甜, 湯料有桃膠、紅棗、杞子、桂圓、淮山、黨參、烏雞, 真係好足料, 杞子同桂圓非常之甜, 烏雞肉質紮實. 火鍋料我哋揀咗御選梅花豬$108, 豬天梯$88, 炸響鈴$58, 鵝肝墨魚丸拼黑松露蝦丸$48/$48, 萵荀$48.御選梅花豬肉質娕滑, 一D都唔肥, 值得推介.豬天梯都幾爽口, 不過略為切得大件咗D.炸響鈴原來係即叫即炸嘅, 非常新鮮好味, 只需要閃浸2秒就食得.至於鵝肝墨魚丸同黑松露蝦丸, 我個人比較喜愛鵝肝墨魚丸啦, 真係估佢唔到會咁彈牙, 下次去都係必叫項目.   黑松露蝦丸咬落就比較鬆散.萵荀係打邊爐佳品, 吸收晒湯底精華, 而且呢度嘅萵荀都好新鮮同娕, 唔會起晒渣咁先好食架嘛!!呢度醬料係自助形式嘅, 想要多多都得, 自己去醬料部任攞!! 另外一點令我滿意嘅係呢度嘅座位與座位之間都擺有屏風, 感覺上提高咗私隱度, 啱晒慢慢烚慢慢傾. …Read More

大熱天時，真係無時無刻都想飲凍嘢！途經coco espresso多次都無機會試，今日終於有機會嚟飲番杯冰咖啡消消暑先！iced long black 話咁快到手，隨即直灌入口，冰涼爽快，咖啡唔太濃厚，味覺不苦澀，帶頗重酸味。飲完感覺無咩咖啡回甘留響口，相信未必吸引到再回頭品嚐。這杯冰咖啡價位不算太便宜， 一杯普通size ，冰塊佔半杯，大熱天時飲快兩啖，話咁快就KO咗杯咖啡，收費$42個大洋，中環就是這個收費吧！…Read More

今日幸好有朋友排隊攞位，所以都可以食到一向午餐時間大排長龍嘅kikusan，我呢個魚生怪當然叫個魚生飯啦！魚生有三文魚，油甘，甜蝦，蟹子，三文魚子，吞拿，多款刺身都非常新鮮肥美，除咗有魚生外，面頭灑上天婦羅炸漿脆脆，食啖啖肉刺身時又咬到脆卜卜脆漿，非常配合！另外呢個kikusan roll 真係要推介！$68食到大大行海膽再加充滿油脂嘅拖羅碎，仲有粒粒新鮮飽滿嘅三文魚子，配上芝麻香，的確十分美味。呢個kikusan 卷果然比足料唔怪得成日條龍都咁長啦！…Read More

今日個人懶懶哋, 唔想走來走去, 所以決定去小甜谷啦! 因為一個地方可以滿足兩個要求, 晚飯+甜品, 非常方便.懶洋洋叫番杯blood orange fruit soda 嘆吓先, 味道清新配埋有粒粒生果肉, 好啱炎炎夏日用嚟消暑!! 透心涼唔好比佢停, 接住食個泰式柚子海鮮沙律, 蔬菜非常新鮮, 海鮮有蜆肉, 魷魚, 彈牙大蝦, 加上少少酸甜醬汁, 非常開胃!! 主菜我哋揀咗胡椒蜜糖豬仔骨, 平時食bbq醬烤豬仔骨就試得多, 今次呢個胡椒味又幾特別喎, 胡椒味好醒胃, 減低咗食豬仔骨經常食到好漏嘅感覺, 豬仔骨亦烤得啱啱好, 肉質軟腍. 好啦好啦! 甜品出場啦....培茶心太軟!!呢個甜品真係好"流"!!!!!! 一切開D餡就好似熔岩爆發咁勁流出嚟, 係咪真係要話佢堅流呀, 哈哈哈!!  食落都無失望喎, 啖啖都充滿香濃培茶味, 配合埋冰凍雪糕,紅豆溶仲有脆脆綠茶粒粒, 真係一流一流!!!!…Read More

是夜又韓癮又發作, 朋友推介嚟舊店響西營盤嘅seoulmate cafe.  炎炎夏日先叫杯柚子椰沬飄雪啖吓先, 柚子清新微甜, 加點點椰子味覺得有D泰FEEL, 雙重清爽嘅感覺, 透心涼!!好彩我哋一心要留肚食甜品, 所以主菜只叫兩樣, 份量十足, 先來kimchi cream pork pasta, 意粉煮得軟硬剛剛好, 因為加咗cream中和咗泡菜嘅酸辣味, 食落又好夾, 一D都唔會覺得漏. 炸釀雞卷配秘制韓式醬汁, 雞卷切開時D肉汁好似溫泉蛋咁流出嚟, 未食都已經覺得juicy啦, 咬落肉質幼滑, 再加上包住粒粒薯仔肉, 又有沙律醬同蕃茄醬, 十分惹味.  甜品時間到啦, 朋友話呢度嘅紫薯芝士蛋糕無得頂, 咁當然要試吓啦, 好可惜我同佢緣慳一面!! 竟然賣晒!! 唯有下次早D嚟試吓先得. 今次就試韓國荷蘭寶寶班戟同K爆米餅雪糕配柚子芒果啦.    韓國荷蘭寶寶班戟 - 新鮮滾熱辣成個煎pan上枱, 店員教我哋首先搽牛油, 跟住灑糖霜, 再落檸檬汁, 自己落又幾好喎, 可以隨個人喜好調交, 即使係同枱食飯嘅朋友, 口味都未必百分百一樣架嘛! pancake煎得薄薄哋, 蛋味香濃, 加咗檸檬汁即刻又覺得好啱夏天呢個時間食, 酸酸甜甜, 唔錯喎!我好LIKE個K爆米餅雪糕配柚子芒果, 塊米餅有D煙UN, 但我感覺又似食緊炸豬皮咁, 好得意, 配埋雪糕同柚子芒果, 味道清新, 甜度適中, 下次嚟除咗要試佢紫薯芝士蛋糕外, 呢個都列入encore list度架啦.…Read More

同事約我食快餐喎, 點知原來係去食優雅嘅法國漢堡包...嚟到好好彩9秘9搵到位, 我哋二話不說鎖定目標就係試個羊堡堡啦, 我哋叫一個 little combo (漢堡+薯條+飲品 $160), 另一個就散叫漢堡+飲品 ($120+$35).  羊堡我哋要medium well , 但係我哋就覺得係well done, 因為係免治關係, well done都唔會搞到D肉好un嘅, 夾住嘅茄子同芝士都幾juicy, 包身軟綿綿, 而且醬汁唔會多到浸死包, 配合得剛剛好. 至於薯條方面就比較失望, 無咩特別, 同埋唔夠脆口, 腍腍哋. 反而支法國傳統 Lemonade archibald fernand elixirs又幾好飲喎, 有氣唔太甜, 好清爽, 配漢堡一流.整體算OK, 但相對價錢略高, 試過就算啦...…Read More